الحلقة الرابعة
جزء من حلقة سابقة :
محمد بصويت وعياط : اااااااه اااااااااه يا بابا يا ندى اااااااه
شريف لنفسه >> محمد !! خير اللهم اجعله خير
(. ندى طلعت تجرى من المطبخ على اوضة محمد ، راحت هى وابوها ولقيوا ............... .)
*_____________________________________________**___________________________*
(. ندى طلعت تجرى من المطبخ على اوضة محمد ، راحت هى وابوها ولقيوا محمد ماسك بطنه وبيصرخ وبيعيط .)
ندى بقلق : مالك يا محمد فى ايه
محمد : بطنى بطنى وجعانى اوى
شريف : انت اكلت حاجة من الشارع
ندى : مش وقته يا بابا لازم يروخ مستشفى
(. وشاله شريف وحطوه فى العربية .)
__**__**__**__
فى المستشفى .....
(. دخل محمد الطورائ وعملوا له اشاعات وتحاليل .)
شريف : خير يا دكتور
دكتور ١ : للاسف هو حالياً فى العمليات
ندى بدموع : يالهوووى عمليات ليه
دكتور ١ : عنده الزايدة وللاسف انفجرت وحصله تسمم
ندى (بتعيط وتقعد على الارض) : تسمم !!!
شريف : حالته ايه يا دكتور
دكتور ١ : ان شاء الله هيبقى كويس هما هيشيله الزايدة وهيعملوا تنضيف عشان التسمم
شريف : يعنى يا دكتور هيبقى كويس
دكتور ١ : ان شاء الله ادعوله
ندى بدموع : يعنى ايه يا بابا يعنى محمد ممكن يروح منى
شريف : لا لا ان شاء الله هيبقى مويس دى عملية سهلة
ندى : العملية سهلة لكن التسمم اكيد مش سهل
شريف : اهدى يا ندى ان شاء الله خير
ندى لنفسها >> يارب يارب اقف جنب محمد وقومه بالسلامه يارب انا ماليش حد غيره هو وبسنت يارب متحرمنيش منهم
(. بعد مرور ساعة .)
ندى (بتجرى على الدكتور) : محمد عامل ايه
دكتور ٢ : انتوا مخضوضين كده ليه اطمنوا هو كويس جداً الحمد لله
شريف : يعنى مفيش اى قلق عليه
دكتور ٢ : لا هو كويس جداً هو اه كانت حالته خطيرة بسبب التسمم بس الحمد لله انتوا جبتوه فى الوقت المناسب واحنا لحقناه
شريف : الحمد لله ومتشكرين جداً
ندى : طيب انا عايزة اشوفه يا دكتور
دكتور ٢ : هو شويه وهيفوق من البنج وتقدروا تشوفه وتتكلموا معاه كمان
ندى : طيب افضل جنبه لحد ما يفوق بالله عليك يا دكتور
دكتور ٢ : مفيش مشكله اوكى
(. دخلت ندى عند محمد وفضلت جنبه لحد ما فاق واطمنوا عليه وبعدها شريف سافر .)
*_____________________________________________**___________________________*
تانى يوم فى المستشفى ......
اتصلت ندى بـ مايا ....
مايا : انت مجتيش المدرسة النهاردة ليه
ندى : مودى عمل عملية وفى المستشفى وانا قاعده معاه
مايا : عملية ايه خير
ندى : الزايدة
مايا : طيب هو عامل ايه
ندى : كويس الحمد لله
مايا : ربنا يطمنكوا عليه
ندى : يارب ، معلش يا مايا ممكن اطلب منك طلب
مايا : طبعاً يا حبيبتى اتفضلى
ندى : ممكن تقولى لـ خالك يرفعلى الغياب انا كده مش هعرف اروح المدرسة قبل ما محمد يبقى كويس ودى فيها ١٥ يوم ويمكن اكتر
مايا : متشليش هم الموضوع ده وانا هجبلك كل اللى احنا هناخده سواء فى المدرسة او الدروس
ندى : متشكرة اوى يا مايا واسفة لو هتعبك معايا
مايا : بس يا بت عيب الكلام ده احنا اخوات
ندى : ربنا يخليكى ليا
مايا : ويخليكى ليا انا هعدى عليكي النهاردة فى المستشفى
ندى : ماشى هستناكى (وقفلوا)
(. قفلت ندى مع مايا واتصلت بـ خالتها رانيا .)
ندى : اذيك يا خالتو عامله ايه
رانيا : الحمد لله يا حبيبتى
ندى : ممكن يا خالتو تاخدى بسنت تقعد معاكى لحد ما محمد يخرج من المستشفى
رانيا : مستشفى !! محمد بيعمل ايه فى المستشفى
ندى : تعب امبارح ونقلناه المستشفى طلع عنده الزايدة وانفجرت وعملتله تسمم وعمل العملية
رانيا : كل ده من غير ما اعرف يا ندى ولا كأنى خالتك
ندى : والله يا خالتو كل حاجة جت بسرعة وكنا قلقانين عليه جداً
رانيا : حتى لو ، على الاقل كنتوا تكلمونى بعد ما اطمنتوا عليه ، اخص عليكي يا ندى مكنش العشم
ندى : انا اسفة يا خالتو انا والله اتلخمت
رانيا : وابوكى فين
ندى : بابا سافر النهاردة الفجر
رانيا : كمان
ندى : مانتِ عارفة شغل بابا وعموماً ادينى كلمتك اهو
رانيا : بسنت هتجى امتى
ندى : هتجى من المدرسة عليكي انا كلمتها
رانيا : طيب انا هقوم اجهزلها الغدا واغديها واجيلك
ندى : ما تتعبيش نفسك يا خالتو
رانيا : يا سلام !! روحى يالا شوفى وراكى ايه ولما بسنت تجى وتتغدى هاجى
ندى : ماشى (وقفلوا)
*_____________________________________________**___________________________*
فى بيت رقية ....
فؤاد : مالك يا رقية
رقية : بتصل على بيت شريف اخويا محدش بيرد
فؤاد : طيب ما تتصلى على شريف
رقية : شريف قالى انه هيسافر الفجر ومش عايزة اقلقه
فؤاد : يمكن فى المدرسة
رقية : مدرستهم بتخلص ٢ الضهر والساعة دلوقتى ٣:٣٠ وبعدين حمزة قالى ان ندى مرحتش المدرسة النهاردة
فؤاد : طيب ما تكلميهم على موبايلاتهم
رقية : اتصلت على موبايل ندى مردتش
فؤاد : ان شاء الله مش هيكون فيه حاجة خير متقلقيش
رقية : لا لازم اطمن عليهم
فؤاد : طيب هتعملى ايه
رقية : هكلم رانيا يمكن تعرف حاجة
فؤاد : وافرضى قلقتيها
رقية : اهو على الاقل تتصرف معايا
(. اتصلت رقية بـ رانيا ورانيا حكت لها كل حاجة .)
فؤاد : خير
رقية : محمد ابن اخويا شريف عمل عملية الزايدة انا هقوم البس واروحلهم
فؤاد : طيب هو كويس
رقية : رانيا بتقول انه بقى كويس بس لازم اروحلهم برضه
فؤاد : طيب انا هلبس واجى معاكى
*_____________________________________________**___________________________*
فى المستشفى ....
(. مايا وبسنت ورانيا ورقيه وفؤاد عند محمد .)
رقية : انتوا يعنى بتعاملونى ان احنا غُرب
ندى : ليه يا عمتو بتقولى كده
رقية : يعنى لا كلمتينى ولا كلمتى خالتك ولا كأننا قرايب
ندى : والله اتلخمنا فى محمد عارفة انا نسيت بسنت نايمه فى الاوضه ونزلت
رانيا : وبعد ما عمل العمليه
فؤاد : هو ايه شغل الحريم ده ، خلاص مش مهم ومتكبروش الحكاية ومتضغطوش على البنت كفاية اللى هى فيه المهم ان محمد بقى كويس
رانيا ورقية : الحمد لله
بعد شوية ......
رقية : وعمك مصطفى جه معاكوا هنا
بسنت : هو عمو مصطفى بيسأل علينا وبابا مسافر لما يسأل وهو موجود
ندى بحزم : بسنت !!
رقية : الكلام ده بجد يا ندى
ندى : عادى يا عمتو كل واحد مشغول فى حياته
رقية : يعنى ايه كل واحد مشغول فى حياته !! عمك بيسأل عليكوا ولا لا
بسنت : لا مبيسألش
ندى : احنا مش عايزين حاجة من حد
فؤاد بصوت واطى لـ رقية >> هو مصطفى اخوكى بيسأل على حد اصلاً
رقية : ربنا يهديه بس ده ساكن معاهم فى نفس العمارة
فؤاد : كبرى مخك
محمد : ندى ندى
ندى : ايوة يا حبيبي
محمد : عايز ثكولاته
ندى : لا يا حبيبي غلط عليك
محمد : بث انا نفثى فيها
ندى : اوعدك اول ما الدكتور يقول ينفع تاكل شيكولاته هجبلك كل الانواع اللى انت بتحبها
محمد : يعنى دلوقتى مث هينفح
ندى : لا يا حبيبى بس انا وعدتك
محمد : ماثى طب انا حايز انام
ندى : حاضر
رانيا : طيب هنخرج احنا بره لحد ما تنيميه
ندى : ماشى
*_____________________________________________**___________________________*
تانى يوم فى بيت رقية .....
فؤاد : بنت اخوكى دى صعبانه عليا اوى
رقية : هى صعبانه عليا من زمان
فؤاد : بس لما شوفتها امبارح فى المستشفى حسيت قد ايه اتظلمت
رقية : البنت دى تفكيرها غريب اوى
فؤاد : قصدك ايه
رقية : يعنى واحدة فى السن ده يبقى كل همها ازاى تربى اخواتها ، المفروض ان ندى طفله يعنى لسه انانية ازاى بقى طفلة فى سنها متفكرش فى نفسها ولا فى مصلحتها وتفكر فى اخواتها
فؤاد : بس انتِ ليه مفضلتيش معاها فى المستشفى
رقية : ماهو مش مسموح. الا بمرافق واحد وندى رافضة تسيب محمد واتفقنا انا ورانيا ان كل واحد تروح تقصى اليوم معاها
فؤاد : ربنا يكرمها ويجازيها كل خير على تربيتها لاخواتها
رقية : طيب ايه رأيك
فؤاد : رأيى فى ايه
رقية : فى موضوع حازم وندى
فؤاد : حازم لسه صغير ده اولاً وندى صغيرة جداً ده ثانياً
رقية : وثالثاً !!
فؤاد : ثالثاً لازم تبقى ندى عايزة حازم وحازم عايز ندى متكونش مجرد جوازة عطف وشفقة
رقية : بس حازم بيحبها
فؤاد : هو العيل ده بيعرف يحب
رقية : لا مش عيل ده باش مهندس قد الدنيا
فؤاد : طيب وندى !!
رقية : اكيد هتحبه
فؤاد : لما تحبه ابقى تعالى قوليلي
رقية : طيب
*_____________________________________________**___________________________*
بعد مرور ست شهور ......
- ندى مبتروحش المدرسة وبتذاكر على قد ما تقدر
- بسنت وحازم وأدهم خلصوا امتحانات الترم الاول وبدأوا الترم التانى
- رانيا فى محاولات مستميته مع ادهم عشان يخطب ندى
- حازم بيحاول مع ندى عشان توافق على الارتباط بيه
- شريف بيجي كل اسبوع ٢٤ ساعة والاسبوع اللى بعده ٣ ايام
- مصطفى مبيسألش على ندى واخواتها خالص
*_____________________________________________**___________________________*
فى بيت رقية ....
رقية : بص بقى يا شريف بنتك داخله على امتحانات الثانوية العامه ومش هتعرف تذاكر وتاخد بالها من اخواتها
شريف : طيب اعمل ايه
رقية : هيجوا هما التلاته يقعدوا عندى لحد ما يخلصوا امتحانات وكده كده حمزة معاها فى نفس السنة وبينهم مواد مشتركة
شريف : هاخد رأى ندى
رقية : مفيش حاجة كده هتجى يعنى هتجى انت عايز تضيع مستقبل البنت
شريف : مستقبلها ضاع من ساعة ما دخلت ادبى
رقية : مالهم يعنى اللى دخلوا ادبى اسمع كلامى وهات عيالك عندى
شريف : حاضر يا رقية
رقية : ربنا يكرمك فيهم يارب ويخليهملك
شريف : يارب ان شاء الله
*_____________________________________________**___________________________*
فى بيت شريف ....
شريف : بصى يا ندى يا حبيبيتى انتِ هتروحى تقعدى مع عمتك رقيه لحد ما تخلصى امتحانات
ندى : لا انا مش هسيب اخواتى
شريف : هيروحوا معاكى
ندى : طيب ليه كده ماحنا ........
شريف يقاطعها : عشان تعرفى تذاكرى يا ندى كفاية اوى لحد كده
ندى : كفاية ايه
شريف : مفيش ، جهزى نفسك انتِ واخواتك عشان هتروحوا عند عمتك بكرة (وقام)
__**__**__**__
شريف لنفسه >> يارب ما اكون ظلمتك يا ندى ، يارب انت مُتطلع وعالم بظروفى وحالى وعارف انى عمرى ما فكرت اظلمها يارب لو كنت ظلمتها سامحنى
(. فضل شريف يكلم فى نفسه ويفتكر ندى وقد ايه هى اتظلمت وافتكر موقف مهم جداً .)
Flash back
(. فى يوم شريف راجع من شغله بالليل دخل على محمد وعلى بسنت لقاهم نايمين ، دور على ندى كتير ودخل لقاها فى اوضة امها نايمه ولقى جنبها ................ .)
اشوفكم الحلقة الجاية
ارجو التقييم بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
جميلة جدا بانتظار باقى الحلقات :D
ردحذفالحلقه اظهرت جزء من شخصية كل واحد ببراعه تسلم ايدك
ردحذفMarwa Elkerkare
ردحذفيعنى فجأه كده تقفلى الحلقه بعد ما اندمجت فيها اعمل فيكى ايه دلوقتى هههه
Mero Mohamed
ردحذف7lwa awyyyyyyyy bgd
Princess Mony
ردحذفجميلة تسلم ايدك ياالاء
Touta Shosho
ردحذفحلوه يا الاء بس القصه كام حلقه
Enas Salem
ردحذفالحلقه جمييله خالص والاحداث حلوه بس قصيره جدا ياااريت تطول شويا لان الواحدبيندمج جااامد مع الاحداث