الحلقة العاشرة
جزء من حلقة سابقة :
(. نزل اروى ومالك تحت ولقيوا العيلة كلها متجمعين .)
مالك بخضة : ايه ده !!
سامح : ..........................
*_____________________________________________**___________________________*
سامح : مش عارف ايه ده يا مالك دى جثة
اروى : ده موسى مين اللى قتله ؟
سامح : معرفش اسألى حضرة الظابط مين اللى دبحه بالمنظر ده
مالك : وانا هعرف منين
سامح : لما يبقى مجوز بنتى لـ ظابط وعايش معانا هنا ورغم كده يحصل جريمة قتل ده يبقى اسمه ايه
مالك : حضرتك مجوز بنتك لـ ظابط شرطة مش لـ كلب حراسة ليلي يحرس بيت حضرتك من السرقة والقتل
اروى : ايوة يا بابا هو مالك ذنبه ايه
اسر : يا جماعه مش وقته الكلام ده دلوقتى فى جثة قتيل فى البيت نتصرف فيها ازاى
مالك : محدش يلمس اى حاجة وانا هكلم قوة حد يبعتلنا قوة من المباحث
(. اتصل مالك بـ ياسر وبلغه ان فى جريمة قتل فى القصر ، جه فريق من المباحث بقيادة رئيس مباحث العاصمة .)
(. بدأت الشرطة فى استجاوب اهل القصر ، سامح قال ان موسى ده بيشتغل عنده من سنة بس ميعرفش تفاصيل كتيرة عنه وانه لما صحى لقاه جثة كده ، باقى اهل البيت اكدوا انهم كانوا نايمين وصحيوا على وجود الجثة ومحسوش بحاجة ولا حسوا بوجود حد .)
__**__
التحقيق مع الخدم ......
الظابط : اسمك وسنك وعنوانك
شوقى : شوقى عبد الستار ، ٣٥ سنة ، من المنوفيه بس عايش هنا فى القصر
الظابط : انت كنت قاعد مع القتيل فى نفس الاوضة صح
شوقى : اه انا وهو فى اوضة واحدة من ساعة ماهو جه
الظابط : انت بتشتغل ايه وهو كان بيشتغل ايه
شوقى : انا سواق يا سعات البيه وهو كان سفرجى
الظابط : تفتكر اتقتل ليه
شوقى : وانا هعرف منين يا باشا بس هو كان له حاجات غريبة كده
الظابط : حاجات غريبة زى ايه ؟
شوقى : كان بيتسحب بالليل كتير وكمان كان بيكلم المحمول كتير
الظابط : وكان بيكلم مين
شوقى : وانا هعرف منين يا سعات البيه
مالك : بعد اذنك يا افندم اسمحلى اتدخل
الظابط : طبعاً يا مالك بيه اتفضل
مالك : بص يا شوقى عيونا بنقدر نقفلها عشان منشوفش لكن ودانا مفتوحه دايماً و غصب عننا بنسمع اللى بيحصل حوالينا
شوقى : ايوة يا مالك بيه بس انا مكنتش بركز معاه
مالك : اكيد فى مرة سمعته بالغلط او بالصدفة
شوقى : انا فاكر اخر مرة كان بيكلم المحمول بره وانا سمعته بيقول ( انا حاسس انه بدأ يشك فيا )
الظابط : متعرفش كان بيكلم مين ؟
شوقى : لا والله يا بيه مفيش الا مرة واحدة محموله رن قدامى ولقيت مكتوب بثينه
الظابط : ماشى يا شوقى امضى او ابصم على اقوالك
شوقى : حاضر يا بيه
(. تم التحقيق مع باقى الخدم واكدوا كلهم ان موسى كانت تصرفاته غريبة وكان بيتسحب بالليل وكان بيكلم الموبايل كتير بصوت واطى .)
(. جت النيابة عاينت المكان ورفعت البصامات وخدت الجثة لمصلحة الطب الشرعى عشان يعرفوا سبب الوفاة .)
__**__
الظابط : ان شاء الله اول ما اوصل لاى حاجة فى القضيه هبلغك بيها
مالك : متشكر اوى يا افندم بس تفتكر فى خطورة على اهل البيت
الظابط : مقدرش احكم بس واضح ان الهدف هو القتيل مش حد تانى
مالك : حضرتك تتوقع ايه السناريو اللى حصل
الظابط : كالعادة جه حد يسرق كان موسى كالعادة بيتسحب بالليل شاف السارق حاول يكشفه السارق خلص عليه
مالك : اممم كلام منطقى
الظابط : عموماً بلاش نستعجل كده كده هنعمل تحرياتنا وهنشوف وهنحقق مع اى حد يعرفه وهنحاول نعرف القاتل فى اسرع وقت متقلقش
مالك : اتمنى ذلك وربنا معاكم
__**__**__**__**__
(. العيلة كلها متجمعه وخلص مالك كلام مع رئيس المباحث ودخلهم .)
سامح : بقى انا يدخل بيتي واحد يدبح شخص من اهل بيتى ويخرج عادى كده من غير ما نحس بيه ولا كأن فى ظابط معانا فى البيت
مالك : انا غير متحمل لاى مسئولية تحصل فى البيت انا مجرد فرد من افراد البيت ده لا اكثر ولا اقل وبعدين ليه اللى داخل هيعمل حساب لـ ظابط شرطه الاولى يعمله لحضرتك يا سيادة السفير
سامح : اللى حصل ده كفيل يثبتلى ويثبت لنفسك ويثبت للداخلية كلها انك ظابط غير كفء لتحمل المسئولية
مالك : اوكى انا ظابط غير كفء انا اصلاً داخلها بالواسطه والتلت نجوم اللى على كتفى برضه بالواسطة مش عشان انا كفء يبقى حضرتك اللى غلطان من الاول انك اعتمدت عليا
اروى : لا بقى انا جوزى من اكفأ الظباط فى مصر وبشهادة كل اللى فى الداخلية ومسمحش ............
مالك يقاطعها بحزم : اروى ، ده ابوكى مينفعش تتكلمى معاه كده
سامح : لا سيبها تكمل كملى يا اروى هانم
مالك : من الاخر كده محدش يحملنى اى مسئولية ، المسئوليه على اللى سايبين بيت زى ده من غير حراسة (ومشى)
اروى : فعلاً يا بابا المسئولية حضرتك اللى تتحملها مش اى حد تانى (ومشيت ورا مالك)
سامح : كانت جوازة مهببه
اسر : لا فعلاً يا بابا هما عندهم حق مالك مالوش اى دخل
فاتن : ابوك قصده ان اى ظابط بيكون عنده حس امنى يعنى كان المفروض يكون واعى للى حصل عن كده
مروة : يعنى هو هيشم على ضهر ايده
سامح : ممكن تخرسوا بقى ، انتوا مش فاهمين يعنى ايه واحد يتقتل بكل سهولة جوه القصر ده معناه ان الدور جاى علينا
فاتن : يبقى نشوف حراسه يا سامح
اسر : صح يا بابا وكمان ممكن نركب كاميرات مراقبة تسجلنا كل اللى بيحصل فى القصر
سامح : هو ده اللى انا ناوى اعمله
آدم : اسمحولى اتدخل ، بعد التحقيق فى القضية هنعرف سبب دخول القاتل هنا وسبب قتله لـ موسى وفى احتمال كبير يبقى الموضوع شخصى يعنى بين القاتل والقتيل
مروة : ايوة يا حبيبى بس ساعتها هيبقى معروف ان اقتحام القصر وقتل شخص فيه حاجة سهلة
سامح : وهو ده اللى قالقنى
فاتن : انا بقول نسافر كلنا بره مصر شوية لحد ما القضية دى تخلص
سامح : هنسافر بس بعد ما نشوف القضية هتوصل لحد فين
__**__**__**__
فى الجهة التانية ....
(. مالك طلع الجناح الخاص بيهم واروى طلعت وراه .)
اروى : انا اسفة يا مالك متزعلش
مالك : اسفة على ايه انتِ كمان
اروى : على اللى بابا عمله
مالك : انتِ مالكيش ذنب وهو عنده حق جريمة قتل تحصل فى بيته مش سهلة بس مش معنى كده انه يحملنى المسئولية
اروى : معلش يا حبيبى انت عارف ان الواحد لما يكون مخنوق وحاسس انه غلطان ومش عايز يعترف بيعمل اى حد تانى شماعة اخطائه
مالك : والله يا اروى انا شايل هم البيت ده زى ابوكى بالظبط واديكي شوفتى ملفات قضايا السرقة اللى هى اساساً اتقفلت ومتقيدة ضد مجهول لمجرد انى اشوف فين الثغرات الامنيه
اروى : ايوة يا حبيبي بس انت مقولتش ايه هى الثغرات الامنيه وايه المطلوب لحماية القصر والارواح اللى فيه
مالك : انا قولت مليون مرة لابوكى وقدامك ان لازم يكون فى حراسه على القصر وهو رافض عشان خايف على ارواحهم صح ولا غلط
اروى : صح
مالك : اهو ابوكى بيضيع ارواح عشان خاطر يحمى مبادئه
اروى : اكيد بعد اللى حصل ده هيجيب حراسه
مالك : ده اساسى وكمان يراقب القصر
اروى : ربنا يستر
مالك : متقلقيش يا حبيبتى ان شاء الله هيستر
اروى : انت هتنزل الشغل
مالك : اكيد
اروى : من غير فطور
مالك : مش مشكلة يا حبيبتى هفطر فى الشغل
اروى : هتجى على الغدا
مالك : مش عارف
اروى : خد بالك على نفسك
مالك : حاضر يا حبيبة قلبى (وباس جبينها وخرج)
*_____________________________________________**___________________________*
فى شغل مالك .....
مالك : صباح الخير
هانى : صباح النور ، شكلك مضايق
مالك : ومخنوق مش طايق نفسى
هانى : ليه بس
مالك : اصحى الصبح على جثة قتيل مدبوح عندنا فى القصر وبعدها خناقة مع حمايا العزيز واكيد سيادة العميد هيطلبنى عشان يدينى الحصة بتاعة كل يوم
هانى : مين القتيل ده ؟
مالك : واحد من اللى بيشتغلوا فى القصر
هانى : ومين اللى قتله
مالك : لسه معرفوش اكيد
(. هنا دخل واحد من اللى بيشتغلوا تحت اشراف مالك .)
الشخص : يا افندم ده تقرير بخصوص تسجيل المكالمات اللى حضرتك طلبته
مالك : يعنى جاهز
الشخص : اه يا افندم وتقدر تسمعه دلوقتى
مالك : طيب روح انت وانا جاى وراك
الشخص : تمام يا افندم
هانى : تسجيل مكالمات لمين
مالك : مانت عارف يا باشا مش كل حاجة بنقولها
هانى : ههههه ماشى يا عم فى دى عندك حق
مالك : هروح انا بقى
هانى : ولو سيادة العميد سأل عليك اقوله ايه
مالك : قوله مات
هانى : هههههههه بعد الشر عليك
__**__**__**__
فى مكتب مالك ....
(. مالك خد التسجيلات وبدأ يسمعها فى مكتبه .)
اول مكالمه ..
(. اروى بتكلم سمر .)
سمر : فينك يا بنتى بكلمك مبترديش
اروى : مكنتش عارفة اتكلم
سمر : فى ايه مال صوتك
اروى : مفيش حاجة مخنوقة شوية
سمر : اتخانقتى مع مالك ولا ايه
اروى : يعنى حاجة زى كده
سمر : بخصوص ايه ؟
اروى : عادى يعنى خناقات عادية بتحصل بين اى زوجين
سمر : ربنا يهدى سركوا
اروى : امين يارب
(. وفضلت اروى وسمر يرغوا فى كلام فاضى .)
مالك لنفسه >> رغى كتير مالوش اى تلاتين لازمه
__**__
تانى مكالمه ..
(. عماد اتصل بـ اروى .)
عماد : اخيراً سمعت صوتك فينك يا بنتى
اروى : موجوده والله يا عماد انت عامل ايه
عماد : تمام من يوم ما اتجوزتى حضرة الظابط محدش سمع صوتك
اروى : عادى بقى بس بعرف اخبارك من سمر وباقى الجروب
عماد : طيب عملتى ايه فى اللى طلبته منك
اروى : كله تمام
عماد : بجد
اروى : ايوة يعنى امال بكدب عليك
عماد : طيب تمام اوى ينفع تحكيلي
اروى : لا مش هينفع فى الموبايل خلينا نتقابل واحكيلك
عماد : خلاص اوكى نتقابل فين
اروى : كمان ساعة فى النادى
عماد : اوكى هستناكى
مالك لنفسه >> مين عماد ده !! وايه الحاجة اللى طلبها منها !! وليه مش هينفع فى الموبايل !! وكمان بتقابله من ورايا
واضح ان شكى فى اروى طلع فى محله
(. تابع مالك باقى المكالمات وكانت كلها مكالمات ملهاش اى اهميه .)
*_____________________________________________**___________________________*
العصر فى بيت اهل مالك ....
(. عبد الرحمن اتصل بـ فؤاد .)
عبد الرحمن : ايوة يا بابا اذيك
فؤاد : الحمد لله يا عبد الرحمن انتوا عاملين
عبد الرحمن : كويسين الحمد لله ، قريت جرايد النهاردة
فؤاد : لا فى حاجة ولا ايه
عبد الرحمن : فى واحد اتقتل فى قصر حما مالك
فؤاد : لا حول ولا قوة الا بالله مين اللى اتقتل
عبد الرحمن : واحد من اللى بيشتغلوا هناك
فؤاد : طيب فى حد حصل حاجة واخوك كويس
عبد الرحمن : متقلقش كلهم بخير بس انا بتصل بـ مالك مبيردش عليا فـ قولت يمكن يكون كلمكم
فؤاد: لا ماتصلش النهاردة خالص
عبد الرحمن : اكيد مشغول فى القضية دى
فؤاد : طيب انا هحاول اكلم اروى اطمن منها عليهم وعلى اخوك
عبد الرحمن : ماشى يا بابا وابقى طمنى عليهم
فؤاد : ماشى
(. وقفلوا واتصل فؤاد بـ اورى .)
فؤاد : ايوة يا اروى يا بنتى اخباركوا ايه
اروى : متقلقش يا عمر احنا كلنا كويسين
فؤاد : اللى مكتوب فى الجرايد ده صح
اروى : ايوة يا عمو للاسف صح
فؤاد : ومين اللى اتقتل
اروى : واحد من اللى بيشتغلوا فى المطبخ
فؤاد : ربنا يرحمه طيب والتحقيقات وصلت لحاجة
اروى : لا يا عمو لسه
فؤاد : ان شاء الله خير ، طيب وفين مالك بنكلمه مبيردش
اروى : مالك فى الشغل واضح انه مشغول اوى لانى انا كمان كلمته ومردش
فؤاد : يالا ربنا معاه ولو كلمك خليه يكلمنا يطمنا عليه
اروى : حاضر يا عمو (وقفلوا)
فؤاد لنفسه >> ربنا يسترها معاك يا مالك يا ابنى يارب ويحميك من كل مكروه
*_____________________________________________**___________________________*
بعد كام يوم فى المباحث ......
(. رئيس مباحث العاصمه اتصل بـ مالك وقاله انهم وصلوا لـ حاجات مهمة فى القضية وطلب يروحلوا .)
مالك : خير يا افندم
رئيس المباحث : تقرير الطب الشرعى وصل وكمان تقرير رفع البصامات
مالك : وايه الاخبار
رئيس المباحث : بالنسبة للبصامات زيها زى حادثتين السرقة
مالك : يعنى البصامات ممسوحه
رئيس المباحث : بالظبط
مالك : طيب بالنسبة لتقرير الطب الشرعى
رئيس المباحث : بيقول انه اتكتم نفسه الاول وبعدين اتدبح بسكينه
مالك : كان فى مقاومه
رئيس المباحث : لا
مالك : يعنى اتقتل على غفلة منه
رئيس المباحث : بالظبط
مالك : تمام وحققتوا مع حد من اهله
رئيس المباحث : مالوش حد اطلاقاً ، عندى احساس قوى ان القضية دى هتبقى زى القضايا اللى قبلها
مالك : قصد حضرتك ضد مجهول
رئيس المباحث : بالظبط اللى بيدخل القصر ده عارف هو هيدخل ازاى وهيخرج ازاى من غير ما يتكشف
مالك : بس موسى ده هيتقتل ليه
رئيس المباحث : بصراحة مش عارف احنا تحرياتنا بتقول انه مالوش اهل ولا زوجه ولا ابناء لا حتى اصدقاء
مالك : طيب مين بثينة اللى كان بيكلمها دى
رئيس المباحث : الرقم مش متسجل باسم حد فى شركة الاتصالات ولما تتبعنا الرقم موصلناش لحاجة
مالك : حضرتك مش شاكك فى اى حاجة
رئيس المباحث : فى مليون شك فى دماغى بس للاسف مفيش حاجة مؤكده
مالك : ليه دايماً الجرايم اللى بتحصل فى القصر ده غامضة كده وملهاش حد
رئيس المباحث : انا عندى شك شبه مؤكد
مالك : اللى هو ايه ؟
رئيس المباحث : انت اكيد عارف ان سامح الخولى عنده اعداء كتير
مالك : امممم عارف
رئيس المباحث : شاكك ان ده حد من اعداءه وبيضغط عليه يعنى بمعنى اصح بيقول انا دخلت بيتك ودبحت واحد ومحدش هيعرفنى لا انت ولا الشرطه شوف بقى انا ممكن اعمل ايه تانى
مالك : كلام معقول ومنطقى
رئيس المباحث : عموماً احنا هنتأكد وهنعمل اللى علينا ويارب نقدر نوصله
مالك : ربنا معاكم ، هستآذن انا عشان عندى شغل
رئيس المباحث : تمام يا سيادة النقيب ربنا معاك
مالك : ربنا معانا كلنا
(. قام مالك ويدوب فتح باب المكتب ووقف لـ ثوانى وافتكر مكالمة اروى وعماد .)
مالك : هو ممكن يكون فى جاسوس جوه البيت بينقل الاخبار بره
رئيس المباحث : وارد جداً طبعاً
مالك : اوكى يا افندم متشكر جداً
رئيس المباحث : العفو
*_____________________________________________**___________________________*
فى شغل مالك ....
(. مالك استدعى واحد من اللى بيشتغلوا معاه .)
الشخص : تمام يا افندم
مالك : عملت ايه فى الرقم اللى طلبته منك
الشخص : انا جبت كل بياناته يا افندم
مالك : فين هى
الشخص : اتفضل (واداله ملف)
مالك : اوكى اتفضل انت
مالك بيقرأ فى سره >> عماد صلاح الشربيني ، مواليد ٨٨ من اسكندرية وعايش طول عمره فى القاهرة
(. مالك بيرجع ضهره للكرسى وبيفتكر بعد ما اتجوز اروى وكان بيملى ملف خاص ببيانات الزوجه واهلها عشان يقدمه لـ الداخلية .)
مالك لنفسه >> آدم صلاح الشربيني وعماد صلاح الشربيني !! يعنى ايه اخوات !! ازاى !!
(. استدعى مالك نفس الشخص تانى .)
الشخص : تمام يا افندم
مالك : انا عايز الفيش والتشبيه بتاع عماد ده وكمان ملفه فى الكليه اللى اتخرج منها ماشى
الشخص : تمام يا افندم
مالك : وكمان عايز كل حاجة عن واحد اسمه ( آدم صلاح الشربيني ) وابوهم ( صلاح الشربيني )
الشخص : تمام يا افندم
مالك : ياريت فى اسرع وكل حاجة يعنى كل حاجة مش عايز حاجة عنهم معرفهاش تمام
الشخص : عُلم وسينفذ يا افندم
مالك : تمام اتفضل انت
مالك لنفسه >> آدم يتجوز مروة غصب عن ابوها ، واروى تجرى ورايا بالشهور وتتجوزنى برضه غصب عن ابوها وتروح تقابل عماد اخو آدم رغم ان آدم قال ان ابوه واخواته فى اسكندرية ومالوش حد فى القاهرة !! واضح ان الموضوع كبير وان قصر الدبلوماسى مليان بالاحداث والقضايا الغامضة
*_____________________________________________**___________________________*
فى قصر سامح الخولى ....
(. مالك من يوم حادثة القتل بيرجع من الشغل على الجناح وينام على طول ، مالك دخل لقى العيلة كلها متجمعه فى جنينة القصر .)
مالك : مساء الخير
كلهم : مساء النور
فاتن : يااه يا مالك اخيراً شوفناك
مالك : معلش مشغول اوى الايام دى
سامح : اخبار القضية ايه
مالك : مفيش جديد لسه
آدم : طيب تعالى اقعد معانا شوية
مالك : هى اروى فين
مروة : فى اوضتها
مالك (قعد) : وانتوا مش راجعين المانيا ولا ايه
مروة : لا هنقعد لاخر السنة
مالك : بس غريبة يعنى انتوا معندكوش شغل هناك
آدم : شغلنا اللى هناك خاص بينا احنا يعنى فى ناس تحت ايدنا مش العكس
مالك : اهاا عشان كده بـ تيجوا وتسافروا تانى بسهوله
سامح : تفتكر يا مالك مين القاتل
مالك : معرفش يا عمى انا مببحققش فى القضية ومقدرش ابنى فروض بدون ادله
فاتن : احنا قصدنا من خبرتك الامنيه
مالك : خبرتى بتقولى مفيش دليل يبقى مفيش فروض
مروة : خلاص خلاص هما كده الضباط محدش يعرف ياخد منهم حق ولا باطل
مالك : عن اذنكم انا بقى عشان مرهق جداً وعايز انام
سامح : اتفضل
مالك : تصبحوا على خير
كلهم : وانت من اهل الخير
__**_**__**__
(. مالك طلع الجناح لقى اروى فى انتظاره .)
اروى : حمد الله على السلامه يا حبيبي
مالك : الله يسلمك
اروى : اخليهم يحضرولك اكل
مالك : اكلت بره
اروى : طيب ممكن نقعد نتكلم مع بعض شوية
مالك : مش قادر عايز انام
اروى : انا مبقتش بشوفك ولا بقعد معاك ولا حتى بتاكل اى وجبه هنا فى القصر بتخرج الصبح بدرى وترجع بالليل متأخر انا لازم افهم فى ايه
مالك : مش لما افهم انا الاول فى ايه
اروى : قصدك ايه
مالك : مقصدش حاجة ، انا تعبان وعايز انام
اروى : بس انا ليا حق عليك انا مخنوقة ومحتاجة اتكلم معاك ومحتاجاك تهتم بيا
مالك : والله بقى هى دى طبيعه شغلى اللى انتِ عرفاه من قبل ما نرتبط
اروى : طيب على الاقل نتعشى سوا
مالك : والمفروض بقى انى اموت نفسى من الجوع عشان اكل مع سيادتك
اروى : انا عايزة افهم مالك ايه اللى غيرك كده
مالك : بقولك ايه انا عايز استريح عشان عندى شغل الصبح والرغى الكتير ده انا مش فاضيله وخليكي فاكرة انك متجوزة ضابط شرطه يعنى وقته وحياته وظروفه مش ملك حضرتك لوحدك
(. اروى اتصدمت من طريقة كلام مالك معاها .)
اروى بدموع محبوسه : اوكى تصبح على خير
مالك : واانتِ من اهله
*_____________________________________________**___________________________*
تانى يوم فى شغل مالك .....
(. مالك فى مكتبه وجه عليه الشخص اللى هو مكلفه بجمع معلومات عن ادم وعماد .)
الشخص : دى يا افندم كل حاجة عن آدم وعماد صلاح الشربيني وعن صلاح الشربيني
مالك : هما اخوات
الشخص : اسم الاب متشابه لكن اسم الام مختلف ومفيش اى حاجة تثبت انهم اخوات
مالك : يعنى ممكن يكون تشابه اسماء
الشخص : ممكن جداً يا افندم تحرياتنا بتقول انهم عمرهم ما اتقابلوا ولا اتكلموا ويمكن ميعرفوش بعض اصلاً
مالك : ممكن !! هو احنا شغلنا فيه ممكن
الشخص : مقصدش يا افندم
مالك : تمام سيب الملفات وروح انت
الشخص : تمام يا افندم
(. فضل مالك يقرأ الملفات ولقى ان مفيش حاجة غلط عليهم بس لسه شاكك فيهم خصوصاً عماد واروى .)
*_____________________________________________**___________________________*
فى بيت اهل مالك ....
شهيرة : اخيراً شوفتك يا مالك
مالك : معلش يا ماما انا والله مشغول جداً فى مليون حاجة مطحون فيها
شهيرة : ربنا معاك يا حبيبي
مالك : ادعيلي يا ماما ادعيلي كتير
شهيرة : انت كويس يا حبيبي
مالك : كويس الحمد لله بس مضغوط اوى
شهيرة : اخبار اروى ايه وعامله ايه فى الحمل
مالك : كويسة انا مبشوفهاش كتير بخرج الصبح وبرجع على النوم
شهيرة : ربنا معاك هحضرلك حاجة تاكلها
مالك : لا يا ماما مش جعان ممكن اشرب شاى
شهيرة : ماشى وهجبلك معاه فطاير انا عملاها
مالك : تسلم ايدك يا ماما
فؤاد : مالك بقى
مالك : مفيش حاجة يا بابا مضغوط فى الشغل
فؤاد : فى مشاكل بينك وبين اروى
مالك : المشاكل فى كل حاجة فى الشغل فى البيت مع اروى
فؤاد : طيب حاول متجيش على اروى عشان خاطر شغلك انت فاهمنى طبعاً
مالك : انا بحاول بس غصب بـ اجى عليها انا مش انسان الى يعنى يا بابا
فؤاد : ربنا معاك ومعاها ويقومها بالسلامه
مالك : يارب
*_____________________________________________**___________________________*
بعد كام يوم فى قصر سامح الخولى ....
(. مالك واروى فى الجناح بتاعهم ، مالك معاه صور لـ اروى وهى بتقابل عماد .)
مالك : خرجتى النهاردة
اروى : لا
مالك : خالص
اروى : لا
مالك : امال ده اسمه ايه (ووراها الصورة)
اروى : ايه ده !!
مالك : مش عارفة ايه ده
اروى : ايوة اصل .. امم ماهو انا كنت ..... (وسكتت)
مالك : كل مكالماتك متسجله مع عماد وفى كل مكالمه كنتى بتقوليله ان مش هينفع الكلام فى الموبايل وتروحى تقابليه
اروى : انت بتتجسس عليا يا مالك
مالك : اه بتجسس عليكي وعشان شاكك فيكي عند حضرتك اعتراض
اروى : يااه كل ده ليه عشان ..........
مالك يقاطعها بزعيق : انا مش عايز اسئلة انا عايز اجابه وتكون حقيقة مش من خيالك
اروى بارتباك : انا من يوم ما تجوزنا مقابلتوش الا مرتين واتكلمنا مرتين او تلاته برضه
مالك : مانا عارف انهم زفت مرتين !! مين عماد ده وايه اللى بينك وبينه
اروى : عماد ده ........
مالك يقاطعها : عارفة لو كدبتى هعمل فيكي ايه وعلى فكرة سهله جداً اعرف انك بتكدبى
اروى بخوف : والله هقول الحقيقة
مالك بزعيق : اتفضلى
اروى : عماد ده صديق ليا من حوالى ست سنين و......
(. يقاطع كلام اروى صوت موبايل مالك وكان رئيس مباحث العاصمه .)
مالك : استنى (ورد على الموبايل) ايوة يا افندم
رئيس المباحث : اذيك يا مالك
مالك : تمام وحضرتك
رئيس المباحث : كنت عايز اقولك انى خلاص هقفل القضية
مالك : وصلتوا للقاتل
رئيس المباحث : اممم يعنى
مالك : مين ؟
رئيس المباحث : ...............
__*__*__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
فين الحلقة الحاديه عشر
ردحذففين الحلقة الحاديه عشر
ردحذف