أم قاصرة (الحلقة السادسة)

الحلقة السادسة

(. خرجت رقية لقيت حازم لسه قاعد فى الصاله ودخلت اوضة نومها وخرجت منها تانى عشان توهم حازم انها دخلتها ووقفت ورا ستارة عشان تشوف حازم بيعمل ايه ومتوتر كده ليه ، فضلت واقفة شوية وبعدين رجعت قفلت باب اوضتها واول ما حازم سمع باب الاوضة بيتقفل مسك وموبايله واتصل بـ واحد صاحبه .)

مجدى (صاحب حازم) : فى ايه ياد قفلت ليه

حازم : امى صحيت

مجدى : تقوم تقفل فى وشى

حازم : خوفت تشك انى بكلم واحدة

مجدى : يا كوكو

حازم : بطل تريقة يا خفيف لو شكت انى بكلم واحدة ممكن موضوع ندى ميكملش

مجدى : ايوة بقى موضوع ندى هتعمل فيه ايه

حازم : بص انا هقوم اعمل اللى قولتلك عليه

مجدى : انا بقول بلاش

حازم : ليه 

مجدى : عشان انت لسه قايل لها بحبك النهاردة وهى صدتك زى ما قولت تقوم بالليل تعمل كده

حازم : هو ده الحل الوحيد اللى هيجيب نتيجه سلام دلوقتى

مجدى : استنى بس (قفل حازم الخط)

(. رقية واقفة ورا الستارة فى حاله رعب وترقب شديد ، حازم قفل الخط ودخل اوضته وخرج تانى وفى ايده بوكس ، وخبط حازم على الاوضة اللى فيها ندى ، رقية وقفت محتارة وخايفة حازم يعمل حاجة فى ندى .)

ندى(فتحت الباب) : حازم فى ايه

حازم : صحيتك

ندى : لا انا كنت صاحية بذاكر

حازم : ربنا معاكى

ندى : انت كنت عايز حاجة

حازم : اتفضلى (وادالها البوكس)

ندى : ايه ده

حازم : افتحيه وقوليلي رأيك

(. خرجت ندى من الاوضة وقفلت الباب وراها عشان بسنت نايمه وراحت الصالة وفتحت البوكس ، لقيت فيه ورد وسلسلة فضة وعروسة .)

ندى : الحاجات دى عشانى

حازم : امال عشان امى ، ايه رأيك بقى

ندى : تسلم يا حازم

حازم : يعنى الحاجات دى عجبتك فعلاً

ندى : ايوة هى اصلاً حاجات حلوة بس مش هينفع اخدها

حازم : ليه

ندى : انت جايبها ليه اصلاً

حازم : عشان اعبرلك عن حـبـ..........

ندى تقاطعه : متكملش يا حازم بس هقولك حاجة تريحك

حازم : حاجة ايه

ندى : احنا لسه صغيرين اوى سواء انا او انت خلينا نبقى قرايب واخوات لحد ما نكبر ونشوف الدنيا فيها ايه

حازم : نكبر ايه ، احنا فى ناس فى سنى وسنك بيتجوزوا

ندى : لو ليا غلاوة عندك متفتحش الموضوع ده تانى

حازم : ليه بس

ندى : عشان خاطرى يا حازم

حازم : ماشى يا ندى مش هفرض نفسى عليكي اكتر من كده

ندى : متشكرة اوى يا حازم عن اذنك هدخل اكمل مذاكرتى

حازم : طيب ممكن تاخدى الهدية لو ليا غلاوة عندك ، اعتبريها هدية من اخوكى

ندى : حاضر هخدها وتسلملى يا احسن اخ فى الدنيا (وخدت البوكس ودخلت)

حازم لنفسه >> احسن اخ !! طيب اشتمها دى ولا اعمل فيها ايه

(. دخلت رقية اوضة نومها ومحبتش تحرج حازم وهى زعلانه جداً ان ندى مش متجاوبة معاه فى حين انه بيحبها اوى .)

*_____________________________________________**___________________________*

تانى يوم فى احدى الكافيهات .....

مايا : يعنى انتِ رافضة حازم عشان صغيرين فعلاً ولا فى حاجة تانية

ندى : بصى بما اننا فى فترة مراهقة فـ دايماً بتلاقينا كل شوية نميل لـ شخص معين وبنفتكر اننا بنحبه وتانى يوم بننساه صح

مايا : صح

ندى : انا حسيت الاحساس ده مرة واحدة ناحية ادهم ابن خالتى وبعد كده لقيت نفسى بعامله ان ادهم ابن خالتى وبس والمشاعر دى مبقتش موجودة

مايا : مش فاهمه ايه علاقة ده بـ حازم

ندى : مانا كنت لسه هكملك حازم محسيتش ناحيته اى احساس غير انه اخويا

مايا : اممممم طيب عموماً انا مش مع الاستعجال فى الارتباط اصلاً

ندى : وانا كمان اصل ................ (وسكتت)

مايا : فى ايه سكتى ليه

ندى : مش ده الشاب اللى كان قاعد المرة اللى فاتت 

مايا (اتلفت) : اه هو شكله بيقعد هنا دايماً

ندى : الظاهر كده

بعد شوية .....

مايا : لا بقى دى مقصودة

ندى : هى ايه دى

مايا : الواد بيبصلك برضه

ندى : انتِ بتهزرى على فكرة ، ده لابس نضارة يعنى مش عارفين بيبص على مين

مايا : والله بيبص عليكي

ندى : ما علينا منه انا اصلاً عايزة اقوم اروح

مايا : ليه بس ما احنا قاعدين شوية

ندى : قاعدين ايه بس احنا امتحانا الاسبوع الجاى

مايا : طيب انا هقعد شوية بقى

ندى : طيب اشوفك بعدين بقى 

(. وخرجت ندى وتابعها الشاب بنظره ، وبعدها مايا مشيت لحقت ندى .)

ندى : فى ايه انتِ جيتى ليه

مايا : انا قعدت بعدك عشان اشوف الولد ده كان بيبص على مين

ندى : يعنى

مايا : بعد ما مشيتى الولد ده فضل يبص عليكى وبعدها خرج من الكافيه فضل واقف لحد ما اختفيتى من الشارع

ندى : كبرى دماغك ، هتروحى ولا هترجعى 

مايا : لا انا جاية معاكى (ووقفوا تاكسى وروحوا)

*_____________________________________________**___________________________*

بعد مرور شهر ونصف .....

- ندى وحمزة وحازم خلصوا امتحانات

- أدهم ورانيا سافروا الامارات 

- الشاب المتخفى فى نضارته لسه بيتابع ندى ومبيتكلمش معاها خالص بس بيظهرلها فى اكتر من مكان بتكون موجوده فيه

*_____________________________________________**___________________________*

فى بيت رقية ........

رقية : انا مبسوطة ان ابوكوا وافق تيجوا معانا المصيف السنة دى

بسنت : انا كمان مبسوطة اووووى احنا بقالنا كتير اوى مصيفناش

محمد : يعنى هنروح البحر

ندى : ايوة يا مودى

رقية : طيب جهزوا نفسكوا بقى عشان هنسافر الصبح

ندى : هو احنا رايحين فين يا طنط 

رقية : العريش يا حبيبتى انتِ ناسية احنا عندنا شاليه هناك

محمد : والثاليه ده جوه البحر

ندى : هههههه يا مودى يا حبيبي مفيش شاليهات جوه البحر بس فيه شاليهات بتكون قريبة من البحر

محمد : يعنى هنط من الثاليه على البحر

ندى : يا دماغى ، مش انت عايز تنزل البحر

محمد : اه

ندى : خلاص بقى انا هنزلك البحر وهنزل معاك مالكش دعوة بقى بـ مكان الشاليه

محمد : ماشى

(. دخلت بسنت وندى الاوضة عشان يرتبوا الشنط .)

ندى : ايه ده يا بسنت اللى بتحطيه فى الشنطة

بسنت : مايوه

ندى : وانتِ من امتى بتلبسى مايوه قطعتين

بسنت : عادى

ندى : لا مش عادى ماما كانت دايماً بتقول ان مينفعش نلبس بكينى وكانت بتسمحلنا نلبس شورت وحاجة فوقه بنص كُم

بسنت : ايوة بس انا عايزة البسه وبعدين ماما مش شيفانا

ندى : المفروض انك تحترمى ماما وبابا فى غيابهم قبل وجودهم

بسنت : مالكيش دعوة انتِ انا هبقى اقول لـ بابا لما يجي

ندى : لا ليا دعوة ونص كمان وخدى بالك انتِ مسئولة منى

بسنت : فى ايه يا ندى انتِ هتعملى عليا واصى

ندى : اه واصى عليكي ده انتِ مكملتيش ١٣ سنة

بسنت : ده على اساس انك عندك ٣٠ سنه ، ده انتِ عندك ١٧ سنة

ندى : بس مسئولة عنك قدام ربنا وقدام ابوكى وقدام امك الله يرحمها مش هتلبسى الا شورت وبدى نص كم لاما والله نا هنروح فى حتة خالص

بسنت : انتِ هتعملى عليا كبيرة

ندى : كبيرة غصب عنك وهتسمعى الكلام غصب عنك او بمزاجك

بسنت : يووووه بقى

ندى : انا رايحه اشوف مودى (وخرجت)

__**__**__

رقية : فى ايه يا ندى صوتكوا عالى كده ليه

ندى : مفيش حاجة يا عمتو

رقية : لا بجد

ندى : هو مودى فين

رقية : بيلعب جوه فى اوضة الولاد

ندى : ماشى هروحله عن اذنك

(. راحت ندى جابت محمد .)

محمد : فى ايه كنت عايز العب

ندى : يالا عشان البسك 

محمد : هنروح فين

ندى : هروح اجبلك هدوم ومايوه عشان البحر

محمد : الله ماثى يالا بينا

ندى : طب تعالى البسك

(. لبست ندى محمد .)

ندى : بسنت انا خارجه اجيب شوية حاجات لـ محمد مش عايزة حاجة من بره

بسنت : لا شكراً

ندى : اوكى باى

*_____________________________________________**___________________________*

(. راحت ندى جابت لـ محمد كل اللى نفسه فيه ولما تعب طلب ياكل ايس كريم فـ خدته ندى وراحت الكافيه اللى متعودة تقعد فيه .)

ندى : اجيبلك ايس كريم ايه

محمد : ثكولاته

ندى : ومعاها ايه تانى

محمد : مانكه

ندى : ايه العك ده يا مودى شيكولاته ومانجه

محمد : طيب ايه

ندى : لا شيكولاته وڤانيليا لا مانجه وفراوله مثلاً

محمد : انا عايز كله

ندى : كتير عليك يا حبيبي هجبلك شيكولاته وڤانيليا

محمد : ماثى

(. طلبت ندى نسكافية وايس كريم وفضل محمد يرغى معاها كتير جداً ، ندى اتلفت لقيت نفس الشاب قاعد بس مش واخد باله منها ولما شافها غير مكانه وجه قعد قصادها .)

محمد : هاتى بقى موبايلك العب شوية

ندى : قولت لا خلص يالا الايس كريم عشان نمشى

محمد : مش هخلثه الا لما تجيبي الموبايل العب بيه شوية

ندى بحزم : قولت لا تبقى لا

محمد : انتِ وحثة

(. الشاب اللى قاعد قصادهم كان متابع الحوار وشغل لعبة على موبايله وعلىَ صوتها عشان يلفت انتباه محمد ، محمد سمع الصوت وقام راح عنده .)

محمد : ممكن العب فى موبايلك

الشاب : طبعاً

(. قامت ندى وهى متعصبة جداً .)

ندى : محمد تعالى هنا (ومسكته من ايده)

الشاب : سيبيه يلعب فى الموبايل شوية

ندى : لا متشكرة 

محمد : هلعب ثوية ثغيرين يا ندى

ندى : لا يالا احنا اسفين

محمد : لا بقى انا مث ماثى

الشاب : على فكرة انا معنديش اى مشكلة

ندى : انا بقى عندى (وطلعت موبايلها واديته لـ محمد)

محمد : العب فيه

ندى : اه يالا عن اذن حضرتك واسفين على الازعاج

الشاب : مفيش ازعاج ولا حاجة

(. دفعت ندى الحساب وخدت محمد ووقفت تاكسى .)

ندى : اللى حصل النهاردة ده ميتكررش تانى مفهوم

محمد : مانتِ اللى مث عايزة تدينى الموبايل

ندى : المفروض ان انا اختك الكبيرة وقولتلك ان ماما قبل ما تروح عند ربنا سابتنى مكانها يعنى المفروض تسمع كلامى زى ما كنت بتسمع كلام ماما بالظبط

محمد : اثف

ندى : لا يا مودى انا زعلانه ومش هكلمك النهاردة خالص

محمد : اثف والله يا ندى مث هعمل كده تانى

ندى : لما نشوف

*_____________________________________________**___________________________*

بعد مرور اربع ايام فى الــعــريــش .....

ندى قاعدة على الشط بتابع محمد وبسنت وحازم وحمزة وهما فى مركب ببدال فى البحر وبتكلم فى نفسها 

>> ايه يا ندى مال الواد واكل عقلك كده ليه ؟ ليه مش بيروح من بالك من اخر مرة شوفتيه فيها ؟ ليه اتخنقتى من العريش ونفسك ترجعى اسماعلية بسرعه كده ؟ عشان تروحى الكافية وتشوفيه وتسمعى صوته اللى بيرن فى ودانك من ساعة ما سمعتيه ؟ يا ترى ايه حكايتك يا عم اللغز

(. فى عز اندماج ندى فى التفكير حسيت بحركة مريبة جداً فى المياة لفتت انتباهها وخلتها تنزل المياة بهدومها عشان تطمن على اخواتها ولقيت ................. .)

اشوفكم الحلقة الجاية

ارجو التقييم بـ تعليق

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)