الحلقة الخامسة
عبد الوهاب : ها ايه الاخبار
الدكتور : انا بصيت فيهم
عبد الوهاب(وهو بيبص في النتايج) : وايه النظام
الدكتور : كل حاجة تمام يا دكتور
عبد الوهاب : امال ليه هى بتحس بالتعب ده انا مش فاهم
الدكتور : مش عارف
عبد الوهاب : خلاص خلاص روح انت
الدكتور : عن اذن حضرتك
(. فضل عبد الوهاب يراجع النتايج على امل انه يلاقى حاجة ولما لقاها كلها سليمه اتصل بـ حبيبة وطلب منها تجيله .)
بعد ما جت ...
حبيبة بقلق : خير يا عمو ، انا عندى ايه ؟
عبد الوهاب : لا يا حبيبتي متقلقيش انتِ معندكيش اى حاجة التحاليل كلها سليمة
حبيبة : امال ليه قولتى اجى دلوقتى ضرورى
عبد الوهاب : النتايج اهيه يا حبيبة خدى بصى فيها عشان تتأكدى
حبيبة (بتبص فيها) : امال في ايه يا عمو
عبد الوهاب : انا عايز اعرف انتِ بتشتكى من ايه ؟ ازاى يبقي معندكيش حاجة فى التحاليل وبتاخدى كمية المروڤين دى
حبيبة : هى فعلاً التحاليل كويسة مفهاش حاجة
عبد الوهاب : يبقي قوليلي بقي بتشتكى من ايه ، ايه الالم اللى بيجيلك ده
حبيبة : هو غالباً بيكون الم فى ضهرى كأن حد بيخبطنى بسكينة ومغص حاد كده بيجيلي
عبد الوهاب : عضمك بيوجعك ؟
حبيبة : ساعات ركبى بتوجعنى
عبد الوهاب : المفاصل يعنى ؟
حبيبة : ساعات
عبد الوهاب : عمرك جالك نزيف ؟
حبيبة : نزيف نزيف لا ، لكن ممكن نقط دم
عبد الوهاب : نقط بس مش نزيف ، يعني ولا مرة جالك نزيف
حبيبة : لا ولا مرة هو فى خطورة من النقط دى
عبد الوهاب : لا يا حبيبتى للخطورة من النزيف مش من النقط خالص
حبيبة : طيب الحمد لله
(. فضل عبد الوهاب يسأل حبيبة اسئلة كتير جداً .)
عبد الوهاب : طيب احنا هنكشف عليكي تانى
حبيبة : تانى يا عمو
عبد الوهاب : معلش يا بيبة ده لمصلحتك
حبيبة : اوك ماشى يا عمو
(. كشفت حبيبة ومشيت على ان لما النتيجة تظهر عمها يبلغها بيها .)
*_____________________________________________**___________________________*
فى بيت رواء ....
رواء : حبيبي كنت عايزة اطلب منك طلب
وسيم : خير يا روءة
رواء : عيزاك تروح تصالح اهلك
وسيم : اهلى !! انتِ اللي فكرك بالموضوع ده دلوقتي
رواء : يا حبيبي المفروض انهم جايلهم حفيد فى السكة ومن حقهم يعرفوا
وسيم : انا مش عايز يا رواء
رواء : طيب انا نفسي افهم انت ليه مقاطعهم اصلاً
وسيم : يووووه يا رواء احنا مش كنا قفلنا الموضوع ده بتفتحيه تانى ليه
رواء : احنا كنا اجلناه مش قفلناه
وسيم : ممكن تقفلى الحوار ده
رواء : انت مش حاسس بقيمة النعمه اللى فى ايديك
وسيم : نعمة ايه ؟
رواء : نعمة ان يكونلك اب وام وعيلة
وسيم : رواء مش كل الابهات والامهات زى باباكى ومامتك الله يرحمهم
رواء : بابا وماما ماتوا وانا عندى سنة يعنى انا اصلاً مش فكراهم ومعرفش اب وام الا بابا عبد الله وماما وداد بس برضه كل يوم بتمنى اشوف بابا وماما وانى اعيش معاهم ولو يوم واحد
وسيم : بصى يا رواء ، ابويا وامى ربطوا جوازى منك بغضبهم عليا ولما ملقيوش فايدة من التهديد ده مرضيوش يساعدونى بـ مليم واحد فى الجوازة ويوم فرحنا جم الفرح ساعه واحدة زى الغُرب وبعدها معبرونيش
رواء : برضه هما ليهم حق عليك انك تروح تزورهم
وسيم : بعد كل اللى قولتهولك ؟!
رواء : حتى لو كنت قولتلي انهم حرقوك بالنار مهما كان دول ابوك وامك
وسيم : خلاص يا رواء هفكر فيها وربك يسهلها
رواء بحنيه : ان شاء الله هتروح يا حبيبي تزورهم وتصالحهم
وسيم : ربنا يسهل
رواء : ربنا يخليك ليا يا حبيبي
*_____________________________________________**___________________________*
فى جامعة الياس ....
(. سعيد والياس متكلموش من اخر مرة شدوا فيها مع بعض ، الياس كان فى الجامعه ودور على سعيد ولقاه .)
الياس : حقك عليا يا معلم
سعيد : انا مش زعلان منك انا زعلان عليك
الياس : لا خلاص لا تزعل منى ولا عليا ، حقك عليا فعلاً انا اسف
سعيد : متتأسفش يا الياس احنا طول عمرنا اصحاب
الياس : انا بس مش عارف مالى
سعيد : ان شاء الله هتبقي كويس
الياس : هو انا حبيتها بجد يا سعيد ؟
سعيد : انت طلبت منى مافتحش معاك الموضوع ده ولا اجيب سيرتها
الياس : انا كنت ساعتها مخنوق
سعيد : بص يا لالوس انا هجبلك من الاخر وكلامى عموماً مش عليها هى بالتحديد
الياس : اتكلم
سعيد : لو حبيت بجد ، اولاً لازم تبقي هى كمان بتحبك بلاش تحب من طرف واحد وبلاش تبقي مشتت كده
الياس : وثانياً ؟
سعيد : ثانياً بقي لازم تفكك من الهلس اللى بنعمله ده وميكونش فى حياتك غيرها ومتعرفش بنات ولا حتى على سبيل الصداقه لان دى خيانه وياريت كمان اول ما تتخرج تاخد خطوة رسمي عشان ربنا يباركلكوا
الياس : كلامك كله صح وعندك حق فيه وانا والله عارف كل ده بس حاسس ان علاقتى بـ حبيبة هيكون فيها عقبات كتير
سعيد : زى ايه ؟
الياس : زى ان كل واحد فينا من محافظه ، زى انها لسه ١٨ سنة وفى كليه طب
سعيد : طب !! دى مشوارها طويل اوى يا معلم
الياس : مانا مش عارف بصراحه اظبطها ازاى ، يعني هخطبها امتى وهتجوز امتى
سعيد : على فكرة بقي دى ميزة جداً
الياس : مش فاهم ؟
سعيد : هى فى سنة كام ؟
الياس : فى تانيه
سعيد : تمام يعني قول هتتجوز وهى فى ٦ او الامتياز يعني كمان اربع او خمس سنين تكون انت بقي رستئت نفسك وكونت مستقبلك واشتغلت واستقريت وعرفت راسك من رجلك
الياس : طيب وهنفضل مرتبطين الفترة دى كلها
سعيد : لا ممكن تخطبها اول مانت تتخرج
الياس : مخك ده ذرى والله يا ابنى
سعيد : بس اهم حاجة قبل كل ده لازم تتقابلوا وتشوفوا بعض ميكونش مجرد تعارف على النت
الياس : تمام
سعيد : ربنا يسعدك يا لالوس وعقباللى يارب
*_____________________________________________**___________________________*
بالليل فى اوضة حبيبة ....
(. حبيبة و الياس بيتكلموا فى الموبايل ، حبيبة حكت لـ الياس حوار تعبها والتحاليل والمسكن اللى بتاخده .)
الياس : انا مش فاهم انتِ ازاى فى كلية طب
حبيبة : يعني ايه ؟
الياس : يعني انتِ اكتر واحدة عارفة اضرار كتر المسكنات عموماً واكيد برضه عارفة المروڤين بيتكون من ايه وعارفه اضراره
حبيبة : على فكره انا لسه مدرستش الادوية تقريباً هدرس الفارماكولجى فى رابعه
الياس : يا سلام !! يا بنتى انا اللى دراستى كلها رياضة عارف المروڤين واضراره
حبيبة : انا مش فاهمه انتوا ازاى كل اللى بيهمكوا وبيشغل بالكوا المروڤين واضراره ومحدش فكر خالص فى الالم اللى بحس بيه
الياس : انتِ بنفسك قولتى انك بتدلعى
حبيبة : صدقنى يا الياس بيجيلى الم رهيب وصعب جداً مبقدرش اقاومه
الياس : الف سلامه عليكي يا بيبة
حبيبة : الله يسلمك
الياس : وعمك قالك ايه ؟
حبيبة : التحاليل اللى عملناها طلع مفهاش حاجة خالص
الياس : انتِ مش قولتى انه عملك تحاليل تانيه
حبيبة : اهاا مانا كلمته من شوية وقالى انه عايزنى اروحله تانى وهيعملى تحاليل تانى عشان يتأكد
الياس : ان شاء الله خير
حبيبة : عارف انا مش قلقانه ، اصل كل ده هيطلع على مفيش
الياس : انا كمان حاسس كده ، شكلك بس اتعودتى على المسكن
حبيبة : بالظبط كده
الياس : المهم بقي في حوار عايز اقولك عليه ضرورى
حبيبة : خير
الياس : انا عايز اشوفك ؟
حبيبة : تشوفنى !! ازاى
الياس : هجيلك القاهرة
حبيبة : انت بتتكلم جد ؟
الياس : ايوة بتكلم جد ، هجيلك على يوم الخميس مناسب ليكي ولا لا ؟
حبيبة : هتجى من الزقازيق ولا المنصورة ؟
الياس : لا من الزقازيق
حبيبة : هيبقي بالنهار ولا بالليل ؟
الياس : على الساعه اربعه او خمسه بالكتير
حبيبة : خلاص تمام
الياس : موافقه يعني ؟
حبيبة : اه موافقة
الياس : هنتقابل فين ؟
حبيبة : امممم مش عارفة
الياس : تعرفى تجى مدينة نصر
حبيبة : اشمعنى مدينة نصر ؟
الياس : عشان عارفها كويس
حبيبة : خلاص ماشى ، نتقابل عند السراج موول عارفه ؟
الياس : اه طبعاً عارفه
حبيبة : خلاص نتقابل هناك ونشوف بقي نروح نقعد فين وكده ماشى
الياس : ماشى جداً
حبيبة : هقوم بقي اذاكر شوية مش عايز حاجة
الياس : خليكي معايا شوية هى المذاكرة هتطير
حبيبة : لا انا عندى مذاكرة كتير وقوم انت كمان ذاكر
الياس : انا بحبك اوى يا حبيبة
حبيبة : مش عايز حاجة
الياس : هههه لا سلامتك (وقفلوا عشان اتخنقت منهم :D)
*_____________________________________________**___________________________*
فى بيت رواء ...
(. حبيبة خلصت مكالمه من الياس واستأذنت مامتها وراحت لـ رواء .)
حبيبة : عيزاكى فى حاجة مهمه
رواء : خير حاجة ايه ؟
حبيبة : الياس هيجي يقابلنى هنا يوم الخميس الجاى
رواء : ده اللى كنتى حكتيلى عنه
حبيبة : ايوة ، هو قالى انه بيحبنى بس انا قولتله انى محتاجة وقت افكر
رواء : يا حيوانه كل ده من غير ما تقوليلي
حبيبة : مانا اتلخمت والله فى كذا فى حاجة
رواء : الخميس ده كمان يومين ده مستعجل اوى
حبيبة : الحب بقي
رواء : يعني انتوا دلوقتى مرتبطين ؟
حبيبة : تقريباً ، احنا بنتكلم كل يوم وهو قالى مش عايز منى رد الا لما نتقابل
رواء : طيب انتِ بتحبيه اصلاً ؟
حبيبة : انا حاسة انى بحبه اوى اوى
رواء : انتِ واثقه فيه ؟
حبيبة : قصدك ايه ؟
رواء : ممكن يكون بيتسلي بيكي
حبيبة : انا مش هاخد قرار الارتباط بيه قبل ما اقابله واشوف ايه النظام لو حسيت انى مرتاحه كان بها محستش مش هرتبط بيه
رواء : وافرض كنتي مرتاحه بس هو كان بيشتغلك
حبيبة : انتِ هتقلقيني ليه يا رواء
رواء : انا خايفة عليكي
حبيبة : طيب خلينا نأجل الحوار ده لما اقابله
رواء : ماشى
حبيبة : كنت عيزاكى تجى معايا فوق
رواء : ليه
حبيبة : تختارى معايا حاجة البسها يوم الخميس
رواء : انتِ قمر فى اى حاجة
حبيبة : تسلميلي يا روءة
رواء : لما وسيم ينام هطلعلك ماشى
حبيبة : ماشي مستنياكى
(. ومشيت من عندها ودخلت رواء لـ وسيم .)
*_____________________________________________**___________________________*
تانى يوم فى اوضه حسام ...
(. حسام وجمال قاعدين مع بعض .)
حسام : يعني انتوا لسه مصمم على رايك
جمال : ما تفكك بقي يا حسام امك ايه دى اللى انت عايز تدور عليها
حسام : يعني هى متستاهلش
جمال : تستاهل !! طيب قولى على ايه !!
حسام : على انها خلفتك
جمال : لا يا راجل !! عدت المانش هى كده ، ما كل الامهات بيخلفوا لكن مش كل الامهات بيربوا ويتعبوا ويطلع عينهم عشان يكبروا ويعلموا زى ماما وداد كده
حسام : انت مصدق ان فى امومه من غير خلفه ؟
جمال : ايوة مصدق ، زى ما فى انجاب بلا امومه في امومه بلا انجاب
حسام : يا سلام !!
جمال بعصبية : ايوة طبعاً ازابيلا اللى انت محروق عليها اوى دى معندهاش ذرة امومه ولا حتى بالفطرة لكن وداد عرفت ازاى تبقي ام مثالية من غير ما تشيل طفل واحد فى بطنها
حسام : يعني مش هتدور معايا
جمال : يا ابنى فوق بقي !! عيب ابقي اصغر منك واقولك الكلام ده
حسام : كلام ايه ؟
جمال : افرض لقيت ازابيلا دى وظهرت فى حياتنا كـ ام فعلاً هتقول ايه لما تجى تتجوز روان !! هتقولها مين دى ولا انا هقول ايه لـ اصحابى ولا لما اجى اتجوز ولا لما حبيبة اختك يتقدم لها عريس نقوله دى امنا اللى سابتنا فتافيت عشان راجل تانى !! رد عليا يا حسام هنقول ايه ؟!
(. سكت حسام لان كلام جمال صدمه .)
جمال : ابقي فكر واعقلها ورد عليا وزى ما قولتلك قبل كده لو مهتم تعرف مكانها اوى اسأل ابوك عن مكانها
(. خرج جمال وفضل حسام فى اوضته خبطت عليه وداد وفتحت .)
وداد : ممكن ادخل ؟
حسام : اتفضلي يا ماما
وداد (قعدت جنبه) : انا عايزة اتكلم معاك فى موضوع
حسام : اتفضلى يا ماما موضوع ايه ؟
وداد : انا سمعت انت واخواتك بتتكلموا سوا بخصوص موضوع مامتك
حسام : انا مش عايز حضرتك تفهميني غلط انا بس عايز ........
وداد تقاطعه : لا يا حبيبي انا مش فهماك غلط ولا حاجة وعمرى ما ازعل انك مهتم تدور على مامتك دى حاجة تزيد حبى ليك
حسام : بجد يا ماما
وداد : يا ابنى يا حبيبي انا جيت اقولك انى هساعدك
حسام : ازاى ؟
وداد : دلوقتى اخواتك قالولك اسأل باباك صح ؟
حسام : صح
وداد : انا هسألك بابا وهاخد منه الجواب الصح وابلغك بيه
حسام : بجد يا ماما !!
وداد : بجد يا حبيب ماما
حسام : كنت عايز حضرتك فى حاجة تانيه
وداد : اوؤمرنى
حسام : فاكرة روان اللى كنت حكيتلك عنها
وداد : طبعاً فكراها
حسام : انا عايز اخطبها قبل ما اسافر
وداد : انا معتديش مانع ، هتكلم مع ابوك واقنعه
حسام بفرح : ربنا يخليكي ليا يارب يا ماما يا احلى ام فى الدنيا (وحضنها)
وداد : ويخليك ليا يا ابن قلبى
*_____________________________________________**___________________________*
يوم الخميس قصاد طيبة موول ....
(. وصلت حبيبة قصاد السراج موول وفضلت واقفه قدامه مستنيه الياس لحد ما يوصل ، اول ما وصل الياس شافته حبيبة وعرفته وهو كذلك شافها وعرفها لانه شاف صورتها قبل كده ، اتقابلوا وسلموا على بعض وراحوا قعدوا فى كافيه جنب السراج موول .)
الياس : انا مكنتش اعرف انك زى القمر كده
حبيبة : وانا مكنتش اعرف انك طويل كده
الياس : اديكي عرفتى
حبيبة : انت جيت مواصلات ولا معاك عربيه
الياس : لا انا معنديش عربية بس واحد صاحبى جابنى بـ عربيته
حبيبة : تمام
الياس : تشربي ايه
حبيبة : اى حاجة
الياس : طيب شوفى كده
(. شافوا المنيو وطلبوا اللى هما عايزينه .)
الياس : بصي بقي يا ستى
حبيبة : ايه ؟
الياس : انا هتخرج السنة دى ان شاء الله وهشوف بقي هشتغل فين ولا ايه النظام ، قولى هستقر فى شغلى بعد سنة
حبيبة : تمام
الياس : اول ما اشتغل هاجى اخطبك على طول وفى اجازة سنة خامسه نتجوز
حبيبة بارتباك : نتجوز !!
الياس : مالك ؟
حبيبة : مش شايف انه بدرى اوى الكلام ده
الياس : توء مش بدرى خالص انا لازم ابقي معرفك ظروفى قبل ما نتعلق ببعض جايز متكنش مناسبة ليكي
حبيبة : انت بتحبنى بجد يا الياس
الياس : انا هسيب ده لاحساسك انتِ
حبيبة : بكلمك بجد ، جاوبنى
الياس : الراجل مننا ميفكرش فى الشغل والفلوس والاستقرار والبيت والخطوبة والجواز الا لما يحب بجد ، وانا بحبك بجد يا حبيبة
حبيبة وشها يحمر وتبص الناحيه التانيه ...
الياس : اهو عشان كده مكنتش عايز اجاوب
حبيبة : عشان ايه
الياس : عشان مكسفكيش
حبيبة : لا انا مش مكسوفه
الياس : زى القمر وانتِ مكسوفه اصلاً
حبيبة : ما علينا
الياس : ايه رأيك فى اللى قولته
حبيبة : كلام كويس جداً
الياس : معندكيش اعتراض على حاجة ؟
حبيبة : انا بس عايزة اسأل انت ازاى بتخطط وانت مش عارف انا بحبك ولا لا
الياس (بيقرب ويبص فى عينها اوى) : وحياة عيونك الحلوة دى انتِ بتحبيني وبتموتى فيا كمان
حبيبة تبتسم وتبص الناحية التانيه
الياس : طيب هتفضلى باصة الناحية التانيه كده كتير
حبيبة : لا خلاص خلاص
الياس : قومى بقي نخرج من المكان ده ونروح نتفسح فى اى حته تانيه
(. دفعوا الحساب وراحوا قضوا اليوم كله سوا ، عبد الوهاب اتصل بـ حبيبة وطلب منها تعدى عليه فى المستشفى وهى قالتله على اخر اليوم هتعدى عليه ، الياس وحبيبة كانوا مبسوطين جداً وفى اخر اليوم الياس ادى لـ حبيبه هدية كان شاريها لها عبارة عن سلسله فضة فيها ايه الكرسى .)
*_____________________________________________**___________________________*
فى مستشفى دكتور عبد الوهاب ....
(. خلصت حبيبة مع الياس وراحت لـ عمها .)
حبيبة : خير يا عمو
عبد الوهاب : خير يا حبيبة عمو متقلقيش
حبيبة : النتيجه ظهرت
عبد الوهاب : اااه ظهرت
حبيبة بتوتر : وخير ولا مش خير !!
عبد الوهاب : ................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
بجد قصه جميله اوى هى الحلقه الجديده هتنزل امتى
ردحذف