الحلقة الواحد والعشرين
بعد كام يوم شقة وسيم ...
(. وسيم كان قاعد بيتفرج على التلفزيون وفجأة جرس الباب رن .)
وسيم : حبيبة
حبيبة : وسيم انا جيالك فى موضوع مهم جداً
وسيم : خير ، فرحة كويسة !!
حبيبة : متقلقش كويسة الحمد لله ، اكلت ونامت
وسيم : امال فى ايه قلقتيني
حبيبة : مش هينفع على الباب ومش هينفع ادخل
وسيم : طيب اطلعلك شقتكم
حبيبة : انت فاضى نخرج بره شوية
وسيم : حبيبة تعالى ادخلى مفيش مشكله يعني ، انتِ اختى الصغيره
حبيبة(دخلت) : هو الموضوع بسيط اوى
وسيم : خدى راحتك ، فى ايه بقي ؟
حبيبة : انا عيزاك تتجوزنى
وسيم باستغراب وخضه : نعم 😳
حبيبة : اسمع بس ، ده هـ يبقي جواز على الورق ، حاجة مُحلله تخليني اعيش مع فرحة على طول من غير ما حد يتكلم عليا وانت مش مُلزم قدامى بـ اى حاجة حتى مش عيزاك تصرف عليا
وسيم : ايه اللى انتِ بتقوليه ده يا حبيبة ؟
حبيبة : عشان خاطرى يا وسيم ، ورحمه رواء وافق وانا والله ما عايزة منك اى حاجة وبص كمان ، بعد ما نتجوز بفترة اتجوز عليا وعيش حياتك الطبيعيه عادى بس متاخدش منى فرحة
وسيم : طيب و الياس ؟
حبيبة : تفتكر من العدل انى اتجوز الياس ، تفتكر ينفع احكم عليه بالاعدام لمجرد انه بيحبنى او انا بحبه
(. وسيم متلخبط جداً وحاسس ان دماغه اتشلت عن التفكير .)
وسيم : انا عمرى ما فكرت اتجوز او احب على رواء
حبيبة : وانا مبقولكش اتجوزنى بجد او حبنى ، ده مجرد عقد يحلل وجودى مع فرحة فى نفس المكان
وسيم : سيبينى افكر وهبقي ارد عليكي
حبيبة : خد وقتك ، بس خليك متأكد انى مش هلزمك بـ اى حاجة لا مصاريف ولا حتى اكل ولا اى حقوق زوجيه ووقت ما تبقي عايز تتجوز برضه معنديش مانع
وسيم : تمام
(. نزلت حبيبة واتصل وسيم بـ الياس وقاله انه هينزله المنصورة بكرة ضرورى وبالفعل اتفقوا على الزمان والمكان .)
*_____________________________________________**___________________________*
تانى يوم فى احدى الكافيهات فى المنصورة ....
الياس : ايه الموضوع المهم اوى كده اللى يخليك تنزل المنصورة مخصوص ، كنت استنى اجيلك انا
وسيم : الموضوع مينفعش يتأجل
الياس : خير حصل ايه
وسيم : حبيبة طلبت منى اتجوزها
الياس معرفش يرد وعينه برقت وبوؤه اتفتح من الصدمه 😨😳
وسيم : بدأ يحكيله التفاصيل اللى حصلت بينه وبين حبيبة
(. سكت اليس شوية وبدأ يفكر وبعد حوالى خمس دقايق اتكلم .)
الياس : اتجوزها
وسيم : نعم !!
الياس : زى ما سمعت اتجوزها ، حبيبة خلاص بقت مريضة بـ فرحة ومستعده تضحى بـ اى حاجة عشانها
وسيم : انا اصلاً مش متخيل انى اتجوز حد غير رواء
الياس : هى قالتلك جواز على الورق ، وكده كده حبيبة باعت وانا اشتريت كتير بس فى الوقت الحالى معدش ينفع اشتري
وسيم : انت ازاى بتتكلم بالسهولة دى
الياس : فى حاجة تانيه عايز تتكلم فيها ؟
وسيم : انا جاى اتناقش معاك فى الموضوع ده وبقولك فكر واقبل بـ العرض اللى انا عرضته قبل كده
الياس : مع احترامى ليك ولـ بنتك ولـ حبيبة انا مش هعمل حاجة مش مقتنع بيها
وسيم : فكر يا الياس
الياس : انا لو اتجوزت حبيبة يبقي هتجوزها هنا وبعدين انا اصلاً خيرتها بيني وبين فرحة واهى اختارت
وسيم : انا مش عارف اقولك ايه ؟
الياس : اتجوزها ، وانا مش زعلان لا منك ولا منها وحبيبة هتطلع من قلبي وحياتى مجرد ما تبقي مراتك وللعلم مش هتلاقى ام لـ فرحة احن من حبيبة ، اللى تبيع الدنيا كلها وتشترى بنتك يبقي هتشيلها فى قلبها وعيونها
وسيم : طيب حاول برضه تفكر شوية فى العرض بتاعى
الياس : نورت المنصورة ، وكان نفسي اقعد معاك اكتر من كده او استضيفك فى بيتي بس عندى شغل
وسيم : ربنا معاك
الياس : متشكر
(. ومشي الياس وهو فى قمة جرحه من حبيبة ورجع وسيم على القاهرة .)
*_____________________________________________**___________________________*
في بيت الياس ....
(. الياس رجع من بره وهو مخنوق ومش طايق نفسه وماسك دموعه بالعافيه .)
احلام : حمد الله على السلامه
الياس : الله يسلمك
احلام : اجهزلك غدا
الياس : لا ماليش نفس
(. ودخل الياس اوضته وقفل على نفسه .)
الياس لنفسه >> ليه كده يا حبيبة !! ليه تبعيني بـ ارخص ما عندك !! هى دى اخرتها !! هو ده جزائي !! ده انا وقفت جنبك واستحملت اللى مفيش بشر يستحمله (ولا بنى ادمين وحياتك :D ) ، ياااااه وانا اللى كنت فاكر نفسي غالى عندك طلعت رخيص اوى اوى يا حبيبة ، ربنا يسامحك على انتِ عملتيه فيا
*_____________________________________________**___________________________*
فى بيت وسيم ....
(. وسيم رجع من المنصوره على شقته وقعد يفكر مع نفسه .)
وسيم لنفسه >> طيب ايه اتجوزها ولا لا !! هتجوز واحدة بتحب واحد تانى !! ماهى لو كانت بتحبه كانت اختارته ، انا لازم احدد اهدافى انا عايز ايه !! عايز ام لـ فرحة ، وهتلاقى ام لـ فرحة احسن من حبيبة !! لا يبقي اتجوز حبيبة ، اتجووزها على الورق زى ماهى بتقول ويا صابت يا خابت ، طيب والياس ؟ الصح اصلاً ان حبيبة تبعد عن الياس ومتتجوزوش انت جربت احساس الابوه وعارفه ومش من العدل ان الياس يتحرم منه وهو معندوش اى مانع غير انه حب حبيبة وممكن اصلاً ميكونش حب بجد ، حبيبة عرضت عليك تتجوزها بس عشان تكون ام لـ فرحة وانت مش عايز اكتر من ام لـ فرحة ، بتهيألى كفايه حب بنتك ليها وتعلقها بيها ، هـ اتجوزها بقي واللى يحصل يحصل
(. اتصل وسيم بـ حبيبة .)
وسيم : ايوة يا حبيبة
حبيبة : انت كنت فين كده ، فرحة عايزه تشوفك
وسيم : كنت فى المنصوره ، كنت عند الياس
حبيبة بخضه : الياس !!
وسيم : ايوة ، روحتله وقولتله انى عايز اتجوزك
حبيبة : وهو قال ايه ؟
وسيم : قال ماشي بس معقبش بـ اكتر من كده
حبيبة : تمام
وسيم : انا هـ اجى اقابل مامتك وجمال عشان اطلب ايدك منهم
حبيبة : ما تستنى لحد ما بابا يجي اجازة
وسيم : هو جاى امتى ؟
حبيبة : بيقول اخر الاسبوع هيجي هو وحسام
وسيم : مش فرح حسام فى شهر عشرة
حبيبة : بس اهل روان مصرين انه يعملها خطوبه وشبكه قبل الفرح لانهم قراين فاتحه بس
وسيم : خلاص ماشى ، انا هقوله انى انا اللى عايز اتجوزك مش هنقول انك قولتيلي حاجة ماشى
حبيبة : ليه ؟
وسيم : كده افضل ليا وليكي
حبيبة : اللى انت شايفه صح اعمله
وسيم : خلاص اخر الاسبوع هكلم باباكى
حبيبة : تمام
وسيم : انتِ عايزة فرح ؟
حبيبة : انا مش عايزة اكتر من فرحة
وسيم : طيب نأجل التفاصيل دى لحد ما باباكى يجي
حبيبة : اوكى بس ممكن اطلب منك طلب
وسيم : اتفضلى
حبيبة : ممكن اقابل الياس لـ اخر مرة فى حياتى
وسيم : عايزة تقابليه ليه ؟
حبيبة : عايزة اوضحله حاجات كتير هو مش فاهمها
وسيم : خلاص ننزله المنصورة بكرة لانه اكيد مش هيوافق يجي القاهرة
حبيبة : هتجى معايا ؟
وسيم : لو حابه
حبيبة : خلاص اوكى
وسيم : خدى بالك على فرحة لحد ما اجى
حبيبة : اوكى (وقفلوا)
*_____________________________________________**___________________________*
فى اوضة حبيبة ...
(. قررت حبيبة انها تتصل بـ الياس عشان خافت من مواجهته وخافت تضعف لما تشوفوه .)
الياس : ايوة
حبيبة : الياس انا اسفة بس صدقنى هو ده الصح
الياس : صح من وجهة نظرك انتِ (بزعيق) انتِ مش عارفة انا بحبك قد ايه ، مش عارفة انا مجروح ازاى
حبيبة : وانا والله العظيم بحبك وعشان بحبك لازم اسيبك
الياس : يا سلام ده اللى هو ازاى يعني ؟
حبيبة : يا الياس انا لو كملت معاك يبقي حكمت عليك بالموت طول عمرك
الياس : ولما تسيبيني وتجرحيني ده مش موت
حبيبة : مع الوقت هتنسانى ، لكن لو اتجوزنا هيجي يوم وهتندم ، يوم ما تلاقى نفسك وحيد فى الدنيا هتندم
الياس : انا قولتلك مش عايز غيرك
حبيبة : بس هيجيلك يوم وتحتاج تبقي اب ، تحتاج سند وعيلة واستقرار وده عمرك ما هتلاقيه معايا
الياس : انتِ جرحتيني يا حبيبة وانا مستاهلش منك ده
حبيبة : انا مقتنعه ان ده الصح ، وصدقني هيجي يوم وتشكرنى فيه انى مكملتش معاك
الياس : اول مرة احس انى مظلوم ، انتِ ظلمتيني والدنيا ظلمتني
حبيبة : برضه متأكده ان هيجي يوم وتشكرنى ، ربنا يوفقك فى حياتك
الياس : ويوفقك يا حبيبة سلام
(. وقفلوا واتصلت حبيبة بـ وسيم ولغت معاه مشوار المنصورة وعرفته اللى حصل .)
*_____________________________________________**___________________________*
بعد مرور عشر ايام فى بيت عبد الله ...
عبد الله : خير يا وسيم ، انت طلبت تقعد معايا ومع جمال وحسام ، ايه بقي الموضوع ذو الاهميه
وسيم : طبعاً انتوا عارفين انا كنت بحب رواء قد ايه ، بس اكيد مش هفضل عازب
حسام : حقك
وسيم : كمان انا عايز ام لـ فرحة ، عايز حد يعيشلها على طول
جمال : هتتجوز بعد رواء !!
حسام : امال هيعيش عمره كله هو وبنته على الذكريات
عبد الله : كمل يا وسيم
وسيم ؛ انا عايز اتجوز حبيبة . بعد موافقتكم طبعاً
عبد الله : حبيبة بنتى
وسيم : ايوة ، انا مش هلاقى ام لـ فرحة احسن ولا احن من حبيبة
عبد الله : انت عارف ظروفها الصحيه ، عارف انها عمرها ما هتخـ .......
وسيم يقاطعه : يا عمى انا عارف كل ده وموافق جداً ، انا خلاص فرحة عندى بالدنيا وعايز حبيبة ام ليها
حسام : بس لازم تبقي بتحبها
وسيم : انا مبكرهاش وكده كده الحب هيزيد مع العشره
عبد الله : ايه رأيكوا يا ولاد ؟
جمال : انا معنديش مانع
حسام : ولا انا
عبد الله : يبقي انا هرجع لـ حبيبة ولـ امها
وسيم : انا بقول خير البر عاجله
عبد الله : يعني ايه ؟
وسيم : يعني حضرتك ممكن تقوم تسألهم دلوقتى واهو اعرف راسي من رجلى
حسام : ده انت مستعجل اوى
عبد الله : تمام عن اذنكم
(. وقام عبد الله ودخل لـ وداد وحبيبة جوه .)
وداد : خير وسيم عايز ايه ؟
عبد الله : وسيم متقدم لـ حبيبة عايز يتجوزها
وداد بفرحة : بجد
عبد الله : اهاا ، حتى اصر ادخل اسألكم دلوقتى
وداد : ايه رأيك يا حبيبة
حبيبة : انا موافقة
عبد الله باستغراب : بسرعه كده !!
حبيبة : وسيم شاب كويس جداً وانا عرفاه كويس وكفايه انه ابو رواء
وداد : ايوة صح الموضوع مش محتاج تفكير اصلاً
عبد الله : يعني اتفق معاه على التفاصيل
وداد : اه وعجل بالجواز ملهاش لازمه الخطوبة والجو ده
عبد الله : تمام
__**__**__**__
(. خرج عبد الله من عندهم ورجع لـ وسيم .)
وسيم : ها خير ؟
عبد الله : حبيبة موافقة
جمال : مبروك يا وسيم
وسيم : الله يبارك فيكوا
عبد الله : بص يا وسيم انا معنديش طلبات غير ان البنت تخلص كليتها وانها يتعملها فرح ان شاء الله حتى على الضيق
وسيم : وانا معنديش مانع
حسام : بس الفرح يبقي قبل ما اسافر
وسيم : ايه رأيكوا اخر الاسبوع ، الشقة جاهزة ومفروشه ونحجز مركب على النيل
عبد الله : وانا معنديش مانع ايه رأيكوا يا ولاد
جمال وحسام : على خيرة الله
*_____________________________________________**___________________________*
النهاردة فرح وسيم وحبيبة ....
(. الفرح كان فى مركب على النيل ، خلصوا وروحوا و وداد خدت فرحة تبات معاها عشان تسيب العرسان براحتهم .)
وسيم : مبروك
حبيبة : الله يبارك فيك
(. وسيم ساكت ومش عارف يقول ايه .)
حبيبة : وسيم انت مش مُلزم قدامى بـ اى حاجة زى ما اتفقنا
وسيم : هنعيش مع بعض ازاى
حبيبة : عادى جداً ، انا هنام مع فرحة فى اوضتها وانت نام فى اوضتك انت ورواء
وسيم : ونظام حياتنا
حبيبة : بلاش نستعجل بس صدقنى مش عايزة غير راحتك
وسيم : انتِ مبسوطه يا حبيبة
حبيبة : اوى ، ربنل عوضنى فعلاً عن اللى شوفته ، كفاية انى هعيش مع فرحة
وسيم : تمام
حبيبة : جعان ؟
وسيم : اهاا
حبيبة : طيب ادخل غير هدومك وانا كمان هدخل اغير الفستان وتعالى نتعشى
وسيم : ماشى
(. دخلت حبيبة غيرت الفستان الاول وبعدها دخل وسيم غير وقعدوا اتعشوا سو .)
حبيبة : ممكن اسألك سؤال
وسيم : اسآلى
حبيبة : انت ليه وافقت على الجواز بالسرعه دى
وسيم : عشان فرحة متعلقة بيكي وعشان ده حل فكرت فيه قبل كده انى اتجوزك بس مكنش عندى الجرأة ولا الدافع القوى انى اطلبه
حبيبة : بص يا وسيم ، احنا اه جوازنا على الورق وهيفضل على الورق بس انا هخلصلك وهسعدك وهحافظ عليك وهصونك
وسيم : وانا اوعدك انى عمرى ما اخونك ولا ازعلك
(. خلصوا عشا ودخل كل واحد نام فى اوضة .)
*_____________________________________________**___________________________*
فى بيت عبد الله ...
عبد الله : فرحة نامت
وداد : ايوة بس انت مالك
عبد الله : مفيش
وداد : لا بجد مالك
عبد الله : حاسس ان فى حاجة غلط فى جوازة حبيبة ووسيم بس مش قادر افهمها
وداد : حاجة غلط ازاى
عبد الله : يعني مش متجوزين عشان عايزين بعض فى هدف تانى
وداد : دى حقيقة ، حبيبة اتجوزته عشان فرحة وهو اتجوز حبيبة عشان تبقي ام لـ فرحة
عبد الله : وده يبقي جواز !!
وداد : طيب وانت وافقت ليه
عبد الله : عشان دى فرصة كويسة جداً لـ حبيبة
وداد : بص هما الاتنين اختاروا بعض وهما الاتنين ظروفهم مناسبه لبعض احنا بقي ندعيلهم بالسعادة
عبد الله : ربنا يسعدهم يارب ويوفقهم
وداد : امين ان شاء الله متقلقش
*_____________________________________________**___________________________*
بعد مرور خمس شهور ......
فى بيت وسيم ....
(. رجع وسيم وحبيبة وفرحة من فرح حسام وروان ، حبيبة غيرت هدومها وغيرت لـ فرحة ونيمتها ومددت جنبها ، قعدت تفكر فى الياس .)
حبيبة لنفسها >> انا جايز اكون ظلمت الياس وجيت عليه كتير اوى بس ده الصح ليه هو ، الياس لسه مش حاسس يعني ايه يتحرم من الاطفال ، حتى لو اتجوزنا وعيشنا احلى ايام حياتنا كان هيجي عليه وقت ويزهق ويمل ويحتاج يبقي اب ، بس طالما عملت الصح ليه حاسة بـ تأنيب الضمير ناحيته .. يارب سامحنى لو كنت ظلمته
(. حاولت حبيبة تنام لكنها مش عارفة خالص وفجأة موبايلها جت عليه رسالة من الياس .)
حبيبة بتقرأ >> اول مرة اتمنى لـ حد جرحنى السعادة ، ربنا يوفقك ويسعدك فى حياتك واسف انى بعتلك رساله
(. قامت حبيبة خرجت البلكونه شوية ولما زهقت دخلت تتفرج على التلفزيون .)
__**__**__**__
فى الجهة التانيه ...
(. وسيم كان فى اوضة نومه وعمال يبص لصورة فرحه هو رواء ويكلمها .)
وسيم لـ الصورة >> انا اسف يا رواء ، عارف انى وعدتك انى عمرى ما هحب ولا هتجوز غيرك بس والله انا لسه بحبك ، يارب تبقي مسمحانى .. ربنا يرحمك يا حبيبتى
(. سمع وسيم صوت التلفزيون شغال عرف ان حبيبة صاحيه فـ خرج لها .)
__**__**__**__**__
عند التلفزيون ....
وسيم : انتِ لسه منمتيش
حبيبة : لا مجانيش نوم ، هو صوت التلفزيون صحاك
وسيم : لا انا منمتش اصلاً
حبيبة : ليه ؟
وسيم : مش جايلي نوم برضه ، ممكن اقعد معاكى
حبيبة : اه طبعاً ، انت بتستأذن فى بيتك
(. قعد وسيم وحبيبة يتفرجوا على التلفزيون وفى حالة صمت رهيبه .)
حبيبة : وسيم انا عايزة اعترفلك بـ حاجة
وسيم : حاجة ايه ؟
حبيبة : الياس بعتلى الرسالة دى النهاردة
وسيم (بعد ماقرأها) : حبيبة انتِ لسه بتحبى الياس
حبيبة : بص يا وسيم ، انا حبيت الياس اوى لانه اول حب فى حياتى واخلصتله وكمان تعبته معايا بس من يوم ما اتجوزتك ورغم ان كل اللى بينا هو عقد الجواز اللى انى بحترمك جداً وبحافظ على سمعتك وعلى شرفك ومن اخر مرة شوفت فيها الياس لا كلمته ولا شوفته
وسيم : انا مقصدش حاجة وحشة ، انا بس كنت بفتح حوار
حبيبة : انا فاهمه بس كنت بوضحلك الامور
وسيم : تمام
(. رجع الصمت خيم عليهم مرة تانيه .)
وسيم : طيب انا هقوم ادخل الحمام وانام مش عايزة حاجة
حبيبة : لا سلامتك ، لحد ما تدخل الحمام هكون غيرت ملاية السرير لانى نسيت اغيرها امبارح
وسيم : اوكى
(. قام وسيم دخل الحمام وقامت حبيبة عشان تغير ملاية السرير ، خلص وسيم وخرج .)
حبيبة : وسيم كنت عايزة اقولك على حاجة مهمه
وسيم : خير
حبيبة : بيتهيألى انه آن الاوان تتجوز
وسيم : اتجوز !! اشمعنى
حبيبة : احنا مش كان اتفاقنا ان احنا بعد فترة من جوازنا انت تتجوز وتعيش حياة طبيعية
وسيم : انتِ عمرك تتخيلي انى ممكن احب بعد رواء
حبيبة : لا
وسيم : ولا انا ، بس حبيت
حبيبة : طيب تمام انت من حقك دلوقتى يكون لك زوجه بتحبها
وسيم (بيقرب منها) : ومين قالك انى عايز زوجة تانيه غيرك
حبيبة مخضوضه : ايه !!
وسيم : انا بحبك ، وجه الوقت اللى اطلبك فيه للجواز ، تتجوزيني
حبيبة : ايه !!
وسيم : انا عمرى ما هلاقى ام لـ بنتى زيك ولا زوجه حافظت عليا وعلى بيتى وعلى شرفى زيك رغم ان اللى يربطنى بيكي هو عقد الجواز بس ، انا عايز اتجوزك بجد يا حبيبة عايزك تبقي مراتى وحبيبتى وام بنتى
حبيبة : هتتجوزنى وانت عارف انى كنت بحب واحد قبلك ؟
وسيم : انا عارف انك كنتى بتحبى الياس بس حب المراهقة غير حب العشرة ، اللى بينا هيبقي المودة والرحمة وبعدين الحب وانا عارف انك اكيد بتحبيني حب عشرة
حبيبة : طيب والاطفال ، انا عمرى ما هخلف
وسيم : فرحة عندنا بالدنيا ، هنربيها سوا ونعلمها ونكبرها ونخليها احسن واحدة فى الدنيا وهى اصلاً شقاوتها بـ عشر اطفال
حبيبة : هههه ربنا يخليها
وسيم : بحبك
حبيبة : وانا كمان
وسيم : وانتِ كمان ايه ؟
حبيبة : بحبك
وسيم (بيحضنها) : ربنا يقدرنى واسعدك واعوضك عن اى حاجة وحشة شوفتيها فى حياتك
حبيبة : ربنا يخليك ليا
(. وسكتت شهرزاد عن الكلام المُباح .)
*_____________________________________________**___________________________*
بعد مرور اربع سنوات ...
فى بيت الياس ....
(. الياس بعد ما ساب حبيبة ركز فى شغله وبس وبعد تلت سنين اتجوز احلام بنت خالته ، هى كانت بتحبه وهو اتجوزها عادى ، كان مقتنع بيها وشايفها مناسبه بس مكنش بيحبها لكنه مع الوقت حبها بس ذكرى حب حبيبة لسه جواه بس مش شايل منها ولا زعلان وفاكرها بالخير ، الياس مراته خلفت اول خلفتهم النهاردة ، الياس واقف بيبص لـ التوأمين ومش لاقي كلام يوصف احساسه فقط بيبص لـ بناته وبـ يبتسم وعينه فيها دموع فرحة محبوسة .)
احلام : الياس يا الياس
الياس : ايوة يا حبيبتى
احلام : بقالى ساعة بنادى عليك
الياس : كنت سرحان مع بناتى شوية
احلام : شكلهم هياخدوك منى
الياس(بيروح عندها ويمسك ايدها) : مفيش حد فى الكون يقدر ياخدك منى
احلام : انا مبسوطه اوى يا الياس ، كان حلم حياتى اتجوزك واخلف بيبي منك
الياس : ربنا يقدرني يا حبيبتى واحققلك كل احلامك
احلام : هـ نسمى البنات ايه بقي ، انت كنت قولت هنسمى واحدة منهم حبيبة
الياس : لا مش هنسمى حبيبة ، هـ نسمى واحدة رحمة
احلام : اشمعنى رحمه ؟
الياس : تيمناً بـ رحمة ربنا بينا ، اصل انا اتأكدت ان ربنا رحيم اوى
احلام : طيب والتانيه ؟
الياس : احلام (وبيبوس دماغها) على اسمك يا حبيبتى
احلام : انا بحبك اوى
الياس : وانا بموت فيكي
(. وقام الياس وراح ناحية بناته .)
الياس لنفسه >> كان عندك حق يا حبيبة ، الابوة والامومه احلى حاجة فى الدنيا ، وان مكنش ينفع اختار بنفسي مكونش اب وانى لو مكونتش اب يبقي بـ اختيار ربنا لانه اكيد هيختارلى الافضل ، دلوقتى بس اتأكدت ان ربنا مبيعملناش حاجة وحشة وان عدم جوازى منك مكنش ظلم بل بالعكس كان خير وكرم ورحمه من ربنا ، فعلاً ولا حب الدنيا ولا اى حاجة فى الكون تساوى الاحساس اللى انا حاسه دلوقتى ، ربنا يسعدك يا حبيبة ويباركلك فى حياتك وفى فرحة بنتك ويخليلي بناتى ويباركلى فيهم ، انا لازم اشكرك لانك سبب انى احس الاحساس ده
*_____________________________________________**___________________________*
فى بيت وسيم وحبيبة ....
(. فرحة بقي عندها سبع سنين و حبيبة خلصت سنة الامتياز ، وسيم كان نايم وصحى على صوت فرحة .)
فرحة : قوم يا بابا يا كسلان اصحى كل ده نوم
وسيم : فى ايه يا فرحة
فرحة : قوم شوف ايه اللى حصل لـ ماما ، كارثة يا بابا
وسيم (بيقوم مخضوض) : كارثة !! في ايه
فرحة : قوم معايا الكارثة بره مش هنا ، قوم يا بابا يا تلحق يا ماتلحقش
(. وطلعت فرحة تجرى من الاوضة ووسيم وراها واعصابه كلها بايظه ، خرج لقي حبيبة لابسه فستان شيك اوى وعامله شعرها ومكياج وعامله سفره غدا وتورته ، وكمان مزوقة الشقه بـ ورد وبلالين .)
وسيم (وقف مكانه) : ايه القمر ده ؟
فرحة : مش قولتلك يا تلحق يا ماتلحقش
وسيم(بيقرب من حبيبة) : ايه كل الحاجات الحلوة دى
حبيبة : حبيت اشكرك انك وقفت جنبى السنين اللى فاتت دى وساعدتنى انى اخلص الكلية وارجع اتفوق فيها تانى ، حبيت برضه اعتذرلك عن اهمالى فيك الفترة اللى فاتت بسبب المذاكرة والامتحانات
وسيم : تشكريني على ايه !! انتِ مراتى حبيبتى ام بنتى وحقك عليا اساعدك واقف جنبك واخليكي احسن واحده فى الدنيا وبعدين انتِ ماهملتنيش ولا حاجة مجرد ما كنت اشوفك مبسوطه عشان حليتي كويس والاقي طموحك واصرارك على النجاح كنت بفرح ، نفسي بجد يا حبيبة اشوفك احسن دكتورة فى العالم
حبيبة : ايه كل الكلام الحلو ده ، انا بحبك اوى (وحضنته)
فرحة : لو سمحت يا باباتى متحضنش مامتى لانى بغير عليها
حبيبة : انتِ روح قلبى وباباكى ده احلى حاجة حصلتلي فى الدنيا
وسيم : ربنا يخلينا لـ بعض ويديم علينا سعادتنا
*_____________________________________________**___________________________*
- وسيم وحبيبة عاشوا احلى سنين حياتهم والحب كبر بينهم وفرحة فعلاً كانت فرحة حياتهم وعندهم بالدنيا
- حبيبة اشتغلت فى الماجستير ووسيم دايماً بيشجعها على التفوق
- الياس تقريباً نسى حبيبة خالص وبقت مجرد ذكرى عابره نادراً لما يفتكرها
- عبد الله رجع من الامارات واستقر فى مصر وفتح مركز طبي للاسنان واشتغل فيه هو و وداد
- حسام عاش فى الامارات وخد الشقة اللى كان ابوه عايش فيها ، وعاش هو روان احلى ايام حياتهم وخلفوا عبد الله
- جمال كان ماشى فى كليته بكل جهده وعزيمته واتخرج واشتغل وقابل واحده فى الشغل حبها وخطبها
النهاية ..
__**__**__**__
يارب القصة تكون عجبتكوا وهستنى رأيكم فيها مهم النهاردة تشاركونى بـ رأيكم :)
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
