الحلقة الرابعة
عبد الله : خلاص هقولكم الحقيقة ، بس خليكوا فاكرين ان انتوا اللى طلبتوا تعرفوها
حبيبة : هى الحقيقة سيئة للدرجة دى
عبد الله : الحقيقة فى كل صورها بتوجع
حسام بتحدى : برضه عايزين نعرف
عبد الله : عارفين ليه من ساعة ما وصلت مصر متكلمتش معاكم
كلهم : ليه ؟
عبد الله : مبدأياً بعد ما عرفت انكم زعقتوا وقليتوا ادبكم قولت اسيبكم لحد ما تهدوا عشان اعرف اتفاهم معاكم وجايز ترجعوا فى كلامكوا وتنسوا اللى حصل ونكمل حياتنا عادى
حسام بعصبية : يعني حضرتك عايزنا نطمرخ على حاجة زى كده
عبد الله بزعيق : احترم نفسك واعرف انك بتتكلم عن ابوك
جمال : اهدى يا حسام مينفعش كده
عبد الله : لا سيبه ، سيبه يزعق ويقل ادبه
حسام : بابا لو سمحت احنا من حقنا نعرف الحقيقة ، احنا متكلمناش الاسبوع اللى فات كله على اساس ان حضرتك متعرفش
جمال : ايوة يا بابا واحنا مكناش عارفين بصراحة نقول لحضرتك ايه
حبيبة : انتوا بتكدبوا على نفسكم ولا على بابا ، بابا احنا اه عايزين نعرف بس كلنا خايفين من الحقيقة
عبد الله باستغراب : خايفين من ايه ؟
حبيبة : خايفين تأكدلنا ان ماما مش امنا او احنا اصلاً مش ولادكوا احنا الاتنين ، انا فعلاً خايفة من الحقيقة (وعيطت)
عبد الله (بياخدها فى حضنه) : اهدى يا حبيبة ، اهدى يا حبيبتى انا هفهمكوا كل حاجة
(. قعدوا كلهم وهديوا وبدأ عبد الله يحكى .)
عبد الله : من ٢٨ سنة ، لما كان عندى انا ٢٦ سنة ، سافرت الامارات واشتغلت فى مركز طبي متخصص لطب وجراحة الاسنان ، هناك اتعرفت على ازابيلا كانت بنوته جميلة ومرحة والكل يحبها ، كان عندها حوالى ٢١ سنة وكانت لبنانيه عايشة في دبي وتقريباً كده كانت مستقله بـ حياتها حبينا بعض وبعد فترة بسيطه من ارتباطنا نزلنا مصر نتجوز ورجعنا تانى دبى
حبيبة : حبيتها واتجوزتها وهى من ديانه تانيه !!
عبد الله : الدين مكنش ازمه بالنسبة ليا ، لاننا اتفقنا انها هتقرأ عن الاسلام ولو اقتنعت هتعتنقه بجانب ان كان فى اتفاق صريح ان ولادنا هيكونوا مسلمين وهى وافقت
جمال : واهلها معترضوش
عبد الله : لا ازابيلا كانت مستقله تماماً عن اهلها ومكنوش بيدخلوا فى حياتها بدليل انها مرجعتش لهم فى جوازها منى وانها درست واشتغلت فى الامارات وهما كانوا فى لبنان
حسام : وبعدين حصل ايه بعد الجواز
عبد الله : كنا متفقين ومبسوطين جداً مع بعض ، بعد كام سنة من الجواز خلفنا حسام وبعدها بـ سنتين خلفنا جمال ومن هنا بدأت المشاكل
حبيبة مصدومه : يعني ماما وداد مش امنا !!
حسام : ممكن تسكتى شوية لحد ما القصة كلها تخلص ، اتفضل يا بابا كمل ايه المشاكل اللى بدأت
عبد الله : اولاً بقى عندها قناعه ان مفيش حاجة اسمها دين ولا فى حاجة اسمها رب باختصار بقت ملحدة ومش هى دى كانت المشكلة الاساسية لان عقيدتنا كانت مختلفه ومكناش مختلفين لكن هى بعد الالحاد قررت ان انا و انتوا نبقوا زيها ومن هنا بدأت المشاكل والخناقات الكتير جداً وزهقنا من بعض ، عرفنا بقى انها حامل في حبيبة ، حاصرتها وضغطت عليها وحبستها فى البيت عشان متنزلش الجنين ، بدأت ازابيلا تهدى المشاكل والخلافات ومبقتش تتكلم عن حوار الدين او الالحاد تمام كده
كلهم : تمام جداً
عبد الله : بعد ولادة حبيبة بـ فترة لقيتها بتخرج كتير وبتكلم التليفون اكتر ، راقبتها لقيتها بـ تقابل واحد تانى بعد ما اتأكدت عرفت انهم بـ يحبوا بعض :-/
(. حسام وجمال وحبيبة نزل عليهم كلام ابوهم كـ الصاعقة ، مقدروش يتكلموا لان فكرة الالحاد بالنسبة لهم اهون بـ كتير من ان امهم تحب واحد على ابوهم .)
عبد الله : واجهتها واتخانقنا وتانى يوم من خناقنا اختفت ازابيلا للابد ، وسابتلى الورقة دى
(. طلع عبد الله ورقة باين عليها انها قديمة ، خدها حسام وقرأها بصوت عالى عشان اخواته يسمعوا .)
حسام بيقرأ >> عبد الله انا راح امشى للابد ما تبحث لانه بحث بلا فائدة ، انا احب شخص اخر متوافق معى فى كل شي ، انا ما بدى منك شي ولا حتى الولاد خليهم معم وربيهم كيف ما بدك وخلين يقتنعوا بـ دينك وافكارك ، هيدا تنازل منى لك عن كل شي ولا راح اطالبك بـ شي ولا حتى بعد مليون سنة .. ازابيلا
عبد الله : بعدها بلغت ودورت عليها وموصلتش لـ حاجة ، انا دورت عليها عشانكم انتوا انا مكنتش عايزها اصلاً
(. حسام وجمال وحبيبة مقدروش ينطقوا مش عارفين يفكروا اصلاً .)
عبد الله : اكمل ولا كفاية كده
حسام مصدوم : هو لسه فيه ؟
عبد الله : مش عايزين تعرفوا مين وداد ؟
جمال : اكيد مرات حضرتك
عبد الله : وداد دى كانت زميلتي فى الشغل ، كنا قريبين من بعض وكنت عارف انها مطلقه عشان مبتخلفش ، كانت بتحب جوزها جداً ولما اكتشفت انها استحالة تخلف اتجوز عليها هى مكنتش تقدر تستحمل جوازه وفى نفس الوقت مكنتش قادرة تحجر عليه وتمنعه فـ اطلقت منه واول ما فقدت الامل فى رجوع ازابيلا اتجوزت وداد ، تخلصت من كل حاجة ممكن تشككوا ان وداد امكم ، اى ڤيديو او صور ليها او اى حاجة ممكن تفكرنى او تفكركوا بيها تخلصت منها
حسام : بس على حسب كلام حضرتك ان انا عشت معاها ازاى انا مش فاكرها
عبد الله : لانها اختفت وانت لسه مكنلتش اربع سنين وفى نفس الوقت انا تخلصت من كل الذكريات دى
جمال : وليه خبيت علينا القصة دى كلها ، ليه فهمتنا ان وداد امنا ؟
عبد الله بعصبية : عايزنى اقولكوا ايه !! اقولكوا امكم سابتكوا عشان راجل تانى !! عايزنى اقولكوا انها كتبتلى تنازل عنكوا هاا رد عليا قولى اقولكوا ايه !! ، كان لازم تحسوا انكم ليكوا ام وكان لازم وداد تحس ان انتوا ولادها عشان كلنا نعيش حياة طبيعيه وعمر حياتنا ما كانت هتمشى طبيعي لو فضلت ازابيلا موجوده فيها حتى لو كانت مجرد خيال
حبيبة : يعني ماما الحقيقية ممكن تكون عايشة ؟
عبد الله : انا مش عارف عنها اى حاجة ، ممكن تكون عايشة وممكن يكون ربنا ريح البشريه منها وماتت
حسام : وانا ايه يثبتلى ان دى قصة حقيقيه مش مؤلفه !! ليه متكنش حضرتك خطفتنا منها عشان حبيبت وداد
عبد الله : كلام منطقى وحقك تشك بس انا معنديش حاجة تثبتلك ، اللى عندى قولته وانتوا ليكم الحرية تصدقوا او لا
جمال : يعني ايه مفيش حاجة تثبت !!
عبد الله : دى مش قضيتي ، انا حكيت لكم كل ده عشان حاجة واحد بس
كلهم : ايه هى ؟
عبد الله بعصبية : عايز اعرف الست اللى ضيعت من عمرها عشرين سنة عليكوا وانتوا مش ولادها ، الست اللى خلت لكم اخوال وعيلة تانيه تستاهل منكم المعامله دى !! تستاهل تقاطعوها كأنها قتلت لكم قتيل !! هو ده حفظ الجميل والمعروف يا خسارة تربيتها وتربيتي ليكوا (ومشى وسابهم)
حسام : انتوا مصدقين القصة دى
حبيبة : وابوك هيكدب علينا ليه ؟
جمال : على فكرة القصة مقنعه جداً ، ابوك موجود فى الامارات على طول يعني لو هى كانت عايزة تدور علينا وتوصلنا مش ازمه
حبيبة : ايوة كمان الجواب اللى هى سيباه شكله فعلاً قديم اوى يعني مش مُفبرك
حسام : طيب وهندور عليها ولا هنعمل ايه ؟
جمال (وهو بيقوم) : هتدور على واحدة هربت وسابتك عشان راجل تانى !!
حبيبة : هى فى النهاية امنا وربنا اللى يحاسبها مش احنا
جمال : وانا ميشرفنيش تبقي امى ، انا امى تبقي الست اللى جوه دي وهعتبر كل اللى حصل ده كأنه محصلش (ومشي)
حبيبة : هنعمل ايه يا حسام
حسام : مش عارف
حبيبة بتهيألى اول حاجة مفروض نعرفها هى اننا نعتذر لـ ماما وداد
حسام : انا هقوم اعتذرلها
(. قام حسام وحبيبة ورواحوا عشان يعتذروا لـ وداد ، لقيوا جمال لسه هـ يخبط ، خبطوا ودخلوا .)
__**__**__**__
فـى اوضة وداد .....
حسام : احنا جايين نعتذر لـ حضرتك
جمال : احنا اسفين يا ماما (احنا اسفين يا ريس :D )
حبيبة : بجد مكناش نقصد نعمل كده احنا اتصدمنا بس ومعرفناش نتصرف
حسام : ايوة وكمان حضرتك ليه محكتيش لينا القصة دى
وداد بصوت مخنوق : عايزنى اقول ايه !! اقول ايوة انا مش امكم ، طيب وبعدين (بدموع) عمركوا ما هتفهمفوا ان انتوا فعلاً ولادى لا عمرى حسيت غير ان انتوا ولادى
حبيبة : واحنا والله يا ماما عمرنا ما حسينا غير انك ماما
جمال : احنا جايز نكون اتهورنا واندفعنا بس انتِ اكيد هتسامحينا
وداد بدموع : غصب عنى هسامحكم ده اذا كنت اصلاً زعلت منكم ، انا بس هقولكوا حاجة الام هى اللى بتربي ، الامومه مش بالولاده ولا بالحمل ، امكم الحقيقية لو كانت ربت وعاشت معاكوا مكنتش مشيت وسابتكوا
كلهم : احنا اسفين يا ماما
(. وباسوا ايدها وحضنتهم وقالتلهم انها مش زعلانه وهما وعدوها ان مهما حصل مش هيقول انها مش امهم .)
*_____________________________________________**___________________________*
بالليل فى احدى الكافيهات ...
(. حسام نزل يقابل البنت اللى مرتبط بيها .)
روان(٢١ سنة،كلية علوم) : يعني عرفتوا ايه الحكايه ؟
حسام : هاا !! اه
روان : طيب ايه الحكاية ؟
حسام : ماما كان متجوز واحدة وخلفنا وماتت وهى بتولد حبيبة اختى بس
روان : نعم !! بس كده ، طيب ليه مقالكوش
حسام : عشان منحسش اننا ناقصنا حاجة او اقل من غيرنا
روان باستغراب : وجهة نظر ، بس انتوا غلطوا برضه
حسام : غلطنا ليه ؟
روان : عشان المفروض تفصلوا بين الست اللى ربتكوا وبين انكوا ليكوا ام تانيه
حسام : احنا كنا فاكرين ان فى لغز كبير فى الموضوع
روان : ولو برضه يا حسام كان لازم تتعاملوا معاها عادى
حسام : فاكس بقي الحوار ده اقفلي عليه
روان : حاضر المهم انت متضايقش نفسك
حسام : انا هسافر مع بابا وهقعد فى الامارات سنة واحدة وهنزل اجازة اخطبك فيها ماشى
روان : يعنى بعد سنة هنتخطب
حسام : ايه كتير !!
روان : انا ليا وجهة نظر تانيه
حسام : ايه هى
روان : انت تجى تخطبنى قبل ما تسافر
حسام : يا سلام !! اروح اقول لـ اهلك ايه !!
روان : دى قرايه فاتحه وربط كلام وكده كده انت متأكد انك مسافر على شغل
حسام : بصى انا عارف انك عايزة تبقي مطمنه وانا برضه مش عايز اسافر من غير ما اطمنك
روان : من هنا لـ معاد السفر فكر فيها براحتك وانا فى كلتا الاحوال مستنياك ومش هتجوز غيرك
حسام : انا بحبك اوى يا روان
روان : وانا والله يا حسام بحبك اوى
حسام : ربنا يخليكي ليا يا روح قلبى
(. قطع كلامهم جرس موبايل روان .)
روان : دى ماما (وردت) ايوة يا ماما
ام روان : انتِ فين يا رونه اتأخرتى كده ليه ؟
روان : انا خرجت مع صحباتى شوية بعد الكورس
ام روان : هتتأخرى يعني ؟
روان : لا لا يا ماما انا هخرج من الكافيه اهو
ام روان : ماشى يا حبيبتي تجى بالسلامه (وقفلوا)
روان لـ حسام : انا اتأخرت اوى يدوب اروح
حسام : انا اسف
روان : على ايه ؟
حسام : عشان مخليكي تكدبى على مامتك طول مانتِ معايا
روان : عادى بقي كدب ابيض يالا بقي عشان هى متقلقش عليا
حسام : طيب هوصلك ماشى
روان : اوكى ماشى
(. دفع حسام الشيك ووصل روان بيتها وبعدين روح .)
*_____________________________________________**___________________________*
فى اوضة حبيبة ....
(. حبيبة بتكلم الياس على الموبايل .)
الياس : وحشتيني
حبيبة : اخبارك ايه ؟
الياس : كويس انتِ بقي مال صوتك
حبيبة : مفيش حاجة مرهقه شوية
الياس : لا شكلك مضايقة من حاجة
حبيبة : الياس بعد اذنك متبقاش تضغط عليا انا لما اكون عايزه احكى هحكى
الياس : انا مكنش قصدى اضغط عليكي بس فاكر انك ممكن تحكيلي عادى
حبيبة : صدقني هحكيلك بس وقت ما اكون قادرة احكى
الياس : اوكى يا حبيبتي براحتك
حبيبة باستغراب : حبيبتك !!
الياس : ضايقتك !!
حبيبة : لا مش قصدى بس لسه بدرى اوى على الكلام ده
الياس : جايز بالنسبة لك
حبيبة : هو ازاى احنا ممكن نحب بعض من غير ما نشوف بعض
الياس : الحب هو حب الروح وليس الجسد
حبيبة يا سلام ، ده انت بتقول حكم
الياس : على فكرة انا فعلاً ميفرقش معايا شكلك اي نعم انتِ زى القمر بس انا حبيتك عشان شخصيتك
حبيبة : تمام
الياس : وعلى فكرة انتِ كمان بتحبيني
حبيبة : نعم !! ليه يعني بتقول كده ؟
الياس : قلب الام
حبيبة مخضوضه : لا بجد ليه بتقول كده ؟
الياس : صدقيني احساس ، عندى احساس انك بتحبيني وانك كمان حكيتي عنى لـ اقرب حد ليكي
حبيبة : لا خالص الكلام ده مش حقيقي
الياس : ما علينا ، مين بقي اقرب حد ليكي
حبيبة : رواء بنت عمى ومارى صاحبتى من الثانوى ومعايا فى الجامعه
الياس : فى طب معاكى ؟
حبيبة : ايوة
الياس : ومارى ده اسم الدلع ولا ايه ؟
حبيبة : تقريباً هى اسمها فى البطاقة ماريان بس محدش بيقولها الا مارى
الياس : هى مسيحيه ؟
حبيبة : اهاا
الياس : وصاحبتك اوى ؟
حبيبة : دى صاحبتى الوحيدة اصلاً
الياس : غريبة رغم ان دينكم مختلف
حبيبة : احنا عمرنا ما بصينا للموضوع كده خالص وانا دايماً بتعامل معاها على اساس انها ماري صاحبتي اللى بحبها اوى
الياس : يا بختها
حبيبة : ليه ؟
الياس : عشان بتحبيها اوى
حبيبة : اهااا
(. هنا حسام خبط و دخل عليها .)
حسام : بتكلمى مين ؟
حبيبة بارتباك : دى مارى
حسام : طيب بابا عايزك
حبيبة لـ الياس >> مارى هروح اشوف بابا عايزنى ليه هبقي اكلمك بعدين
الياس : بحبك
حبيبة : اوكى باى
(. قفلت حبيبة وراحت تشوف باباها عايز ايه .)
*_____________________________________________**___________________________*
فى شقة رواء ...
(. رواء كانت نايمه حست بـ حركه فى شعرها ، صحيت لقيت وسيم بيلعب فى شعرها .)
رواء : وسيم ، وحشتنى اوى يا حبيبي (وحضنته)
وسيم : انتِ وحشتيني اكتر ، عامله ايه يا حبيبتي
رواء : كويسة الحمد لله
وسيم : والحمل ؟
رواء : ماشي تمام بس بيخليني انام كتير
وسيم : برضه مصممه تكملي الحمل ده يا روءه
رواء : عشان خاطرى يا وسيم ، سبنى اكمل الحمل
وسيم : انا خايف عليكي
رواء : انا عارفة والله يا حبيبي بس انا متفائله جداً بـ الحمل ده هيربطنا ببعض اكتر
وسيم : اه صحيح عندى ليكي خبر مش كويس ؟
رواء بقلق : خير خبر ايه ؟
وسيم : انا نظام شغلى هيتغير
رواء : ازاى ؟
وسيم بحزن : هـ اجى ٣٥ يوم وهـ اروح الشغل ٣٥ يوم
رواء (بتحاول تدارى زعلها) : عادى يا حبيبي دى حاجة كويسة اوى
وسيم باستغراب : كويسة اوى !! ازاى
رواء : اي نعم انت هتبقي بعيد عنى شهر وخمس ايام بس برضه هتقعد معايا فترة كويسة لان الـ ١٥ يوم مبيكفونيش
وسيم : انا بحبك اوى ، ربنا يخليكي ليا
رواء : ويخليك ليا(ومسكت موبايلها)
وسيم : بتعملى ايه ؟
رواء : هكلم ماما اقولها انك جيت
وسيم (بياخد الموبايل) : انا عديت عليهم الاول ومن دلوقتى لحد ما ارجع الشغل انتِ ليا انا وبس
رواء : هههه مانا كده كده بتاعتك
وسيم : لا ياختى كلها كام شهر والفسل اللى جاى فى السكة ده ياخدك منى
رواء : محدش يقدر ياخدنى منك يا روحى
وسيم : ربنا يخليكي ليا
*_____________________________________________**___________________________*
تانى يوم فى جامعه حبيبة ....
مارى : هاا هتروحى لـ كتور
حبيبة : سيبك بس من الحوار ده فى حاجة اهم
مارى : حاجة ايه ؟
حبيبة : حكت لها عن حوار الياس كله
مارى : بتحبيه ؟
حبيبة : شكلى كده
مارى : لسه بدرى اوى يا بيبة على حوار الارتباط ده
حبيبة : ليه بتقولى كده
مارى : انتِ لسه فى سنة تانيه ، يعني لسه ادامك اربع سنين غير سنة الامتياز
حبيبة : ايه علاقة الدراسه بـ الحب
مارى : بصى انا عندى مبدأ اخر فى الحب سنة وخطوبه بالكتير اوى سنتين وبعد كده اتجوز
حبيبة : صدقيني انا كنت زيك بس غصب عنى يا مارى
مارى : هو عنده كام سنة ؟
حبيبة : تقريباً ٢٢ سنة ، فى اخر سنة فى هندسة
مارى : انتِ مقتنعه بـ انك ترتبطى دلوقتى خصوصاً ان لسه مشوارك فى الدراسه طويل ؟
حبيبة : انا مش شايفة ان فيها مشكلة
مارى : يبقي خلاص ارتبطى بيه طالما مقتنعه
حبيبة : تصدقى انك خوفتيني
مارى : فكرى فيها واحسبيها صح وبعدين خدى قرار
حبيبة : اوك
مارى : ربنا يسعدك يا ببتي
*_____________________________________________**___________________________*
فى عيادة دكتور عبد الوهاب (عم حبيبة) ...
(. حبيبة راحت لـ عمها العياده وحكتله على حوار المورڤين .)
عبد الوهاب : انتِ اتجننتي !! ازاى تاخدى الكميه دى كله
حبيبة : يا عمو انا بحس بـ تعب بيبقي هيموتني بضطر اخد اى مسكن
عبد الوهاب : بس متاخديش الكميه دى كلها ، المفروض انك دكتوره وعارفه
حبيبة : يا عمو مبقدرش اتحكم بخرج عن شعورى
عبد الوهاب : يبقي تكشفي زى الناس الطبيعين
حبيبة : ما حضرتك عارف اللى فيها بروح اكشف ويطلع على مفيش
عبد الوهاب : المرة دى هتروحى تعملى check up كامل
حبيبة : مانا عملت قبل كده
عبد الوهاب : تعملى تانى
حبديبة : بس مش عايزة بابا يعرف ممكن ؟
عبد الوهاب : ليه ؟
حبيبة : عشان زهقوا منى كل شوية اقولهم تعبانه ولما اروح اكشف مبيطلعش عندى حاجة
عبد الوهاب : بصي يا بنتى ، انا هاخدك وهروح اعملك الـ check up ومش هقول لحد
حبيبة : وافرض طلع كالعادة معنديش حاجة
عبد الوهاب : هاخدك برضه وهنروح لـ دكتور نفسي
حبيبة : حضرتك برضه بتقولى دكتور نفسى
عبد الوهاب : هو ده الصح وانا هبقي معاكى ومش هسيبك ماشي
حبيبة : ماشي يا عمو
(. واتفقوا على المعاد اللى هيروحوا فيه عشان يعملوا الـ check up .)
*_____________________________________________**___________________________*
فى جامعه الياس .....
سعيد : عملت ايه فى حوار حبيبة
الياس : بطلنا نتكلم وانا صرفت نظر عن الموضوع
سعيد : ده بجد ؟
الياس : امال هشتغلك
سعيد : اشمعنى كده ؟
الياس : اصل انا مبحبهاش وهى شكلها بنت نضيفه مش عايز بقي اعلقها بيا على الفاضى
سعيد : ايه الجدعنه دى
الياس : ادينا بنحاول نبقي جدعان شوية
سعيد : مالك يا لالوس شكلك مش طبيعي
الياس : يا عم مفيش حاجة
سعيد : هو انت حبيتها بجد !! هى اللى قالبه حالك كده ؟
الياس بعصبيه : سعيد فكك منى ومتجبش سيرتها تانى ممكن ؟
سعيد : فى ايه يا الياس ما تظبط مش جدعنه على فكرة انك تخسر صاحبك عشان واحدة
الياس : انا مخسرتكش ومش انا اللى اعمل كده ، بس انا بقالى ساعه بقولك فكك من الحوار ده
سعيد : خلاص هـ افكنى ، بس لما موودك يظبط ابقي كلمنى سلام يا معلم (ومشى وسابه)
*_____________________________________________**___________________________*
فى اوضة وداد ...
(. عبد الله صحى ولقي وداد صاحيه .)
عبد الله : مالك لسه زعلانه ؟
وداد : زعلانه على الولاد
عبد الله : ليه ؟
وداد : مشتتين اوى وتايهين جداً
عبد الله : طبيعي جداً انهم هـ ياخدوا فترة لحد ما يتأقلموا
وداد : انا زعلانه على التوهان ده وعلى صدمة حقيقة امهم ، ياريتك ما قولت لهم
عبد الله : لا كان لازم يعرفوا الحقيقه كامله
وداد : وافرض دوروا على امهم
عبد الله : حتى لو دوروا ولقيوها مش هينسوا اللى حصل
وداد : ربنا يسترها معاهم يارب
عبد الله : متزعليش منهم ولا عليهم ، كل ده طبيعي الفترة دى لحد ما يستوعبوا اللى حصل
وداد : وانا والله ما زعلانه الا عليهم
عبد الله : مع الوقت هيتأقلموا وهينسوا يالا نامى بقي
وداد : حاضر تصبح على خير
عبد الله : وانت من اهله
*_____________________________________________**___________________________*
بعد كام يوم فى بيت عبد الله .....
(. حسام وجمال وحبيبة قاعدين فى اوضه حبيبة وقافلين على نفسهم .)
حسام : ها بقى هنعمل ايه ؟
جمال : انا قولتلك يا حسام ان الموضوع ده انتهى واتقفل بالنسبه ليا
حسام : بس انت ليك ام من حقها تشوفك
حبيبة : لا يا حسام ، جمال بيتكلم صح ، احنا نروح ندور على واحد سابتنا واحنا لسه فتافيت
جمال : انا مش فاهم انت لسه مهتم بـيها اصلاً
حسام : يعني المفروض اعرف ان احنا لينا ام ممكن تبقي عايشه وماهتمش
جمال : عشان تستريح وتريحنا ، اعتبرها ماتت
حسام : وانتِ ايه رأيك يا حبيبة ؟
حبيبة : بصراحة انا ساعات بـ احن انى اشوف الست اللى خلفتنى واللى مفروض انها امى بس لما بفتكر كلام بابا وافتكر اللى هى عملته اصرف نظر عن الحوار ده
جمال : وانا بقي مابحنش خالص ولا فارقه معايا ، وبعدين انت هتدور عليها فين ؟ هتسافر لبنان
حبيبة : ده اذا كانت مهاجرتش بلد اوروبيه
حسام : انا واثق ان بابا عارف عنوانها او عارف اى معلومات عنها
جمال : يبقي اسأله وابوك مش هيلف ولا هيدور
حسام : تمام وانا برضه هحاول اشوف اى طريقة اعرف بيها مكانها
جمال باستهزاء : هاهاها ربنا معاك
حبيبة : يالا بقي وروني عرض كتافكم عايزة اذاكر شوية
حسام : ولا هتكلمى مارى
حبيبة : مالكش دعوه
جمال : تعالى يا حس نلعب دور بلايستيشن
(. وخرجوا من اوضة حبيبة وحبيبة كلمت الياس شوية وبعدين قعدت تذاكر .)
*_____________________________________________**___________________________*
تانى يوم فى احدى المستشفيات (بتاعة عم حبيبة) ....
(. عبد الوهاب خد حبيبة وراحوا يعملوا check up لـ حبيبة ، بعد كام ساعه كانت كل حاجة خلصت وحبيبة روحت على ان عمها هـ يقولها النتيجه فى الموبايل ، اول ما النتيجة ظهرت خدها دكتور تحت التمرين وراح لـ عبد الوهاب مكتبه .)
عبد الوهاب : ها ايه الاخبار
الدكتور : انا بصيت فيهم
عبد الوهاب(وهو بيبص في النتايج) : وايه النظام
الدكتور : ....................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
0 التعليقات :
إرسال تعليق