الحلقة التاسعة عشر
جزء من حلقة سابقة :
بسنت : بصى هو بابا قالى مكلمكيش خالص بس انا كان لازم اكلمك
ندى : خير يا بسنت فى ايه
بسنت : ...............................
*_____________________________________________**___________________________*
بسنت : مودى صحى من نومه وجه كالعادة عشان ينام فى حضنك ولما ملاقكيش اتفتح فى العياط ومش عارفة اعمله ايه
ندى : خديه فى حضنك يا بوسى وهو هينام
بسنت : مش راضى
ندى : طيب هاتى اكلمه
بسنت : حاضر ، موودى كلم ندى
محمد : انتِ فين يا ماما وسيبانى لوحدى
ندى : مش انا قولتلك انى هبات فى بيت ابيه يوسف
محمد : مانا نمت هناك وهما جبونى هنا
ندى : معلش يا مودى استحمل كام يوم كده وانا هجيلك بسرعة
محمد : لا بقى تعالى دلوقتى
ندى : عشان خاطر ماما نودى استحمل شوية وانا هجيلك وهجبلك كل الحاجات الحلوة اللى بتحبها
محمد : طيب متتأخريش عليا
ندى : حاضر يا حبيبي ، خد بالك على نفسك
محمد : حاضر بوسى عايزة تكلمك
ندى : ماشى
بسنت : معلش يا ندى لو صحيتك بس والنبى متقوليش لـ بابا انى كلمتك
ندى : متشغليش بالك يا قلبى واى وقت تحتاجونى اتصلى انتِ ومالكيش دعوة
بسنت : حاضر
ندى : خدى محمد فى حضنك لحد ما ينام وانا اول ما اصحى هكلمكم
بسنت : ماشى تصبحى على خير
ندى : وانتوا من اهله (وقفلوا)
يوسف : فى ايه
ندى : ده محمد مش عارف ينام من غيري
يوسف : انتِ مدلعه محمد اوى يا ندى
ندى : انت مضايق من ايه يا يوسف
يوسف (خدها فى حضنه) : اضايق ايه يا هبلة انتِ انا بس خايف من تعلقه الزايد بيكي ده يأذيه فهمانى
ندى : اعمل ايه طيب ماهو مالوش غيري
يوسف : خدت بالى
ندى : خدت بالك من ايه
يوسف : محمد مش فاكر مامتك ومفيش حد فى حياته الا ماما ندى
ندى : متنساش ان انا اللى ربيته هو وبسنت ومحمد كان وقتها مكملش تلت سنين
يوسف : لا بس ما شاء الله كبرتيه وربيته احسن تربية كل ما يشوف حد يقوله انا راجل عندى ٨ سنين
ندى : ههههههههه على فكرة هو يدوب لسه مكملهم
يوسف : مش انتوا بينكم ١٠ سنين
ندى : اه بينى وبين مودى ١٠ وبينى وبين بوسى ٥ وبين بوسى ومودى ٥ برضه
يوسف : عيلة منظمة
ندى : ربنا يرحمك يا ماما وحشتنى اوى
يوسف : هو ليه يا حبيبتى بتتطلب معاكى نكد لما نكون فرحانين
ندى : انا لا ابداً
يوسف : لا والنبى ، ههههههه طيب نامى نامى عندنا سفر الصبح
*_____________________________________________**___________________________*
فـى خـلال ثـلاثـة شـهـور ....
- حالة شريف الصحية بـ تسوء اكتر واكتر
- ندى ويوسف عايشين احلى ايام حياتهم ويوسف بيحاول ميحرمهاش ولا يبعدها عن اخواتها وهتروح جامعتها على الامتحانات
- محمد بدأ يتأقلم على غياب ندى
- رقية ما بين بيت اخوها وبيتها
- ادهم خطب علياء
- لبنى بدأت تحب ندى بسبب انها سبب فى سعادة يوسف بالطريقة دى
*_____________________________________________**___________________________*
فى بيت يوسف وندى .........
يوسف : مالك يا ندى
ندى : مفيش يا جو
يوسف : لا يا حبيبتى شكلك مضايقة من حاجة ،باباكى اخواتك كويسين
ندى : لا متقلقش هما كويسين
يوسف : امال مالك ، عايزة تروحى عندهم
ندى : لا يا حبيبي ماحنا لسه جايين من عندهم
يوسف : طيب مالك
ندى : عندى خبر حلو
يوسف : طيب لما هو خبر حلو قولى لـ وشك الاول
ندى : انا بس اتصدمت شوية
يوسف : ايه يا ندى اللغز ده ما تقولى في ايه يا حبيبتى
ندى : مش انا من فترة كده كنت بنام كتير اوى ودايماً دايخة
يوسف : اه وقولتلك اكيد نقص تغذية
ندى : لا انا حامل
يوسف بفرحة اطفال : حامل !! بجد يا ندى حامل
ندى : اه والله حامل فى شهرين
يوسف : يااااه بجد يا نودى هيبقى فى طفل كده منك ويملى علينا حياتنا
ندى : ايوة بجد
يوسف : بجد انتِ متعرفيش انا مبسوط ازاى انا نفسى اخدك ونطير من كتر الفرحة اللى انا فيها
ندى : ربنا يسعدك يا حبيبي كمان وكمان
يوسف : بس انتِ مالك ليه حاسس انك مش مبسوطة
ندى : لا انا بس مصدومة واتخضيت
يوسف : ليه يا حبيبتى
ندى : مش عارفة
يوسف : انتِ مكنتيش عايزة تخلفى دلوقتى صح
ندى : لا اصلاً الموضوع مكنش فى دماغى اوى بس كان نفسى اخلف بعد ما ......... (سكتت)
يوسف : بعد ما ايه كملى
ندى (محبتش تضيع فرحة يوسف) : مفيش يا حبيبي انا بس اتخضيت انى لسه صغيرة كده وهبقى ماما
يوسف : مانتِ ماما من زمان يا احلى ماما فى الدنيا ، بس بجد انتِ كويسة
ندى(حضنته) : انا بحبك اوى يا جو يا حبيبى ومبسوطة اوى انى هخلف منك ونفسى يطلع زيك بالظبط
يوسف : بموت فيكي
(. اتصلت ندى بـ لبنى وفرحت اوى واتصلت بـ ابوها وخالتها وعمتها عشان تفرحهم .)
*_____________________________________________**___________________________*
بعد اسبوعين .....
يوسف : كنت عايز اقولك على حاجة
ندى : خير يا حبيبي
يوسف : انا مسافر
ندى : مسافر !! فين
يوسف : مأمورية تبع الشغل
ندى : وهتقعد كتير
يوسف : شهر
ندى : طيب يا حبيبي مالك زعلان ليه
يوسف : مكنتش عايز اسيبك المدة دى كلها لوحدك
ندى : لا يا حبيبي ده شغلك ربنا معاك بس اهم حاجة تاخد بالك على نفسك
يوسف : يعنى مش زعلانه يا روحى
ندى : لا يا حبيب قلبى تروح وتجى بالسلامه بس هتسافر امتى
يوسف : كمان تلت ايام ، هنروح نشوف ماما وبعدها هوديكي اسماعلية تقعدى مع اخواتك بقى
ندى : ربنا يخليك ليا يا يوسف ويرجعك بالسلامه
يوسف : خدى بالك من نفسك ومن ابنى
ندى : اسمها ابننا
يوسف : بموت فى امه
ندى : هههههههه وانا بحبك اوى
*_____________________________________________**___________________________*
بعد سفر يوسف .....
فى بيت اهل ندى .....
ندى : خير يا بابا
شريف : كنت عايز اتكلم معاكى فى موضوع بعيد عن اخواتك
ندى : موضوع ايه
شريف : انا مريض
ندى : انا عارفة كل حاجة يا بابا
شريف : عارفة ايه
ندى : عارفة اللى حضرتك عاوز تقوله
شريف : عرفتى منين ، يوسف اللى قالك ؟
ندى : لا والله يوسف مقاليش حاجة
شريف : امال عرفتى منين
ندى : بالصدفة قرأت تحليل وانا بروق الاوضة وفهمت
شريف : ومقولتليش ليه
ندى : يوسف اللى قالى مقولكش انى عارفة
شريف : طيب انتِ عارفة الجزء الاول من كلامى
ندى : هو فى جزء تانى
شريف : اه فيه
ندى : ايه هو يا بابا
شريف : اخواتك
ندى : مالهم
شريف : دول مسئوليتك انتِ
ندى : بابا ، بسنت ومحمد ولادى مش اخواتى بس يعنى متقلقش عليهم وان شاء الله محدش هيربيهم غيرك
شريف : انتِ بس لازم تبقى عارفة كل حاجة
ندى : متخفش يا بابا والله اخواتى فى عيني وعمرى ما هتخلى عنهم مهما كانت الظروف
شريف : ربنا يخليكي لهم يا حبيبتى وميحرمكوش من بعض
ندى : وميحرمناش منك يا بابا
شريف : قوليلي بقى اخبار العضو الجديد ايه
ندى : ههههه الحمد لله بس لسه محستش بيه
شريف : على اخر الرابع هتبدأ الحركة بتاعته تحسى بيها ولو شقى هيبقى قبل كده
ندى : وبطنى هتكبر امتى
شريف : لا قدامك لـ السادس ، عارفة ومامتك حامل فيكي كنا ممكن نقعد نراقب بطنها تلت اربع ساعات لمجرد انك تحركى ايدك او رجلك
ندى : ياااااه للدرجة دى
شريف : ربنا يرجعلك يوسف بالسلامه وهتعرفى انه للدرجة دى
(. هنا محمد نادى على ندى وخرجتله ، قعد شريف مع نفسه يفتكر احلامه هو وراندا لـ ندى ، واللى مقارنةٍ باللى ندى فيه وجعتله قلبه عليها .)
FLASH BACK
راندا (حامل فى السابع) : شريف يا حبيبي تعالى بسرعه
شريف : خير يا حبيبتى
راندا : ندى بتتحرك تعالى شوف
شريف : ياااه شايفه حركتها بارزة ازاى مش زى زمان
راندا : كبرت بقى دى دلوقتى ٧ شهور
شريف : بس مقولتليش ليه اسم ندى
راندا : مش معناه انه قطرات المطر الخفيفة
شريف : اه
راندا : انا حاسة بقى انها هتبقى ندى السعادة يعنى هتنزل علينا سعادة زيادة
شريف : ربنا يباركلنا فيها
__**__**__**__
(. ندى عمرها خمس سنوات .)
ندى : ماما حلوة الرسمة دى
راندا : حلوة اوى يا حبيبتى
شريف : على فكرة ندى هتبقى رسامة ممتازة
راندا : بس انا نفسى تبقى دكتورة
شريف : صيدلانية برضه
راندا : لا بشرية
شريف : ونفسك فى ايه كمان
راندا : تتجوز مهندس بترول مثلاً
شريف : وليه مش ظابط
راندا : شغلانتكم صعبة اوى يا حبيبي ومحبش بنتى تشوف اللى انا شوفته
شريف : للدرجة دى ايامك كانت صعبه معايا
راندا : لا والله يا حبيبي بالعكس انا عشت معاك احلى ايام حياتى بس انا نفسى ندى تبقى مستريحة عمرها كله مش عيزاها تتعب ولا تقلق ولا تحزن
شريف : يا سلام على الام
راندا : طب عارف انا مش هجوزها قبل ما تكمل ٢٥ سنة
شريف : اشمعنى !!
راندا : عشان متشلش مسئولية بيت واسره بدرى كده عيزاها تعيش حياتها الاول فى خيرك كده وبعدين تتجوز بقى
(. يفوق شريف من ذكرياته على دموع عينه .)
شريف بتنهيدة شقت صدره >> ااااه يا راندا ، اهى مش شالت المسئولية بس لا دى شالت الهم بدرى بدرى من وهى عيلة عندها ١٤ سنة وكمان اتجوزت بدرى ومبقتش دكتورة ولا اى حاجة من اللى حلمناها سوا بس عارفة يا راندا يوسف ده طيب اوى وهدية ربنا لـ ندى عشان يعوضها عن كل اللى شافته واتحرمت منه
*_____________________________________________**___________________________*
فى احدى الكافيهات ...
ندى : وانتوا والله يا بنات وحشتونى اوى
مايا : اخبار الحمل معاكى ايه
ندى : الحمد لله
هايدى : بس مش شايفة انك لسه صغيرة اوى على المسئولية دى
ندى : هههههه لا يا هايدى انا شايلة اللى اكبر منها من زمان
مايا : ندى قدها وقدود ربنا يكملها على خير وتجيب بنوتة زى القمر زيها كده عشان نلعب بيها
هايدى : واخبار الجواز ايه
ندى : انا عن نفسى مبسوطة جداً الحمد لله
هايدي : يعنى حلو ولا وحش
ندى : معرفش الجواز كـ كل عامل ايه انا بتكلم عنى انا ويوسف
هايدي : هو للدرجة دى يوسف بيحبك
ندى : ابقى اسأليه
مايا : ده بيموت فيها يا بنتى انا لاحظتها من ايام ما كان بيقعد قصادها هنا فى الكافيه ويبص عليها
هايدى : اهاا ولما جه اتكلم معاكى وخلع كان ايه وضعه
ندى : اتكلم وخلع !! هو مين ده
هايدى : يوسف
ندى : مش فاهمه حاجة
مايا : حكتلها كل حاجة
ندى(حست ان هايدي عايزة توقع بينها ومايا) : اممم المهم انه طلع فى الاخر شارينى وادينا اتجوزنا وخلفنا وبجد يا مايوش انتِ اجدع صاحبة قابلتها
هايدي : ربنا يخليكوا لبعض
مايا : يارب يا اختى
ندى : بس تعرفى يا مايا ان يوسف محكليش الموضوع ده برغم انه مبيخبيش عليا حاجة
هايدى بسخرية : هههههه اهو طلع بيخبى
مايا : هو اكيد نسى يقولك لكن ماظنش انه خبى عليكي
ندى : انتِ صح يا مايا
هايدي : اممم طيب انا ماشية
ندى : لا خليكى انا اللى همشى عشان اتأخرت (وقامت)
مايا : استنى انا هاجى اوصلك انتِ والسفروت اللى فى بطنك (ومشيوا)
*_____________________________________________**___________________________
فى بيت اهل يوسف .....
لبنى : مش كان المفروض ندى تجى تقعد معانا لحد ما يوسف يرجع بالسلامه
امام : ما تقعد فى الحتة اللى تريحها
لبنى : انا قصدى لو كانت هنا كنت باكلها وشربها وتغذيتها دى مهما كان حامل متقدرش تشيل مسئولية حد
امام : انتِ عندك حق بس دى فرصة كويسة تقعد مع اخواتها وتشوف جامعتها
لبنى : ربنا يكملها على خير بس انا مكنتش اعرف ان اخواتها متعلقين بيها كده
امام : دول ولادها مش اخواتها بس
لبنى : على قد مانا كنت خايفة منها على يوسف على قد مانا حبيتها
امام : وايه بقى اللى تغير
لبنى : يوسف ابنك بقى واحد تانى من يوم ما اتجوزها والابتسامه مش مفرقاه
امام : عشان بيحبها
لبنى : وهى كمان بتحبه اوى ربنا يسعدهم
امام : يارب
*_____________________________________________**___________________________*
فى بيت شريف ...
رقية : خير يا اخويا
شريف : امال الولاد فين
رقية : جوه فى اوضتهم
شريف : يعنى محدش هسمعنا
رقية : لا
شريف : دلوقتى انتِ عارفة الظروف وعارفة ان الحالة كل يوم بتتأخر
رقية : الامل فى ربنا
شريف : ونعمَ بالله بس انا لازم أءمن مستقبل العيال الصغيرة دى
رقية : انت ناوى على ايه
شريف : انا هبيع كل اللى املكه لـ ندى
رقية : ندى لوحدها
شريف : اه وهخلى يوسف يكون واصى على بسنت ومحمد لحد ما يكبروا
رقية : بس دى مش ممتلكات ندى لوحدها
شريف : وندى مش هتظلم اخواتها وواثق ان اول ما يوصلوا سن الرشد ندى هتدى كل واحد حقه زى الشرع ما قال
رقية : بس مينفعش انت متضمنش الزمن ولا الظروف
شريف : لا ان شاء الله خير وندى دى امهم
رقية : وليه يوسف يكون الواصى !!
شريف : يوسف ده ابنى الكبير
رقية : بتهيألى احنا اولى بـ لحمنا ودمنا
شريف : وانا مش هشيل هم ولادى لحد
رقية : حد !! انا بقيت حد يا شريف
شريف : والله ماقصد يا رقية بس لو عملتك واصى رانيا هتزعل ولا العكس انتِ هتزعلى
رقية : فانت بقى قررت تزعلنا احنا الاتنين
شريف : اظن بعد اللى ندى عانته طول الخمس سنين اللى فاتوا اقل حق اخليها واصى لاخواتها وممتلكاتهم
رقية : بس انت قولت يوسف
شريف : وهو ندى ويوسف ايه !!
رقية : انت واثق من يوسف للدرجة دى
شريف : طبيعي جداً اثق فيه ده انا مديله حتة منى
رقية : انت كده بتديله كل حاجة ولادك وفلوسك والفلوس بتغير النفوس
شريف : ايه اللى بتقولى ده يا رقية
رقية : بقولك ان احنا مش عايشين فى الجنة وانت اللى تملكه مش قليل ولا شوية عشان تسيبه كله لـ ندى اللى ممكن يوسف يضحك عليها وعيالك التانين ميطلعوش بمليم واحد
شريف : انتِ ازاى تفكرى كده ، ندى تبيع اخواتها
رقية : زى ما مصطفى باعك فى يوم من الايام
شريف : علاقة ندى بـ اخواتها تختلف عن اى علاقة اخوية تانية
رقية : والله بقى انا حذرتك وانت حر
شريف : انتِ ايه مقترحاتك طيب
رقية : تبيع كل ممتلكاتك وتحولها لـ فلوس وتقسمها بالعدل على التلاته زى ما الشرع قال الذكر مثل حظ الانثتين ويوسف يبقى واصى لحد ما يوصلوا سن الرشد ياخدوا فلوسهم
شريف : تمام هفكر واشوف هعمل ايه
رقية : متزعلش منى يا اخويا بس انا خايفة عليك وعلى اولادك
شريف : لا يا حبيبتى مش زعلان
رقية : هروح اشوف الغدا
(. خرجت رقية من الاوضة لقيت ندى واقعه على الارض .)
رقية : يالهوى ندى !! يا شريف الحقنى يا شريف
شريف : فى ايه !! ايه ده مالها ندى
رقية بدموع : مش عارفة انا خرجت لقيتها كده
(. شريف شال ندى عشان ياخدها لاى دكتور .)
رقية : يا مصيبتى !!
شريف : فى ايه (واتلفت لقى دم مكان ما ندى كانت واقعه )
شريف >> هى كده سقطت !!
رقية : يالا ناخدها على المستشفى بسرعه مفيش وقت
__**__**__**__**__
فى المستشفى ....
(. دخلت ندى الطورائ وبعد الفحص والكشف خرج الدكتور .)
شريف ورقية >> خير يا دكتور
دكتور : ......................
اشوفكم الحلقة الجاية
ارجو التقييم بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق