الحلقة الرابعة
ذكرى : ( حكتله اللى حصل مع مروان ) انا بقي قولتله لازم يقابلك انت الاول قبل ما يقابل بابا ، أدهم انت معايا ، أدهم أدهم
أدهم : ايه يا ذكرى انتِ كنتِ بتقولى حاجة ؟
ذكرى : كنت بقول حاجة !! أنت مش معايا خالص يا أدهم
أدهم : معلش يا ذكرى انا مش فايق اسمع حاجة دلوقتى
ذكرى : طيب مالك يا حبيبي احكيلي
أدهم : ذكرى لو سمحتى سبيني لوحدى ، ممكن ؟
ذكرى : خلاص زى ما تحب
(. وخرجت ذكرى من الاوضة وقفلت الباب وراها وهى قلقانه جداً على اخوها ، اما ادهم فـ بدأ يكتب فى كشكوله .)
__**__**__
(. فى الناحية التانيه كانت وصال بتتفرج على التلفزيون وذكرى خرجتلها .)
وصال : مالك يا زيزو ضاربة البوز ليه
ذكرى (بتقعد جنبها) : مفيش يا ماما
وصال : اكيد عشان أدهم
ذكرى : انا مش عارفة ماله ؟
وصال : مش عارفة ماله ازاى !! أدهم بقاله سنين فى الحالة دى
ذكرى : ربنا ينوله اللى فى باله
وصال : يارب ، بس انتِ كنتى داخلة فرحانه اوى ، وشكلك حصلك حاجة فرحتك ودخلتى تفرحى ادهم معاكى فكبسك
ذكرى : لا
وصال : لا ايه ، مش حصلك حاجة فرحتك ولا مكبسكيش
ذكرى : الاتنين
وصال : على اساس انى جوز خالتك ومش فاهمك ، انا امك يا بت يعنى اعرفك من نظرة عينك
ذكرى : خلاص يا ماما كنت فرحانه وادهم كبسنى ، استريحتى كده
وصال : لا طبعاً مستريحتش (بتقوم) هستريح لما تقومى تحضرى معايا العشا ابوكى زمانه خلص العياده وعلى وصول
ذكرى : حاضر هغير هدومى واحصلك
*_____________________________________________**___________________________*
بعد كام يوم فى احدى النوادى ...
(. بعد كام يوم كان خرج أدهم من حالة الحزن اللى تملكته وحكيتله ذكرى على اللى حصل مع مروان واتفقوا يتقابلوا .)
"أدهم وذكرى قاعدين سوا ولسه مروان مجاش"
ذكرى : هو المفروض احضر القعدة دى ولا لا
أدهم : عادى يعني
ذكرى : عادى يعني احضر ولا محضرش
أدهم : هو احنا هنتكلم فى اسرار يعني ولا هنبدل مخدرات ، عادى يا زيزو خليكي
ذكرى بفرحة : طيب
أدهم : بس هو فين ؟
ذكرى : زمانه على وصـ...... ، اهوه اهوه جاى
أدهم : طيب اتقلى كده وخليكي عاقلة
(. هنا جه مروان وسلم على أدهم وذكرى وقعد ، أدهم وذكرى قاعدين جنب بعض على كنبة ومروان قاعد على كرسي قصادهم .)
مروان : احب اشكرك على الدوا بتاع اللثة ، انا كنت بعانى والله من الموضوع
أدهم : بالشفا ان شاء الله والموضوع مش مستاهل شُكر ، انا عملت شغلى
مروان : لا بس انت دكتور شاطر
أدهم : شكلك بتنفخنى عشان معترضش على ارتباطكوا
مروان : ههههه لا والله دى كلمة حق
أدهم : متشكر مرة تانيه
مروان : انا مبحبش اللف والدوران ، او المقدمات الطويلة لذلك هدخل فى الموضوع على طول
أدهم : ياريت
مروان : أنا طبعاً معجب بـ ذكرى جداً وبسببها حبيت انى استقر وابنى اسره
أدهم : كلام جميل
مروان : أنا زى ما ذكرى عرفتك ، قبطان بحرى لـ سفن تجارية فى اوروبا بس انا عندى مشكله واحدة ومرضتش ابلغ بيها ذكرى وحبيت تعرفوها سوا
"أدهم وذكرى بيبصوا لبعض" .. أدهم : خير مشكلة ايه ؟
مروان : انا حياتى مش مستقرة
أدهم بقلق : يعني ايه مش مستقرة ؟
مروان : انا بسافر بـ سفن من ليڤربول لـ اسكندرية والعكس ، وطبعاً باخد ايام فى المياة وبفضل فى مصر لحد ما السفينه تفضى وتشحن وبرجع بيها ليڤربول وهكذا
أدهم : طيب وذكرى او اى زوجه هتتجوزها هيكون ايه وضعها
مروان : انا مُقيم فى ليڤربول واجازتى السنوية بقضيها فى مصر وبسافر مرة او اتنين فى الشهر مش اكتر وباقى الشهر قاعد فى ليڤربول
أدهم : افهم من كده ان ذكرى هتعيش معاك بره
مروان : ماهو انا مش شغال فى مصر ، انا بشتغل فى شركة شحن بحرى انجليزية يعني لازم اكون متواجد فى ليڤربول دايماً
أدهم (بيبص لـذكرى) : وانتِ ايه رأيك ؟
ذكرى بتوتر : مش عارفة ، انت ليه مقولتليش الموضوع ده من الاول ؟
" لسه مروان هيتكلم أدهم سبقه "
أدهم : وهى دى هتفرق معاكى فى ايه ؟
ذكرى : قصدك ايه ؟
أدهم : قصدى انك لو عيزاه وموافقة تتجوزيه يعني تعشيه معاه فى النار لانها بالنسبة لك هتكون جنة
ذكرى بصوت واطى : واسيب مصر ؟ واسيبكوا ؟
أدهم : ما تسبينا ياختى هو انتِ هتفضلى عايشة معانا العمر كله ده غير يعني انك لو مبسوطه احنا مش هنزعل على فراقك
ذكرى : يعني انت موافق ؟
أدهم : مش مهم أنا ، انتِ موافقة ولا لا ؟
مروان : صدقيني يا ذكرى مش هتحسى انك فى غربة خالص وهتتبسطى هناك وانا بوعدك اهو قدام ادهم انك لو متبسطيش هنزلك مصر
أدهم : ده غير انه ممكن لو مسافر مصر تسافرى فى نفس يوم وصوله لـ مصر واهو تشوفينا ومتسبهوش
ذكرى : تمام
أدهم : احنا هنتكلم مع بابا ونقنعه طبعاً بفكرة العيشة بره وبعدين ناخدلك معاد وهكلمك ابلغك
مروان : اوكى متشكر جداً
أدهم : العفو
(. قعدوا مع بعض شوية وبعدها قام مروان وسابهم .)
" بعد ما مروان مشى "
أدهم : أنتِ عارفة هو عايش فين ؟
ذكرى : آه ، ليه ؟
أدهم : اكتبيلي العنوان عشان عايز اسأل عليه قبل ما اقدمه لـ ابوكى
ذكرى : ربنا يخليك ليا يا أدهم
أدهم : وميحرمكيش منى ابداً
ذكرى : هههههه يارب ياخويا يارب
*_____________________________________________**___________________________*
فى احدى الكافيهات ...
(. تامر وفطيمة اتفقوا يتقابلوا عشان تامر يدي الـ cv لـ فطيمة .)
تامر : اهو الـ cv بتاعى اهو يارب يصدق بس ويجبلى شغل كويس
فطيمة : ان شاء الله
تامر : مالك يا فطيمة
فطيمة : مالى ازاى ؟
تامر : متغيره كده بقالك كام يوم
فطيمة : لا مش متغيره ولا حاجة ، يمكن من قعدة البيت
تامر : طيب يا حبيبتى ماتخرجى ، روحى لـ رهف
فطيمه : رهف عندها مذاكرة يعني مش فضيالى طول الوقت
تامر : ياريت ينفع نقضي اليوم كله سوا
فطيمه : وايه اللى يخليه مينفعش ؟
تامر : يعني اكيد مامتك مش هتسيبك تخرجى الوقت ده كله
فطيمة : عندك حق
(. بعد مده قصيرة من الصمت .)
فطيمة : تعرف انى خسرت ماما بسببك
تامر بزهق : معلش ، مفيش ام بتخسر ولادها
فطيمة : اسفة ، نسيت انك قولتلى محكلكش على مشاكلى
تامر : كويس انك افتكرتى
فطيمة : انا كمان عايزة افكرك بحاجة
تامر : حاجة ايه ؟
فطيمة : ان احنا بقالنا اكتر من اربع سنين مرتبطين ، طول الاربع سنين دول انا مكنتش ببص لجنس رجل غيرك او بمعني اصح عيونى مبتشوفش غيرك
تامر : مانا عارف كل ده يا حبيبتى مش محتاج تفكريني بيه
فطيمة : ماشى ، انا يدوب اقوم اروح عشان ماما
تامر بيبص فى ساعته : اه وانا كمان هروح عشان ابويا قافش عليا الايام دى
(. وقام تامر روح وفطيمة قالتله انها هتستنى رهف تعدى عليها بس رهف كانت مستنياه فى عربيتها قدام الكافيه ، بمجرد خروج تامر من الكافيه خرجت فطيمه وركبت مع رهف عربيتها ، ركب تامر تاكسى ومشيت رهف ورا التاكسى بالعربيه ، وفضلوا وراه لحد ما دخل كافيه تانى بس كان فيه شلة بنات على ولاد .)
فطيمة : اهو يا رهف جاى يقابل صحابه
رهف : والله !! ولما هو جاى يقابل صحابه قالك ليه هروح
فطيمة : على فكرة بقي انتِ مُتحامله على تامر ، ممكن يكون مش عايز يزعلنى
رهف : وايه الزعل فى انه يقولك انه خارج مع اصحابه ؟
فطيمه : انه بيخرج وكده وانا قاعدة فى البيت بسببه
رهف : انتِ مصدقة اللى انتِ بتقوليه ده ؟
فطيمة : اه ، الراجل اهو قاعد محترم لا راح قابل واحدة ولا راح شقة مشبوهة
رهف : والتلت بنات اللى جوه مش مكفينك ؟
فطيمة : صداقه عادية ، تامر بيحبنى ومخلص ليا ، تقدرى تقوليلي ايه اللى يخليه معايا لحد دلوقتى طالما مبيحبنيش مستفيد ايه ؟
رهف : مش عارفة مستفيد ايه !! الهدايا اللى حضرتك بتجبيهاله بمناسبة وغير مناسبة مش فايدة !! ولا الشيكات اللى بتدفعيها فى المطاعم والكفيهات مش فايدة !!
فطيمة : انا بدفع لانه لسه مشتغلش وممعاهوش فلوس ومبيكونش عايزنا نخرج عشان كده وانا اللى بغصب عليه
رهف : فطيمة ، انتِ حره بس اتمنى متكونيش مُغيبة ولا مضحوك عليكي
فطيمة : متقلقيش ان شاء الله خير و يالا بقي خلينا نروح نودى الـ cv لـ باباكى
رهف : ماشي ، يالا
*_____________________________________________**___________________________*
فى بيت دكتور محسن ...
(. أدهم وذكرى قاعدين مع بعض فى بلكونه أوضة أدهم .)
ذكرى : طيب ما تكلم بابا أنت يا آدهم
أدهم : اقوله ايه ؟
ذكرى : قوله انك عرفته بالنادى وشافنى وعايز يتقدملى
أدهم : طبعاً الراجل شافك فـ مقدرش يقاوم جمالك وقرر يتقدملك من غير ما يعرف حاجة عنك يكفيه انك اختى صح
ذكرى : انت بتتريق ؟
أدهم : اه طبعاً بتريق ، انتِ معملتيش حاجة غلط تخليكي تكدبى كدبه ممكن تتكشف بعدين واصلاً الموضوع مش محتاج كدب
ذكرى : يعني انت عايزنى انا اروح اقول لـ بابا
أدهم : آه ، قوليله الحقيقة ، واحد كنت بلعب معاه تنس وحصل اعجاب متبادل وقالى انه عايز يتقدملى وخليته يقابل ادهم وبعدين انا اتدخل
ذكرى : طيب مانا عندى فكرة احلى
أدهم : قولى ؟
ذكرى : تقول انت لـ بابا الكلام ده
أدهم : فى ايه يا بت انتِ خايفة ولا ايه
ذكرى : بصراحة آه
أدهم : امال معايا بتبقي بجحة بجاحة
ذكرى : ايوة ياخويا بس مع امك وابوك بكون فرخة ، بكش وبخاف
أدهم : خلاص هنقول احنا الاتنين سوا
ذكرى : شكلك انت كمان خايف
أدهم : هخاف من ايه ، محدش هياكل علقة غيرك ، وبعدين لا احنا الاتنين سوا لا ماليش دعوة بالموضوع ده
ذكرى : لا خلاص خلاص احنا الاتنين سوا موافقه
أدهم : بكرة بقي
ذكرى : ليه ما نخليها النهاردة
أدهم : لا لما اسأل عليه الاول يا خفيفه
ذكرى : اه صح ماشى
(. هنا موبايل ذكرى رن وكان مروان اللى بيتصل .)
ذكرى : طيب انا هـ...........
أدهم : روحى ياختى كلميه
ذكرى : انت عرفت ازاى انه هو ؟
أدهم : من قرون الاستشعار اللى مركبهالك دى
ذكرى : وانا بموت فيك يا أدهم
أدهم : يالا روحى قبل ما يزهق و يفصل
(. دخلت ذكرى اوضتها وقفلت على نفسها اما ادهم فدخل الاوضة وقفل البلكونه وضلم الاوضة وقعد يرسم على ضوء الاباجورة .)
__**__**__**__
فى اوضة ذكرى .....
ذكرى : الو
مروان : وحشتيني
ذكرى : وانت كمان وحشتني
مروان : على فكرة أدهم اخوكى جدع جداً وانا احترمته اوى
ذكرى : ادهم ده احلى حاجة فى حياتى
مروان : يا بخته
ذكرى : ههههه وانت بعده
مروان : ربنا يخليهولك يا حبيبتى
ذكرى : اه صحيح انت ليه مقولتليش على حوار العيشة بره ده
مروان : بصراحة حبيت اعرف رأيك فى وجود اخوكى
ذكرى : بس انا اتكسفت ارد عليك قدام ادهم
مروان : ليه كنتى ناويه تقولي ايه ؟
ذكرى : كنت هقولك اللى ادهم قاله
مروان : ايوة يعني اللى هو ايه ؟
ذكرى : اللى هو انى بحبك واى مكان معاك يبقي جنة
مروان : انا بحبك اوى يا ذكرى ، عمرى ما قابلت واحدة وحبيتها نص حبي ليكي
ذكرى : طيب انا كنت عايزة احكيلك على حاجة
مروان : احكى يا حبيبتى
ذكرى : انا كنت مرتبطه قبل كده
مروان : امتى ؟
ذكرى : من تلت سنين ، ارتبطت بـواحد لمده سنة وبعدين أدهم عرف انه كان كداب وانا اتأكدت من ده بنفسي وسيبته
مروان : كنتى بتحبيه اوى
ذكرى : مانكرش انى حبيته بس حب عن حب يفرق ، انا حاسة انى عمرى ما حبيت حد فى حياتى غيرك
مروان : ربنا يقدرنى واسعدك
ذكرى : يعني مش زعلان ؟
مروان : لا طبعاً انا ماليش دعوة باى حاجة فاتت ، انا ليا اللى جاى
ذكرى : ربنا يقدرنى واسعدك انا كمان
مروان : وجودك معايا هو سعادتى
ذكرى : وانا هفضل جنبك لاخر عمرى
مروان : بحبك
ذكرى : بعشقك
*_____________________________________________**___________________________*
فى بيت نهال الواصفى ...
(. رهف مكنش عندها حاجة مهمه فى الكلية فقررت تروح تقعد مع مامتها لاخر الاسبوع .)
نهال : انتِ متخانقة مع ابوكى
رهف : هو انا لما اجى لحضرتك تقولى متخانقة مع بابا ولما ماجيش تقولى ابوكى معصيكي عليا
نهال : انا حاسة ان فيكي حاجة مش طبيعيه
رهف بتنهيدة : حاجة واحدة !! دى حاجات
نهال : مالك يا حبيبتى
رهف : هو ليه حضرتك وبابا ومترجعوش لبعض ، حضرتك لسه بتحبيه وهو كذلك
نهال : فعلاً ، احنا الاتنين لسه بنحب بعض واوى كمان ، بس الجواز يلزمه حاجات تانيه غير الحب احنا افتقدناه ، نحب بعض آه لكن نرجع لبعض ونكمل سوا مينفعش
رهف : عندك حق
نهال : وعرفتى منين ان عندى حق ؟
رهف : اصل بابا قالى نفس الكلام
نهال : تمام ، انتِ بقي مالك ، بتحبى ؟
رهف : والله مانا عارفة ايه اللى انا فيه ده
نهال : طيب احكيلي وانا افهمك
رهف : انا متعلقة بواحد معرفش عنه اى حاجة غير انه دكتور
نهال : متعرفيش عنه حاجة خالص !! ولا سنه ولا عيلته
رهف : ههههه انا اصلاً معرفش اذا كان مناسب ليا ولا لا
نهال : وايه يجبرك على كده ؟ ايه الحب المنيل ده
رهف : يا ماما انا مش عارفه اصلاً اذا كان ده حب ولا فضى
نهال : فضى !! فاضيه يعني
رهف : بالظبط
نهال : بصي يا روفه ، لاما تاخدى موقف مع نفسك وتطلعيه من دماغك سواء بتحبيه او فضي ، لاما تاخدى موقف معاه
رهف : اخد موقف معاه ازاى ؟
نهال : يعني اخلقى الفرصه اللى تفتح معاه مجال للكلام والحوار فاهمه
رهف : اه فاهمه
نهال (بتحضنها) : ربنا يكتبلك كل خير يا حبيبتى ويصلحلك الاحوال
رهف : يارب يا ماما
*_____________________________________________**___________________________*
تانى فى عيادة دكتور محسن .....
(. قررت رهف تروح العيادة وتخلق الحوار بينها وبين الدكتور اللى شاغل بالها زى ما مامتها قالتلها ، دخلت رهف العيادة وكانت حاجزة قبل كده بالتليفون ، دفعت الحجز واستنت دورها ، قعدت تتصفح مجلة لحد ما يجي دورها .)
موظف الاستقبال : آنسة رهف الطوبجى
رهف : ايوة
موظف الاستقبال : دور حضرتك ، اتفضلى
رهف : متشكرة
(. قامت رهف ودخلت اوضة الكشف وقفلت الباب وراها وقبل ما تدخل وقف أدهم من على الكرسي بتاعه وفضلوا واقفين يبصوا لبعض ورهف فى قمة استغرابها من تصرفه ، قرب منها أدهم ووصل عندها .)
أدهم بابتسامه عريضة : اذيك
رهف : كويسة
أدهم (بيمسك ايدها) : وحشتيني اوى
رهف (بتسحب ايدها) : نعم !!
أدهم : كل ده يا رحمه مشوفكيش
رهف : رحمة مين !! انا اسمى رهف
أدهم بنبرة حنينه : رهـف ، اسم جميل (بيمسك ايدها تانى) انا ميفرقش معايا رهف من رحمه من اى اسم تانى انا بحبك انتِ مش بحب اسمك
رهف (مذهولة ومصدومه) : نعم !! انت بتقول ايه ؟ (وبتسحب ايدها)
أدهم : أنتِ كنتى فين كل ده !! قلقتيني عليكى
رهف : انت بتقول ايه !! انت مجنون صح
أدهم(بيمسك ايدها) : مجنون بيكى
(. رهف وقفت مصدومه ومذهوله وبوؤها مفتوح ومبرقة من كلام أدهم .)
أدهم (بيسحب من ايدها) : تعالى اقعدى
(. شدت رهف ايدها بكل قوتها وخرجت من العيادة تجرى من شدة الخضة وأدهم وراها ولكن موظف الاستقبال وقفه .)
موظف الاستقبال : دكتور أدهم
أدهم بنرة استعجال : نعم فى ايه ؟
موظف الاستقبال : .......................
اشوفكم الحلقة الجاية
ارجو التقييم بـ تعليق :)
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
www.wattpad.com/alaaelsherifi
ونبي نزلي الحلقة الرابعة بقا
ردحذف