الحلقة الحادية عشر
بعد ما يستوعب هادى يقرب من ملك ويقف قصادها وملك كانت بتلعب فى الموبايل ، تحس بوجود حد واقف قصادها تبص تلاقيه هادى ، عينها توسع وتبرق ووشها يقلب الوان ، تقف قصاده ببطء بيفصل بينهم ترابيزه وكرسي ، فضلوا يبصوا لـ بعض وهما مش مستوعبين ولا عارفين يقولوا ايه ، خوف ، شك ، قلق ، حزن ، ندم ودموع كل ده فى عيونهم ، فى نظراتهم ، نظرات طويلة وصمت اطول .)
يقطع هادى الصمت والنظرات : معقوله !! اخر حاجة اتوقعها ان الاقيكي فى الوضع ده
ملك : مانـــا ، انا قولتلك انى اتغيرت
هادى بعصبيه بيحاول يسيطر عليها : اتغيرتى اه بس متوقعتش للدرجة دى !!
ملك : انت ليه محسسنى انك مسكتنى فى شفة مفروشه
هادى : انتِ ازاى بتتكلمى بالبرود ده !!
ملك : وانت ليه مكبر الموضوع كده
هادى : عيزانى اشوفك مستنيه واحد والسيجارة فى ايدك وتقوليلي مكبر الموضوع
ملك : هادى ، انا مستنيه واحد فى شغل مش اكتر
هادى : عارف
(. ويقعد هادى وتقعد ملك وتحط السيجاره على الطفاية .)
هادى : عارف انه شغل وانا اصلاً كنت جاى اكلمك فى الشغل ده بس صُعقت لما لقيتك بتدخنى
ملك باستهتار : تتكلم فى الشغل !! ليه !!
هادى : ليه !! مش عارفه ليه
ملك : انا مبشتغلش حاجة حرام ولا عيب
هادى : عارف ، بترجمى scripts وشغل من عربي لـ انجليزى والمانى وصيني والعكس وعامله اسعار رمزيه عشان تنافسي مكاتب الترجمه
ملك : طيب مانت عارف اهو
هادى بعصبيه : ويارتنى ما عرفت ، انتِ اصلاً مش محتاجه فلوس ولا انتِ خلصتى كلية
ملك : بضيع وقت
هادى : انتِ تعرفى ان ٩٠٪ من الشباب اللى انتِ قابلتيهم كانوا بيخترعوا شغل و scripts عشان يقابلوكى ، عارفه فيهم كام واحد قال انك مقضياها معاه ، عارفه كام واحد قال عليكي مُزة ووصف جسمك ، عارفه كام واحد شافك بتدخني وقال انك شمال
تشد ملك السيجارة من الطفايه وتاخد نفس وترد ببرود : عارفه
هادى بعصبيه يرمى السيجارة من ايدها : انتِ بتستفذينى !!
ملك : من اول يوم شوفتك فيه وانا قولتلك انا اتغيرت ، انا مبقتش ملك بتاعة زمان ، ايوة بشتغل شغل اى كلام ، واغلب اللى بشتغل معاهم شباب جاى يتفرجوا على البنت الامورة اللى جسمها جامد واللى بتدخن وشكلها شمال وموافقه ومعنديش مانع ولا يفرق معايا كلامهم ولا حتى نظرتهم بس يكفى ان مفيش حد فيهم عمل معايا حاجة اكتر من الشغل المطلوب
هادى : انتِ ازاى بقيتي كده وليه اصلاً !! مش خايفة من كلام الناس !! مش خايفة من نظراتهم وفكرتهم عنك
ملك : مش خايفة من حد الا من ربنا ، لكن المجتمع والناس اللى عايشين فيه يولع كلهم بجاز وسخ ولا يفرق معايا حد
هادى : خايفة من ربنا وبتعملى كل ده
ملك : انا مبعملش حاجة يا هادى ، ده شغل مفهوش اى حرمانيه وماليش دعوه بـ نوايا اللى بتعامل معاهم
هادى : والسجاير !!
(. تفتح ملك شنطتها وتطلع منها محفظة وتطلع منها ٢٠٠ جنيه تحطهم قدام هادى ، وبعدين تلم كل حاجتها "الموبايل وعلبه السجاير والولاعه والمحفظة ومفاتيحها" وتلبس شنطتها كروس .)
ملك : دول الـ ٢٠٠ جنيه اللى صاحبك دفعهم مقدم وانا مبخدش فلوس مشتغلتش بيها (وتقوم ويقوم هادى قصادها)
هادى : ملك استنى
ملك : اه بالنسبه للسجاير فهى حرام عليك زى ما حرام عليا بالظبط ، لما تبطلها وترضي ربنا ابقي انصح غيرك
(. وخرجت ملك من الكافيه وراحت عند عربيتها وخرج هادى وراها ولكنه ملحقهاش كانت ملك ركبت العربيه ومشيت .)
__**__**__
توضيح شغل ملك / ملك معاها تلت لغات غير العربي انجليزي والمانى وصيني ، بترجم رسايل الماجستير والكتب والافلام ولكن باسعار رمزية بـعكس مكاتب الترجمه
*_____________________________________________**___________________________*
فى بيت فاروق السلحدار ....
(. هيام وولاء قاعدين مع بعض فى اوضة هيام ، هيام ممدده على السرير وولاء قاعدة على كرسي هزاز فى الاوضة قصاد السرير .)
هيام : ووليد ليه مش عايز يروح للست هانم
ولاء : يا بت افهمى ، ماما عيزاه يروح يشوف بنته
هيام : هو برضه لسه مستنى ملك
ولاء : انا اللى مستغربه انك انتِ لسه مستنيه وليد
هيام : عشان للاسف حبيته بجد وعشان هو عنده ظروف خاصة وانا كمان عندى ظروف خاصة
ولاء باستغراب : ظروف خاصة !! ظروف ايه دى ؟
هيام : فكك
ولاء باهتمام : لا بجد
هيام : بعد ما الزفته ملك دى دخلت فى حياة وليد وانا فقدت الامل فى انه يحبنى ، بعد مشكله جوازهم وطلاقهم دى على طول انتِ عارفه اننا سافرنا
ولاء : اه
هيام : اتعرفت على واد اجنبي وحصل اللى حصل بقي
ولاء بقلق : قصدك ايه !! ايه اللى حصل يا هيام
هيام : اتنيلت على عيني وعملت معاه علاقة كامله
ولاء : يا مصيبتي !! ومتجوزتيهوش ليه
هيام : حظى المنيل بقي ، مات
ولاء : طيب وانتِ هتعملى ايه ؟
هيام : كنت فاكره انه مع الوقت وليد هينسى ملك ويحبنى وانا كنت هحكيله الحقيقة وهو اكيد هيتقبلها
ولاء : وانتِ منين جالك انه هيقبل حاجة زى كده
هيام : لانه برضه كان متجوز ومطلق ومطلق بفضيحه وعنده بنت ، يعني نفس الظروف
ولاء : وانتِ ليه يا هيام وصلتى للمرحله دى
هيام : انا عارفه بقي يا ولاء متفكرنيش ، معرفش كنت مُغيبه ولا ده كان حب ولا اتهبلت على عيني وعين اللى خلفونى ، والله يا ولاء انا ندمانه اوى ربنا يسامحنى بقي
ولاء : ربنا يسامحك يارب ويتوب عنك ويسامحنا كلنا
هيام : عامله ايه مع دياب ؟
ولاء : سيبنا بعض ورجعنا تانى
هيام : انا مش فاهمه دياب ليه مبيخطبكيش رسمي ، ده صاحب اخوكى وجاهز وبتحبوا بعض مستنين ايه
ولاء : بيقول انه لمح لـ وائل ووائل قاله بابا مش ناوى انى اتخطب او اتجوز الا لما اخلص
هيام : وده بجد ؟
ولاء : اه فعلاً انا فاكرة ان مرة الموضوع اتفتح وقال انه مش عايزنى اتشغل قبل ماخلص الكلية
هيام : يا سلام ، طيب مانتِ كده كده مشغوله ، يبقي تنشغلى رسمي احسن
ولاء : يا بنتى مينفعش حد يعرف انى مرتبطه بـ دياب هيبقي شكله وحش اوى ادام وائل واهلى
هيام : طيب خدى بالك بقي منه شكله مش مريحنى
ولاء : مش مريحك ليه ؟
هيام : مفيش واحد محترم يبص لـ اخت صاحبه وكمان يرتبط بيها وميتقدمش رسمى
ولاء : على فكرة بتحصل كتير اوى
هيام : طيب حطيه فى اختبار
ولاء : اختبار ايه ؟
هيام : قوليله ان متقدملك عريس وفى موافقه شبه مبدأيه من باباكى
ولاء : ماهو هيروح يسأل وائل
هيام : لو سأل وائل يبقي هو بيتسلي ، لكن لو راح اتقدم بدون ما يتأكد اذا كنتى بتكدبى ولا لا يبقي هو اللى يهمه انك متكونيش لحد غيره فهمانى
ولاء : اه
هيام : جربيها بقي
ولاء : ربنا يستر ، بس انتِ هتعملى ايه ؟
هيام : مش بفكر فى الموضوع ، اديني مشغوله فى الدراسه ولما يجي وقته بقي يبقي يحلها ربنا
ولاء : ربنا يسترها معاكى يا هيام
*_____________________________________________**___________________________*
فى احدى الكافيهات ....
(. ملك مروحتش على البيت ، بعد ما خلصت مع هادى كلمت يزن وقالتله انها محتاجه تقابله ضرورى واتفقوا على المكان والمعاد وقفلت ملك موبايلها وراحت تستنى يزن فى الكافيه اللى اتفقوا يتقابلوا فيه ، جه يزن لقي ملك قاعدة على ترابيزه وبتشرب سجاير بطريقة مبالغ فيها وقدامها اسبريسو دوبل ، يزن كان باين عليه الارهاق والقلق وقلة النوم لان ملك صحيته من نومه وكان باين على هدومه الاستعجال .)
يزن(قبل ما يقعد) : مالك يا ملك فى ايه ؟
ملك : اقعد يا يزن
يزن : مالك قلتيني ، صوتك كان باين عليه الخنقه والعياط ، وايه كمية السجاير دى
ملك : انا مخنوقه اوى (وشاورت ملك لـ الـ waiter )
النادل : اوؤمرى يا افندم
ملك : عايزة واحد اسبريسو دوبل كمان
يزن : اسبريسو دول كمان !! هو انتِ شاربه واحد قبل كده
ملك : اه
يزن لـ النادل : هات اتنين عصير ليمون بعد اذنك
ملك : انا عايزه اسبريسو
يزن : انا مش مليون مره قولتلك خفى شوية من المكيفات دى مش كفاية السجاير
ملك : يوووه
يزن : فى ايه ؟
ملك : هادى ، هادى كان عاملى فخ عشان يعرف انا بشتغل ايه
يزن : طيب وفيها ايه ؟
ملك : بيقول ان ٩٠٪ من الشباب اللى بيجبوا ليا شغل اعمله بيكونوا مخترعينه عشان يجوا يقابلونى وبيقولوا انى شمال عشان مُدخنه وكلام من اللى انت عارفه
يزن : طيب مانا قولتلك الكلام ده فى يوم من الايام وانتِ مهتمتيش وقولتى انه مش فارق معاكى ، ايه اللى جد بقي ؟
ملك : مش عارفه ، مش عارفه ليه مضايقه ومخنوقه
يزن : مش يمكن عشان هادى هو اللى شافك فى الوضع ده
ملك : وضع !! وضع ايه ، هو انا كنت بعمل حاجة غلط
يزن : ملك ، متضحكيش على نفسك انتِ عارفه ان السجاير دى سوأت سمعتك وناس كتير خدوا عنك فكرة غلط وانتِ بنفسك حكيتلى انك كنتى بتبقي فى اماكن عامه وفى شباب بيعرضوا عليكي تروحى معاهم ، انتِ برضه عارفه ان شغلك ده مفيش منه اى تلاتين لازمه غير انك بتحتكى بـ اقذر ناس فى المجتمع ، انتِ مش محتاجه منه فلوس ولا انتِ مخلصه كليه وعندك فراغ
ملك : انا ............
يزن يقاطعها : ولا هو بيضيعلك وقتك يا ملك ، قوليلي شغلك ده بيعطلك عن التفكير فى كل اللى حصلك ، بينسيكي اسوأ نص ساعة قلبت كيانك ، ملك انتِ اشتغلتى الشغلانه دى لـ غرض معين انا مش فاهمه بس مش عشان تضيعي وقت
ملك : كفاية بقي يا يزن انا مكلماك عشان تريحني ولا عشان تتعبنى اكتر
(. هنا جاب النادل العصير وقامت ملك دخلت التواليت غسلت وشها عشان تفوق ورجعت تانى .)
يزن : اشربي العصير
(. تمسك ملك العصير وتبدأ تشربه وكذلك يزن .)
يزن : مش هتقوليلي ليه كنتى بتعمل الشغل ده
ملك : لما اعرف ليه البنت اللى بتشرب سجاير شمال والشاب اللى بيشرب اى حاجة يبقي روش
يزن : هو ده المجتمع وهو ده تفكيره ومش انتِ اللى هتغيري الكون ، زى بالظبط الربط بين البنت واخلاقها ، زى نظرتهم للبنت المطلقة وزى برضخ نظرتهم للبنت اللى تعرضت لـ اغتصاب او تحرش
(. تلمع دمعه فى عين ملك وتحط العصير على الترابيزه .)
يزن : ملك انا اسف ، انا قصدى اوصلك ان كل دى اعتقادات خاطئة في مجتمعنا
ملك : وانا مضايقتش ، انا عمرى ما حسيت بالنقص لـكونى مُطلقة
يزن : قومى معايا
ملك : هنروح فين
يزن : قومى بس
(. ودفع يزن الحساب وخد ملك وراح بيها الملاهى وقضوا اليوم كله هناك ونسيت ملك اى ضيق او زعل ، قضوا هناك اكتر من اربع ساعات .)
__**__**__
فـى الـمـلاهـى ....
(. يزن يجيب لـ ملك غزل بنات ويديهولها .)
ملك : الله ، غزل بنات ، بقالى كتير اوى مكلتهوش
يزن : من امتى ؟
ملك : من يوم ماطلقت وبقالى تلت سنين تقريباً مروحتش ملاهى
يزن : طيب انسى بقي ، احنا النهاردة جايين عشان نتبسط
ملك : انا فعلاً مبسوطه اوى ، بقالى كتير مضحكتش من قلبى
يزن بـ لمعه حب فى عينه : نفسك فى ايه تانى ؟
ملك : ايس كريم وشوكولاته وعايزة مصاصه ومارشميللو وجيلي كولا
يزن : ده انا اجبلك الدنيا كلها لحد عندك
(. يزن جاب لـ ملك كل اللى هى طلبته وبيتمشوا سوا وملك بتطلع من الكيس وتاكل .)
ملك : عارف يا يزن ، انا بقالى سنتين واكتر عايشه على السجاير والقهوة والاسبريسو ، حتى اكلى خفيف اوى
يزن : امممم ، باين على وزنك انتِ كام كيلو
ملك : هقولك بس متتخضش
يزن : خليني اخمن ، ٥٠ كيلو صح
ملك : ٥٣
يزن : بس انتِ ميزتك ان جسمك بيخس بس وشك محتفظ بجماله
ملك : ههههه ميرسي ميرسي
(. بعد شوية من الرغى والضحك ، ركبوا عربيه يزن عشان يزن يوصل ملك عند عربيتها عشان يروحوا .)
ملك : ممكن تقف عند اى سوبر ماركت
يزن : ليه ؟
ملك : عايزة اشترى حاجة
يزن : اوكى انزل اجبهالك
ملك : لا لا هنزل انا
(. ونزلت ملك وراحت السوبر ماركت جابت اكياس مصاصات واكياس مارشميللو وجيللي كولا كتير وبرنجلز وشوكلاوتات كتير وانواع اكتر .)
يزن : ايه ده !! ايه كل ده
ملك : ده ، ده لـ مليكة
يزن : مليكة اختك ؟
ملك : اه ، اصلها بتحب الحاجات دى اوى برضه
يزن : طلعالك ؟
ملك : معرفش جايز
يزن : بس انتِ مكنتيش بتحبيها زى ما بتقولى ليه جبتيلها حاجات زى دى
ملك : انت فرحتنى اوى النهارده يا يزن ، وبسبب الفرحه هتلاقى تصرفات غير معتاده وطبيعيه
يزن : زى .......
ملك بابتسامه : زى انى عايزة افرح مليكة
*_____________________________________________**___________________________*
فى بيت عادل السلحدار .....
(. ولاء بتكلم دياب فى الموبايل .)
دياب : اخر مرة تجي المكتب فاهمه
ولاء : ليه
دياب : عشان اللى حصل ده مش عايزه يحصل تانى
ولاء : تمام
دياب : قوليلي بقي حسيتي بـ ايه ؟
ولاء : والله انت رايق يا دياب
دياب : وانتِ ليه مش رايقه ؟
ولاء : انا متقدملى عريس
دياب : طيب وايه المشكله !! كده كده باباكى مش هيوافق
ولاء : لا فيه موافقه مبدأيه
دياب : نعم !! واشمعنى وائل قالى ان استحالة يوافقوا قبل ماتخلصي
ولاء : معرفش بقي ، بس قالوا ان العريس ده مناسب وفرصه
دياب : وانا يعني اللى مش مناسب !!
ولاء : انا عارفه بقي
دياب : انا هكلم وائل وهقوله انى عايز اخطبك وعليا بقي وعلى اعدائي
ولاء : بجد هتكلمه
دياب : بكرة الصبح اول ماشوفه
ولاء : طيب ابقي طمني
دياب : ولاء حبيبتى ، اوعى تقلقى انتِ ليا انا وبس
ولاء : بحبك
دياب : وانا بموت فيكي
*_____________________________________________**___________________________*
فى بيت مجدى فاضل .....
(. هادى قاعد فى اوضته مخنوق جداً ، عماله يفكر فى الموقف ككل ، عماله يفكر ايه اللى حصل لـ ملك حولها كده ، عمال يفتكر كلام صاحبه وصاحب صاحبه عليها ، عماله يدور على سبب واحد يخليها كده مش لاقى ، عماله يستوعب صدمته ، عمال يحارب خيالاته وتوقعاته فى ايه تانى ممكن تكون بتعمله ملك ، يتصل هادى بـ ملك كتير ولكن موبايلها لسه مقفول من ساعة ما كان معاها ، تدخل عالية على هادى اوضته وتعرف انه مخنوق من كم السجاير اللى شربها .)
عالية : ايه يا هادى مالك ؟
هادى : فى ايه ؟
عالية : من ساعة ما جيت من بره وانت مش مبطل شرب سجاير وانت اصلاً كنت بتبطل ايه اللى حصل
هادى : مفيش حاجة سبيني لوحدى
عالية (تدخل وتقفل وراها) : من ساعة الاتصال اللى جالك واحنا قاعدين مع بعض وانت مش على بعضك
هادى : تخيلي يا عالية ، ملك ، الرقيقه الملاك بتشرب سجاير
عالية : طيب مانت بتشرب سجاير
هادى : نعم !!
عاليه : ايوة ، انت بتشرب وهى بتشرب ، انت بتضر صحتك وهى بتضر صحتها ، انت بتغضب ربنا وهى بتغضب ربنا ، ايه الفرق
هادى : الفرق انها بنت
عالية : وهو يوم القيامه ربنا هيقولك تعالى على جنب عشان انت راجل
هادى : انتِ بتبررلها بقي ؟
عالية : انا ماببررش ، انا بوضحلك ، حاسب نفسك قبل ما تحاسب غيرك
هادى : قومى يا عاليه ، قومى اخرجى بره ، انتِ جاية تحرقى دمى اكتر ماهو
عالية : يا هادى اقعد معاها وافهم منها ليه عملت كده ، انحراف مثلاً ولا اكتئاب بس للاسف مينفعش تقعد تحل معاها عقدتها وانت ماسك فى ايدك سيجارة
هادى : يوووه بقي
عالية : طيب سيبك من الحوار ده ، ايه حكايه الشغل اللى مش مناسب اللى بتشتغله ملك
هادى : عرفتى منين ؟
عالية : انت لما سألتنى انا وهايدي شكينا
هادى : حكى لها طبيعه شغل ملك
عالية : طيب وفيها ايه ؟
هادى : ليه يعني الشغل السواحيلي ده اللى بيخليها تحتك بالسافل قبل المؤدب ، يا بنتى واحد صاحبى بنفسه قالى ان صاحبه كان بيخترع حاجات محتاجه ترجمه عشان يقابلها ويقعد معاها لانه فاكرها شمال ويجي منها
عالية : بص يا هادى ، ملك اكيد في اسباب قوية وصلتها لكل ده ، اقعد معاها واتكلم معاها بهدوء وبعقل ، حاول تعرف مالها ، ساعدها واقف جنبها طالما بتحبها
هادى : وافرض مرضيتش تقولى اسباب
عالية : حاول بكل الطرق ، يا سيدى اعمل معاها زى ما بتعمل معايا انا وهايدي صاحبها واديها الامان ، احتوى خوفها ومشاكلها
هادى : ربنا يستر
*_____________________________________________**___________________________*
فى بيت عادل السلحدار ......
(. وائل ووليد قاعدين على السطوح بيتكلموا سوا .)
وائل : انت ليه مش عايز تروح تشوف بنتك
وليد : يا عم انا مش عايز اروح فى داهيه ، انا شوفت ايام سوده
وائل : طيب ايام وعدت
وليد : عدت ازاى !! انت ناسي ان عمك معاه اوراق ضدى توديني فى داهيه لو قربت من ملك او مليكة
وائل : روح فى توقيت شغله
وليد : وهو مرات عمك مش هتقوله يعني ده ان فتحتلى
وائل : على فكرة انت مُسالم زياده عن اللزوم فى حين انك ممكن تخطفها
وليد : انت اهبل ، القانون ميسمحليش بـ كده لان ملك متجوزتش تانى ومن حقها حضانة البنت وبعدين حتى لو يسمحلى عمك هيوديني ورا الشمس
وائل : انت حر بقي بكره تندم لما تلاقيها مقبالك فى حته ومش عرفاك
وليد : لما تكبر هقدر اقرب منها وافهمها
وائل : ربنا يديك ويدينا طولة العمر بقي
(. بعد شوية من الصمت .)
وائل : ما تحاول تفكر بـ جدية فى موضوع هيام
وليد : مش عارف ليه مش مستريح لـ هيام حاسس ان وراها مصيبه
وائل : مصيبة ايه يا جدع متظلمهاش
وليد : يا عم واحدة حلوة زيها ، عايشة بره وعارفه انا بحب ملك قد ايه متمسكه بيا ليه رغم ظروفى المهببه لا شغل ولا شقه ولا مستقبل وماضى زى الزفت
وائل : بـ تحبك
وليد : عايز تقنعنى ان واحدة زى هيام بـ دماغها السطحيه دى هتسيب الشباب اللى بره وتفضل تحبنى وهى عارفه انى مبحبهاش
وائل : بقولك ايه ، انت عايز اى حجه تهرب بيها من هيام ومش عايز تقول انك مش شايف غير ملك فـ مترميش بقي الناس بالباطل
وليد : طيب ياخويا ابقي اخطبها انت
وائل : بفكر
*_____________________________________________**___________________________*
فى بيت محمود السلحدار ...
(. ملك راجعه من بره ، لابسه شنطتها كروس وشايله الكيس اللى جيباه لـ مليكة فى ايد وبتفتح الباب بالايد التانيه ، دخلت ملك وقفلت الباب وفضلت تنادى على مليكة "ليكة ، يا موكى ، انا جيت" ، كانت مليكه مع محمود وفريال فى الـ living ، استغربوا جداً وبصوا لـ بعض لما سمعوا ملك بتنادى على مليكه اما مليكة كعادتها لما تسمع باب بيتفتح او بيتقفل او حد بينادى عليها تطلع تجرى ، قامت تجرى وقام وراها محمود وفريال لاستغرابهم وقلقهم ، نزلت ملك على ركبتها وجريت عليها مليكه حضنتها بعد ما كانت ملك فتحت لها دراعاتها ، وده كان اول حضن تحضنه ملك لـ مليكة من يوم ولادتها ، فضلت مليكة تكلم ملك كلام مش مفهوم وملك مندمجه معاها وبترد عليها كأنها فهماها وده برضه عكس عادتها ، اديتلها الكيس وفرحت مليكة بيه جداً وقالتلها ملك "عايزة بوسه من موكى" ، راحت مليكة بيساها اكتر من بوسه فى خدها وشفايفها ، خدت مليكة الكيس وقعدت بيه فى الصالون اللى كان قصاد باب الشقة وقعدت مليكة تطلع اللى فيه ، قلعت ملك الشوز بتاعها وراحت قعدت جنب مليكة ورفعت رجليها على ترابيزه الصالون اللى قصادها ، مليكة كانت تديها الحاجه اللى عايزه تاكلها وملك تفتحلها ومليكه كانت تدى ملك فى بوؤها مره وتاخد هى مرة وهكذا ، لحد ما ملك قالتلها "طيب ما تجى ندخل اوضتى" ، وقالتلها مليكة "ماى" بمعنى ماشى ، وشاليتها ملك وشالت الكيس ودخلت بيها اوضتها وقفلت وراها ، ومحمود وفريال حاسين او متأكدين انهم بيحلموا لدرجة ان محمود قال لـ فريال "خدى بالك لا تكون ملك عايزه تأذى مليكه وعامله كل ده عشان تاخدها اوضتها" .)
__**__**__**__
فى اوضة ملك ...
(. ملك قاعدة هى ومليكه على السرير بياكلوا سوا وبيتكلموا على الرغم من صعوبه فهم لغه مليكة ، ملك جابت الموبايل بتاعها وحطيته فى الشاحن ، بعد ما فتح لقيت هادى اتصل بيها كتير فـ قررت تتصل بيه .)
هادى : اخيراً فتحتى موبايلك
ملك : كان فاصل شحن
هادى : ومشحنتيهوش ليه
ملك : نسيته
هادى : ملك انتِ لسه بتحبيني
ملك : مكنتش رجعتلك
هادى : طيب ليه مقولتليش على شغلك ده !! وليه مقولتليش انك بتدخنى
ملك : من الحاجات اللى حبيت احتفظ بيها لنفسى
هادى : زمان مكنش فى فرق بيني وبينك ، كنا واحد
ملك : وانا من بعد ما اتقابلنا تانى وانا بقولك انا مش ملك بتاعة زمان
هادى : طيب يا حبيبتى ليه متقعديش معايا وتفهميني ، ايه اللى حصلك ، طيب بلاش تحكيلي تعالى نشجع بعض ونرجع زى الاول ، تعالى نشجع بعض عن اننا نبطل تدخين
ملك : انا بحبك اوى يا هادى
هادى : وانا بموت فيكي يا ملك وعايزك تبقي احسن واحدة فى الدنيا
ملك : وانا عمرى ما هبقي كده ، انا بقيت سيئه اوى
هادى : ليه بتقولى كده ؟
ملك : دى نظرتى لنفسى
هادى : اتمنى يا ملك مكشفش حاجة جديدة فى المستقبل
ملك : مقدرش اوعدك
هادى : ليه ؟
ملك : عشان فى حاجات كتير اوى انت متعرفهاش عنى
هادى : طيب عرفيني
ملك : مقدرش
هادى : طيب يا ملك انا هسيبك براحتك
ملك : انا اسفة يا هادى
هادى : متتأسفيش بس حاولى نتقابل بكره
ملك : ان شاء الله
(. وقفلوا وكملت ملك لعب مع مليكة لحد ما راحوا فى النوم هما الاتنين .)
*_____________________________________________**___________________________*
تانى يوم الصبح فى شركة وائل ودياب ....
(. وائل كان فى مكتبه ، دخل عليه دياب وهو مضايق جداً .)
وائل : ايه يا عم البوز ده ، شكلك يسد النفس على الصبح
- يقعد دياب وميتكلمش
وائل : مالك يااااد
دياب : انت مطلعتش جدع على فكرة يا وائل
وائل باهتمام : انا !! ليه ؟
دياب : .....................
اشوفكم الحلقة الجاية
ارجو التقييم بـ تعليق :)
*_____________________________________________**___________________________*
بـ قلم / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
www.wattpad.com/alaaelsherifi
0 التعليقات :
إرسال تعليق