الحلقة الحادية عشر
جزء من حلقة سابقة :
انس : هقولك ، بس عايزك تعرفى ان اللى هقوله ده حاجه اضطراريه
شيرين : مش فاهمه حاجة ما توضح
انس : هفهمك
شيرين : ها ؟
*_____________________________________________**___________________________*
انس : امممم خلاص يا شيرين مفيش حاجة
شيرين : هو ايه اللى مفيش حاجة امال ايه المقدمات دى كلها
انس : انا مسافر اسبوعين
شيرين : اسبوعين ليه !!
انس : شغل
شيرين : شغل ايه ده يا انس انت عمرك ما سافرت
انس : ده مؤتمر طبى للصيادله
شيرين : طيب مينفعش اجى معاك انا كمان مانا صيدلانيه
انس : ونسيب العيال لـ مين يا شيرين
شيرين : اه صحيح طيب اسبوعين كتير اوى
انس : ممكن تروحى تقعدى عند مامتك لو عايزة
شيرين : هروح اسبوع واحد بس
انس : اوكى اعملى اللى يريحك
شيرين : هتسافر امتى
انس : بعد بكرة
شيرين : تروح وترجع بالسلامه
(. قامت شيرين تشوف ولادها واتصل انس بـ تامر صاحبه .)
انس : تامر انت فين دلوقتى
تامر : طيب قول سلام عليكم
انس : انت فين يا ابنى عايز اشوفك ضرورى
تامر : فى البيت
انس : طيب هعدى عليك عايزك فى حاجة مهمه
تامر : طيب انا مستنيك
(. نزل انس وراح لـ تامر بيته وخده وراحوا قعدوا فى كافيه .)
*_____________________________________________**___________________________*
فى شقة رضوى .....
(. رضوى قاعدة فى امان الله لقيت الجرس بيضرب بقوة فتحت وهى مخضوضة لقيت نورهان .)
رضوى : مالك يا نورهان
نورهان : انا تعبانه اوى يا رضوى
رضوى : طيب تعالى ادخلى
(. دخلت نورهان وهى شبه منهارة وحكت لـ رضوى كل حاجة .)
رضوى : بصى يا نورهان انا جايز كنت مؤيدة جوازكم بس انا كنت ضد انه يجي بالطريقة دى
نورهان : يعنى ايه ؟
رضوى : يعنى كان لازم اخواتك ومحى يعرفوا انك متجوزه وجيرانك كمان يعرفوا انتِ دلوقتى حامل وكلها شهرين تلاته وبطنك هتظهر هتقولى ايه للناس
نورهان : ما يولع الناس انا مش ده اللى هاممنى انا زعلانه من اللى انس عمله
رضوى : ماهو له حق برضه يا نور ومش معنى انه تفاجئ بالحمل انك بالنسبة له مجرد عشيقة او بيت راحة زى ما بتقولى
نورهان : انتِ عندك تفسير تانى لـ رد فعله
رضوى : يا نور انس اتجوزك فى لحظة ضعف منه ، قرر يستغل فرصه ممكن القدر ميجبهاش تانى ، اتجوزك من غير ما يعمل حساب لحاجة
نورهان : انتِ مالك صعبان عليكي انس اوى كده طيب وانا
رضوى : مش فكرة تعاطف يا نور بس انا بقول كلمه الحق ، انس مظلمكيش ولا جه عليكي ورد الفعل طبيعي جداً لانه مش عايز يخلف منك فى السر زى ما قال لازم الناس كلها تعرف
نورهان : مظلمنيش !!! انتِ شايفة كده ده انتِ ناقص تقوليلي ان انا اللى ظلمته وظلمت شيرين
رضوى : على فكرة محدش فيكوا ظالم وبرضه محدش فيكوا مظلوم
نورهان : نعم !!
رضوى : زى ما قولتلك انتِ لو بره الدايرة هتقولى نفس كلامى ده ، انا الاول كنت متعاطفه مع شيرين بس شيرين غلطت فى حق نفسها ، طالما هى حاولت معاه ومكنش فى نتيجه يبقى كانت تسيبه متربطش نفسها معاه بـ عيلين وتشوف حياتها وتعيش حياة طبيعيه ، كذلك انس فين الظلم اللى وقع عليه ان هو كان مجبور فى حياته مش مشكلتك ولا مشكلة شيرين ان شخصيته ضعيفه
نورهان : طيب وانا ؟
رضوى : انتِ ايه يا نور !! انتِ كنتى متجوزه راجل اى واحدة تتمناه اتجوزتيه بمزاجك واتطلقتى منه بمزاجك وبرضه اتجوزتى انس بمزاجك وانتِ عارفة كل ظروفه
نورهان : بس مكنتش اعرف انى هبقى بالنسبة له وسيلة عشان ................
رضوى تقاطعها : لا يا نورهان انتِ عارفة ان انس بيحبك متضغطيش عليه بزيادة
نورهان : يعنى طلعت انا اللى غلطانه !!
رضوى : عايزة الصراحه اه غلطانه ، غلطانه انك اتجوزتى من غير ما اخواتك يعرفوا وعشان اتجوزتى من غير تفكير
نورهان : يعنى ايه من غير تفكير !! هو انا مش خدت رأيك
رضوى : قولتلك ايدت الفكرة بس مش مؤيدة للطريقة والتوقيت اللى انت نفذتوا فيهم
(. سكتت نورهان ورضوى شوية .)
نورهان : طيب ممكن اطلب منك طلب
رضوى : طبعاً
نورهان : ممكن تكلميه تقوليله انى تعبانه وانتِ مش عارفة تتصرفى
رضوى : ليه كده ؟
نورهان : من ساعة ما مشى من عندى وانا معرفش عنه حاجة وقلقانه عليه فـ لو قولتيله انا تعبانه هيجي وهطمن عليه من غير ما اجرح كرامتى
رضوى : طيب ماشي بس ممكن يقول عرفت رقمه ازاى
نورهان : مانتِ هتكلميه من موبايلى كأنك طلعتى الرقم من عندى
رضوى : خلاص اوكى
(. خدت رضوى موبايل نورهان عشان تتصل بـ انس .)
*_____________________________________________**___________________________*
فى الجهة التانيه فى احدى الكافيهات .....
(. انس وتامر قاعدين مع بعض وانس حكى لـ تامر كل حاجة من ساعة ما عرف نورهان مراراً بجوازه بـ شيرين وبعدين جوازه من نورهان وبعد كده حمل نورهان .)
تامر : انت ليه ورطت نفسك التوريطه دى بس
انس : ما قولت يا ابنى بحبها
تامر : بس انت كان المفروض تروح تطلبها من اخواتها انت ورطت نفسك وورطتها معاك
انس : يا ابنى افهم اخوتها عمرهم ما هيوافقوا عليا
تامر : طيب هى نورهان كانت وضحتلك ليه اخواتها كانوا رافضينك اوى كده
انس : هى اصلاً متعرفش انا بس اللى اعرف
تامر : يعنى انت عارف السبب
انس : ايوة عارف وعشان متأكد ان عمرهم ما هيوافقوا لا دلوقتى ولا بعد كده اتجوزتها هعمل ايه يعنى
تامر : طيب ايه السبب يعنى
(. سكت انس وسرح كأنخ بيفتكر حاجة .)
تامر : فى ايه يا جدع انت هتخبى عليا ولا ايه
انس : مش فكرة اخبى بس عادى انا كل السنين دى مقولتش لحد
تامر : طيب فى ايه فهمنى
انس : محى طليق نورهان انا كنت اعرفه بس معرفه سطحيه وهو كان بيحب نورهان ولما عرف انى بحب نور وعايز اتجوزها ورطني فى واحده معرفش جابها منين واتحدفت عليا ازاى وطبعاً اخوها شافنى فى منظر لا احُسد عليه وطبعاً اتأكد انى مبحبش نور وبضحك عليها عشان اخد منها اللى انا عاوزه
تامر : يعنى انت كنت على علاقة بواحده
انس : يا ابنى معرفة عادية كـ اصحاب عادى يعني بس اللى شافه اخو نور غير كده
تامر : يعنى حصل حاجة بينك وبينها
انس : والله مالمست واحدة قبل شيرين مراتى ومن بعدها نورهان بس هو كان تعبان وعرف يوصلهم انى شيطان وهو ملاك
تامر : بس برضه كنت تحاول مكنتش هتخسر حاجة
انس : اهو ده اللى حصل بقى
تامر : طيب انت هتعمل ايه دلوقتى هتكمل مع نورهان
انس : اكيد يعنى انا ماصدقت اتلايمت عليها
تامر : طيب هتعمل ايه
انس : هو انت كل اللى عليك هتعمل ايه امال انا جاي احكيلك ليه
تامر : بص بقى انا من وجهة نظرى انك تعرف اخوات نورهان انك اتجوزتها ودلوقتى خلاص غير زمان انتوا كبرتوا مش عيال صغيرين تمام
انس : تمام
تامر : سؤال بس ، انت عايز تكمل مع شيرين ولا عايز تطلقها
انس : مش عارف بصراحة ، ساعات احس انى لازم اطلقها عشان تتجوز حد تانى لانها تستاهل احسن منى مليون مرة وفى نفس الوقت مش قادر ابعد عن ولادى
تامر : بص يا انس عشان متظلمش حد ، لو قررت تكمل مع شيرين يبقى تديها حقها وزيادة وكمان تعوضها عن اللى فات لكن متركنهاش جنبك
انس : طيب وشيرين
تامر : عادى يعنى خليك معاها برضه بس مش لازم شيرين تعرف يعنى
انس : يا ابنى بقولك حااامل افهم بقى
تامر : ايه يعنى حامل ، لما ولادك يكبروا ابقى عرفهم على بعض لكن بلاش دلوقتى هتخرب الدنيا وهتخسر الاتنين
انس : مش مقتنع حاسس ان شيرين لازم تعرف ده حقها
تامر : وانت مفكرتش فى حق شيرين ليه قبل ما تتجوز نور ؟
انس : انت فاكر انى مش تعبان انا من يوم ما اتجوزت نورهان وانا كاره نفسي ، احساس انك خاين وكداب ده احساس قذر جداً
تامر : بص بقى انا قولت رأيي بس اهم حاجة سواء شيرين عرفت او لا حقهم عليك انت الاتنين انك تعدل بينهم
(. قطع كلام انس وتامر اتصال رضوى من تليفون نورهان .)
انس : ثوانى دى نور (ورد) ايوة يا نور
رضوى : انا مش نور انا رضوى صاحبتها
انس : خير نورهان مالها ؟
رضوى : هى جت عندى وفجآة وقعت من طولها ومش عارفة مالها
انس : طيب عنوانك ايه بسرعه لو سمحتى
(. ادتله رضوى العنوان وقفلوا .)
تامر : فى ايه يا ابنى مالها نورهان ؟
انس : اغمى عليها عند صاحبتها انا هروح اشوفها عن اذنك
تامر : طيب ابقى طمنى
انس : ماشى
(. وركب انس عربيته وطار على بيت رضوى وهو متوتر جداً .)
*_____________________________________________**___________________________*
فى بيت هشام ....
(. هشام جاى من شغله بسبب اتصال من نهى انها تعبانه جداً .)
هشام : خير يا نهى مالك
نهى : تعبانه اوى يا هشام خدنى وديني للدكتور بسرعه
هشام : تعبانه مالك
نهى : عندى مغص فظيع
هشام : طيب يا حبيبتى قومى تعالى
(. وهى بتقوم هشام شاف دم .)
هشام : ايه ده يا نهى !!
نهى : ايه ده !! انا عندى نزيف ولا ايه ؟
هشام : طيب روحى غيري هدومك يالا عشان نلحق نروح للدكتور
نهى : بقولك تعبانه تقولى روحى غيري هدومك
هشام : امال هتروحى كده ؟
نهى : تعالى ساعدنى يا هشام
هشام : انتِ تعبانه للدرجة دى
(. نهى مردتش على هشام وبطلوع الروح قدرت تروح تغير هدومها وهشام محاولش يساعدها وسندها وركبها العربيه وراحو للدكتور اللى قال ان حصلها نزيف من جدار الرحم وعشان كده جالها مغص وادالها مسكنات وادوية توقف النزيف وقال ان مفيش حاجة خطيرة ورجع هشام ونهى على البيت .)
هشام : يعنى تجرجريني على ملى وشى وتسيبيني شغلى عشان حضرتك بتدلعى
نهى : بتدلع !! انا بتدلع
هشام : ايوة الدكتور قال مفيش حاجة خطيرة
نهى : مش معنى كده انى مكنتش تعبانه وبتدلع
هشام : كنتى خدى اى مسكن يا نونو
نهى : والله ما عارفة اقولك ايه ، ده انت لما بيجيلك شوية ورد بتوقف البيت كله على رجل واحدة وفى الاخر تقولى انا مهمله
هشام : ايه دخل ده فى ده
نهى : كل حاجة داخله فى بعضها حس بالناس عشان يحسوا بيك وقدر تعبهم عشان يقدروا تعبك (ومشيت)
هشام : انتِ رايحه فين ؟
نهى : انا داخله انام عشان اقدر اقوم اجهز غدا
هشام : طيب يا حبيبتى استنى ادخلك الاوضة عشان تسترحي
نهى بصوت واطى : لا مضحى اوى
(. دخل هشام ساعد نهى فى تغيير لبسها ودخلها السرير تنام .)
هشام : نامى براحتك يا حبيبتى انا هجيب اكل من بره لينا ماشى
نهى : ماشى
هشام : متزعليش منى حقك عليا
نهى : لا خلاص مش زعلانه
هشام : بحبك اوى
نهى : وانا كمان
(. وخرج هشام من الاوضة عشان يسيبها تستريح .)
نهى لنفسها >> اى نعم هو فى الاخر خد رد فعل حلو اوى بس مالوش طعم بعد ما شوفت فى اسلوبه عدم التقدير والاستهتار
هشام لنفسه >> والله مش قصدى عدم تقدير انا بس مبحبش اهولها الامور عشان متتخضش زيادة وتتعب اكتر
*_____________________________________________**___________________________*
فى بيت رضوى ....
(. وصل انس المكان اللى فيه شقة رضوى وركن العربية تحت العمارة ويدوب نزل منها وهيدخل مدخل العمارة سمع صوت بيندهه .)
بهاء : انس يا انس
انس : بهاء !! انت بتعمل ايه هنا
بهاء : جاى ازور اختى ساكنه هنا
انس : بجد
بهاء : انت جاى تزور حد
انس : اه واحد صاحبى
بهاء : طيب تعالى نطلع
(. طلع بهاء وانس العمارة وركبوا الاسانسير وطلعوا نفس الدور ولقى انس بهاء رايح نفس الدور فتظاهر انه غلط فى العنوان ورجع الاسانسير وطلع الدور اللى فوق ، بهاء ضرب الجرس وفتحت رضوى .)
رضوى : بهاء ؟ تعالى يا حبيبى ادخل
بهاء : اذيك يا رضوى وحشتيني
رضوى : وعشان كده بتسأل كل يوم
بهاء : انتِ عندك حد ؟
رضوى : دى واحده صاحبتى بس جوزها هيجي ياخدها دلوقتى
(. نورهان كانت جوه وخرجت عشان تشوف انس .)
نورهان : انس جه يا رضوى
(. هنا بهاء عيونه برقت وبوؤه اتفتح واتثبت تماماً لما سمع اسم انس .)
رضوى : لا ده بهاء اخويا
نورهان : اه اسفه اهلاً وسهلاً
بهاء : اهلاً بحضرتك
نورهان : انا بعتذر جداً ، بقولك يا رضوى انا هنزل بقى الظاهر انه مش جاى
رضوى : لا قال انه جاى
بهاء : هو انس ده يبقى جوزها ؟
رضوى : اه
نورهان : بصى انا همشى ولو جه قوليله انى بقيت كويسة ومشيت
(. ومشيت نورهان من عند رضوى .)
بهاء : جوزها من زمان
رضوى : لا شهور
بهاء : هى عندها كام سنة
رضوى : قدى
بهاء : وليه متجوزتش كل ده
رضوى : لا لا دى كانت متجوزه واطلقت وهى وانس كانوا بيحبوا بعض من سنين واتجوزوا بقى
بهاء : بس جوزها ده مخلص قعد السنين دى كلها من غير جواز
رضوى : لا هو متجوز ومخلف واتجوز نور من ورا مراته
بهاء : تمام
__**__**__**__**___
فى الجهة التانيه ...
(. خرجت نورهان من عند رضوى وقابلت انس فى الاسانسير ونزلوا وركبوا العربية .)
انس : انتِ كويسة يا حبيبتى
نورهان : اه يا حبيبى متقلقش ده هبوط بسبب الحمل
انس : انا هنا من بدرى بس معرفتش ادخل
نورهان : ليه ؟
انس : جوز اخت شيرين طلعت اخته ساكنه فى نفس العمارة لا وكمان فى نفس الدور وشافنى
نورهان : اسمه بهاء
انس : انتِ عرفتى منين
نورهان : ده اخو رضوى صاحبتى
انس : ايه الصدفة الغريبة دى ، كويس انى مدخلتش الشقة
نورهان : بس حصل حاجة فوق
انس : حصل ايه
نورهان : عرف ان جوزى اسمه انس
انس : يادى النحس طيب نتكلم فى بيتنا عشان ممكن يكون شايفنا
(. وطلع بالعربية وبهاء كان بيبص عليهم من البلكونه وشاف كل حاجة .)
*_____________________________________________**___________________________*
فى احدى الكافيهات ....
(. ممدوح راح لـ بهيرة الجامعه وخدها ورواحوا كافيه .)
ممدوح : عايز اطلب منك طلب
بهيرة : طلب ايه خير
ممدوح : نتجوز
بهيرة : ماحنا هنتجوز
ممدوح : لا انا عايز نتجوز اخر الشهر ده
بهيرة : اشمعنى يعني
ممدوح : يا حبيبتى كل حاجة بقت جاهزة ايه لازمته الانتظار
بهيرة : عشان انا عندى امتحانات
ممدوح : صدقيني هتذاكرى وهتمتحنى وهتنجحى كمان
بهيرة : مش عارفة يا ممدوح ماما وبهاء ممكن يوافقوا ولا لا
ممدوح : قوليلي الاول انتِ موافقة ولا لا
بهيرة : عايزة اعرف ايه سبب الاستعجال ده وبعدين اقولك موافقة ولا لا
ممدوح (بيمسك ايدها) : مبقتش قادر ابعد عنك انا بحبك اوى
بهيرة (بتسحب ايدها) : معلش استحمل الشهرين دول
ممدوح : لا بقى انتِ بقيتي حواليا ٢٤ ساعة بقيتي بتوحشيني وانتِ جنبى
بهيرة : خلاص يا ممدوح كلم بهاء وماما واقنعهم
ممدوح : يعنى انتِ موافقة ؟
بهيرة : اه بس لو هما مش موافقين متطلبش منى ادخل
ممدوح : لا ان شاء الله هيوافقوا
*_____________________________________________**___________________________*
بعد كام يوم فى بيت شيرين .....
(. علياء راحت تزور شيرين .)
شيرين : والله وحشتيني يا لولو
علياء : انتِ اكتر يا شيري
شيرين : طمنيني عليكي يا حبيبتى اخبارك ايه
علياء : انا كويسة الحمد لله قوليلي صحيح فين انس
شيرين : انس مسافر مؤتمر طبى مانا قولتلك من قبل سفره بيومين
علياء : اااه مؤتمر طبى لا ربنا معاه
شيرين : خير يا بنتى فيكي حاجة شكلك متغير خالص
علياء : اه يا شيرين في حاجة مهمه ولازم تعرفيها
شيرين : خير قلقتيني
علياء : .........................
__*__*__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
كالعادة .. روعـــــــــــــــــــة
ردحذفانا عايزه صفحتك على فيس بوك مش لقياها
ردحذف