الحلقة الرابعه عشر (الاخيرة)
جزء من حلقة سابقة ..
الدكتور : يؤسفنى اقولكم انها .......... (وسكت)
(. طه وهشام اتثبتوا مكانهم وبصوا لـ بعض والقلق باين عليهم .)
هشام : انها ايه يا دكتور ؟
*_____________________________________________**___________________________*
الدكتور : انها جالها جلطه فى الرحم ومنعت الدم يوصل للجنين ، والجنين بيتغذي على الدم اللى بيوصله داخل الرحم وبناءاً على كده الجنين مات
طه : احسن
هشام بص لـ طه بقرف : وهى يا دكتور اخبارها
الدكتور : هى فى غيبوبه
طه : غيبوبه !! ليه
الدكتور : عضوياً احنا مش قادرين نعرف السبب يعنى هى معندهاش حاجه عضويه تؤدى الى غيبوبه
هشام : قصد حضرتك ان السبب ممكن يكون نفسي
الدكتور : ده السبب الوحيد المنطقى لكن مفيش اى حاجه عضويه
طه : اوكى يا دكتور متشكرين جداً
الدكتور : العفو ربنا يطمنكم عليها عن اذنكم (ومشى)
هشام : انت معندكش دم على فكرة
طه : ليه يعنى ؟
هشام : الراجل بيقولك ابن اختك مات وانها عندها جلطه تقوم تقوله احسن
طه : انا مقولتش احسن انها جالها جلطه انا قصدى احسن ان الجنين مات
هشام : وايه الاحسن فى كده
طه : هى مش قالت انها عايزة تطلق ايه بقى يربطها بـ طفل
هشام : واحنا كنا عرفنا السبب اصلاً مش ممكن حاجة تتلم ودى وميحصلش طلاق
طه : هى اصلاً تستاهل كسر رقبتها ياريتها كانت ماتت وارتحنا منها ومن فضايحها
هشام : انا مش قولتلك من سنين وافق على اللى هى عايزه عملتلى فيلم هندى عشان متجوزهاش انس وتجوزها محى وكانت ايه النتيجه اطلقت من محى وراحت اتجوزت انس من ورانا لـ ثقتها انك مش هتوافق
طه : انت هتستعبط بقى هو كل من حب ومطالش هـ يهد حياته ويبدأ حياة جديدة مع اللى كان بيحبه وبعدين كان ماله محى كان بيعاملها احس معامله واهى اتجوزت اللى حبته وبعد كام شهر طلبت الطلاق
هشام : احنا برضه مش عارفين القصة ايه
طه : والنبى كفايه مش ناقصة الفلسفة بتاعتك دى دلوقتى
هشام : اهم حاجة تقوم بالسلامه وبعدين نشوف هنعمل ايه
طه : انا رايح الكافتريا اشرب قهوه هـ تجى ولا قاعد هنا
هشام : لا روح انت
*_____________________________________________**___________________________*
فى بيت انس وشيرين ...
(. شيرين لمت هدومها وهدوم عيالها وماشيه .)
انس : انتِ رايحه فين يا شيرين
شيرين : انا هروح بيت اهلى يا انس
انس : ليه طيب احنا مش اتفقنا انى هطلقها
شيرين : لما تطلقها هبقى ارجع
انس : يا شيرين انا عمال اعتذرلك كل شويه وانتِ مش عايزة تقبلى اعتذارى
شيرين : بص يا انس ، انا عشت معاك خمس سنين ، لا ستة سنين انا نسيت ان عيد جوازنا كان اول امبارح ، كنت واثقة انك مبتحبنيش وانك عايش معايا عشان محمد ونانسي ومش معترضه اطلاقاً وقررت انا كمان اضحى عشان خاطر ولادى قولت بيني وبين نفسى يعنى الراجل يضحى وانا لا ، وعشت معاك ونسيت انى ست وانثى وكمان دكتورة ، جردت نفسي من اى حاجة الا امومتى وفوق ده كله بقيت شغاله وكنت راضيه وبحمد ربنا لكن انت تروح تعيش حياتك عادى وانا حياتى وقفت اهو ده اللى مش هقبل بيه ابداً
انس : انا عارف انى غلطت وانى ظلمتك بس ربنا بيسامح انتِ مش هتسامحى
شيرين : انا مش بـ قوة وعظمة وسماحة ربنا عشان اسامحك
انس : طيب اديني فرصة اخيرة
شيرين : انا فى بيت بابا يا انس لحد ما تخلص موضوعك ده وبعدها نتحاسب
انس : يعنى ايه !! يعنى لو طلقت نورهان مش هتسامحيني
شيرين : لا اكيد لسه ليا حق عندك هاخده
انس : انا مش فاهم حاجة
شيرين : هـ تفهم لما تخلص موضوعك ده عن اذنك (ومشيت)
*_____________________________________________**___________________________*
عند مستشار العلاقات الزوجيه +18...
(. ممدوح وبهيرة قاعدين بره فى انتظار الدور .)
بهيرة : مالك يا ممدوح
ممدوح : انا مُحرج اوى يا بهيرة
بهيرة : بص يا حبيبي ، هدخل انا لـ الدكتور الاول احكيله كل حاجة بالتفصيل وبعدين انت تدخل يقولك على طريقة العلاج
ممدوح : اشمعنى يعنى
بهيرة : عشان متبقاش محرج وانت بتحكى
ممدوح : مانا هبقى مُحرج وانا بسمع طريقة العلاج
بهيرة : طيب يا ممدوح انا هسأله لو ينفع يقولى طريقة العلاج
ممدوح : يارب ينفع
سكرتيرة : مدام بهيرة سعيد
بهيرة : ايوة
سكرتيرة : دور حضرتك
بهيرة لـ ممدوح : انا هدخل عشان خاطرى متمشيش
ممدوح : حاضر
(. ودخلت بهيرة .)
بهيرة : مساء الخير
الدكتور : مساء النور اتفضلى
بهيرة : شكراً
الدكتور : ايه مشكله حضرتك بقى
بهيرة : لا لا انا معنديش اى مشكله ده جوزى
الدكتور : ماله جوزك ؟
بهيرة : جوزى مدمن افلام جنسيه ، بيشوفها بطريقة رهيبه والاخطر من كده انه بيبقى عايز يعيش اللى يشوفه ، بيطلب حاجات غريبة
الدكتور : حاجات غريبة زى ايه ؟
بهيرة اتكسفت ووشها احمر ووطت دماغها
الدكتور : معلش اديني مثال بسيط
بهيرة : ممكن يطلب حاجة حرام او حاجة مقززة
الدكتور : هو جوزك عارف انك جايه هنا
بهيرة : هو موجود معايا بس اتحرج يدخل
الدكتور : لا ياريت يدخل انا محتاج اشوفه
بهيرة : اوكى ثوانى
(. خرجت بهيرة لـ ممدوح واقنعته بـ طلوع الروح انه يدخل وبالفعل دخل واتكلم مع الدكتور شوية .)
الدكتور : بتشوف الافلام دى من امتى
ممدوح : من زمان ، من ايام سن المراهقة تقريباً
الدكتور : كنت بتشوفها بـ مُعدل كام مرة فى الاسبوع
ممدوح : زمان كان صعب اشوفها اكتر من مرة فى الاسبوع لان النت مكنش زى كده وكنا بقى بنشوف شرايط ڤيديو وكده فـ تقريباً كل ما كان يتوفر شريط و ڤيديو ومكان
الدكتور : وبعد انتشار النت
ممدوح : ممكن مرة فى اليوم
الدكتور : هل فى كل مرة كنت بتشوف فيها فيلم جنسي بـ تقوم بـ اداء العادة السرية
(. ممدوح بص لـ بهيرة وهو مُحرج فـ الدكتور فهم الاجابه من نظره عينه ومسألش تانى .)
الدكتور : علاقتك مع مراتك طبيعيه بصرف النظر عن الطلبات الغريبة
ممدوح : اه بتهيألى (وبيبص لـ بهيرة)
بهيرة : اه يا دكتور طبيعيه يعنى مفيش ضعف ولا برود
الدكتور : تمام ، بص يا استاذ ممدوح مبدأياً كده تقريباً مفيش شاب مبيشوفش الافلام دى بس المفروض مع التقدم فى السن الاهتمامات بتختلف والشاب ممكن يشوف الافلام دى بس مش بنفس القوة واللهفة بتاعة زمان وهو لسه مراهق او جامع معندوش مسئوليات تمام
ممدوح : تمام
الدكتور : بس لو وصل للمرحلة دى ، لازم تتعالج ، الدكاترة النفسيين بيتعاملوا مع مدمن الافلام الجنسية انه لا يقل ضرراً عن مدمن المخدرات او الكحوليات
ممدوح : يعنى انا مدمن ؟
الدكتور : بغض النظر عن المسميات ، دى حاجة وبقت للاسف منتشره ومش بين الرجاله بس لا كمان فى ستات بتدمن الافلام دى وهى اللى بتطلب الحاجات الغريبة
بهيرة باستغراب : ستات !!
الدكتور : بصي يا مدام ، خلينا نتفق ان مفيش اى حاجة حراام بين الزوجين الا اللى ربنا حرمه فى القرآن الكريم ما بُقى اياً كان مش حرام لان مفيش حاجة ذُكرت فى القرآن ولا السنه عنه
ممدوح لـ بهيرة : شوفتى
الدكتور بيبص لـ ممدوح : بس مينفعش اى حاجة تحصل بدون موافقة الطرف التانى والا يعتبر اغتصاب ، يعنى لازم الطرف التانى يكون موافق وعايز كده زيك بالظبط غير كده مش من حقك تمارس معاها حاجة هى مش عيزاها
ممدوح بتوتر : ايوة اصل انا يا دكتور ، اممم اصل ........
الدكتور يقاطعه : انا فاهم انك مبتوصلش للمتعه الا بالحاجات اللى انت اتعودت تشوفها ، خلينا نبدأ نحط خطه لـ العلاج
بهيرة : ياريت
الدكتور : مبدأياً النت والكمبيوتر يتفصلوا من البيت او يتعمل عليهم ارقام سريه حضرتك متعرفهاش
بهيرة : تمام
الدكتور : حضرتك يا مدام لاما هتطبخيله الاكل بـ زيت الخروع او زيت الكافور لانه بيقلل من الرغبه الجنسية
بهيرة : تمام
الدكتور : هقولك حاجة غريبة مينفعش دكتور يقولها
ممدوح : حاجة ايه ؟
الدكتور : لما تحس انك عايز تتفرج على فيلم قوم على طول اتوضأ وصلى او اقرأ قرآن ولو انت مسيحي روح الكنيسه اتعبد لـ ربنا ، ويُستحسن تصلى فروضك فى المسجد او تواظب على فروضك فى الكنيسه
ممدوح : تمام فهمت
الدكتور : صلى فى اى وقت تجيلك فيه رغبه انك تشوف الافلام دى
ممدوح : حاضر
الدكتور : وهنعمل جلسات علاج بس بعد اذن حضرتك يا مدام انتِ مش هتحضريها
بهيرة : طيب ممكن اجى واستنى بره
الدكتور : ممكن بس مش هتحضرى الجلسة
ممدوح : خلاص كده
الدكتور : النهاردة اه بس هستناك كمان اسبوع ان شاء الله
ممدوح : اوكى يا دكتور متشكر جداً
الدكتور : العفو
(. وخرج ممدوح وبهيرة وهما مستريحين جداً من المقابله دى ، خصوصاً ممدوح .)
*_____________________________________________**___________________________*
بعد مرور عشر ايام ....
- طه رجع عشان شغله لكن هشام واخد اجازة طويله
- شيرين لسه فى بيت اهلها هى وولادها ورافضة تقابل انس
- نورهان فاقت و محجوزه فى المستشفى
- منال شوية تقرب من محى وشوية تبعد عنه
*_____________________________________________**___________________________*
فى شقة نورهان ....
(. نورهان لسه راجعه البيت النهاردة .)
هشام : حمدالله على سلامتك
نورهان : الله يسلمك
هشام : بتعيطي ليه
نورهان : مخنوقه شوية
هشام : احمدى ربنا انها جت على قد كده
نورهان : الحمد لله
هشام : قادرة تحكيلي ايه اللى حصل ؟
نورهان : حكت لـ هشام كل حاجة من اول مرة شافت فيها انس لحد الخلاف اللى حصل
هشام : نزوة !!
نورهان : تخيل يا هشام
هشام : مش عايز اقولك انك انتِ اللى رخصتى نفسك
نورهان : رخصت نفسي عشان وثقت فيه وامنته عليا
هشام : عشان اتجوزتيه من ورا اخواتك ، عشان معملتيش لنفسك قدامه عيلة وهيبه
نورهان : انا كنت متأكده ان طه مش هيوافق
هشام : كنتى اتكلمى معايا
نورهان : اهو ده اللى حصل بقى يا هشام انا مش ناقصة عتاب دلوقتى
هشام : انا مش بعاتبك قد مانا بفوقك ، مفيش راجل فى الدنيا يسيب مراته وولاده وبيته المستقر عشان الحب
نورهان : امال اتجوزنى ليه !!
هشام : عشان انانى زى ما مراته قالتلك
نورهان : طيب انا اعمل ايه دلوقتى
هشام : هطلقك منه
نورهان : وطه هيوافق بسهوله كده انى اتطلق لـ المرة التانيه
هشام : كده كده هتطلقى ، انس شوية وهيحن لـ ولاده ومراته وبيته وهيطلقك عشان يرضيهم يبقى تجى مننا احنا
نورهان : ماشي بس انا عايزة اطلق النهارده ممكن
هشام : حاضر ، اكتبيلي عنوانه وتليفونه
نورهان : حاضر
(. وكتبت نورهان العنوان والرقم لـ هشام ودخلت تستريح شوية .)
*_____________________________________________**___________________________*
فى بيت طه ....
(. طه بيكلم هشام فى الموبايل .)
طه بعصبيه : يعنى هتطلق للمرة التانيه
هشام : هو مين يعنى عرف بالمرة التانيه
طه : هتلاقى الخبر انتشر بسرعة الصاروخ وخد عندك بقى الحكاوى والحواديت
هشام : يا طه افهم هو كده كده هيطلقها هو قال لـ مراته الاولى كده
طه : قالها ايه ؟
هشام : قالها انه هيطلق نورهان عشان يرضيها
طه : وكلام الناس
هشام : ما يولعوا الناس بـ كلامهم يا طه متوجعش دماغى بيهم ، وكده كده نورهان هتجى تعيش مع حد فينا
طه : ماشى يا هشام اعمل اللى انت شايفه صح
هشام : صدقنى ده الصح
طه : ماشى ابقى طمني عليكم
هشام : ان شاء الله
(. بسمه كانت قاعدة وطه بيتكلم فى الموبايل بس متكلمتش ومسألتش عن حاجة .)
طه : يعنى مسألتيش كـ عادتك
بسمه بابتسامه : لا خلاص يا حبيبي اتعلمت انك لما تبقى متعصب متكلمش معاك فى حاجة
طه : يعنى خلاث تفهمتى ده اخيراً
بسمه : ايوة انا مش هسألك عن اى حاجة وانت لما تبقى عايز تحكى هتحكى
طه : ده بجد ولا زعل
بسمه : لا طبعاً بجد
طه : يعنى مش زعلانه ؟
بسمه : لا والله ما زعلانه ، بس انت برضه لازم تتفهم انى غرضى اطمن عليك مش فضول يعني
طه : حاضر يا حبيبتى
بسمة : اقولك حاجة كمان ؟
طه : قولي
بسمة : انا بقيت مقتنعه جداً ان مفيش حد كامل ، كلنا فينا عيوب وكلنا صعب علينا نغير طباع اتطبعنا بيها من ٣٠ سنة لكننا نقدر نتعايش معاها
طه : ايه العقل ده ؟ ما شاء الله
بسمه : ايوه انا فكرت بعقلانيه ولقيت انى بحبك يبقى لازم اتأقلم معاك ومع شخصيتك واحبك كلك على بعضك بـ عيوبك ومميزاتك
طه : بحبك
بسمة : وانا والله بموت فيك
طه : عشان خاطر الكلمتين دول بقى انا كمان هحاول اتحكم فى عصبيتي وهحاول اقولك كلام حلو كتير
بسمة : بحبك
طه : بعشقك
(. وعاشوا فى تبات ونبات بعد اقتناع بسمه ان مفيش حد كامل وانها احسن من غيرها وتحمد ربنا ، وطه حاول يتحكم فى عصبيته ويرضى مراته بـ كلمه حلوة وان الكلمه مش هتضر يعنى .)
*_____________________________________________**___________________________*
فى بيت انس .....
(. انس قاعد فى بيته حاسس بـ وحده رهيبة من غير ولاده وشيرين ، قطع وحدته صوت جرس الباب ، قتح ولقاه هشام .)
انس باستغراب : هشام !!
هشام : انا من زمان اوى عارف انك واطى وندل بس مكنتش اعرف انها واصله معاك للمرحله دى
انس : انا مضحكتش على اختك ومتجوزها بمزاجها
هشام : يعنى اتجوزتها وكمان حامل منك ، يعنى يا راجل يا واطى متسألش على مراتك وابنك الفترة دى كلها
انس : انا كنت سايبها لحد ما تهدى عشان اعرف اتعامل معاها
هشام : نورهان كانت هتموت
انس : خير مالها ؟
هشام : مش مهم تعرف ، يالا
انس : يالا ايه
هشام : (يالا now :D ) يالا عشان تطلق نورهان
انس : مش هطلقها
هشام : هتطلقها ورجلك فوق رقبتك
انس : عشان ترجعها لـ محى صح ؟
هشام : هو ده كل اللى همك ؟
انس : هى عايزة ترجعله
هشام : اختى دى غلبانه اوى وقعت فى اتنين اوسخ من بعض سواء انت او محى
انس : طيب وابنى ؟
هشام : ابنك مات يا انس
انس : هى اللى نزلته ؟
هشام : ده من رحمة ربنا بيها نزل لوحده عشان مفيش حاجة تربطها بواحد حقير زيك ، هتطلقها ولا لا
انس : اسمعها منها
هشام : حاضر
(. اتصل هشام بـ نورهان اللى اصرت على الطلاق وانس كان ما صدق انه يطلقها عشان يرضى شيرين وترجع عشان خاطر ولاده ، نزل هشام وانس وخدوا مأذون وراحوا عن نورهان واطلقوا وبعدها حبست نورهان نفسها فى الاوضه من كتر الزعل .)
*_____________________________________________**___________________________*
فى بيت اهل شيرين .....
(. انس رايح لـ شيرين عشان يرجعها .)
شيرين : خير يا انس جاى ليه
انس : انا طلقت نورهان
شيرين : بجد
انس : اه والله طلقتها عشان خاطرك
شيرين : كويس
انس : قوليلي بقى ايه طلباتك
شيرين : هتنفذهالى
انس : اى حاجة تطلبيها هنفذهالك
(. سرحت شيرين شوية وبعدين بصت لـ انس .)
شيرين : طلقنى
انس : نعم !!
شيرين : زى ما سمعت طلقنى
انس : اطلقك ليه مانا طلقت نورهان عشانك
شيرين : مانا كنت مستنياك تطلقها عشان اطلق انا كمان
انس : انا مش فاهم حاجة
شيرين : انت متستاهلش ولا واحده فينا ، لا انا ولا هى وعشان كده كنت عايزة اتأكد انك طلقتها وانا كمان اطلق ، انا وهى ارقي بـ كتير من اننا نعيش مع واحد انانى زيك
انس : بس انا عايز اعيش معاكى ومع ولادى
شيرين : وانا مش عايزة ، انا خلاص مش هضغط على نفسى تانى عشان خاطر حد
انس : والولاد ؟
شيرين : مالهم الولاد ، هيعشوا معايا احلى عيشة وهبقي اخليكم تشوفوا بعض
انس : بس انا مش هطلق
شيرين بابتسامه : يبقى انا هخلعك
انس بتحدى : وانا هطلبك فى بيت الطاعه
شيرين : ابقى اعمل كده وصدقنى هتتفاجئ من اللى هعمله فيك
(. دخلت شيرين وسابته وخرج ابوها يقنعه انه يطلق بهدوء بدل الشوشرة والفضايح انس مقتنعش وقرر انه مش هيطلقها ومشى من عندهم .)
*_____________________________________________**___________________________*
فى خلال شهرين ...
- ابو شيرين ضغط على انس واجبره على الطلاق و اتطلقوا
- هشام رجع الكويت وخد نورهان معاه
- منال اختفت ومحى مش عارف يوصلها
- ممدوح مستمر على جلسات العلاج وبيتحسن
*_____________________________________________**___________________________*
عند مستشار العلاقات الزوجيه ...
الدكتور : انا مبسوط جداً من التحسن اللى انت وصلتله
ممدوح : الفضل لـ ربنا ثم لـ حضرتك
الدكتور : لا طبعاً انا ماليش اى دور ، الفضل لـ ربنا وبعدين لـ عزيمتك واصرارك
ممدوح : يعنى انا بقيت كويس
الدكتور : تقريباً عارف يا ممدوح رغم انى دكتور نفسى متخصص فى العلاقات الزوجيه الا انى بستغرب
ممدوح : بتستغرب ايه ؟
الدكتور : الناس بتجى عندنا تدفع دم قلبها عشان جلسات العلاج وركعتين لله ببلاش فيهم الراحه كلها
ممدوح : حتى فى حالتى
الدكتور : حتى فى حالتك ، علاقتك بـ ربنا وقربك منه هو اللى وصلنا لـ التقدم ده فى حالتك
ممدوح : الحمد لله
الدكتور : هنستمر على العلاج والجلسات
ممدوح : لحد امتى
الدكتور : هانت جداً انت اصلاً بقيت زى الفل بس زيادة تأكيد
ممدوح : اوكى يا دكتور
*_____________________________________________**___________________________*
فى بيت منال ....
(. منال خارجه من شقتها لقيت محى فى وشها .)
محى : اخيراً لقيتك
منال : عايز ايه ؟
محى : انتِ فين كل ده وايه اللى عملاه فى نفسك ده
منال : اتحجبت ومسافرة دلوقتى
محى : مسافرة فين ؟
منال : هعمل عمرة ، هروح ابدأ بدايه جديدة مع ربنا يمكن يسامحنى على اللى فات من عمرى
محى : نعم !!
منال : اللى سمعته ، هروح لـ ربنا جايز حبه يملى قلبى وانساك
محى : انتِ اتجننتى ؟
منال بزعيق : قصدك عقلت ، انا مش عايزة اشوفك تانى ولا حتى فى احلامى ، انا خلاص مش هغضب ربنا تانى
محى : انا عايز اتجوزك
منال : وانا خلاص مبقتش عايزة اتجوزك
محى : ليه
منال : عشان انت سبب انى اعصى ربنا وابقى زانيه ، انا كان بيني وبين النار الموت بس وانا مش عايزة ادخل النار
محى : مانا بقولك عايز اتجوزك اهو
منال : لما ارجع ابقى اقرر
(. ومشيت منال وسابته ومحى واقف مذهول .)
*_____________________________________________**___________________________*
فى بيت اهل شيرين ...
(. انس بقاله شهرين عايش لوحده مش قادر يتأقلم على الحياة بدون ولاده وشيرين ولاول مرة انس يحس ان شيرين وحشاه وانه بيحبها فـ قرر يروحلها .)
شيرين : خير يا انس
انس : بـحـبـك
(. شيرين معرفتش تنطق لانها اول مرة تسمعها من انس بالاحساس ده ولكنها استجمعت قواها وردت .)
شيرين : ايه اللى بتقوله ده احنا خلاص اتطلقنا
انس : والله بحبك ومش قادر اعيش من غيرك
شيرين : من غيري ولا من غير ولادك
انس : والله من غيرك ، انتِ فعلاً وحشانى واتأكدت انى كنت بحبك بس الماضى كان عامل غشاوة مش مخليني شايف
شيرين : وبعدين
انس : وبعدين انا خلاص مبقاش فى حاجة تربطنى بالماضى ، انا من يوم ما طلقت نورهان وانا مكلمتهاش ولا شوفتها ولا حتى فكرت فيها انا بحبك انتِ
شيرين : بس انت بتحب نورهان
انس : صدقيني كنت فاكر كده وانا عمرى ما كرهتها بس برضه اكتشفت انى بحبك
شيرين : يعنى عايز ايه ؟
انس : عايز نرجع ، مش انتِ بتحبيني ؟
شيرين : لو عايزنى ارجع يبقى بـ شروطى
انس : اوؤمرى اى حاجة انفذهالك
شيرين : مبدأياً انا عايزة اعيش حياة طبيعيه جداً معاك وعايزة ولادى يحسوا قد ايه ابوهم بيحب امهم
انس : حاضر ، ايه تانى
شيرين : انت اللى هتودى محمد المدرسة وانت اللى هتجيبه ، يعنى هتشيل معايا جزء كبير من مسئوليه الولاد مش هشيلها لوحدى خلاص
انس : حاضر وهساعدك كمان فى شغل البيت لو عايزة
شيرين باستغراب : انت فعلاً بتحبنى
(. انس بيقعد على ركبه وبيطلع علبه فيها دبلتين .)
انس : بحبك يا مراتى يا ام ولادى ، تقبلى تتجوزيني
شيرين بابتسامه : انت مجنون
انس : يعنى موافقة
شيرين : ماشى موافقة
انس : يعنى خلاص مش زعلانه منى
شيرين : اللى فات مات مش عايزة اتكلم فيه ولا عايزة افتكره
انس : ماشى
شيرين : انا هدخل وهناديلك بابا عشان تتفق معاه
انس : بحبك
(. دخلت شيرين ونادت على ابوها وانس طلب منه يرجع شيرين وبالفعل نزل على طول ردها ورجعت معاه هى وولادها .)
*_____________________________________________**___________________________*
بـعـد مـرور سـت شـهـور ....
- شيرين وانس عايشين حياة طبيعيه جداً جداً كـ اى زوجين وسعداء جداً مع بعض ، وبعد شهر شيرين خلفت ولد وانس كان حاسس انه اول مرة يخلف لان احساسه ناحيه شيرين اختلف
- علياء خلفت ولد وعايشة هى وبهاء حياة مستقرة
- طه وبسمه حياتهم استقرت وبقوا متفاهمين اكتر
- هشام اقتنع انه لازم يحس بـ مراته اكتر من كده ونهى اقتنعت انها لازم تبقى رومانسيه مع جوزها وعايشين مستقرين
- ممدوح اتعالج وبقى شخص طبيعي جداً ، مبقاش بيشوف الافلام لاصراره انه عايز يبقى كويس وعايش حياة مستقرة مع بهيرة ، وبهيرة حامل
- منال قررت انها مش هتجوز محى لان علاقتهم مينفعش يكون اخرها جواز وتابت لـ ربنا وبطلت تشوفه او حتى تفتكره
- محى سافر بره مصر تانى
- هشام لقى لـ نورهان عقد عمل فى الكويت وعاشت معاهم واشتغلت و بعد حوالى سنة من طلاقها قابلت واحد زميلها مصرى وارتبطوا بـ بعض واتجوزوا
- رضوى عقدتها النفسية اتحلت ووقعت فى حب واحد جارها جديد واتخطبتله
يارب القصة تكون عجبتكم :) وياريت تقيموها بـ تعليق
__*__*__
دى مجموعه كتب قيمه جداً ومحترمه جداً جداً عن الحياة الزوجيه وطبعاً لـ الكبار فقط (المتزوجين والمقبلين على الزواج) ياريت تقرأوها و يارب تستفادوا منها ....
- تحفة العروس ومتعة النفوس (النسخ القديمه افضل شئ)
- الابداع فى فن الاستمتاع (افكاره عن الثقافة الجنسية)
- يوميات زوج سعيد
- فقه الاسرة المسلمه
- رومانسيات زوجيه
- السحر الحلال
- اخطاء الزوج
- اخطاء الزوجه
- فن العلاقة الزوجية
- سنة اولى زواج
- وصايا وإتحاف قبل ليلة الزفاف
- الرجال من المريخ والنساء من الزهرة (مُعرب ولكن افكاره غربية نوعاً ما)
- وصية نبوية للعروسين ليلة الزفاف
-
__*__*__
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
