الحلقة الثالثة
فى شقة وداد .....
(. وداد راجعه من عند رواء دخلت لقيت حسام فى اوضة نومها .)
وداد : انت بتعمل ايه هنا ؟
حسام : كنت بدور على دى
وداد : ايه دى ؟
حسام : دى يا ماما مش فاهمه ايه دى ؟
وداد : مش فاهمه ايه الحاجات دى
حسام :شهادات ميلادنا وبطاقتك
وداد بارتباك : شهادات ميلاد مين ؟
حسام : شهادة ميلادى انا واخواتى
وداد(بتفك طرحتها) : ايوة يعنى انت عايز ايه دلوقتى ؟
حسام بعصبية : عايز افهم ، ازاى انتِ اسمك وداد مصطفى عبد الحميد واسم الام فى شهادات ميلادنا انا واخواتى إزابيلا جورج الترك
وداد : انا معرفش انت بتتكلم عن ايه ؟
حسام : لا عارفة كويس اوى انا بتكلم عن ايه متستعبطيش
وداد (تضربه بالقلم) : احترم نفسك ومتتكلمش معايا بالاسلوب ده
حسام : انتِ بتضربيني !! مش من حقك اللى انتِ عملتيه ده
وداد باستغراب : مش من حقى !!
حسام : ايوة لان الورق الرسمي بيقول ان انتِ مش امى
(. هنا جه جمال وحبيبة على صوتهم وخناقهم .)
جمال : في ايه ؟
حسام : فيه ان الست اللى عايشة معانا بقالها اكتر من عشرين سنة مش امنا
حبيبة : مش ايه !! مش امنا !!
جمال : ايه الهبل اللى انت بتقوله ده !! انت اتجننت ولا ايه ؟
حسام : لا متجننتش ، خدوا شوفوا شهادات ميلادنا كلنا وبطاقتها (واداهم لـ جمال)
جمال (بعد ما قراهم) : ايه ده !!
حبيبة : وريني (وخدتهم)
وداد : فى ايه ، انتوا بتتكلموا معايا كده ليه ؟
حسام : عشان عايزين نفهم !! عايزين نعرف انتِ مين وفين امنا الحقيقيه
جمال : ايوة احنا من حقنا نعرف ونفهم
وداد : انا معرفش اللى انتوا بتتكلموا عنه ده لما ابوكوا يجي ابقوا اسألوه
حبيبة بدموع : يعني ايه متعرفيش حاجة !! مش عارفة اذا كنا ولادك ولا لا
وداد بعصبية ودموع محبوسه : اطلعوا بره مش خدتوا اللى انتوا عايزينه
جمال : احنا عايزين نعرف انتِ مين !! انتِ امنا ولا لا
وداد (بتخرجهم من الاوضه) : قولت معرفش حاجة اطلعوا ولما ابوكوا يجي ابقوا اسألوه
(. خرجوا من الاوضة وقفلت وداد على نفسها وفضلت تعيط وخرج حسام وجمال وحبيبة-مش مبطله عياط- قعدوا فى الانتريه وساكتين من الصدمه .)
*_____________________________________________**___________________________*
فى شقة رواء ....
(. رواء بتكلم وسيم .)
رواء : مش عارفة بقى اطلع اشوف في ايه ولا اطنش
وسيم : انتِ سمعتيهم ازاى ؟
رواء : ماما وداد كانت عندى اصلاً وبعد ما مشيت حسيت انى مش قادرة انام فـ خرجت بلكونه اوضة نومنا ، اوضة ماما وداد فوق اوضتنا على طول سمعت بقى خناق وصوت عالى
وسيم : انا مش عارف اقولك ايه بصراحة يمكن بيتخانقوا على حاجة متخصناش
رواء : انا مش عايزة اعرف بيتخانقوا ليه ، انا عايزة اطمن عليهم
وسيم : بصى يا حبيبتي لما الامور تهدى شوية ابقي اطلعى اطمني عليهم
رواء : يعني مش دلوقتى ؟
وسيم : انتِ بتقولى ان كلهم كانوا بيتخانقوا وصوتهم عالى يعني دلوقتى كلهم مشحونين خليها للصبح
رواء : اللى قلقنى اكترا ن بابا عبد الله مفروض يوصل مصر كمان كام ساعه
وسيم : بصى يا قلبى انتِ قومى كده صلى لك ركعتين و نامي كده واستريحي شوية والصباح رباح ماشى
رواء بتذمر : ماشى خلاص
وسيم : حبيبتي صدقيني ده الصح ليكي وليهم وبكره تعرفى ان كان عندى حق
رواء : خلاص يا حبيبي والله ما هعمل حاجة
وسيم : ولا حتى تكلمي حبيبة فى الموبايل تستفسرى منها
رواء : حاضر
وسيم : يالا بقى انا هقوم انام ، تصبحى على خير
رواء : وانت بخير يا حبيبي (وقفلوا)
رواء لنفسها >> استر يارب
*_____________________________________________**___________________________*
فى شقة وداد فى الانـتـريـه ...
بعد فترة طويلة من الصمت ...
جمال : يعني احنا لينا ام تانيه ؟
حبيبة بدموع : يعني دى مش ماما
حسام : انا مش فاهم انتِ بتعيطي ليه ؟
حبيبة : وانت ازاى بتتعامل بسهولة كده
حسام : مش فكرة تعامل بسهولة بس احنا المفروض نعمل ايه
جمال : على فكرة احنا لسه منعرفش الحقيقة
حسام : يا سلام كل ده ومش فاهم
حبيبة : يعني انت فاهم ؟
حسام : ملهاش الا تفسير واحد
جمال : اللى هو ايه ؟
حسام : ان ابوك كان متجوز إزابيلا دى و وداد دى ضحكت على ابوك وخدتنا منها
جمال : ايه الهبل اللى بتقوله ده ، على اساس ان ابوك عيل مش عارف يعمل ايه ؟
حبيبة : ما ممكن تكون ماما وداد لها اسمين ، او احنا مش ولادهم وهما تبنونا
حسام : انتِ عبيطه ولا شكلك كده تبنونا وكتبونا بـ اسم عبد الله ونسيوا يكتبونا بـ اسم وداد
جمال : بقولكوا ايه فككوا من الحوار ده دلوقتى طيارة ابوك زمانها على وصول وهو بقي يحل لنا اللغز ده
حسام : طيب يالا نقوم نلبس عشان ننزل
(. قاموا هما يلبسوا ونزلوا ، راحت حبيبة تخبط على اوضة وداد .)
حبيبة لـ وداد >> ماما انتِ كويسة !! يا ماما ردى عليا !! اطلعي فهميني في ايه !! احنا مين ونبقالك ايه
(. يأست حبيبة من التخبيط وعدم الرد وراحت اوضتها لقيت الياس متصل عليها كتير ولقيت مسج منه .)
حبيبة بتقرأ المسج >> مش عارف اقولك ايه انا متلخبط ومش عارف بعمل ايه ، بس كل اللى اعرفه انك مش مجرد صديقة وفى نفس الوقت متخوف من فكرة اننا عارفين بعض من النت ، اكيد انتِ فهمانى
(. المسج اتستفذت حبيبة فـ اتصلت بيه .)
حبيبة : انت قصدك انك خايف اكون مقضياها مع كل واحد بكلمه على النت
الياس : اهدى بس يا حبيبة انا مقصدش كده
حبيبة : بص يا الياس انا جايز عرفتك من النت بس مش معنى كده انى بعامل كل اللى عرفتهم من النت بنفس الاسلوب
الياس : قصدك ايه ؟
حبيبة : قصدى انك اول واحد اكلمه voice وانا اصلاً متكلمتش مع شباب معرفهمش كتير وبقالى سنة وشوية مبتكلمش الا مع تلاته لانهم قريبين ليل وزى اخواتى انت واحد منهم
الياس : يعني انا زى اخوكى
حبيبة : تصبح على خير يا الياس
الياس : جاوبيني على السؤال يا حبيبة لو سمحتى
حبيبة : باى يا الياس (وقفلت السكة وبعدين قفلت الموبايل)
*_____________________________________________**___________________________*
فـى الـمطـار ...
(. حسام وجمال قاعدين مستنين فى صالة الوصول وكل واحد فيهم شايل الهم ومبيتكلموش ، وصل عبد الله وحس انهم مش طبيعين خصوصاً انهم بيسلموا عليه ببرود ولاحظ ان فى هم كبير شايلينه وطبعاً القلق تملكه على وداد وحبيبة ورواء ، خرجوا من المطار وركبوا العربية وجمال وحسام برضه ساكتين .)
__**__
فـى الـعـربـيـة ...
(. حسام سايق العربية ، وابوه قاعد جنبه ، وجمال قاعد ورا ، حسام باين انه مركز اوى فى السواقه لكنه شارد جداً وعامل مركز عشان ميتكلمش ، جمال مرجع دماغه لورا وبيبص على الطريق .)
عبد الله : امكم واخواتكم البنات كويسين ؟
حسام : اه يا بابا بخير الحمد لله
عبد الله : متأكدين
حسام : ايوة يا بابا كويسين والله
عبد الله : امال مالكم !! كأن ميت لكم عزيز كده وكأنكم مش مرحبين بـيا
جمال : لا طبعاً يا بابا بالعكس احنا كنا مستنين رجوع حضرتك بفارغ الصبر
حسام : بابا هو انا هسافر مع حضرتك ؟
عبد الله : ربنا يسهل ان شاء الله
حسام : يعني هسافر ولا مش هسافر
عبد الله : هتسافر اكيد هو فى حد لاقى شغل هنا ، بس هتسافر بعدى مش معايا
جمال : وحضرتك راجع امتى
عبد الله : مش عارف لسه
(. خيم الصمت عليهم مرة تانيه وعبد الله قلقه زاد على وداد وبناته .)
*_____________________________________________**___________________________*
فى بيت مـارى ....
(. مارى قاعدة بتذاكر ، ابوها صحى من نومه قلقان دخل يطمن عليها .)
هانى (ابو مارى) : انتِ لسه صاحية يا مارى
مارى : مجانيش نوم قعدت اتفرجت على التى ڤى شوية وبعدين قومت اذاكر شوية
هانى : ربنا معاكى يا حبيبتي
مارى : بابا كنت عايزة اسأل حضرتك على حاجة ؟
هانى : اتفضلى يا بابا
مارى : ليا واحدة صاحبتى بتاخد البرشام ده (وطلعت الشريط اللى خدته من حبيبة)
هانى : مروڤين ، بتاخده ليه ؟
مارى : كـ مسكن ، بيجيلها الم واتعودت عليه
هانى : يعني دكتور هو اللى كتبه لها ولا من نفسها
مارى : تقريبًا من نفسها
هانى : هى عندها ايه ؟
مارى : هى يا بابا عندها توهم للمرض يعني على حسب كلامها لو مثلاً عضت لسانها بالغلط ممكن تقعد تتألم يومين
هانى : يعني هى بتاخد المسكن ده بدون سبب اصلاً !!
مارى : بس هى بتقول انه بيجيلها الم ولازم تاخد المسكن عشان تستريح
هانى : لا يا حبيبتي صاحبتك مش بيجيلها الم ، صاحبتك بقت مدمنه والالم ده بيجي نتيجه لـ تأثير خروج المسكن من جسمها
مارى : بس ده مسكن عادى يعني يا بابا
هانى : ايوة مسكن بس مش باندول يعني ده مروڤين عارفة المروڤين بيستخلص من ايه ؟
مارى : لا
هانى : من الافيون يا دكتورة ، فاهمه يعني ايه الافيون والدكاترة مش بيكتبوه الا فى حالات الالم المستعصية زى الحروق والعمليات الجراحية وحالات السرطان المتأخرة كمان
مارى : دى كانت بتقولى اسأل حضرتك على حاجة اقوى منه
هانى : هرويين بقى ، قولى لصاحبتك تعقل وتستهدى بالله لانها لو فضلت كده هتدمنه فعلاً وهتدخل مصحه للعلاج
مارى : ربنا يستر
هانى : يالا قومى نامي شوية بقي عشان عندك جامعه
مارى : اوكى يا بابا تصبح على خير
*_____________________________________________**___________________________*
فى بيت عبد الله و وداد .....
(. وصل عبد الله البيت وملقاش استعدادات وصوله اللى تعود يجي يلاقيها ، زى انه يلاقى حبيبة و وداد و رواء فى انتظاره ويكون فى غدا او عشا والبيت متروق عن كده .)
عبد الله : فين امكم ؟ فين حبيبة و رواء
جمال : حبيبة فى اوضتها و رواء فى شقتها
عبد الله : وامكم ؟
حسام باستهزاء : امنا !!!
(. هنا خرجت وداد من الاوضة .)
وداد : انا هنا يا ابو حسام ، حمد الله على السلامه
عبد الله : الله يسلمك يا حبيبتي (وباس دماغها)
وداد : ثوانى ويكون العشا جاهز ، معلش راحت عليا نومه
عبد الله : لا ولا يهمك انا اكلت فى الطيارة
وداد : وهو ده اكل برضه انا هدخل اجهز العشا
جمال : وانا هشوف حبيبة فين ؟
(. ودخل جمال لقى حبيبة نايمه على كنبه فى اوضتها صحاها وعرفها ان ابوها وصل ، حبيبة من الفرحة نطت من الاوضة لـ حضن ابوها على طول ، قعدوا سوا كلهم واتعشوا بس وداد متعشتش معاهم ، بعد العشا كلهم دخلوا ناموا .)
__**__**__**__
فى اوضة عبد الله و وداد ...
عبد الله : فى ايه يا وداد البيت والعيال مالهم مش طبيعين ليه كده ؟
وداد : حسام دخل فتش فى الاوضة هنا وفجأة لقيتوا بيديني بطاقتى وشهادات ميلادهم وبعد مطابقتهم مع بعض بدأت الاسئلة والشكوك تملي دماغهم
عبد الله : يعني حسام كان داخل وقاصد يفتش ؟
وداد : شكله كده
عبد الله : وحصل ايه ؟
وداد بدموع : قعدوا يزعقوا فيا ويتخانقوا معايا كأنى واحدة من الشارع مش امهم
عبد الله : ولاد الكلب ، طيب اهدى متعيطيش ، وانا هحل الموقف ده
وداد بعصبية : انت السبب فى كل ده ، انت اللى حطتني وحطيت نفسك والولاد فى الموقف ده
عبد الله : يعني كنتى عيزانى اعمل ايه ؟
وداد : تقولهم الحقيقة ، تعرفهم كل حاجة من اول يوم
عبد الله : انا كان عندى وجهة نظر انتِ عارفاها كويس اوى
وداد : وليه مطبقتش وجهة النظر دى على رواء
عبد الله : عشان هى ليها اب وام وليها ورث من الاتنين ، عشان كنت ناوى اجوزها حد من ولادى يعني كانت لازم تبقى فاهمه انهم مش اخواتها
وداد : بس وجهة نظرك دى كانت غلط الولاد اول ما اتقلبوا ، اتقلبوا عليا وفى اول ما شكوا ، شكوا فيا انا ، حتى رواء مقدرتش تتعامل مع الولاد الا اخواتها وحبت واحد تانى واتجوزتوا
عبد الله : وانا مش زعلان ، ومش رواء المشكلة اصلاً
وداد : يعني انت معترف ان فى مشكلة
عبد الله : بس هحلها
وداد بحرقة ودموع : الله يسامحك يا عبد الله ، ضيعت ولادى منى
عبد الله : صدقيني كل حاجة هتتحل وهترجع زى ما كانت واحسن
وداد : عارف انت هتعمل ايه ؟
عبد الله : هعمل ايه ؟
وداد : هتلم الازاز اللى تكسر كله وتلزقه فى بعضه بس بعد ما تلزقه كل ما حد فينا يجي يلمسه هيجرحه
عبد الله : حقك عليا يا وداد ، بس انتِ عارفة ان نيتي كانت خير سواء ليكي او لـ الولاد
(. قضت وداد الليلة كلها قلقانه وزعلانه وعبد الله من تعب وارهاق السفر راح فى النوم .)
*_____________________________________________**___________________________*
بعد مرور اسبوع .....
- عبد الله مواجهش ولاده بـ حاجة وهما كذلك متكلموش فى حاجة ، لكن مبيتكلموش مع وداد ولا وداد بتكلمهم ، حبيبة بس اللى بتكلمها
- حبيبة مبتردش على الياس سواء على الموبايل او النت
- الياس متعلق بـ حبيبة جداً ونفسه يرتبط بيها
*_____________________________________________**___________________________*
فى احدى الكافيهات ...
(. حبيبة ومارى خلصوا كورس مع بعض وراحوا يشربوا حاجة .)
مارى : يا حبيبة انتِ لازم تبطلي المُسكن ده
حبيبة : صدقيني يا مارى مش قادرة بيجيلي الم بيقتل فيا
مارى : ماهو ده نتيجة تعودك عليه
حبيبة : لا بقيت باخده وبرضه بحس بـ الم
مارى : يا بيبة صدقيني ده وهم ، وهم يا حبيبتي
حبيبة : طيب قوليلي اعمل ايه
مارى : روحى لـ دكتور نفسي يا حبيبة
حبيبة باستغراب : دكتور نفسى !!
مارى : ايوة ، روحى اتعالجى من الوسواس القهرى اللى عندك ده
حبيبة : لا لا طبعاً مش للدرجة دى
مارى : يا بنتى فكرى فيها ، لازم تروحى
حبيبة : طيب لحد ما افكر واروح ، عشان خاطرى اسألى باباكى عن اى مسكن تانى
مارى : صدقيني سألته كتير وقالى مينفعش لانك فى مرحلة ادمان
حبيبة : ادمان !!
مارى : يا حبيبة المروڤين اللى بتاخديه ده بيتعمل من الافيون
حبيبة : بصى انا عارفة ، انا قريت عنه كتير بس صدقيني لما يعدى ٨ ساعات من اخر برشامه بفقد اعصابى وسيطرتي على نفسى من شدة الالم
مارى : طيب انتِ متأكده انك معندكيش حاجة عضويه ؟
حبيبة : ايوة متأكده ، اخر مرة عملت check up كامل ، حتى رسم القلب والمخ عملته ومعنديش اى حاجة
مارى : الدكتور قالكم ايه يعني ؟
حبيبة : قال لـ بابا بنتك بـ تتدلع
مارى : ربنا يستر يا بيبة ، انا فعلاً خايفة عليكي
حبيبة : قل لن يصيبنا الا ما كتب الله لنا
مارى : اه صحيح انتِ بتاخديه من نفسك ولا دكتور كتبهولك
حبيبة : لا من نفسي
مارى : وازاى بتجيبه ، ده ممنوع يتصرف الا بـ روشته طبية
حبيبة : عمى دكتور بروحله العيادة واخد كام روشته من بتوعه واكتب فيها اسم الدوا
مارى : يااااه يا حبيبة للدرجة دى
حبيبة : انا خايفة اوى يا مارى لاكون مدمنه بجد
مارى : اسمعى كلامى وخلينا نروح لـ دكتور نفسي
حبيبة : هفكر فيها وارد عليكي
مارى : ماشى
(. قعدوا شوية وبعدين قاموا راحوا كورس تانى .)
*_____________________________________________**___________________________*
فى اوضة حسام ...
(. حسام وجمال قاعدين بـ يلعبوا بلايستيشن .)
حسام : تفتكر ابوك متكلمش معانا لحد دلوقتى ليه
جمال : مش يمكن تكون مقالتش لـ ابوك
حسام : ويمكن يكونوا مش عايزين يعرفونا الحقيقة
جمال (بيدوس pause) : تفتكر يعنى ممكن تكون ايه هى الحقيقة دى
حسام : مش قادر اتخيل حاجة
جمال : بص يا حس ، احنا منتكلمش مع ابوك فى حاجة هو هيجيله وقت ويتكلم
حسام : يا عم انت شوفتنى اتكلمت
جمال : المفروض برضه نتكلم مع ماما ونتعامل معاها عادى
حسام : انت مصدق انها ماما
جمال : حتى لو لينا ام تانيه يا حسام ، الست دى برضه تعبت معانا وربتنا
حسام : حتى لو برضه انها تعبت معانا والكلام الحمضان ده ، انت كده ليك ام تانيه ليها حقوق عليك ، ليك اخوال تانين وقرايب تانين ، مش بعيد كمان يكونلك اخوات من امك او ورث
جمال : متبصش للامور بـ العمق الشديد ده
حسام : امال المفروض ابص ازاى فى ام الفيلم الهندى اللى احنا فيه ده (اخرس ياحيوان متقولش على قصتى فيلم هندى :D )
جمال : على فكرة ممكن الموضوع يبقي ابسط من كده ، ممكن وداد تكون هى هى ازابيلا
حسام : ازاى يعني ؟
جمال : انت خدت بالك ان اسم الام فى شهادات الميلاد ازابيلا جورج الترك والديانة مسيحية والاسم اللى فى البطاقة وداد مصطفى عبد الحميد والديانه مسلمه
حسام : انت قصدك ايه ؟
جمال : قصدى ان ازابيلا امك اسلمت وغيرت اسمها لـ وداد
حسام : وغيرت كمان الجنسية من لبنانية لـ مصرية
جمال : انا بقول ممكن وكل شئ جايز
حسام : بص هو كلام منطقى بس لسه فى لغز محدش هيحله الا ابوك او هى
جمال : ان شاء الله خير
*_____________________________________________**___________________________*
فى جامعة الياس ...
سعيد : انت عايز تقنعنى انك حبيتها بجد
الياس : لا مش عايز اقنعك
سعيد : امال عايز ايه ؟
الياس : عايز اقنع نفسي انى محبتهاش
سعيد : هى برضه لسه مش عايزة ترد عليك
الياس : قالتلى انا مبكلمش الا تلاته على النت وبعتبرهم زى اخواتى انت واحد منهم
سعيد : كنت قولها انا امى متخلفش الاشكال دى
الياس : بطل استظراف يا سعيد
سعيد : طيب ما تجى نعمل حاجة بسيطه كده نختبرها بيها
الياس : حاجة ايه ؟
سعيد : تديني الـ bbm بتاعها وانا هضيفها
الياس : وبعدين
سعيد : هنشوف هتتجاوب ولا لا (حركات مصريين :D )
الياس : بس انا واثق فى كلامها
سعيد : مش هنخسر حاجة على فكرة
الياس : لا لا مش عايز احط نفسي ولا احطها فى الموقف ده
سعيد : يا ابني انا ستر وغطا عليك
(. بعد الحاح شديد الياس اداله الـ pin بتاع حبيبة وبالفعل ضافها لكنها رفضت الاضافه وعملتله بلوك .)
الياس : هاهاهاهاها اهى رزعتك بلوك
سعيد : المهم انك تكون مطمن
الياس : انا مكنتش شاكك ، الحاحك عليا استفذني
سعيد : طيب انت ناوى تعمل ايه
الياس : مش عارف سيبها بظروفها ، جايز اكون مبحبهاش اصلاً
سعيد : انا حاسس كده برضه
*_____________________________________________**___________________________*
فى الـتـاكسى ...
(. حبيبة فى التاكسى مروحة ، فتحت النت لقيت الياس بعتلها رسايل كتير على الـ bbm ، حبيبة غصب عنها حنتله وقررت ترد عليه بس بحزم وحرص .)
Elyas : حبيبة انتِ اونلاين ردى لو سمحتى
DrHabiba : نعم يا الياس ؟
Elyas : انتِ زعلانه منى ليه ؟
DrHabiba : بص يا الياس من الاخر كده انت مالكش الحق تحاسبني وتقولى بكلم من او مبكلمش مين
Elyas : انا قولت انى فكرت كده لانى معجب بيكي
DrHabiba : حتى لو معجب بيا انت المفروض انك عارفنى كويس احنا مش عشرة يومين
Elyas : بـحـبـك
Elyas : روحتى فين ؟
DrHabiba : مش عارفة اقولك ايه ؟
Elyas : قوليلي مشاعرك ناحيتي ايه
DrHabiba : انا فى التاكسى مروحه لما اوصل نبقي نتكلم
Elyas : لا دلوقتى
DrHabiba : دلوقتى ايه ؟
Elyas : اعرف شعورك ناحيتي ايه
DrHabiba : مش وقته
Elyas : يالااااا دلوقتى
DrHabiba : بصراحة يعني هو انا مش بحبك بس ده ميمنعش ان فى اعجاب او انجذاب ليك
Elyas : طيب دي بداية كويسة اكيد مش هتحبيني الا لما تعرفيني كويس
DrHabiba : ربنا يسهل بس انت ازاى تقولى بحبك وانت متعرفنيس كويس
Elyas : لا انا عارفك كويس
DrHabiba : يا سلام
Elyas : نوعاً ما يعني
DrHabiba : طيب انا وصلت هطلع بقي ونبقي نتكلم بعدين
Elyas : طيب خدى بالك على نفسك
DrHabiba : اوكى وانت كمان.. باى
Elyas : باى
*_____________________________________________**___________________________*
فى بيت عبد الله ....
(. عبد الله كان قاعد مستني كل ولاده لحد ما يرجعوا من بره ، رجعوا واتغدوا واستريحوا وبعدين قالهم انه عايزهم ، ودخل عبد الله وجمال وحسام وحبيبة اوضة وقفلوا على نفسهم .)
عبد الله : فين يا حسام شهادات الميلاد اللى انت لقيتها
حسام : موجوده
عبد الله : قوم هاتها
حسام : حاضر
(. قام حسام جابها ورجع .)
عبد الله : طبعاً انتوا عرفتوا ان اسم الام فى شهادات ميلادكم مختلف عن اسم الست اللى عايشة معاكم
كلهم : اه عرفنا
عبد الله : وداد حكتلى كل حاجة حصلت بينكم ، حكتلى عن زعيقكم وتبجيكم وقلة ادبكم معاها
حسام بعصبية : عايزنا نعمل ايه لما نعرف حاجة زى كده
عبد الله : وهو ايه اللى انت عرفتوا !! ها قولى عرفت ايه ، دى مجرد اسماء لكن انت متعرفش اصل الحكاية ايه
جمال : ماهى يا بابا مرضيتش تقول
عبد الله : مش مجبرة تقولكم حاجة زى كده ، خصوصاً ان انتوا قليتوا ادبكم معاها
حبيبة : يعني هي يا بابا امنا ولا لا
عبد الله : تفرق معاكم !!
حسام : حضرتك شايف ان حاجة زى كده المفروض متفرقش معانا
عبد الله : مش قصدى بس انتوا عمركم حسيتوا انها مش امكم
جمال : بس ده معناه ان احنا لينا ام تانيه من حقنا على الاقل نبقي عارفين هى فين او هى مين
حسام : ومن حقنا برضه نعرف ليه فهمتنا السنين دى كلها ان الست دى تبقى امنا
عبد الله : يعني انتوا عايزين تعرفوا الحقيقة
كلهم : ايوة عايزين نعرف
عبد الله : خلاص هقولكم الحقيقة ، بس خليكوا فاكرين ان انتوا اللى طلبتوا تعرفوها
حبيبة : هى الحقيقة سيئة للدرجة دى
عبد الله : الحقيقة فى كل صورها بتوجع
حسام بتحدى : برضه عايزين نعرف
عبد الله : .........................................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
رائعه
ردحذف