الحلقة السادسة عشر (الاخيرة)
جزء من حلقة سابقة :
بعد شوية ......
شريفة : ها يا دكتور فى مشكله
الدكتور : .........................
*_____________________________________________**___________________________*
الدكتور : انا عايزك تبقى هادية وتعتبرى ان اى حاجة بتحصلنا ده خير من ربنا
شريفة : هو حضرتك مصمم تلعب بـ اعصابى
الدكتور : انا بس مش عايزك تتفاجئ
شريفة : حضرتك بتقلقنى اكتر ياريت تتكلم على طول
الدكتور : انتِ مينفعش تخلفى
شريفة مصدومه : ايه !! مينفعش ايه
الدكتور : انا اسف انى بيقولك كده بس انتِ عندك مشكله تمنعك من الخلفة
شريفة : يا دكتور انا ممكن اسافر بره ، انا ممكن اعمل اى حاجة عشان اخلف الفلوس موجودة قولى اى حل
الدكتور : الفلوس مش هتعمل حاجة ولا حتى السفر بره
شريفة : انت بتحبطنى
الدكتور : لو سمحتى اهدى عشان تفهميني اللى عندك مشكله نادرة جداً بتحصل لـ واحدة فى الـ ١٠٠ الف وملهاش علاج وللاسف حصلتلك
شريفة : يعنى ايه ملهاش علاج
الدكتور : حتى لو بدأنا العلاج فيه خطورة عليكي انتِ عندك بوادر ورم فى الرحم والافضل ان احنا نشيله
شريفة بعصبيه وخرجت عن شعورها : مش هشيل الرحم قبل ما اخلف فاهم لازم اخلف شوفلى اى حل
الدكتور : ممكن تهدى شوية
شريفة : مش عايزة اتزفت انا عيزاك تشوفلى حل انا عايزه اخلف عايزة ابقى ام
الدكتور : يؤسفنى اقولك ان مفيش حل وانك لازم تشيلي الرحم لانك لو سبتيه هتبقى بتنهى حياتك بنفسك
(. شريفة اتصدمت من كلام الدكتور وخرجت من العيادة من غير ولا كلمة .)
*_____________________________________________**___________________________*
فى بيت مديحة ......
مديحة : اهدى يا شريفة متعمليش فى نفسك كده
شريفة : انا عملت ايه بس يا ماما عشان اتحرم من الحاجة الوحيدة اللى اى بنت بتستناها
مديحة : يا حبيبتى ده نصيب والمكتوب على الجبين لازم تشوفه العين
شريفة : لا يا ماما انا لازما اعمل اى حاجة عشان اخلف
مديحة : مش بتقولى الدكتور بيقول ان مفيش حل
شريفة : لازم الاقى حل ماهو مش معقول يبقى عندى الفلوس دى كلها وميكونش فيه طريقة
مديحة : فوقى بقى يا شريفة الفلوس مش هى اللى بتعمل ربنا هو اللى بيعمل
شريفة : مش وقت حكم ومواعظ انا هسافر بره هلف العالم لحد ما الاقى طريقة
مديحة : طيب اهدى عشان صحتك
شريفة : انا عيزاكى تجى معايا يا ماما
مديحة : اجى معاكى فين
شريفة : بيتى
مديحة : انا قولتلك انى مش هسيب بيتي
شريفة : يعنى هتسبينى لوحدى
مديحة : تعالى انتِ عيشي معايا
شريفة : الناس بتتقدم وانتِ عيزانى اتأخر
مديحة : انا مش هسيب شقتى انا عشت فيها وهموت فيها
شريفة : ماشى يا ماما براحتك (وخرجت)
*_____________________________________________**___________________________*
بعد كام يوم فى ڤيلا شريفة ......
(. اياد رجع من السفر وراح يزور شريفة عشان يعرف ايه موضوع الجواز ده .)
شريفة : حمد الله على السلامه
اياد : الله يسلمك
شريفة : وحشتنى
اياد : وانتِ كمان ، انتِ اتجوزتى
شريفة : اه اتجوزت
اياد : من غير ما تقولى لنا
شريفة : مانتوا كنتوا مسافرين وكان لازم الجوازه تتم فى اسرع وقت
اياد : اشمعنى يعنى واتجوزتى مين
شريفة : اتجوزت مؤمن خطيبي الاولانى
اياد : مؤمن !!! مش ده مؤمن اللى قولتى عليه مبحترموش
شريفة : فى ايه انت مالك اصلاً انا مش صغيره اتجوز اللى انا عيزاه
اياد : مالى !! هو انتِ تعتبرينا اخواتك وعيلتك لما تحتاجينا بس
شريفة : اياد لو سمحت انا نفسيتى زفت فـ متضغطتش على اعصابى بعد اذنك
اياد : مانا لازم افهم فى ايه ، انا الناس كانت بتباركلى على جوازك وانا معرفش اصلاً انك اتجوزتى
شريفة : يووووه
اياد : يا بنتى مالك لو عندك مشكله انا ممكن احلهالك
شريفة : ايوة عندى مشكلة بس مفيش حد يعرف يحلهالى
اياد : مشكلة ايه
شريفة : حكت له موضوع الخلفة وليه اتجوزت مؤمن
اياد : يعنى ايه ملهاش علاج مفيش حاجة ملهاش علاج
شريفة : الدكتور اكدلى ان حالتى نادرة جداً وزى ما تقول حاجة مستحيلة انى اتعالج عشان موضوع الورم
اياد : خلاص يا حبيبتى متزعليش نفسك اكيد ده خير يعنى ربنا مبيعملش فينا حاجة وحشة
شريفة : بس انا كان نفسى اخلف
اياد : انا حاسس بيكي والله بس مينفعش نعترض على قضاء ربنا
شريفة : انا الدكتور مستنينى اروح اعمل العملية بس انا مش عايزة
اياد : ليه يا شيفة مش يمكن التأخير ده خطر عليكي
شريفة : عندى امل انى ممكن اخلف لو شيلت الرحم عمرى ما هخلف
اياد : طيب وهتعملى ايه
شريفة : هسافر بره جايز يكون فيه علاج حالتى
اياد : عيزانى اسافر معاكى
شريفة : لا يا حبيبي خليك انت فى شغلك
اياد : طيب يا شريفة ابقى طمنيني عليكي
شريفة : حاضر
*_____________________________________________**___________________________*
بعد مرور شهر .....
- سافرت شريفة بره مصر لوحدها ولفيت على مستشفيات ومراكز طبية كتير بس كان الكل بيأكدلها ان الخلفة مستحيلة والاحسن تشيل الرحم ، وبالفعل شالت شريفة الرحم بس مؤمن ميعرفش كل الكلام ده وفاكرها مسافرة عشان شغل
- مؤمن مُستمتع جداً بالحياة المرفهة اللى شريفة وفرتهاله
- مديحة رافضة تماماً تروح تعيش مع شريفة ومش هتسيب بيتها
*_____________________________________________**___________________________*
فى ڤيلا شريفة .......
مؤمن : خير يا حبيبتى كنتى عايزة ايه
شريفة : طلقنى
مؤمن : ايه !!! اطلقك !! ليه يا حبيبتى انا زعلتك فى حاجة
شريفة : مش مُلزمة اقولك اسباب كل اللى انا عيزاه انى اطلق
مؤمن : ومش هطلقك الا لما افهم فى ايه
شريفة : بص من الاخر كده انا اتجوزتك عشان غرض معين وخلاص الغرض خلص ايه بقى لازمتها نكمل الجوازه
مؤمن : يعنى انتِ اتجوزتينى عشان مهمة خلصت وخلاص كده
شريفة : لا يا شيخ امال انت اتجوزتنى ليه مش عشان الفلوس
مؤمن : هو انا شوفت منك حاجة
شريفة : والله !! امال العيشة اللى انت عايشها دى تبقى ايه ان شاء الله انت كنت تحلم اصلاً تعيش العيشة دى
مؤمن : ماهو عشان العيشة دى انا مش هطلق
شريفة : طلقنى بمزاجك يا مؤمن بدل ما تطلقنى ورجلك فوق رقبتك
مؤمن : اتكلمى معايا كويس انتِ بتكلمى جوزك
شريفة : انا قولت اللى عندى فكر فيها واحسبها براحتك
مؤمن : لا من غير ما احسبها انتِ عليكي مليون جنية تمن الجواز ادفعى بقى تمن الطلاق
شريفة : والمرة دى عايز كام
مؤمن : الاجمالى كله خمسة مليون
شريفة (وهى ماشية) : هههههههههه
مؤمن : قولتى ايه
شريفة : معنديش رد لـ كلامك (ومشيت وسابته)
*_____________________________________________**___________________________*
تانى يوم الصبح .....
(. شريفة قاعدة بتفطر وبتبص على الجرايد ، شافت خبر معين لفت انتباهها .)
شريفة لنفسها >> ايه ده !! ايه النعى ده لا لا مش ممكن يارب يطلع غلط
(. وطلعت شريفة موبايلها اتصلت بـ زياد لكنه مردش فـ اتصلت بالمحامى .)
شريفة : صباح الخير يا دكتور احمد
احمد : صباح النور يا مدام شريفة ، البقاء لله
شريفة بارتباك : يعنى الخبر اللى مكتوب فى الجرايد ده صح
احمد : حضرتك متعرفيش
شريفة بدموع : لا معرفش
احمد : طيب اهدى ده قضاء ربنا ونفذ
شريفة بدموع : يا حبيبي يا اخويا ، هو مات ازاى
احمد : حادثة عربية امبارح والنعى نزل فى جرايد النهاردة والعزا النهاردة
شريفة : اوكى متشكرة (وقفلت)
شريفة بدموع وصويت >> يا حبيبي يا اياد ، يا حبيبي يا اخويا
هنا جه مؤمن .....
مؤمن : مالك يا شريفة
شريفة : اياد اخويا مات اياد مات مؤمن
مؤمن : طيب اهدى اهدى ادعيله ربنا يرحمه
شريفة : ده هو الوحيد اللى طلعت بيه من الدنيا (منهارة) ليه كده يارب ليه يارب عمال تاخد منى كل حاجة
مؤمن : بس يا شريفة انتِ هتكفرى ولا ايه
شريفة : انا كل حاجة بتضيع منى ، اياد مات ، مات وسابنى انا ماليش حد غيره انا هعيش ازاى من غيره
(. فضل مؤمن يهدى فى شريفه لحد ما قدرت تقوم وتغير هدومها وتروح ڤيلا ابوها .)
*_____________________________________________**___________________________*
فى ڤيلا عمر ابو الوفى .....
(. دخلت شريفة ومعاها مؤمن واول ما زياد عرف انها تحت نزلها .)
زياد : انتِ بتعملى ايه هنا
(. شريفة اول ما شافته رمت نفسها فى حضنه بس زياد زقها .)
زياد : انتِ جاية ليه وعايزة ايه
شريفة : يعنى ايه جاية ليه احنا اخونا مات
زياد بزعيق : متقوليش اخونا ، اياد ده يبقى اخويا انا بس انتِ مش اختنا
شريفة : ميصحش الكلام ده يا زياد احنا فى النهاية اخوات
زياد : اخرسى بقى مش عايز اسمع صوتك ولا عايز اشوفك انتِ مبتحسيش
شريفة : انت محسسنى انى انا اللى موته
زياد : ماهو كان رايح يزورك لو مكنتيش ظهرتى فى حياتنا مكنش زارك ولا كان مات
مؤمن : استهدى بالله مينفعش الكلام ده
زياد : اخرجى بره يا شريفة مش عايز اشوفك ولا حتى صدفة كفاية اوى اللى خدتيه وكفاية اللى وصلتينا ليه
شريفة : احنا ملناش الا بعض يا زياد
زياد : انتِ مستفزة امشى بقى امشى ومش عايز اشوفك فى العزا ولا عايز اشوفك اصلاً (ومشى وسابها)
مؤمن : خلاص يا شريفة تعالى نروح هو شوية وهـ يهدى
شريفة : كنت فاكرة انه اول ما يشوفنى هيترمى فى حضنه
مؤمن : اكيد الصدمه مش قليلة عليه
شريفة : ربنا يرحمك يا اياد يا اخويا مشوفتش احن منك
مؤمن : ربنا يرحمه يالا نمشى (ومشيو)
*_____________________________________________**___________________________*
فى عـزاء ايــاد ....
(. فارس مسبش زياد لحظة لوحده من لحظة ما عرف بـ وفاة اياد لحد ما العزا خلص .)
فارس : معلش فى السؤال هو مات ازاى
زياد : كان رايح يزور زفتة شريفة وكانت الشبورة شديدة اوى دخل فى عربية تانية
فارس : ربنا يرحمه
زياد : ربنا ياخدك يا شريفة دخلت حياتنا كلنا بوظتها
فارس : هى ذنبها ايه بس
زياد : هى لو مكنتش ظهرت فى حياتنا كان زمانه زارها مكنش زمانه مات
فارس : ده قضاء ربنا يا زياد وكده كده كان هيحصل
زياد : ربنا يرحمك يا اياد طيبة قلبه هى اللى كانت مودياه فى داهية
(. هنا شريفة جت العزا وكانت داخله صيوان الحريم وزياد لمحها .)
زياد : دى جت برضه انا مشوفتش كده
فارس : اهدى انت يا زياد مش عايزين فضايح هورحلها انا
__**__**__
شريفة : فارس !! انت بتعمل ايه هنا
فارس : البقاء لله
شريفة : ونعمَ بالله
فارس : شريفة زياد لو شافك العزا هيقلب بفضيحة وانتوا مش قليلين عشان تتخانقوا قدام الناس
شريفة بدموع : ده عزا اخويا يا فارس ازاى مش عايزينى احضره
فارس : معلش يا شريفة زياد مشحون وعلى اخره
شريفة : ماشى يا فارس انا همشى عشان خاطر اياد الله يرحمه
فارس : انا هبقى اجيلك اعزيكي
شريفة : ماشى
(. مشيت شريفة وفضل فارس واقف يبص عليها كانت وحشاه اوى ، بس لما شاف مؤمن مستنيها وخدها فى حضنه حس ان حد غرز سكينه فى قلبه ، وفاق من كل ده ورجع لـ العزا .)
__**__**__**__
(. شريفة راكبه العربية جنب مؤمن والسواق سايق بيهم ، شريفة سرحانه وبتبص على الطريق دموعها بتنزل منها تلقائى .)
شريفة لنفسها >> وحشتنى يا اياد انت كنت احن حد عليا فى الدنيا كلها ، كنت بقول انى مطلعتش من الدنيا الا بيك ليه يا رب بتاخد منى كل حاجة بحبها ، فارس وطلقنى اياد ومات امى ورافضة تعيش معايا خلفة واتحرمت منها ، انا هخسر ايه تانى خلاص مبقاش عندى حاجة اخسرها ، يارب انا تعبت ليه بيحصل فيا كده !!
(. لثوانى فاقت شريفة .) >> هو انا ممكن فعلاً اكون ظلمت اخواتى !! ممكن يكون اياد مات وهو شايل منى !! بس انا ماليش ذنب بابا هو اللى باعلى كل حاجة ، لا بس انا كنت المفروض ارفض ، لا بس اى حد غيري كان هيقبل الوضع كان مغرى جداً ، لا ده كان حق اخواتك ولازم يرجع يمكن اياد يستريح فى ترتبه ويسامحنى ، سامحنى يا اخويا سامحنى يا حبيبي لو كنت ظلمتك
*_____________________________________________**___________________________*
بعد كام فى ڤيلا شريفة ......
(. شريفة كانت قاعدة بتقرأ فى اوراق خاصة بالممتلكات .)
مؤمن : بتعملى ايه
شريفة : ببص على اوراق خاصة بملكيتى
مؤمن : فى حاجة ولا ايه
شريفة : ناوية ارجع لاخواتى حقهم
مؤمن : اخواتك !! قصدك زياد
شريفة : هرجع لـ زياد حقه وحق اياد الله يرحمه
مؤمن : حق ايه انا مش فاهم حاجة
شريفة : حكت له موضوع الفلوس
مؤمن بانبهار : يعنى انتِ معاكى ٩ مليار و٦٠٠ مليون جنية
شريفة : ايوة بس حقى الاصلى منهم ٣ مليار و٢٠٠ مليون
مؤمن : واخوكى رفض ياخد الـ ٦ مليار اللى باقيين
شريفة : ايوة
مؤمن : ده من حُسن حظنا
شريفة : حظنا !!! فوق يا مؤمن انت هتطلقنى اصلاً
مؤمن : موافق بس بشرط
شريفة : اللى هو
مؤمن : عايز نص اللى معاكى اربعة مليار ونص
شريفة : نعم !!!
مؤمن : اللى سمعتيه انا مش هطلقك الا اذا خدت المبلغ ده وكاش كمان
شريفة : انت اتجننت بقى
مؤمن : انتِ اللى تبقى اتجننتى لو فاكرة انى ممكن اضيع فرصة زى دى
شريفة : مش هديك حاجة
مؤمن : وانا مش هطلق
شريفة : خاف على نفسك منى يا مؤمن انت متعرفش انا ممكن اعمل ايه
مؤمن : هتعملى ايه يعنى هتخطفيني وتضربيني زى ما فارس عمل
شريفة : اللى فارس عمله ده هبل لانك ببساطه كان ممكن تسجنه لو ثبت انه ضربك بس انا ضربتى هتبقى قاضية
مؤمن : انا عارف قدراتك كويس اوى وعارف انك متقدريش تعمليلي حاجة
شريفة بزعيق : طلقنى
مؤمن : اربع مليار ونص كاش (ومشى وسابها)
شريفة لنفسها >> ايه الورطة دى بس !!! انا لازم الاقى مخرج
__**__**__**__
(. قعدت شريفة فكرت مع نفسها شوية وبعدها قالت لـ مؤمن انها مسافرة اسبوع تبع شغلها ، شريفة قبل ما تسيب الڤيلا سرقت الشيك اللى كانت كتباه لـ مؤمن عشان يتجوزها .)
(. بعد حوالى اسبوع جه اخطار لـ مؤمن من المحكمه عشان مراته رافعه عليه قضية خلع وعملاله محضر بالتعدى عليها بالضرب ، شريفة زورت تقرير الطب الشرعى بـ ان فيه اثار ضرب وتعذيب على جسمها والسبب فيها جوزها ، شريفة عملت المحضر عشان لو الخلع اترفض تساوم مؤمن انه لو طلقها هتتنازل عن المحضر وبالفعل اتقبلت قضية الخلع .)
*_____________________________________________**___________________________*
فى بيت مؤمن .....
سميرة : مش قولتلك الطمع اخرته وحشة
مؤمن : انتِ نفسك كنتى طمعانه ، قولتيلي ارجعلها رغم انك عارفة انها اتخلفت فى الحرام
سميرة : كانت لحظة ضعف وبعد كده قولتلك سيبك منها
مؤمن : انا خسرت كل حاجة ، الفلوس وشريفة حتى شغلى فى البنك سيبته ، الشقة اللى كنت متأجرها سيبتها والعربية اللى كلنت حيلتى بعتها
سميرة : وانت ليه عملت كده
مؤمن : انا كان معايا شيك بمليون جنيه ده ، المبلغ ده يخلينى ابيع اى حاجة
سميرة : وفين الشيك ده
مؤمن : سرقته بنت الحرامية
سميرة : لعبتها صح عليك
مؤمن : مكنتش اعرف انها بالشر والقسوة دى
سميرة : معلش حصل خير
مؤمن : خير !!! انا كده هبدأ من الصفر يا ماما
سميرة : ربنا يعوض عليك يا ابنى
*_____________________________________________**___________________________*
بعد مرور اسبوع فى ڤيلا عمر ابو الوفىٰ ......
(. راحت شريفة لـ زياد .)
زياد : انتِ تانى
شريفة : ممكن تسمعنى
زياد : مش عايز
شريفة : يا زياد انا جاية اجبلك حقك انت واياد الله يرحمه حقكوا كله
زياد : حقنا !! دلوقتى بقى حقنا !!
شريفة : انا غلطت فى حقكوا وجاية اصلح غلطى
زياد بزعيق : بعد ايه !! بعد ما احلى حاجة وكل حاجة فى دنيتى راح وبسببك
شريفة بدموع : انا معنديش حاجة اكفر بيها عن ذنبى غير انى ارجعلك الفلوس
زياد : مش هاخد حاجة ممكن اخدهم منك فى حالة واحدة
شريفة : ايه هى
زياد : لو رجعتيلي اياد تانى
شريفة : ازاى يعنى
زياد : ماهو عشان اياد مستحيل يرجع تانى انا كمان مستحيل اخد الفلوس دى تانى
شريفة : بس انت كنت عايزهم
زياد : فوقى بقى ، فلوس ايه اللى بتتكلمى عنها ، انا اخويا مات سندى وضهرى وحبيبي وصاحبى مات ، تفتكرى هيفرق معايا فلوس الدنيا كلها
شريفة : انا جاية اعوضك
زياد : انتِ اكيد مش طبيعية ، جاية تعوضنيي عن ايه !! عن اخويا
شريفة : يا زياد انا عايزة اصلح اللى بينا عشان احنا خلاص ملناش الا بعض
زياد : ملناش الا بعض !! لا انا مكنش ليا الا اياد وخلاص راح منى انا عمرى ما اعترفت بيكي ولا حبيتك الا عشان خاطر اياد
شريفة : طيب وغلاوة اياد عندك خد الفلوس
زياد بصوت مخنوق ودموع محبوسة : لو كنتى فعلاً بتحبى اياد وموته حركك من جواكى كنتى عرفتى ان الدنيا احقر بكتير من انى اتمسك بيها او بـ ملذاتها ، انا لا عايز فلوس ولا عايز الدنيا كلها من غير اياد انا هعمل لاخرتى عشان اروحله ياريت انتِ كمان تفوقى
شريفة : طيب يا زياد بلاش تاخد الفلوس بس خلينا اخوات وكويسين مع بعض عشان خاطر اياد حتى
زياد : ماليش اخوات الا اياد انتِ مش اختى ، امشى يا شريفة روحى اتمتعى بالفلوس روحى اتمتعى بالدنيا على الله الفلوس تنفعك
شريفة : يعنى مفيش فايدة
زياد : لو سمحتى مش عايز اشوفك تانى (ومشى وسابها)
*_____________________________________________**___________________________*
فى شغل فارس ....
(. شريفة راحت تزور فارس .)
شريفة : وحشتنى اوى يا فارس
فارس : نعم !!!
شريفة : انا خلعت مؤمن يا فارس خلاص وجاية عشانك
فارس : جاية عشانى !!
شريفة : انا لسه بحبك يا فارس
فارس : عشان كده روحتى اتجوزنى بعد شهور العدة على طول
شريفة : انا كان لازم اخلف وحاولت معاك وانت رفضت ترجعلى بس كنت ناوية اخلف واطلق وارجعلك
فارس : ايه القرف ده !! انتِ ازاى كده
شريفة : قرف !!
فارس : انتِ قولتيلي فى يوم من الايام انك مش عايزة تخلفى الا منى دلوقتى جابة تقولى كنت هخلف واجيلك
شريفة : انا محتجالك انا مبقاش ليا حد غيرك ، والله لسه بحبك
فارس : لما حصلت المشكلة وقررنا ننفصل كنت شاكك فى حبك ليا بس بعد اللى انتِ عملتيه مبقتش شاكك بالعكس بقيت متآكد انك محبتنيش
شريفة : انا محبتكش يا فارس
فارس : انا مجرد حاجة بتسدى بيها فراغك وبتقضى بيها احتاجاتك النفسية والعاطفية
شريفة : طيب تعالى نبدأ صفحة جديدة
فارس : بتصرفاتك دى انتِ قطعنى الصفح كلها
شريفة : يعنى مفيش امل
فارس : لا انتِ خسرتيني للابد ومتحاوليش تانى
(. قامت شريفة من غير ما ترد وفارس نداها ووقفها .)
فارس : شريفة
شريفة : نعم
فارس : انا لما صممت على الانفصال قولت يمكن توحشيني وارجعلك بس انتِ روحتى اتجوزنى ولا كآنك كنتى مستنية الخطوة دى بجانب انك فضلتى الفلوس عليا وفوق ده كله رجعتى لما كنتى محتاجانى عشان تخلفى
شريفة : وايه لازمة كل ده
فارس : عايز اقولك انك انتِ اللى خسرتيني وانتِ اللى اخترتى
*_____________________________________________**___________________________*
فى بيت مديحة ....
شريفة : يا ماما ابوس ايدك تعالى عيشي معايا انا عايشة لوحدى
مديحة : مش هينفع يا شريفة
شريفة : ليه يا ماما
مديحة : لما انتِ سبتيني ومسألتيش عنى ولما اتهمتينى انى طمعانه فى الفلوس مزعلتش بس خدت على نفسى عهد انى عمرى ما هعيش معاكى بـ فلوس ابوكى
شريفة : انتِ مش قولتى انك سامحتيني
مديحة : سامحتك بس مش هقدر اعيش معاكى
شريفة : يا ماما انا مبقاش ليا حد غيرك ، لا اب ولا زوج ولا اخ ولا حتى ابن
مديحة : تعالى عيشي معايا ، سيبك من الفلوس دى كلها وتعالى عيشي معايا هنا
شريفة : اسيب المليارات دى لمين
مديحة : المليارات دى هى اللى خسرتك كل حاجة
شريفة : وعيزانى بعد ما خسرت كل حاجة اخسر الفلوس كمان
مديحة : الخلاصة انى مش هسيب بيتى
شريفة : شكراً يا ماما انك وقفتى جنبى لما الناس كلها اتخلت عنى (ومشيت)
مديحة لنفسها >> للاسف يا شريفة انتِ اللى بعتى الكل واتخليتي عنهم
*_____________________________________________**___________________________*
اخـــر مــشـــهــد ....
(. شريفة قاعدة فى جنينة ڤيلتها بـ تبص حواليها حاسة بفراغ رهيب فى حياتها ووحدة بتموتها دموعها مبتوقفش .)
شريفة لنفسها >> انا غلطانه ، يارتنى ما اخترت الفلوس ، انا دلوقتى معايا الفلوس اهو ومعايا فلوس كتير اوى بس هعمل بيها ايه وانا لوحدى لا عندى زوج ولا حبيب ولا ينفع اخلف ابن نتهنى سوا بالفلوس ، اخواتى وخسرتهم واحد مات والتانى مش طايقنى وسابلى البلد كلها ، ام بتقولى سامحتك ورافضة تجى تعيش معايا وتونسنى واونسها ، حبيبي رافض يسامحنى ويرجعلى
>> انا فضلت الفلوس على امى وعلى جوزى وعلى اخواتى ، اخترت الترف ودوست بكل قذراة على الشرف ، خسرت كل الناس وخسرت نفسى وربى قبل الكل ، معايا فلوس كتير بس المستقبل مبهم مالوش ملامح
>> يارتنى ما فضلت الترف على الشرف ، يارتنى ما تمسكت بالفلوس والترف ، يارتنى كنت مسكت فى شرفى وفى الناس اللى بيحبونى ومسبتهمش ابداً ، ملعون ابو الفلوس على الترف اللى تخليني عايشه كده
بـ قلمى / آلاء الشريفى
*_____________________________________________**___________________________*
اتمنى القصة تكون عجبتكم واتمنى النهاية كمان تعجبكم
ياريت التقييم والفئة الصامته تخرج عن صمتها وتقولى رأيها
