امومة بلا انجاب ( الاولى )

شخصيات القصة الاساسيه ..

عبد الله : ٥٤ سنة ، الاب ، دكتور اسنان فى الامارات

وداد : ٥٠ سنة ، الام ، دكتورة اسنان ولكنها لا تعمل

حسام : ٢٢ سنة ، الابن الكبير . حديث التخرج من كلية تجارة

جمال : ٢٠ سنة ، الابن الاوسط ، طالب فى كلية هندسة (خاص)

حبيبة : ١٨ سنة ، البنت الصغيرة ، تانيه طب

رواء : ٢١ سنة ، بنت اخو عبد الله ، خريجة اعلام

*_____________________________________________**___________________________*

الحلقة الاولى 

فى اوضة حبيبة ...

(. حبيبة كانت بتلبس خبطت عليها مامتها ودخلت .)

وداد : صباح الخير يا بيبة

حبيبة : صباح النور يا ماما

وداد : صحيتي امتى

حبيبة : انا لسه منمتش من امبارح

وداد : ليه كده ؟

حبيبة : انتِ ناسيه انى عندى امتحان النهاردة

وداد : وعايزة بقى تقنعيني انك هتعرفى تحلى فى الامتحان وانتِ منمتيش واكيد كعادتك مكالتيش

حبيبة : متشغليش بالك يا ماما انا متعودة على كده من زمان

وداد : طيب افطرى قبل ما تنزلى 

حبيبة : اهاا عشان بطنى توجعنى من قلق الامتحان ومعرفش احل حاجة

وداد : انا غُلبت معاكى انتِ حرة اعملى اللى انتِ عيزاه

حبيبة : خلاص يا وده مش هزعلك وهفطر معاكم ، بس هو جمال وحسام صحيوا ؟

وداد : حسام بس صاحى انا هصحى دلوقتى جمال باشا عشان يروح المخروبه بتاعته

حبيبة : غريبة حسام صاحى بدرى كده ليه

وداد : تقريباً زهق من كتر النوم والانتخه

حبيبة : مانا مش فاهمه ليه مش عايزين تشغلوه ؟

وداد : يا حبيبتي بابا بيدورله على شغل كويس بس بتهيألى خلاص حسام شويه كده وهيسافر

حبيبة : ربنا معاه يارب

وداد : ربنا معاكم كلكم يارب ويبارك ليا فيكم

حبيبة : يارب يا ماما

وداد : يالا يا حبيبتى خلصى وتعالى

حبيبة : حاضر

(. خرجت وداد من اوضه حبيبة وراحت عشان تصحى جمال .)

__**__**__**__

فى اوضة جمال ...

(. وداد بتفتح شباك الاوضة وبتتكلم بصوت عالى عشان تزعج جمال .)

جمال : في ايه يا ماما حد بيصحى حد كده

وداد : قوم يا زفت انت عندك جامعه

جمال (بيشد الغطا) : مش قادر اروح النهاردة

وداد (بتشده من عليه) : قوم يالا خليك تاخد اختك فى سكتك بدل ما تركب تاكسى

جمال : ماهى متعوده تاخد تاكسى كل يوم

وداد : يا بنى ادم خلى عندك دم هى عندها امتحان النهاردة وكمان انت امتحاناتك قربت قوم روح شوف ايه فاتك

جمال : يوووه يا ماما عايزة ايه منى على الصبح

وداد : قوم يا حشاش بدل ما اقول لـ ابوك على فضايحك كلها

جمال (بيقوم بسرعه) : بس بس وطى صوتك لـ حد يسمعك

وداد : ولما انت بتخاف كده مش بتمشى عدل ليه

جمال : مكنتش مرة يا ماما هتذليني بيها

وداد : وانا ايه يثبتلى انها مرة

جمال : ثقتك فيا 

وداد باستهزاء : ثقتى فيك !! ياد انت مش بتتكسف من نفسك ، مش حاسس انك اقل واحد فى اخواتك

جمال : كل ده عشان هما دخلوا كليات حكومية وانا بفلوس

وداد : لا يا ظريف مش عشان كده بس انت عكسهم فى كل حاجة

جمال يقاطعها : معلش يا ودة البطن قلابه

وداد : ماشى يا جمال براحتك بس انا لـ صبرى حدود وقسماً عظماً لو ما اتظبطت وشوفت مصلحتك لاكون قايله لابوك على كل حاجة بتعملها وهقوله انك لسه فى سنة تالته مش فى رابعه ماشى

جمال : حاضر يا ماما ماشى

وداد : يالا عشان تفطر وتاخد اختك فى سكتك

__**__**__**__

فـى الـمطبـخ ...

(. وداد بتكمل تحضير الفطار ودخل عليها حسام .)

وداد : خير صاحي بدرى ليه

حسام : رايح مشوار

وداد : مشوار فين بدرى كده ؟

حسام : راح اغير مهنتي في البطاقة من طالب لـ محاسب

وداد : ماشى بس افطر قبل ما تنزل

حسام : خلصى انتِ بس الفطار

(. وخرج حسام ورجع لـ امه تانى .)

حسام : اه صحيح يا ماما كنت عايز شهادة ميلادى

وداد (يقع من ايدها طبق) : شهادة ميلادك !! 

حسام : مالك يا ماما !!

وداد (بتوطى تشيل الازاز) : مفيش اتخضيت اصلك خرجت ورجعت من غير ماحس ، كنت عايز شهادة ميلادك ليه ؟

حسام : مانا قولتلك انى رايح اغير مهنتي فى البطاقة ولازم يكون فيها شهادة ميلادى وكمان عشان املى منها البيانات

وداد : بس انا مش فاكرة حطيت شهادة ميلادكم فين ، اجل المشوار ده لحد ما ادور والقيهالك

حسام : ااجل ايه يا ماما مفيش وقت بابا هيجي كمان تلت ايام وبعدين هبدأ اعمل ورقى عشان اسافر معاه

وداد بعصبيه : اجلها بقي لما ابوك يبقي يجي ويروح معاك

حسام : هو انا عيل صغير !!

وداد : يا سلام !! ماهو اللى راح معاك وانت رايح تعمل البطاقة وكمان هو اللى ملى لك البيانات

حسام : ايوة ده زمان لما كنت عيل فى ثانوى دلوقتى خلاص انا كبرت

وداد بعصبية اكتر : سبني دلوقتى يا حسام خليني اجهز الفطار اخواتك نازلين جامعتهم

حسام بالحاح : طيب قوليلي ممكن تكون فين وانا هروح ادور عليها

(. هنا تدخل حبيبة وتقطع حوارهم .)

حبيبة : ماما انا نازلة بقى مش عايزة حاجة

وداد : استني جمال ياخدك فى طريقه 

حبيبة : لا يا ماما جمال بطئ جداً وروحه طويلة واصلاً انا بحب اروح بدرى

وداد : طيب مش هـ تاكلى حاجة

حبيبة : هبقي اكل فى الجامعه

وداد : طيب خدى بالك على نفسك

حبيبة : حاضر

(. ومشيت حبيبة ونزلت خدت تاكسى .)

حسام : هااا يا ماما

(. مردتش وداد على حسام وخدت الاكل حطته على السفره وبعدها دخلت صحت جمال تانى وقعدوا يفطروا هما التلاته .)

*_____________________________________________**___________________________*

فــى الـتـاكـسـى ....

(. ركبت حبيبة تاكسى ولما لقيت الطريق زحمة فتحت نت من موبايلها وفتحت احدى برامج الشات وكانت مهتمه جداً انها تتكلم مع صديق مقرب ليها على النت ، اسمه الياس وفى اخر سنة فى كلية هندسة .)

Elyas : صباح الخير. اخيراً فتحتى يا حبيبة

DrHabiba : سورى يا الياس كنت بذاكر عشان عندى امتحان النهاردة

Elyas : طيب كنتي افتحى طمنيني عليكي

DrHabiba : صدقنى مكنش عندى وقت خالص

Elyas : بصراحه انتِ فظيعه بتدى المذاكرة اكتر من حقها اوى

DrHabiba : انت ليه فاتح دلوقتى. معندكش جامعه ولا ايه

Elyas : لا عندى بس مش دلوقتى خالص هنزل كمان ساعتين

DrHabiba : مش ناوى تحول جامعه القاهرة بقي ؟ 

Elyas : مش ناوية انتِ تديني رقم موبايلك بقي ؟ ;)

DrHabiba : ليه بقي ؟ ;)

Elyas : يا بنتى احنا داخلين على سنة نعرف بعض ورغم كده مش عايزة  تقابليني او تديني رقمك >_<

DrHabiba : وانت بتاخد ارقام كل البنات اللى بتكلمهم على النت :D

Elyas : لا طبعاً البنات القريبة لـ قلبى بس

DrHabiba : وكام بنت بقى قريبة لـ قلبك ;)

Elyas : قبل ما اعرفك ولا بعد ما عرفتك ؟ ;)

DrHabiba : والنبي يا الياس ماتحور  :D

Elyas : لو من غير تحوير يبقي احب اقولك ان مفيش بنت كلمتها اكتر من تلت شهور وكنت بزهق الا انتِ مبزهقش منك ابداً ❤️

DrHabiba : يا سلام O.o

Elyas : والله ما بكدب مسألتنيش ليه انا غير الاكونت بتاعى

DrHabiba : ليه ؟ :o

Elyas : عشان الاكونت ده مش عليه حد غيرك فاكلمك براحتى بقي من غير ما حد ياخدنى منك

DrHabiba : وبعد ما بنخلص بتفتح الاكونت القديم صح  :D

Elyas : لا والله خالص انا اصلاً نسيت الباسورد

DrHabiba : بس اكيد مقضيها على الفيس او السكايب  :D

Elyas : صدقيني يا حبيبة تقريباً مبكلمش حد غيرك

DrHabiba : انت عايز ايه يا الياس ؟

Elyas : عايز نقرب من بعض شوية

DrHabiba : ماحنا قريبين اهو

Elyas : لا نتكلم صوت. اقولك خلينا نتكلم سكايب

DrHabiba : امممم اوعدك لو حليت كويس النهارده هفكر فى حوار السكايب ده

Elyas :  ان شاء الله هتحلى كويس. ده انتِ فظيعه اصلاً :D

DrHabiba : يا ناس يا شر كفاية قر :D :3

Elyas : خدى بالك على نفسك

DrHabiba : حاضر وانت كمان 

(. وقفلوا الشات سوا وفضلت حبيبة تراجع شوية لحد ما وصلت .)

*_____________________________________________**___________________________*

فى شغل عبد الله فى الامارات ....

(. اتصل عبد الله بـ وداد .)

عبد الله : ايه يا وداد كل دى اتصالات

وداد : ايه انت يا عبد الله بقالى ساعه بكلمك وانت مش معبرنى

عبد الله : يا حبيبتي انا فى الشغل ومكنتش عارف اتكلم ، انتِ مال صوتك

وداد : حسام 

عبد الله : ماله حسام ؟

وداد : بيقول انه عايز شهادة ميلاده عشان يروح يغير مهنة فى البطاقة

عبد الله : طيب فين المشكلة ؟

وداد : يا سلام ، يعني انت مش عارف فين المشكلة

عبد الله : انتِ اللى بتكبري المواضيع وصدقيني حسام مش هياخد باله من اى حاجه

وداد : اقنعه يستناك

عبد الله : انا مش فاهم ليه انتِ مش عايزة العيال تكبر وتعتمد على نفسها ، ماهو كلها شهر وهيجي يشتغل هنا وانا مش هتوسطله على فكرة

وداد : انت مش فاهم حاجة

عبد الله : طيب فهميني يا وده ، ولا اقولك مش وقته خليني لما اروح

وداد : طيب ماشي بس انا اعمل ايه دلوقتى

عبد الله : سبيه يعمل اللى هو عاوزه

وداد : ماشى يا عبد الله ، خد بالك على نفسك ، لا اله الا الله

عبد الله : محمد رسول الله

(. قفلت وداد مع عبد الله ونادت على حسام .)

حسام : ايوة يا ماما

وداد : ايه ده !! انت غيرت هدومك ليه

حسام : ما حضرتك ضيعتي عليا الوقت ومش هلحق اروح اعمل حاجة

وداد : ده انا كنت هقولك تعالى دور معايا على شهادة الميلاد

حسام (وهو ماشى) : مش وقته بقي انا داخل انام

وداد : ماشي يا حبيب امك نوم الهنا

*_____________________________________________**___________________________*

فى بيت رواء ....

 (. رواء عندها ٢١ سنة خريجه اعلام ، بنت عم حبيبة ، ابوها وامها توفوا فى حادثة عربية وخدها عبد الله و وداد ربوها مع ولادهم لحد ما اتجوزت وهى فى اخر سنة فى الكلية بناءاً على رغبتها ، اتجوزت فى بيت ابوها اللى هو فى نفس العمارة اللى فيها عمها وولاده عشان متبعدش عنهم ، رواء متعرفش اهل غير عمها عبد الله ومراته وولاده ، هو ابوها و وداد امها وولادهم اخواتها ، جوز رواء (وسيم،٢٦ سنة) بيشتغل فى البترول ، ١٥ يوم معاها و١٥ يوم فى الشغل .) 

رواء : انا كنت لسه هطلع لـ ماما

حبيبة : انا جيت من الامتحان عليكي 

رواء : طيب تعالى نطلع نساعد ماما فى تجهيز الغدا

حبيبة : يا رواء زمانها اصلاً قربت تخلص

رواء : مالك يا حبيبة شكلك مضايق انتِ محلتيش كويس ولا ايه

حبيبة : لا لا حليت كويس

رواء : امال مالك

حبيبة : انا شكلى بحب يا رواء

رواء : بجد !! مين ؟

حبيبة : واحد عرفته من النت

رواء باستغراب : نت !!

حبيبة : ماهى دى الورطه 

رواء : ورطه ايه مش فاهمه حاجة !!

حبيبة : انا بكلم ناس كتير على النت وفجأة بقيت ادخل مردش على اى حد ولا اتكلم الا مع الياس واصلاً تقريباً بفتح نت عشان اتكلم معاه

رواء : هو اسمه الياس ؟

حبيبة : ايوة

رواء : طيب تمام كملى

حبيبة : الياس بيقولى انه برضه مبيقاش بيتكلم مع حد غيري وكده

رواء : طيب فين المشكلة

حبيبة : المشكلة انى مش مصدقاه واكيد لو قولتله انى مبكلمش غيره مش هيصدقنى وهيقول زى ما بكلمه بكلم غيره

رواء : بصراحة انا عشان كده مبحبش الارتباط من على النت

حبيبة : انا مش عارفة اعمل ايه ؟ ابعد عنه قبل ما اتعلق بيه اكتر من كده ولا اقرب منه

رواء : والله ما عارفه يا حبيبة بس انا وجهة نظرى ان الارتباط من النت ده مبيفلحش

حبيبة : انا مش مشكلتى النت او غيره لانى مقتنعه ان الحب مش مربوط بـ مكان او زمان

رواء : امال ايه مشكلتك ؟

حبيبة : مشكلتى ان يكون بينا ازمه ثقة لا انا اثق فيه ولا هو يثق فيا

رواء : لو حبيتوا بعض بجد مش هيكون فيه الكلام ده بينكم

حبيبة : يعني انتِ ايه رأيك ؟

رواء : قربي منه شوية طالما بتقولى حاسة انك بتحبيه جايز الموضوع يقلب بجد

حبيبة : ربنا يستر بقى

رواء : هو من القاهرة ؟

حبيبة : لا للاسف 

رواء : امال منين ؟

حبيبة : هو من المنصورة وفى هندسة الزقازيق

رواء : شكله حلو ؟

حبيبة : قمر يا روءه

رواء : هههههه طيب يا اختى ، يالا خلينا نطلع لـ امك

حبيبة : طيب بقولك ايه عايزة اطلب منك طلب

رواء : خير

حبيبة : عيزاكى تشغلى امى واخواتى وانا هدخل اكلم الياس سكايب 

رواء : طيب ما تخليكي لـ بالليل

حبيبة : لا انا عايزه اكلمه قبل الغدا عشان ماما تناديني لـ الغدا

رواء : ليه كده يعني مش فاهمه ؟

حبيبة : عشان منتكلمش كتير اوكى

رواء : اوكى ماشى

(. وقفلت رواء شقتها وطلعت هى وحبيبة فوق .)

*_____________________________________________**___________________________*

فى شقة وداد ......

(. وداد فى المطبخ وحسام نايم وجمال لسه مرجعش .)

رواء : معلش يا ماما معرفتش اجى

وداد : لا يا حبيبتي ولا يهمك ، عملتى ايه فى الامتحان يا بيبة

حبيبة : الحمد لله حليت كويس

رواء : طيب ادخلى انتِ غيري هدومك يا حبيبة وانا هساعد ماما

حبيبة : اوكى (ودخلت اوضتها)

رواء : ماما فى حاجة غريبة كده بتحصلى

وداد بقلق : حاجة غريبة ايه !! خير مالك !!

رواء : دايماً كسلانه ومش قادرة اتحرك وعايزة انام اطول وقت

وداد : طيب وبتاكلى كويس ؟

رواء : بـ اكل كتير اوى

وداد : كل ده وساكته على نفسك !!

رواء : المفروض اعمل ايه يعنى ؟

وداد : المفروض تعرفى ان دى اعراض حمل

رواء مخضوضه : حمل !!!

وداد : ايوة حمل ، ايه مختيش بالك خالص

رواء : وانا هعرف منين يا ماما هو انا كنت خلفت قبل كده

وداد : فى ناس مخلفتش خالص وعارفة الاعراض دى

رواء : طيب وانا اتأكد ازاى بقى ؟

وداد : روحى اتصلى بالصيدلية وقولى لهم يجيبوا لك اختبار الحمل المنزلى

رواء : حاضر

وداد لنفسها >> استرها يارب

(. بعد شوية كان جمال جه ودخل يغير هدومه وحبيبة لسه فى اوضتها والصيدليه كانت بعتت الـ order .)

رواء : اهو يا ماما 

وداد : ادخلى الحمام اعمليه

رواء : بيتعمل ازاى ده ؟

وداد : اقرى التعليمات يا رواء متوجعيش دماغى

(. دخلت رواء الحمام وخرجت تانى .)

رواء بتوتر : ماما انا حامل

وداد بقلق : الاختبار طلعه بـ خطين 

رواء : اهو

وداد : طيب يا حبيبتي متقلقيش كده

رواء بدموع محبوسه : انا خايفة

وداد بتاخدها فى حضنها : بس يا هبلة خايفة من ايه ده احلى حاجة فى الدنيا الاطفال

رواء : ايوة بس .................

وداد تقاطعها : مبسش ، احنا النهاردة بالليل ان شاء الله نروح لـ الدكتور وصدقيني هيقولك انك كويسة وزى الفل وان الحمل مفهوش مشكلة

رواء : طيب اكلم وسيم اقوله ؟

وداد : لا لا استنى متقوليش لحد خالص ولا حتى حبيبة لحد ما نروح للدكتور ونشوف هيقولنا ايه ماشى

رواء : ماشى

وداد : يالا يا حبيبتي اغسلى وشك كده وفوقى ومتكشريش ربنا مبيعملناش حاجة وحشة

رواء : انا بحبك اوى يا ماما ، عمرى ما حسيتك الا امى

وداد : الام هى اللى بتربي يا روءه مش اللى بتخلف 

رواء : ربنا يخليكي لينا يا احلى ام فى الدنيا

__**__**__**__

فى اوضة حبيبة ....

(. خلصت رواء مع وداد وراحت لـ حبيبة .)

رواء : ايه عملتي ......... ايه ده مالك يا حبيبة

حبيبة : معلش يا روءه ممكن تناوليني البرشام اللى فى شنطتي

رواء بتوتر : حاضر حاضر

(. راحت رواء جابت لها الدوا ومياة وخدتهم .)

رواء : ايه الدوا ده يا حبيبة 

حبيبة : ده برشام مسكن

رواء : بتاخديه ليه

حبيبة : باخده لما اكون تعبانه ومحتاجه مسكن

رواء : يعني مفكيش حاجة خطيرة

حبيبة : لا يا بنتى خطيرة ايه ، ده انا باخده للصداع او للمغص

رواء : يا شيخه خضتيني ، قوليلي بقي عملتى ايه مع الياس

حبيبة : اتكلمنا bbm بس قالى انه مش هيعرف يتكلم سكايب دلوقتى

رواء : هو انتِ قولتيله انك عايزة تكلميه

حبيبة : لا لا هو اللى قالى هينفع نتكلم سكايب قولتله اه قالى خلاص لما اروح

رواء : خلاص ماشى لما يروح

(. قاموا كلهم اتغدوا سوا وفضلت رواء عندهم وبالليل نزلت رواء و وداد عشان يروحوا لـ الدكتور .)

*_____________________________________________**___________________________*

فـى عـيـادة الـدكتور ....

الدكتور : ها ايه الاخبار

وداد : رواء حامل 

الدكتور : متأكدين ولا مجرد اعراض ؟

رواء : انا عملت اختبار الحمل المنزلى

الدكتور : انتِ منتظمه على العلاج يا رواء

رواء : ايوة يا دكتور باخده بانتظام

الدكتور : طيب احنا منقدرش نجزم بـ انك حامل الا بـ تحليل الدم لان من ضمن الاعراض الجانبية لـ العلاج القئ والغثيان والوهن وفقدان الشهية ودى نفس اعراض الحمل

وداد : يعني احنا ايه المطلوب مننا

الدكتور : مبدأياً هـ نعمل تحليل الدم بتاع الحمل والفحوصات والاشاعات الللى احنا متعودين نعملها دايماً

وداد : اوك يا دكتور متشكرين جداً 

(. وخرجوا من عند الدكتور .)

وداد : يوه نسيت اسأل الدكتور على حاجة مهمه 

رواء : تحبي نرجع نسأله 

وداد : لا خليكي انتِ فى العربية وانا هطلع اسأله بسرعه واجى

(. رجعت وداد لـ الدكتور تانى .)

الدكتور : خير يا مدام وداد

وداد : معلش عايزة اسأل حضرتك على حاجة مهمه ومش عايزة اسأل قدام رواء

الدكتور : اتفضلى

وداد : هو الحمل فيه خطوره على رواء

الدكتور : مش هقدر اجزم بـ ده قبل ما تعملى التحاليل والفحوصات المطلوبه

وداد : يعني بفرض ان حالتها مش مستقره هنعمل ايه ؟

الدكتور : هنزل الجنين

وداد : ولو العكس ؟

الدكتور : لو العكس يبقي هتكمل الحمل عادى بس بحذر وحرص شديد ولازم الدكتور اللى هـ يولدها يتابع معايا

وداد : يعني لو كملت الحمل مفيش خطوره منه

الدكتور : الخطوره من الولاده ودى ممكن يبقي حلها القيصري

وداد : يعني ممكن ............

الدكتور يقاطعها : بلاش نسبق الاحداث

وداد : اوكى يا دكتور متشكرة جداً

(. نزلت وداد لـ رواء ومشيوا .)

*_____________________________________________**___________________________*

فى اوضه حبيبة ......

(. حبيبة بتكلم الياس على السكايب .)

حبيبة : انت عارف احنا بقالنا قد ايه بنتكلم

الياس : قد ايه ؟

حبيبة : تلت ساعات ونص 

الياس : والله ما حسيت بالوقت

حبيبة : اوكى انا هقفل بقى

الياس : طيب عايز اقولك حاجه قبل ما نقفل

حبيبة : حاجة ايه ؟

الياس : حاجة نتيجه كلامنا النهاردة

حبيبة : مش فاهمه حاجة ، عايز تقول ايه !!

الياس : بس متزعليش

حبيبة : اخلص يا الياس فى ايه ؟

الياس : .........................

اشوفكم الحلقة الجاية

ارجو التقييم بـ كومنت

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com