الحلقة السادسة
فى مستشفى دكتور عبد الوهاب ....
(. خلصت حبيبة مع الياس وراحت لـ عمها .)
حبيبة : خير يا عمو
عبد الوهاب : خير يا حبيبة عمو متقلقيش
حبيبة : النتيجه ظهرت
عبد الوهاب : اااه ظهرت
حبيبة بتوتر : وخير ولا مش خير !!
عبد الوهاب : لما قولتيلي انك بتشتكى من مغص حاد ووجع فى ضهرك وساعات بيكون فيه نقط دم شكيت طبعاً ان دى الام فى الرحم وعملتلك سونار لـ الرحم والمبيضين عشان نطمن
حبيبة : في مشكلة ولا ايه ؟
عبد الوهاب : مشكلة بسيطة ، تسمعى عن هبوط الرحم ؟
حبيبة : ايوة
عبد الوهاب : انتِ عندك هبوط فى الرحم
حبيبة : بس مش المفروض ان انزلاق الرحم ده بيجي لـ المتجوزين !!
عبد الوهاب : ممكن يجي للعذارى بس كل مليون بنت بكر يجي لـ واحدة فيهم
حبيبة : طيب ايه سببه يا عمو
عبد الوهاب : الاربطه اللى ماسكة الرحم عندك ضعيه ومرتخيه جداً والسبب اللى واضح فى الاشاعات والسونار انك مولوده كده
حبيبة : عيب خلقى !!
عبد الوهاب : طبعاً انتِ عارفة ان الانزلاق له تلت مراحل ، انتِ حالياً فى المرحلة التانيه
حبيبة : ودى لها علاج ؟
عبد الوهاب : اه متقلقيش هـ تاخدى علاج وان شاء الله يجيب نتيجه ويرجع الرحم مكانه
حبيبة : طيب ما الاربطه كده كده ضعيفه ؟
عبد الوهاب : احنا مش متأكدين اذا كان عيب خلقى فعلاً ولا فى اسباب تانيه احنا منعرفهاش
حبيبة : طيب والعلاج ده هيجيب نتيجة
عبد الوهاب : ان شاء الله
حبيبة : وان مجبش نتيجه !!
عبد الوهاب : مش عايزين نسبق الاحداث
حبيبة : يبقي في حاجة خطيره
عبد الوهاب : مفيش حاجه خطيرة يا حبيبة ، لو الرحم مرجعش مكانه هنعمل جراحة بسيطه نرجعه مكانه ونثبته بس كده
حبيبة : ماشى يا عمو ، هقول لـ بابا وماما ولا لا
عبد الوهاب : انا مش رأيي مش لازم يعرفوا حاجة هيقلقوا والموضوع بسيط بـ إذن الله
حبيبة : تمام
عبد الوهاب : ده العلاج اللى هتاخديه كله
(. وطلع لها عبد الوهاب كيس مليان ادويه اشتراها لها وعرفها هتاخدهم امتى وازاى ، وبعدها عمها خدها وصلها وكانت حبيبة متوتره وقلقانه جداً ومتلخبطه وخايفة .)
*_____________________________________________**___________________________*
بـالليل فى بيت عبد الله ...
(. عبد الله كان قاعد بيتفرج على الاخبار المهببه :D دخلت عليه وداد .)
وداد : عبد الله كنت عايزة اتكلم معاك فى حاجة
عبد الله : خير يا وداد
وداد : هو حسام هـ يسافر امتى
عبد الله : لاما معايا لاما بعدى بـ شوية
وداد : طيب ما نخطبله قبل ما يسافر
عبد الله : نخطبله !! اشمعنى
وداد : فى بنت هو معجب بيها نخطبهاله قبل ما يسافر
عبد الله : ايوة بس هنروح نقول ايه لـ اهلها ، حسام المفروض لسه مبيشتغلش
وداد : اولاً حسام عنده شقة ودى ميزة انه تقريباً خلص نص عقبات الجواز بوجود الشقة دى
عبد الله : وثانياً
وداد : ثانياً احنا هنقول انه كان بيشتغل هنا وقرر يسافر الامارات وان هناك فى شغل كذا وبـ مرتب كذا
عبد الله : هو اللى قالك تقوليلي
وداد : لا انا اللى جت الفكرة فى دماغى ، طالما معجب بيها وهى كمان يبقي ليه نستني كده احسن بدل ما حد غيره يخطبها
عبد الله : هى فكرة كويسة واهو يبقي خاطب بدل ما يروح يعرف بنات هناك
وداد : بعد الشر انا ولادى متربيين احسن تربيه
عبد الله : ربنا يبارك فيهم
وداد : المهم انت موافق ولا لا
عبد الله : مبدأياً اه موافق بس عايز اعرف معلومات عنها وعن اهلها عشان اسأل عنهم قبل ما نروحلهم
وداد : ربنا يخليك لينا يا عبد الله ، انا هروح افرح حسام وابعتهولك تعرف منه كل حاجة انت عايزها
عبد الله : ماشى
(. راحت وداد لـ حسام وقالتله ان ابوه وموافق وفرح جداً ، وراح قعد مع ابوه وعرفه كل اللى هو عايز يعرفه ، عبد الله قاله انه هيسأل عليهم وبعدين يقوله عشان يحدد معاهم معاد .)
__**__**__**__
(. حسام بيكلم روان فى الموبايل .)
حسام : وحشتيني
روان : وانت وحشتنى اكتر يا حبيبي
حسام : عندى ليكي خبر
روان : خبر ايه !! حلو ولا
حسام : مش عارف
روان : يعني ايه مش عارف
حسام : مش عارف هيفرحك ولا لا
روان : خير يا حسام قلقتنى اتكلم على طول
حسام : بابا وافق اننا نجى نخطبك قبل ما اسافر
روان : بجد !!
حسام : والله بجد
روان : حسام ، بتتكلم جد ولا بتهزر
حسام : والله يا بت انتِ بتكلم بجد
روان : انا بحبك اوى يا حسام ربنا يخليك ليا
حسام : ويخليكي ليا يا احلى حاجة حصلتلى
روان : طيب هتيجوا امتى
حسام : بس بقي متبقيش واقعه كده
روان : انا واقعه جداً كمان ، ليك شوق فى حاجة
حسام : ليا شوق فيكي طبعاً
روان : طيب هتيجوا امتى
حسام : بابا لسه هيسأل عن عيلتك وكده وبعدها هنتفق على المعاد
روان : حسام
حسام : يا عيون حسام
روان : انت راجل اوى يا حبيبي
حسام : نهارك مش فايت انتِ كنتى شيفانى مش راجل
روان : لا مقصدش بس نادراً اوى ما في شاب لسه ٢٢ سنة يروح يتقدم لـ حبيبته
حسام : طيب نقول بقي الحمد لله ان ظروفى احسن من غيري ، لان في شباب كتير كويس بيكون عايز يتقدم لـ اللى بيحبها بس ظروفه مش مسعداه
روان : وفى برضه شباب ظروفهم كويسه ومبيوفوش بـ وعودهم مع البنت
حسام : ملناش دعوة المهم ان احنا هنتخطب واخيراً بقي هخرجك معاكى واكلمك براحتى من غير خوف
روان : انا اللى كنت عايشة فى رعب ان مامتى او بابا يعرفوا حاجة
حسام : مش انا يا حبيبتي وعدتك ان كل ده هـ ينتهى
روان : بحبك اوى يا حسام
حسام : بموت فيك يا روح قلب حسام
(. وقفلوا عشان فى ناس اشتكت من الرومانسية :D .)
*_____________________________________________**___________________________*
بعد كام يوم فى جامعه حبيبة ...
(. حبيبة حكت لـ مارى كل حاجة .)
مارى : طيب انتِ خايفة كده ليه بس
حبيبة : مش عارفة قلقانه اوى
مارى : لا يا حبيبتى انتِ المفروض تحمدى ربنا انك كشفتى المرض بدرى بدرى وكمان وهو لسه فى اوله
حبيبة : طيب هو انا لو اتجوزت هخلف !!
مارى : انتِ حمارة يا حبيبة ازاى تسألى سؤال زى ده وانتِ بتدرسي طب ، يا بنتى ده حتى اللى بيعملوا الجراحة بيرجعوا يخلفوا ويعيشوا حياتهم الطبيعيه عادى جداً
حبيبة : ربنا يستر
مارى : هيستر ان شاء الله بس انتِ متقلقيش كده
حبيبة : اه صحيح ماما وبابا واخواتى ميعرفوش حاجة ، محكتش الا لـ رواء بنت عمى
مارى : طيب ليه كده ؟
حبيبة : عمو عبد الوهاب قالى مش لازم تقلقيهم
مارى : طيب تمام
حبيبة : اه صحيح مش انا قابلت الياس
مارى : بجد !! امتى
حبيبة : الخميس اللى فات
مارى : وحصل ايه ؟
حبيبة : مقولكيش يا مارى على شكلى اول ما شوفته
مارى : مش فاهمه
حبيبة : شكله الحقيقي غير الصور خالص ، زى القمر بجد
مارى : ايوة يا عم بس قوليلي بقي عملتوا ايه
حبيبة : ولا حاجة روحنا كذا مكان واتكلمنا كتير اوى
مارى : ارتبطوا
حبيبة : انا دلوقتى متأكدة انى بحبه بس لسه مقولتلوش حاجة
مارى : يعني ايه ؟
حبيبة : لسه مقولتلوش انى بحبه ، بتقل شوية
مارى : ايوة كده احسن خليكي تقيلة
حبيبة : اه صحيح يا مارى اقوله على ظروف التعب ده
مارى : هتقوليله رحم وبتاع لا لا متقوليش حاجة
حبيبة : حاسة انى عايزة اقوله
مارى : وانا شايفة ان ملهاش لازمه
حبيبة : تمام هفكر واحسبها
*_____________________________________________**___________________________*
فى احدى الكافيهات ...
(. جمال ومجموعه من اصحابه قاعدين فى كافيه يعاكسوا فى اللى داخل واللى خارج .)
جمال : معاك حشيش ياد
صديق ١ : انت مش كنت بطلت
جمال : ايوة بس مجتش من مرة
صديق ٢ : مانت كل مرة بتقول مجتش من مرة
جمال : لخص ياد منك ليه معاك ولا مش معاك
صديق ١ : خد يا عم اهو ( والداله سيجارة حشيش)
جمال : هروح اشربها فى العربية (وقام)
صديق ٣ : رايح فين كده ، حد يسيب المُزز دى كلها
جمال : هظبط دماغى وارجعلهم تانى
صديق ١ : خدنى معاك (ولسه هيقوم قعد تانى) ولا اقولك روح انت
جمال : قشطة
(. وراح عربية واحد صاحبه وفضل اصحابه يكملوا وصلة الغلاسة على البنات من بعيد لـ بعيد عشان ميطردوش من المكان .)
صديق ١ : حد شاف الصاروخين دول
صديق ٣ : اووووووبس دول هبطوا علينا امتى
صديق ٢ : تقريباً لسه جايين
صديق ٣ : بس حد يجي هنا عشان يقرأ فى كتب
صديق ١ : شكلهم دحيحة
صديق ٢ : بس مُزز
(. غلسوا عليهم شوية واتصل واحد منهم على جمال .)
صديق ٢ : تعالى ياد
جمال : فى ايه ؟
صديق ٢ : فى حتتين انما ايه مقولكش
جمال : لا قولى
صديق ٢ : تعالى شوف بنفسك
جمال : طيب انا جاى
(. دخل جمال الكافيه تانى لقي اصحابه مركزين اوى مع البنتين ، دخل ولسه هـ يعاكس لقاهم حبيبة ومارى .)
جمال : حبيبة !! انتِ بتعملى ايه هنا
حبيبة : خلصنا كورس وجينا ننقل كام حاجة من بعض
جمال بعصبية : هنا يا حبيبة !!
مارى : عادى احنا بنجى هنا دايماً
(. هنا جه صديق ٢ .)
صديق ٢ لـ جمال بصوت هامس >> ايه يا عم مش هنقسم
جمال بصوت عالى : لم نفسك ياد
صديق ٢ : ايه يا عم انت هتعيل ولا ايه
جمال لـ حبيبة : قوموا يالا قوموا خلينا اروحكوا
صديق ٢ : تروحهم !! هما يقربولك
جمال بعصبية : اختى وصاحبتها (بزعيق لـ حبيبة ومارى) يالا فزوا
(. خدهم جمال فى تاكسى ووصل مارى الاول وبعدين روح هو وحبيبة وطول الطريق متكلموش .)
*_____________________________________________**___________________________*
بالليل فى اوضة حبيبة ....
(. جمال لما روحوا مرضيش يتكلم وهو مضايق بعد ما هدى دخل على حبيبة لقاها بتذاكر .)
جمال : ايه اللى وداكى هناك ؟
حبيبة : نعم !! مكان زى اى مكان بروحه
جمال : الولاد كانوا بيعاكسوكى
حبيبة : والمفروض ان انا اللى غلطانه
جمال : لما بنتين يروحوا كافيه مترشق شباب بيحششوا ويشيوا يبقي هما اللى غلطانين
حبيبة : لا مش غلطانين احنا كنا قاعدين بـ احترامنا وبعيد عن الشباب هما اصلاً اللى جم قعدوا قريب مننا
جمال : عشان شكلكوا مُلفت
حبيبة : وانت بقي لما بتعاكس بنت ، بتعاكس اللى شكلها مُلفت بس ولا اللى بـ تعجبك
جمال : قصدك ايه !!
حبيبة : قصدى انك زى ما بتعاكس بنات لازم يتردلك فى اختك وتتعاكس ولما بقي اصحابك يعاكسونى شوف انت الفجور وصل بيك لحد فين
جمال : ايه اللى انتِ بتقوليه
حبيبة : بقولك الحقيقة يا جمال بيه ، زى مانت مش عاتق بنت الا لما تعاكسها ربنا هياخدلها حقها وهيبعت لـ اختك اللى ميعتقهاش
جمال : بس انا بعاكس الشمال بس ، اللي هى اصلاً عايزة تتعاكس
حبيبة : وانت ايه عرفك انها شمال ، مكتوب على وشها
جمال : بيبان انا كـ رجل اقدر احدد مين المحترمه ومين الشمال
حبيبة : راجل !! على كده بقي انا شمال
جمال : ايه اللى بتقوليه ده !!
حبيبة : ما هما اصحابك الرجالة الخبره زى حضرتك عاكسونى ده معناه انى شمال برضه
جمال : متستفذنيش يا حبيبة
حبيبة : انت اللى مُستفز ومتخلف زى المجتمع اللى انت عايش فيه ، فاكر ان البنت لو قعدت فى كافيه تبقي شمال ولو لابسه ستايل معين تبقي عايزة تتعاكس ونسيت ان كما تدين تدان فى كل الاحوال
(. خرج جمال من غير ولا كلمه لان كلام حبيبة صدمه ، خرج وقعدت حبيبة تذاكر وبعدين كلمت الياس .)
حبيبة : اخيراً رديت
الياس : عايزة ايه يا حبيبة
حبيبة : في ايه يا الياس بتكلمنى كده ليه
الياس : انا اللى عايز اعرف انتِ عايزة ايه
حبيبة : مش فاهمه
الياس : ركنانى جنبك مش عايزة تعرفيني راسي من رجلى ، مش عارف انا بالنسبة لك ايه
حبيبة : هو ده اللى مضايقك
الياس : انتِ شايفه ايه
حبيبة : شيفاها حاجة بسيطه وانت مكبرها
الياس : بتحبيني ولا لا !!
حبيبة : نعم !!
الياس : جاوبى يا حبيبة ولو سبتى الاجابه متعلقه بين اه ولا لا يبقي مالوش لازمه كلامنا
حبيبة : مالوش لازمه !!
الياس : ايوة التعليقة دى ملهاش لازمه لكن لو عرفتيني بتحبيني ولا لا على الاقل هعرف اتعامل معاكى على اى اساس
حبيبة : تمام
الياس بحزم : حبيبة
حبيبة : نعم
الياس : بتحبيني ولا لا
حبيبة بتوتر : اه
الياس : اه ايه ؟
حبيبة : بخجل : ايوة يعنى
الياس : هو ايه ده اللى ايوة
حبيبة : ايوة بحبك ارتحت
الياس بفرح شديد وابتسامه عريضة : ارتحت جداً ، انا بقي بموت فيكي بجد
حبيبة : بس بقي عشان كسفتنى
الياس : مانا مش فاهم شيلاها فى قلبك وساكته كل ده ليه
حبيبة : بتقل عليك شوية مينفعش اتقل يعني
الياس : حد يتقل على حبيبه برضه ولا انا مش حبيبك
حبيبة : لا طبعاً
الياس : لا طبعاً ايه ؟
حبيبة : لا طبعاً حبيبي
الياس : وانتِ روح قلبى بحبك
حبيبة : وانا بموت فيك
الياس : ربنا يخليكي ليا ويقدرنى واسعدك
حبيبة : يعني عمرك ما هتسبني
الياس : اسيبك ايه بس انا قتيلك
حبيبة : انا مكنتش اتخيل انك ممكن تحبنى كده
الياس : انا بحبك فوق ما تتخيلي وصدقيني عمرك ما هتندمى وهخليكي اسعد واحدة فى الدنيا
حبيبة : ربنا يخليك ليا ويسعدنا
(. فضلوا يتكلموا ويحبوا فى بعض شوية وقفلوا وناموا على صوت بعض :D .)
*_____________________________________________**___________________________*
فى خـلال اربـع شـهـور ....
- حبيبة ماشية على العلاج ومفيش تقدم لسه والدكتور قال مش قبل ست شهور
- رواء حامل فى شهرها السادس
- حبيبة والياس عايشين احلى قصة حب
- عبد الله وحسام سافروا الامارات
- حسام وروان اتخطبوا ، و روان بقت صديقة مقربه من حبيبة
- حبيبة ومارى وجمال وروان والياس وسعيد امتحنوا الترم الاول ونجحوا والترم التاني باقيله شوية ويبدأوا امتحانات
*_____________________________________________**___________________________*
فى الامارات ...
(. حسام خلى باباه فى الشغل ودخل اوضته وفضل يفتش فى اوراقه الشخصية على امل انه يلاقي حاجة تخص بـ امه ، ابوه رجع ودخل عليه فجأة .)
عبد الله : بتعمل ايه هنا يا حسام
حسام : انا انـ انـ انا كنت بدور على حاجة
عبد الله : حاجة ايه !!
حسام ساكت ومش عارف يقول
عبد الله : كنت بتدور على ايه ؟
حسام : يا بابا انا من حقى اعرف امى فين
عبد الله : وانا مش معترض بس لما اقولك انى معرفش عنها حاجة يبقي فعلاً معرفش عنها حاجة
حسام : مش ممكن يعني تكون متعرفش حتى عايشة فين
عبد الله : انت ليه بتدور عليها !! فاكرلها ايه كويس !! انت فاكرها اصلاً !!
حسام : كل اللى اعرفه انها امى اللى خلفتنى
عبد الله بعصبيه : خلفتك ورمتك عشان راجل تانى
حسام : بس امى
عبد الله بعصبيه اكتر : امك دى تبقي خاطية وعاصية ، هتقول ايه لـ خطيبتك واهلها ولا اولادك ، هتقولهم امى مُلحده وكانت تعرف راجل على ابويا !!
حسام : مانا بصراحه بقي مش مصدق الحوار ده ، مش مصدق ان فى ام ممكن تسيب ولادها اللى هما حته منها تحت اى ظرف
عبد الله : خليك كده مش مصدق ومش مقتنع وبتدور عليها ، والشقه كلها عندك اقلبها جايز تلاقي حاجة وانا يا حسام مش هحاسبك ولا هقولك حاجة انت حر يا ابنى
حسام : بابا انت متأكد ان حضرتك قولت لنا الحقيقة كامله
عبد الله : اللى حصل واللى عندى قولته
حسام : بس الحقيقة ناقصة يا بابا
عبد الله (وهو خارج) : انت حر فى قناعتك وافكارك (وخرج)
حسام بـ يبص لـ ورقه فى ايده وبيكلم نفسه >> الحقيقة ناقصة كتير اوى يا بابا بس انا هسكت الا لما اعرفها
*_____________________________________________**___________________________*
فى احدى عيادات النساء والتوليد ....
(. رواء و وداد راحوا لـ دكتور النساء والتوليد عشان يطمنوا على رواء وعلى الجنين .)
الدكتور : انتِ عملتى سونار 3D فى الوقت المناسب
وداد : حضرتك اول ما قولتلنا نعمله عملناه
الدكتور : اهو انا طلبته فى الوقت المناسب بس المشكله ان مفيش عندى فى العيادة سونار 3D
رواء : المهم الجنين بخير ؟
الدكتور : متقلقيش هو فى مشكله بسيطه جداً
رواء و وداد بقلق : مشكلة ايه خير !!
الدكتور : ....................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
