الحلقة السادسة
(. خرجت ملك مع فريال لـ الريسبشن واول ما شافت اللى عايز يشوفها وقفت ملك متنحه شوية ، ملك ومامتها جنب بعض واللى جاى يزور ملك واقف قصادها ، وملك متنحه وعيونها كلها عصبيه وشر .)
ملك بصوت هامس : هيام !! (تبص لـفريال) هيام بتعمل ايه هنا يا ماما ؟
هيام : لو سمحت يا ملك انسى اى حاجة دلوقتى وخلينا نتفاهم عشان مصلحتك قبل مصلحتي
ملك بعصبيه : مصلحة !! مصلحه بينا احنا الاتنين !! انتِ اتجننتي
فريال : لو سمحت يا هيام ........
هيام تقاطعها : لو سمحت يا طنط انا اصريت انى اشوف ملك واتكلم معاها
(. هجمت ملك على هيام وقعدتها على الكرسي اللى كان وراها على طول ومسكتها من رقبتها او خنقتها بـمعنى اصح .)
ملك : انتِ تخافى على مصلحتى طيب ازاى !! انا طولتك اهو يا هيام وهطلع روحك
فريال(بتحوش) : بس يا ملك بس ، هتموت فى ايدك
ملك : انا عيزاها تموت
فريال(وهى عماله تحوش) : يعني تودى نفسك فى داهيه عشان ايه
هيام بصوت مخنوق : كفايه يا ملك هتموتيني
(. ملك فعلاً كانت عازمه على خنق هيام ولكن فريال قدرت تخلص رقبة هيام من ايد ملك ، وبعدت فريال ملك عن هيام ومسكتها من ايدها عشان متروحلهاش تانى ، وهيام عماله تكح وعيونها مدمعه من شدة الخنق .)
فريال لـ ملك : انتِ اتجننتى عايزة تموتيها وتروحى فى داهيه دنيا واخره
ملك بصوت عالى وعصبيه : انا لو قطعت من لحمها وهى عايشه مش هتصعب عليا ومش هيكفيني
هيام : انا معملتلكيش حاجة !! انتِ اللى عملتى فى نفسك كل ده
ملك : انتِ مال امك !! اعمل ولا ماعملش انا مش عايزه اشوفك انتِ لو عندك دم ما...........
هيام تقاطعها : يا بنتى اسمعيني ، وليد ناوى يأذيكي ، عايز ينتقم منك انا جيت عشان .....
ملك لـ فريال مقاطعه هيام : ماما خرجيها بره بدل ماصورلك قتيل
(. ودخلت ملك اوضتها وقفلت على نفسها .)
فريال : انا قولتلك مش لازم تقابلى ملك وانتِ اصريتي ، احنا مش مُرحبين بيكوا وخصوصاً ملك
هيام : يا طنط انا مش فاهمه ليه ملك واخده منى الموقف ده ، احنا كنا قريبين لـبعض ، كانت روحنا فى بعض
فريال : هيام ، احنا بقالنا سنين يا بنتى مقاطعين بعض ، سيبوا ملك فى حالها
هيام : ايوة بس وليد كان ناوى .....
فريال تقاطعها : مش عايزين نعرف (راحت فريال ناحية بابا الشقة وفتحته) نورتينا يا هيام
(. خدت هيام شنطتها ومشيت ورزعت فريال الباب وراها .)
__**__**__
فى الجهة التانيه ...
(. دخلت ملك وهى مُنهاره تماماً ، قفلت باب الاوضة بالمفتاح كعادتها ومقدرتش توصل لـ اى مكان فى الاوضة من شدة الانهيار ، قعدت على الارض وحطيت دماغها بين ايدها على السرير وفضلت تعيط بحرقة شديدة ، دقيقتين وشدت علبة السجاير والولاعه من تحت المخدة وولعت سيجاره وكانت بتدخنها وهى منهاره تماماً .)
فريال بتخبط على الباب : ملك ، ملك انتِ كويسه يا حبيبتى
- ملك مبتردش
فريال : طيب ردى طمنيني عليكي مش لازم تفتحى ، يا ملك ردى عشان خاطرى
(. تشم فريال ريحة الدخان خارج من الاوضة ، ريحة الدخان اللى دايماً بتشمها واللى شوية تكدب نفسها وتقول ان استحالة بنتها تكون بتدخن وشوية تقول لنفسها شوية وهتبطل ولكنها فى كل الاحوال مبتقدرش تواجه ملك بـ شكوكها انها مُدخنه .)
فريال : ملك ، حبيبتى ردى قولى انك كويسه
ملك بصوت مخنوق : انا كويسه يا ماما
فريال : طيب متقعديش لوحدك ، افتحى عايزة اتكلم معاكى
- ملك متردش
فريال : يا بنتى متعمليش فى نفسك كده اللى فات مات ، انسيه وانسيهم
ملك : سبيني لوحدى يا ماما ، انا كويسه
فريال : طيب (بصوت هامس وهى ماشيه) ربنا يطمني عليكي ويصلحلك حالك
(. ملك لـ اول مرة من سنين تنهار كده ، اول مرة متقدرش تمسك دموعها ولا انها تفكر كتير وكذلك اول مرة من سنين تحس انها مش قادرة تشيل كل ده لوحدها ومن غير تفكير لقيت نفسها بتتصل على هادى ، هادى كذلك بدون تفكير رد على ملك .)
ملك بعياط : اذيك يا هادى
هادى : انتِ كويسه يا ملك ؟
ملك : لا يا هادى انا مش كويسه ، انا تعبانه ومخنوقه اوى
هادى : مالك بس يا حبيبتى حصل ايه ؟
ملك : محصلش حاجة ، انا اتخنقت فجأة كده
هادى : بقى عايزة تقنعيني انك مخنوقه كده وبتعيطي ومنهاره بالشكل ده عادى كده
ملك : انا مش قادرة احكى يا هادى متضغطش عليا
هادى : طيب خلاص براحتك متحكيش بس برضه متعمليش فى نفسك كده مفيش حاجة تستاهل
- ملك ساكته
هادى : ملك ينفع اشوفك دلوقتى ؟
ملك : ايه !!
هادى : ايوة انا عايز اشوفك ، بصي هجيلك عند بيتك وانتِ بس انزليلي اشوفك
ملك بابتسامه اقتحمت انهيارها ودموعها : زى زمان
هادى بابتسامه عريضه : ايوووووة زى زمان
ملك : بس يا هادى احنا خلاص معدش يـنـ.........
هادى يقاطعها : ملك ، انا بس هشوفك وانتِ لو مكنتيش محتجانى مكنتيش كلمتيني . انا محتاجلك وانتِ محتجانى
ملك : ايوة بس ..........
هادى يقاطعها : طيب خلاص خلينا نشوف بعض دلوقتى وبعدين منشوفش بعض تانى ، اعتبريه لقاء ما قبل الفراق
ملك : يا سلام
هادى : بقولك ايه ، انا هالبس اهو ، يالا استنيني سلام (وقفل من غير ماترد)
ملك لنفسها >> لسه مجنون زى ماهو ، ايه يا ملك هتقابليه !! هتقدرى تقاومى ضعفك ادامه !! طيب اقابله المرة دى بس انا فعلاً محتاجه اشوفه (وتنهار ملك تانى وتقعد تعيط وتبدأ جميع ذكرياتها السيئه تطارد عقلها)
__**__**__
(. بعد شوية من انهيار ملك قررت تقابل هادى على اعتبار انها مجتش من مره وانها بالفعل محتاجه تقابله ، غيرت ملك هدومها وخرجت لـ مامتها وقالتلها انها هتخرج تغير جو ، بعد ما كان هادى كلمها وقالها انه قرب يوصل التجمع الخامس ، خرجت ملك واستنته بره الكومبوند اللى ساكنه فيه ومازلت ملك فى حالتها الغير طبيعيه ، رغم وجودها فى الشارع الا انها مكنتش قادره توقف دموعها ، جه هادى وركبت معاه وهادى كان مستغرب جداً لـ حالتها دى فـاول ما قابله مكان هادى ركن فيه ، وكان المكان تقريباً مفهوش حد غيرهم .)
هادى : مالك يا ملك !!
(. تنزل ملك من غير ما ترد على هادى وتقعد على شنطه العربيه وينزل هادى كذلك ويقف قصادها وهى قاعده على الشنطه .)
هادى : مش عايزه تتكلمي
ملك : معنديش حاجة اقولها
هادى : ولا حتى سبب الدموع دى ؟
ملك : مش عارفه سببها
هادى : او اسبابها كتير
(. تزيد ملك فى العياط ، وتنزل من على شنطة العربيه وبدون مقدمات او تفكير تترمى فى حضن هادى وتعيط بحرقة شديدة ، ادت لـ استغراب هادى لانهم طول فترة ارتباطها عمرها ما سمحتله يحضنها او يتجاوز معاها وهو كذلك مفكرش فى كده كان ابسط حاجة بيعملها يبوس دماغها كأنها بنته ، استغرب هادى جداً لـ رد فعل ملك التلقائى والجرئ واستغرب لـ بكاها بالحرقه دى ، لف هادى ايده حوالين كتفها وطبطب عليها كأنه بيهديها او بيطمنها ، ملك مكنتش بتعيط بحرقة وبس دى كانت بتصرخ فى حضن هادى ، لمس هادى شعرها وهى بيقولها "بــس بــس اهدى ، اهدى يا حبيبتى" ، اقتحم حزن ملك وعياطها عقلها اللى فوقها وعرفها انها فى حضن هادى لذلك توقفت ملك عن العياط فجأة وسابت حضن هادى وتراجعت كام خطوة وهى بتقوله " ا ا انــ انــــــا آسـ آسفة " .)
هادى : بتتأسفى ليه ؟
ملك : مكنش ينفع اعمل كده
هادى : وخلاص حصل سواء ينفع او لا مفيش داعى للاعتذار
ملك : انا بقالى سنين معيطتش ، مش عارفه ايه حصلي النهارده
هادى : اياً كان اللى حصلك فأنا مبسوط
ملك باستغراب : مبسوط !!
هادى : ايوة ، اولاً عشان اللى حصلك خلاكى تكلميني من نفسك وثانياً خلاكى توافقى انك تقابليني وثالثاً انه خلاكى تترمى في حضنى
ملك : هادى ، ممكن نعتبر ان النهارده ده مصحلش
هادى بابتسامه : توء ، النهارده ده اسعد يوم فى حياتى
ملك : احنا مش هينفع نرجع
هادى : قصدك احنا بالفعل رجعنا
ملك : نعم !!
هادى : ملك انا بحبك وانتِ بتحبيني ، بتحبيني زى زمان ويمكن اكتر ، انا حسيت كل ده فى صوتك اول ما كلمتيني ، نفس احتياجك ليا بتاع زمان ، نفس صوتك وانتِ مضايقه وعارفه ان مفيش حد غيرى هيخرجك من الموود ده ، لما قابلتك النهاردة الضهر وشوفتك دلوقتى شوفت فى عينك نفس الفرحه بتاعة زمان
ملك : جايز مشاعرى ناحيتك زى زمان بس انا مش زى زمان
هادى : عايز افهم ايه اللى اتغير ؟
(. تسكت ملك شوية وتجاوب على مضض .)
ملك : يارتني اقدر افهمك ايه اللى اتغير
هادى : متخليش عقلى يسرح بيا واشك فى نفسى
ملك : هادى انا والله بحبك بس ......
هادى(يمنعها من الكلام بوضع سبابته على شفايفها) : مفهاش بس ، خلاص انتِ بتحبيني ودى كفايه عليا وكفيله اننا نبدأ صفحة جديدة مع بعض
ملك (تديله ضهرها) : هادى متضطرنيش اختفى تانى
هادى (يقف قصادها ويمسكها من كتافها) : وانتِ مين قالك بقي انى هسمحلك تختفى تانى
ملك باستغراب : يعني ايه ؟
هادى : يعني خلاص معدش فيه مانع لارتباطنا الرسمى ، اجازتى فاضل فيها شوية هخطبك فيهم وهنزل على السنه الجديده نتجوز
ملك (بتوتر ادى لاستغراب هادى) : لا لا لا لا ، مش بسرعه كده خطوبة وجواز يعني اديني فرصه
هادى : اديلك فرصه لـ ايه يا ملك ، عشان تعرفيني اكتر ولا عشان تهربي منى تانى
ملك : عشان انت تعرفنى اكتر
هادى : قصدك ايه ؟
ملك : الفترة اللى فاتت دى يا هادى مش قليله ، اكيد كل واحد فينا اتغير فيه حاجات كتير ، يعني احنا لسه بنكتشف بعض من جديد
هادى : ماشي يا ملك بس اوعديني انك متختفيش
ملك بابتسامه : حاضر يا هادى اوعدك انى مش هختفى تانى
هادى : بحبك
ملك : وانا كمان بحبك
*_____________________________________________**___________________________*
بعد كام يوم فى بيت عادل السلحدار ....
(. سميرة وعادل قاعدين قدام التلفزيون بيتفرجوا على الاخبار وتقطع سميرة متابعه عادل بـ كلامها .)
سميرة : احنا مش هنخطب لـ وليد بقي ؟
عادل (وهو بيبص على التلفزيون) : وليد ولا وائل ؟
سميرة : وليد طبعاً ، الكبير الاول
عادل بتهكم : كبير !! ده من انهى اتجاه
سميرة : يعني ايه من انهى اتجاه ؟
عادل(يبصلها) : يعني المفروض ان وليد الكبير بس سناً فقط ، لكن مقارنةٍ بـ وائل وليد مش كبير ولا حاجه
سميرة : اشمعنى يعني ؟
عادل : وائل اخلاقه متزنه افعاله مش صبيانيه زى وليد وفوق ده كله معاه فلوس وشغلانه محترمه يعني قادر يفتح بيت
سميرة : مالها اخلاق وليد يا عادل !! وليد طول عمره طيب وغلبان بس حظه قليل وبخته مايل
عادل : وهو مين اللى ميل بخته ، احنا ولا هو !!
سميرة : لا احنا ولا هو ، الظروف ، الظروف السيئه اللى مر بيها ، الواد غلبان
عادل : انا بستغرب انه عايز يخطب ، له عين يخطب
سميرة : الله !! هو كان عامل عمله يعني ولا كان عامل عمله ، وبعدين هو مطلبش ومش عايز اصلاً
عادل : امال انتِ ليه بتفكرى فى الموضوع ده ؟
سميرة : البت هيام ، هيام بنت اخوك فاروق
عادل : مالها ؟
سميرة : البت شاريه وليد وبتحبه وهتموت عليه ، فـ فرصه نخطبها وهى هنا
عادل : نعم !! عيزانى اقول لـ فاروق عايز بنتك لـ ابنى وهو اصلاً مخليها طول السنه بره مصر عشان يبعدها عن وليد
سميره بعصبيه : هو وليد ده يعني جربان ولا بيعدى ، فى ايه يا عادل
عادل : سميرة ، الواد مش عايز يخطب وهو اصلاً عمره ما حب هيام ، وفاروق عمره ما هيوافق ، بلاش نلخبط الدنيا ونعكها اكتر ما هى
سميرة : طيب شوفله شغلانه عندك فى المستشفى ؟
عادل : هيشتغل ايه فى مستشفى بيطرية !! ، كلب !!
سميرة : بطل تريقه ، شوفله شغلانه فى الحسابات ولا هى المستشفى دى مفهاش حسابات
عادل : مبحبش الوسايط
سميرة : انت بس عشان مش راضى على وليد
عادل : ربنا يرضى عليه وعليكي
سميرة : يارب يرضي علينا كلنا
__**__**__**__
فى اوضة ولاء .....
(. ولاء قاعدة على مكتبها اللى قصاد باب الاوضة ، فاتحة الكتاب وحاطه الهاندى فرى فى ودانها والموبايل فى جيبها وبتكلم دياب .)
دياب : يعني هشوفك بكرة اكيد ، انا بقالى يومين مشوفتكيش لما هتجنن خلاص
ولاء : لا اكيد هشوفك بكره وكمان هقعد معاك فترة طويله عشان فى كورس اتلغي
دياب : الله عليكي ، هاتى بوسه بقي
- ولاء تسكت
دياب : ده زعل ولا كسوف
ولاء : المفروض انك عارف
دياب : انا مقصدش حاجة والله ، انتِ عارفه انا بحبك وبخاف عليكي قد ايه بس هو تعبير عن الفرحه مش اكتر
ولاء : خلاص حصل خير
دياب : بحبك
ولاء : انا بموت فيك
دياب : بقولك يا لولو صحيح
ولاء : ايه يا حبيبى
دياب : نفسى اشوفك بـ لبس البيت
ولاء باستغراب : لبس البيت !! اشمعنى
دياب : عادى يعني ، فضول
ولاء : بس هوريك لبس البيت ازاى يعني ، اكيد مش هخرج بيه
دياب : صورى نفسك صورة وابعتيهالى على الواتس اب
ولاء : صورتى !!
دياب : لا صورة اللبس لوحده ، اكيد صورتك يعني يا ولاء
ولاء : ايوة بس انا بلبس بيجامات عاديه يعني زى باقى البنات
دياب : وانا مالى انا ومال باقى البنات ، انا عايز اشوف حبيبتى انا
ولاء : بس انا مقدرش ابعتلك صورتى
دياب : ليه !! مبتثقيش فيا
ولاء : لا مش كده يا حبيبي ، بس ممكن وائل او اى حد من صحابك يفتح الواتس اب او الجاليري
دياب : على اساس انى اهبل ولا على اساس انى مش خايف عليكي !! اولاً انا مسجل رقمك بـ اسم "امى" عشان لو وائل شافه ميشكش وثانياً بمسح كلامنا على الواتس اب او الرسايل اول باول ومفيش اى صور ليكي عندى عشان بخاف الموبايل يضيع او يتسرق وفوق ده كله فيه باسوورد للموبايل
ولاء : يعني هى الصورة دى هتفرق معاك ؟
دياب : خلاص يا حبيبتى طالما مش عايزة ومش واثقه فيا
ولاء : مش موضوع ثقه يا حبيبي هو بس (وسكتت)
دياب : خلاص يا لولو كأنى مطلبتش حاجه يا روحى
ولاء : دابو
دياب : نعم
ولاء : بحبك
دياب : انا بحبك اكتر
ولاء : طيب اديني شوية اتصور وابعتلك الصورة
دياب : بتتكلمى جد يا حبيبتى
ولاء : اه يا حبيبى
دياب : مستنيكي على احر من الجمر
(. قفلت ولاء مع دياب وقامت بصت فى التسريحه اللى على شمال المكتب ، ولاء كانت لابسه بنطلون بيجامه على تى شيرت بيجامه تانيه وكانت عامله شعرها كحكه بطريقه عشوائيه ، بصت لنفسها فى المرايه وقالت "ايه التشرد ده" ، وبسرعه كانت ولاء مطلعه بيجامه تانيه شكلها اشيك واحلى كانت نص كُم وبنطلون برمودا وكان لونها بمبى غامق ، ودخلت الحمام غسلت وشها بـ غسول ودهنت شعرها سيرم وعملته ضفيره نازله على كتفها ، وحطت كريم اساس عشان تدارى الهالات السوده وتقلت جواجبها بقلم حواجب وحطت بلاشر خدود بسيط جداً وكأنها كانت بتوصل لـ دياب ان اللى الحاله اللى هو بيشوفها عليها بره البيت هى الحاله الطبيعيه رغم ان ولاء حلوة على طبيعتها لكنها كانت عايزه تبان فى نظر دياب انها اجمل واحده فى كل حالاتها ، اتصورت ولاء كام صورة وبعتتهم لـ دياب على الواتس اب وقعدت تستنى اتصال دياب ، بعد شوية دياب كان شاف الصور وكلمها .)
ولاء : مبتردش على الواتس اب ليه ؟
دياب : هو انا بعد الجمال ده فقدت النطق اصلاً
ولاء : متأڤورش
دياب : لا بجد زى القمر
ولاء : يعني عجبتك ؟
دياب : نعم !!
ولاء : عجبتك ؟ انا عجبتك ولا لا ؟
دياب : ده على اساس انى كنت مستنى الصورة دى عشان تعجبيني ، انا من يوم ما شوفتك وانا بحبك وعجبانى
ولاء : بحبك اوى بقي
دياب : وانا بعشقك
*_____________________________________________**___________________________*
فى بيت مجدى فاضل ....
(. هادى قاعد فى البلكونه بيكلم ملك فى الموبايل ومقضيها حب ورومانسيه ، خلص المكالمه مع ملك ودخلت عليه مامته .)
هدى : ايه يا باشمهندس لحقت
هادى : لحقت ايه ؟
هدى : لحقت تزهق وتعرف واحدة
هادى : انتِ فاكرة انى بكلم واحدة ؟
هدى : امال مين اللى بتقولها خدى بالك على نفسك يا حبيبتى
هادى : دى ملك
هدى : انت لقيتها ؟
هادى : ورجعنا لبعض
هدى : انت بتتكلم جد ؟
هادى : اه لقيتها
هدى : وهتخطبها قبل ما تسافر
(. يقعد هادى على كرسى ويهرش فى ودانه .)
هادى : لا لسه مش دلوقتى
هدى (تقعد قصاده) : نعم !! ليه ايه المانع لسه هتتعرفوا على بعض
هادى : اصل عندها ظروف
هدى : ظروف ايه ؟
هادى : بغض النظر عن ظروفها فى كام حاجة عايز اتأكد
هدى : تتأكد من ايه ؟ انت شاكك فيها
هادى : ما علينا يا ماما ، متشليش هم انتِ ، الاجازة الجاية هخدها فى اقرب فرصه وهنزل اشوف بقي اخطبها ولا لا
هدى : ربنا يكتبلك الخير يا ابنى
*_____________________________________________**___________________________*
فى عمارة عائلة السلحدار ......
(. وليد خارج من العماره لقى هيام فى وشه داخله العماره .)
هيام : اذيك
وليد : كويس
هيام : انا روحت لـ ملك
وليد (مش مستوعب) : روحتى لـ ملك !! ملك مين
هيام : هيكون ملك مين هو فى غيرها
وليد : ملك بنت عمك
هيام : اه
وليد : روحتيلها ليه ؟ ورضيت تقابلك
هيام : ومتقابلنيش ليه ؟
وليد : انا قصدى يعني عشان الظروف اللى حصلت
هيام : انا ماليش دخل فيها وعموماً انا روحت عشان ارجع المياة لـ مجاريها
وليد : مش فاهم
هيام (وهى داخله من البوابه) : بحاول اقنعها بيك
وليد يمسكها من ايدها : بتتكلمى جد ؟
هيام : لما تلاقيها بتكلمك هتعرف انى مكنتش بهزر
(. هنا يجي فاروق ابو هيام ويكون واقف على السلم بتاع المدخل وينادى بصوت اجش "هيام" .)
هيام : بابا !!
فاروق : بتعملى ايه عندك ؟
وليد : احنا اتقابلنا بالصدفة وهى .......
فاروق يقاطعه : انا مسألتكش ، انا بسأل بنتى
هيام : مفيش يا بابا انا قابلت وليد بالصدفه وكنت بسأله عن ولاء لانى مشوفتهاش
فاروق : طيب اطلعى
(. طلعت هيام العماره وركبت الاسانسير ، نزل فاروق الخمس سلمات اللى واقف فوقهم وقرب من وليد .)
فاروق بحزم : بنتى لا يا وليد ، فاهم يعني ايه بنتى لا
وليد : عمو انا معملتش حاجة وهيام دى اختى زى ولاء بالظبط
فاروق : فى نظرى هى مش اختك ومش زى ولاء . انا حذرتك هيام بنتى لا ، صدقيني انا ممكن اطير فيها رقبتك
وليد : حاضر يا عمو ، انا اسف
(. بصله فاروق نظره طويله وبعدها طلع فوق تانى .)
وليد لنفسه >> يا تري يا هيام بتتكلمى جد ولا ده اى كلام ، ااااه يا ملك يا حبيبتي وحشتيني اوى
*_____________________________________________**___________________________*
فى بيت محمود السلحدار ...
(. ملك كعادتها قاعدة فى بلكونه اوضتها وممدده رجلليها على كرسي قصادها وبتدخن سيجارتها وحاطه اللاب على رجليها بتابع صفحتها على الفيس بوك وبتقرآ الرسايل عشان تشوف هل هتاخد شغل جديد ولا لا ، ملك كانت ناسيه تقفل الاوضه بالمفتاح ، فـ مليكة فتحت الباب ودخلت عليه وفى الثوانى دى كانت ملك طفت السيجاره وخبيت الطفايه وعليه السجاير والولاعه وقامت تشوف مين فتح الباب .)
ملك : هو انتِ خضتيني
- مليكة بتتكلم كلام طفولى مش مفهوم وبتشاور بالسبابه
ملك بعصبيه : بنت انتِ انا مبفهمش لغة الخرس بتاعتك دى روحى لـ ماما هى هتفهمك
- مليكة حسيت بعصبيه ملك او انها زعلت ملك فـ حضنت رجليها
ملك بتبعدها : مليكة ، روحى لـ ماما انا مبفهمكيش (بصوت واطى) ومبطيقكيش
- مليكة مستمرة فى الكلام بطريقه مش مفهومه
ملك : يووووه بقى
(. وتخرج ملك من اوضتها ومليكه بتجرى وراها عشان تلحقها لان خطوات ملك سريعه وكانت بتنادى على مامتها فـ راحتلها لقيتها بتختم الصلاة .)
فريال(بعد ما سلمت) : فى ايه ؟
ملك : تعالى خدى البت دى من عندى
فريال : البت دى !! طيب احنا اسفين انها راحتلك
ملك : ماما لو سمحتى متكبريش الموضوع
فريال : لا مكبراه ولا مصغراه ، اى خدمات تانيه
- قطعت مليكة كلامهم بطريقتها الغير مفهومه وصوتها العالى
ملك لـ مليكة : ما تسكتي بقي شوية مفيش حاجة بـ تهدك
فريال بعصبيه : بعد الشر عليها من الهدة
- مليكة تحضن رجل ملك تانى
ملك بتبعدها : خليكي هنا ومتجيش عندى (وتخرج ملك من اوضة امها)
فريال بتحضن مليكة : والله ما تستاهل حبك ليها ، اوعى تعبريها لحد ما العفريت اللى راكبها ده يسيبها
(. ترجع ملك لوضعها التقليدي فى البلكونه ولكن بعد ما تقفل الباب بالمفتاح وتلاقى مُعز اخوها مكلمها سكايب كتير فـ اتصلت بيه .)
مُعز : انتِ فين كده ؟
ملك : فى البيت بس كنت عند ماما فى اوضتها
مُعز : انا قصدى انتِ فين بقالك كام يوم
ملك : معلش نفسيتي مكنتش متظبطه
مُعز : طيب افهم حوار الفلوس وبعدين اطمن على نفسيتك
ملك : فلوس ايه
مُعز : هنستعبط اهو
ملك : اهاا لا خلاص هقولك
مُعز : قولى ، بس قولى دى فلوس ايه وجيباها منين ومخبياها ليه
ملك : كل ده
مُعز : عندك مانع
ملك : لا
مُعز : خلاص اتفضلى قولى
ملك : ............................
اشوفكم الحلقة الجاية
ارجو التقييم بـ تعليق :)
*_____________________________________________**___________________________*
بـ قلم / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
www.wattpad.com/alaaelsherifi
0 التعليقات :
إرسال تعليق