أم قاصرة ( الحلقة الاخيرة )

الحلقة الثالثة والعشرين (الاخيرة)

جزء من حلقة سابقة :

بسنت >> بصراحة مستخسراه فيها 

بسنت >> هو انا اه صغيرة بس متأكده انى بحبه

بسنت >> لا طبعاً لا ندى ولا اى حد يعرف حاجة مفيش غيرك

بسنت >> ...........................

*_____________________________________________**___________________________*

بسنت >> بصى هو بيعاملنى كويس جداً بس مش عارفة عشان انا اخت ندى ولا عشان بيحبنى

بسنت >> انا حاسة انه متغير من ناحية خصوصاً انها بدأت تهمل نفسها وتهمله انا بقى ههتم بيه

بسنت >> ماهو اكيد يوسف زيه زى اى واحد هيزهق من اهمال مراته

(. سمعت ندى اسم يوسف فـ فهمت كل حاجة ، وقررت انها تدخل على ندى تواجهها ، اول ما فتحت الباب بسنت قفلت الخط .)

ندى : بتكلمى مين يا بسنت

بسنت : محدش لا دى واحدة صاحبتى

ندى : كنتوا بتقولوا ايه

بسنت : عادى كنا بنتكلم كلام عادى

ندى بدموع محبوسة : هى دى اخرتها يا بسنت

بسنت : قصدك ايه مش فاهمه

ندى بزعيق : انا سمعت المكالمه كلها

بسنت بارتباك : سمعتى ايه يعنى

ندى : سمعت انك بتحبى يوسف ، يوسف يا بسنت ملقتيش الا يوسف ، خلاص الدنيا كلها ضاقت بيكي

بسنت : لا لا مش قصدى يوسف جوزك انا قصدى يوسف واحد تانى

ندى : بس بقى بطلى كدب انا سمعت كل حاجة ، مستخسراه فيا يا بسنت ، مستخسرة فيا الفرحة الوحيدة اللى انا عشتها فى حياتى ، مستخسرة فيا الانسان الوحيد اللى صبرنى على كل حاجة شوفتها حرام عليكي يا شيخة 

بسنت ساكتة ومرتبكة ومش عارفة تقول ايه

ندى بدموع : هى دى اخرتها ، هو ده جزائى يا بسنت ، ده انا ضيعت عمرى كله عليكوا ، انا ضيعت كل حاجة حلوة فى حياتى وضحيت بكل احلامى بس عشانكوا انتوا فى النهاية بتكافئينى انك تحبى يوسف هى دى مكافأة نهاية الخدمة !! هى دى شكراً يا بسنت اللى انتِ بتقوليهالى !! انا جيت على ابنى وجوزى عشان خاطركم انتوا يااااااه للدرجة دى مفيش اى حاجة حلوة عملتها ليكي تخليكى تفكرى قبل ما تعملى كده

بسنت : انا اسفة

ندى : فى حاجات مينفعش بعدها اسف لانها مبتصلحش اللى اتكسر

(. خرجت ندى من عند بسنت وراحت اوضتها وقفلت الباب ومن شدة الخبطة صحى يوسف على صوتها وخرج لقى بسنت واقفة بتعيط .)

يوسف : فى ايه !!

بسنت : انا زعلت ندى

يوسف : هى ناقصة يا بسنت 

بسنت : غصب عنى 

يوسف : طيب ادخلى اغسلى وشك وانا هدخل اشوفها 

(. دخل يوسف على ندى لقاها منهارة من العياط .)

يوسف : مالك يا حبيبتى (وقرب منها)

ندى بتبعد عنه

يوسف : فى ايه يا ندى مزعلك اوى كده

ندى : زعلانه على انانيتكم ، زعلانه انى بعد العمر ده كله اكتشف انى بضحى وبـ ادى ناس جاحدة ناكرة للجميل متحفظش المعروف وفى الاخر بخونونى ويطعنونى فى ضهرى

يوسف : ايه دخل بسنت فى اللى انا عملته بس 

ندى : كلكم زى بعض ، كلكم نسخة واحدة يا خسارة كل يوم عشته لحد فيكم ، يا خسارة عمرى اللى راح هدر اللى راح من غير تمن

يوسف : طيب اهدى بس

ندى : مش عايزة اهدى ومالكش دعوه بيا خليك انت فى السنيورة بتاعتك على الله تنفعك

يوسف : انا هروح الشغل وعلى ما ارجع تكونى بقيتي كويسة ونعرف نتكلم

(. نزل يوسف وندى فضلت منهارة شوية وبعد كده قامت عشان تشوف بيتها وابنها واخوها وبسنت فضلت حابسة نفسها فى اوضتها .)

ندى بدموع لنفسها >> ايه اللى بيحصلى ده !! الصدمات دى كتيرة عليا اوى ، اختى تحب جوزى وجوزى يحب واحدة تانية لا لا مش قادرة استوعب ان ده يحصلى من اقرب الناس ليا

>> اخص عليك يا يوسف هونت عليك تقولى الكلام ده ، هونت عليك تجرحنى وتهنينى الاهانه دى ليه كده يا يوسف ، يعنى انت لو قصرت فيا ولا اهملتنى هروح اعرف واحد عليك ، مش عارفة الاقيها من مين ولا مين ، من يوسف ولا بسنت ، ربنا يسامحكم

*_____________________________________________**___________________________*

فى بيت اهل يوسف .....

(. يوسف خلص شغله وراح لـ امه .)

لبنى : فى ايه يا يوسف

يوسف : مخنوق مخنوق اوى كمان

لبنى : خير يا ابنى مالك

يوسف : حكى لامه انه عارف واحدة على ندى وحكى لها الحوار اللى حصل بينه وبين ندى

لبنى : يا عينى عليكي يا ندى

يوسف : طيب وبالنسبة ليا

لبنى : انت فاكر انك صعبان عليا ده انت ولا هزيت فيا شعرة

يوسف : يا سلام ليه بقى !!

لبنى : عشان كل اللى بيحصل ده انا حذرتك منه وعلى حسب كلامك ندى كمان قالتلك على ظروف حياتها وانت قبلت دلوقتى بقى جاى انت تشتكى مالكش حق

يوسف : يا ماما مكنتش اعرف ان الحياة هتبقى سيئة للدرجة دى ندى وصلت انها بقى كأنها شغاله فى البيت مش زوجة

لبنى : وايه مدى علاقتك باللى انت بتكلمها دى

يوسف : مجرد كلام تليفونات مش اكتر

لبنى : يعنى العلاقة بينكم متطورتش

يوسف : لا بس فى احتمال تطور يعنى هو انا ملاك 

لبنى : ياما حذرتك وانت مسمعتش كلامى

يوسف : مش وقته يا ماما التأنيب ده وبعدين مكنتش اعرف ان الموضوع هيوصل انها حتى متنمش جنبى او ان يعدى علينا اسابيع ملمسهاش ، يا ماما كل حاجة حلوة بينا ماتت

لبنى : اتجوز يا يوسف

يوسف : نعم !! اتجوز

لبنى : ايوة اتجوز ، اهو اسمه جواز وحلال احسن ما تعمل حاجة حرام

يوسف : اتجوز على ندى

لبنى : انت شايف ايه يعنى اكيد هتتجوز عليها بس احسن ما تعمل الكبائر

يوسف : طيب وهقول لـ ندى ايه

لبنى : ندى ايه اللى تقولها انت مجنون ولا ايه ، ندى مش هتعرف حاجة انت هتتجوز من وراها

يوسف : ليه يعنى

لبنى : عشان ميبقاش جزائها بعد الغُلب والظلم اللى شافته فى حياتها ان حضرتك تتجوز عليها

يوسف : انا مش فاهم انتِ منين عيزانى اتجوز عليها ومنين مش عيزاها تعرف

لبنى : انا عيزاك تتجوز عشان احميك من الغلط او انك تقع فى الحرام ومش عيزاك تعرفها عشان هى مش ناقصة ومتستحقش كده حتى لو كانت قصرت معاك

يوسف : بس انا مبحبش احس انى بسرق

لبنى : معلش تعالى على نفسك لكن لو ندى عرفت ممكن تروح فيها

يوسف : انا هفكر فى الحوار ده واشوف هوصل لايه

لبنى : ربنا يريح بالك يارب ويسعد قلبك

يوسف : يا رب يا ماما ، هروح انا بقى عشان اتأخرت

لبنى : ماشى وسلملى على ندى

*_____________________________________________**___________________________*

فى خلال اسبوع .......

- ندى وبسنت مبيتكلموش

- يوسف بيفكر فى موضوع الجواز

- ندى ويوسف مبيتكلموش الا للضرورة

__**___**__**__**__

(. بسنت كالعادة حابسة نفسها فى اوضتها ، ندى دخلت عليها .)

ندى : حقك عليا يا بسنت

بسنت : انا اللى اسفة يا ندى (وحضنتها)

ندى : متتأسفيش انا اللى غلطانه

بسنت باستغراب : انتِ اللى غلطانه !! ازاى يعنى

ندى : انا اللى متكلمتش معاكى عن السن اللى انتِ داخله عليه وخطورته وانك هتحبى اول رجل قدامك وطبيعي جداً اللى هو يوسف

بسنت : انا  مش عارفة ازاى فكرت كده بس والله خلاص الفكرة دى مبقتش فى دماغك 

ندى : ليه بقى مبقتش فى دماغك

بسنت : كلامك فوقنى ، شال الغمامه اللى كانت على عيونى قولت لنفسى ازاى اعمل فيكي انتِ كده ، ده انتِ امى يا ندى

ندى : بس انا ام سيئة جداً ، ام مش تمام

بسنت : والله انتِ احلى ام فى الدنيا

ندى : لا يا بسنت انا فعلاً ام مش كويسة ، عارفة قبل ما يحصل اللى حصل كنت بقول على نفسى ام قاصرة بس بعد التفكير اكتشفت انى ام مُقصرة

بسنت : انتِ مُقصرة يا ندى !! ازاى يعنى

ندى : انا قبل ما اقوم بدور امك مفروض اكون اختك وصاحبتك انا اكتشفت انى غلطت فى حقك كتير اوى ، انا مصاحبتكيش ، كنت بس بديلك اوامر عمرى ما فهمتك ليه بقولك اعملى كذا ومتعمليش كذا ، علاقتى بيكي كانت مجرد اوامر 

بسنت : بس والله كنت بعمل كل اللى بتقوليلى عليه

ندى : ودى المصيبة الاكبر لانك كنتى ساعات بتعملى اللى بقولك عليه وانتِ مش مقتنعه 

بسنت : انا بس كنت دايماً بحس انك بتعامليني انى طفلة

ندى : فعلاً عمرى ما خدت بالى انك كبرتى والمفروض حاجات كتير اوى تفهميها والمفروض انى اصاحبك واحكيلك وتحكيلي ده غير انى بفضل محمد عليكي

بسنت : حصل خير يا ندى اهم حاجة متكونيش زعلانه منى

ندى : لا يا حبيبتى مش زعلانه وانتِ كمان متزعليش منى

بسنت : انا عمرى ما زعلت منك

ندى : بس اوعديني ان احنا من النهاردة اخوات واصحاب وانك هتحكيلي كل حاجة زى مانا هحكيلك

بسنت : اوعدك ان هحكيلك كل حاجة حتى لو انتِ مش حكتيلي

ندى : ربنا يخلينا لبعض عشان احنا ملناش الا بعض

*_____________________________________________**___________________________*

فى بيت اهل يوسف .........

يوسف : ماما انا قررت اتجوز

لبنى : خلاص فكرت كويس

يوسف : من يوم ما اتكلمنا وانا بفكر ولقيته حل مناسب بس ......... (وسكت)

لبنى : بس ايه

يوسف : بس انا عايز اعرف ندى

لبنى : طيب ليه عايزها تعرف 

يوسف : معرفش بس انا حاسس ان الصح انها تعرف

لبنى : ولما كنت بتكلم واحدة فى الموبايل مكنش صح انها تعرف

يوسف : دى حاجة هبلة مجرد كلام ومكنش كلام حب يعنى ده كلام عادى بس طالما فيها جواز يبقى لازم تعرف 

لبنى : انا قولت رأيي وانت حر اعمل اللى انت شايفه صح

يوسف : يا ماما انا فعلاً تعبان مش هتجوز عِند يعنى ، انا محتاجة واحدة تهتم بيا يبقى بينا مشاعر ندى باهمالها موتت كل حاجة حلوة

لبنى : اكيد مش قصدها

يوسف : قصدها او مش قصدها المهم انه فى النهاية حصل

لبنى : وهتتجوز مين !!

يوسف : واحدة متعرفهاش بس هى ارمله وعايشة لوحدها

لبنى : امتى طيب

يوسف : اخر الشهر

لبنى : ربنا يسعدك المهم تبقى انت مبسوط

يوسف : مش عارف بس مش هخسر حاجة لو جربت

لبنى : والله انا خايفة تخسر كتير يا يوسف 

يوسف : عادى بقى محدش بيتعلم ببلاش

لبنى : طيب مش خايف ان اللى هتتجوزها دى بعد ما تخلف تهملك برضه

يوسف : ماهى مبتخلفش يعنى حياتها كلها هتبقى ليا

لبنى : ده انت مرتب امورك بقى

يوسف : مش دى فكرتك

لبنى : ربنا يستر 

*_____________________________________________**___________________________*

فى احدى الكافيهات .....

دينا(اللى هيتجوزها يوسف) : ده شكل واحد جاى يقولى عايز اتجوزك

يوسف : فى ايه يا دينا

دينا : مفيش حاجة يا يوسف هنكتب الكتاب امتى

يوسف : اخر الشهر ان شاء الله

دينا : وهتقول لمراتك ايه

يوسف : هقولها الحقيقة

دينا : نعم !!

يوسف : مش عارف بصراحة لسه هعمل ايه هقولها ولا هخبى عليها

دينا : انا من رأيي تقولها

يوسف : احتفظى برأيك لنفسك

دينا : فى ايه يا يوسف لما انت مش طايقنى هتتجوزنى ازاى

يوسف : يا دينا انا عمال افكر وقولتلك انى مش قادر اقابلك وانتِ اصريتي

دينا : خلاص يا حبيبى انا اسفة

يوسف : حصل خير

دينا : هى مراتك عندها كام سنة ؟

يوسف : انتِ عبيطة يا دينا ولا ايه

دينا : ليه بتقول كده 

يوسف : انا عايز لما اكون معاكى متجبليش سيرة ندى او عبد الله خالص سواء ندى عرفت اننا اتجوزنا او لا

دينا : انت للدرجة دى مش طايقها

يوسف : يا دين امى بس بقى انا ماشى (وقام)

*_____________________________________________**___________________________*

بعد كام يوم فى بيت اهل يوسف ...

ندى : خير يا طنط قلقتينى

لبنى : يوسف حكالى اللى حصل بينكم 

ندى : ويرضيكي يا طنط اللى يوسف عمله ده

لبنى : لا ميرضنيش وميرضنيش برضه اهمالك ليه

ندى : طيب قوليلي اعمل ايه

لبنى : انتِ يا حبيبتى بتعملى اللى تقدرى عليه انا بقى اللى هعمل

ندى : مش فاهمه حاجة حضرتك عايزة تعملى ايه

لبنى : انا هعزل لـ شقة فى نفس الشارع اللى انتوا فيه قصادكم بالظبط

ندى : ليه كده يا طنط ما تيجوا تقعدوا معانا

لبنى : انتوا ناقصين زحمة وكفاية الوكسة اللى وصلتى لها انتِ ويوسف

ندى : عموماً هتنور المكان

لبنى : محمد وبسنت هيجوا يعيشوا معايا

ندى : لا يا طنط ايه اللى حضرتك بتقوليه ده

لبنى : انتِ مش مأمنه على اخواتك معايا

ندى : لا والله يا طنط مش قصدى بس دول هيتعبوكى

لبنى : لا مالكيش دعوة وبعدين انا هاخدهم بالشغالة

ندى : ايوة بس .........

لبنى تقاطعها : ندى اخواتك هيبقوا قريبين منك تشوفيهم وقت ما تحبى ووقت ما يحتاجوكى هيلاقوكى ده غير انهم ممكن يقضوا معاكى اليوم طول ما يوسف فى الشغل آن الاوان بقى يا ندى تفوقى لجوزك 

ندى : انا والله كنت خايفة اضيع اخواتى

لبنى : اخواتى كده مش هيضيعوا يوسف هو اللى هيضيع

ندى : خلاص ماشى يا طنط

لبنى : احنا هنعزل قريب وعيزاكى اخر الشهر ده تكونى جهزتى كل حاجة اخواتك ماشى

ندى : ماشى يا طنط هتكلم معاهم واقنعهم 

لبنى : كمان عيزاكى تروحى تعملى شعرك وتشترى فستان جديد وتفاجئى يوسف بيكي ماشى

ندى : حاضر يا طنط

(. قعدت ندى شوية مع لبنى وبعد كده مشيت .)

امام : انا مستغربك ازاى تاخدى اخواتها وانتِ اصلاً كنتى رفضاها

لبنى : مش هنخلص بقى من الموضوع ده

امام : انا بسأل بس

لبنى : خلاص ابنك اتجوزها وخلف منها تفتكر اخرب بيته واسيبه يتجوز ولا اساعده ان بيته ومراته يرجعوا مى ما كانوا

امام : امممم عندك حق برضه

لبنى : وبعدين فكرك جوازه من دينا هيبقى حلال ده متجوزها بس عشان يشبع غريزة مش اكتر ده يبقى جواز ازاى

امام : ربنا يسعده يارب ويهديله ندى

لبنى : يارب

*_____________________________________________**___________________________*

بعد كام يوم فى بيت ندى ......

ندى : انتوا دلوقتى كبرتوا وهتفهوا قصدى صح

بسنت : فى ايه يا ندى

ندى : انتوا بتحبوا طنط لبنى صح

بسنت ومحمد : اه بنحبها اوى

ندى : طيب ايه رأيكوا تروحوا تباتوا عندها

محمد : ليه

ندى : عشان هى وعمو امام عايشين لوحدهم

محمد : طيب ما يجوا يعيشوا معانا

ندى : الشقة مش هتكفى

بسنت : يعنى هنقعد معاهم على طول

ندى : لا انا اول ما اصحى من النوم هجيلكم اقعد معاكم الوقت كله واسيبكم على النوم

بسنت : هو ده عشان اللى حصل منى

ندى : لا طبعاً بطلى غباء

بسنت : عموماً انا معنديش مشكلة طالما هنبات بس وباقى اليوم هتبقى معانا

ندى : وانت يا مودى

محمد : مش عايز اروح فى حتة انتِ مش فيها

ندى : لا يا حبيبي انا هبقى معاكم على طول

محمد : يعنى هتسبينى بس لما اجى انام

ندى : ايوة

محمد(بيفكر) : لا برضه

ندى : طيب انا عندى فكرة

محمد : ايه هى

ندى : تجرب يوم كده او يومين لو مارتحتش يبقى خلاص

محمد : ماشى موافق

ندى لنفسها >> ربنا يستر

*_____________________________________________**___________________________*

اخــر الـشهـر .....

(. يوسف رجع من الشغل وقرر انه يقول لـ ندى انه رايح يكتب كتابه ويتجوز ، دخل يوسف الشقة لقاها ظلمة ومفيش اى اصوات فيها .)

يوسف : يا ندى ، يا ندى يا عبد الله  (مفيش حد رد)

يوسف لنفسه >> خيبة لتكون ندى عرفت وقررت تمشى وتسيب البيت ، مجنونة وتعملها

(. دخل يوسف نور النور لقى ندى قاعدة على كرسى السفرة ، ولابسة فستان ابيض وعامله شعرها وعامله مكياج وطابخة لـ يوسف كل الاكل اللى بيحبه .)

يوسف (اتصدم من المفاجأة) : مين حضرتك ؟

ندى (قربت من يوسف) : مرات حضرتك عندك مانع

يوسف : مراتى وحبيبتى وام ابنى

ندى (بتحضن يوسف) : وحشتنى اوى

يوسف : ندى انتِ عرفتى حاجة

ندى : يعنى ايه قصدك ايه

يوسف : لا مقصدش حاجة يا حبيبتى بس ايه الحلاوة دى كلها

ندى : انا اسفة يا يوسف انى قصرت فى حقك او اهملتك بس صدقنى كل ده غصب عنى

يوسف : حصل خير يا حبيبتى المهم ان احنا نرجع زى زمان

ندى : اوعدك انى هرجع زى زمان واحسن كمان

يوسف : وانا اوعدك انى عمرى ما هزعلك ولا هكون لحد غيرك

ندى : يعنى انت مش زعلان منى

يوسف : لا خلاص مش زعلان بس فين صحيح شلة الفساد 

ندى : عند مامتك

يوسف : يعنى احنا اخرنا مع بعض الليلة دى

ندى : لا يا حبيبي احنا مع بعض على طول

يوسف : مش فاهم

ندى : حكتله اللى لبنى عملته

يوسف : وهتسيبي محمد وبسنت كده على طول

ندى : انا اسيب الدنيا كلها عشانك 

يوسف : ربنا يخليكي ليا ، امال فين بوده

ندى : عند مامتك برضه عشان تعرف انا بحبك قد ايه

يوسف : انا اللى بحبك اوى يا ندى ووحشتينى اوى (وحضنها)

(. هنا موبايل يوسف رن وكانت دينا .)

ندى : مين

يوسف : مش مهم مين (وطلع الشريحة من الموبايل وكسرها)

ندى : ربنا يخليك ليا

يوسف : انا اسف لو جرحتك او جيت عليكى او قولتلك كلمه تضايقك

ندى : خلاص يا يوسف بلاش نتكلم فى اللى فات

يوسف : انا بعشقك ووحشتينى اوى اوى انا حاسس انك كنتى ضايعه منى ولقيتك (وحضنها)

ندى : وانا بموووووت فيك وبحبك اوى

__**__**__**__**___

- عاش محمد وبسنت مع لبنى وامام وكانوا مرتاحين جداً خصوصاً ان ندى مكنتش بتحسسهم انها بعيدة

- يوسف وندى رجعوا زى ما كانوا واحسن كمان

- ادهم اتجوز علياء

- حازم خطب

- بعد سنتين ارتبط حمزة بـ بسنت

**_** الــنــهــايــة **_**

(. المفروض تكون النهاية ان ندى مش هتوافق تبعد عن اخواتها ويوسف هيتجوز وندى هتعرف وتطلق وترجع باخواتها وابنها اسماعلية وتعيش هناك وترفض ترجع لـ يوسف بس انا مهنش عليا اعمل فيها كل ده وقررت اغير النهاية .)

___**___**___**__

ارجو التقييم بـ تعليق وقولوا ليا انهى نهاية احسن :)

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)