الحلقة الثانية
الياس : طيب عايز اقولك حاجه قبل ما نقفل
حبيبة : حاجة ايه ؟
الياس : حاجة نتيجه كلامنا النهاردة
حبيبة : مش فاهمه حاجة ، عايز تقول ايه !!
الياس : بس متزعليش
حبيبة : اخلص يا الياس فى ايه ؟
الياس : انا كلمت بنات كتير اوى ، كل واحدة كنت بحسسها ان مفيش زيها وانى مبقتش بكلم غيرها مع انى ببقى مقضيها لحد ما نتكلم صوت او نتقابل شهرين تلاته وبزهق بس بعد ما كلمتك النهاردة اول مرة احس انى مش عايز اقفل وانى مش عايز حد غيرك وهستنى بكرة بـ فارغ الصبر عشان اكلمك تانى
حبيبة : وانت مين قالك اننا هنتكلم بكرة تانى ؟
الياس : شكلك زعلتي ؟
حبيبة : لا مزعلتش احنا فى النهاية اصحاب يعني بتكلمني او بتكلم غيري ميفرقش معايا كتير
الياس : يا سلام
حبيبة : انا هقفل بقى عشان عندى مذاكرة
الياس : هستناكى بكرة
حبيبة : تصبح على خير . باى
الياس : باى
(. قفلت حبيبة مع الياس وخرجت على صوت عالى بره ، لقيت حسام وجمال وامهم بيتكلموا سوا .)
حسام : ما احنا عايزين نفهم يا ماما
وداد : تفهموا ايه ؟
جمال : نفهم كنتى فين انتِ ورواء ؟
حسام : وليه لما وسيم اتصل قولتيله ان رواء كانت هنا طول اليوم وكانت نايمه
وداد : انتوا هتحققوا معايا ولا ايه ؟
حبيبة : في ايه مالكوا !!
حسام : مش تحقيق يا ماما بس لازم نفهم احنا مش طراطير هنا
وداد : كنا بنغير جو عندكم مانع
جمال : وليه من غير حبيبة ؟
حبيبة : اه صحيح ليه روحتوا من غيري
وداد بعصبية : انتوا عايزين ايه ؟
حسام : عايزين نفهم بعد اذن حضرتك ، عايزين نفهم كل فترة بتروحي فين انتِ ورواء وليه مبترضيش تخلى حد يوصلكم وليه اصلاً مخبيين على جوزها مشاويركم دى
وداد : عشان رواء عيانه
حسام وجمال وحبيبة بيبصوا لبعض ومصدومين : عيانه مالها !!
وداد باستسلام : عندها القلب ومن هى طفلة ، احنا مرضناش نقولكم عشان تتعاملوا معاها عادى مش انها مريضة وتعطفوا عليها وهى تحس بـ ده وتشيل جواها
حسام : بس وسيم كان لازم يعرف حاجة زى كده ؟
وداد : وسيم فعلاً عارف ووافق مكنش عنده مشكله بس رواء دلوقتى حامل واحنا مش عايزين نعرفه عشان لو اضطرينا ننزل الجنين ، هو بعيد عنها وهيقلق
حبيبة بقلق : طيب وحالتها ايه !! الدكتور قالكم ايه ؟
وداد (وهى داخله اوضتها) : اديكوا عرفتوا اللى انتوا عايزينه ومتعرفوهاش ان انتوا عرفتوا(ودخلت اوضتها)
حبيبة بدموع : يا حبيبتي يا رواء
حسام : خلاص يا حبيبة متعيطيش اكيد هي كويسة طالما بقت حامل
جمال : مكنش ينفع ماما تخبى علينا حاجة زى كده
حبيبة : هو ده اللى يهمك يا جمال
جمال : يا ستي مش قصدى
حسام : خلاص حصل خير المهم بس هى تبقي كويسه ونطمن عليها
حبيبة : انا داخله اذاكر شوية
(. ودخلت حبيبة تذاكر وجمال وحسام قعدوا مع بعض يتكلموا شوية .)
__**__**__**__
فى اوضة نوم وداد ....
(. وداد بتكلم عبد الله .)
عبد الله : ان شاء الله خير يا وداد صدقيني هتبقى كويسة
وداد : كلام الدكتور مطمنيش بالعكس قلقني اكتر
عبد الله : هى رواء فين دلوقتى ؟
وداد : في شقتها هى مبقتش بترضى تبات هنا بعد ما اتجوزت
عبد الله : سبيها براحتها
وداد : على فكرة الولاد عرفوا
عبد الله : ولاد مين وعرفوا ايه ؟
وداد : ولادنا احنا وعرفوا بـ ظروف ولاء
عبد الله : ليه يا وداد عملتى كده ؟
وداد : ضغطوا عليا ومعرفتش اقولهم غير الحقيقة وعموماً هما مش هيعرفوها حاجة
عبد الله : يالا حصل خير
وداد : انت طيارتك بعد بكرة امتى ؟
عبد الله : الفجر ان شاء الله
وداد : تجى بالسلامه يا حبيبي
(. وقفلوا مع بعض .)
*_____________________________________________**___________________________*
تانى يوم الصبح .....
(. حبيبة كانت نايمه وصحيت على صوت موبايلها وكان رقم مش متسجل .)
حبيبة : الو مين ؟
الرقم : صباح الخير
حبيبة : صباح النور ، مين ؟
الرقم : الياس
حبيبة بتوتر : الياس !! انت جبت رقمي منين ؟
الياس : بطريقتي الخاصة
حبيبة : لا بجد عرفته ازاى ؟
الياس : انتِ كتباه على السكايب
حبيبة : سكايب !!
الياس : ايوة كتباه من ضمن بياناتك على السكايب
حبيبة بخضة : وظاهر لاى حد ؟
الياس : لا ، لـ الاصدقاء
حبيبة : اصل انا مبضفش حد غير الاصدقاء والعيلة بس ودول معاهم رقم تليفونى
الياس : وحشتيني
حبيبة : على فكرة مش من الجدعنه ان لما رقمي يقع تحت ايدك تكلمني هى اصلها مش عافيه
الياس : هى مش عافيه فعلاً بس انتِ لو مش عايزة تردى مش هتردى عليا
حبيبة : اه صح عندك حق
(. وقفلت حبيبة فى وشه وقفلت الموبايل خالص .)
*_____________________________________________**___________________________*
فـى عيادة الدكتور ....
(. رواء و وداد خرجوا من عند الدكتور راحوا عملوا كل التحاليل والفحوصات المطلوبه وطلعت تانى يوم خدوها وراحوا للدكتور .)
بعد ما فحص الدكتور التحاليل والفحوصات ....
وداد : ها يا دكتور خير ؟
الدكتور : هى رواء حامل فى شهر ونص
رواء : طيب في خطوره ؟
الدكتور : الفحوصات والتحاليل بتقول ان حالتك مستقره
وداد : يعني هتكمل الحمل ؟
الدكتور : هتكمله بس زى ما قولنا بـ حرص وحذر وعنايه شديدة
وداد : طيب يا دكتور احنا هنعملها كل اللازم
الدكتور : مبدأياً احنا هنغير العلاج ، هنضيف حاجات جديدة وهنشيل ادويه ممكن تأثر على الجنين
رواء : تمام
الدكتور : ثانياً الراحة ثم الراحة ثم الراحة ، مش عايزك تقومى ولا تتحركى الا للضرورة
رواء : بس انا كده هتخن اوى
الدكتور : بعد الولادة ان شاء الله هنعمل تمارين معينه ميكونش فيها اجهاد على القلب
وداد : ونظام الاكل يا دكتور
الدكتور : زي ماهو ، هديلكم اسم وعنوان دكتور نساء وتوليد هتتابعوا معاه عشان نكون انا وهو على تواصل مع بعض
وداد : تمام
الدكتور : هكتبله تقرير بـ حالة رواء كلها وتديهوله
رواء : ان شاء الله
(. كتب الدكتور التقرير والروشته الجديدة وخدوهم ومشيوا راحوا لـ دكتور النساء والتوليد على طول وبدأوا يتابعوا معاه .)
*_____________________________________________**___________________________*
فى جامعه حبيبة ...
(. حبيبة قاعدة مع زميلاتها وفجأة وشها اتغير وقامت راحت الحمام لحقتها مارى صاحبتها .)
مارى(بتخبط عليها) : حبيبة انتِ كويسة ؟
حبيبة(جوه التواليت) : اه يا مارى متقلقيش بس جانى مغص فجأة
مارى : يا شيخه افتكرت فيكي حاجة خطيرة
حبيبة(خرجت) : بقولك يا مارى
مارى : ايه ؟
حبيبة : انا موسوسه جداً دايماً بحس بمغص وصداع والم فى عضمي وحاجات كتير كده
مارى : ده وسواس قهرى يا حبي
حبيبة : مانا عارفة ومش لقيلاله حل
مارى : ربنا يشفيكي
حبيبة : بصى انا باخد المسكن ده (وخرجته من شنطتها) فـ بما ان باباكى صيدلي ممكن تسأليهولى عن مسكن اقوى شوية عشان ده خلاص مبقاش بيجيب نتيجه
مارى (بتاخده منها) : يخربيتك ده مسكن قوى جداً
حبيبة : مانا تقريباً اتعودت عليه ومبقاش بيعمل حاجة
مارى : انتِ كده ادمنتيه يا حبيبة وده غلط ، انتِ اكيد عارفه ومش محتاجه اقولك
حبيبة : طيب يعني اعمل ايه ؟
مارى : روحى اكشفى
حبيبة : يا بنتى انا من كتر ما بحس انى تعبانه ونروح للدكاترة ويقولوا مفهاش حاجة اهلى مبقوش بيصدقونى
مارى : وانتِ يعني صغيره ما تروحى انتِ للدكتور
حبيبة : ههههههه يا بنتى انا والله مافيش فيا حاجة كل دى اوهام وانا عارفه نفسي عارفه لو عضيت لسانى بالغلط ممكن اقعد اعيط ساعه واتألم يومين
مارى : انتِ اوڤر اوى ربنا يهديكي
حبيبة : طيب هتسأليلي عمو
مارى : ماشي يا اختى ويالا خلينا نخرج من هنا
*_____________________________________________**___________________________*
فى بيت رواء .....
(. رواء بتكلم وسيم جوزها فى الموبايل .)
وسيم : وحشتيني اوى يا روءة
رواء : انت اكتر يا حبيبي عامل ايه
وسيم : الحمد لله اديني عايش
رواء : بتاكل كويس يا وسيم
وسيم : متقلقيش عليا يا حبيبتي انا مش ناقصني غيرك
رواء : كنت عايزة اقولك على حاجة مهمه
وسيم : خير يا حبيبتي
رواء : انا حامل
وسيم : ايه !! حامل
رواء : ايوة حامل فى شهر ونص تقريباً
وسيم : ليه كده يا رواء احنا مش اتفقنا ان مفيش حمل عشان حالتك الصحية
رواء : والله يا وسيم ماخدتش بالى خالص وكمان الدكتور قال ان حالتى مستقره واقدر اكمل الحمل عادى
وسيم : هقولك ايه بس يا رواء ، يالا ربنا يقومك بالسلامه ويسترها ان شاء الله
رواء : متزعلش عشان خاطرى
وسيم : حبيبتى انا مش زعلان انا خايف عليكي لا مش خايف انا مرعوب
رواء : ان شاء الله خير وبرضه لما تنزل اجازة تروحى معايا للدكتور عشان تطمن
وسيم : طيب وانا فى شغلى مين هياخد باله منك وانا فى شغلى
رواء : ماما وداد متقلقش انت
وسيم : ربنا يخليهالك يارب
رواء : يارب يا حبيبي
*_____________________________________________**___________________________*
فى جامعة الياس ....
سعيد (صاحب الياس وزميله فى الجامعه) : واشمعنى بقي هتموت عليها كده
الياس : بص هو فى الاول كان هوس واعجاب بيها زيها زى غيرها بس بعد كده ........
سعيد : بعد كده ايه ؟
الياس : تقريباً اتعلقت بيها
سعيد : ايه يا الياس من امتى واحنا بنتعلق بـ بنات من على النت
الياس : يا عم سعيد بقولك تقريباً وبعدين فيها ايه ؟
سعيد : انت مش شايف ان فيها حاجة ؟
الياس : اصل النت يعني فيه الكويس والوحش
سعيد : بص يا الياس انت حر مفيش حد شريكك بس يا صاحبى البنت اللى تكلم ولد على النت اكيد هتكلم عشرة زيك كده بالظبط ، زى ما بتكلمها بتكلم غيرها
الياس : بس فعلاً هى مختلفه ومحترمه وبنت ناس كمان
سعيد : يعني هما الباقيين واقفين على الارصفه ماهما اكيد ولاد ناس بس قصدى ان المبادئ لا تجزأ
الياس : قصدك ايه ؟
سعيد : هديلك مثال على حبيبة ولا عندك مانع ؟
الياس : مثال ايه ؟
سعيد : حبيبة مثلاً على حد قولك انها مبتكلمش ولاد معاها فى الكلية خالص ولا حتى على سبيل الزمالة صح ؟
الياس : صح
سعيد : بس معندهاش مشكله انها تكلمهم على النت فى حين ان ممكن يكون هو هو نفس الشاب زميلها بس هى مش عايزة يتقال عليها بتكلم ولاد فى الجامعه لكن فى النت اللى محدش يعرفها ومحدش شايفها فيه بتغير مبدأها
الياس : بس ممكن تكون مبتكلمش ولاد فى الجامعه عشان مجتمعنا دماغه شمال
سعيد : بتهيألى ان الناس بتفرق بين البنت اللى واقفه مع زميل لمجرد الزماله واللى واقفة معاه عشان هى شمال
الياس : مش كل الناس بتعرف تفرق
سعيد : انا هدفى ان المبادئ لا تجزأ ، لما واحدة تقول انا مبتكلمش مع حد معرفوش يبقي مبتكلمش مع اى حد متعرفوش خالص فاهمني
الياس : فاهمك بس انا برضه حاسس ان حبيبة دى مختلفه
سعيد : مختلفة ازاى يعني !! مناخيرها تلت فتحات
الياس : بطل استظراف قصدى انها بنت لسه نقيه وبريئة ، مبتحورش كتير ودايماً على طبيعتها
سعيد : ماشى يا عم الله يسهلك
الياس : يووه لسه برضه قافله موبايلها
سعيد : احسن
الياس : خليك فى حالك
*_____________________________________________**___________________________*
فى شقة وداد .....
(. وداد راجعه من عند رواء دخلت لقيت حسام فى اوضة نومها .)
وداد : انت بتعمل ايه هنا ؟
حسام : كنت بدور على دى
وداد : ايه دى ؟
حسام : دى يا ماما مش فاهمه ايه دى ؟
وداد : مش فاهمه ايه الحاجات دى
حسام : .........................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
0 التعليقات :
إرسال تعليق