الحلقة العشرين
جزء من حلقة سابقة :
فى المستشفى ....
(. دخلت ندى الطورائ وبعد الفحص والكشف خرج الدكتور .)
شريف ورقية >> خير يا دكتور
دكتور : ......................
*_____________________________________________**___________________________*
دكتور : هى كويسة الحمد لله
شريف : امال ايه اللى حصلها يا دكتور
رقية : هو الجنين مات
دكتور : لا لا الجنين كويس وزى الفل وهى كمان كويسة الحمد لله انتوا مالكوا مخضوضين كده
شريف : الحمد لله بس هو ايه اللى حصلها ده الاغماء والنزيف
دكتور : الاغماء نتيجة لـ قلة التغذية البنت ضعيفة جداً اما النزيف فـ دى شعيرات دموية بتغذى الجنين فـ نذفت وده برضه نتيجة الضعف والحالة النفسية
شريف : حالة نفسية !!
دكتور : الشعيرات دى متنزفش بالشكل والغذارة دى الا اذا كان فى ضغط نفسى وعصبى شديد عليها او لانها زعلت جداً
رقية : بس محدش زعلها
شريف لـ رقية >> يمكن عشان يوسف مسافر
دكتور : متنسوش يا جماعة انها لسه صغيرة فى السن وجسمها ضعيف جداً يعنى معرضة لـ الاغماء
شريف : طيب احنا نقدر نشوفها
دكتور : اه طبعاً بس هى هتتحجز عندنا شوية محتاجة تتغذى ومحتاجة محاليل كتير
شريف : اوكى يا دكتور متشكرين جداً
دكتور : العفو ربنا يطمنكم عليها عن اذنكم
(. دخل شريف ورقية الاوضة على ندى ، ندى متعلق لها تحاليل وفى سونار على بطنها لمتابعه الجنين ونضبه طول الوقت .)
شريف : سلامتك يا نودى
ندى (بتجاهد عشان تتكلم) : الله يسلمك يا بابا
رقية : عشان ابقى اقولك كُلى واتغذى عشان حتى اللى فى بطنك
شريف : هى هتاخد بالها بعد كده
رقية : الدكتور بيقول انك زعلتى ايه اللى زعلك بقى
ندى مردتش
شريف : مالك يا حبيبة بابا
ندى : مفيش يا بابا
رقية : طيب عرفينا ايه اللى زعلك ووصلك للمرحلة دى ، يوسف هو اللى زعلك ؟
ندى بصت الناحية التانية ومردتش
شريف : يوسف هو اللى زعلك يا ندى ؟
ندى : لا يا بابا يوسف مزعلنيش ولا عمره زعلنى
شريف : امال مالك
ندى : مفيش
رقية : خلاص يا شريف متضغطش عليها وسيبها تنام شوية
شريف : طيب انا هقعد جنبها وانتِ روحى اطمنى على ولادك وعلى بسنت ومحمد
رقية : خلاص ماشى (ومشيت)
شريف : انا هطفيلك النور عشان تستريحي شوية
ندى : بابا انا عايزة اتكلم معاك فى حاجة مهمة
شريف : استريحي شوية بس وبعدين هنتكلم فى كل حاجة
ندى : لا لو اتكلمت هستريح
شريف (قرب منها) : فى ايه يا نودى
ندى : انت ليه مقولتليش ان الحالة بتتأخر
شريف : حالة ايه
ندى : حالتك يا بابا (وعيطت)
شريف : متعيطيش يا ندى انا فى وسطكم اهو
ندى : امال ليه عايز توزع كل حاجة عليا انا واخواتى
شريف : صدقيني يا ندى حتى لو مكنتش عيان كنت هعمل كده العمر مش مضمون يا بنتى
ندى بدموع : يعنى انت كويس ولا فعلاً الحالة متأخرة
شريف : لا يا حبيبتى انا كويس
ندى : طيب عايزة اقولك على حاجة كمان
شريف : قولى
ندى : انا عمرى ما ابيع اخواتى يا بابا ولا اخد حقهم ولا حتى يوسف ممكن يعمل كده وحتى لو يوسف قالى اعمل كده عمرى ما هعمل كده فى ولادى
شريف : انتِ ليه بتقولى كده
ندى : انا سمعتك انت وعمتو رقية وانتوا بتتكلموا بس والله مكنتش بتجسس بس هى جت كده
شريف : وعشان كده مكنتيش بتردى عليها لما تكلمك
ندى : انا اصلاً مش طيقاها
شريف : متزعليش منها هى بس خايفة عليكم
ندى : خايفة علينا من مين يا بابا من يوسف !! من جوزى ابو ابنى
شريف : معلش اعذريها انا فضلت يوسف عليهم فى كل حاجة هى اكيد غيرانه شوية ، متزعليش منها ولا تعرفيها انك سمعتى حاجة
ندى : لا طبعاً خلاص مش هكلمها تانى
شريف : لا يا نودى عشان خاطر بابا دى اختى
ندى : عشان خاطرم انت يا بابا بس
شريف : ربنا يخليكي ليا يا حبيبتى (وباسها على دماغها)
(. فضلت ندى فى المستشفى خمس ايام ، كان بيزورها خالتها وعمتها وحماتها وابوها مكنش بيسبها .)
*_____________________________________________**___________________________*
بعد رجوع يوسف ......
(. يوسف خلص مأموريته وجه على اسماعليه عشان ياخد ندى على القاهرة .)
ندى : يوسف وحشتنى اوى يا حبيبى
يوسف (خدها فى حضنه) : انتِ وحشتينى اكتر يا حبيبتى عامله ايه
ندى : انا كويسة الحمد لله بس انت مالك خاسس كده ليه
يوسف : انا اللى خاسس ده انتِ شكلك خلصانه خالص
(. هنا جه شريف ومحمد .)
محمد : ابيه يوسف (وجرى عليه ويوسف شاله فى حضنه)
شريف : حمدالله على السلامه يا يوسف
يوسف : الله يسلمك يا عمو
شريف : اخبار الشغل ايه
يوسف : الحمد لله
شريف : ربنا معاك ان شاء الله
محمد : جبتلى حاجة حلوة
يوسف : اه طبعاً جبتلك شوكلاته كتير اوى وشيبسى كمان
محمد : فين
يوسف (نزله واداله كيس) : اتفضل يا استاذ محمد
محمد : شكراً (ودخل اوضته)
شريف : يوسف عايز اتكلم معاك شوية ممكن ولا انت مستعجل
يوسف : اه طبعاً ممكن
ندى : وانا ينفع احضر
شريف : لازم تحضرى
يوسف : خير يا عمى
شريف (اداله ظرف)
يوسف : ايه ده
شريف : دى اوراق فيها بيع لكل ممتلكاتى لـ ندى سواء عقارات او اراضى او فلوس فى البنك حتى دهب امك الله يرحمها
ندى : انا مش فاهمه حاجة
يوسف : استنى انتِ يا نودة ، كمل يا عمى
شريف : الفلوس دى مش هتتقسم الا بعد جواز بسنت ومحمد
يوسف : اشمعنى
شريف : بعد المساواة يعنى بعد ما كل واحد يتصرف عليه زى ما اتصرف على ندى فى جوازها وبعد كده اللى يتبقى يتقسم بينكم بالعدل ، محمد ضعف ندى وبسنت
يوسف : تمام
شريف : فى الظرف ده كمان وصيتى متتفحتش الا بعد ما ربنا يفتكرنى
يوسف : بعد الشر عليك يا عمى
ندى : متقولش كده يا بابا ربنا يخليك لينا
شريف : انا لازم احط كل الاحتمالات ، اهم حاجة الاوراق دى تخليها معاك والوصيه متتفتحش الا فى وقتها
يوسف : متقلقش يا عمى
شريف : انا مش قلقان وواثق فيك اكتر من نفسى
(. لحظات من الصمت تسود المكان ، شريف بص لـ يوسف ويوسف فهم انه يوزع ندى .)
يوسف : بقولك ايه يا حبيبتى مش تقومى بقى تجهزى عشان عندنا سفر
ندى : هنسافر ازاى انت مش عربيتك فى القاهرة
يوسف : اتفقت مع تاكسى هيجي يوصلنا زمانه على وصول
ندى : اوكى هقوم اجهز
(. وقامت وقام شريف اتأكد انها مشيت فعلاً عشان ميحصلش زى يوم رقية .)
شريف : كويس انك قومتها انا عايز اقولك حاجة بس مينفعش قدامها عشان نفسيتها متتعبش
يوسف : مانا خدت بالى اتفضل يا عمى
شريف : انا ايامى فى الدنيا بقت معدودة وده كلام الدكاترة
يوسف : الامل فى ربنا مش فى الدكاترة
شريف : ونعم بالله بس انا عايز اطلب منك طلب
يوسف : اتفضل يا عمى
شريف : بسنت ومحمد
يوسف : والله فى عنيا
شريف : انا عايزك تاخدلهم شقة قريبة منكم ومصاريفهم ندى هتتكفل بيها من الحساب بتاعهم اللى فى البنك
يوسف : متقلقش انا هعمل كل اللى يريحك ويريح ندى
شريف : هما اصلهم ملهمش حد غير ندى
يوسف : وانا عمرى ما هبعدهم عن ندى ، بسنت ومحمد اخواتى زى ما هما اخوات ندى بالظبط
شريف : ربنا يبارك فيك يا يوسف يا ابنى انت فعلاً هدية من ربنا مش لـ ندى بس لا ده للعيلة دى
يوسف : متقولش كده يا عمى انتوا اهلى ومحدش بيبيع اهله
(. خلصوا كلام وكانت ندى جهزت ورجعوا على القاهرة ، راحوا على اهل يوسف الاول وبعد كده روحوا شقتهم .)
*_____________________________________________**___________________________*
فى بيت يوسف وندى ...... (حبة رومانسية بقى 😍)
يوسف : وحشتينى نودة اوى
ندى : وانت اكتر يا حبيبي
يوسف : مالك يا ندى شكلك متغير اوى
ندى : ممكن اعمل حاجة بس متزعلش تقول عليا نكدية
يوسف : عايزة تعملى ايه
(. رمت ندى نفسها فى حضن يوسف وعيطت كتير جداً وبحرقة ، ويوسف معملش حاجة غير انه فضل يطبطب عليها ويملس على شعرها وسابها تطلع كل خنقتها فى حضنه .)
يوسف : احسن دلوقتى
ندى : طول مانا جنبك يا يوسف
يوسف : كنتى بتعيطى ليه بقى
ندى : احساسى ان بابا ممكن فى لحظة ميكونش بينا بيوجعنى اوى مش قادرة اتخيل
يوسف : ندوشتى خليكي دايماً واثقة ان ربنا مبيعملش فينا حاجة وحشة لانه بيحبنا وخلقنا عشان يعمل كل حاجة حلوة ربنا عمره ما هيأذى خلقه
ندى : بس المرض ده .......
يوسف : المرض ده حاجة كويسة لـ باباكى
ندى : حاجة كويسة !! انت بتقول ايه
يوسف : ايوة المرض ده بيكون حاجة من الاتنين لاما ابتلاء لاما تكفير ذنوب وفى الحالتين الشخص المريض هو الكسبان
ندى : بس برضه مش قادرة اتخيل الحياة من غيره
يوسف : طيب ليه انتِ سابقة الاحداث ما يمكن ربنا يشفيه ويبقى كويس ويعيش لحد ما يجوز زؤروم
ندى : زؤروم مين !!
يوسف : زؤروم ابننا
ندى : هههههه ايه الاسم ده
يوسف : ايه رأيك فى ذوقى
ندى : ذوقك حلو فى كل حاجة الا زؤروم دى
يوسف : طيب والله اسم حلو ، تخيلي كده ام زؤروم وابو زؤروم
ندى : مش عايزة اتخيل
يوسف : طيب عايز اطلب منك طلب ممكن
ندى : اتفضل طبعاً
يوسف : عايزك تغمضى عينك ومتفتحيش الا لما اقولك
ندى : ليه
يوسف : هتعرفى لما تفتحى
ندى : اوكى
(. وغمضت ندى وجه يوسف من وراها وربط عصبة على عينها .)
ندى : ليه كده
يوسف : بصراحة مش واثق فيكي
ندى : طيب فى ايه
يوسف : هُش هتعرفى كل حاجة
بعد حوالى خمس دقايق ....
ندى : لا بقى كده كتير
يوسف : خلاص خلاص تعالى بقى (وخدها من ايدها وداها اوضة تانية)
(. جه يوسف من ضهر ندى وحضنها واتكلم فى ودانها بصوت واطى خالص .)
يوسف >> انا بحبك وبعشقك وبموت فيكي يا احلى حاجة حصلتلى فى الدنيا كلها ومقدرش اشوفك ثانية واحدة زعلانه او مكشره واكتر حاجة بكرهها دمعة عينك واكتر حاجة بحبها ابتسامه رقيقة من شفايفك وضحكة حلوة من قلبك بيطلعونى السما السابعه .. ربنا يخليكي ليا يا احلى بنت واجمل زوجة واحن ماما فى الدنيا
(. ولبسها يوسف سلسلة وشال العصبة من على عيون ندى وخدها فى حضنه .)
ندى : ايه ده كله يا يوسف
يوسف : دى اقل بكتير من اللى جوايا ليكي ندى
ندى : طيب نور النور بقى عشان عايزة اشوف عيونك
يوسف : حاضر
(. نور يوسف النور ولقيت ندى سلسلة فى رقبتها جميلة اوى فيها اية الكرسى ولقيت ورد كتير فى المكان وبلونات طايره فى الاوضة وقلب احمر كبير على السرير معمول بالورد ولبس لـ البيبي يوسف حطه قدامها .)
ندى : ايه كل ده
يوسف : بـــــحــــبـــــك
ندى : وانا بموت فيك بس انت عملت كل ده امتى
يوسف : لما كنا عند ماما وقولتلك هنزل اشوف واحد صاحبى
ندى : مش سهل انت يا جو بس بعشقك
يوسف : وانا بموت فيكي
(. وسكتت شهرذاد عن الكلام المباح .)
*_____________________________________________**___________________________*
فى خلال ست شهور ....... (كروتة معلش :D )
- الامور مستقرة تماماً والحياة ماشية طبيعية بس حالة شريف مش مستقرة بل بالعكس بتزيد سوء
- ندى فى شهرها الاخير وخلصت امتحانات الترم الاول
__**__**__**__
فى بيت شريف .....
(. شريف بيقرأ قرآن ومحمد بيلعب بلايستيشن وبسنت بتلعب على اللاب توب .)
شريف : بسنت
بسنت : ايوة يا بابا
شريف : ناوليني بوكس الادوية بتاعى وكوباية مياة
بسنت : حاضر يا بابا
(. وقامت ناولت شريف اللى هو عاوزه وهو طلع كذا علبة برشام خد منها .)
بعد شوية ......
بسنت : مالك يا بابا انت كويس
شريف بيحاول يتماسك : اه اه كويس
بسنت : لا شكلك تعبان
شريف : هاتيلي بس حاجة غطيني بيها
بسنت : طيب تعالى ادخلك اوضتك
شريف : مش قادر اقوم من مكانى يا بسنت هاتى بس اى بطانية غطيني بيها
بسنت : حاضر يا بابا
محمد : فى ايه يا بسنت
بسنت : مفيش بابا عنده شوية برد خد البطانية دى ودهاله لحد ما اعمله حاجة دافية يشربها
محمد : حاضر
بعد ثوانى ......
محمد : الحقى يا بسنت
بسنت : فى ايه
محمد : فى دم فى مناخير بابا
بسنت بتوتر : بابا مالك فى ايه انت كويس
شريف بيحاول يتكلم : كلمى عمتك رقية بسرعة خليها تجى هى وعمك فؤاد
بسنت : حاضر
(. بـ دموع وارتباك وتوتر اتصلت بسنت بـ عمتها اللى جت باقصى سرعة .)
رقية : شريف مالك يا اخويا
فؤاد : مش وقته يا رقية انا هكلم اى اسعاف
رقية : اسعاف ليه !!
فؤاد : شكلن تعبان احنا نوديه مستشفى احسن
رقية : انت بتشتكى من ايه يا شريف ايه بيوجعك
شريف بصوت واطى : عضمى كله يا رقية وصداع هيموتنى
فؤاد : لازم مستشفى يا رقية
رقية : بسنت يا حبيبتى
بسنت : ايوة يا عمتو
رقية : حبيبتى خدى اخواتك وروحى عندنا البيت احنا هناخد بابا للدكتور عشان نشوف عنده ايه
بسنت : طيب اجى معاكم
رقية : لا يا حبيبتى مش هينفع عشان محمد روحى وانا هطمنك
بسنت : حاضر
(. على ما بسنت غيرت هدومها ومحمد كمان ومشيوا كانت الاسعاف جت ، عملوا لـ شريف بعض الاسعافات الاولية ورقية اصرت انه يروح المركز الطبى وشريف طلب من رقية تكلم يوسف ضرورى .)
*_____________________________________________**___________________________*
فى بيت يوسف وندى ..........
(. يوسف بيكلم الموبايل .)
يوسف : انتوا فى المركز الطبى دلوقتى
رقية : احنا لسه خارجين من اسماعلية اهو
يوسف : هتوصلوا هتلاقونى فى انتظاركم (وقفل)
ندى : فى ايه يا يوسف
يوسف بيحاول يلاقى كلام : لا لا ده ، دى مأمورية شغل على غفلة كده هغير وانزل
ندى : ابويا مات يا يوسف !!
يوسف : لا لا بعد الشر ليه بتقولى كده
ندى : امال انت رايح المركز الطبى ليه ؟
يوسف : مين قالك كده
ندى : انت لسه قايل لـ اللى بتكلمه دلوقتى
يوسف : لا يا حبيبتى بتهيألك انا داخل البس
(. دخل يوسف يلبس ومسكت ندى موبايله وعرفت انه كان بيكلم عمتها رقية .)
ندى بدموع : ابوس ايدك يا يوسف خدنى معاك حتى لو مات اشوفه بس ابوس ايدك ورجلك
يوسف (ياخدها فى حضنه) : متعيطيش وقولتلك ١٠٠ مرة انتِ تأمرى واياكى تترجينى
ندى : يعنى هتاخدنى معاك
يوسف : يا حبيبتى باباكى كويس هو بس تعب فجأة وخدوه للدكتور
ندى : عشان خاطرى يا يوسف خدنى معاك اطمن عليه اشوفه بس وهروح على البيت على طول
يوسف : خلاص يا حبيبتى البسى يالا
*_____________________________________________**___________________________*
فى المركز الطبى العالمى ......
(. وصل الاسعاف لـ المستشفى وكان يوسف وندى فى انتظارهم ، اتنقل شريف لـ الطورائ وبعد اكتر من ساعة جه الدكتور يطمنهم .)
دكتور : انا اسف لو اتأخرت عليكم بس عملنا تحاليل وفحوصات كتير خدت وقت
فؤاد : مش مشكلة يا دكتور بس ايه الاخبار
(. رقية خافت تكون الاخبار وحشة فـ تظاهرت بـ مغص وخدت ندى وراحت الحمام .)
يوسف : احنا اسفين يا دكتور اتفضل
دكتور : السرطان كان فى المخ بس دلوقتى بقى فى كذا مكان فى جسمه ومناعته ضعيفة جداً ومش قادر يقاومه
فؤاد : طيب والحالة هتوصل لحد فين
دكتور : مش هقدر اقولكم غير انكم تدعوله ربنا يتولاه لان ده اللى فى ايدنا دلوقتى
يوسف : يعنى خلاص كده
دكتور : القلب لسه شغال وبينبض كويس واحنا هنسيبه تحت الملاحظة وتحت الاجهزة بس الامل بقى شبه منعدم بسبب سيطرة المرض على اجزاء حيوية فى المخ والعضم وكمان المثانة
فؤاد : لا اله الا الله
يوسف : طيب هو فايق يعنى نقدر نشوفه
دكتور : مسموح لمرافق واحد بس وممكن نسمح لكم كلكم تشوفوه بس واحد واحد
يوسف : اوكى يا دكتوذ ياريت متقولش حاجة قدام بنته عشان حامل ومش مستحملة
دكتور : اوكى متقلقش ربنا يصبركم
فؤاد : معلش يا دكتور ممكن سؤال
دكتور : اه طبعاً اتفضل
(. لسه فؤاد هيتكلم جت ممرضة .)
الممرضة : الحق يا دكتور
رقية : الحقونى الحق يا يوسف ندى
(. راح الدكتور على اوضة شريف وراح يوسف وفؤاد يشوفوا ندى مالها .)
اشوفكم الحلقة الجاية
ارجو التقييم بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق