الحلقة الحادية عشر
جزء من حلقة سابقة :
(. وساعة ما ندى كانت مندمجة فى الكتابة سمعت صوت بيقولها >> بتكتبى ايه يا ندى .)
ندى : .........................
*_____________________________________________**___________________________*
ندى : حازم اذيك ؟
حازم : كويس الحمد لله انتوا عاملين ايه
ندى : احنا بخير الحمد لله انت بتعمل ايه هنا
حازم : انا روحت عندكم البيت ملقتش حد كلمت بسنت قالتلى ان انتوا هنا
ندى : خير فى حاجة
حازم : لا انا كنت جاى اشوفكم عادى يعنى
ندى : انت جيت من القاهرة امتى
حازم : امبارح بالليل مقولتليش بقى كنتى بتكتبى ايه
ندى : حاجة كده زى المذكرات
حازم : وده من ايه
ندى : عادى يعنى بفضفض مع نفسى
حازم : ومين يوسف ده
ندى بارتباك : يوسف !! يوسف مين
حازم : اللى كنتى بتكتبى عنه فى مذكراتك
ندى : انت قريتها ؟
حازم : لا لمحت اسمه كده وانتِ بتكتبى
ندى : لمحت برضه !!
حازم : اكيد لانى معرفش انك بتكتبى مذكراتك ، انتِ بتحبى يا ندى
ندى : لا يا حازم مبحبش
حازم : مالك متعصبة كده ليه متفتكريش انى هزعل
ندى : يعنى لو انا قولتلك انى بحب واحد تانى مش هتزعل
حازم : لا طبعاً انا هفرحلك عشان احنا اخوات
ندى : انت بتتكلم بجد يا حازم
حازم : امال بشتغلك
ندى : وبالنسبة للموضوع اللى كلمتنى فيه قبل كده
حازم : اكتشفت ان كلامك صح
ندى : كلام ايه
حازم : ان احنا صغيرين ومينفعش نحكم على مشاعرنا فى السن ده ولسه بدرى والخ الخ
ندى بخجل : الخ الخ كمان :-/
حازم : مالك
ندى : بص يا حازم الموضوع مالوش علاقة بالسن بس احنا طول عمرنا اخوات صعب اغير نظرتى ليك
حازم : كلامك اتغير يا ندى
ندى : مش انت قولتلى قبل كده ان كل ما بنكبر شوية كل ما نظرتنا للامور بتختلف اهو عشان كده كلامى اتغير
حازم : لا يا ندى انتِ كلامك اتغير عشان حبيتى
ندى : انا محبتش ولا حاجة مين قالك
حازم : ويا ترى مختفى فين المدة دى كلها يارب يبقى كويس
ندى : مش فاهمه قصدك ايه
حازم : انتِ يا ندى لسه كاتبة الكلام ده عنه دلوقتى
ندى : دى كانت لمحة سريعة !!!
حازم : انا مكنش قصدى اطلع على اسرارك
ندى : يا حازم مفيش اى حاجة بينى وبين يوسف ده مجرد واحد بشوفه بالصدفة واعجبت بيه ، اعجاب مش اكتر
حازم (بيقوم من مكانه) : ربنا يطمنك عليه
ندى : يا حازم استنى بس افهمك حاجة
حازم بيغتصب ابتسامه : نودى يا حبيبتى احنا اخوات وهنفضل اخوات وانا مش زعلان بالعكس انا مبسوط بس اهم حاجة تكونى اخترتى صح ولو احتجتى اى حاجه اطلبيها منى ومش هتأخر عنك (ومشى)
ندى : حازم يا حازم ، يووووه
هنا جت بسنت ......
بسنت : ماله حازم
ندى : مش عارفة انتِ كنتى فين كل ده
بسنت : كنت مع اصحابى مالك يا ندى فى ايه
ندى : مفيش حاجة يا بسبوسة ، عايزة تروحى ولا نقعد كمان شوية
بسنت : انا جيت استأذن منك اخرج مع اصحابى
ندى : تخرجى معاهم فين
بسنت : هنروح البلاجات (منطقة فى اسماعلية على القنال)
ندى : البلاجات !! اشمعنى
بسنت : عادى يعنى تغيير جو احنا كل يوم هنا
ندى : مش هغلس عليكي واقولك متروحيش بس توعدينى متتأخريش
بسنت : حاضر مش هتأخر
ندى : خدى بالك على نفسك
بسنت : حاضر (ومشيت)
(. فضلت ندى مع محمد فى النادى لحد ما خلص لعب .)
ندى : مش يالا بقى
محمد : كمان ثوية
ندى : لا كفاية كده يدوب نروح بس وعد هجيبك تانى
محمد : حاضر ماثى
(. خرجت ندى ومحمد من النادى ووقفوا تاكسى ، ندى نزلت من التاكسى ونزلت محمد ولقيت يوسف بيركن العربية قصادها بس هى تجاهلته رغم فرحتها الشديدة ، ونزل يوسف من العربية .)
يوسف : ندى يا ندى
محمد : ماما فى حد بينادى عليكي
(. بصت ندى وراها لقيت يوسف بيعدى الشارع وقفت مكانها مستنياه وبتحاول تخبى فرحتها .)
يوسف : اذيك يا ندى ، اذيك يا محمد
محمد : كويث
ندى : محمد استنانى عند مدخل العمارة يا حبيبي
محمد : حاضر (ومشى)
يوسف : عاملة ايه يا ندى
ندى بتلقائية : انت كنت فين كل ده قلقتنى عليك ، قصدى اممم قصدى كويسة الحمد لله وانت
(. ابتسم يوسف ابتسامه شديدة من فرحته بتلقائية ندى ، وندى اتحرجت جداً لانها عبرت عن اللى جواها وابتسامه يوسف سحرتها .)
يوسف : كان عندى شغل فى اسكندرية
ندى : هو انت بتشتغل ايه
يوسف : اممممم انا مهندس بشتغل مهندس
ندى : اوكى
يوسف : طيب بقولك ايه مش هنكمل كلامنا
ندى : مش هينفع دلوقتى
يوسف : ليه
ندى : عشان احنا لسه راجعين من النادى والمفروض محمد ياخد شور وينام
يوسف : طيب بعد ما ينام انزلى
ندى : اختى مش موجودة و مش هينفع اسيبه لوحده
يوسف : خلاص لما اختك تجى انزلى قابلينى اوكى
ندى : اوكى ان شاء الله
يوسف : لحظة واحدة (وراح عند عربيته وجاب منها قلم ورجع تانى)
يوسف (مسك ايد ندى وبدأ يكتب عليها رقمه) : لما اختك تجى كلمينى هجيلك فى المكان اللى تقولى عليه
ندى بتوتر واستغراب وخجل : كان ممكن تكتبه على الموبايل على فكرة
يوسف : معلش اصل انا لسه بدائى بتاع ورقة وقلم :)
ندى : قصدك ايد وقلم
يوسف : هستنى اتصالك عشان نتقابل
ندى : ان شاء الله
يوسف : النهاردة يا ندى ضرورى
ندى : ربنا يسهل ، عن اذنك (ومشيت ويوسف ركب عربيته ومشى)
محمد : هو مين ده يا ماما
ندى : هاا !! ده واحد قريب مايا صاحبتى
(. طلعت ندى نيمت محمد وفضلت تستنى فى بسنت بس دماغها مسافرة فى حتة تانية خالص ، عمالة تفكر فى يوسف ، عمالة تفتكر ملامحه ضحكته نظرته ليها طريقة كلامه واخيراً لمسة ايده اللى كانت كلها حنية ، فاقت ندى من شرودها على صوت موبايلها .)
ندى : اذيك يا مايا عامله ايه
مايا : الحمد لله وانتِ
ندى : بخير الحمد لله
مايا : مالك !! شكلى اتصلت فى وقت غير مناسب
ندى : بالعكس انتِ اتصلتى فى الوقت المناسب
مايا : خير حصل حاجة
ندى : حكتلها كل اللى حصل مع يوسف
مايا : لا بقى ده بتلكك
ندى : قصدك ايه
مايا : حوار القلم وكده
ندى : ما علينا انا دلوقتى اروح اقابله ولا لا
مايا : لا طبعاً روحى
ندى : مش المفروض اتقل شوية
مايا : تتقلى ايه بس مانتِ هببتى الدنيا
ندى : قصدك ايه
مايا : قصدى انك اتفضحتى قدامه ، ردود افعالك خانتك
ندى : قصدك لما قولتله انت فين
مايا : ايوة ده غير طبعاً نظراتك ليه
ندى : يعنى اروح
مايا : انا شايفة كده
ندى : طيب ممكن تجى معايا
مايا : اجى معاكى اعمل ايه
ندى : مش عارفة
مايا : ندى كلمى بسنت اختك خليها تجى واتصلى بـ يوسف وروحى قابليه
ندى : اوكى ماشى (وقفلوا)
(. اتصلت ندى بـ بسنت استعجلتها وجهزت نفسها وكلمت يوسف قالتله انها هتقابله فى الكافيه اللى بتقعد فيه دايماً ، نزلت ندى عشان توقف تاكسى بس لقيت يوسف قدامها بالعربية .)
يوسف : اركبى
ندى : لا مش هينفع
يوسف : اسمعى الكلام يالا
بعد ما ندى ركبت .............
يوسف : انا عديت على الكافيه وانا جاى ولقيته زحمة جداً وممكن يكون فيه حد هناك يعرف
ندى : امال هنقعد فين
يوسف : احنا ممكن نركن العربية فى اى مكان ونتكلم
ندى : لا طبعاً
يوسف : طيب بما انك من اسماعلية عندك مكان نروحه ميكونش زحمة
ندى : هو انت مش من اسماعلية
يوسف : لا انا بشتغل هنا بس
ندى : امال انت منين
يوسف : القاهرة
ندى : طيب
يوسف : ها هنروح فين
ندى : اطلع على اى كافيه مش مشكلة حتى لو زحمة
يوسف : وافرض فيه حد يعرفك شافك
ندى : انا مبعملش حاجة غلط احنا هنقعد نتكلم بكل احترام
يوسف بنظرة اعجاب شديدة : لا عجبتينى فعلاً ماشى يا ستى
*_____________________________________________**___________________________*
فى بيت رقية .......
رقية : مالك يا حازم
حازم : مفيش يا ماما
رقية : هتخبى على امك
حازم : متضغطيش عليا يا ماما
رقية : انت شوفت ندى النهاردة
حازم : ويارتنى ما شوفتها
رقية : حصل ايه ، لسه معاندة برضه
حازم : ياريتها على العند بس
رقية : امال
حازم : طلعت بتحب واحد تانى
رقية : أدهم ابن خالتها صح
حازم : لا واحد اسمه يوسف
رقية : يوسف مين
حازم : معرفش معرفش يا ماما
رقية : وانت عرفت ازاى
حازم : حكى لامه كل حاجة
رقية : وقولتلها احنا اخوات
حازم : امال كنت اقولها ايه لا والنبى انا بحبك
رقية : اهدى بس يا حازم وفهمنى انت ليه قولتلها كده اصلاً
حازم : عشان احافظ على بقايا كرامتى
رقية : بس انت بتحبها والحب مفيهوش كرامه
حازم : لما تبقى هى بتحبنى زى ما بحبها ساعتها ادوس على كرامتى عشانها لكن خلاص مبقاش فى سبب يخلينى ادوس على نفسى
رقية : حصل خير يا حبيبي وده فى النهاية نصيب
حازم : انا داخل انام
رقية : ربنا يريح بالك وقلبك يا حازم يا ابنى
*_____________________________________________**___________________________*
فى الكافيه المعتاد .....
يوسف : ها بقى كنتى عايزة تقولى ايه قبل ما اكلمك عن نفسى
ندى : انا كنت عايزة اقولك حاجة مهمة فى البداية لانها اساس كل حاجة وعايزة اقولك عليها قبل ما اعرف عنك حاجة
يوسف : طيب ماشى قولى
ندى : حكت لـ يوسف قصتها مع اخواتها
يوسف : دى حاجة تزيد احترامى ليك مش شايف فيها اى مشكلة
ندى : انت متخيل شكل حياتى هيبقى عامل ازاى
يوسف : ازاى
ندى : انا مش هينفع اتجوز دلوقتى وحتى لو اخواتى هيفضلوا فى رقبتى ورقبة اللى هرتبط بيه لحد ما كل واحد فيهم يتجوز ويستقر ويبقى مش محتاجنى انت فاهم
يوسف : اللى بعده
ندى : فى ايه
يوسف : فى ايه انتِ
ندى : حاساك كده مستهيف كلامى وبتتكلم ببرود
يوسف : بصى انا يا ندى انا فاهم وجهة نظرك بس انا عارف كل ده قبل ما اتكلم معاكى وفكرت فيه كويس واخترتك انتِ رغم اى حاجة
ندى مصدومة ومبرقة وساكته
يوسف : heeeey روحتى فين
ندى : انت قولت ايه
يوسف : انا شاريكي رغم اى ظروف او مستقبل غامض ومش عايز غيرك انتِ
ندى : طيب و.............
يوسف يقاطعها : واوعدك ان اخواتك هما اخواتى لا كمان هعتبرهم ولادى وعمرى ما هكون سبب فى تقصيرك ناحيتهم بل بالعكس هشجعك اكتر
ندى باعجاب شديد : انت ازاى
يوسف : هههههه يعنى ايه
ندى : انت بتجاوب على السؤال قبل ما اقوله
يوسف : عشان حاسس انتِ عايزة تقولى ايه وعارف بتفكرى فى ايه
ندى : امممم طيب مش هتعرفنى عليك اكتر
يوسف : بصى يا ستى انا عندى ٢٤ سنة من القاهرة بس بشتغل هنا ، بروح القاهرة كل فترة كده بس ان شاء الله السنة الجاية شغلى هيستقر فى القاهرة وبس
ندى : تمام
يوسف : عندى اخت اكبر منى دكتورة بيطرية متجوزة وعندها بنت وولد
ندى : اسمها ايه
يوسف : اختى اسمها فريدة واولادها يوسف وملك ومعنديش اخوات غيرها
ندى : ربنا يخليكوا لبعض
يوسف : تحبى تعرفى ايه تانى
ندى : انا من رأيى سيبنا احنا نعرف بعض لوحدنا
يوسف : احسن برضه
ندى : وانت مهندس ايه
يوسف : مهندس سيارات
ندى : ميكانيكى يعنى
يوسف : ههههههه ماشى يا ستى لو عيزانى ميكانيكى ابقى ميكانيكى ، قوليلي بقى ايه اكتر حاجة بتكرهيها
ندى : اممممم فى الصفات بكره الكدب جداً واستحالة اسامح فيه
يوسف : حتى الكدبة البيضا
ندى : الكدب ملوش الوان زى ماهو مالوش رجلين
يوسف : بس ممكن الواحد يكدب عشان يحافظ على شخص بيبحه
ندى : بتهيألى لا
يوسف : يعنى ايه
ندى : يعنى ازاى احافظ على واحد بحبه بالكدب
يوسف : عجبانى دماغك اوى سابقة سنك بمراحل
ندى : دى حاجة حلوة ولا وحشة
يوسف : حلوة جداً طبعاً
(. تبادلوا الاحاديث لفترة طويلة وبعد كده يوسف وصل ندى لبيتها .)
*_____________________________________________**___________________________*
فى خلال شهرين ........
- حازم بعيد تماماً عن ندى من اخر مرة اتكلموا
- رقية متغيرة من ندى عشان حازم
- ندى ويوسف قربوا من بعض جداً بس لسه كلامهم مفهوش كلام حب او رومانسية
- أدهم وحازم وبسنت ومحمد امتحنوا الترم الاول
- يوسف بدأ يشجع ندى على مذاكرتها وتربية اخواتها
*_____________________________________________**___________________________*
فى عربية يوسف ......
(. ندى خارجة من الدرس ويوسف كان مستنيها .)
يوسف : عملتى ايه
ندى : فى ايه
يوسف : مش قولتيلي عندك امتحان فى الدرس
ندى : اها حليت كويس بس المستر هيقولنا الدرجات الحصة الجاية
يوسف : تحبى تروحى فين
ندى : مش هينفع لازم اروح عشان محمد وبسنت الساعة بقت ٨
يوسف : طيب خلاص هروحك
تحت بيت ندى .......
ندى : مش عايز حاجة
يوسف : بحبك
(. ندى مصدومة ومبسوطة عشان اول مرة تسمعها منه .)
ندى : ايه
يوسف : بحبك واوى كمان
ندى : وانا كمـ.......... (وسكتت)
يوسف : كملى يا ندى خليكي تلقائية زى مانتِ
ندى : طيب بص الناحية التانية
يوسف : ليه هتغيري هدومك ولا ايه
ندى (بتخبط يوسف فى كتفه) : بطل قلة ادب ورخامه
يوسف : طيب ليه بجد
ندى : عشان بتكسف ابصلك
يوسف ؛ اهو (وحط ايده على وشه)
ندى : بحبك اوى (ونزلت من العربية)
يوسف (نزل وراها) : استنى يا هبلة
(. ومسكها من كتفها بس ندى بتبص فى الارض .)
يوسف (بيعرف وشها ليه) : بصيلى هنا ، ها بقى قولتى ايه
ندى : اللى سمعته
يوسف : مسمعتش كويس
ندى بخجل : قولت انى بحبك اوى
يوسف : وانا بعشقك (وباسها على دماغها) عارفة انا نفسى اخدك فى حضنى دلوقتى حالاً بس مش هينفع حرام
ندى : مش عارفة اقول ايه
يوسف : متقوليش اى حاجة يالا اطلعى قبل ما حد يشوفك وكلمينى بعد ما اخواتك يناموا (وباسها على جبينها)
ندى : حاضر (وطلعت)
__**__**__**__**___
(. طلعت ندى فوق وهى حاسة احاسيس كتيرة حلوة اوى ، بقت شايفة كل حاجة حلوة ، الدنيا بقت بالنسبة لها الوان ، بقت حاسة بامان اكتر وراحة اكتر وحاسة ان يوسف هو السبب اللى مخليها تكمل ، بقى حلمها الوحيد بعد انها تطمن على اخواتها هذ انها تتجوز يوسف وتعيش معاه باقى عمرها .)
__**__**__**__
يوسف لـ نفسه >> انا ازاى حبيتها الحب ده كله !! ازاى حاسس المشاعر دى كلها ناحيتها !! انا مقبلتش اى واحدة واثرت فيا وخلتنى اعشقها كده زى ندى ، ببرائتها وطفولتها خلتنى احبها واتعلق بيها ، يارب اجمعنى بها فى حلالك وصبرنى على المشاكل اللى هتقابلنى
*_____________________________________________**___________________________*
بعد كام يوم فى مستشفى المعادى العسكرى ........
شريف : خير يا دكتور رأفت (ظابط دكتور فى المستشفى وصديق لـ شريف)
رأفت : نتيجة التحاليل ظهرت
شريف : اللى انت كنت طلبتها منى
رأفت : اه
شريف : انا معرفتش اجى الفترة اللى فاتت انت عارف شغلنا
رأفت : اه طبعاً عارف
شريف : واتأكدت من اللى كنت شاكك فيه
رأفت : اه
شريف : وهتقولى عليه ولا ناوى تحتفظ بيه لنفسك
رأفت : لا اكيد طالما اتاكدت لازم اقولك
شريف : خير
رأفت :...........................
اشوفكم الحلقة الجاية
ارجو التقييم بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق