أم قاصرة (الحلقة الثامنة)

الحلقة الثامنة

جزء من حلقة سابقة :

(. دخلت ندى تلبس محمد ، فـ الجرس ضرب .)

ندى : مودى حبيبي خليك لحد ما اروح افتح الباب

محمد : حاضر يا ماما

(. ندى وقفت فى مكانها بعد ما سمعت الكلمه دى من محمد ورجعت حضنته وباسته وبعد كده راحت فتحت الباب .)

ندى : ......................

*_____________________________________________**___________________________*

ندى : بابا وحشتنى اوى (وحضنته)

شريف : وانتِ وحشتينى اكتر يا حبيبة بابا ، ايه ده انتوا كنتوا بره

ندى : لا احنا كنا لسه هنخرج يا محمد يا بسنت تعالوا بابا جه

محمد : مث هعرف اجى يا ماما انا مث لابث

ندى : انا نسيت ان محمد مخلصش لبسه هروح اكمله لبسه يا بابا عن اذنك (ومشيت)

بسنت (جريت على ابوها) : بابا اخيراً شوفتك وحشتنى اوى

شريف : وانتِ كمان يا حبيبتى عامله ايه

بسنت : كويسة الحمد لله

شريف : قوليلى يا بسنت قبل ما ندى تجى

بسنت  : اقولك ايه يا بابا

شريف : مين بيسأل عليكوا وانا مش موجود

بسنت : مفيش الا خالتو رانيا وعمتو رقية وطبعاً عمو فؤاد جوز عمتو وولادهم بس كده

شريف : وعمتك سمية وعمك مصطفى مفيش حد فيهم بيسأل

بسنت : انا مش فاكرة اصلاً اخر مرة شوفتهم كانت امتى بس عرفت ان عمتى سمية سافروا القاهرة وقعدوا هناك على طول

شريف : ولا حتى بيتصلوا

بسنت : ماظنش

(. هنا ندى جت ومحمد راح جرى على حضن ابوه .)

محمد : كل ته يا بابا متجيش عندنا

شريف : معلش يا حبيبى ماهو ده عشان شغلى

محمد : ليه انت بتفضل هناك واثحابى كلهم بابهتهم بيروحوا البيت فى الاخر

شريف : يا حبيبي انا شغلى مختلف

محمد : متخلف ازاى ؟

شريف : هههههههه متخلف ايه بس بص انت بكرة ان شاء الله هتكبر وهتفهم 

محمد : هى كل حاجة هتحثل لما اكبر

شريف : ايوة عشان كده لامم تاكل كويس وتسمع كلام ندى عشان تكبر بسرعة

محمد : حاضر

شريف : يالا يا ندى خدى اخواتك وروحوا اتفسحوا

ندى : نروح فين يا بابا احنا هنقعد مع حضرتك

شريف : يالا روحوا قضوا يومكم وانا هريح شوية

ندى : لا طبعاً  ، تحبوا تخرجوا ولا نقعد مع بابا

بسنت ومحمد : لا طبعاً نقعد مع بابا

شريف : طيب تعالوا نقعد قدام التلفزيون شوية

ندى : طيب يا بابا ما تدخل تنام شوية

شريف : لا مش عايز هقعد معاكم

ندى : طيب وانا هدخل اعملكم حاجه حلوة ناكلها

شريف : ايه ده يا ندى انتِ بتعرفى تعملى حلويات

محمد : ماما ندى بتعمل حاجات حلوة كتيرة اوووى

شريف لنفسه >> ماما !!!

ندى : اتعلمت من النت يا بابا (ودخلت)

شريف : هو انت بتقول لـ ندى يا ماما

محمد : اه 

شريف : اشمعنى

محمد : مش هى لما ماما راحت عند ربنا سابت ندى مكانها تبقى ندى ماما

شريف : ربنا يخلى لنا ندى

(. فضل شريف وولاده قاعدين مع بعض لحد وقت متأخر ولما ناموا ولاده دخل هو كمان اوضته وقعد قدام صورته هو وراندا وكعادته كلمها وافتكر ذكرياتهم سوا .)

                                                       **_** Flash Back **_**

راندا : هو انا لو مُت هتجوز بعدى

شريف : بعد الشر عليكي ليه بتقولى كده

راندا : عادى جه فى دماغى

شريف : طيب انا اللى المفروض اسأل السؤال ده 

راندا : اشمعنى بقى

شريف : عشان انا حياتى دايماً مُعرضة للخطر ولما بخرج من البيت بيكون عندى يقين انى ممكن مرجعش تانى

راندا : ربنا يخليك لينا احنا منقدرش نعيش من غيرك

شريف : وانا كمان مقدرش اعيش من غيرك وعشان كده متقوليش الكلام ده

راندا : دى مجرد افكار عادى يعنى

شريف : طيب اطردى الافكار الوحشة دى من دماغك

راندا : طيب جاوبنى المرة دى ومش هفتحه تانى

شريف : راندا يا حبيبتى انا عمرى ما اقدر اعيش مع ست غيرك خالص وعمرى ما هتجوز غيرك

راندا : رب يخليك ليا يا شريف 

شريف : وميحرمنيش منك ابداً 

__**__**__**__

شريف لنفسه >> ربنا يحرمك يا راندا وحشتينى اوى ، الحياة من غيرك وحشة اوى وملهاش معنى ولا طعم ومش مصبرنى عليها الا ولادنا عشان هما حتة منك ، عارفة يا راندا ندى نسخة منك فى كل حاجة الشكل الضحكة طريقة الكلام والتفكير ، حنيتك وطيبتك وقلبك الكبير ، ربنا يباركلنا فيها ، تصبحى على خير يا حبيبتى

*_____________________________________________**___________________________*

تانى يوم الصبح ....

(. صحى شريف من النوم وراح بيت اخوه مصطفى .)

فـى بيت مصطفى ...

مصطفى : عاش من شافك يا شريف يا اخويا

شريف : اذيك يا مصطفى 

مصطفى : الحمد لله وانت ايه اخبارك واخبار ولادك

شريف : ولادى !! بتسألنى عن ولادى اللى عايشين معاك فى عمارة واحدة

مصطفى : يعنى بلاش اسألك عليهم

شريف : على الاقل اسأل عليهم فى غيابى

مصطفى : انا عمرى ما قصرت مع ولادك بس ساعات بتلهى عنهم

شريف : واخر مرة شوفتهم او سألت عنهم كان امتى بقى

مصطفى : الاسبوع اللى فات 

شريف (وقام وراح ناحية الباب) : الاسبوع اللى فات ولادى كانوا فى العريش مع اختك رقية ومتشكر جداً يا اخويا على اهتمامك باولادى (وخرج)

مصطفى لنفسه >> ولادك !! انا بكرهك انت وولادك مش كفاية ابويا اتجوز امك على امى

                                                       **_** Flash Back **_**

محمد(ابو شريف) : طيب انا اعملك ايه جبتلك كل الوسايط عشان ادخلك كلية الشرطة ومتقبلتش وحظ شريف انه يقبل فى الحربية

مصطفى : اشمعنى بقى شريف يتقبل فى الحربية وانا لا

محمد : عشان كان مجموعك ضايع والواسطة قالت احنا ممكن نعمله اى حاجه بس مش هتقدر نخدمكم فى المجموع

مصطفى : يبقى شريف ميدخلش حربية

محمد : انت مجنون يا ابنى هو عشان انت مدخلتش يبقى تحرمها على غيرك

مصطفى : انت اشمعنى بتفضل شريف عليا فى كل حاجة

محمد : انا مبفضلش حد على حد بعاملكم انتوا الاربعة زى بعض

مصطفى : وعشان كده اتجوزت بعد ما امى ماتت وجبتلنا مرات اب

محمد : مرات الاب دى ربتك انت واختك احسن تربية

مصطفى : بس كنت بتحبها اكتر من امى

محمد : يا ابنى فوق بقى امك ماتت واتجوزت بعد موتها بـ اربع سنين ، انت بس اللى عايز تبرر غيرتك من اخوك

مصطفى : انا مبغيرش منه

محمد : لا بتغير بدليل انك غيران انه دخل حربية

مصطفى : عشان ده كان حلمى

محمد : وده نصيب ، نصيبه هو يدخل كلية حربية وانت تترفض فى الشرطة

__**__**__**__**__

مصطفى لنفسه >> الله يرحمك بقى يا ابويا حتى راندا بنت عمى بعد ما قولت هجوزهالك جوزتها لـ شريف

*_____________________________________________**___________________________*

بعد مرور شهرين ......

- كانت الاجازة خلصت وكلهم رجعوا دراستهم

- يوسف مظهرش لـ ندى  بعد مقابلته مع مايا

- مصطفى بيحاول يضغط على نفسه ويسأل على اولاد اخوه

- رانيا وادهم رجعوا من الامارات

*_____________________________________________**___________________________*

فى بيت رانيا ....

رقية : حمد الله على سلامتكم والله ليكوا وحشة

رانيا : انتِ اكتر والله يا رقية وكتر خيرك انك جيتى

رقية : متقوليش كده احنا اخوات

رانيا : ربنا يخليكي يا حبيبتى وولادك عاملين ايه

رقية : الحمد لله حازم نجح بتقدير جيد جداً وحمزة جاب ٩٤٪ 

رانيا : الف مبروك ربنا يباركلك فيهم

رقية : يارب وادهم عامل ايه

رانيا : كويس الحمد لله ان شاء الله يخلص بقى كليته ونروح كلنا نقعد فى الامارات بعد ما نخطبله ان شاء الله

رقية : انت هتخطبى لـ ادهم

رانيا : امال

رقية : قصدى بدرى كده

رانيا : مانتِ عارفة انى ماليش غيره وعايزة افرح بيه وبخلفته

رقية : ربنا يخليهولك يارب وهو فى دماغه حد معين ولا انتِ هتختاريله

رانيا : لسه مش عارفة يا رقية والله بس انا نفسى اخطبله ندى بنت اختى

رقية : ندى !!

رانيا : اه احنا اولى ببعض ولا انتِ ايه رأيك

رقية : مش موضوع مين اولى المهم يبقوا الاولاد عايزين بعض

رانيا : ان شاء الله ادعى انتِ كده بس

رقية : ربنا يعملهم اللى فيه الخير ان شاء الله (ومشيت)

*_____________________________________________**___________________________*

فى بيت ندى .......

ندى : يالا يا مودى بقى عشان تلبس

محمد : مث هلبث الا لو جيتى معايا المدرثة

ندى : يا حبيبى انت دوقتى فى اولى ابتدائى يعنى راجل كبير مينفعش حد يروح معاك

محمد : مانا هروح مكان جديد معرفش حد فيه

ندى : لا يا حبيبى اللى كانوا معاك فى الحضانه هيكونوا معاك برضه فى المدرسة عشان انتوا فى مدرسة واحدة

محمد : بث برضه انا ..........

ندى تقاطعه : عشان خاطر ماما ندى البس وروح المدرسة

محمد : حاضر يا ماما عثان خاطرك

ندى : تسلملى يا حبيبي (وباسته)

محمد : تثلميلى 

ندى : هههههههه اه صحيح انت المفروض كبرت وروحت المدرسة مش المفروض بقى تنطق حروفك صح

محمد : ثح ازاى

ندى : هبقى اعلمك يا حبيبي

محمد : ماثى

ندى : يالا انجز بقى عشان الباص زمانه جاى

(. بعد ما محمد وبسنت نزلوا راحوا المدرسة .)

ندى لنفسها >> يدوب البس انا كمان عشان الحق مدرستى

(. دخلت ندى تلبس وهى بتسرح شعرها افتكرت امها لما كانت كل يوم الصبح بتسرحلها شعرها .)

ندى لصورة امها >> وحشتينى اوى يا ماما ، انا تعبت اوى يا ماما من المسئولية دى واخواتى كل يوم مسئوليتهم بتزيد وبتكبر وبتبقى متعبة اوى بس انا يا ماما مستحمله عشان خاطرك وعشان بقيت حاسة انهم اولادى فعلاً محمد وبسنت اولادى لانى حبى لهم اختلف عن زمان لما كنتى موجودة يا ماما ، متخافيش يا ماما مش هسيب اخواتى الا لما يتجوزوا ويبقى لهم حياتهم ويبقوا مش محتاجنى ، اوعدك يا ماما

*_____________________________________________**___________________________*

فـى مدرسة ندى .....

هايدى : اخيراً شوفتك يا ندى وحشانى يا بنتى فينك

ندى : مانتِ عارفة انى مبجيش المدرسة

مايا : اه صحيح جيتى ليه النهاردة

ندى : جيت لـ خالك وكمان النهاردة اول يوم قولت اجى 

مايا : خير عايزة خالو فى ايه

ندى : مفيش هسأله اذا كان هيرفعلى الغياب السنة دى ولا لا

هايدي : اه صحيح اخبار يوسف ايه ;)

ندى : يوسف مين

هايدى : يوسف يا بنتى (خبطتها مايا فى ايدها)

ندى : فى ايه

مايا : مفيش حاجة يا ندى اطلعى انتِ لـ خالو قبل الفسحة ما تخلص

ندى : اوكى يا بنات اشوفكم فى درس العربى بقى (ومشيت)

هايدى : فى ايه يا مايا 

مايا : فى ايه انتِ ايه خلاكى تجيبي سيرة يوسف

هايدى : مش انتِ اللى قولتيلى انه مُعجب بيها وجه اتكلم معاكى

مايا : ايوة بس هى متعرفش

هايدي : انتِ مقولتلهاش ؟؟

مايا : لا طبعاً ومتعرفش اى حاجة من الكلام اللى حصل بينى وبين يوسف

هايدى : ليه كده

مايا : اهو كده وخلاص

هايدى : فى ايه يا مايا انتِ مخبية عليا ايه

مايا : مش مخبية حاجة

هايدى : انتِ ارتبطتى بـ يوسف 

مايا : لا طبعاً

هايدى : طيب حبيتيه او ليه مش عايزة تعرفى ندى انه جه اتكلم معاكى وسأل عليها

مايا : ...........................

اشوفكم الحلقة الجاية

ارجو التقييم بـ تعليق

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)