الحلقة العاشرة
جزء من حلقة سابقة :
انس : اممم حاسك عايزة تقولى حاجة
نورهان : حاجة مهمه جداً بس مش عارفة اتوقع رد فعلك
انس : محى تانى ؟
نورهان : لا حد اهم من محى
أنس : مين ؟
*_____________________________________________**___________________________*
نورهان : ضيف هيجي عندنا
انس : ضيف مين
نورهان : واحد كده
أنس : مين ده يا نور وهيجي امتى وليه
نورهان : هيجي كمان تسع شهور
انس : نعم !! انتِ قصدك ايه
نورهان : انا حامل
انس مصدوم : ايه !! حامل
نورهان : ايوة يا حبيبي حامل انا مبسوطه اوى
انس : حامل ايه !! احنا متفقناش على كده
نورهان مصدومه : مـتـ ايه !! متفقناش !! هو احنا المفروض نتفق على حاجة زى كده !!
انس : انا قصدى كنتى اصبرى شوية لحد ما اخواتك يعرفوا
نورهان : خلاص نعرفهم احنا لسه فيها
انس : انتِ بتقولى ايه !! اكيد يعني مش هنلحق
نورهان : يعني انت عايز ايه دلوقتى
انس : مش عارف بس انت لخبطتى كل حسابتنا
نورهان : حسابات ايه دى ان شاء الله
انس : ان احنا نعرف اخواتك ونعرف شيرين
نورهان : انا مش عايزة حد يعرف ، انا عايزة احس انى عايشة عيشة طبيعيه
انس : وانا عملت كل اللى اقدر عليه عشان اعيشك عيشة طبيعيه
نورهان : ما علينا من كل ده انا دلوقتى اعمل ايه ؟ ايه المطلوب منى
انس : تنزلى الحمل ده لحد ما الامور تتظبط
نورهان : انزل الحمل !! يعني انت مش بس بتجرحنى كمان عايزنا نقتل روح ونشيل ذنبها انت اكيد اتجننت
انس : يا نورهان افهمى وجود طفل فى الوقت الحالى غلط طالما خلفتى يبقى لازم شيرين تعرف انى اتجوزت وخلفت
نورهان : وانا مطلبتش منك تعرف شيرين حاجة
انس : بس طالما فيها اطفال يبقى لازم تعرف ولازم محمد ونانسى يعرفوا انهم ليهم اخوات افرضى خلفتي بنت ومع الوقت هى ومحمد حبوا بعض يبقى ايه موقفنا ساعتها
نورهان : والله دى بقى مشكلتك انت عايز تعرف شيرين او لا دى حاجة متخصنيش
انس : كنتى قوليلي انك عايزة تخلفى وانا كنت ظبط نفسى وعرفت شيرين كل حاجة واخواتك كمان
نورهان : عايزة تخلفى !!! امال احنا متجوزين ليه يا انس
انس : قصدك ايه ؟
نورهان : انت فاهم قصدى كويس ، انت متجوزتنيش عشان خاطر الاستقرار والعيلة والاسرة (بزعيق) انت بتعاملنى انى عشيقة
انس بعصبية : بطلى بقى الكلام ده انتِ اكتر واحدة عارفة انا بحبك قد ايه
نورهان : بتحبنى اه بس انانى عايز كل حاجة ، عايز البيت والدفى والاسرة اللى مع شيرين وعايز الحب اللى معايا
انس بصوت مخنوق : انا انانى !! انانى ازاى وانا عمرى ما خدت حاجة بحبها ، امى ماتت وانا عيل عندى اربع سنين وقولت ربنا عايز كده عشت مع مرات اب واخوات عمرى ما حسيت انهم اخواتى ، حبيتك ومعرفتش اتجوزك برضه حمدت ربنا وقولت عايز كده ، اشتغلت شغلانه مبحبهاش واتجوزت ست مش عارف اعيش معاها ولا احبها وخلفت حتة منى من واحدة مبحبهاش ولازم احبها عشان خاطر ولادى ، اتخليت عن رجولتى واتجوزتك فى السر عشان لقيتها فرصه خايف اضيعها الدنيا تستكرها عليا ومترجعهاش تانى ويوم ما اخلف من الانسانه الوحيدة اللى حبيتها ابقى مضطر اتخلى عنه ، مبعرفش انام بسبب تأنيب الضمير ، لو عند شيرين احس انى بخونك ولو عندك احس انى بخونها
نورهان : ياااه ده انت مضحى اوى مكنتش اعرف انك بطل اوى كده
انس بعصبيه : لا مش بطل ، بس راجل انكسر واتجرح واتظلم وانتِ عمرك ما هتحسى بكسرة نفس او قلب او كرامه راجل
نورهان : كسرة قلب ونفس وكرامه ايه ده انت اتجوزتنى فى السر ومطلبتش منك اى حاجة ولا حتى انك تطلبنى من اخواتى
انس بزعيق : وهى دى كانت سهله عليا دى اكتر حاجة وجعتنى ، بس انتِ عمرك ما هتحسى بيا ، عمرك ما هتحسى بكسرة راجل شاف حبيبته بتتزف لواحد تانى وبمزاجها ، مش هتحسى بـ ذل راجل وهو بيتخيل حبيبته فى حضن راجل تانى ومن حقه كل حاجه ، مش هتحسى يعنى ايه راجل يتجوز واحدة غصب عنه (بزعيق) ويبقى ملزم باداء واجباته الزوجيه عشان ميتقالش عليه انه مش راجل
نورهان : بمزاجها !!
انس : ايوة يا نورهان كان بمزاجك ، (بزعيق) انتِ اتجوزتى محى بمزاجك ولا مش بمزاجك
نورهان : بس بعد سنتين من جوازك انت ، كنت عايزنى اعمل ايه افضل مستنيه سراب
انس : مقولتلكيش كده بس صعب اوى لما تبقى انت مغصوب على حاجة عشان خاطر انسان عمل نفس الحاجة بمزاجه
نورهان : تصدق انت المفروض يتعملك تمثال يا راجل
انس بعصبيه : انتِ ازاى مش حاسة بيا
نورهان : لانك عايز الناس تحس بيك وانت مش حاسس بحد ، انت فاكر ان سهل على واحدة تعيش مع واحد من حقه كل حاجة وهى مش قادرة تقول لا ، مش حاسس يعنى ايه واحدة تبقى خايفة ومرعوبة لـ تتخيل الراجل ده حبيبها وتبقى بتخونه وبتخون نفسها وتغضب ربها ، محستش بواحدة نفسها تكون ام وتحرم نفسها عشان مش عايزة تكون ام الا من الراجل اللى بتحبه ، عارف كام مرة بشوفك فى اماكن عامه مع شيرين وبستخبى ، عمرك فكرت انا بحس بايه لما تكون بايت عندها وانا مرميه هنا لوحدى
انس : انا حاسس بكل ده ومقدره وعايز اعوضك عن كل حاجة
نورهان : وعشان كده عايزنى انزل الجنين ، عايزنى العب دور العشيقة (بزعيق) بتعاملنى انى بيت الراحة !!
انس باستغراب : بيت الراحة !!
نورهان بعصبية : ايوة بيت الراحة ، المكان اللى بترتاح فيه من مشاكلك مع شيرين او من مشاكلك فى الشغل ، انا المكان اللى بتطلع فيه كبتك النفسى والعاطفى والجنسى
انس : اخرسى بقى متتكلميش كده ، بتجرحيني
نورهان : وانت مجرحتنيش لما ...........
انس يقاطعها : كفاية يا نورهان كفاية لو سمحتى
نورهان : انت رايح فين
انس : فى داهيه تاخدنى عشان الكل يستريح
نورهان : انس استنى يا انس
(. نزل انس وقعدت نورهان مخنوقه وبتعيط .)
*_____________________________________________**___________________________*
فى شقة منال ...
(. صحى محى من النوم ملقاش منال جنبه ، قام لبس هدومه ودور عليها ، لقاه قاعدة فى الريسبشن والمكان ضلمه وبتعيط .)
محى : مالك يا منال
منال : مفيش حاجة
محى : شكلك بتعيطي
منال : مفيش حاجه اجهزلك حاجة تاكلها
محى : طيب قوليلي مالك بس
منال : مكنتش عايزة اعمل كده ، زمان قولت انى عيلة وربنا سترها معايا لكن دلوقتى ايه حجتى
محى : على فكرة زمان يعنى احنا مكناش بنعمل حاجة بتهيألى من يوم ما عرفتك اول مرة نوصل للاخر
منال : كله حرام كله زنى
محى : طيب اهدى يا منال هو ايه النكد ده
منال : بصى يا محى احنا المفروض نتجوز
محى : نتجوز !!
منال : ايوة نتجوز
محى : انا عمرى ما فكرت فى حاجة زى كده
منال : نعم !! امال جاي بعد السنين دى ليه !! ولما انت عمرك ما فكرت تتجوزنى ليه عملت كده امبارح
محى : اهى جت كده يعنى مكنتش مترتبه ولا كان ده قصدى
منال : بس حصل واقل حق بعد كل اللى قدمتهولك فى السنين دى كلها انك تتجوزنى
محى : قدمتيلي ايه يعنى !! هو كان غصب عنك يعنى
منال : غصب عنى !! لا مكنش غصب عنى بس كنت مغيبه عشان بحبك
محى : انتٍ عايزة تقنعيني انك فجأة بقيتي بتحبيني
منال : لا مش فجأة من يوم ما عرفتك (بدموع) مسألتش نفسك ليه متجوزتش بعد ما جوزى مات مسألتكش نفسك ليه ؟
محى : ليه ؟
منال : كنت مستنياك ، كان عندى امل انك هترجعلى ، كنت حاسة انك هترجع وهنتجوز
محى : واديني رجعت بس مش هينفع نتجوز
منال : ليه طيب !! انت فعلاً مبتثقش فيا ولا شايفني رخيصة
محى : انا لسه بحب نورهان وانا معرفش ابدأ حياة جديدة وانا جزء منى متعلق بالماضى
منال مصدومه وبدموع : يعنى انت جيب بس عشان شهوتك مش اكتر
محى : صدقيني والله لما كلمتك مكنش فى نيتي حاجة زى كده تحصل
منال : اخرج بره يا محى
محى : نعم !!
منال : زى ما سمعت انا مش عيزاك فى حياتى الا اذا اتجوزتنى غير كده لا تتصل بيا ولا تجيلي
محى : اوكى يا منال (وخرج)
منال لنفسها >> انا خلاص مش هبقى ضعيفه تانى مش عايزة ابقى ضعيه (بدموع) بس انا بحبه انا فعلاً محتجاله
*_____________________________________________**___________________________*
فى شقة رضوى .....
( بهيرة راحت تزور رضوى وكان شكلها متعصب اوى .)
رضوى : مالك يا بهيرة فى ايه ؟
(. بهيره طلعت فلاشه من شنطتها .)
بهيرة : فى ده ؟
رضوى : ايه ده !
بهيرة : دى نفس الفلاشة اللى ممدوح ادهالى المرة اللى فاتت اللى عليها افلام اباحيه
رضوى : ادهالك برضه بالغلط !!
بهيرة : انا مبقتش فاهمه حاجة لما هى الفلاشة عليها حاجات مش عايز حد يشوفها ليه كل شوية يدهالى بالغلط
رضوى : ايه حكايته بقى سي ممدوح ده ، ده يستاهل الفضيحة فعلاً
بهيرة : انا هواجهه
رضوى : لا بلاش تحطيه فى موقف زى ده
بهيرة : طيب اعمل ايه
رضوى : اعملى عبيطه يا بهيرة
بهيرة : انتِ ازاى حاطه على قلبك مراوح كده
رضوى : عشان انا اكبر منك وعندى خبرة فى الحياة اكتر منك اسمعى كلامى بقى وصدقيني كل ده هيطلع على فاشوش
بهيرة : بس انا حاسة انه قاصد يدينى الفلاشة
رضوى : وانا كمان عندى نفس الاحساس وعشان كده لازم تعملى عبيطه وانك مش فاهمه حاجة
بهيرة : مش متفائلة بجوازى انا وممدوح حساه مريض بالافلام دى
رضوى : تفائلي وخلى ثقتك فى ربنا كبيرة وان شاء الله اللى جاى احسن واحسن
بهيرة : رضوى ممكن اسألك سؤال ومتزعليش
رضوى : من غير ما تسألى انا هجاوبك ، انا متجوزتش لحد دلوقتى لانى بكره صنف الرجالة كله وحاسة انى لو اتجوزت جوزى هيعمل فيا زى ما بابا عمل فى ماما الله يرحمها
بهيرة : بس الرجالة مش كلهم كده صدقيني
رضوى : طيب مانا عارفة بس لما مثلك الاعلى ينهار صعب تثقى فى اى حد حتى ثقتك فى نفسك بتنهار ، بابا كان بالنسبه ليا هرم واتهد
بهيرة : بس ده مكنش سؤالى
رضوى : امال ايه سؤالك ؟
بهيرة : انتِ بتقولى انك اتعقدتى بسبب بابا ازاى مكرهتيناش انا وبهاء وازاى بتقدرى تدى الناس امل فى الحياة ولو طاقتهم سلبيه تحوليها لـ طاقة ايجابيه
رضوى : انا اه اتعقدت بس موصلتش لـ مرحلة المرض ، انا مش مريضة مقدرش اكره معمليش حاجة انتوا مالكوش ذنب فى تصرفات بابا ولا اقدر اكره حد فى حياته لانى محبش حد يحس الاحساس ده
بهيرة : انتِ طيبة اوى يا رودى انا بحبك اوى
رضوى : وانا والله بحبكوا اوى ، انتِ وبهاء الحاجة الحلوة اللى طلعت بيها من الدنيا ، انتوا ولادى اللى مخلفتهوش
بهيرة : ربنا يخلينا لبعض
رضوى : امين يارب
*_____________________________________________**___________________________*
فى شقة نورهان .....
(. نورهان من ساعة ما أنس خرج من عندها وهى مخنوقة وبتعيط ، أنس نزل من عندها ومش عارف رايح فين لف شوية بالعربية ورجع لها ، دخل لقاها قاعد فى اوضة نومها وبتعيط .)
انس : انا اسف حقك عليا ، مكنش قصدى اجرحك او اضيع فرحتك بالحمل
نورهان : انا مش هنزل الجنين يا انس
انس : وانا مش عايزك تنزليه بس ممكن اسألك سؤال
نورهان : اسأل
انس : هتقولى ايه لاخواتك
نورهان : هقولهم الحقيقة ومش هستنى لحد ما يجوا
انس : يعنى ايه ؟
نورهان : اول ما الحمل يثبت ان شاء الله هسافر لـ طه او لـ هشام وهقولهم انى اتجوزت وحامل
انس : انا خايف عليكي تواجهى الموقف ده لوحدك ، طه اخوكى عصبى وممكن يتغابى عليكي
نورهان : اكيد يعني مش هيقتلنى وهى كده كده خربانه اصلاً
انس : زعلانه منى ؟
نورهان : اكيد
انس : انا اسف صدقيني خرجت عن شعورى سامحيني
نورهان : هسامحك لما احس انى مراتك مش عشيقتك
انس : والله عمرى ما حسيت انى متجوز الا لما اتجوزتك ، انا بحبك اوى يا نورهان وانتِ متأكده من كده
نورهان : وانا موجوعه اوى يا انس ومجروحه واللى حصل النهاردة صعب يتداوى بالسهولة دى
انس : انتِ جرحتيني وانا جرحتك يبقى ننسى بقى ونكمل حياتنا عادى
نورهان : عمرنا ما هنكمل حياتنا عادى يا انس بعد الحاجز اللى اتحط النهاردة
انس : والله العظيم بحبك وعمرى ما تمنيت اتجوز حد غيرك
نورهان : انا قايمه اخد دش عن اذنك (وقامت)
انس لنفسه بصوت مسموع >> يارب انت الوحيد العالم بحالى وعارف ان كل حاجة بتحصل غصب عنى ، يارب حللى امورى المعقدة دى ، يارب انا مش ظالم ولا حتى مظلوم انا انسان يعنى بغلط وانت يارب كبير سامحنى يارب لو ظلمت اى حد
(. نورهان دخلت الحمام اللى فى اوضة النوم وسمعت مناجاة انس لـ ربنا وغصب عنها دموعها نزلت منها .)
نورهان لنفسها >> عارفة انك اتظلمت كتير فى حياتك ونفسى دلوقتى اطلع واخدك فى حضنى واطبطب عليك بس كرامتى وجعانى اول مرة تجرحنى كده يا انس
*_____________________________________________**___________________________*
فى بيت طه ....
(. طه راجع من شغله لقى الشقة كلها ضلمه ، نور النور لقى بسمة عامله غدا رومانسى وتورته .)
طه باستنكار : ايه ده ؟
بسمة : دى حفلة بسيطه كده ليا انا وانت وبس
طه : فين العيال ؟
بسمه : فى النادى ، واحدة صاحبتى خادتهم مع اولادها
طه : ده ليه يعنى كل ده ؟
بسمه : عشان نبقى لوحدنا
طه (وهو متجه لاوضة النوم) : طيب مش كنتى تخليها فى يوم اجازة اانا مهدود خالص
بسمة : النهاردة عيد جوازنا يا طه
طه (بيوقف ويرجعلها) : عيد جوازنا !! ااااه تصدقى كنت فاكر بس ضغط الشغل لخبطنى
بسمة : لا ولا يهمك مش هتتغدى
طه : اكيد هنتغدى سوا ونطفى الشمع بمناسبه عيد ميلاد جوازنا
بسمه : انت بتتريق ؟
طه : انا اتريق عليكي برضه هدخل بس اغير هدومى واغسل وشى
بسمه : اتفضل
(. دخل طه يغير هدومه وهو بيكلم نفسه .)
طه لنفسه >> عيد جواز ايه ده كمان اللى نحتفل بيه ، ١٠٠ مرة اقولها مبحبش الجو ده مش ده الاسلوب اللى هتحرك بيه مشاعرى ، هنقضى السنة بقى احتفالات اعياد ميلاد واعياد جواز ايه الفضا والفراغ اللى هى فيه ده
بسمه لنفسها >> كل سنة يقولى نفس الجمله كنت فاكر بس ضغط الشغل لخبطنى ، لحد امتى يا طه هتفضل كده مش فاهم ان الستات بيحسبوها بالتاريخ والساعه ، نفسى تفهم ان الذكريات دى غاليه على قلب الست وبتحب تحتفل بيها
(. خرج طه لـ بسمة واتغدوا سوا واحتفل بـ عيد جوازه وهو مش عاجبه الجو ده وبسمه زعلانه ان طه كل سنة ياخد نفس رد الفعل .)
بعد حوالى ساعتين ......
بسمه : لحد امتى هتفضل متجاهل الذكريات الحلوة اللى بينا
طه : وانتِ لحد امتى هتفضلى مش فاهمه انى ماليش فى الجو ده
بسمه : ماله الجو ده بيوترك ليه
طه : يا ستى انا معنديش مانع نحتفل باى حاجة ان شاء الله عيد الام بس مش بالطريقة دى
بسمه : طريقة ايه ؟
طه : انى ابقى راجع مهدود من الشغل والاقيكي لازمانى باحتفال انا ببقى نفسى اطول السرير
بسمه : اى راجل فى الدنيا يتمنى مراته تعمله كده وانت مش عاجبك
طه : يا ستى مليون مرة اقولك الرجاله مش زى بعض ، انتِ ممكن تفكريني قبلها بيوم اظبط نفسى واظبط امورى ونخرج نحتفل بره
بسمه : انا بيقى عايزه اعملهالك مفاجأة
طه : ١٠٠ مرة اقولك مبحبش المفاجأت ومتقوليش كل الرجاله بتحبها ، صوابعك مش زى بعضها
بسمه : انت يعنى غاوى تنكد عليا
طه : انا احتفلت معاكى وانتِ اللى فتحتى نقاش وبدأتى بحدة وهجوم
بسمة : اه انا اللى غلطانه
طه : زى ما بقدر تعبك قدرى تعبى لو سمحتى ، انا داخل انام شوية
بسمه : تصبح على خير
طه : يعني يرضيكي فى يوم عيد ميلاد جوازنا انام لوحدى فى الاوضة ده حتى فال وحش
بسمه : يا سلام
طه : فكى بوزك ده وابقى فكرى فى كلامى على رواقه هتلاقيه منطقى
بسمه : حاضر هبقى افكر
*_____________________________________________**___________________________*
فى شقة بهاء وعلياء .......
(. بهاء راجع من بره لقى علياء نايمه فـ صحاها .)
علياء : حمد الله على السلامه يا حبيبي
بهاء : حبيبك مقموص
علياء : ليه كده بس
بهاء : لما الباشا ده لسه مشرفش وخدك منى كده امال لما يجي بقى هيحصل ايه
علياء : ما عاش ولا كان اللى ياخدنى منك
بهاء : امال ده اسمه ايه بقى ، انتِ يا حبيبتى مبقتيش معايا خالص
علياء : خلاص حقك عليا
بهاء : لا برضه زعلان
علياء : بطل دلع بقى
بهاء : لا مش دلع ، مراتى حبيبتى ركنانى على الرف يبقى ازعل ولا مزعلش
علياء : خلاص مراتك حبيبتك من دلوقتى هتنزلك من على الرف
بهاء : لما نشوف
علياء : والله يا حبيبي كل ده غصب عنى بس الحمل تاعببني اوى
بهاء : ماهى دى بدايه غير مبشرة
علياء : صدقنى مش ههملك تانى ابداً
بهاء : ماشى يا حبيبتى كملى نومك بقى
علياء : لا هقوم اعملك عشا ونتعشى سوا
بهاء : لا هتنامى انتِ شكلك مرهقه خالص
علياء : ده فرمان وصدر
بهاء : طيب يالا هساعدك
(. قامت علياء جهزت عشا وساعدها بهاء واثناء ماهما بيتعشوا كانوا بيتكلموا .)
علياء : عايزة اقولك على حاجه
بهاء : قولى
علياء : انت بتسهر كتير بره البيت
بهاء : عادى يا حبيبتى بقعد مع صحابى
علياء : بس ده كل يوم يا بهاء ، انت بتسبنى لوحدى فترات طويله
بهاء : ايه المشكله يعنى يا لولو
علياء : انت شايف ان مفهاش مشكله ؟
بهاء : انا شايف انه عادى
علياء : والله !! يعنى تسبنى طول الليل لوحدى وده عادى
بهاء : خلاص يا علياء هحاول ارجع بدرى
علياء : والسجاير والشيشة اللى قولتلي مليون مرة هبطلهم
بهاء : هو انا هبطل بس مش فى يوم وليلة
علياء : لما نشوف
بهاء : بصى يا لولو عشان مش طالبه خناق وافش على اخر الليل ، اختارى التوقيت اللى تتكلمى فيه وحاولى تدورى على طريقة تانيه توصلى بيها شكوتك وزعلك طريقة متخنقش اللى ادامك
علياء : يعنى انا خنقة ؟
بهاء : لا طبعاً بقى انا مراتى حبيبتى خنقة ، يالا هتدخلى تنامى ولا ايه
علياء : هلم الاطباق واجى
بهاء : ماشي يا حبيبتى معلش مش هساعدك مرهق جداً
علياء : لا ولا يهمك
*_____________________________________________**___________________________*
تانى يوم فى بيت انس وشيرين .......
(. انس صحى من نومه متأخر شوية .)
انس : صباح الخير يا شيرين
شيرين : صباح النور
انس : محمد نزل
شيرين : اه من بدرى
انس : ونانسى ؟
شيرين : لسه نايمه
انس : طيب انا عايز اتكلم معاكى فى موضوع مهم
شيرين : خير
انس : هدخل الحمام بس وانتِ جهزيلي اى حاجة اكولها
شيرين : حاضر
(. قعد انس وشيرين فطروا وشيرين مش على بعضها ومترقبه انس هيقولها ايه .)
شيرين : خير يا انس
انس : هقولك ، بس عايزك تعرفى ان اللى هقوله ده حاجه اضطراريه
شيرين : مش فاهمه حاجة ما توضح
انس : هفهمك
شيرين : ها ؟
انس : .................................
__*__*__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
جميلة الحلقة كالعادة
ردحذف