الحلقة
الثانية عشر
وائل : ايه عم البوز ده , شكلك يسد النفس على الصبح
-يقعد دياب وميتكلمش
وائل : فى ايه ياااد
دياب : انت مطلعتش جدع على فكرة يا وائل
وائل باهتمام : انا !! ليه ؟
دياب : انت مش قولتلى ان ابوك مش بيوافق على عرسان تجي لاختك ؟
وائل : وايه اللى يخليني مش جدع لما اقولك كده
دياب : لانى عرفت ان اختك بيجيلها عرسان
وائل باهتمام شديد : وهى اختى تخصك فى ايه ؟
دياب بارتباك : مـ مـ مش فكرة تخصنى بـ بـ بـس........
وائل يقاطعه : في ايه يا دابو , اوعى تكون غدرت
دياب باستغراب : غدرت !! قصدك ايه
وائل يقرب منه: يعنى اكون دخلتك بيتي وامنتك على اهل بيتي وفى الاخر
شقطت اختى
دياب : ايه اللى انت بتقوله ده يا وائل انا اعمل كده برضه , اختك هى
اختى يا جدع
وائل : ولما اختى هى اختك عرفت منين انها بتقدملها عرسان وابويا
بيوافق
دياب : هو فى بنت يعني مبتقدملهاش عرسان
وائل يبص لـ اللاب : ماشى يا دابو
وائل لنفسه >> يا خوفى يا دياب
دياب لنفسه >> انا غبى , كان المفروض اقوله انى عايز اخطب اخته
, دى كانت احلى فرصه عشان اخطبها رسمي منه
دياب لـ وائل >> طيب يا معلم هروح انا مكتبي
_____**_____**_____**_____**_____**_____**_____**_____
فى بيت محمود السلحدار ...
(. فريال طول الليل منمتش كويس من كتر قلقها على مليكة من ملك فكانت
كل شوية تصحى عشان تطمن على مليكة , ملك صحيت من النوم وكانت طول الليل مش حاسه
بأى حاجة من كتر التعب والارهاق , صحيت على صوت موبايلها وكان المتصل يزن .)
يزن : صباح الخير يا لووكا
ملك بصوت ناعس : صباح النور اخبارك ايه ؟
يزن : انتِ اللى اخبارك ايه ؟
ملك : كويسه اوى الحمد لله
يزن : عملتي ايه مع مليكة ؟
ملك : ابسط حاجه ممكن اقولهالك انها نايمة فى حضنى طول الليل لا انا
قلقت ولا هى قلقت
يزن : طيب كويس اوى , قوليلي بقى هينفع اشوفك النهارده
ملك : اووكى ممكن نتقابل دلوقتى نشرب قهوة فى اى مكان لو انت فاضى
يزن : طيب ينفع نفطر قبل القهوة ؟
ملك : اوكى ولو انى مبفطرش
يزن : لا مانا هفطرك
ملك : اوكى هقوم كده افوق واغير واكلمك تانى
يزن : اوكى مستنيكي
(. قفلت ملك مع يزن وقامت دخلت الحمام وغيرت هدومها استعداداً للخروج
.)
__**__**__
فى الجهة التانية ...
(. كانت فريال بتحضر الفطار لـ محمود قبل ما يروح شغله , محمود صحى من
نومه ودخل الحمام وغير هدومه وقعد يستنى الفطار فى المطبخ , كان قاعد على كرسي فى
المطبخ من بين اربع كراسي وترابيزة بيتوسطوا المطبخ الواسع الفخم .)
فريال : هتشرب شاى ولا قهوة
محمود : شاى
فريال : مالك ؟
محمود : حلمت حلم ضايقنى
فريال تتلفت باهتمام : حلم ايه !! خير اللهم اجعله خير
محمود : متقلقيش كده , انا بس شوفت ابويا الله يرحمه
فريال :الله يرحمه (وتبدأ تحط
الاطباق على الترابيزة) بس ايه اللى يضايقك فى كده
محمود : كان قاعد مع اخويا عادل ووليد ابنه
(. تروح فريال تجيب الشاى وتحطه على الترابيزة وتقعد قصاد محمود .)
فريال : انت اتضايقت عشان ابوك قاعد معاهم فى الحلم
محمود (وبدأ ياكل) : لا اضايقت لانى حسيت انه مش راضى عنى
فريال : حبيبى , بلاش تاخد الامور بحساسيه كده ده مجرد حلم ويا عالم
ابوك لو كان عايش كان وقف فى صف مين
محمود : الله يرحمه
فريال : امين يارب
(. هنا تجى ملك , اللى كانت لابسه بنطلون جينز وبلوزه مشجره بـ الروز
والابيض وشعرها كان مفرود على ضهرها .)
ملك : صباح الخير
-فريال ومحمود يبصوا لبعض بـاستغراب شديد وبعدين يردوا سوا "صباح
النور"
ملك : ماما انا نازله دلوقتى , مليكة نايمه فى اوضتى انا حطيتلها
المخدات حواليها عشان متقعش
فريال : طيب تعالى كٌلى حاجه قبل ما تنزلى او حتى اشربي القهوة بتاعتك
ملك : لا هشربها بره بقي عشان مستعجله
محمود : ملك انتِ رايحه فين ؟
ملك : خارجه مع جماعه اصحابى
-محمود وفريال يبصوا لبعض تانى لان ملك ملهاش اصحاب او بمعنى اصح
قاطعتهم من سنين
محمود : طيب ابقي طمنينا عليكي
ملك : حاضر
(. وخرجت ملك من الشقة عشان تقابل يزن اما محمود وفريال كانوا
بيحاولوا يستعبوا اللى بيشوفوه من ملك من اللى عملته مع مليكة مرارا بـلبسها
وشعرها .)
فريال : انت مستوعب اللى بيحصل ده ؟
محمود : مش يمكن ملك بتحب ؟
فريال : اتمنى
محمود : بس على الله تختار صح
فريال لنفسها >> يا ترى يا هادى انت اللى ورا اللى ملك فيه ده
_____**_____**_____**_____**_____**_____**_____**_____
فى بيت مجدى فاضل ...
(. هادى تقريباً لا بينام ولا بياكل من ساعة ما شاف ملك بتدخن , واللى
كانت واخده بالها اوى وحاسه بيه هى عالية اخته , صحيت عالية وراحت لـ هادى اوضته
.)
عالية : صباح الخير يا هادى
هادى : تعالى يا عالية
(. دخلت عالية وقفلت وراها
وقعدت جنب اخوها .)
عالية : انت كويس
هادى : لا , انا منمتش طول الليل بحاول الاقى سبب يحول ملك كده
عالية : تصدق انا كمان فكرت فى الموضوع ده , ملك دى طول عمرها رقيقة ,
كانت فعلاً المعنى الحقيقى لـ الملاك
هادى : ايه بقي اللى يغير الملاك لـ الكائن البشع اللى اانا شوفته ده
عالية : بس انت مش مكبر حكاية شغلها دى زياده عن اللزوم
هادى : عشان وراه هدف غير تضييع الوقت او كسب المال او استثمار لغاتها
عالية : هدف زى ايه ؟
هادى : هو ده اللى نفسى اعرفه , المشكلة دلوقتى انى مش عارف هسافر
ازاى
عالية : وايه دخل ده فى سفرك ومستقبلك ؟
هادى : يعنى هسافر من غير ماعرف ايه طبيعه علاقتى بـ ملك ومن غير
ماعرف هى بتعمل كده ليه وايه تانى ممكن تكون بتعمله
عالية : ماشي عندك حق فى كل ده بس مستقبلك اهم وشغلك ووضعك اللى انت
عايز تضيعهم بسهوله دول
هادى : ربنا يسهل واقدر اعرف راسي من رجلى فى الاسبوعين الباقيين
عالية : ربنا ييسرلك الامور , هروح بقي اعملنا ساندوتشات ونسكافبه لان
كلهم خرجوا
هادى : اوكى وانا هروح اخد دش
_____**_____**_____**_____**_____**_____**_____**_____
فى احدى الكافيهات ....
(. اتقابل يزن وملك وطلبوا معجنات وقهوة .)
يزن : شبعتى ؟
ملك : اكيد انا اصلاً مبفطرش
يزن : بالهنا والشفا
ملك : متشكره
يزن : حلوة البلوزه اللى انتِ لبساها دى غير ستايلك اللى انا متعود
عليه وكمان شوفى اعرفك بقالى قد ايه واول مرة اشوف شعرك بالجمال ده
ملك : مش انا قولتلك انى لما بكون مبسوطه بتصرف تصرفات مختلفه عن
طبيعتى
يزن : ماهو انا مستغرب
ملك : مستغرب من ايه ؟
يزن : ايه اللي حصل فرحك اوى كده
ملك : اننا روحنا الملاهى
يزن : انا خدتك عشان الهيكي عن الزعل لذلك مستغرب انك فرحتى اوى كده
واتغيرتى اوى كده
ملك : يزن انت مش فاهم حاجه
يزن : طيب فهميني
ملك : انت مش بس خدتنى الملاهى , انت خدتنى لـ طفولتى , خدتنى لـ حياة
كنت بحبها كنت مبسوطه فيها وفجأة اتخطفت منها , انت خدتنى لـ احلى ماضى واجمل
ذكريات
يزن : ياااه كل ده
ملك : واكتر يا يزن , انت رجعتنى لـ ملك الطفلة البريئة الطفلة اللى اكتر حاجة ممكن تزعلها انها
متلاقيش سبب يفرحها
يزن : وايه اللى غيرك يا ملك ؟
ملك : المسئولية , الاختيارات والافتراضات الخاطئة , الجواز والطلاق
اللي في غير اوانهم
يزن : طيب احكيلي يا لووكا , احكيلي ليه اتجوزتى وليه اطلقتى ؟ احكيلي
ايه هى الافتراضات والاختيارات الخاطئة
ملك (بتطلع سيجارة) : احكيلك ايه يا يزن , احكيلك انى اتعميت وشوفت
حاجات مش موجوده
يزن : انا مش فاهم حاجه وانتِ كالعاده هتقولى كلام مش مفهوم وانا
بصراحه مش فايق بس ممكن اطلب منك طلب
ملك (بتولع السيجاره) : اطلب
يزن (بياخد السيجارة منها) : بلاش تدخين
ملك بابتسامه : مانت اللي نكدت عليا
يزن (بيطفى السيجارة) : لا اصبرى لسه النكد جاى
ملك : شكلك ناوى تخرب اللي عملته امبارح
يزن : ناوى افهم جزء من الالغاز اللى حواليكى دى
ملك : انهى لغز بقى ؟
يزن (يسند على الترابيزة ويبص لـ ملك) : شغلك
ملك : ماله ؟
يزن : انتِ مش محتاجه فلوس من وراه ولا محتاجه تمارسى اللغات اللى
معاكى عشان متنسيهاش ولا بتضيعلك وقتك وبيضر سمعتك احياناً , بعد تفكير وتمحيص
وصلت لـ السبب
ملك : ايه هو ؟
يزن : بصى يا ملك من الاخر كده وقبل ماقولك اللى وصلنى لـكده هقولك
انك كنتى بتعملى كده عشان تعلقى الشباب بيكي
ملك بخضة : ايه !! ايه اللى انت بتقوله ده ؟
يزن باسلوب هجومى حاد : هى دى الحقيقة يا ملك , مكنتيش بتاخدى شغل الا
من شباب كنتى بتقابليهم رغم ان كان ممكن تاخدى الشغل على الايميل والفلوس تتبعتلك
رصيد او تتحولك تحويل بنكى
ملك تقاطعه بحدة : انت ازاى ......
يزن يقاطعها بنفس الحده
والهجوم : كنتى بتتعمدى تدخنى قدامهم وكذلك بتتعمدى تروحى وشعرك مفرود لانه بيزيدك
جمال , انتِ كنتى بتوصليلهم انك متحرره او بمعنى داراج شوية كنتى بتوصليلهم انك
منحرفة او شمال , كنتى قاصده تخليهم يتعشموا ويتعلقوا بيكي وفى الاخر ميطولوش حاجه
كنتى بتفرحى بعذابهم , كنتى بتتلذذى بـ حبهم ليكي من طرف واحد واكبر دليل انك
رفضتى تقابلى هادى لانه اصلاً مولع فى عشقك
(. ترتبك ملك والدموع تملى عيونها والخنقة والضيق يسيطروا عليها ,
تفتح شنطتها وتطلع منها توكه تلم بيها شعرها وتولع سيجارة .)
يزن : اخترتى اكتر حاجه متمكنه فيها اللى هى الترجمه واخترتى اسهل
وسيلة تواصل او بمعنى شوارعى اسهل طريقة تشقطى بيها زباين واخترتى اسهل مجال
هتلاقى عليه اقبال لان اغلب الشباب بقوا بيعملوا مشاريع او ماجستير
ملك بصوت مخنوق : كفاية يا يزن
يزن : وبتكرهى مليكة لانها ببساطه حاجه بريئه , ملاك بيتحرك حواليكي
وجوده بيتسفذك لانه بيفكرك بتصرفاتك الغلط
ملك بتوتر : انا مش وحشة
يزن : مانا عارف , ياريتك وحشه ولا شمال كان ده بقي سبب مقنع لتصرفاتك
لكن انتقامك الشديد من جنس الذكور مش لاقيله سبب , الكلام ده تعمله واحده حبت واحد
وضحك عليها لكن انتِ دايماً بتأكديلي حب هادى ليكي او حب الشخص اللى اتجوزتيه
ملك : انا عايزة امشى
يزن : مش هسيبك تمشى , مش هسيبك تهربي زى كل مرة
ملك : مش من حقك , مش من حقك تقولى اقعد ولا امشى
(. وتلم ملك حاجتها وتمشى وتركب عربيتها ويزن مراقبها من جوه الكافيه
.)
يزن لنفسه >> ملك هتفضل ملك , عايزه تبان منحرفه وشمال وهى
اصلاً مش كده , يمكن اتجوزت واتطلقت لـ مجرد انها تعاند المجتمع
_____**_____**_____**_____**_____**_____**_____**_____
فى جامعة ولاء .....
(. ولاء من ساعة ما راحت الكلية النهارده وهى مش مركزه فى اى حاجه
لانها مستنيه دياب يكلمها يقولها عمل ايه مع وائل , مستنيه تعرف دياب بيحبها
وشاريها ولا لا , اتصلت بيه مرتين ومردش وده قلقها اكتر وعلى الضهر كلمها .)
دياب : اذيك يا ولاء
ولاء بعصبيه : كل ده يا دياب متكلمنيش قلقتنى
دياب : معلش يا حبيبتى كان ورايا شغل مهم
ولاء : ربنا معاك يا حبيبى
دياب : انا اتكلمت مع وائل
ولاء بقلق : وقالك ايه ؟
دياب : معجبنيش اسلوبه فى الكلام معايا زى ما يكون شاكك فى حاجة
ولاء : مش فاهمه حاجة
دياب : حكى لها اللي حصل مع وائل
ولاء : طيب ما دى كانت فرصه كويسه انك تفاتحه فى موضوعنا
دياب : مانا عارف بس لسانى اتلجم وعقلى اتشل لما قالى اوعى تكون غدرت
ولاء : طيب وبعدين , هو فعلاً كلامه غريب ولا كأنه عارف
دياب : متقلقيش يا ولاء هتكلم معاه رسمى والله بس شوية كده
ولاء : شوية قد ايه
دياب : والله قريب يا حبيبتى لانى اصلاً زهقت من وضعنا ده
ولاء : ماشى يا دياب
دياب : بس انتِ متأكده ان باباكى مش هيغصبك على العريس اللى داخل
دماغه ده
ولاء : عريس ايه ؟
دياب : العريس اللى قولتيلي عليه امبارح
ولاء : اااه لا اكيد بابا مش هيغصبنى بس انت شد حيلك
دياب : حاضر يا حبيبة قلبى ... لولو
ولاء : نعم يا حبيبي
دياب : انا بحبك اوى
ولاء : وانا بموت فيك
_____**_____**_____**_____**_____**_____**_____**_____
فى بيت عادل السلحدار ...
(. وليد ووائل قاعدين في اوضتهم , كل واحد ممدد على سريره مستنين
العيلة لما تتجمع علي الغدا .)
وائل : عايز احكيلك علي حاجة
وليد : الشغل ولا هيام
وائل : لا كده ولا كده
وليد : امال ؟
وائل : دياب شريكى
وليد: ماله
وائل : اتكلم معايا مرتين تلاته كده بس بطريقه غير مباشره عن ولاء
وليد باستغراب : ولاء !! اختك
وائل : هو فى غيرها
وليد : وانت سيبته يتكلم عن اختك كده عادى وبعدين بيتكلم بيقول ليه ؟
وائل : ما تبطل الحمقة اللى انت فيها دى , قولتلك بيتكلم بطريقة غير
مباشره مقدرش اقوله حاجة وبعدين انا حسيت انه عايز يتقدملها بس متردد , حسيت انه
قلقان افهمه غلط
وليد : طيب وهو كويس ؟
وائل : اه دياب محترم وابن ناس وكمان مستقبله كويس
وليد : بس حاسب يا وائل لا يكون دياب معلق ولاء اصلاً
وائل : مش للدرجه دى انت شكاك زيادة
وليد : وانت بتآمن للناس بـ زيادة
وائل : سيبك انا هتأكد من الموضوع ده بطريقتى
وليد : بقولك يا واؤول انا عايز اخد رأيك فى حاجه مهمه
وائل : خير يا برنس
وليد : انا عايز اسافر بس من غير مابوك وامك يعرفوا
وائل : نعم !! ده اللى هو ازاى
وليد : انا هاعمل كل الاجراءات والسفر هيبقى واقف على الحجز مش اكتر
وبعدين اقولهم لان امك رافضه تماماً
وائل : طيب وانت عايز تسافر ليه اساساً
وليد : وهو انا قاعد هنا بعمل ايه ؟
وائل : اديك وسطينا ومعانا
وليد : بعمل ايه انا معاكوا ووسطيكوا
وائل : مانت اللى مش عايز ......
وليد يقاطعه : يووووه , هتساعدنى ولا لا
وائل : طيب فكر واحسبها , انت هتسيب كل حاجه هنا وهتسيبنا وعشان ايه
يعني
وليد : عشان مش لاقى نفسى هنا , حاسس انى لو فضلت هنا او كده هموت
نفسى
وائل : ماشى يا وليد بس اجل الموضوع ده شوية
وليد : مانا مأجله بقالى كتير
وائل : شوية كمان , انا هطلع اشوف الغدا جهز ولا لا
_____**_____**_____**_____**_____**_____**_____**_____
فى بيت محمود السلحدار ...
(. ملك راجعه من بره مكتأبه جداً والضيق باين عليها , قلقت عليها
فريال لانها خارجه غير كده خالص .)
فريال بقلق : مالك يا حبيبتى
ملك (بتقفل باب الشقه) : مفيش
(. تجرى عليها مليكة وتحضن رجلها وتقول كلمات كتيرة وتعبر عن سعادتها
انها شافت ملك .)
ملك (بتاخر مليكة) : شيلى البت دى بعيد عنى
فريال (بتشيل مليكة) : طيب انتِ كويسه
ملك (وهى داخله اوضتها) : اه
(. دخلت ملك اوضتها وقفلت الباب على نفسها , فريال خدت مليكة ودخلت
بيها جوه وقالت لنفسها "الحاله رجعت تانى يا ملك" .)
__**__**__
فى اوضة ملك ...
(. دخلت ملك اوضتها وقلت بالمفتاح , قعدت على سريرها وسندت ضهرها على
راس السرير , رمت شنتطها جنبها وبعدين طلعت منها سيجاره وفضلت تدخنها وهى بتفكر في
كلام يزن , مخها رجع بـيها لـ ذكريات قديمه .)
FLASH BACK
في البيت القديم فى عمارة عائله السلحدار ...
(. محمود وفريال ومُعز قاعدين بره فى الصاله
وملك فى اوضتها تعبانه ومرهقه من الحمل ولكنها سامعه كل اللى بيحصل بره .)
فريال : روحتوا لـ وليد ؟
مُعز : مش راضى يطلق
فريال : رافض خالص !!
محمود : مش عايز يا فريال وقال مش هيطلق حتى لو قضى عمره كل في السجن
فريال : هو اتجنن !! هو الجواز بالعافيه
مُعز : بيقول بيحبها
فريال بعصبيه : حبه برص , بلا حب بلا قرف ده احنا مشوفناش منه الا
القرف والهم والمشاكل
محمود بحرقة : كان يوم اغبر
فريال بعصبيه وصوت عالى : مانا قولتلك , قولتلك متروحش لـ كلب زى ده
تطلب منه الطلاق ده مالوش كبير ولا بيهمه حد
مُعز : ايوة يا ماما يعني عيزانا نعمل ايه , هنسيبها على ذمته يعني ؟
فريال : نرفع قضيه خلع ولا طلاق لكن منفضلش تحت رحمه الزفت ده
محمود يقف ويرد بعصبيه على غير عادته : مينفعش , مينفعش نتنيل ونرفع
قضيه خلع
فريال تقف قصاده : ليه ؟
مُعز : وطوا صوتكوا , ملك ممكن تسمعنا
فريال : عايزه افهم ليه مينفعش نرفع خلع
محمود ماشي وسايبهم : فهم امك
(. ودخل محمود وسابهم .)
مُعز : يا ماما انتوا عايزين تاخدوا ضمانات من وليد انه مالوش علاقة
بـ ملك ولا ابنه ولا حتى بعد مليون سنة , الضمانات دى لازم تاخدوها منه بارادته
يعني لازم يطلق بمزاجه ويوافق انه يمضيلكوا على كل الاوراق اللى انتوا عايزينه
يمضى عليها ده غير انه لو اتخلع او رفعنا طلاق فـ هو بعد كده من حقه ياخد حضانه
ابنه او يرفع قضيه وياخده او ابسط حاجه يرفع قضيه وياخد حكم برؤيه ابنه على الاقل
كل اسبوع مره
فريال بتقعد : حسبى الله ونعم الوكيل , كان ايه لازمتها الوحلة اللى
احنا فيها دى
مُعز : النصيب بقى
__**__**__
-تفوق ملك والدموع ماليه عيونها وتقول لنفسها >> مش فاكرة حد فيهم قالى عايزة تطلقى
ولا لا !! مش فاكرة فى اى حاجه حد سألنى عن رأيي ولا عايزة ايه ولا حتى نفسي فى
ايه
(. يقطع خلوتها مع نفسها اتصال هادى بيها وتتحكم ملك فى دموعها وترد
على هادى .)
ملك : ايوة يا هادى
هادى : ايه يا حبيبتى فينك
ملك : موجوده
هادى : وحشتيني
ملك : انت مسافر امتى يا هادى
هادى : يعني عشر ايام كده ان شاء الله
ملك : هادى انا شايفه ان ارتباطنا ممنوش فايدة خلينا ننفصل وكل واحد
فينا يروح ....
هادى يقاطعها : ايه اللى بتقوليه ده يا ملك انتِ مش عارفه انا بحبك قد ايه
ملك : انا مش هستحمل فى يوم تعايرنى بحاجه
انت اكتشفتها
هادى : انا اعايرك يا ملك !!
ملك : هادى , ارجوك ده الصح
هادى : ملك انتِ لسه متأثره باللى حصل امبارح
بس بصى اهدى كده وانا مش هكلمك ولا هضغط عليكي لحد ما تنسى واوحشك
ملك : هادى انا بحبك وانت فعلاً واحشنى بس
خلينا نفكر بالعقل , انا اهو بقولك انى سيئه فوق ما تتصور وانا مش هقدر احكيلك اى حاجه
ولا مستعده انك تكشف حاجة فى يوم من الايام
هادى : انتِ كده بتخلى دماغى تروح لـ حتت غلط
ملك : وانا مش هصلحلك الغلط اللى انت فهمته
هادى : للدرجة دى !!
ملك : انا من اول ما اتقابلنا تانى وانا
قولتلك ....
هادى يقاطعها : قولتيلي انك اتغيرتى وانا مش
معترض لانى انا كمان اتغيرت , بس كنت متأكد اننا هنقدر نرجع الحاجات الحلوة اللى
بينا تانى , هنقدر نكون افضل بوجودنا سوا , ملك انا بحبك
ملك بدموع محبوسة : وانا والله بحبك اوى وعشان كده بقولك نبعد
هادى : وانا مش هبعد يا ملك , هبعد بس كام يوم لحد ما تهدى
ملك : طيب فكر في اللى قولتهولك
هادى : وانتِ كمان فكرى في اللى قولتهولك .. خدى بالك على نفسك
ملك : حاضر وانت كمان
(. وقفلوا وقامت ملك غيرت هدومها وخدت دش وكانت متوقعه ملك ان يزن
يكلمها ولكن على غير العادة متصلش بيها خالص من ساعه ما مشيت وسابته .)
_____**_____**_____**_____**_____**_____**_____**_____
فى عمارة عائلة السلحدار ....
(. وليد طلع على السطوح يشم الهوا بعد الغدا , شافته هيام وهو طالع فـ
طلعت وراه , وليد كان ضهره لـ هيام , جت هيام ووقفت وراه وهو حس بوجود حد واقف
وراه ولكنه متلفتش .)
هيام : اذيك يا وليد
وليد : اذيك انتِ
-هيام تروح تقف جنبه
هيام : فينك بقالك فترة مبشوفكش
وليد : موجود بس مبخرجش كتير
هيام : انت زعلان منى ولا من بابا
وليد : وانا هزعل من باباكى ليه ؟
هيام : عشان اللى كان حصل على السلم تحت يوم ماقولتلك انى روحت لـ ملك
وليد : باباكى خايف عليكي يا هيام وده حقه ومينفعش ازعل من واحد خايف
على بنته
هيام : عندك حق انت برضه اكيد حاسس بيه وعاذره مانت اب
-بص وليد لـ هيام بصه كانت عينه بتلمع فيها
هيام : هو انت بتشوف بنتك ولا لا
وليد : هيام انتِ عايزة ايه ؟
هيام : انت اللى عايز ايه !! يا وليد انا بحبك جرب تقرب منى وتحبني
خلينا نبدأ سوا من جديد وننسى اللى شوفناه فى حياتنا
وليد : هيام انتِ بنت ممتازة اى حد يتمناكى بس انا مش عايز اظلمك
هيام : طيب جرب يا وليد , صدقنى انا وانت انسب اتنين لبعض
وليد : انسب اتنين !! ليه ؟
هيام : قرب منى واعرفنى وحاول تحبنى وانت هتعرف السبب
(. ومشيت هيام وسابت وليد واقف على السطوح وهو بيحاول يفهم هيام تقصد
ايه , رجع وليد بذكرياته شوية وافتكر انه سمع الكلام ده قبل كده .)
FLASH BACK
(. هيام ووليد قاعدين على
السطوح بيراقبوا برج الحمام بتاع جدتهم , كانت ملك عندها 15 سنة وهيام 18 سنة
ووليد 21 سنة , جت ملك وقالت لـ هيام ان مامتها بتسأل عليها ونزلت هيام وقعدت ملك
جنب وليد وملك كان طاير من الفرحه كعادته لما تكون ملك قريبه منه .)
ملك : وليد , هو انت وهيام مرتبطين
وليد : لا طبعاً ليه بتقولى كده ؟
ملك : بحس كده وانتوا قاعدين جنب بعض او
بمعنى اصح بحس ان هيام لزقالك
وليد بابتسامة : انتِ غيرانه ؟
ملك : غيرانة !! انت عبيط لا طبعاً
وليد : امال ؟
ملك : والله بسأل عادى مقصدش حاجة
وليد : طيب انتِ ايه رأيك ؟
ملك : انت وهيام انسب اتنين لـ بعض
وليد باستغراب : انسب اتنين لـ بعض ازاى مش
فاهم
ملك : قرب لـ هيام واعرفها كويس وانت تفهم
يعنى ايه
وليد : لا بجد يعني ايه ؟
ملك : صدقنى زى ما بقولك كده لما تقرب منها
وتعرفها كويس هتعرف ان انتوا مناسبين لبعض وان شخصياتكوا قريبه من بعضها
وليد بخباثة: بس انتِ غيرانه برضه
ملك بدلع : طالما انت مصمم يبقي ماشى
__**__
يفوق وليد وهو بيقول لـ نفسه >> ايه
حكاية انسب اتنين لبعض دى !!
_____**_____**_____**_____**_____**_____**_____**____
تانى يوم فى شركة وائل ودياب ....
(. دياب كان فى الحمام ووائل خد باله ان دياب ساب مكتبه , قام وائل
ودخل اوضة مكتب دياب , مسك موبايله اللى كان سايبه على المكتب وشايل الباسوورد من
عليه , دخل وائل ومسك الموبايل وفتحه وكتب رقم ولاء اخته , جه دياب من الحمام لقى
وائل ماسك الموبايل , وقف دياب عند باب اوضة المكتب ومدخلش وفضل يبص لـ وائل ووائل
بيبدل نظراته بين شاشة الموبايل وبين دياب .)
اشوفكم الحلقة الجاية
ارجوع التقييم بـ تعليق :)
_____**_____**_____**_____**_____**_____**_____**_____
بـ قلم آلاء الشريفى
sh5abytalaa.blogspot.com
