الفصل السابع والعشرين
انتظر سراج عمارة حتي جاء سليم الالفى الى مكتبه وذهب اليه بعد ان تصفح اوراق العمل واحتسي قهوته الصباحيه
سراج : صباح الخير يا باشا
سليم : صباح النور يا سراج
سراج : عندي خبر مش حلو
سليم : على الصبح كده ؟
سراج : انا عارف الخبر بقالى اربع ساعات بس مش عايز اقول لحضرتك
سليم : لا قول ، خير
سراج : جيلان
سليم : مالها ؟
سراج : انتحرت
سليم (وقد سقط القلم من يديه) : ايه !!
سراج : لسه حد من السجن مكلمني وقايلي الخبر السئ ده
سليم (بتأثر شديد) : لا حول ولا قوة الا بالله
صمت سليم للحظات محاولاً استيعاب الموقف ثم نظر الى سراج وعينيه يملؤها الدموع والتأثر
سليم : متعرفش انتحار ولا حد قتلها في السجن ؟
سراج : لا انتحار
سليم : ربنا يرحمها ، بناتها هنا ولا سافروا ؟
سراج : لا لسه هنا بس حسين رفض يستلم جثتها
سليم : لا اله الا الله
سراج : انا بعت واحد خلص البيعه معاه والمفروض انه يرجع امريكا اذ لم يكن رجع اصلاً
سليم : تمام ، هروح ارتاح شويه
سراج : ماشي يا باشا ، هترجع تانى ؟
سليم : اه على بعض الضهر
خرج سليم الالفى من مكتبه واستقل سيارته واتبعه موكبه وذهب الى قصره
ارسلت شرويت رساله نصية على هاتف سراج لـ تخبره ان يقابلها في الحال في موقف السيارات الخاص بـ الشركة
سراج : في ايه ؟
شرويت : كنت في الـ HR وقالولي ان فلوريت مرات تيم موصيه على واحد عشان يتعين
سراج : واحد مين ؟
شرويت : معرفش ، اسمه طارق وبيقولوا انها كانت قاعده معاه في كافتريا الشركة
سراج : قريبها يعني ؟
شرويت : معرفش ، بس انا خدت copy من الـ cv بتاعه عشان تشوفه
سراج : مستنتيش تقوليلي الكلام ده في البيت ليه ؟
شرويت : حسيت انه مينفعش يستني
سراج : طيب ماشي روحي دلوقتي ونتقابل بالليل
شرويت : اوكى
وتركته شرويت واتجهت الى مكتبها اما سراج فـ نظر الى الملف الورقي الذي بين يديه وردد هامساً "يا ترى ايه حكايتك يا سي طارق وانتِ ياللي اسمك فلورا حاسة جاية وناوية تاخدي مكانى" ثم صمت ثوان قليلة لـ يظهر على ملامحه الضيق والتحدي العنيف لـ يقول بتحدي "محدش هيبقي دراع سليم الالفى غيرى ولا حتي ابنه"
__**__**__
فى تمام الساعه الثانية بعد منتصف الليل ، توجهت قوة من شرطة الاداب الى منزل سيرين لـ تقوم بالقاء القبض عليها وهي عاريه في احضان احد الرجال لـ تأخذها القوة فقط بـ الملاءة
قالت سيرين ان هذا الرجل هو زوجها ولكن عُرفياً وان ليس من حق القضاء محاسبتها ولكن قال هذا الرجل انه يمارس الجنس مع سيرين مقابل حصولها على المال
واكدت التحريات ان هناك اكثر من شخص اكد نفس الكلام وهو ممارسته للرذيلة مع سيرين مقابل حصولها على مال واكدت بعض فتيات الليل انهن يعرفن سيرين جيداً وكانت تقوم بـ تأجيرهن للرجال راغبي المتعه الحرام ، بعد التحريات قامت النيابة بتحويل القضية الى المحكمه للبت والحكم فيها ، بعد النظر الى التحريات وسماع اقوال شهود وعدم قدرة سيرين او محاميها باثبات العكس امرت المحكمه بـ حبسها ثلاث سنوات
__**__
فى صباح اليوم الذي تم الحكم فيه على سيرين توجه سراج عمارة الى سليم الالفى لـ ينقل له الاخبار الجديدة
سراج : سيرين اتحكم عليها بـ تلت سنين
سليم : تستاهل
سراج : انا خايف بس تنتحر زي جيلان
سليم : سيرين مش بنفس قوة جيلان ولا بنفس يأسها
سراج باستغراب : قوة !!
سليم : اوعي تكون فاكر ان الضعيف هو اللى بينتحر
سراج : المفروض
سليم : جيلان دبحت نفسها ، جابت رقبتها من اقصي اليمين لاقصي الشمال ، مينفعش يعمل كده واحد ضعيف ، لازم يكون قوى وجرئ وسيرين ضعيفه وجبانه
سراج : بس بصراحة سيرين ذودتها واقل حاجه تستاهلها هي قضيه الدعارة اللى لبسهالنا
سليم : وهو انت فاكر ان احنا لبسنهالها
سراج : مش ده اللى حصل
سليم : احنا اه اتفقنا مع الشهود لكن سيرين تعتبر عاهره ورخيصه اوى بس مش زي فتيات الليل العاديين ، دي كانت بتقبض ملايين وعربيات وعقارات والماظات مقابل تنازلها عن جسمها وشرفها ، يعني احنا ملبسنهاش حاجه ، احنا بس استغلينا قذارتها
سراج : دي طلعت مليونيره بنت اللذينة
سليم : لما تكون في بنت بتعرف ده وده وده بيقولوا عليها صديقة الطلبة ، لقب قليل على قدها لكن سيرين صديقة الوزارء والسياسين ورجال الاعمال ، اللى منامش معاها استغلها وخلاها تنام مع حد تانى عشان يعرف معلومة مثلاً
سراج : قمة الرخص
سليم : المهم
سراج : خير يا باشا
سليم : تيم وفلورا عاملين ايه في الشغل ؟
سراج : كويسين جداً وبيتعلموا بسرعه
سليم : كويس طمنتني
سراج : بس عندي ملاحظه
سليم : قول ؟
سراج : مدام فلورا عندها حماس واخلاص اكتر من تيم بيه
سليم : مانا عارف ، البنت ماشاء الله فوريره وشاطرة
سراج : اه ماشاء الله
سليم : ربنا يهدي تيم وكويس ان مراته شاطره ، هتقدر تحفظله ماله اللى هو مش مقدر قيمته
سراج : ربنا يخليهولك وعقبال ما تشوف ولاده
سليم بنبرة وابتسامه يملؤوهما الامل : يارب
__**__**__
على الرغم من قلة خبرة تيم وفلوريت في العمل الا ان مجموعه سليم الالفى كانت في قمة نجاحها وازدهارها
كان تيم لا يحب العمل كثيراً كعادته الا ان حماس فلوريت واخلاصها في العمل جعله يسير على خطاها
كون تيم وفلوريت ومعهما طارق فريق عمل جيد جداً يخدم العمل ونجاحه بكل اخلاص وحماس لدرجة جعلت سليم الالفى يشعر بالامان والراحه
كانت فلوريت في مكتبها تراجع بعض الاوراق ، جاء اليها زوجها
تيم : فلوريت
فلوريت : نعم يا روحي
تيم : مزهقتيش
فلوريت : من ايه ؟
تيم : من الشغل
فلوريت : تيم انت بتهزر !! احنا داخلين على صفقه مهمه اوى
تيم : انا زهقت يا فلورتي ، انا مبقتش لاقيكي
فلوريت : يا تيمو يا حبيبي ، ده مالنا وشغلنا ، لو احنا ماخلصناش فيه وفهمناه كويس مين بقي هيديروهلنا ، هنسيبه لـ سراج
تيم : مش معنى كده اننا نقضي وقتنا كله في الشغل
فلوريت : طيب ممكن تركز بس الفترة الجاية ، احنا بنسابق الزمن يا حبيبي
تيم : بشرط
فلوريت : ايه هو
تيم : بعد ما ناخد الصفقه دي ناخد اسبوع اجازه نسافر فيه اي حته
فلوريت : ماشي يا روحي ، باباك يخلص اجازته وناخد احنا اجازتنا
تيم (مقبلاً راحة يديها) : بحبك
فلوريت : بموت فيك
تيم : ربنا يخليكي ليا ، قوليلي بقى
فلوريت : اقولك ايه ؟
تيم : بتعافرى عشان تاخدي الصفقه ولا عشان تاخدي الصفقة من مجموعة طلعت المنشاوى
فلوريت : الاتنين ، طلعت المنشاوى منافس لينا وابو اكتر انسان بكرهه
تيم : انا كنت متوقع اني لما نتجوز هتنسي نديم خالص مش هتفتكريه لا بحلو ولا وحش
فلوريت : نزار قبانى قال ايه ؟
تيم : ايه يا ام العُريف
فلوريت : الانسان بلا حزن ذكرى انسان
تيم : وافهم ايه من كلام سي نزار ؟
فلوريت : اني انا بسهولة جداً نسيت حب نديم ، لكن مش هنسي الوجع اللى وجعهولي ولا الحزن اللى عيشني فيه
تيم : انا سايبك تشتغلي في الصفقه دي لنفسك عارفه ليه ؟
فلوريت : ليه ؟
تيم (وهو ينهض من مقعده) : عشان تحسي بـ لذة الانتصار والانتقام
فلوريت : انت قومت ليه ؟
تيم : عندي شغل يا حبيبتي
فلوريت : طيب انا عازمه نفسي معاك على الغدا
تيم : ماشي يا حبيبتي ، خلصى شغلك وعرفيني
فلوريت : بحبك (وارسلت له قبله)
تيم : بموت فيكي
وخرج تيم من مكتب فلوريت ، نظرت فلوريت الى ملف الصفقه ثم ابتسمت ورددت "لذة الانتصار والانتقام ، ياما نفسي احس الاحساس ده"
__**__**__
كان طارق في مكتبه يتصفح بعض الاوراق التي طلبت منه فلوريت مراجعتها ، طرق احدهم باب مكتبه لـ يسمح له طارق بالدخول
طارق : اهلاً سراج بيه اتفضل
سراج : بتعمل ايه ؟
طارق : بشتغل
سراج : ملف ايه ده ؟
طارق : مدام فلوريت اديتهولي اراجعه
سراج : وريني
طارق (وهو يسحب الملف من بين يدي سراج) : اوريك ايه ؟
سراج : الملف
طارق : معنديش اوامر اني اديه لحد
سراج : امممم معندكش اوامر !! تمام ماحنا هنا بنفذ الاوامر
طارق : كويس ان حضرتك عارف
سراج : اه عارف ، زي ما الـ HR خدوا اوامر بتعينك رغم ان معندكش ميزه زياده ، اى زي ماحنا خدنا اوامر نعملك مكتب لوحدك
طارق : مدام فلوريت صديقة قديمة جداً ، بينا عشرة عمر وعيش ملح ، وقفت معاها كتير فقررت تردلي الجميل ، فيها حاجه دي
سراج : ايوة هو ده ، رد الجميل
طارق : قصدك ايه ؟
سراج : اني كمان قريب اوى هرد الجميل
وتركه سراج وخرج من مكتبه وعلامات استفهام كثيره تحاوط طارق ، اخذ طارق الملف الورقي واتجه الى مكتب فلوريت
فلوريت : راجعت الملف ؟
طارق : اه
فلوريت : فيه ثغرات ؟
طارق : ثغرات لا تذكر
فلوريت : تمام
طارق : عايز احكيلك على حاجه
فلوريت : حاجه ايه ؟
قص لها طارق كل ما حدث مع سراج واخبرها عن كلامه المبهم
طارق : عندك تفسير
فلوريت : بص ، سراج هنا في الشركة من ايام ما كان ٢٣ سنه ، وقدر يبقي دراع انكل سليم اليمين ، شعوره بـ ان تيم بدأ يعرف الشغل ويفهمه وكذلك انا وبدأ يبقي مهمش ومع الوقت تيم هيكون دراع باباه اليمين فـ طبيعي وجودي انا وتيم يكون مجننه
طارق : بس هو مش سهل
فلوريت : شغال مع انكل سليم وتقولي مش سهل ، مينفعش يكون سهل والا مكنش بقي الدراع اليمين لـ سليم الالفى
طارق : طيب هو خاين ولا مخلص
فلوريت : مظنش ان انكل سليم ممكن يثق الثقه دي كلها في حد خاين
طارق : بس انا قلقان في سراج
فلوريت : يا طارق انت بتعمل شغلك وخلاص ، كونك خدت اهتمام زياده عشان احنا اصدقاء ده ميمنعش انك موظف شاطر
طارق : متشكر اوى يا فلورا انك ادتيني الفرصه دي
فلوريت : مفيش شُكر بينا ، احنا اخوات
ابتسم طارق الى فلوريت وغادر مكتبها
__**__**__
فى المقر الرئيسي لـ مجموعه شركات المنشاوى ، اجتمع نديم المنشاوى مع مجموعه من الموظفين لدراسه الصفقة التى يودوا اخذها من سليم الالفى والعكس صحيح
ابدي كلاً منهما رأيه واقتراحه وقام نديم بـ تسجيل كل الملاحظات وفي نهاية الاجتماع اكد عليهم ضروره الاهتمام بـ تلك الصفقة وانها الاهم في تاريخهما ويجب الا تأخذها مجموعه سليم الالفى على الاطلاق
انصرف الموظفين من غرفة الاجتماعات ماعدا جود والتي طلب منها نديم البقاء
نديم : جود انا عايز منك خدمه
جود : خير يا نديم
نديم : انتِ دايماً بتقولي انك بتعزيني وممكن تعمليلي اي حاجه انا عايزها
جود : اكيد طبعاً وغير المعزة انت ليك فضل عليا
نديم : جه الوقت ترديه
جود : قول اللى انت عاوزه
نديم : انتِ مش مرتبطه بـ طارق
جود : ايوه
نديم : وطارق بيشتغل في مجموعه الالفى
جود : صح
نديم : عايزك تستدرجيه وتخليه يجيبلك فايل العروض بتاعتهم
جود : نعم ؟؟
نديم : جود افهميني ، فلوريت لو خدت الصفقة دي انا ممكن اموت فيها ، هما اصلاً داخلينها تحدي
جود : انت عايزني اخون طارق
نديم : الصفقه دي حياة او موت بالنسبالى ساعديني
جود : ممكن طارق ميرضـ......
نديم مقاطعاً : جود انا واثق انك تقدري
صمتت جود وشردت قليلاً
نديم : بصي ، عشان متقعيش في مشاكل مع طارق فـ انا مس هاخد الصفقه ، هخلي اى شركة تانيه تاخدها ، انا مش مهم عندي اخدها بس الاهم ان فلوريت متخدهاش
جود : حاضر يا نديم
نديم : انا متشكر اوى يا جود
جود : يارب بس اقدر اجيبه
نديم : لو عايزه تجبيه هتجبيه انا عارف
جود : ربنا يسهل
__**__**__
دخلت شرويت على زوجها في مكتبه المتواجد في عش الزوجية الذي يجمعهما لـ تجده شارد ويقوم بـ تمزيق الورق الذي امامه
شرويت : سراج ، سراج
سراج : ايوه
شرويت : مالك يا حبيبي
سراج (مازال شارداً) : مالى ؟
شرويت : سرحان وبتقطع الورق في ايه ؟
سراج : اللى اسمها فلورا دي ، جاية تسيطر ، جاية عشان تاخد مكانى
شرويت : سليم مش سهل يجيب حد مكانك ، مش عشان الثقه والكلام ده ، عشان اللى انت بتعملهوله لا ينفع يعمله ابنه الفرفور ولا ينفع تعمله ست
سراج : بس هي ذكية وعارفه ان جوزها مش شاطر في الشغل فـ بتحاول تسد مكانه
شرويت : ماهي برضه يا حبيبي عندها حق ، ده مال جوزها ومال ولادها في المستقبل
سراج : المكانه اللى انا وصلتلها تعبت عشان اوصلها يا شيري ، تعبت جداً ، مش قادر استوعب فكرة اني مركون على الرف
شرويت : ماعاش ولا كان يا حبيبي اللى يركنك على الرف وتعبك مش هيروح هدر
سراج : البت دي جاية وفي دماغها تسيطر زي ما قولتلك ، خوفها من قلة خبرتها وقلة خبرة جوزها مخليها مفنجله وبتتعلم بسرعه
شرويت : مش معني انها بتتعلم بسرعه وانها خايفه على مال جوزها يبقي عايزه تلغيك
سراج : لازم شوكتها تتكسر
شرويت : يعني ايه ؟
سراج : يعني هكسرها
شرويت : ازاي ؟
سراج : هتعرفي ، بس انا عرفت هعمل ايه
شرويت : خد بالك طيب بدل ما تجي بالعكس
سراج : لا متقلقيش انا مخطط كويس اوى
شرويت : ربنا يستر
__**__**__
بعد ايام قليلة اجتمع سليم الالفى بكلاً من تيم وفلوريت وسراج وشرويت وطارق حتي يناقش معهما امر الصفقه حيث ان سليم الالفى ليس المتابع المباشر لـ تلك الصفقه فقد ترك امرها لـ مَن يثق بهما وحتي تكون اختبار حقيقي الى تيم وفلوريت ، كان يجتمع معهما من حين الى اخر لمعرفة سير الاحداث
فلوريت : بما ان حضرتك يا انكل مجتمع بينا عشان صفقه مهمه زي دي وبما اننا هنقول اسرار فـفي حاجه لازم اقولها الاول
سليم : حاجه ايه ؟
فلوريت : احنا بينا خاين يا انكل
سليم : نعم !!
دقق سليم وتيم وطارق النظر في فلوريت اما سراج فـ نظر الى شرويت
فلوريت : زي ما قولت ، احنا بينا خاين
تيم : بينا يعني فينا احنا الموجودين في الاوضة دي ولا عموماً
فلوريت : لا حد من الموجودين في الاوضة دي
صمت لـ ثوان قليلة
فلوريت : حد زي ما بيقولوا عض الايد اللى اتمدتله ، حد خان ثقة اقرب الناس ليه ، حد لا صان العشرة ولا العيش والملح
شعر الجميع بـ ارتباك وخوف شديد ، كانت هناك غصه تقف في حناجرهم ، حتي سليم الالفى شعر بـ ارتباك شديد
سليم : اتكلمي يا فلورا ، مين ؟
وزعت فلوريت نظراتها على الجميع ، نظرت في عيني كل الحضور بما فيهم زوجها وسليم الالفى ، مازال الارتباك والفضول والخوف يسيطروا على الحضور ومازال الصمت يسود المكان ...
#تابعونا
#الدّيْن
#آلاء_الشريفى
0 التعليقات :
إرسال تعليق