نص ساعة (الثالثة عشر)

 

 

 

 

الحلقة الثالثة عشر

 

تانى يوم فى شركة وائل ودياب ....

(. دياب كان فى الحمام ووائل خد باله ان دياب ساب مكتبه , قام وائل ودخل اوضة مكتب دياب , مسك موبايله اللى كان سايبه على المكتب وشايل الباسوورد من عليه , دخل وائل ومسك الموبايل وفتحه وكتب رقم ولاء اخته , جه دياب من الحمام لقى وائل ماسك الموبايل , وقف دياب عند باب اوضة المكتب ومدخلش وفضل يبص لـ وائل ووائل بيبدل نظراته بين شاشة الموبايل وبين دياب .)

دياب : فى حاجه

وائل بارتباك : لـ لا , لا مفيش حاجه

دياب بيدخل : كنت عايز موبايلى فى حاجه ؟

وائل : لا انا كنت بكلم واحد صاحبى وفصل شحن فجيت اكلمه من عندك , معلش مستأذنتكش

دياب : لا يا معلم ولا يهمك انا وانت واحد

وائل : تسلم يا برنس

(. وخرج وائل من مكتب دياب وهو مكسوف من الموقف اللى اتحط فيه خاصة انه ملاقش رقم اخته على موبايل دياب , اما دياب قعد على مكتبه وفكر شوية مع نفسه واتأكد ان وائل شاكك فيه , طلع من جيبه موبايل تانى بـ رقم مختلف جايبه مخصوص عشان يكلم ولاء منه , واتصل بـ ولاء .)

دياب : ايوة يا ولاء

ولاء : ايوه يا حبيبي وحشتنى اوى

دياب : وانتِ كمان وحشانى , (بصوت هامس) , بصي امسحى رقمى من الاسماء والسجل عندك واى رسايل او شات واتس اب امسحيه

ولاء : ليه ؟

دياب : اعملى اللى بقولك عليه وبعدين هفهمك

ولاء : اوكى حاضر

(. وقفل دياب مع ولاء ونزل وساب الشركه , اما ولاء عملت زى ما دياب قال ومسحت ارقامه ورسايله واى شات بينهم .)

_____**_____**_____**_____**_____**_____**_____**_____

فى بيت محمود السلحدار ...

(. ملك فى اوضتها قاعده على الكنبة اللى بتتوسط اوضتها ورافعه رجليها على الترابيزه اللى قدامها وبتبدل نظراتها بين اللاب اللى على رجليها والتلفزيون اللى قصادها , باب الاوضة كان مفتوح جت مليكة جري من بره على ملك ولكن ملك تعاملت ببرود , خدت مليكة مجله كانت موجوده على الترابيزه وقعدت بيها على كرسي وفضلت تقلب فيها وهى بتلحن بصوتها نغمات غير مفهومه , بصيتلها ملك وافتكرت يزن امبارح وهو بيقولها "وبتكره

ى مليكة لانها ببساطه حاجة بريئه ملاك بيتحرك حواليكي وجوده بيستفذك لانه بيفكرك بتصرفاتك الغلط" , عضت ملك شفايفها من كتر الغيظ من يزن وكلامه , لذلك خدت مليكة وخرجتها بره عشان متفتكرش كلام يزن او ربما لان كلام يزن بيستفذها , طلعت ملك موبايلها من جيبها واتصلت بـ يزن .)

ملك : اذيك يا يزن

يزن : انا كويس انتِ عامله ايه ؟

ملك : اههمم , امم , انا كنت متصله عشان امم عشان ـان......

يزن : ملك انتِ متصله ليه ؟

ملك : انت زعلان انى اتصلت

يزن : لا انا بس عايز اعرف السبب

ملك : متصله اعتذرلك

يزن : ولا متصله تشوفى العصفور جوه القفص ولا طار

ملك : قصدك ايه ؟

يزن : قصدى انى مش هفضل تحت رحمتك تانى يا ملك وقت ما تعوزيني تلاقيني اما وقت ما تتخنقى تطلعى تجرى

ملك : انت اللى بتسأل عن حاجات متخصكش

يزن : طول عمرى بسأل وطول عمرك ما تهربى

ملك :  ايوة بس امبارح انت زودتها اوى

يزن : عشان كنت بقولك حقيقتك

ملك بعصبيه : انت ازاى ممكن تتخيل ان دى حقيقتى , انت لو شايفنى كده يبقي مش عايزه اعرفك تانى

يزن : خلاص يا ملك لو مش عايزة تعرفيني تانى اوكى

ملك : يعني لو قولتلك متكلمنيش تانى مش هتكلمنى فعلاً

يزن : ولا هرد عليكى

ملك بارتباك : حتى لو احتجتـ........

يزن يقاطعها : معلش مضطر اقفل عشان عندى شغل

ملك : سلام

(. وقفلت ملك وهى متضايقة اكتر وكرامتها وجعها وقفل يزن وقلبه بيتقطع على ملك .)

_____**_____**_____**_____**_____**_____**_____**____

فى احدى الكافيهات ...

(. دياب وولاء قاعدين سوا فى كافيه , قاعدين قصاد بعض .)

دياب : وحشتيني اوى

ولاء : وانت كمان يا حبيبى

(. يطلع دياب موبايل صغير من جيبه .)

ولاء : ايه ده ؟

دياب : ده من النهارده الموبايل اللى هتكلميني عليه

ولاء : اشمعنى ؟

دياب : ده موبايل بخط تانى مش مع حد غيري ولا تديه لحد , الموبايل ده هتخفيه عن اهلك واخواتك وخاصه وائل

ولاء : ليه كل ده

دياب : حكى لها اللى حصل مع وائل

ولاء : يعني بيشك

دياب : انا كنت حاسس وعشان كده مسحت كل حاجه تخصك من موبايلي واشتريت الموبايل ده ووائل مشافهوش معايا , النهارده بقي لما لقيته ماسك موبايلي نزلت اشتريتلك خط وموبايل

ولاء بتنهيدة : يعني مش الخطوبة اسهل من كل ده

دياب : ولاء , والله العظيم انا بحبك بجد لدرجه انى بندم انى ارتبطت بيكي

ولاء : نعم !!

دياب : ايوة بندم انى مروحتش خطبتك على طول بدل ماحط نفسى فى موقف زى ده مع صاحبى

ولاء : مانت ممكن تتقدم دلوقتى على اساس اننا مش مرتبطين

دياب : هو ده اللى هيحصل بس لما اتأكد انه بطل يشك فيا

ولاء : ماشي يا دابو بس برضه لازم تعرف ان اخرك معايا الترم ده

دياب : حاضر يا حبيبتى

ولاء : ربنا يستر

دياب (يمسك ايدها) : بحبك

ولاء : وانا بموت فيك

_____**_____**_____**_____**_____**_____**_____**_____

بعد مرور شهر ...

-هادى رجع دبى بعد ماتفق مع ملك يفضلوا على اتصال لحد ما ينزل تانى قريب

-ملك طول الشهر ده متعرفش حاجه عن يزن وهو تنفيذاً لرغبتها وتحدى لقلبه مكلمهاش ولا شافها

-وليد بيحاول عشان يسافر بس محدش بيساعده ولا لاقى عقد مناسب ولا معاه فلوس التذكره حتى

-دياب وولاء زى ماهما بيتقابلوا كل اسبوع مرتين تلاته ومفيش مره بيتقابلوا الا لما يحصل تجاوزات بينهم لذلك اتفقوا ميتقابلوش لحد ما ولاء تخلص الترم الاول ودياب يكلم وائل

_____**_____**_____**_____**_____**_____**_____**_____

فى بيت محمود السلحدار ....

(. النهارده عيد مليكة , النهارده مليكة كملت سنتين , النهارده احسن يوم فى عيلة محمود السلحدار ولكنه اسوأ يوم فى حياة ملك , وكعادة السنه اللى فاتت عمل فريال عيد ميلاد كبير ولكنه بيقتصر على عيلة محمود السلحدار فقط او بمعنى اصح محمود وفريال ومُعز اما ملك بتحبس نفسها فى اوضتها , المرة دى كل حاجة جاهزة من زينة وبلالين وتورت وجهزت فريال كل ده رغم ان مفيش حد هيحضر حتى مُعز مسافر ومش هيحضر .)

(. محمود قاعد قدام التلفزيون جت فريال من المطبخ وقعدت جنبه .)

فريال بتقعد : ااه يانا , خلاص كده كل حاجه جاهزة على الاحتفال

محمود : احتفال ايه بس يا فريال , انا مش فاهم ايه لازمة كل ده , ده مفيش غيرى انا وانتِ وليكه لسه صغيره مش هتفهم الفرق بين الاحتفال من عدمه

فريال : مش كفايه حظها القليل مع امها وهى من غير اب كمان معملهاش عيد ميلاد يا محمود

محمود : طيب طالما بتتعبى نفسك والموضوع بيتكلف كده ليه متعزميش جيرانا ومعارفنا

فريال : واقولهم مليكه تبقي مين ولا بنت مين ؟ اقول بنتك ولا بنت ملك ؟ طيب وفى الحالتين ليه ملك حابسه نفسها ومبتحضرش

محمود : هى برضه حابسه نفسها ؟

فريال : مشوفتهاش من امبارح والاوضه مضلمه ومخرجتش منها ولا فتحتها حتى

محمود : اه صحيح فكرتيني , انتِ ليه كنتى بتقولى لاصحابك وجيرانا ان مليكة بنتى من ست تانيه

فريال : امال عايزنى اقول بنت مين ؟

محمود : الحقيقة , بنت ملك

فريال : وابرر معامله ملك السيئة دى بـ ايه ؟

محمود : وانتِ كده بتبرريها بـ ايه ؟

فريال : ببررها بـ ان ملك زعلت انك اتجوزت وبتغير من مليكه لانها خدت منها باباها

محمود : وده سبب بيقنع الناس ؟

فريال : مش احسن ماقولهم ان مليكة بنت ملك وملك بتكرهها عشان مكنتش عايزه تخلفها

محمود : ملك دى غريبة , اول مره فى حياتى اشوف ام بتكره بنتها

فريال : ربنا يهديها

محمود : هى مليكة فين ؟

فريال : بعد ما حميتها ولبستها نامت

(. هنا جرس الباب رن واستغرب محمود وفريال لان محدش بيزورهم كتير وان حد زارهم بيزورهم بـ معاد , قام محمود عشان يفتح , بص من العين السحرية مشافش حد لان اللى على الباب مكنش ظاهر نفسه , استغرب محمود اكتر وخاف يكون وليد ولكنه فتح ولقاه مُعز اللى كان جاى وعاملهالهم مفاجأة , فرح محمود جدا وحضن ابنه وقال لـ فريال بصوت عالى "ده مُعز يا فريال" ومن فرحتها خرجت من جوه وهى بتجرى عشان تشوف ابنها , سلموا وحضنوا ودخلوا يقعدوا جوه سوا .)

محمود : مقولتش ليه انك جاى ؟

مُعز : حبيت اعملهالكوا مفاجأة 

فريال وهى بتحضنه : احلى مفاجاة يا حبيبى

مُعز : امال فين ملك ومليكة ؟

فريال : ملك حابسه نفسها فى اوضتها كالعادة ومليكة نايمه شوية كده واصحيها عشان نحتفل بـ عيد ميلادها

مُعز : انا جاى مخصوص عشان احتفل معاكوا بس مكنتش اعرف ان ملك لسه زى ماهى

فريال وهى بتقوم عشان تصحى مليكة : ملك زى ما سيبتها مفيش حاجة اتغيرت

(. قامت فريال وصحيت مليكة اللى جريت على خالها حضنته كعادتها لما تشوف حد عندهم , احتفلوا بـ عيد مليكة وقرر مُعز ميدخلش على ملك اوضتها الليلة وقرر يأجلها للصبح .)

__**__**__

فى اوضة ملك ...

(. ملك قافله على نفسها بالمفتاح ومطفيه كل الانوار ويدوب بتروح الحمام الملحق باوضتها وقبل ما تخلص السيجاره بتكون مولعه غيرها , سمعت صوت الاحتفال بره اصواتهم وضحكهم ورغم انها سمعت صوت مُعز اخوها اللى كانت هتموت وتشوفه بس برضه مقدرتش تخرج بره , تدفن ملك دماغها فى المخده وتحاول تمنمع نفسها انها تسمعهم بس مقدرتش وذاكرتها رجعت بيها لنفس اليوم –المشئوم- من وجهة نظرها .)

                                FLASH BACK

(. ملك فى نفس الاوضة دى حابسه نفسها , بقت فى الشهر التاسع فى حمل مكنتش عيزاه ولا عيزاه يكمل , كان بالنسبه لها حدث مشئوم هيقلب حياتها للاسوأ , كانت كاره الجنين اللى محاولتش تعرف نوعه ايه كانت بتحاول بس تموت نفسها او تتخلص منه , صحيت ملك بـ الام خفيفه اسفل بطنها , قامت دخلت الحمام لقيت مياة البيبى بتنزل , نادت على فريال اللى جاتلها بسرعه البرق .)

فريال : ملك , مالك يا حبيبتى ؟

ملك بصوت موجوع وبتكز على اسنانها : مش عارفه يا ماما , الم فى بطنى تحت وفى مياة كتير

فريال بقلق : مياة  !! دى ولاده

(. وخرجت فريال وقالت لـ محمود وخدوا ملك وشنطة هدومها وهدوم البيبى اللى كانت فريال مجهزاها مسبقاً وطلعوا على المستشفى , اخدت ملك طلق صناعى وفضل الطلق مستمر لمده 25 ساعة وكانت تصنف ولادة ملك من الولادات المتعسره ولكن بعد انتظار اكتر من 20 ساعة من تعب وعياط وصريخ ومحاولات ملك تترجاهم يخلصوها من الالم ده اتنقلت ملك لغرفة الولاده وبعد حوالى نص ساعه نزل الجنين بـ سلام , العرق والدموع ماليين وش ملك , خدت الممرضة الجنين عشان تحطه على صدر ملك عشان تنسى التعب زى ما بتعمل مع كل الامهات ولكن ملك صرخت فيها بـ اعلى صوتها " ابعديه عنى مش عايزة اشوفه" , استغربت الممرضة والدكتور ولكن تداركت فريال الموقف وخدوا البنت ونضفوها واتنقلت ملك لـ اوضتها .)

فريال : ممكن اجبلك البنت ترضعيها

ملك بصوت مرهق : لا

فريال : يا بنتى خليها بس تاخد لبن السرسوب عشان ده اللى فيه الفايده

ملك : قولت لا , مش هشيلها ولا هرضعها

فريال : البنت كده هتموت من الجوع

ملك : يارب

فريال : لا اله الا الله

(. هنا يدخل محمود .)

محمود : ملك اخبارها ايه ؟

فريال : كويسه

محمود : فين بنتها ؟

فريال : فى الحضانه

محمود : طيب انا نازل اثبتها مش هتسميها برضه يا ملك

ملك بصوت مرهق : تسموها , تسمموها اعملوا اللى انتوا عايزينه

فريال : سميها مليكة يا محمود

محمود : تمام

(. وخرج محمود وجابت الممرضة مليكة اوضة ملك .)

الممرضة لـ فريال : خلى مامتها ترضعها

فريال : مش هينفع , مامتها بتاخد علاج ومينفعش ترضعها ادوها صناعى

الممرضة : اوكى

فريال لـ ملك : مش عايزه تشوفيها برضه

ملك : لا

(. تصرخ مليكة صرخه تقلع قلب ملك من مكانه لدرجه ان ملك تتعدل وتقوم مخضوضه .)

ملك : مالها !! فيها ايه ؟

الممرضة : لا دى جعانه مش اكتر , هروح اديلها رضعه

ملك بتردد : هاتيها

(. تاخدها ملك وتشيلها لـ اول مرة وتقريباً لـ اخر مرة , رضعتها ملك وهى بتضغط على نفسها , ملك كانت شايله مليكة وبترضعها ودموعها بتنزل منها بحرقة شديدة .)

__**__

(. فاقت ملك وهى بتبكى بنفس الحرقة اللى كانت بتبكى بيها من سنتين  وكانت بتبكى لـ نفس السبب وهو انها مش عارفه تحب ملك ولا قادره تكرهها , لا قادره تعاملها كويس ولا بتقدر تمنع نفسها من معاملتها السيئة وفى كل الاحوال مبتقدرش تسامح نفسها .)

ملك لنفسها >> سامحيني يا مليكة , سامحيني يا بنتى

_____**_____**_____**_____**_____**_____**_____**_____

فى بيت عادل السلحدار ...

(. عيلة عادل السلحدار كلهم متجمعين قدام التلفزيون , وليد مبيتكلمش كتير لان دايماً ابوه بيرد عليه بـ اسلوب وحش , كانوا كلهم بيتكلموا فى احاديث متفرقه لحد ما قطع الاحاديث دى كلام عادل عن موضوع مهم جداً .)

عادل : النهارده بنت وليد كملت سنتين

سميرة : اه ماحنا عارفين , كان زمانها دلوقتى فى وسطينا وبنعملها عيد ميلاد

ولاء : ايه ده بجد هو النهارده ؟

وائل : اه صح ده النهارده

عادل : مش ناوى تروح تشوف بنتك يا وليد

سميرة : ناوى وعايز بس مستنى الوقت المناسب

عادل : والوقت المناسب ده بقاله سنتين مجاش !! ياترى هيجي بعد كام سنه

وليد : بابا حضرتك عارف انى لو قربت من ملك او مليكة عمى محمود مش هيسبنى فى حالى , هيسجنى

عادل : وانا مبقولكش قرب من ملك ومش عايزينك اصلاً تقرب ناحيه ملك , بقولك بنتك

وليد : واتسجن !!

عادل : ولما اتسجنت قبل كده وقولت اتسجن عمرى كله ولا انى اطلق ملك ايه الفرق يا سبع الرجال , ما ده سجن وده سجن

وليد : الله بقى هو حضرتك كل شوية هتقطم فيا

عادل : ده على اساس انك بتحس !!

وليد : انا قايم عن اذنكوا

(. قام وليد دخل اوضته وقفل على نفسه .)

سميرة : انت كل ما الواد يقعد معانا شوية تخنقه كده وتخليه يقوم

عادل : وهو بيدينى فرصه اتكلم معاه , يدوب اقول كلمتين ويهرب من الكلام

وائل : ماهو يا بابا مفيش اب بيرمى لحمه ومفيش اب مش نفسه يشوف عياله بس الظروف اللى وليد اخويا فيها مختلفه عن اى ظروف تانيه , احنا لازم نقدر برضه انه اب ومحتاج يشوف بنته بس مش عارف

عادل : وهو كان حد قاله يسيبها من الاول

ولاء : لا بقي يا بابا حضرتك روحتله السجن وقولتله ينفذ كل كلام عمو محمود بس ميقولش انك عارف

سميرة : خلاص بقي اللى حصل حصل , بلاش كل يوم تفكرونا بالايام السوده دى بالله عليكوا

__**__**__

فى اوضه وليد ...

(. وليد سابهم ودخل اوضته مدد على سريره وطلع من درج الكومدينو صور مطبوعه ولكنها متصورة بـ كاميرا موبايل , الصور كانت لـ مليكة يوم ماتولدت ودى كانت اول واخر مرةه شافها فيها وليد , رجع وليد باليوم الوحيد اللى شاف فيه بنته .)

                                           FLASH BACK

(. وليد جاله اتصال من واحد جار ملك فى التجمع الخامس اللى كان وليد اتصاحب عليه عشان يقدر يعرف اخبار ملك وكان حكيله القصة كلها انه اتجوز ملك وطلقها غصب عنه واتمنع يشوف ملك او ابنه , كلمه الجار ده وقاله انه شاف ملك وابوها وامها خارجين بسرعه وشاكك انها راحت تولد وانه مشى وراهم وعرف هى فى انهى مستشفى , خرج وليد بسرعه وراح المستشفى اللى قاله عليها بعد ما كان اتخفى فى كاب ونضاره شمس كبيره , سأل وعرف ان ملك لسه مولدتش , زى ما كانت ملك واهلها بيعانوا بسبب الم ملك وصعوبه ولادتها كان وليد بيعانى تحت وقلبه كان بيتوجع على ملك اكتر من وجع ملك نفسها , عرف وليد ان ملك ولدت بنت وان ملك اتنقلت اوضتها والبنت اتنقلت الحضانه , طلع وليد وسأل عن الحضانه وعرف يوصل لـ بنته من اسم ملك المكتوب على اسورة فى ايد ورجل بنته , شالها وليد وباسها وحضنها ودموع بتنزل منه , اذن فى ودانها وبعد كده قالها بصوت هامس "سامحيني , فراقك وبعدى عنك مش بايديا , عايزك تسامحيني وتعرفى انى بحبك اوى" , صورها وليد كام صورة على موبايله عشان يبقى يشوفها كل ما توحشه , سمع وليد صوت عمه محمود وهو بيتلكم فى الموبايل وبيقرب من الحضانه , فـ خرج بسرعة قبل ما يشوفه .)

__**__

 (. فاق وليد من ذكرياته ودموع ماليه وشه وهو بيبص لـ صورة بنته يوم ولادتها .)

وليد لـ الصورة >> يا ترى شكلك بقى عامل ازاى دلوقتى !! يا ترى شبهى ولا طالعه جميلة لـ مامتك !! يا ترى يا مليكة بيقولولك باباكى مين ولا بابا راح فين !! طيب لما تكبرى هتسامحيني وتحبيبنى ولا هتعملى زى مامتك !! (بيبوس الصورة) انا بحبك اوى ونفسى اشوفك واخدك فى حضنك

_____**_____**_____**_____**_____**_____**_____**_____

تانى يوم الصبح فى بيت محود السلحدار ...

(. مُعز متعود يصحى بدرى , قام من النوم وغسل وشه وصلى الصبح ولقى مامته بتجهز الفطار , دخل الاوضه على ملك عشان مشفهاش من ساعة ماوصل , خبط كذا مره ملك مردتش فتح الباب لقاها رايحه فى نوم عميق , قعد جنبها على السرير وهى حسيت بيه فـ صحيت .)

ملك : مُعز !! (بتحضنه) حمدالله على السلامة يا حبيبى

مُعز : الله يسلمك يا لوكا , عامله ايه ؟

ملك : كويسه الحمد لله , انت جيت امتى

مُعز : يعني مسمعتيش صوتى امبارح

ملك : بصراحه سمعته

مُعز : مانا عارف , مخرجتيش تحتفلى معانا ليه ؟

ملك : انت عارف اليوم ده بيمثلى ايه

مُعز : ايوة بس هى .......

ملك تقاطعه : انا عارفه كل اللى هتقوله الاحسن نغير الموضوع

مُعز : ماشى , عندى ليكي خبر حلو

ملك : اخيراً

مُعز : اخيراً ايه !!

ملك : اخيراً هسمع اخبار حلوة

مُعز : انا قررت اخطب

ملك : تخطب !! بجد

مُعز : اه يدوب كده

ملك : مين !! اوعى تقولى حد من العيلة ؟

مُعز : لا عيلة ايه , واحده عرفتها على النت

ملك باستغراب : نت !!

مُعز : عادى يا مالوكه النت زيه زى اى وسيله

ملك : مش قصدى بس انا اللى اعرفه ان دماغك اكبرمن انك ترتبط من على النت

مُعز : والله انا كنت فاكر ان دماغى اكبر من انى ارتبط اصلاً

ملك : ههههه , طيب ايه قولت لـ بابا وماما ولا لسه

مُعز : لا شوية كده , هنروح انا وانتِ نقابلها

ملك : طيب هتاخدنى معاك ليه ؟

مُعز : عشان تتعرفى عليها وعشان مش حابب اقابلها لوحدنا تفهمنى غلط

ملك : اوكى يا زيزو , ربنا يكملك على خير يارب

مُعز : يارب , قوليلي يا ملك انتِ مفيش اى حاجه جديدة ولا لسه حابسه نفسك جوه الذكريات والتجربة الاليمة

ملك : انت عارف علاقاتى كلها معقده وفاشلة

مُعز : امممم , طيب قومى كده اغسلى وشك عشان نفطر سوا

ملك : حاضر

_____**_____**_____**_____**_____**_____**_____**_____

فى الامارات ....

(. هادى كان فى مكتبه فى الشركة اللى بيشتغل فيها وكانت تحديداً فى دبى , هادى كان قلقان جداً على ملك لانه بيكلمها طول الليل مبتردش عليه وبعدين الموبايل اتقفل , هادى كان قلقان يكون حصلها حاجة وكان قلقان تكون قررت تختفى زى ما عملت قبل كده , لكن قلبه اطمن لما ملك رنيت عليه , كنسل هادى واتصل .)

هادى : ايه يا لوكا يا حبيبتى قلقتيني

ملك : معلش يا هادى , مُعز اخويا جه امبارح بالليل ومعرفتش اكلمك

هادى : حمدالله على سلامته , انتِ عامله ايه يا حبيبتى

ملك : كويسه الحمد لله , انت اخبارك ايه

هادى : انا كويس , بقولك

ملك : ايه !! قولى

هادى : انتِ ممكن تقابلى اخواتى البنات ولا عندك مانع

ملك : لا طبعاً معنديش مانع بس هقابلهم ليه ؟

هادى : مش لـ سبب هما عايزين يتعرفوا عليكي وانا حابب تكونوا اصحاب

ملك : ده شئ يسعدنى

هادى : بحبك

ملك : وانا كمان بحبك

هادى : هبعتلك رقم عالية وهايدي فى مسج وهما هيكلموكى واتفقوا سوا بقى

ملك : تمام

هادى : ملك ممكن اسألك سؤال مهم

ملك : اسأل

هادى : لما كنت فى مصر خدت بالى انك بتخافى منى , او مش مديانى الامان والثقة بتوع زمان

ملك : لا طبعاً اكيد بثق فيك

هادى : محستش ده فى اى مرة اتقابلنا فيها

ملك : مكنتش روحت معاك السخنه

هادى : بس انا خدتك على خوانه

ملك : بص يا هادى , احنا اتفقنا ان فى حاجات اتغيرت واحنا سوا هنحاول نصلحها

هادى : ماشى , اخبار التدخين ايه

ملك : خفيت شوية

هادى : بحبك

ملك : وانا كمان

_____**_____**_____**_____**_____**_____**_____**_____

بالليل فى اوضة ولاء ...

(. ولاء نايمة فى اوضتها ومتكلفته فى الغطا وبتكلم دياب من الموبايل اللى جابهولها وسايبه الموبايل التانى بيشحن على الكومدينو عشان لو حد دخل عليها يتأكد انها مبتكلمش فى الموبايل .)

دياب : وائل لسه مركز معاكى ؟

ولاء : لا خلاص بقاله فترة

دياب : طيب تمام , انا لمحتله من كام يوم

ولاء : وقالك ايه ؟

دياب : وائل كل ما المحله بيبصلي بصه بتربكنى

ولاء : اصل اخواتى بيغيروا عليا جداً

دياب : ماشى انا مش معترض , بس انا لما واحد صاحبي يبقي عايز يخطب اختى مبقفش زيه كده

ولاء : كل واحد له شخصيته واسلوبه

دياب : سيبك انتِ , هاتى بوسه

ولاء : مشبعتش بوس النهارده يا دابو

دياب : هو انتِ يتشبع منك , ده انا نفسى تــــيــــت (كلمة منعتها الرقابة الاخلاقية :D )

ولاء بخضه نفضت جسمها : ايه !! انت بتقول ايه

دياب : يا ستى فى الحلال هو انتِ بتقفشي كده ليه

ولاء : بص يا دياب , الخطوط الحمره اللى بينا عماله تتلاشي وده اكبر غلط

دياب : لولو , انتِ حبيبتى ومراتى وكل حاجه ليا مفيش حاجه بينا اسمها خطوط حمره

ولاء : ايوة بس..........

دياب : بحبك

ولاء : وانا بموت فيك

دياب : عارفه انا نفسى فى ايه دلوقتى

ولاء : ايه ؟

دياب : تبقى مراتى

ولاء : ان شاء الله شد حيلك انت

دياب : لا انا عايز دلوقتى

ولاء : ده اللى هو ازاى ؟

دياب : عادى يعني تصبيره كده فى الموبايل

ولاء : دياب , انت بتبرر اللى بيحصل بينا بـ انه تصبيره ودلوقتى بتقولى ......

دياب يقاطعها : اولاً مش دلوقتى بس انا بقالى كتير بتحايل عليكي وثانياً كل مرة بشوفك فيها لو حضنتك ولا اى نيلة تقعدى تلومى فيا ولازم افضل اتحايل عليكي لحد ماتتعبيني , انتِ بتطلعى روحى

ولاء : ايوة بس اللى انت بتقوله ده مينفعش وميصحش وبعدين ازاى يعني فى الموبايل

دياب : عادى يعنى زى اللى بيعملوا كده على النت او الموبايل , متعرفيش

ولاء : وانا هعرف منين شايفنى مقضياها

دياب : طيب انا هقولك ازاى

ولاء : لا

دياب : عشان خاطرى

ولاء : لا

دياب : لولو عشان خاطرى يا حبيبتى ماليش خاطر عندك

ولاء : ليك طبعاً بس مش هينفع

دياب : طيب تبقي اول واخر مرة

ولاء : لاااا

(. وبعد محايلات دياب ورفض واصرار ولاء انها متعملش كده , رضخت ولاء لـ رغبه دياب وضعفت قدامه وعملت كل كلمة قالهالها وكانت ولاء بتتبع خطوات دياب لانها مييييييح اما دياب فكان عنده خبره او هو نفسه "خبره" .)

_____**_____**_____**_____**_____**_____**_____**_____

فى بيت مجدى فاضل ....

هايدى : انتِ هتكلمى ملك امتى

عالية : بكرة بقى ان شاء الله

هايدي : انتِ متعرفيش هادى عايزنا نقابلها ليه ؟

عالية : انتِ ليه باصه للموضوع بالعمق ده !! ماهو لما عرفها زمان عرفنا عليها وعرف ماما عليها كمان

هايدى : بس مكناش على اتصال او كنا بنتقابل

عالية : الموضوع اختلف يا هايدى , هما خلاص كبروا وداخلين على خطوبة وجواز يعني طبيعي نعرفها ونصاحبها

هايدى : طيب ما تأجلى المقابلة لحد ماخلص امتحانات

عالية : هكلمها واتفق معاها واشوف ظروفها ايه

هايدى : طيب تمام

عالية : هو انتِ ليه مركزة اوى مع هادى وملك ومهتمه بـ ادق تفاصيل علاقتهم

هايدي : والله عادي مش لسبب اكتر من ان امر هادى يهمنى

عالية : طيب لما هو يهمك مش فرحناله ليه لما رجع لـ ملك

هايدي : لان ملك لو بتحبه زى ما بيحبها مكنتش سابته من غير سبب وعذبته كده

عالية : اللى بين هادى وملك هما اكتر اتنين ادرى بيه , متنسيش برضه ان هادى زمان طلع عين اهل ملك من كتر البنات اللى حواليه وعموماً هما كبروا وحالياً بيبصوا للامور بنظره مختلفه اكيد

هايدي : يا ستى ربنا يسعدهم , انا اهم حاجه عندى سعاده وراحة هادى

عالية : ربنا يسعدهم

_____**_____**_____**_____**_____**_____**_____**_____

فى بيت محمود السلحدار ...

(. ملك ومُعز سهرانين سوا قدام التلفزيون وبيتكموا وبيرغوا مع بعض .)

مُعز : هو انتِ متعرفيش اى حاجه خالص عن بنات وولاد عمك

ملك : لا , ومحاولتش اعرف بصراحه

مُعز : اصل هيام بنت عمك بعتتلى add

على الفيس بوك

ملك : وقبلته ؟

مُعز : لا , بس انا مستغرب هى بعتتلى ليه

ملك : طول عمرنا مبنعرفش هيام بتفكر فى ايه اصلاً , هى برضه كانت جت هنا واتخانقت معاها وطردتها

مُعز : دماغ هيام دى

ملك : دماغ وسخه , سيبك , عملت ايه فى المشكلة اللى كانت عندك

مُعز : اتحلت طبعاً والا مكنتش خدت اجازة

ملك : طيب تمام , ربنا يصلحلك الاحوال يا زيزو يارب

مُعز : يارب انا وانتِ

(. بعد شوية من الرغى والسؤال عن الاحوال .)

مُعز : ملك كنت عايز اسألك على حاجة

ملك : اسأل

مُعز : انتِ تعرفى واحد اسمه هادى فاضل

ملك بعيون لامعه : مين !!

مُعز : هادى فاضل

 

 

اشوفكم الحلقة الجاية

ارجوع التقييم بـ تعليق :)

_____**_____**_____**_____**_____**_____**_____**_____

بـ قلم آلاء الشريفى

www.facebook.com/sh5abyt.bnoota

sh5abytalaa.blogspot.com

www.wattpad.com/alaaelsherifi