مش غلطتها لوحدها :
انا عمرو ، ٢٥ سنة ، شاب زى اى شاب فى مجتمعى ، بخرج بسافر بتفسح وبعرف بنات كــــتـــيــــر زى اى شاب
منهم اللى بنكون اصحاب -just best friends- ومنهم اللى بنكون مرتبطين ، مش معنى اننا مرتبطين يبقى بنحب بعض لأ هما بس اللى بيحبونى ، انا مبحبش ، بس طبعاً كل واحده فاهمه ان انا بحبها وبخلص لها و الخ الخ الخ ، اصلاً فيها ايه لما اعرف بنات كتير مانا رجل والرجل فى مُجتمعنا مفيش حاجه تعيبه ، يسافر لوحده عاااادى ماهو رجل ، يصاحب بنات عاااادى ماهو رجل ، يعلق بنات بيه عااااادى ماهو رجل ، يشرب يسكر عاااادى ماهو رجل ، حتى لو اتجوز عُرفى عااااادى برضه ماهو رجل
انا هفهمكو ، انا اتربيت ان البنت هى اللى بتجيب العار لاهلها لكن الولد لا طبعاً ده رجل ، اتربيت انى لو شوفت اختى واقفه مع ولد حتى لو مجرد زميل اكسر رقبتها قبل ما تجيبلى العار ، لو اكتشفت فى يوم انها بتحب واحد اموتها عشان اكيد بتعمل حاجه غلط وهتجيب لنا العار ، لكن انا احب واصاحب و.. و.. و... عاااادى انا رااااااجل
لكن انا فكرتى دى اتغيرت تماماً ، واكتشفت ان الولد زى البنت بيجيب العار لاهله ومفيش حاجه اسمها ولد وبنت وهحكيلكوا ايه اللى غير فكرتى ......
طول عمرى علاقاتى مع البنات مجرد فسح وخروج وتنطيط وطبعاً لو مسكت ايدها او بوستها خلاص خلصت هو ده اخرها معايا ، مش عشان انا ولد محترم وخايف عليها لا طبعاً انا خايف على نفسي علاقتنا تتطور واتورط انا وممكن ترفع عليا قضية ولا بتاع انا مش ناقص وجع دماغى ، هو انا اه متأكد ان مفيش بنت هتقدر ترفع قضية لان ده عار لاهلها وهتخاف تقولهم بس برضه من خاف سلم ، انا ايه يضمنلى ان مفيش بنت تقدر تورطنى وساعتها ممكن اتجوزها وانا استحالة اتجوز واحده صايعه عملت كده معايا ماهى ممكن تعمل كده مع اى حد
لحد ما فى يوم وقعت فى المحظور وعلاقتى تطورت مع بنت وللاسف كانت البنت الوحيدة اللى انا حسيت انى بحبها بجد وطبعاً كان رد فعلى انى لا كلمتها ولا شوفتها بعد اللى حصل ، ماهو مهما كنت بحبها استحالة اتجوزها ...
حكيت لـ مصطفى صاحبى واللى كان رأيه مُخالف تماماً لـ رأئي رغم انه ولد ورجل زيى والمفروض اننا لينا نفس وجهة النظر ان البنت اللى تسلم نفسها لـ رجل قبل الجواز سهل تعمل كده مرة واتنين وتلاته
مصطفى : حرام عليك تسيبها كده انت كده وقفت حالها
عمرو : نعم !! يعنى انت عايزنى اتجوزها
مصطفى : ايوة ان شاء الله حتى تكتب عليها وتطلقها تانى بس متسبهاش متعلقة كده
عمرو : نعم انت عايزنى اتجوز واحدة عملت كده
مصطفى : طب مانت عملت كده برضه
عمرو : انا رجل يا مصطفى
مصطفى : رجل !! قولتلى ، سؤال بقى يا عم الرجل ، لما ارتبطت بيها وانت قولت بنفسك انك حبيتها اكيد طبعاً كنت متأكد من اخلاقها ؟
عمرو : كنت ، كنت متأكد دلوقتى مقدرش اثق فيها نهااااااائي ، انت مجنون يا مصطفى !!!
مصطفى : اسمعنى يا عمرو للاخر ومتقاطعنيش وياريت كمان متعقبش قبل ما تفكر كويس اوى فى الكلام اللى هقوله
عمرو : اتفضل
مصطفى : اللى انتوا عملتوا ده مش هقولك غلط وعيب والكلام ده انا هقولك اللى اكبر من كده ، اللى انتوا عملتوا ده حراااااااام فاهم يعنى ايه حرااااام ، وخد بالك اللى (انتوا) مش اللى هى ، لان الدين قال الزانى والزانية مقالش الزانية بس ، يعنى انتوا الاتنين غلطانين وعملتوا حاجه حرام ولما ربنا يجي يحاسب هيحاسبكوا انتوا الاتنين على عملتكوا، ده اولاً
ثانياً : ليه الولد يعرف بنت واتنين وعشرة وفى النهاية يقولوا رجل او عيل وغلط وبكرة يكبر وفى النهاية مش هيجيب العار لاهله ، ولو البنت عملت علاقة واحده وممكن تبقى شريفة يعنى علاقة خالية من اى غلط بس برضه يتقال عليها صايعه ومش محترمه وميتوثقش فيها ، ليه تبقى انت علاقاتك كتيرة ونصها علاقات قذرة والبنت اللى ارتبطت مرة قبلك متنفعش تنول شرف زواجها منك
ثالثاً بقى وده الاهم ازاى تحمل البنت الغلطه لوحدها رغم انك غلطت زيك زيها بس الفرق بينكم انها ممكن تغلط مرة واحدة وحياتها توقف عليها عشان هى عندها اللى يكشف غلطها فى حين انك ممكن تبقى عامل ١٠٠ علاقة وتقول انا رجل ، الرجولة انك متغلطش ولما تغلط تعترف بغلطك وتواجهه مش تقول انا رجل و مش عارف ايه ، انا خلصت فكر بقى فى كلامى مع نفسك
(.مصطفى بتكلم صح ، مين اللى قال ان البنت بس هى اللى بتجيب العار لاهلها طب ما الرجل برضه ممكن يجيب العار لاهله ، مين قال ان لما غلطه زى رى تحصل يبقى البنت هى اللى مش كويسة وغلطانه طب مانا برضه غلطت ، لان ده حرام والعقوبة واقعه علينا احنا الاتنين ونفس العقاب ربنا فى النهاية مش هيقول ده ولد ودى بنت ، فعلاً الرجولة مش انى اعرف ١٠٠ بنت ويوم ما اجى اتجوز اقول انا عاوز واحده معرفتش حد قبلى ، هو فى حد مبيغلطش ، انا مبقولش ان البنت لما بتعمل كده ده صح ، لا طبعاً غلط واكبر غلط انها تفرط فى شرفها وتسلم نفسها لاى حد مهما كانت بتثق فيه ، بس ده مش غلطها لوحدها هى معملتش كده لنفسها ، ويمكن لو مكنش الولد اللى هو الرجل ده دخل فى حياتها مكنتش عملت كده ، ايوة الولد بيخدر البنت بالكلام المعسول واللمسات الرقيقة اللى بتخليها تغيب عن الوعى ، بس برضه مفروض البنت متسمحش لولد انه حتى يمسك ايدها ، ولو اتقابلوا يبقى فى اماكن عامه ما هى برضه البنت تقدر تخلى اقذر رجل فى الدنيا يحترمها غصب عنه ، بس برضه مش غلطها لوحدها لان الرجل الصح يحافظ على البنت من نفسه وزى ماهو بيعمل رجل ويغير عليها من نظرات الناس ليها يغير عليها برضه من نفسه الرجل الصح يحميها من نفسها ومن نفسه ، اصل حتى لو البنت بتدى الولد الفرصة دى اكيد لو هو مخدش خطوة هى برضه مش هتاخد خطوة حتى لو هى عايزة عمرها ما هتقوله ، فعلاً الرجل الحق مس هو اللى يعرف دى ويصاحب دى ويقل ادبه مع دى ويحب فى دى ، لا الرجل الصح هو اللى يحب بنت واحدة يحميها ويحافظ عليها عشان هو رجل ، ومفيش حاجه اسمها انا رجل وهى بنت لان ربنا هيحاسبنا احنا الاتنين زى بعض ، اما بالنسبة للعار والفضيحة فدى كلها مغلوطات اجتماعية بنورثها البعض ، انا هكتب على البنت اللى انا غدرت بيها لان هى دى الرجولة اللى انا كنت فاهمها غلط ان شاء الله حتى اطلقها تانى عادى طالما متأكد ان الغلطه دى مش طبعها وان دى مش اخلاقها بس معملش فيها كده لانها مس هتتحمل نتيجه غلطة مغلطتهاش لوحدها ، احنا الاتنين غلطانين ولازم نعالج غلطتنا سوا زى ما ربنا هيحاسبنا سوا ، ايوة صح دى مش غلطتها لوحدها
*_________________________
بـ قلم / آلاء الشريفي
(.الموضوع مفتوح للنقاش للى عايز يشارك برأيه.)
صح انا مش اسيب حبيبتي و اروح اتجوز حبيبت غيري
ردحذف