شخصيات القصة الاساسية
عمر : ٥٢ سنة ، رجل اعمال
مديحة : ٥٠ سنة ، موظفة
مؤمن : ٢٦ سنة ، خريج كلية تجارة
شريفة : ٢٤ سنة ، خريجة كلية السن
زياد واياد : ٢٣ سنة ، (توأم) ، خريجين ادارة اعمال جامعة امريكية
*_____________________________________________**___________________________*
الحلقة الاولى ..
فى بيت مديحة ....
مديحة : انتِ هتفضلى قاعده على الزفت ده كتير
شريفة : فى ايه يا ماما
مديحة : فى ايه انك ٢٤ ساعة قاعدة على النت
شريفة : معلش يا ماما بقى
مديحة : ممكن اعرف انتِ بتعملى ايه
شريفة : بدور على شغل لـ مؤمن
مديحة : مش هنخلص من مؤمن ده بقى هو مبيعملش حاجة لنفسه
شريفة : يا ماما ماهو بيشتغل فى البنك بس انا بدورله يمكن نلاقى شغل احسن
مديحة : ربنا يكرمه يا ستى عشان تتجوزوا بقى ولا هو مطول
شريفة : يا ديحة انتِ كل يوم تسألى نفس السؤال رغم انك عارفة ان لسه تشطيبات الشقة مخلصتش
مديحة : طيب قومى بقى افطرى عشان فى مشوار عيزاكى تروحيه معايا
شريفة : مشوار ايه
مديحة : قومى بس افطرى وبعدين هقولك
شريفة : حاضر
(. قامت شريفة من على النت عشان تفطر مع مامتها .)
شريفة : ها يا دوحة عايزة تروحى فين
مديحة : زيارة لـ مريض
شريفة : مين ؟
مديحة : ده جوز واحدة صاحبتى تعبان ومحجوز فى المستشفى
شريفة : طيب انتِ رايحة تزورى جوز صاحبتك العيان انا مالى
مديحة : هروح لوحدى يعنى
شريفة : لا ازاى انا باخد الجمعة والسبت اجازة عشان اروح معاكى المشاوير
مديحة : احترمى نفسك
شريفة : طيب ممكن اخرج مع مؤمن شوية
مديحة : يا سلام على الاحترام مانتِ كل يوم بتخرجى معاه ولا فكرك يعنى انا مش عارفة
شريفة : طيب خلاص هنروح امتى لجوز صاحبتك ده
مديحة : بعد العصر كده
شريفة : ماشى هخرج بقى اتغدى مع مؤمن
مديحة : ماشى يا اختى
*_____________________________________________**___________________________*
فى احد المطاعم على النيل :
شريفة : ليه كده يا مؤمن ما كنا كلنا فى اى مطعم ميكونش غالى كده
مؤمن : يوووه يا شريفة هو انا معرفش افرح معاكى لازم تنكدى كده
شريفة : والله يا حبيبي ما قصدى انكد عليك بس .........
مؤمن يقاطعها : عارف هتقولى ايه ، احنا المفروض نتجوز واى فلوس نوفرها جوازنا اولى بيها عارف كل ده بس مفهاش مانع لو روحنا عن نفسنا شوية بدل ما نطق
شريفة : خلاص يا حبيبي حقك عليا
مؤمن : عارفة يا شريفة ساعات اقول لنفسى لو كان اهالينا سابوا لينا ميراث كويس مش كان زمنا عايشين احسن من كده لكن اللى زينا مبيورثيش من اهاليهم الا وجع القلب والشقى
شريفة : ايه يا مؤمن الطريقة اللى بتتكلم بيها دى ، اول مرة اشوفك بتتكلم كده
مؤمن : زهقت
شريفة : زهقت !! زهقت من ايه يا حبيبي احنا احسن من غيرنا بكتير احنا اتعلمنا تعليم كويس غيرنا معرفش ياخد الابتدائية ، بناكل تلت وجبات فى اليوم غيرنا مش لاقى وجبه واحدة اى نعم اهالينا مسابوش لينا فلوس بس لما كانوا عايشين صرفوا علينا ولما ماتوا سابوا لينا السمعه الطيبة
مؤمن : كلامك كله صح بس السمعه الطيبة دى بقى تتصرف من انهى بنك
شريفة : اقولك حاجة وتصدق
مؤمن : قولى
شريفة : انا لما بروح مكان حد يعرف بابا الله يرحمه فيه ويقولوا دى بنت مصطفى المنياوى وفعلاً عرف يربى احلى عندى من فلوس الدنيا كلها
مؤمن : يا حبيبتى انا فاهم ومقدر كل ده بس الزنقة اللى احنا فيها بسبب الجواز دى خنقانى
شريفة : يااااه يا مؤمن جاى تتخنق دلوقتى بعد ما خلاص جبنا الشقة والتشطيبات قربت تخلص وانا كمان حاجاتى خلصانه جاي تزهق دلوقتى
مؤمن (بيوطى دماغه) : كان نفسى اشتريلك فستان الفرح زى ما وعدتك زمان وكمان الشقة ايجار مش ملك
شريفة : يا حبيبي الحمد لله على كل شئ غيرنا مش عارفين يتخطبوا حتى وبعدين انا قولتلك اول ما ارتبطنا انك مش ملزم قدامى باى وعد غير انك تتجوزنى واهى هانت
مؤمن : الحمد لله طبعاً بس عارفة لو ......
شريفة تقاطعه : بلاش لولوة يا مؤمن لانها تفتح عمل الشيطان
مؤمن : ربنا يخليكي ليا يا شريفة بجد انا بحبك اوى
شريفة : وانا بموت فيك اوى اوى
مؤمن(مسك ايد شريفة) : ربنا ما يحرمنا من بعض ، عارفة يا شيفة انا لو بتمنى فلوس كتير فده عشان اسعدك ومحرمكيش من اى حاجة
شريفة : انا سعادتى فى انى اكون جنبك انا مفيش فى نفسى حاجة غير انى ابقى جنبك
مؤمن : وانا اكيد يعنى مش هحرمك منى ، قوليلي بقى ايه اكتر حاجة بتحبيها فيا
شريفة : اممممم ، خوفك عليا اولاً طبعاً وثانياً انك دايماً بتدور على الحاجة اللى بحبها وتعملهالى
مؤمن(بيبوس ايدها) : ربنا يقدرنى واسعدك كمان وكمان
شريفة : ربنا ميحرمنيش منك يا مؤمن
مؤمن : ولا يحرمنى منك يا حبيبتي
*_____________________________________________**___________________________*
فى بيت مؤمن ...
سميرة (ام مؤمن) : انت كنت فين
مؤمن : كنت بره
سميرة : مانا عارفة انك كنت بره ، قصدى كنت بره فين
مؤمن : كنت عازم شريفة على الغدا
سميرة : يا ابنى وفروا تمن العزومات دى انتوا محتاجين كل مليم عشان تتجوزوا
مؤمن : يا ماما ده انا باخدها على اى عربية ساندوتشات وناكل يعنى حد قالك ان احنا بنروح الـ 4 season
سميرة : يا حبيبي ربنا يكرمكوا وتروحوه بس انا قصدى عشان نفرح بيكوا بقى
مؤمن : قريب والله يا ماما متقلقيش
سميرة : يارب يا حبيبي يكملكم على خير
مؤمن : يارب يا ماما
(. هنا جت ايمان - اخت مؤمن ، ٢٠ سنة - .)
ايمان : انت تعرف واحد اسمه سعيد المنياوى !!
مؤمن : طالما المنياوى يبقى من عيلة شريفة اكيد
ايمان : اهو سعيد ده بقى يبقى ابن عم ست شريفة بتاعتك
مؤمن : مش فاهم فين المشكلة
ايمان : الواد ده معايا فى الجامعه وقليل الادب وسمعته وحشة جداً وبيقولوا كمان ان سمعة اهله مش تمام
مؤمن : وانتِ تعرفيه منين
ايمان : انا معرفوش بس واحدة صاحبنى عرفت انه ابن عم شريفة وجت قالتلى
مؤمن : ايوة يعنى انا برضه مش فاهم انتى عايزة ايه
سميرة : متزعلش مننا يا مؤمن احنا بنحب شريفة بس مينفعش تتجوز واحدة عيلتها فيها ناس سمعتهم وحشه كده
مؤمن : اهااا فهمت
سميرة : فهمت ايه ؟
مؤمن : يعنى انتوا عايزنى اسيب شريفة
ايمان : المفروض
مؤمن :اولاً يا ست ايمان سعيد ده رجل يعنى مفيش حاجة هتعيبه ومفيش رجل سمعته بتتلوث وثانياً بقى يا ماما انا مش هسيب شريفة ولو على جثتى ياريت تفهموا الكلام ده
سميرة : يا ابنى احنا خايفين عليك
مؤمن : متشكر جداً
(. دخل مؤمن اوضته و اتصل على شريفة .)
مؤمن : ايوة يا حبيبتى انتِ فين كده
شريفة : انا فى التاكسى رايحه مع ماما المشوار اللى قولتلك عليه
مؤمن : طيب خدى بالك من نفسك وابقى طمنيني عليكي
شريفة : حاضر يا حبيبي بس انت مال صوتك
مؤمن : مضايق شوية
شريفة : من ايه
مؤمن : انتِ ليكي واحد قريبك اسمه سعيد المنياوى
شريفة : اه ده ابن عمى ماله
مؤمن : ممالوش لما ترجعى من المشوار ده نبقى نتكلم
شريفة : اوكى يا حبيبي (وقفلوا)
*_____________________________________________**___________________________*
فى مستشفى دار الفؤاد ......
(. شريفة ومديحة راكبين تاكسى وركن قدام مستشفى دار الفؤاد .)
شريفة بصوت واطى : ماما ماما
مديحة : فى ايه
شريفة : انتِ متأكده ان جوز صاحبتك فى المستشفى دى
مديحة : وايه المشكلة
شريفة : يعنى ايه ايه المشكلة دى غالية نار مبيجهاش الا الوزرا والناس الاغنية اوى
مديحة : استنى احاسب التاكسى
(. حاسبوا التاكسى ونزلوا .)
شريفة : ماما انتِ شكلك غلطانه فى العنوان
مديحة : بطلى رغى بقى وتعالى ندخل نزور الراجل
شريفة : اول مرة اعرف انك تعرفى ناس نضيفة كده
مديحة : بطلى قلة ادب
>>. فى استقبال المستشفى .<<
مديحة : لو سمحت استاذ عمر ابو الوفى فى اوضة كام
موظف الاستقبال : ثانية واحدة (ودور على الكمبيوتر) الاستاذ عمر ابو الوفى فى جناح رقم ١٠
مديحة : اوكى شكراً
شريفة : كمان فى جناح مش اوضة
مديحة : تعرفى تسكتى شوية
شريفة (وهى بتبص لسقف المستشفى) : اممم هحاول اسكت يا ديحة
(. خبطت مديحة على باب الجناح ودخلت ، كان فى استقبال الجناح اياد وزياد ولاد عمر .)
مديحة : مساء الخير
إياد : مساء النور مين حضرتك
مديحة : انا معرفة بابا وماما وجاية ازو باباك لما عرفت انه عيان
إياد : اهاا اهلاً بحضرتك
مديحة : ممكن ادخله اشوفه واطمن عليه
زياد : لازم
مديحة : لو مفيش مانع
إياد : لا طبعاً يا طنط مفيش مانع بس هو الدكتور مانع زيارة اكتر من خمس دقايق
زياد : ومانع ان يدخله اكتر من شخص
مديحة : هدخله انا لوحدى
شريفة : طيب وانا يا ماما
مديحة : استنى هنا لحد ما اجى
إياد : اتفضلى يا طنط
(. خبطت مديحة على باب اوضة عمر ودخلت .)
مديحة : اذيك يا عمر
عمر : الحمد لله (واتلفت لها) انتِ مين !!
مديحة : مش فاكرنى يا عمر
عمر : مش واخد بالى
مديحة : مش لازم تاخد بالك انا جاية اطمن عليك
عمر : متشكر بس حضرتك مين
مديحة : اشوف وشك بخير يا عمر
(. وخرجت بره لـ استقبال الجناح .)
مديحة : يالا يا شريفة
شريفة : اوكى عن اذنكم (وخرجوا)
عمر : يا اياد يا زياد
زياد : نعم يا بابا
عمر : اياد فين
زياد : نزل يشوف حاجة وجاى
عمر : مين الست اللى كانت هنا
زياد : منعرفش يا بابا دى جت هى وبنتها وقالت انها معرفة حضرتك انت و ماما
عمر : وهو اى حد يقولك يعرفنى تدخله على طول
زياد : انا قولت يمكن صاحبة ماما او اى حاجة يعنى
عمر : يا متخلف امك ماتت من تلت سنين
زياد : انا عارف بقى يا بابا هى يعنى كانت عملت ايه
عمر : اطلع بره يا واد ومدخلوش عليا حد غير لما تسألونى
(. هنا جه الدكتور .)
الدكتور : فى ايه يا جماعة الانفعال ده غلط على حضرتك
زياد : يا دكتور هو اللى بينفعل على اتفه الاسباب
عمر : عشان مخلف ناس متخلفة
الدكتور : ياريت حضرتك تهدى الانفعال ده كده بيرجعنا ١٠٠ خطوة لورا
عمر : مانا يا دكتور مش حاسس باى تحسن
الدكتور : اهم حاجة حضرتك تبعد على الانفعال والباقى ده بتاع ربنا
عمر : وانا هفضل فى المخروبة دى كتير انا عندى شغل بره
الدكتور : صحتك اهم مليون مرة من الشغل
زياد : يا بابا متقلقش انا باخد بالى من الشغل
عمر : بامارة الست اللى دخلتلى
الدكتور : انا هديلك حقنة توطى الضغط لانه عالى جداً وياريت حضرتك تنام شوية عشان تستريح
عمر : ماشى
(. وخد عمر الحقنة وخرج الدكتور وزياد بره عشان ينام .)
زياد : هو هيفضل محجوز فى المستشفى كتير
الدكتور : اه شوية لحد ما نطمن عليه الازمة اللى جت لوالدك لو مكنش صحته كويسة كان بعد الشر راح فيها
زياد : الحمد لله
الدكتور : ربنا يطمنكم عليه (وخرج)
*_____________________________________________**___________________________*
فى التاكسى .....
شريفة : انا مش فاهمه حاجة
مديحة : مش فاهمه ايه
شريفة : فين صاحبتك اللى انتِ كنتى رايحه تزورى جوزها وليه مكملتيش حاجة جوه
مديحة : صاحبتى دى اتوفت
شريفة : ربنا يرحمها بس انتِ رايحة تزورى جوزها ليه طالما هى ميته
مديحة : عشان عمرها ما قصرت معايا
شريفة : وجوزها يعرفك يعنى
مديحة : لا معرفنيش
شريفة : وعادى كده
مديحة : انا لما لقيته مش عارفنى قولتله انى جاية اطمن عليه وخرجت
شريفة : حصل خير
مديحة : ان شاء الله
*_____________________________________________**___________________________*
فى بيت مؤمن .......
سميرة : انت زعلان منى
مؤمن : لا مش زعلان
سميرة : انت واثق انى بحب شريفة ولا لا
مؤمن : لا واثق وبتحبيها اوى كمان
سميرة : والله بحبها لو مش عشان هى طيبة وغلبانه يبقى عشان انت بتحبها
مؤمن : امال ايه الفيلم اللى انتِ وايمان عملتوه ده
سميرة : فيلم !!
مؤمن : اه فيلم
سميرة : لا مش فيلم ، سعيد ده بقالنا اكتر من سنة واحنا عارفينه وعارفين انه مش كويس ومش عايزين نقولك عشان متزعلش
مؤمن : امال ليه دلوقتى قررتوا تقولولى
سميرة : عشان سمعته السيئة طالت شريفة
مؤمن : مش فاهم
سميرة : يعنى اللى يعرف ايمان بيقولها سعيد ابن عم شريفة
مؤمن : انا مش فاهم سعيد ده بيعمل ايه يعنى
سميرة : بتاع بنات وبتاع ليالى قذرة ومخدرات وقرف
مؤمن : وايه علاقة شريفة بالموضوع
سميرة بارتباك : فى ناس بيقولوا ان اكيد شريفة زيه
مؤمن : قطع لسان اللى يقول على شريفة نص كلمه
سميرة : بس الناس مبتحرمش
مؤمن : الله يلعن ابو الناس اللى بتستبيح سمعة وشرف غيرهم
سميرة : اديني قولتلك اللى فيها وريحت ضميري
(. وقامت شريفة واتصل مؤمن بـ شريفة .)
شريفة : ايوة يا حبيبي
مؤمن : انتِ رجعتى ؟
شريفة : اه لسه داخله من شوية يدوب غيرت هدومى
مؤمن : مين بقى سعيد ده
شريفة : مانا قولتلك ده يبقى ابن عمى
مؤمن : بتشوفيه يعنى وبتتكلمى معاه
شريفة : مش دايماً بتسأل ليه
مؤمن : حكى لها الكلام اللى سمعه عنه وعن سمعته
شريفة : طيب وانا مالى يا مؤمن
مؤمن : مش ابن عمك
شريفة : ايوة بس انا مش مسئولة عنه ولا عن تصرفاته الكلام ده تقوله لو هو اخويا اقدر اخلى امى تلمه لكن انا ماليش دعوة بـ سعيد
مؤمن : بس ممكن سمعته السيئة دى تطولك
شريفة : مظنش انها توصل للدرجة دى
مؤمن : ماشى
شريفة : لا مش ماشى يا مؤمن بفرض انك سمعت عنى انا كمان كلام وحش ده يخليك تفقد الثقة فيا
مؤمن : اكيد لا يعنى
شريفة : بس كلامك دلوقتى بيقول غير كده
مؤمن : انا خايف عليكي مش اكتر
شريفة : اوكى
مؤمن : خلاص بقى متزعليش
شريفة : مش زعلانه يا مؤمن بس اتصدمت من رد فعلك تجاهك وانك بتحاسبنى على حاجة متخصنيش اصلاً
مؤمن : بحبك
شريفة : افكر
مؤمن : والله بحبك ومقدرش استغنى عنك
شريفة : وانا كمان والله بحبك اوى ومقدرش ازعل منك
*_____________________________________________**___________________________*
بعد كام يوم فى مستشفى دار الفؤاد .......
مديحة : لو سمحت الاستاذ عمر ابو الوفى لسه هنا
موظف الاستقبال : اه لسه موجود
مديحة : واولاده موجودين معاه ولا لوحده
موظف الاستقبال : هما بيبقوا موجودين فى اوقات معينه بس معرفش حالياً هما موجودين ولا لا
مديحة : اوكى متشكرة جداً
موظف الاستقبال : العفو
(. راحت مديحة للجناح الخاص بـ عمر ووقفت على الباب عشان تسمع مين جوه وقدرت تعرف ان فى واحد بس من ولاده جوه بس مقدرتش تعرف اذا كان زياد ولا اياد ، راحت للاستقبال وطلبت منه ينادى على زياد او اياد عمر ابو الوفى لانها مش عارفة توصلهم واول ما شافت ابنه نازل طلعت هى لـ عمر .)
عمر : انتِ مين يا ست انتِ
مديحة : مش فاكرنى يا عمر
عمر : لا مش فاكرك
مديحة : معلش اصل الزمن غيرنى اوى لكن انت لسه زى مانت هما كده ولاد الناس بيفضلوا زى ما هما اصلهم لا بيشيلوا هم ولا قرف الدنيا
عمر : قصدك ايه وبعدين انتِ لازم تقوليلي انتِ مين والا هبلغ الامن يجي ياخدك
مديحة : ارجع بالزمن ٢٥ سنة يا عمر وانت تعرف انا مين ، افتكر من ٢٥ سنة عملت ايه وافتريت ازاى
عمر : ٢٥ سنة !!
مديحة : انا مديحة يا عمر ، مديحة فاكرنى
عمر (وبدأ يفتكر) : مـ مـ مـديحة الشناوى
مديحة : ايوة مديحة الشناوى ، افتكرتنى يا عمر
عمر : انتِ ايه اللى فكرك بيا بعد السنين دى كلها
مديحة : ولا عمرى نسيتك ولا هنسى اللى عملته فيا
(. رجع عمر دماغه لورا وبص للسقف وبدأ يفتكر .)
FLASH BACK
__**__**__**__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق