الحلقة الثالثة عشر
جزء من حلقة سابقة :
ندى : يعنى انا اعمل ايه دلوقتى واقول ايه لـ بابا
يوسف : مش عارف
ندى : يعنى ايه مش عارف ، هى كلمه وملهاش تانى هتجى تقابل بابا ولا لا
يوسف : ...........................
*_____________________________________________**___________________________*
يوسف : طيب سبينى افكر
ندى : تفكر !! شكراً (وقفلت الخط)
يوسف لنفسه >> ايه اللى انتِ هببتيه ده يا ندى ، مش وقته خالص ابوكى يعرف حاجة من اللى بينا ، اتصرف ازاى انا دلوقتى
__**__**__**__
(. قفلت ندى الخط فى وش يوسف وهى مذهولة ومصدومة وقعدت على كرسى فى البلكونة .)
ندى لنفسها >> ايه ده !! ممكن يكون يوسف بيضحك عليا !! مش ممكن مش قادرة اصدق ، انا عمرى ما جه فى دماغى اطلب منه يقابل بابا ولا الكلام ده بس مكنتش متوقعه انى يوم ما اطلب منه يكون ده رد فعله ، يااااارب يااارب ميكونش يوسف وحش ولا بيضحك عليا لانى مش قد الصدمه دى
__**__**__**__**__
(. شريف فى اوضة نومه سرحان ومخنوق ومصدوم ، قام وبص لـ صورة راندا .)
شريف لـ صورة راندا >> الظاهر كده يا راندا يا حبيبتى انى هجيلك قريب ويمكن دى الميزة الوحيدة فى مرضى ، والله انا مش معترض على قضاء ربنا وراضى بكل اللى كاتبه بس صعبان عليا العيال ، تفتكرى يا راندا هسيبهم لمين ، عارفة يا راندا انا صعبان عليا اوى ندى زى ما يكون الهم حالف ما يسيبها فى حالها ، ااااااه (بتنهيدة شقت صدره) يارب تولاهم
(. بعد حوالى ساعة خرج شريف من الاوضة عشان احساس الاكتئاب ميسيطرش عليه ولما خرج لقى ندى قاعدة فى البلكونة وشكلها مهمومه خالص .)
شريف : مالك يا ندوش
ندى : مفيش يا بابا
شريف : زعلانه منى
ندى : لا بس ....... (وسكتت)
شريف : مالك يا بنتى طمنينى عليكي
ندى : حكت لابوها اللى حصل مع يوسف
شريف بحزن : حصل خير يا ندى ميستاهلش انك تزعلى عليه
ندى : انا اتصدمت اوى يا بابا مكنتش متخيلة ان ده رد فعله
شريف : كان المفروض تقولى لى يا ندى بس يالا اللى حصل حصل محدش بيتعلم بالساهل
(. هنا جرس الباب رن .)
شريف : هروح اشوف مين وانتِ قومى اغسلى وشك وريحي شوية
ندى : حاضر يا بابا (وقامت)
(. فتح شريف الباب .)
يوسف : مساء الخير
شريف : مساء النور
يوسف : حضرتك العميد شريف صح ولا انا غلطان فى العنوان
شريف : ايوة انا مين حضرتك
يوسف : انا يوسف امام
شريف : اااااه يوسف اتفضل يا ابنى
يوسف : متشكر جداً
بعد ما دخل وقعد .........
شريف : دى ندى قالتلى انك مش جاى
يوسف : انا قولتلها ادينى فرصة افكر لقيت الخط بيتقفل فى وشى
شريف : حصل خير ، تحب تشرب ايه
يوسف : لا متشكر
شريف : ازاى ده واجب الضيافة عن اذنك
(. وقام شريف وطلب من ندى تعمل عصير بس معرفهاش ان يوسف هو اللى بره .)
بعد ما جابوا العصير ..........
يوسف : انا عارف ان كان المفروض اجى اقابل حضرتك قبل ما اتكلم مع ندى بس ندى صغيرة جداً وكنت مستنى لحد ما تخلص تالته ثانوى
شريف : تمام
يوسف : ياريت حضرتك تفهم وجهة نظرى ومتاخدش عنى فكرة غلط كل الحكاية انى ..........
شريف يقاطعه : انا فاهم وجهة نظرك جداً وخلاص مش زعلان يعنى كونك تجى تقابلنى فى نفس اليوم اللى اطلب فيه منك تقابلنى ده فى حد ذاته يثبتلى انك راجل
يوسف : طيب الحمد لله
شريف : انا معنديش مانع انك تخطب ندى قبل ما تخلص تالته ثانوى
يوسف : بجد يا افندم
شريف : اه على الاقل قراءة فاتحة بس طبعاً مش قبل ما اسأل عليك
يوسف : انا من القاهرة وعندى ٢٤ سنة
شريف : تمام
(. فضل شريف ويوسف يتكلموا مع بعض فترة طويلة ، شرح فيها يوسف ان لسه متكلمش مع اهله عن ندى وانه اول ما يتكلم معاها هيجي عشان يتقدم ، واتكلموا عن شغل يوسف وشريف قاله انه اول ما يسأل عنه هيرد عليه وتبادلوا ارقام الموبايلات .)
يوسف : استأذن انا بقى
شريف : اوكى يا يوسف وان شاء الله هنبقى على اتصال مع بعض
يوسف : ان شاء الله
(. مشى يوسف واول ما نزل بعت رساله لـ ندى قال فيها >> على فكرة حبيبك راجل اوى << .)
ندى لنفسها >> كده وراجل يا يوسف اخص عليك فعلاً
(. هنا دخل عليها شريف .)
شريف : بتعملى ايه
ندى : بذاكر شوية
شريف : مكشرة ليه
ندى : عادى بقى
شريف : انتِ عارفة مين كان معايا بره
ندى : لا ، مين ؟
شريف : عريس متقدملك
ندى باستغراب : نعم !!!
شريف : اه حتى اسمه يوسف امام
ندى (بفرحة شديدة معرفتش تخبيها) : يوسف !! بجد يا بابا بجد يوسف كان هنا
شريف : اه بجد
ندى : وقالك ايه اتكلمتوا فى ايه
شريف : اتكلمنا فى كل حاجة وقولتله انى معنديش مانع تتخطبوا
ندى : نتخطب
شريف : اه ولا انتِ مش عايزة
ندى بتلقائية : لا طبعاً عايزة ، اممم قصدى اللى تشوفه يا بابا
شريف : هههههه ماشى يا حبيبة بابا انا هسأل عليه وهنشوف الدنيا فيها ايه
ندى : ان شاء الله خير
شريف : انا هنزل اروح لـ عمتك رقية
ندى : ماشى يا بابا
(. خرج شريف واتصلت ندى بـ يوسف بس لقيت موبايله مقفول فـ بعتتله رسالة قالت فيها >> بحبك اوى يا ارجل راجل فى الدنيا << .)
*_____________________________________________**___________________________*
فى بيت رقية ....
رقية : واخبار ندى ايه
شريف : كويسة الحمد لله كلهم بخير
رقية : ويا ترى انت عارف هى بتروح فين وبتجى منين
شريف : انا واثق فيها وهى واخدة منى تصريح تعمل اللى هى عيزاه طالما واثقة انه صح
رقية : والله !!
شريف : فى ايه يا رقية
رقية : مفيش بس خد بالك منها
شريف : انتِ عارفة انا مبحبش اللف والدوران قولى على طول فى ايه
رقية : هو من الصح ان بنتك تخرج مع واحد غريب منعرفش عنه حاجة ، من الصح ان بنتك تعمل غراميات من وراك
شريف : ومين قالك انه من ورايا
رقية بخضة : يعنى انت عارف
شريف : اه عارف وعارف يوسف كويس
رقية : انت ازاى تسكت على المسخرة دى
شريف : بنتى مبتعملش مسخرة وانا واثق من اخلاقها والحب عمره ما كان عيب او حرام طالما فى حدود
رقية : طيب وحازم ابنى يا شريف
شريف : انا عارف ان حقك تزعلى منى عشان حازم بس قلب ندى بايد اللى خلقها يا رقية مش بايدي
رقية : بس جوازها بايدك
شريف : ترضى لابنك يتجوز واحدة قلبها متعلق بغيره
(. هنا جه حازم .)
حازم : اذيك يا خالو
شريف : اهلاً بالباش مهندس اخبارك ايه
حازم : كويس الحمد لله
رقية : متقلقش على ندى يا حازم ابوها طلع عارف بـ الموضوع اللى قولتلى عليه
حازم باستغراب : عارف !! وساكت يا خالو
شريف : وفيها ايه الشاب كويس وشارى ندى وندى كمان عيزاه
حازم : بس الشخص ده مجهول مفيش حد فى اسماعلية كلها يعرف عنه حاجة
شريف : كفاية انا عارف
حازم : يا خالو ده بيقول انه مهندس سيارات وبيشتغل فى شركة رغم ان .............
شريف يقاطعه : وانت مين قالك انه مهندس سيارات
حازم : انا لما سألت عنه مقدرتش اوصل الا لاسمه ووظيفته ، ووظيفته دى تشكك اى حد
شريف : والله الرجل اتقدملى لسه هسأل عنه ونشوف
حازم : براحتك طبعاً يا خالو بس ازاى مهندس سيارات وبيشتغل فى اسماعليه واسماعليه كلها مفهاش شركة لـ هندسة السيارات
شريف : طيب انا اتأخرت يدوب اقوم اروح تصبحوا على خير
رقية : انت اجازتك قد ايه
شريف : لسه مش عارف انا قاعد شوية
رقية : طيب ابقى تعالى تانى
شريف : ان شاء الله (ومشى)
رقية لـ حازم >> الظاهر انه اتصدم لما عرف بموضوع شغله ده
حازم : اراهنك ان الواد ده صايع ولا له اصل ولا فصل ولا حتى وظيفة وهيطلع فى الاخر بيشتغل ندى وخالى
رقية : خليهم يشربوا نتيجة عِندهم
*_____________________________________________**___________________________*
بــعــد تلت ايام ......
(. ندى بتتصل بـ يوسف من يومها لاما موبايله مقفول لاما مبيردش ، لكنه النهاردة رد .)
ندى : اخيراً يا استاذ يوسف
يوسف : فى ايه يا استاذة ندى
ندى : فيه انى بتصل بيك من تلت ايام وانت مبتردش
يوسف : مقموص
ندى : مانت اللى استفذتنى
يوسف : تقومى تقفلى السكة فى وشى
ندى : امال عايزنى اعمل ايه وانت بتقولى هفكر
يوسف : تتناقشى معايا مش تقفلى الخط
ندى : طيب وحشتنى اوى
يوسف : لا زعلان
ندى : بحبك
يوسف : متحاوليش انا زعلان
ندى : بحبك بحبك بحبك بحبك بحبك بحبك
يوسف : معنديش مانع
ندى : بطل بواخة بقى والله وحشتنى اوى
يوسف : وانتِ كمان وحشتينى يا هبلة
ندى : انا هبلة يا جو
يوسف : احلى هبلة فى الدنيا
ندى : طيب عايزة اشوفك
يوسف : انا فى القاهرة يا حبيبتى
ندى : ايه ده من غير ما تقولى
يوسف : استأذن يعنى ههههههه
ندى : لا مقصدش بس تسافر كده من غير ما اعرف
يوسف : اهو اللى حصل يا حبيبتى وعموماً انا جاى اخر الاسبوع
ندى : تجى بالسلامه يا حبييى
يوسف : انا هتكلم مع اهلى النهاردة ان شاء الله
ندى : ان شاء الله يا حبيبي متنساش تقولى حصل ايه
يوسف : اكيد يالا بقى روحى ذاكرى شوية
ندى : حاضر (وقفلوا)
__**__**__**__**__
فى بيت اهل يـــوســـف .........
لبنى (ام يوسف) : بتكلم مين كده
يوسف : انتِ بتجسسى عليا يا بلبله
لبنى : بلبلة !! يبقى عايز تقول حاجة
يوسف : عايز اخطب
لبنى : بجد والله يا يوسف
يوسف : اه بجد
لبنى : ده انا نفسى ازغرط اخيراً احكيلي بقى كل حاجة
يوسف : هى بنوتة من اسماعلية عرفتها هناك ، ابوها عميد فى الجيش
لبنى : ما شاء الله وامها
يوسف : امها متوفية
لبنى : ربنا يرحمها وهى بتشتغل ايه
يوسف : لا دى لسه بتدرس
لبنى : كويس يعنى لسه صغيرة وبتدرس ايه بقى طب ولا صيدلة
يوسف بصوت واطى >> هههه طب ولا صيدلة ده انتِ طموحة اوى
لبنى : بتقول ايه يا واد انت
يوسف : مبقولش بس هى لسه فى تالته ثانوى
لبنى : وحياة امك !!
يوسف : ايه يا حجة ده
لبنى : تالته ثانوى ايه اللى تخطبها دى عيلة هتاخدها تربيها
يوسف : لا يا ماما ندى مش عيلة ولا حاجة دى دماغها كبيرة جداً
لبنى : انت مفروض تتجوز واحدة تشيل مسئولية بيت واسره مش واحدة تشيل انت مسئولية تربيتها
يوسف : يا ماما ندى مختلفه عن اى بنت فى سنها لانها هى اللى ربت اخواتها
لبنى : افندم
يوسف : انا هحكيلك ( وحكى لها قصة ندى )
لبنى : انت اتجننت يا يوسف هتتجوز واحدة مُعقدة
يوسف : ايه اللى عقدها بس يا ماما
لبنى : لما واحدة تشيل الهم بدرى يبقى شالت العقد بدرى
يوسف : بس انا بحبها
لبنى : حبك برص ، انت كانك متجوز واحدة بعيالها
يوسف : ماهو ابوهم موجود
لبنى : ابوهم مش هيعيش العمر كله وفى النهاية المسئولية دى انت اللى هتشيلها
يوسف : مفيش مشكلة
لبنى : لا بقى ده انت فعلاً اتجننت وبعدين ابوك اصلاً استحالة يوافق على الجوازة دى
يوسف : انا اللى هتجوز على فكرة وانا اصلاً مش صغير وقد قرارى وهتحمل نتيجته اياً كانت
لبنى : انا قولت اللى عندى الجوازة دى مش هوافق عليها عندك بقى ابوك اتصرف معاه
يوسف : ماشى بس لعلمك انا بحب ندى ومش هتجوز غير ندى
لبنى : ماليش دعوة (ووقامت)
*_____________________________________________**___________________________*
بعد مرور اسبوعين .......
- اهل يوسف رفضوا جوازة ندى ويوسف رجع اسماعلية
- ندى ويوسف على اتصال بعلم شريف
- شريف قدم شهادات طبية تفيد بانه مريض سرطان عشان استقالته تتقبل
- حازم لسه بيدور ورا يوسف بس مش عارف يوصل لحاجة
- رقية واخدة موقف من ندى وشريف
- رانيا سافرت الامارات
*_____________________________________________**___________________________*
فى مستشفى المعادى العسكرى ........
حسين : اخبار الاستقالة ايه
شريف : اتقبلت طلعت معاش مبكر
حسين : معلش قضاء الله
شريف ونعمَ بالله
حسين : هنبدأ العلاج امتى
شريف : انا عايز اعرف ايه نظام العلاج ده
حسين : دى جلسات كيماوى هنبدأ بـ جلسة فى الاسبوع وبعد كده جلستين
شريف : يعنى هقعد فى المستشفى قد ايه
حسين : هيبقى يومين بالكتير فى الاسبوع
شريف : ينفع اخد العلاج فى المركز الطبى العالمى
حسين : هنا كويس
شريف : لا المركز الطبى اقرب لـ اسماعلية من هنا
حسين : اه فهمت اوكى مفيش مشكلة وهو برضه تبع القوات المسلحة
شريف : تمام ، بس انا مش هيبقى معايا حد
حسين : ازاى بس لازم يكون معاك اى حد
شريف : انا زوجتى متوفية واولادى صغيرين
حسين : هو الممرضات هيعاملوك احسن معامله بس يستحسن يكون مع حضرتك حد من اهلك
شريف : خلاص ربنا يسهل ، انا هطلع من هنا على المركز الطبى وهتابع مع حضرتك برضه
حسين : الف سلامه وربنا يتمم شفاك على خير
شريف : متشكر جداً يا دكتور (ومشى)
*_____________________________________________**___________________________*
فى بيت رقية .....
شريف : متزعليش منى يا رقية
رقية : دى بنتك وانت حر فيها
شريف : رقية انا محتاجلك جداً
رقية : ربنا ما يحوجك ليا ولا لغيري
شريف : بس انا فعلاً محتاجلك
رقية : خير يا شريف
شريف : انا عيان
رقية : خير يا اخويا مالك
شريف : انا عندى سرطان فى المخ
رقية برهبة وخوف : يالهوووى سرطان
شريف : وطى صوتك
رقية دموعها نزلت منها ومقدرتش تتكلم
شريف : بطلى عياط انا راضى بقضاء ربنا ومش زعلان ، انا هبدأ علاج من بكرة ان شاء الله بس لازم يكون حد معايا ياخد باله منى وانا مش عايز اعرف ندى
رقية : انا معاك يا اخويا وافديم بروحى
شريف : ربنا يخليكي يا رقية ، المفروض انى استاقلت من الشغل بس انا فهمت ندى ان شغلى يومين بس فى الاسبوع عشان جيت هنا اسماعلية
رقية : متخفش يا حبيبي مش هعرفها حاجة
شريف : طيب بطلى عياط بقى
رقية (قامت حضنته) : ربنا يشفيك يا حبيبي ويخليك لـ اولادك
شريف : يارب
*_____________________________________________**___________________________*
فى احدى النوادى ........
يوسف : خير يا عمى
شريف : متقلقش عايز اتكلم معاك فى موضوع مهم
يوسف : اتفضل
شريف : بس زى ما اتفقنا ندى متعرفش انى شوفتك
يوسف : اكيد
شريف : حكى لـ يوسف حكاية مرضه
يوسف : لا اله الا الله ، ان شاء الله العلاج يجيب نتيجة وتقوم بالسلامه
شريف : بس فى احتمال انى ربنا يفتكرنى وده اللى خلانى اتكلم معاك دلوقتى
يوسف : مش فاهم
شريف : يعنى لو اتجوزت ندى وانا مُت فاكيد ندى مش هتسيب اخواتها لانهم اصلاً مالهمش غيرها بعدى وده معناه ان هيكون عليك عبء زيادة ، انا قولتلك قبل اى خطوة رسمى عشان تفكر وتاخد قرارك وصدقنى انا فى كل الاحوال مقدر موقفك ومش هزعل
يوسف : ايه اللى حضرتك بتقوله ده يا عمى انت بتكلم راجل
شريف : حتى لو قررت انك تبعد فده ميقللش من رجولتك
يوسف : ندى واخواتها فى عيونى وانا عمرى ما هسيب ندى
شريف : فكر
يوسف : انا مبقولش كده عشان مُحرج او مُتعاطف انا بقول كده لانى فعلاً مستعد ومش هبعد عن ندى لانى بحبها
شريف : طيب عايزين نتمم الخطوبة والجواز بدرى بدرى يا عالم انا هفضل معاكوا لوقت طويل ولا لا
يوسف : العمر كله ليك ان شاء اللن بس للاسف انا اهلى معترضين عشان ندى لسه صغيرة بس انا متمسك بـ ندى ومش هسيبها وان شاء الله هقنعهم فى اقرب وقت
شريف : هو حقهم طبعاً ندى فى نظرهم عيلة
يوسف : هما مالهمش غيرى واكيد هيوافقوا انا واثق
شريف : ان شاء الله ، حاجة كمان
يوسف : اتفضل
شريف : انا واققت انك تكلم ندى ويبقى ارتباطكم قدامى لـ كذا سبب ، اولهم عشان متتكلموش من ورايا وثانيهم انك راجل وهبقى مطمن على ندى معاك وثالثهم بقى ان ندى اتغيرت للاحسن معاك
يوسف : ثقتك فيا دى شرف ووسام على صدرى وعمرى ما هخونها ان شاء الله
شريف : طلب اخير وارجو انك تنفذه
يوسف : اتفضل طبعاً
شريف : السر اللى انت قولته ليا لازم ندى تعرفه
يوسف : ايوة بس ..........
شريف يقاطعه : مفيش بس لازم تعرف عشان كل ما اتأخرت فى المصارحة كل ما ده عمل مشكلة بينكم
يوسف : خلاص هقولها النهاردة
شريف : تمام انا هروح وخلينا على اتصال
يوسف : ان شاء الله
(. مشى شريف واتصل يوسف بـ ندى عشان تنزل تقابله .)
بـعـد ما ندى جت ......
يوسف : انتِ عارفة انا بحبك قد ايه
ندى : اه طبعاً عارفة
يوسف : طيب لو انا كدبت عليك هتسامحينى
ندى : وانت كدبت عليا فى ايه
يوسف : لا انا مكدبتش فى حاجة
ندى : فى ايه يا يوسف
يوسف : بصى انا مخبى عليكي حاجة وحاجة مهمة
ندى : مخبى عليا !!! هو ايه ده اللى انت مخبيه
يوسف : مش هقولك الا لما توعدينى انك هتسامحينى ومش هتزعلى
ندى : مقدرش اوعد بحاجة مجهوله
يوسف : طيب حاولى على الاقل تتفهمى الموضوع وتفكرى فيه بـ عقلك وتحكميه ومتزعليش منى وبلاش نخسر بعض على حاجة تافهة
ندى : حاضر هحاول اتفضل اتكلم بقى عشان قلقت
يوسف : ....................................
اشوفكم الحلقة الجاية
ارجو التقييم بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
روعه جدااااااا
ردحذف