نص ساعة (السابعة)

الحلقة السابعة 

مُعز : قولى ، بس قولى دى فلوس ايه وجيباها منين ومخبياها ليه

ملك : كل ده

مُعز : عندك مانع

ملك : لا 

مُعز : خلاص اتفضلى قولى

ملك : انت عملت ايه فى مشكلتك ؟

مُعز : زى ماهى ، اوعى تكونى قولتى لـ بابا او ماما

ملك : انت عارف مبحكيش ومبتكلمش كتير

مُعز : انا مش فاهم حاجة ايه علاقة ده بـ ده ولا انتِ بتوهيني

ملك : مبتوهكش والله ، انا كان معايا ٤٠٠٠ جنيه قدرت اجمع عشرين الف جنيه عشانك

مُعز باستغراب : عشانى !!

ملك : ايوة انا عملتلك ايداع بـ مبلغ عشرين الف جنيه عشاان يساعدوك فى المشكله اللى عندك اللى هى خاصة بالاقامه والجو ده

مُعز : انتِ اتجننتي يا ملك !! انا كنت بحكيلك عشان احنا مبنخبيش عن بعض حاجة وعشان افضفض معاكى مش عشان تساعديني

ملك : انت اللى اتجننت لو فاكر انك تبقي واقع فى مشكله وانا ماسعدكش

مُعز : انت جبتى المبلغ ده كله منين ممكن اعرف 

ملك : جبته من مكان ما جبته ومتقلقش بابا وماما ميعرفوش حاجة ، انا مش هديهم فرصه يشمتوا فيك او يقلقوا عليك

مُعز : جبتى الفلوس دى منين يا ملك ، دول عشرين الف جنيه

ملك : قولى الاول انت ازاى المبلغ موصلكش ؟ انا عامله ايداع من اكتر من اسبوع

مُعز : انتِ عملتى ايداع على حسابي المصري انا مبستخدمهوش هنا 

ملك : بس الكريدت كارد شغاله عندك مش هى master ؟ 

مُعز : اه تقريباً لسه منتهتش 

ملك : طيب يا حبيبى ، روح بقي اسحبهم عشان تعرف ترجع شغلك تانى

مُعز : جبتى الفلوس دى منين يا ملك ؟

ملك : يوووه بقى يا مُعز ، انا كان ٤٠٠٠ جنيه بتوعى واتصرفت فى الباقى

مُعز : ملك اوعى تكونى .......

ملك تقاطعه : متفكرش كتير ، المهم ان مشكلتك تتحل 

مُعز : ميهمنيش ان المشكله تتحل قد ما يهمني اعرف جبتيهم ازاى ، ملك انا مبتكلمش عن الف ولا الفين ولا حتى عشره دول عشرين الف فاهمه يعني ايه عشرين الف ؟

ملك : ممكن بقي متفضلش تزن ، وشوف بقي المبلغ لما يتحول عندك هيكفى ولا لا

مُعز : ملك انتِ بعتى من دهبك صح ؟

- ملك ساكته

مُعز بعصبيه : ملك ، بعتي من دهبك صح ؟ ردى

ملك : اه انا بعت اسورة بس مش حاجات كتير يعني

مُعز : ليه يا ملك عملتى كده !! ده انا مرضتش اقول لـ ماما عشان متعملش اللى انتِ عملتيه ده

ملك : مُعز ، انا مبلبسش دهب وانت عارف وكده كده محدش هيسأل عليها وبعدين يغور الدهب كله قصادك ملصحتك

مُعز : هبعتلك الفلوس وتروحى ......

ملك تقاطعه : بطل عبط ، احنا ملناش الا بعض

مُعز : اخر مرة

ملك : ربنا يسهل ، ابقي طمني بس الفلوس كفتك ولا لا

مُعز : ماشي يا ملك

*_____________________________________________**___________________________*

بعد كام يوم فى بيت مجدى فاضل ....

(. فى الـ living room كان قاعد هادى وعاليه وهايدي بيتفرجوا على فيلم ، عالية وهايدي كانوا مركزين اوى اما هادى فـ كان قاعد بنص عقل .)

هايدي : هادى انت معانا

هادى : عايزه ايه ؟

هايدى : مفيش كنا بنكلمك بس واضح انك مش مركز معانا ولا مركز فى الفيلم

هادى (يقفل الصوت ويتعدل فى قعدته) : عايز اسألكوا سؤال مهم جداً

عالية : اسأل

هادى : ايه اللى يخلي واحدة بنت ناس كويسين واغنياء ومحترمين ، يعني هى المفروض ان اخلاقياً محترمه والمفروض انها غنيه مش محتاجه فلوس ...........

هايدي تقاطعه : دى ملك ؟

عالية : استنى كمل السؤال

هادى : عايز يعني اعرف ايه اللى يخلى واحدة بالمواصفات دى تشتغل شغلانه مش مناسبه ، مش مناسبه لـيها بأى شكل من الاشكال

عالية : على حسب المهنه ، يعني هل المهنه دى منافيه للاخلاق او مثلاً .....

هايدي تقاطعها : على فكرة مش لازم تكون منافيه للاخلاق ، المهم انها مش مناسباها يعني هي معندهاش مبرر تشتغل شغل مش مناسبها

عالية : لا طبعاً يا هايدي ، مفيش اى مشكله فى الشغل طالما مش ضد الاخلاق

هايدي : والاخلاق دى حاجة نسبيه

عالية : ده اللى هو ازاى يعني !! تشتغل رقاصه ولا فتاة ليل وتقوليلي الاخلاق دى حاجه نسبيه

هايدي : وانا مش قصدى على الحاجات دى انا قصدى يعني الطبقات الاجتماعيه العاليه اوى مبيسمحوش لـ بناتهم يشتغلوا اى شغل وبيعتبروها ضد مبادئهم واخلاقهم

هادى : ياختااااى كفاية رغى ، خلينا نفترض انها بتشتغل شغل عادى بس مش مناسب ليها ولا لمستواها ولا محتاجه منه فلوس تفتكروا تشتغلوا ليه ؟

عالية وهايدي فى نفس واحد : فراغ

هادى : وايه تانى غير الفراغ ؟

عالية : ملهاش سبب تانى غير الفراغ

هادى : طيب خلينا نفترض انها بتشتغل شغلانه يرفضها الدين و المجتمع والقانون كمان

هايدي : فى علم النفس الجنائي الانحراف مالوش علاقة بـ المستوى الاجتماعى

عالية : صح عندك حق ، يعني على حسب مواصفاتك انها المفروض مش محتاجه مادياً وانها بنت ناس فـ الانحراف عندها هوايه

هايدي : وممكن تكون حاله نفسيه على فكرة

عالية : هى مين دى يا هادى ؟

(. يسند هادى ضهره على الكرسي ويرجع ايده لورا ويسند عليها دماغه .)

هادى لنفسه >> لا هوايه لا حالة نفسيه !! لاما فراغ

__**__**__**__

(. يقوم هادى ويخرج من الـ living room ويروح اوضته ويمدد على السرير ويتصل بـ ملك يلاقيها مشغوله كتير وبعد كده ترد .)

هادى : ايه يا حبيبتى فينك كده ؟

ملك : موجوده

هادى : بكلمك بقالى شوية بيدينى مشغول

ملك : اه كنت بكلم الموبايل وانا مش مشغله خاصية الانتظار

هادى : كنتِ بتكلمى مين ؟

ملك : مُعز اخويا

هادى : اااهاا تمام ، وحشتيني على فكرة

ملك : وانت كمان وحشتني

هادى : ملك انتِ لسه بتحبيني زى زمان ؟

ملك : مش انت قولت انك حسيت انى بحبك زى زمان واكتر

هادى : فى فرق بين انى احس وانك تقولي واحسها من صوتك ولهفتك عليا

ملك : صدق احساسك يا هادى ، انا بحبك اكتر من زمان

هادى : اه صحيح كنت عايز اسألك على حاجة

ملك : حاجة ايه ؟

هادى : مفيش حاجة مخبياها عليا ؟

ملك : هو ده السؤال ؟

هادى : اه ، عايز اعرف فى حاجة معينه انتِ مخبياها عليا ؟

ملك بتوتر : لـ لا

هادى : متأكده ؟

ملك : انت ليه بتسأل السؤال ده ، يعني انت عارف حاجة معينه انا مخبياها

هادى : لا بس انتِ بتقولى ان احنا بقالنا سنين بعيد عن بعض واكيد حاجات كتير اوى اتغيرت فينا وحوالينا والاكيد برضه ان فى حاجات كتير حصلتلنا فـ عشان كده بسأل مش اكتر

ملك : انا حاسه انك بتسأل السؤال ده لـهدف معين ؟

هادى : يعني ايه ؟

ملك : يعني عارف حاجه معينه وبتسأل عليها

هادى : تمام فكك من الحوار ده

ملك : زى ما تحب

هادى : اخبار مليكة ايه ؟

ملك باستغراب : مليكة !! اشمعنى ؟

هادى : عادى يعني ، اصل انا بحب الاطفال جداً ومليكة بتفكرنى بـ هايدي اختى ، اخر العنقود وكده

ملك : اهاا بس مليكة تعتبر غلطه اساساً

هادى : غلطه !! ليه ؟

ملك : يعني بابا جابها بالغلط يعني

هادى : ربنا رايد انها تجي ، بس انا ليه ملاحظ انك بتعمليها وحش

ملك : انا اصلاً مبحبهاش 

هادى : ليه ؟

ملك : عادى

هادى : دى طفله ملهاش ذنب ان باباكى اتجوز على مامتك

ملك : اكيد مع الوقت هحبها

هادى : المهم مش هشوفك بقي

ملك : امم عايز نتقابل امتى

هادى : دلوقتى لو ينفع

ملك : لا خليها لـ بكره

هادى : اوكى يا حبيبتى

(. قعدوا يرغوا شوية مع بعض وبعدين قفلوا .)

بعد ما قفلوا هادى لنفسه >> ياتري يا ملك مخبيه ولا بتشتغليني ولا ايه حكايتك !!

*_____________________________________________**___________________________*

فى بيت عادل السلحدار ...

(. وائل قاعد بيتفرج على التلفزيون وراح وليد قعد جنبه .)

وليد : كنت عايز احكيلك على حاجة

وائل : بخصوص ملك برضه ؟

وليد : هيام بنت عمك بتقولى انها راحت لـ ملك عشان تصالحنا على بعض

وائل : وانت صدقت هيام ؟

وليد : وهى هتكدب ليه ؟

وائل : انت اهبل يا وليد ، عايز تقنعنى ان هيام اللى بتحبك من سنين وبتكره ملك بسبب حبك ليها راحت تصالحكوا على بعض ، ده غير اصلاً ان ملك مبطيقش هيام واظن لو شافتها هتقتلها

وليد : ويمكن يكون هيام بتتكلم جد

وائل : انت عارف ان ملك استحاله تتصالح معاك وعارف كمان ان هيام مش ممكن تحاول تصلح بينكم ومتأكد ان ملك مش هتقابل هيام بالاحضان ، لكن انت رغم كل ده عايز تصدق هيام ، عارف ليه ؟

وليد بزهق : ليه ؟

وائل : عشان انت عايز تصدق ، عشان انت لسه زى مانت بتتشعلق فى الحبال الدايبه

وليد : انا نفسى اطمن على ملك مش اكتر

(. هنا تطلع ولاء فجأة واللى سمعت اخر جمله عن ملك .)

ولاء : كل حاجة فى حياتك ملك ملك ، الا عمرنا ما سمعناك بتقول نفسى اطمن على بنتىى

وليد : انا عارف ان بنتى كويسه وفى احسن حال كمان مش قلقان عليها انا فعلاً قلقان على ملك

ولاء (تقعد على كرسي يمين الكنبه اللى قاعد عليها اخواتها) : طلعها من دماغك بقي يا وليد عشان تعرف تعيش

وليد (يقف ويديهم ضهره): على فكرة انتوا مش فاهمين ولا حاسين

ولاء (تقف وراه) : فاهمين يا وليد ، فاهمين عشقك لـ ملك اللى مخلي حياتك كلها متلخبطه من يوم ما حبيتها

وائل : بس حبك ليها مجنون 

وليد (يبصلهم) : او جننى

(. ويخرج وليد من الشقة ويطلع على سطوح العماره يشم هوا ، وليد قعد مع نفسه وفضل يفكر كتير جداً ، يفكر شوية فى ملك وشويه فى حاله وشوية فى تصرف هيام وشوية فى بنته اللى عمره ما شافها ، بدأ يرجع بـ ذاكرته لـ سنين فاتت .)                                                 

                                               FLASH BACK

(. هيام ووليد واقفين على سطوح العمارة ، راكنين على السور وبيبصوا على الشارع ، وليد كان مخنوق وكـعادته طلع السطوح ولما هيام شافته طالع السطوح طلعت وراه وقعدت جنبه ، وليد كان قاعد ساكت وهيام بتحاول تفتح حوار .)

هيام : انت زعلان مع ملك ؟

- وليد ساكت

هيام : هى ملك كده هتفضل طول عمرها مدب ومبتحسش

- وليد مستمر فى صمته

هيام : كنت عايزة اقولك على حاجة مهمه بخصوص ملك

- وليد يبصلها ويهز دماغه دلاله على قوله "ايه"

هيام : متخليش حبك لـ ملك يعميك عن حقيقتها

وليد : حقيقة ايه ؟

هيام : حقيقة انها مقضياها وحبك ده ميفرقش عندها ولا بيهز فيها شعره ، زيك زى غيرك ، القلوب عندها لعبه

(. تظهر ملك فى الخلفيه "ضهرهم ليها" ومتروحش عندهم تتكلم من بعيد .)

ملك : ناقص تقوليله انى شمال

(. هيام ووليد يتلفتوا ويقولوا سوا " ملك " ، تفضل هيام باصه لـ ملك اما وليد يبص قدامه ، وبعد ثوانى قليله تقوم هيام وتقرب من ملك وتقولها بصوت هامس "انا بقوله كده عشان يبعد عنك" .)

ملك بنفس نبره صوتها العاديه : انا موكلتيش محامى تدافعى عنى وكلامك عنى كفايه عليا

هيام : فى ايه يا ملك ؟

ملك : مفيش حاجة يا هيام ، انا خلاص مبقتش بهتم بـ كلامك وبقيت متوقعه منك اى حاجة

هيام : والله كان قصدى انه يبعد عنك مش انتِ قولتيلي انك مبتحبهوش

(. تسيبها ملك وتروح تقف جنب وليد وتركن على السور جنبه .)

ملك : انا اسفه

(. يبص وليد يلاقى هيام لسه واقفه وبتغلى من الضيق .)

وليد بابتسامه : مبعرفش ازعل منك

ملك : صدقنى مكنش قصدى ازعلك

وليد : وانا والله مش زعلان لانى فعلاً معرفش ازعل منك

(. ويقف وليد وملك يتكلموا ويهزروا وهيام واقفه مضايقه واخر ما زهقت نزلت وسابتهم وهى فى قمة ضيقها .)

__**__

يفوق وليد وابتسامه مرة ماليه وشه >> ياريتك يا ملك حبتيني نص حب هيام ليا او يارتني حبيت هيام

*_____________________________________________**___________________________*

فى بيت محمود السلحدار ....

(. ملك نايمه على سريرها ، كانت نايمه على جنبها ومبتعملش حاجة كـعادتها غير التدخين والتفكير ، عماله تفكر فى هادى ورجوعها ليه اللى هى غير مقتنعه بيه ، عماله تفكر هو رجعلها ليه اصلاً وليه كان بيدور عليها بعد السنين ، عماله تفكر فى الارتباط الرسمى بيه ، عماله تفكر فى شغلها ، قطع تفكيرها اتصال من يزن ، وهى بقالها فترة طويله مبتردش عليه ولكنها متعرفش ليه المرة دى قررت ترد .)

ملك : الو

يزن : اذيك يا ملك

ملك : الحمد لله ، انت عامل ايه

يزن : انتِ كويسه ؟

ملك : مش عارفه والله انا كويسه ولا لا

يزن : مالك ؟

ملك : انا متلخبطه ومش عارفه ايه الصح من الغلط

يزن : ايه الجديد طيب ؟

ملك : انا رجعت لـ هادى

يزن بتوتر وارتباك وزعل : هـ هـ هادى !! طيب كويس

ملك : لا مش كويس

يزن : ليه ؟ انتوا مش كنتوا بتحبوا بعض ، اهو القدر جمعكم تانى

ملك : انا رجعت لـ هادى تحت ضغطه عليا ، مكنتش عارفه اجرحه 

يزن : الحاجات دى مفهاش ضغط

ملك : لا يا يزن فيها ، هادى كان محاصرني مكنش عايز اى حاجة غير اننا نرجع

يزن : مش مبسوطه انكم رجعتوا ؟

ملك : وايه اللى يبسط فى كده ؟

يزن : انا برضه مش فاهم لحد النهارده ، ليه سبتيه زمان وليه كذلك رافضه ترجعيله

ملك : لو كنت عايزه اقولك الاسباب كنت قولتلهالك من يوم ما عرفتك

يزن : انتِ لسه بتشتغلى الشغل اياه ده

ملك : بتسأل ليه ؟

يزن : اعتبريه سؤال فضولى (فضولى ولا اضول منى :D )

ملك : اه لسه ؟

يزن : انتِ محتاجه الشغل ده فى ايه ؟ فلوس مظنش !! رفاهيه مظنش حتى تضييع وقت كذلك مظنش

ملك : اعتبر انها هوايه ، رغبه عندى مش اكتر

يزن : براحتك بس انتِ بتضطرى تحتكى بمستويات متليقش بيكي

ملك : الرقاصه بترقص لـ الرئيس والخفير

يزن : رقاصة !! 

ملك : بديلك مثال

يزن : ما علينا ، مش هشوفك قريب

ملك : هكلمك لما ينفع

يزن : لازم اشوفك يا ملك

ملك : بس فى اطار الشغل بس

يزن : بس انا مش عايزك فى شغل

ملك : بس انا عيزاك

يزن بابتسامه عريضة : وانا مقدرش اقولك لا

*_____________________________________________**___________________________*

فى احدى الكافيهات .....

(. دياب وولاء قاعدين فى كافيه سوا ودياب سرحان ومبيبصش حتى لـ ولاء .)

ولاء : تحب اقوم امشى ؟

دياب : ليه يا حبيبتى بتقولى كده ؟

ولاء : انت مش شايف نفسك !! لا بتتكلم ولا حتى بتبصلي

دياب : معلش فى حاجة شغلانى

ولاء : حاجة ايه ؟

دياب : بصي يا لولو انا عايزك تفهمى الكلام ده كويس

ولاء بقلق : كلام ايه ؟

دياب : الشباب غالباً يعني الاغلبيه العظمي منهم احياناً شهوتهم بتغلب عليهم

ولاء : يعني ايه ؟

دياب : يعني ممكن يكون بيحبك اوى لدرجة انه نفسه يحس معاكى حاجات مش اوانها

ولاء : ممكن توضح اكتر

دياب : بس الكلام هيبقي صريح وانتِ بتتكسفى

ولاء : ماهو انا عندى فضول افهم

دياب : يعني الشاب ساعات شهوته بتسيطر عليه ويبقي عايز مثلاً يحضن حبيبته او يبوسها وممكن اكتر من كده 

ولاء : انت قصدك ان بدافع الحب يعني

دياب : واحياناً بدافع التسليه

ولاء : تمام

دياب : انا لما طلبت منك الصورة كان نفسى اشوفك بـ لبس البيت حب مش شهوه ولكنى ندمت بعد كده

ولاء : ندمت ليه ؟

دياب : مش عايز الوضع يتطور معانا اكتر من كده لذلك هطلب منك طلب

ولاء : طلب ايه ؟

دياب : مهما اطلب منك حاجات شبه دى اياكى توافقى

ولاء : حاضر

دياب : انا خايف عليكي منى وخايف على اللى بينا يتلوث

ولاء : ربنا يخليك ليا يا حبيبى

دياب : ويخليكي ليا يا احلى لولو فى الدنيا

*_____________________________________________**___________________________*

فى مقر شغل وائل السلحدار ...

(. دياب خلص مقابلته مع ولاء وراح شغله مع وائل ، دخل على وائل مكتبه ولقاه شغال على اللاب ومركز ولكن ملامحه باين عليها الغضب .)

دياب : ايه يا عم وائول سرحان فى ايه ؟

وائل : سرحان فى الشغل اللى انت كل سايبهولى ده

دياب : معلش بقي يا معلم انت قدها وقدود

وائل : انا عايز اعرف انت كل شوية بتخلع كده وتروح فين ؟

دياب : حوار كده هقولك عليه بعدين 

وائل بابتسامه صفره : بنات !!

دياب : هى بنت واحدة بس بـ بنات الكون

وائل : ماشي يا برنس ربنا يوفقك بس خف والنبى عندنا شغل والبنات بيجبونا ورا

دياب : الا قولى يا وائل ، انت عمرك ما عرفت بنت

وائل : زمان كنت بعرف بنات عادى يعني زى اى شاب

دياب : والحب ؟

وائل : انا سبب اللى انا فيه ده الحب 

دياب : ازاى ؟

وائل : حبيت واحده ، ظروفى مكنتش لسه تسمح اخطبها سابتنى واتجوزت واحد جاهز زى الافلام بالظبط

دياب : وانت قررت تعمل زى عبد الحليم حافظ فى الوساده الخاليه وتخليها تندم انها مستنتكش

وائل : بالظبط بس الفرق انى مبقتش بحبها

دياب : ليه ؟

وائل : مش جدعنه يعني احب واحدة متجوزه وعايشه مبسوطه وكل ده بمزاجها

دياب : ومفكرتش فى غيرها ؟

وائل : لسه شوية 

دياب : امتى ؟

وائل : اول ما بكون فى فرع تانى للشركه دى وننجح ونثبت نفسنا فى مجال الكمبيوتر هفكر فى الموضوع

دياب : ربنا يكرمنا يارب فى الشغل والحب

وائل : يارب

*_____________________________________________**___________________________*

فى بيت محمود السلحدار ....

(. ملك ممددة على سريرها وحاطه اللاب على رجليها وبتشوف الفيس بوك ، ملك اتفاجأت لما لقيت هادى باعت لها رساله على الاكونت ولسه مُصر على انه يقابلها والاغرب انه عمل اكونت جديد بعد ما ملك عملتله بلوك والاغرب من ده كله انه فى بدايه الرساله بيقولها "ملك بعتلك اكتر مرة ومبترديش وحابب اتعامل معاكى" ، ملك استغربت واتعدلت فى قعدتها وفضلت تفكر مع نفسها .)

ملك لنفسها >> يعني هادى عارف ان ده الاكونت بتاعى !! طيب لما هو عارف اللى فيها ليه مقاليش انه كلمنى !! ولا هو فاكر انه تشابه اسماء مثلاً !! مش مطمنه ومبقتش قادرة اثق فيه زى زمان ، فى حاجة غلط ولازم افهم في ايه ، لازم اركز فى كل حرف بيقوله هادى 

(. وقفلت ملك اللاب وقامت عشان تاخد دش وكعادتها ملت البانيو وحاولت تستجم وتنسي ارهاق اليوم بالدش ده ، قعدت ملك فى البانيو فترة طويلة وبعدها لبست البورنس وخرجت عشان تلبس فى اوضتها ، يدوب خرجت من الحمام بقيت مليكة نايمه فى سريرها ، استغربت ملك وجود مليكه هنا خاصة انها محستش بيها لما دخلت ومليكه شقيه وبتعمل قلق فى المكان واللى زاد استغرابها ان مليكه مبتعرفش تنام لوحدها ولازم حد يحضنها ، تجاهلت ملك كل ده وراحت عشان تلبس ، لبست ملك وطفت نور الاوضة وقررت تسيب مليكه جنبها حرصاً منها على عد قلق نومها عشان كان باين عليها الارهاق من كتر اللعب وابسط دليل انها نامت من غير ماحد يحضنها ، مددت ملك جنبها وحاولت تروح فى النوم ولكن بعد تفكير طويل .)

(. قامت ملك من نومها ولقيت مليكة لسه جنبها  ، قامت ملك وقعدت على السرير وفضلت تبص لـ مليكة ولـ ملامحها فترة طويله وفجاة تحولت نظرات التأمل الى نظرات شر وعدوانيه ومسكت ملك المخدة اللى جنبها وكتمت بيها نفس مليكة ، مليكة عشان مش قادرة تاخد نفسها فضلت تصرخ ولكن صوتها مش طالع بسبب المخده اللى ملك حطاها وبسبب قوة ملك فى مسكتها لـ المخده ، صرخات مليكه والتوائها تحت المخده محركش ملك بل بالعكس كان بيزيدها قوة ، فجأة سكت صراخ مليكه وحركتها ورفعت ملك المخدة من على مليكة .)

اشوفكم الحلقة الجاية

ارجو التقييم بـ تعليق :)

*_____________________________________________**___________________________*

بـ قلم / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com

www.wattpad.com/alaaelsherifi