مش زى الافلام :
أنا نـدى ٢٥ سنة ، من صُغر سنى وانا مهووسة بـ الافلام والقصص والاغانى الرومانسية ، كنت بـ أعيش قصة حب مع كل بطل فيلم او مسلسل حتى الاغانى كنت بتخيل ان المغنى بيغنيها ليا انا اتهووست وكان قلبى على تكة عشان يحب ويتحب ويعيش قصة حب زى الافلام ... ... ....
كبرت ، دخلت الجامعة وكنت متوقعه انى اول ما هدخل الجامعه هلاقى فارس احلامى مستنينى عشان يقع فى حبى من اول نظرة -زى الافلام-
بس ده محصلش انا اول سنة محبتش وحتى مفيش واحد قالى انا معجب بيكِ يا نــدى ، مفيش وفجأة حسيت ان انا شغلى الشاغل هو انى احب واتحب ،
دخلت تانى سنة وبرضه محبتش ولا اتحبيت ورغبتى فى انى احب قلت ، واملى فى انى الاقى فارس احلامى اللى بشوفه فى الافلام قربت تنعدم وفى السنة التالته وقعت فى الحب ....
يااااه اخيراً انا بحب ، اخيراً قلبى دق لـ شخص وكمان باين عليه بـ يحبنى ، بدأ حازم يقرب منى كلمة فـ جملة فـ حوار فـ قاعدة فـ مكالمة تليفون فـ قصة حب زى الافلام .
اصبحت الحياة هى حازم وبقيت بروح الكلية بس عشان حازم ،
حازم اللى بيحبنى وبيخاف عليا من الهوااا ، اللى بيحافظ عليا واللى بيحمينى واللى بيسمعنى احلى كلام حب زى الافلام ، شهر فـ شهرين فـ تلت شهور فـ ترم عدى فـ سنة عدت واتخرج حبيبى حازم ..
حازم : ياااه اخيراً اتخرجت ده انا كنت مخنوق من الكلية دى
ندى : انا مبسوطة عشان انت اتخرجت بس زعلانه عشان مش هشوفك زى الاول
حازم : لا مانا هجيلك وهنتقابل اكيد
ندى : طب هنتخطب امتى
حازم : ان شاء الله اشوف التجنيد وهدور على شغل واول ما اشتغل هاجى اتقدملك
ندى : ربنا يكرمك يا حبيبي ...
كانت كل صلاتى دعاء لـ حازم ان ربنا يوفقه ويكرمه ويلاقى شغل وان ربنا يجمعنا فى حلاله ، انا فعلاً نفسي اوى اكمل حياتى مع حازم لانه خلانى اعيش قصة حب زى قصص الافلام ...
-حازم الحمد لله مدخلش جيش وفى خلال السنة كان لقى شغل وكنت انا اتخرجت ، وبدأت العرسان تجى البيت زى اى بنت ليها خطابها ، عريس فـ عريس فـ عريس وبرفض بدون اسباب مانا مستنية حازم ..
-بحكم اختلاف تفكير امى عن تفكيري كان صعب اصارحها بـ حبى لـ حازم ، دى كانت بتتخانق معايا لو واحد زميلى سألنى على حاجه ورافضة فكرة الارتباط والحب ، وكانت بتخاف عليا من اى ولد فى العيلة او ولد حتى ماشى فى الشارع ، مش عايزة قلبى يدق لاى حد الا جوزى ، هى دى وجهة نظرها وانا بحترمها بس انا وجهة نظرى ان مش هجوز الا لما احب واعيش قصة حب زى الافلام وانا لقيت ده مع حازم بس ده كان صعب اقوله لماما ....
ندى : يا حازم انت لازم تجى تتقدملى . بدأوا يشكوا فيا فى البيت
حازم : اجى اقول لـ ابوكى ايه ، والله انا بشتغل وباخد ٧٠٠ جنيه مرتب يادوب مكفينى ومعنديش مهر ولا شبكة ولا هعرف اجيب عفش ولا حتى عندى شقة اقعد بنتك فيها
ندى : مانت تقول لـ بباك يجيب الحاجات دى
حازم : يعنى هو ابويا اللى ظروفه عِدله ، ابويا ممكن يساعدنى مش اكتر مانتِ عارفة ظروفى يا ندى انا مضحكتش عليكى، وحتى لو ابويا قادر يجبلى الشقة والعفش والخ الخ الخ انا هصرف عليكى منين من الـ ٧٠٠ جنيه
ندى : طب تعالى حتى اقرأ فاتحه
حازم : يا ندى صعب واحنا كان اتفقنا انى مش هتقدم قبل سنتين من تخرجى
ندى : بُص يا حازم بابا لو شاف انك انسان كويس ممكن يتغاضى عن الشكليات دى
حازم : جسى نضبه والله لو معندوش مانع من الصبح هكون فى بيتكوا
-لما عرضت فكرة زواج البنت بدون شبكة ومهر تضاربت الاقاويل بابا يقول الشبكة دى هدية العريس لـ عروسته والمهر ده واجب عليه لكن ممكن اتغاضى عن المؤخر وماما تقول لو هجوز بنتى لازم احلى شبكة وشقة وعفش ده غير المهر والمؤخر والقايمة واخويا يقول اهم حاجه المؤخر والقايمة ولازم يكتب مبلغ كبير عشان ميُغدرش ....
ايه ده هى مال الحياة بقت مش زى الافلام ليه ، ازاى شاب لسه يدوب متخرج ولقى شغل بالصدفة بمبلغ بسيط جداً يعمل كل ده ، وافرض مقدرش يعمله ميتجوزش اللى بيحبها ، امال فين جمل الافلام احنا بنشترى رجل وميهمناش الفلوس لا فعلاً الواقع مش زى الافلام
فيها لو اى اب بنته بتحب واحد كويس اخلاقه عاليه ومحترم وهيتقى ربنا في بنته ، فيها ايه لما يتنازل عن شوية شكليات ملهاش اى لازمه ، القايمة مثلاً يعنى الاب بيمضي العريس على شوية عفش واطباق وهو مديله حتة منه ، حتى لو كان بيضمنلى حقى المفروض ان لو انا فى يوم كرهت جوزى مش هبقى عايزه منه حاجه غير انى اخلص منه كذلك لو الرجل باع مراته هيبقى عايز يخلص منها وخلاص
شوية شكليات كسرت قلوب وفرقت احباب وخلت بنات كتير تجوز رجال من غير حب ، شوية شكليات كان اخرها الطلاق ، ياااه دى فعلاً مش زى الافلام
وحتى لو فى ناس قالتلى مانتِ حافظى على قلبك للى هتتجوزيه وبكده قلبك مش هيتكسر وهتحبى جوزك ، كلام منطقى بس مش ممكن اتخطب لواحد انا معرفوش واحبه ويحبنى ويختلفوا على الشكليات دى ويسبنى ويفضل قلبى متعلق ...
المشكلة مش فى انى حبيت وهتجوزه او اتجوزت وهحبه ، المشكلة فى الشكليات اللى ملهاش اى لازمه اللى بتبوظ العلاقات ،المشكلة ان الاهل عايزين يجى لـ بنتهم زى ما جه لـ بنت جيرانهم فى حين ان اكيد ظروف العريسين مختلفة وكذلك البنتين ...
-قولت لـ حازم الكلام ده بس هو كان جدع ومحبش يكسر قلبى وجه واتقدملى على اساس نقرأ فاتحة وبعد كام سنة نتجوز ، بس بابا رفض وماما واخويا لانه غير مُقتدر مادياً
- هو الجواز فلوس !! هو الامان بالنسبة للناس فلوس !! هو مين اللى هيعمل مين !! الفلوس هتعمل رجل ولا الرجل هو اللى هيعمل الفلوس !! هو مين اللى هيحققلى السعادة ، الرجل اللى بحبه ولا الفلوس !! هو مين اللى هيحمنى من غدر الزمن ، الرجل اللى بيخاف عليا ولا الفلوس !! ملعوووون ابو الفلوس
-على فكرة ، مش مشكلة انى متجوزتش حازم وقلبى اتكسر واتوجع لـ فراقه ، ومش مشكلة انى اتجوزت واحد تانى كان فى يوم من الايام مكان حازم واترفض وقلبه اتكسر لـ فراق حبيبته ،ولما قدر مادياً اتقدملى عشان هى دى سُنة الحياة ، هو احنا اه مع الوقت كل واحد نسى حبه القديم وتعايش مع الحب الجديد بس برضه عنده جزء مظلم فى حياته بيحنله
المشكلة فى الاهل اللى بيحكموا على الشاب اللى لسه بيبدأ حياته بالاعدام ، بيحكموا عليه بأنه مش امان للبنت ، بيبصوا للعريس على انه بنك مش رجل ، مهما كان الرجل يملك من المال مش هيحمى زوجته الا برجولته وقوته وحبه ليها
اكيد مش كل الاهالى كده ، بس النسبة الكبيرة بتفكر كده ونسيوا حديث الرسول صلى الله عليه وسلم
(اذا اتاكم مَن ترضون دينه وخلقه فـ زوجوه) صدقت يا رسول الله
بس نصيحة متركزوش اوى مع الافلام ..... اصل الحياة والواقع .. مش زى الافلام ..
*_________________________
بـ قلم / آلاء الشريفي
(.الموضوع مفتوح للنقاش للى عايز يشارك برأيه.)
ناس كتير بتخسر لي بتحبه علشان شويه شكليات فيها لو ساعدو بعض و جابو الحاجات لي في الشقه واحده واحده ده عش زواجهم يبقي في الحلال احسن من اي حاجه تانيه
ردحذف