نص ساعة (الثالثة)

الحلقة الثالثة 

الضيفة : بس مش غريبة انك تخلفى بعد ٢٠ سنه من انقطاعك عن الحمل ، مش فرق السن بين مليكه وملك عشرين سنه ؟

فريال : هو اه فرق عشرين سنه بس اصلاً مليكة مش بنتى

الضيفة بـاستغراب : مش بنتك !! امال بنت مين ؟ انتِ مش قولتى ان مُعز وملك متجوزوش

فريال : ايوة متجوزوش بس مليكه مش بنت حد فيهم

الضيفة باستغراب اشد : امال بنت مين ؟؟

فريال : دى بنت جوزى

الضيفه وكأن وقع على دماغها هرم خوفو : بنت مين !!

فريال : بنت محمود جوزى ، اتجوز من حوالى تلت سنين وخلفها وامها ماتت وهى بتولدها وانا خدتها اربيها مع ولادى ، هى فى النهايه اختهم

الضيفه : يا خبر اسود ، انتِ بتقولى ايه !! محمود اتجوز عليكي !! وكمان بتربي بنت ضرتك

فريال : ايوة ، البنت ملهاش ذنب

الضيفه : لا بقي احكيلي ازاى كل ده حصل !! انا مش مستوعبه انك سبتيه يتجوز عليكي وفوق ده كله بتربي بنته

فريال : محمود اتجوز من ورايا ، نزوه بقي تقصير منى المهم انى لقيته داخل عليا بالبنت وقالى القصه كلها ، انا خدت مليكه ، حسابي معاه مالوش علاقة بالبنت 

الضيفة : يا قلبك يا فريال وسامحتيه بسهوله كده

فريال : سامحته اه لكن مش بسهوله

الضيفة : ربنا هيجازيكي خير على تربيتك لـ بنت يتيمه ، مفيش ست تقدر تعمل كده

فريال (تشيل مليكه وتحضنها) : مليكة دى روحى فيها ، بحبها زى ملك ومُعز بالظبط

الضيفة : *مسم* ده انتِ غريبة اوى

(. قعدت الضيفة مع فريال شوية والاستغراب مسيطر عليها ومش مبطله مصمصه فى شفايفها وضغطت فريال على نفسها واستحملتها لحد ما خلصت القعدة ومشيت .)

*_____________________________________________**___________________________*

فى بيت عادل السلحدار ...

(. وليد كان بره ، كان بيغير جوه  ، رجع البيت وفتح الباب بالراحه واتسحب بهدوء عشان ابوه ميحسش بيه ، عدى الصالة ودخل طُرقة توزيع عدى اوضة ابوه وامه من غير ما يحسوا بيه وجه يدخل اوضته وهو وائل سمع صوت جاى من اوضة ولاء "ايوة طبعاً من حقى" ، فتح وليد الاوضة على ولاء لقاها قاعدة على مكتبها وفاتحه كتاب قدامها .)

وليد : انتِ كنتي بتكلمى مين ؟

ولاء : مبكلمش حد انا بذاكر 

وليد : بس انا سمعت صوتك 

ولاء : انا بذاكر بصوت عالى انت عارف

وليد : انتِ كنتِ فين النهاردة ؟

ولاء : يعني ايه كنت فين ؟

وليد : يعني انا نازل من البيت قبل المغرب بشوية وانتِ مكنتيش لسه رجعتى والمفروض انك .....

ولاء تقاطعه : انا عديت على وائل فى شغله

وليد : انا مش فاهم انتِ كل شوية تروحى لـ وائل ليه !! ده انتِ غريبه

ولاء : عادى يعني بغير جو 

وليد : ابوكى سأل عليا لما جه من بره ؟

ولاء : لا 

وليد : تمام اسيبك تكملى مذاكرة 

(. وخرج وليد من اوضة ولاء وقفل وراه الباب وفضل واقف شوية عشان يشوفها هتكلم حد ولا لا بس ولاء كانت انصح منه وفضلت تذاكر بصوت عالى عشان تأكد لـ وليد انها بتذاكر ، اطمن وليد ودخل اوضته المشتركه مع اخوه وائل ، لقي وائل ممدد على سريره وفاتح نت من موبايله .)

وليد : قوم ياد من على سريرى

وائل : نام على سريرى

وليد : وحياة امك ، انت رامى هدومك وحاجتك كلها على سريرك ومريح على سريرى ، قوم

(. قام وائل من على سرير وليد وشال كوم الهدوم من على السرير حطه على المكتب .)

وليد(بيغير هدومه) : على فكرة حرام عليك امك ، بيتقطم وسطها عشان تلم ورانا

وائل : انت كنت فين ؟

وليد : كنت مكان ماكنت

وائل : بتكلم جد 

وليد(يمدد على سريره) : سيبك انا سمعت اصوات جاية من شقة عمك محمود ، هما رجعوا !!

وائل : لا مرجعوش ، بس عمك عماد اشتراها

وليد باستغراب : باعوها !! اشمعنى يعني بعد السنين دى كلها 

وائل : عمك محمود مكنش عارف يبيعها عشان ميدخلش حد غريب وسطينا ومكنش حد من اخواته الاربعه بما فيهم ابوك محتاجها فـ عمك عماد قرر يشتريها

وليد : واشمعنى عمك عماد اشتراها غريبه دى

وائل : بيقول اشتراها لـ هالة بنته

وليد : عمك جه هنا ولا بعت حد من طرفه ؟

وائل : مظنش انه جه هنا ، هو اكيد اتفق مع عمك عماد من بره بره

(. ملحوظه ، عيلة السلحدار مكونه من سبع اشقاء ، خمسه رجال منهم محمود السلحدار وعادل السلحدار ، العيلة كلها كانت عايشه فى العمارة دى اللى بناها ابوهم وكان ساكن فى الدور الارضي وكل واحد من ولاده وبناته له شقة فى العماره ماعدا عماد السلحدار الاخ الاكبر اللى اتجوز فى شقة والده وعايش فيها من قبل ما والديه يتوفوا ، تتميز عيلة السلحدار بقوة ترابطهم مع بعض سواء الاخوه او زوجاتهم او اولادهم ، ولاد العم كانوا كل يوم يسهروا فى بيت حد فيهم وكل اسبوع لازم يخرجوا يوم سوا ، ومحمود السلحدار كان اول واحد يهد شمل العيلة ويقرر يعزل من العماره .) 

وليد : تفتكر يا وائل مين اللى دمر حياتى كده

وائل : انت اللى دمرت نفسك طبعاً وملك يا وليد مدمرتش حياتك ولا جت جنبك اصلاً بل بالعكس يمكن تكون انت اللى دمرتها

وليد : متبقاش صريح اوى كده

وائل : انا بفوقك من وهم ان فى حد دمرك

وليد(يشيل مخده ويخبطها فى اخوه) : اسكت

وائل(يردهاله) : طلع ملك من دماغك خططك كلها فاشله

وليد : تصبح على خير

وائل : وانت بخير

(. يحط وليد دماغه على المخده وينام على جنبه ويدي ضهره لاخوه ، ويشد من تحت مخدته صورة قديمه لـ ملك يبص لـ ملامحها ولـ ضحكتها ولـ برائتها وللسعادة اللى ماليه وشها ، يدفن وليد راسه فى المخده بسبب دموع نزلت منه ويلاحظ وائل ويعرف ان اخوه بيبكى من شدة شوقه وحبه لـ ملك لان الموال ده بيحصل كل ليلة فـيقوم  يطفى النور ويفضل على الموبايل شوية ، وليد تظاهر انه نام غمض عينه ولكن مخه وذكرياته مبيناموش .)

                                                                        FLASH BACK

من تلت سنين ..

ملك : ١٩ سنه ... وليد : ٢٥ سنه

(. ملك راجعه من الكليه العصر شكلها مرهقه جداً ، لابسه فستان طويل حمالات فيروزى مشجر فى اصفر وبمبي غامق وعليه جاكت بمبي غامق شمرته لحد الكوع وسايبه شعرها البنى الطويل منسدل على ضهرها ، وليد واقف فوق شافها وهى جاية من بعيد ، انبهر بيها وبجمالها وبرائتها وفستانها ولون شعرها لما الشمس بتخبط قيه وبتخليه ينور ، وليد كان وشه مرسوم عليه قلوب من شده الحب والانبهار ، بسرعه البرق طلع وليد يجرى من الاوضه وعدى على المطبخ فتح التلاجه وطلع منها مجموعه شوكولاتات من اللى ملك او اى بنت بتحبها وكانت مترتبه على شكل بوكيه ومعموله بشكل مترتب وجميل ، وطار من الشقة واستناها فى مدخل العماره ، دخلت ملك العماره لقيت وليد فى وشها .)

ملك : وليد !! انت جيب من الشغل بدرى ولا ايه

وليد : اه ، خلعت النهاردة مكنش عندى حاجه مهمه

ملك : يبقي نخرج بقى ، عشان بقالك اسبوع معطلنا

وليد (يديها الشوكولاته) 

ملك : ده ليا !!

وليد : ايوة طبعاً ، انا عارف ادمانك للشوكولاته

ملك بضحكه طفوليه : هو انا بس كل البنات كده

وليد بنظره كلها حب : بس انتِ غير كل البنات ، انتِ حاجه تانيه

ملك : بطل اڤوره بقي

وليد : طيب هتاخدى الشوكولاته ولا لا

ملك : بذمتك حد يقول للشوكولاته لا (وخدتها) متشكره اوى يا وليد ربنا يخليك ليا

وليد : شيك اوى الفستان ده عجبنى

ملك : بجد حلو ؟

وليد : اه والله مخليكي شبه الملايكه

ملك : انا شرياه اول امبارح بس

وليد : عارفة اكتر حاجة بحبها فيكي ايه

ملك : ايه ؟

وليد : انك عارفه ايه اللى يتلبس للكليه وايه اللى يتلبس براها

ملك : ماهو انا رايحه اتعلم مش رايحه اعمل استعراض

وليد : عقلك كمان وطريقة تفكيرك ....

ملك تقاطعه : لا يا وليد كده من هنخلص انا تعبانه جداً ، هطلع استريح عشان نخرج كلنا بالليل

وليد : ماشى هتفق مع ولاد عمك وهكلمك

ملك (وهى متجه لـ السلم اللى فى المدخل وراحت عند الاسانسير) : لو مردتش اعرف انى نايمه وسيبلى خبر مع مُعز هو كمان هيخرج معانا (وتطلع)

وليد لنفسه >> يخربيتك ضحكتك ورقتك وبرائتك وعيونك وجمالك ، بعشق كل حاجة فيكي يا ملك

__**__**__**__

(. يفوق وليد من ذكرياته على صوت وائل اخوه .)

وائل : لما انت بتحبها اوى كده ، ليه عملت كل ده

وليد : ومن الحب ما قتل ، تصبح على خير

وائل : وانت بخير بس على الله تنام مش زى كل ليلة

وليد لنفسه >> وهى من يوم ماختفت وانا بعرف انام اصلاً

*_____________________________________________**___________________________*

فى بيت محمود السلحدار .....

(. كانت ملك فى اوضتها بتخرج هدوم من الدولاب ، تدخل الاوضه يكون السرير على اليمين والدولاب على الشمال والبلكونه قصاد باب الاوضة ، وبين البلكونه والدولاب تكون التسريحه وقريب من البلكونه بشوية فيه كنبه وكرسي وتربيزة وقصادهم مكتبه صغيره ، فيها تلفزيون وكاسيت وشوية كتب ولاب ملك دايماً فيها ، وجنب المكتبه دى بشوية باب الحمام الملحق بـ الاوضة ، دخلت فريال على ملك لقيتها بتخرج الهدوم وتحطها على السرير .)

فريال : ايه الهدوم دى !! انتِ خارجه ؟

ملك : لا ، داخله استحمى

فريال : بس دول فيهم هدوم خروج ؟ هتلبسي البنطلون الجينز ده بالليل كده

ملك : اكيد لا ، بس خارجه بكره

فريال : رايحه فين ؟

ملك : مشوار

فريال : ايوة يعني فين ؟

ملك (تسيب الهدوم وتبص لامها) : نازله اغير جو

فريال : تغيرى جو لوحدك !! ده انا بقالى سنة بتحايل عليكي نخرج سوا زى زمان وانتِ مبترضيش

ملك : كفايه عليكي مليكة

فريال بعصبيه : مليكة !! انتِ بتكرهيها للدرجة دى !! 

ملك : ايوة بكرهها للدرجة دى وفوق ما تتصورى ، ولولاكى كنت قتلتها

فريال بزعيق : انتِ دماغك دى فيها ايه !! شيلتى قلبك وحطتيى مكانه حجر دى طفلة و .......

ملك تقاطعها ببرودها : ماما ماما لو سمحتى احنا كل ما تجى سيره مليكه تقولى نفس الكلام ، انا مبحبهاش ودى حاجة ترجعلى احنا مش هنقعد كل شوية نعيد ونزيد 

(. هنا يدخل محمود والد ملك ويفضل واقف على باب الاوضة .)

محمود : صوتكوا عالى كده ليه ؟ انتوا مش عارفين الساعه كام

فريال : البت دى هتجننى

ملك : كل ده عشان العيلة دى

محمود : لو سمحتى يا فريال سبيني مع ملك شوية

فريال : حاضر ، هروح اطمن علي مليكه

(. تخرج فريال من اوضه ملك ويدخل محمود ويقف قصاد ملك وهو حاطط ايده ورا ضهره ويكلمها بهدوئه المعتاد .)

محمود : انتِ عارفه العيلة دى تبقي لنا ايه ؟

- تبص ملك لابوها بكبرياء ومتردش

محمود : اظن انتِ عارفه هى تبقى لنا ايه ومش محتاج اقولك ان روحنا فيها وانها ممكن تكون اغلى منك انتِ ومُعز

- تحتفظ ملك بهدوئها وبرودها وكبريائها ومتردش

محمود : اخر مرة اسمعك بتتكلمى عليها وحش ولو شوفتك او امك قالتلى انك عاملتيها وحش صدقيني هتصرف تصرف مش هيعجبك اطلاقاً

ملك : تمام

محمود : اتفضلى اقعدى عشان نتكلم شوية

ملك : حاضر

(. واتجه ملك ومحمود ناحية البلكونه وقعدوا على الكنبه الموجوده فى الاوضة .)

محمود : انتِ عارفه انى بقالى اربع ايام مشوفتكيش

ملك : معلش بكون نايمه

محمود : طيب عارفه بقالنا قد ايه مقعدناش واتكلمنا ، فوق السنة

ملك : انا مش قادرة اتكلم او بمعنى اصح معنديش حاجة اقولها

محمود : ولا حتى لـ بابا يا ملك

ملك باستهزاء : بابا !!

محمود : ايه نسيتي انى ابوكى

ملك : منسيتش طبعاً انك ابويا ، (تقوم وضهرها لابوها) بس برضه منسيتش ابويا عمل فيا ايه

محمود بنبره يائسه : عمرك ما هتفهمى

ملك (تبصله) : اللى فهمته كفايه اوى

محمود : دايماً بتقفلى اى باب بينا للنقاش او للكلام او حتى للتقرب 

(. ملك متردش وتنزل من عيونها دموع بسيطه فتدى باباها ضهرها وتمسح دموعها بسرعه ، يقوم باباها من على الكنبه ويروح ناحيه باب الاوضة وقبل ما يخرج يقولها "تصبحى على خير" ، وقفل باب الاوضة وراه ، وكعادة ملك مستسلمتش لدموعها او حزنها ودخلت الحمام ملت البانيو بالمياة والصابون وقفلت باب الاوضة بالمفتاح، وخدت معاها علبة السجاير والولاعه والطفاية  وشغلت الكاسيت على موسيقي هادية ، وفضلت فى المياة عشان تسترخى وتهدى اعصابها وكالعاده السيئة ممسكه بالسيجاره  .)

__**__**__**__

فى اوضة محمود وفريال ...

(. تفتح الباب يكون السرير فى منتصف الاوضة وفى وش السرير التسريحه والدولاب قصاد باب الاوضة ، وجنب السرير موجود سرير اطفال لـ مليكه ، يدخل محمود يلاقى الاوضة ضلمه ونور الاباجورة بس الوالع وضهر فريال للباب اول ما الباب يتفتح تتلفت فريال وتشاور لـ محمود عشان ميعملش صوت خوفاً من ان مليكه تصحى ، يدخل محمود وينام على السرير .)

فريال بصوت واطى : اتكلمت معاها

محمود : كالعاده قفلت كل الطرق لفتح نقاش

فريال : انا مش عارفة ليه بتعمل معانا كده

محمود : ملك فى شيطان مسيطر عليها ، مخليها كارهه كل الناس

فريال : هى برضه اللى حصلها مش شوية

محمود : اللى حصلها !! وهو مين اتدمر احنا ولا هى

فريال : مهما كان اللى حصلنا يا محمود اكيد ميجيش ربع اللى حصلها

محمود : ازاى بس يا فريال ، لما الابن بيقول اى الاب او الام بيقولوا الف اى

فريال : متضايقش نفسك ، ربنا يهديها الحكايه كلها مسأله وقت

محمود : ربنا يهديها

*_____________________________________________**___________________________*

تانى يوم فى بيت مجدى فاضل ....

(. هادى كان لسه صاحى من النوم ، صحى وخد الموبايل من على الكومدينو اللى على يمينه وبعين واحدة اتصل بـ رقم ملك اللى خده من حارس العماره ، اتصل ولقاه مقفول وقال "لسه مقفول برضه" ، بص هادى على الكومدينو لقي ملفات خاصة بشغله وبرساله الماجستير اللى عايز يعملها ، لسه بيقوم من السرير لقي موبايله بيرن وكان احد اصدقائه .)

صديقه : ايه يا ابنى فينك

هادى : كنت نايم ومقدرتش اخرج امبارح

صديقه : على فكرة ظبطتلك الحوار اياه

هادى : بتتكلم جد ؟

صديقه : ايوة يا ابنى ، مش انا قولتلك هات من النت ارخص

هادى : يعني بكام ؟

صديقه : لا معرفش الاسعار بس معروف يعني ان النت دايماً اى حاجة من عليه رخيصه ، بص انا هبعتلك لينك دلوقتى على الفيس بوك افتحه وعيش انت بقي

هادى : اووكى يا معلم متشكر

صديقه : العفو يا برنس

هادى : اه صحيح بقولك ايه ؟

صديقه : قولى ايه ؟

هادى : الحوار ده مجربه ولا اى كلام ؟ مانا مش هدفع فلوس على الفاضى

صديقه : لا انا متعاملتش معاها ، بس ليا واحد صاحبى بيقول ان شغلها نضيف 

هادى : بيس ، هشوف اللينك وهبقي اكلمك تانى

صديقه : اوكى (وقفلوا)

(. يقفل هادى مع صاحبه ويفتح اللينك من الفيس على الموبايل ، يلاقى اسم الاكونت مكتوب بالصيني ومش فاهم منه حاجة والاكونت مش واضح عليه حاجة .)

هادى لنفسه >> ايه الاكونت ده !! هو الواد ده جابلى واحده من الصين لما ابعت الرسالة بقي وخلاص

(. وبعت هادى رساله مضمونها " سمعت عنك كلام كتير وكله كلام كويس خاصة ان الكل بيقول انك مُتمكنه وانا بحب اتعامل مع الناس المُتمكنه اللى عندها ضمير لذلك حابب اتعامل معاكى .. فى انتظار ردك .)

(. يمدد هادى على السرير تانى ويرجع بذكرياته .)

                                                                    FLASH BACK

(. هادى وملك قاعدين فى كافيه سوا ، هادى قرر يقوم يدخل الحمام بس نسي موبايله على الترابيزة ، الفضول اثار ملك وخلاها تفتش فى الموبايل وخاصة الفيس بوك ، لقيت رساله جديده جاية لـ هادى من واحدة وكان مضمونها "خلاص يا باشمهندس انا هـاجى الشقة بكره استنانى الساعة تسعه " حاولت تجيب ملك الـ history ولكنها مالقيتش الحوار كامل فـ فهمت ان هادى مسحه قبل كده وان دى رساله جديده جت بعد ماهو مسح الحوار ، يجي هادى من الحمام وقبل ما يوصل لـ ملك يعرف ان فى حاجة غلط ، لانه شاف ملك بتهز فى رجلها بقوه وماسكه الموبايل ، يقعد هادى قصادها .)

هادى : اياً كان اللى شوفتيه فـراعى اننا فى مكان عام يعني حاولى تهدى وتمسكى اعصابك

ملك : اعصابى !! انت خليت فيا اعصاب

هادى : طيب ممكن تقوليلي شوفتى ايه ؟

(. تديله ملك الموبايل ويقرآ هادى الرساله .)

هادى : ياااه اخيراً ردت

ملك : نعم !! انت بتقول ايه

هادى : انا مستنى الرساله دى من اسبوع

ملك : بجد طيب كويس انها جت

هادى : انتِ فهمتى ايه من الرساله ؟

ملك : واحدة بتقول لواحد هاجيلك الشقة الساعه تسعه ، هفهم ايه يعني غير انك شاقط واحدة من النت

هادى : هههههه يخربيتك جبتى الكلمه دى منين ، بقي البراءة دى كلها تقول اللفظ ده

ملك : متغيرش الموضوع

هادى : دى مهندسه ديكور ، ماما عايزة تغير ديكور الشقة وانا المُكلف انى اشوفلها مهندس ديكور شاطر

ملك : يا سلام !! وفين باقى الحوار ؟

هادى : باقى الحوار كان على الموبايل

ملك : وانا ايه يثبتلى الكلام ده

هادى : اللى يثبتلك انك تكونى موجوده وهى جاية عندنا البيت

ملك : وانا هاجى عندك البيت ازاى

هادى : عادى يعني ، امى واخواتى عارفين حضرتك فين المشكله ؟

ملك : لا خلاص (وتسكت ويتسلل الشك لها تانى) ولا اقولك ماشى هاجى اشوف

هادى : انتِ للدرجة دى شاكه فيا

ملك : انت اللى وصلتني للمرحله دى من كتر تصرفاتك الغلط

هادى : بس مهما عملت المفروض تكونى واثفة انى مبحبش غيرك

ملك : خلاص ، هروح اعرف شباب واقولك المهم انى بحبك انت

هادى : والله بحبك اوى يا ملك

ملك : هادى ، انا لو بسامح فى خيانتك ليا عشان بحبك بس مش معنى كده انى هفضل اسامح كتير

هادى : انا مش فاهم ازاى بتسمى التصرفات دى خيانه ، انا لا عمرى قولت لواحده غيرك بحبك ولا عمرى فكرت المس واحده دى مجرد صحوبيات

ملك : مش عايزة غيري فى حياتك ، حقى ولا مش حقى

هادى : بحبك

ملك : حقى ولا مش حقى ؟

هادى : حقك بس انا برضه بحبك

ملك : وانا كمان للاسف بحبك

هادى : للاسف ليه بقي !!

ملك : عشان وقعت فى واحد بيجب يكلم بنات بسبب ومن غير سبب بس وديني لاتوبك يا هادى

هادى : برضه بحبك

ملك : خلاص بقي انا بتكسف

هادى : مانا بقولك كده عشان بحب اشوفك مكسوفه

__**__**__**__

يفوق هادى من ذكرياته وابتسامه حزينه ماليه وشه وهو بيقول لنفسه >> وحشنى كسوفك يا ملك ، وحشنى كل حاجة فيكي 

__**__**__

فى اوضة عالية وهايدي ....

(. فى اوضة بناتى جداً ، فى سريرين قصاد بعض ، عالية نايمه على واحد وهايدي قاعدة على المكتب قصادها .)

هايدي : غلط كده يا عالية ، براء كده هيلغيكي انتِ شخصياً لما تتجوزوا

عالية : يا هايدي انا بحبه وعايزه ارضيه فين المشكله ؟

هايدي : المشكله انك لاغيه طموحك واهدافك واحلامك لمجرد انك بتحبى ، الحب اللى يلغيكي ويلغى شخصيتك بلاش منه

عالية : كل ده لمجرد انه مش عايزنى اشتغل

هايدى : لا يا عاليه ، براء بيتحكم فيكي لمجرد التحكم مش حب ولا خوف 

عاليه : لمجرد التحكم !! ليه يعني ؟

هايدى : عشان عقدة النقص اللى عنده 

عالية : عقدة نقص !! ايه اللى بتقوليه ده ؟

هايدى : بقولك الصراحه ، براء عنده عقده نقص لانه اولاً من غير عيلة ومش عايش فى بلده وعيلته الوحيدة اللى يعرفها هى عيله امه ، وانتِ سواء عيلة امك او ابوكى فالاتنين يشرفوا

عالية : بطلى اڤورة مش للدرجة دى

هايدي : يا ستى مش مهم عنده عقد ولا لا ، المهم تخليكي فاكرة ان براء مش هينفعك ومفيش راجل بينفع ست

عاليه : ده اللى هو ازاى يعني ؟

هايدي : يعني بفرض انك مشتغلتيش ومالكيش ميراث وعايشه بس على مُرتب جوزك ، بفرض انه استغنى عنك وطلقك ولا جاتله مصيبه شالته ومات هتعيشي ازاى ، فكرى فيها وفكرى فيها بقي لو عندك اولاد والدخل الوحيد هو مرتب جوزك

عاليه : انتِ كده بتقولى ان الراجل بنك

هايدي : انا بتكلم عن شخصية براء ، اللى شايف ان الست ملهاش الا بيتها وجوزها

- لسه عالية هتتكلم هايدي اتكلمت

هايدي : بصى يا لولو الخلاصه ، لو معندكيش احلام وطموح يبقي براء مناسب ليكي بس لو عندك طموح مفيش حد يستاهل تدفني نفسك عشانه 

*_____________________________________________**___________________________*

فى بيت محمود السلحدار ....

(. ملك قاعدة على الكنبه ومشغله التلفزيون وحاطه رجلها على الترابيزه اللى قصادها واللاب على رجلها وجنبها الموبايلات وشوية ورق والطفاية جنبها وبتدخن كعادتها السيئة وكعادتها برضه قافله الباب بالمفتاح ، الموبايل مش مبطل رن سواء الرقم الشخصى او رقم العامة ، ردت على الموبايل الخاص وعملت التانى صامت .)

ملك : ايوة

يزن : انا يزن

- تنفخ ملك كعادتها

يزن : ملك انا خايف عليكي ، مش قادر اسيبك فى الوحله اللى انتِ راميه نفسك فيها دى

ملك : انت مالك !! انا مطلبتش مساعدتك

يزن : لا طلبتيها ، جتيلي عشان اساعدك وهربتي منى تانى

ملك : يزن ، المكالمه الفاتت قولتلك سبنى لحد ما يجلي مزاج او رغبه بس المره دى كلامى اختلف

يزن : قصدك ايه

ملك : يعني المره دى هقولك متتصلش بيا تانى ومش عايزه اعرفك

(. وقفلت ملك فى وش يزن السكه وحطت الرقم فى الـ block list ، وبعدها فتحت الـ other box وهى فى الغالب بتجيب الرسايل القديمه الاول بس لفت انتباهاها احدث رساله بسبب اسم المُرسل Hady M Fadel ، حطت ملك السيجاره فى الطفاية ونزلت رجلها من على الترابيزة واتعدلت فى قعدتها وهى مخضوضه جداً وقلبها بيدق بقوه ، وبدأت تقرأ الرساله ، بعد ما خلصتها بدأت تتكلم مع نفسها .)

ملك لنفسها >> معقوله يكون هو !! معقوله بعد السنين دى كلها تقابلنى هنا !! ايه الصدفة دى ، طيب اعمل ايه !! ارد ولا اديله بلوك ولا اتجاهله ماهو اكيد مش هقدر اقابله 

(.  تفتح ملك الاكونت بتاع المُرسل وتلاقى كل البيانات هى بيانات هادى وان ده الاكونت بتاعه القديم زى ماهو متغيرش ، وتلاقى رقم الموبايل فى الاكونت ، هنا الموبايل يرن بـ رقم مش متسجل ويكون هو نفس الرقم اللى فى اكونت هادى  ، توزع ملك نظراتها بين الرساله والموبايل ومتعرفش تتصرف ازاى ، حست ان دماغها اتشلت عن التفكير ، فقررت تقفل الموبايل وتعمل deactivate للاكونت لحد ما تشوف هتتصرف ازاى .) 

*_____________________________________________**___________________________*

فى عمارة عيلة السلحدار ....

(. وليد خارج من شقتهم ، لقى حد بينادى عليه بصوت هامس من على السلم ، وليد استغرب وطلع السلم لقي هيام بنت عمه .)

وليد باستغراب : هيام !! انتِ جيتي من السفر امتى

هيام : جينا النهارده الفجر وحبيت اشوفك

وليد : حمدالله على سلامتك

هيام : الله يسلمك ، وحشتنى اوى يا وليد

- اتصدم وليد ورفع حاجبه من الصدمه

هيام : متستغربش يا وليد ، انا زى مانا متغيرتش رغم كل اللى حصل ، انا لسه بحبك وغلاوتك فى قلبي متغيرتش

وليد باستغراب : بعد كل اللى حصل !!

هيام : تخيل ان بعد كل اللى حصل ده انا لسه بحبك

وليد (يقعد على السلم) : ياريتك اعترفتيلي بـ حبك ده من زمان

هيام(تقعد جنبه) : هو انت كنت شايف حد غير ملك ؟

وليد : ومش هقدر اظلمك يا هيام 

هيام : يعني ايه !! انت لسه بتحبها ؟

وليد بحرقه : ومش شايف غيرها

(. تقوم هيام من على السلم وتقف قصاده وتتكلم بعصبيه وهى حابسه دموعها .)

هيام : لسه بتحبها رغم كل اللى هى عملته !! كانت هتوديك فى داهيه وهتضيع عمرك وتقولى مش شايف غيرها

وليد (يقف قصادها) : ومش فاكر لها اللى انتِ بتقوليه ده وعاذرها عليه كمان

هيام : انت حلال فيك اللى بيحصلك ، حلال فيك حياتك تدمر كده ، خليك يا وليد افضل متعلق بالحبال الدايبه دى ، افضل ماشي ورا حب ملك اللى عماك وضيعك (بعصبيه اكتر) اشرب يا وليد 

(. وطلعت السلم ورجعتله تانى .)

هيام : لما انت بتحبها عملت كل ده ليه !!

وليد : حمد الله على سلامتك يا هيام

(. ومشى وليد وسابها وخرج من العماره كلها .)

__**__**__**__

فى شقة عادل السلحدار ...

(. ولاء مكنش عندها كليه النهاردة فـ صحيت طول الليل تكلم دياب ونامت متأخر ودخلت مامتها تصحيها .)

سميرة (تقعد على السرير) : ولاء ، ولاء اصحى

ولاء : صباح الخير يا ماما

سميرة : صباح ايه !! احنا بقينا العصر

ولاء : طيب سبيني انام شوية كمان

سميرة : قومى يا بت عيزاكى فى حاجة مهمه

ولاء : حاجة ايه يا ماما خير

سميرة : .........................

اشوفكم الحلقة الجاية

ارجو التقييم بـ تعليق :)

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com

www.wattpad.com/alaaelsherifi