قصر الدبلوماسي " الحلقة التاسعة "

الحلقة التاسعة 

جزء من حلقة سابقة :
مالك : عايزة تقولى ايه ومترددة خايفة
اروى : لا انا لا مترددة ولا خايفة
مالك : طيب قولى في ايه 
اروى : .......................
*_____________________________________________**___________________________*
اروى : طيب مستعد لكلامى
مالك : فى ايه يا اروى ما تتكلمى
(. قربت اروى من مالك شوية .)
اروى : غمض عينك
مالك : يووه بقى انتِ فاضية شكلك انا عندى شغل
اروى : استنى بس خدنى على قد عقلى وغمض
مالك : اهو يا ستى
(. غمض مالك عيونه وقربت منه اروى ومسكت ايده وحطتها على بطنها .)
مالك(بيفتح) : ايه ده
اروى : مفهمتش
مالك : بحاول
اروى : انا حامل
مالك بخضة : ايه !! حامل
اروى : اه فى شهرين الا اسبوع
مالك : يعنى من اول جوازنا
اروى : اه ، الف مبروك يا حبيبي (وحضنته)
مالك : مبروك لينا احنا الاتنين يا حبيبتى ربنا يكملك على خير
اروى : مالك يا مالك حاسه انك مش مبسوط
مالك : لا يا قلبى انا مبسوط جداً بس انتِ عارفة ردود افعالى يعنى بتكون معقوله
اروى : يعنى بجد مبسوط
مالك : اكيد يعنى مبسوط مش هجيب بيبي من احلى واحن واحدة فى الدنيا كلها
اروى : ربنا يخليك ليا يا حبيبي يالا بقى عشان متتأخرش على شغلك
مالك : اوكى يا روحى اشوفك على الغدا (ومشى)
*_____________________________________________**___________________________*
فى شغل مالك ...
(. مالك اول ما وصل الشغل رئيسه طلبه فى مكتبه وراحله .)
رئيسه : اهلاً بالعريس
مالك : خير يا افندم حضرتك طلبتنى
رئيسه : فين التقرير بتاع الراجل الامريكي
مالك : يا افندم حضرتك طلبت منى التقرير ده من يومين وانا لسه شغال فيه
رئيسه بزعيق : انت مش شايف شغلك كويس يا حضرة الظابط
مالك : يا افندم مالوش لازمة الكلام ده انا بعمل اللى بقدر عليه والمطلوب منى
رئيسه بعصبية : مفيش حاجة اسمها بعمل اللى اقدر عليه انت بتشتغل فى اخطر واهم جهاز امنى فى البلد يعنى تعمل شغلك مظبوط وتفوق لنفسك بدل ما تلاقى نفسك سايب الخدمه احنا هنا مبنهزرش
مالك بيحاول يتمالك اعصابه : تمام يا افندم
رئيسه : شوف شغلك يا حضرة الظابط مش عشان اتجوزت تتدلع
مالك : تمام يا افندم
رئيسه : اتفضل على مكتبك والتقرير اللى طلبته يكون موجود عندى خلال ٢٤ ساعه
مالك : تمام يا افندم (ومشى)
__**__**__**___
فى مكتبه ....
هانى (زميله برتبه رائد) : فى ايه يا عم
مالك : مش عارف ليه من ساعة ما اتجوزت وهو حاططنى فى دماغه رغم انى بشوف شغلى كويس
هانى : متزعلش نفسك بس هو فاكر ان الجواز خلاك تهمل شغلك
مالك : من امتى يعنى واحنا حياتنا الشخصية بتأثر على شغلنا
هانى : خلاص حصل خير بس متنساش يا مالك ان احنا شغلنا حساس وغلطة واحدة ممكن تضيع البلد كلها
مالك : يا عم هو فين الغلط ده هو طلب تقرير عن راجل امريكي داخل مصر ومشكوك فيه الكلام ده كان امبارح وانا لسه بعمل تحرياتى
هانى : ربنا معاك يا معلم
مالك : ربنا معانا كلنا
*_____________________________________________**___________________________*
فى قصر سامح الخولى .....
(. اروى وسامح وفاتن ومروة وآدم واسر بيتغدوا سوا .)
فاتن : مالك يا روءة مبتاكليش ليه
اروى : عايزة اقولكم على خبر حلو
كلهم : خير
اروى : انا حامل
مروة : بجد يا روءة
اروى : اه والله فى شهرين الا شوية يعنى من اول الجواز
فاتن : الف مبروك يا حبيبتى ربنا يتمم لك على خير
اروى : يارب يا ماما
اسر : مبروك يا روءة هاتى بقى واد جدع كده وسميه اسر متعمليش زى مروة
ادم : على فكرة كانت عايزه تسمى اسر بس انا كان نفسى فى عمر
سامح : مبروك يا روءة بس كنتى اعملى زى مروة
اروى : اعمل ايه زى مروة
فاتن : بابا قصده انك كنتى تأجلى الحمل شوية لحد ما تاخدوا على بعض وتضمنوا ان حياتكوا مستقرة
مروة : اه فعلاً انا اجلت الحمل سنتين
اروى : انا مكنتش عامله حسابى على حمل اصلاً بس ده اللى حصل واللى مكنتش عامله حسابه وبعدين انا اصلاً فرحانه بالحمل ده جداً
فاتن : مبروك يا قلبى ربنا يقومك بالسلامه
سامح : مبروك يا حبيبتى قولتى لـ مالك ولا لسه
اروى : قولتله طبعاً وفرح جداً
ادم : اكيد طبعاً ده احلى احساس فى الدنيا
فاتن : ربنا يسعدكم كلكم يا حبايب قلبى يارب
سامح : هو مالك فين مجاش على الغدا ليه
اروى : مالك عنده شغل هيرجع بالليل
فاتن : ربنا معاه
*_____________________________________________**___________________________*
فى بيت اهل مالك ......
(. مالك خلص شغله وراح يشوف امه وابوه .)
شهيرة : خلصت شغل
مالك : اه خلصت
شهيرة : اروى عامله ايه
مالك : اروى حامل
شهيرة : ما شاء الله بالسرعه دى
مالك : اهو نصيب بقى
شهيرة : مالك مش مبسوط
مالك : لا والله يا ماما بالعكس انا فرحان جداً بس انا مضغوط فى الشغل
شهيرة : خير يعنى
مالك : الحمد لله وبصراحة انا مش مرتاح فى بيت اهل اروى
شهيرة : لو مش مرتاح خد مراتك وروحوا شقتكم
مالك : لما تولد بقى هنروح شقتنا
شهيرة : ربنا يكملها على خير
مالك : يارب
شهيرة : اتغديت
مالك : لا انا جيت من الشغل عليكوا
شهيرة : احضرلك الغدا ولا هتاكل مع مراتك
مالك : لا يا ماما حضريلى اكل انا بطنى وجعتنى من اكلهم العجيب ده
شهيرة : حاضر يا حبيبي ثوانى واحضرلك الغدا
مالك : هو بابا فين
شهيرة : كان بيصلى المغرب تلاقيه بيقرأ قرآن
مالك : طيب هدخله
(. دخل مالك على ابوه لقاه على سجادة الصلاة فكان هيخرج تانى بس ابوه نداله .)
فؤاد : تعالى يا مالك انا خلصت
مالك : اذيك يا بابا
فؤاد : انا كويس يا حبيبي انت عامل ايه
مالك : تعبان اوى يا بابا
فؤاد : ليه بس كده ده انت لسه عريس
مالك : لما سبت اروى ورجعتلها تانى ركنت عقلى والتفكير المنطقى على جنب روحتلها ورجعتلها بكل مشاعرى وعواطفى بس انا عارف انى عمرى ما هستريح
فؤاد : بس انت بتحبها ؟
مالك : الحب مش كل حاجة
فؤاد : بص يا ابنى اروى مراتك بتحبك بجد ومش عايزة اى حاجة غير انها تعيش معاك المشكلة فى وجودك فى القصر انت مش مستريح هناك فـ لو خدت مراتك وروحتوا عيشتوا فى شقتكوا هتستريح اكتر وهتحس لن حياتكم مستقلة اكتر
مالك : خايف اكون بظلمها
فؤاد : ايه الظلم فى كده
مالك : صعب اوى انها تتنقل من القصر والخدم والحشم لـ شقة صغيره ومطلوب منها تعمل فيها كل حاجة
فؤاد : وانا واثق ان اروى هتستحمل وهتعيش معاك تحت اى ظرف لانها بتحبك فعلاً
مالك : انا هستنى لحد ما تولد عشان فى القصر فى ناس كتير ياخدوا بالهم منها خصوصاً انى ساعات بتأخر فى الشغل
فؤاد : هى اروى حامل ؟
مالك : اه فى شهرين الا شوية
فؤاد : ربنا يكملها على خير
مالك : امين يارب ، هروح بقى لـ ماما عشان متفتكرش اننا بنتكلم فى اسرار وتزعل
(. هنا جت شهيرة .)
شهيرة : لا مش هزعل انا عارفة ان ابوك اقربلك منى
مالك(بيبوس دماغها) : ربنا يخليكوا ليا وميحرمنيش منكم
فؤاد : ويخليك انت واخواتك لينا يارب
شهيرة : يارب تعالى يالا عشان تتغدى
*_____________________________________________**___________________________*
فى قصر سامح الخولى .....
(. مالك رجع من شغله طلع على الجناح الخاص بيهم على طول وكانت اروى فى انتظاره .)
اروى : حمد الله على سلامتك يا روحى
مالك : الله يسلمك يا حبيبتى
اروى : اتأخرت كده ليه
مالك : انا خلصت شغل وبعدين روحت لابويا وامى
اروى : طيب اتغديت ولا اخليهم يجهزوا لك غدا
مالك : لا يا روءة اتغديت الحمد لله
اروى : بالهنا والشفا يا حبيبي
(. بدأ مالك يغير هدومه واروى كانت بتساعده .)
اروى : اه صحيح يا حبيبي
مالك : ايه ؟
اروى : كذا مرة ابقى عايزة اسألك وانسى
مالك : عايزة تسألى عن ايه
اروى : الملفات الخاصة بسرقة القصر
مالك : مالها
اروى : هى معاك ليه
مالك : ايه الغريب مش فاهم
اروى : انت مش سبت شغلك فى المباحث
مالك : ايوة بس انا هعيش فى القصر ده
اروى : مش فاهمه ؟
مالك : قبل ما نتجوز طلبت من ياسر يجيبلى نسخة من الملفات دى عشان ادرسهم كويس عشان اشوف السارق بيجي ليه وايه الثغرات الامنيه اللى هو بيستغلها
اروى : طيب اللى بيسرق بيسرقنا ليه
مالك : اكتر حاجة دايماً بتتسرق الفلوس والدهب والغريبة بقى ان رغم ان انتوا اتعرضتوا للسرقة مرتين الا ان ابوكى لسه بيحتفظ بالفلوس والدهب فى الخزنة وفى نفس الاوضة
اروى : ايوة يا روحى بس بابا اشترى خزنة جديدة ببصمة الايد
مالك : اللى عايز يسرق يا اروى بيتصرف
اروى : ان شاء الله خير واكيد كل الناس عرفت ان فى ظابط فى القصر محدش بقى هيقرب
مالك : ههههههه ماشى ربنا يستر
اروى : بتضحك على ايه
مالك : يا حبيبة قلبى اللى عايز يسرق بيسرق فى اى مكان وتحت اى ظرف ماشى
اروى : خلاص بقى يا مالك متقلقنيش
مالك : خلاص يا حبيبتى اطمنى خير ان شاء الله
اروى : طيب ممكن اسألك سؤال
مالك : اسألى
اروى : ايه الجهة الامنية اللى انت شغال تبعها
مالك : بتسألى ليه
اروى : عندى فضول اعرف
مالك : وانا هقولك بس ده سر محدش يعرف غير ابويا وانتِ وبس
اروى : بس انا معرفش
مالك : مانا هقولك اهو
اروى : فين بقى
مالك : المخابرات العامة
اروى : واو انت ظابط مخابرات
مالك : خلاص بقى انتِ عرفتى اهو زى مانتِ عايزة منتكلمش بقى فى الموضوع ده كتير
اروى : حاضر بس انا فخورة بيك اوى
مالك : ليه يعنى
اروى : لما جوزى حبيبي يبقى شغال فى اهم جهاز امنى فى البلد مش من حقى افخر
مالك : لا متفخريش انا ظابط زى اى ظابط ماشى
اروى : بحبك
مالك : وانا كمان يا حبيبتى بحبك
*_____________________________________________**___________________________*
تانى يوم الصبح فى قصر سامح الخولى ......
(. سامح وفاتن ومالك واروى بيفطروا سوا .)
سامح : وانت اخبار شغلك ايه يا مالك
مالك : تمام يا عمو ماشى الحال
سامح : ربنا معاك مصر بين ايديكوا
مالك : انا مقتنع ان مصر بين ايد كل واحد مصرى لان كل واحد فى مجاله بيخدم بلده
سامح : تمام كلامك بس الظباط والوزراء والسفراء والناس المهمة دى بيقع عليهم اكبر نسبة
مالك : ربنا يقدرنا كلنا
فاتن : سبيكوا بقى من الكلام ده هتسموا البيبي ايه
مالك : ياه يا طنط لسه بدرى اوى بس عموماً اى اسم تختاره اروى
اروى : ربنا يخليك ليا يا حبيبي
سامح : عارف يا مالك انا بقيت مطمن بوجودك فى القصر هنا معانا
مالك : اه صحيح يا عمى كان عندى سؤال او استفسار بسيط جداً
سامح : اسأل
مالك : ليه حضرتك مش جايب حراسة على القصر
سامح : بص يا ابنى لو حد حط فى دماغه انه يدخل البيت ده ويسرقه هيدخله وهيسرقه تحت اى ظرف وبناءاً على كده لو جبت حراسه اكيد فى ارواح هتروح وكل ده ليه يعنى عشان الدهب والفلوس
مالك : هى نظرية بس برضه الحرامى بيكون اجبن كائن على وجه الارض لانه عارف انه بياخد حاجة مش بتاعته يعنى ممكن لما يشوف حراسه يخاف
سامح : وانا مقتنع ان الحارس هو ربنا
مالك : ونعمَ بالله ، عن اذنكم انا بقى عشان عندى شغل
اروى : نستناك على الغدا يا حبيبي
مالك : لا يا روءة انا هتأخر
اروى : اوكى يا حبيبي ربنا معاك
*_____________________________________________**___________________________*
فى احدى النوادى الاجتماعية ...
سمر : ليه كده يا اروى كنتى اصبرى شوية
اروى : انا مش فاهمه ايه الحكاية كله عمال يقولى كنتى اصبرى اصبر على ايه مش فاهمه اتجوزت وبحب جوزى وبيحبنى وحملت ايه بقى الاستعجال فى كده
سمر : يا حبيبتى انتوا بقالكم اقل من شهرين متجوزين يعنى لسه متعرفوش بعض كويس لسه متعرفوش هتكملوا مع بعض ولا لا
اروى : بعد الشر ايه اللى انتِ بتقوليه ده
سمر : بقولك الواقع اللى احنا عايشين فيه دلوقتى البنات يتجوزوا وشهرين تلاته ويطلقوا عشان كده اغلبهم بيأجلوا الحمل اول سنة
اروى : يا سلام ده تفكير مش منطقى اصلاً
سمر : ليه بقى
اروى : عشان فى ستات بتتطلق بعد ١٥ سنة جواز يعنى مش شرط
سمر : بصى بقى اللى حصل حصل وانتِ دلوقتى خلاص حامل فـ ربنا يكملك على خير دى اهم حاجة
اروى : لسه فاكرة
سمر : يا بنتى انا بتكلم كده من خوفى عليكي
اروى : بصى يا سمر انا بحب مالك لا مبحبوش انا بعشق التراب اللى هو بيمشى عليه والهوا اللى بيتنفسه وناوية اكمل معاه عمرى كله وهعمل المستحيل قبل الممكن عشان افضل معاه باقى عمرى عشان كده فرحت بالحمل ده زى فرحتى بجوزانا
سمر : ربنا يسعدكوا يا اروى وتفضلوا مع بعض العمر كله
اروى : امين يارب
سمر : اه صحيح اخواتك سافروا ولا لسه
اروى : لا لسه مروة وجوزها وابنها بيقولوا قاعدين لـ اخر السنة
سمر : واسر ؟
اروى : لما دراسته هناك تبدأ
سمر : ربنا معاهم ان شاء الله
اروى : يارب
*_____________________________________________**___________________________*
فى شغل مالك ....
(. كالعادة رئيس مالك فى الشغل طلبه ومالك راحله .)
رئيسه : كويس اوى التقرير اللى انت عملته
مالك : متشكر يا افندم
رئيسه : بس الظابط اللى يطلع اسرار شغله بره يبقى ايه
مالك : مش فاهم يا افندم
رئيسه : لا حاول تفهم قصدى وتشوف انت بتتكلم مع مين كتير
مالك : يا افندم انا مش فاهم حاجة
رئيسه : راجع نفسك وراجع كلامك وشوف انا قصدى ايه
مالك : تمام يا افندم
رئيسه : خد بالك من شغلك يا حضرة الظابط وفى شغلتنا دى نسمع اكتر ما نتكلم
مالك : تمام يا افندم
رئيسه : وخد بالك غلطة كمان وهسحب منك الملف اللى تحت ايدك
مالك : يا افندم انا مطلوب بالاسم فى القضية دى
رئيسه : انت اتطلبت عشان كنت ظابط كفاءة لكن كفائتك بدأت تقل يا حضرة الظابط وياريت تاخد بالك
مالك : عن اذنك يا افندم
رئيسه : اتفضل
__**__**__**__
(. مالك راح لـ هانى مكتبه وهو متعصب جداً .)
مالك : هو فى ايه الرجل ده حاطتنى فى دماغه كده ليه
هانى : هو بستفك برضه
مالك : انا مش فاهم فى ايه
هانى : انت عملت حاجة غلط
مالك : شكلى كده بس مش عارف هو قصده ايه
هانى : انت قولت لشخص معين على مكان شغلك بالتحديد
مالك : مش فاهم
هانى : يعنى انت فى العادى بتقول ايه
مالك : ظابط شرطه وبس كده ولو حد مقرب بقول جهة امنيه
هانى : قولت لمين انك ظابط مخابرات
مالك : مقولتش لحد غير ........... (وسكت)
هانى : خد بالك يا مالك انا اقدم منك هنا وفى المكان ده السرية والخصوصية والكتمان اهم من اى حاجة
مالك : فهمت
هانى : وعلى فكرة مش شرط يكون حصل حاجة بس هو بيقولك كده عشان تاخد بالك
مالك : اخد بالى من ايه
هانى : من كلامك مع اى حد القريب قبل الغريب
مالك : اه فهمت
هانى : وشد حيلك فى القضية اللى معاك دى مهمة اوى ولو ظبطت هيبقى فيها تريقة
مالك : ههههههه انت عارف انا مسكت كام قضية مهمه فى البلد من ايام ما كنت فى المباحث وفى كل قضية كنت بسمع الجملة دى
هانى : هههههه يعنى مش مصدقنى
مالك : مش قصدى بس انا سمعت الجملة دى كتير وعموماً انا بعمل واجبى ومش مستنى مقابل
هانى : ربنا معاك
مالك : ربنا معانا كلنا
*_____________________________________________**___________________________*
فى قصر سامح الخولى ...
(. مالك راجع من شغله بالليل قابلته اروى كالعادة بابتسامتها .)
اروى : حمد الله على السلامه يا حبيبي
مالك : الله يسلمك
اروى : اتغديت
مالك : اه
اروى : طيب هساعدك فى لبسك(وقربت منه)
مالك(بيبعدها) : لا متشكر
اروى : فى ايه مالك
مالك : مفيش مرهق من الشغل
اروى : لا شكلك فيك حاجة
مالك : اروى انتِ قولتى لمين انى بشتغل فى المخابرات
اروى : مقولتش لحد
مالك : متأكده
اروى : ايوة متأكده يعنى هكون بتكلم وانا مش واخدة بالى
مالك(بيقرب منها وفى عينه نظرة تحدى) : قسماً عظماً لو حصلى اى ضرر فى شغلى بسببك انا مش هرحمك
اروى : فى ايه يا مالك بتكلمنى كده ليه
مالك : انا حذرتك يا اروى صدقيني مش هرحمك لو حتى كلمه خرجت منك عفوية لاى حد وسببتلى مشاكل مش هعديها وهتشوفي واحد تانى غير اللى انتى تعرفيه
اروى بصوت مخنوق : والله ما قولت لحد حاجة
مالك : قولتى او مقولتيش اديني حذرتك عشان تاخدى حذرك بعد كده
اروى باستسلام : حاضر بس انا عمرى ما افكر أآذيك وخليك فاكر انك بتكلم مراتك الللى انت آمنتها على شرفك يعنى المفروض تكون مآمن اكتر من كده على اسرار شغلك معاها
مالك : انا ماليش دعوة بالرغى ده انا قولت هتشوفى واحد تانى
اروى بعصبية : على اساس اللى بيتكلم معايا دلوقتى انا اعرفه ده انا اول مرة احس انى خايفة منك
مالك ببرود : اللى عندى قولته انا داخل انام
(. فضلت اروى صاحية طول الليل بتعيط ومالك قلق وصحى لقاها لسه صاحية .)
مالك : انتِ منمتيش
اروى : لا نمت وصحيت
مالك : انتِ بتكدبى عليا انتِ شكلك مشوفتيش النوم ، زعلانه منى صح
اروى بدموع : والله عمرى ما افكر أأذيك ولا حتى بكلمة انا بحبك ومش عايزة غير مصلحتك
مالك : خلاص يا اروى انا مضغوط جداً فى الشغل وخرجت عن شعورى
اروى : معنديش مشكلة انك تخرج عن شعورك بس المشكلة انك شكيت فيا
مالك : انا اسف حقك عليا بس رئيسي فى الشغل قالى كلام معناه انى بخرج اسرار الشغل وكلام من ده وهددنى عشان كده اتعصبت
اروى : ربنا معاك فى شغلك
مالك : خلاص بقى متزعليش
اروى : خلاص يا حبيبي مش زعلانه
مالك : طيب تعالى نامى يالا
اروى : حاضر (ودخلوا ناموا)
*_____________________________________________**___________________________*
بعد كام يوم فى قصر سامح الخولى ...
الساعة ستة الصبح

سامح بيزعق : اصحى يا مالك باشا اصحى يا حضرة الظابط شوف اللى بيحصل
فاتن : اهدى يا سامح شوية
سامح : اهدى انتِ مش شايفة اللى انا شايفه ولا ايه
اسر : ايوة يعنى ومالك ذنبه ايه
سامح : ذنبه انه ظابط وعايش وسطنا
فاتن : ايوة بس مش بايده حاجة
سامح : اسكتوا انتوا اصحى يا مالك بيه فوق يا حضرة الظابط من العسل والغيبوبة اللى انت فيهم
__**__**__
فى الجهة التانية ....
(. صحى آدم واروى على صوت الزعيق .)
ادم : ايه الصوت العالى ده
مروة : ده صوت بابا
ادم : وبيزعق كده ليه
مروة : واضح انه بيزعق لـ مالك
ادم : طيب تعالى نشوف فى ايه
مروة : ربنا يستر (ونزلوا)
__**__**__
فى الجهة التالته ......
(. مالك واروى نايمين فى جناحهم وصحيوا على صوت الزعيق .)
مالك : ايه ده فى ايه
اروى : ده صوت بابا شكله بيزعق
مالك : شكله كمان يقصدنى
اروى : اكيد هو فى ظابط غيرك
مالك : طيب هنزله
اروى : استنى انا جاية معاك
(. نزل اروى ومالك تحت ولقيوا العيلة كلها متجمعين .)
مالك بخضة : ايه ده !!
سامح : ..........................



__*__*__

ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)