الحلقة الثالثة عشر
جزء من حلقة سابقة :
(. الساعه ١٢ ونص بالليل اروى نايمه فى الجناح الخاص بيها وموبايلها رن برقم متعرفوش .)
اروى : الو
المتصل : اروى الخولى ؟
اروى : ايوة انا مين ؟
المتصل : انا النقيب ياسر الحمصانى
اروى بعصبية : ياسر !! خير فى ايه ومتصل فى وقت زى ده ليه
*_____________________________________________**___________________________*
ياسر : مالك
اروى : مات !!
ياسر : انتِ عرفتى منين !!
اروى : هو مات فعلاً !!
ياسر : اتقتل اتضرب عليه نار وللاسف .......
اروى : اوكى يا ياسر والجثة فين
ياسر : فى المشرحة واكيد هيطلبوكى عشان يحققوا معاكى
اروى : يحققوا معايا !! ليه هو انا مشكوك فيا
ياسر : مش بالظبط بس اكيد هيسألوكى شاكه في مين وحاجات من دى
اروى : تمام
ياسر : البقاء لله يا اروى
(. اروى مردتش على ياسر وقفلت الخط ، اروى منزلتش ولا دمعه ومكنتش مصدومه اطلاقاً ورد فعلها كان هادى جداً وبارد ، قفلت مع ياسر الخط وشدت البطانيه ودفنت نفسها تحتها .)
__**__**__**__
فى جناح سامح وفاتن ...
(. تليفون جه لـ سامح وقاله خبر قتل مالك .)
فاتن : خير يا سامح مين كان بيتصل
سامح : لا حول ولا قوة الا بالله
فاتن : فى ايه يا سامح خضتنى
سامح : مالك
فاتن : ماله مالك
سامح : اتقتل
فاتن بصدمه : اتـ ايه !!! اتقتل !! اتقتل ازاى ومين قتله
سامح : بيقولوا مجهول ضرب عليه نار
فاتن : يعنى كان فى مواجهة معاهم ولا ايه بالظبط
سامح : لا ده كان راجع على هنا اتقتل غدر
فاتن بدموع : لا اله الا الله ، ربنا يرحمك يا مالك ربنا يرحمك يا ابنى
سامح : المشكلة دلوقتى هنقول الخبر ده لـ اروى ازاى
فاتن : انا مش عارفة البنت ممكن تروح فيها او تنتحر تانى
سامح : انا من رأيي نستنى الصبح تكون مروة وصلت ونقولها عشان نكون كلنا حواليها
فاتن : ماشى طيب واهله عرفوا
سامح : معرفش
فاتن : قوم يا سامح يالا نلبس
سامح : نلبس !!
فاتن : ايوة قوم نروحلهم نكون جنبهم
سامح : وافرض بنتك صحيت
فاتن : مش هتصحى قبل الصبح قوم نروحلهم ونكون نجبهم
سامح : ماشى بس افرضى مكنوش عرفوا
فاتن : نقولهم احنا بدل ما يعرفوا من بره
سامح : انا هكلم عبد الرحمن اخو مالك واهو يكون معانا
فاتن : ماشى انا هدخل اغير هدومى
(. اتصل سامح بـ عبد الرحمن اخو مالك ، عبد الرحمن رد بسرعه البرق كأنه كان مستنى الاتصال ده .)
سامح : معلش انى بتصل فى وقت زى ده
عبد الرحمن : مالك وصل
سامح : انت عارف حاجة
عبد الرحمن : انا كنت بكلمه وفجأة مبقاش بيرد وسمعت صوت ضرب نار وبكلمه موبايله مقفول
سامح : للاسف مالك توفى
عبد الرحمن : توفى !! اخويا مالك مات
سامح : احنا دلوقتى رايحين عند اهلك عشان نقولهم ونكون جنبهم ممكن تقابلنا هناك
عبد الرحمن : اوكى
(. وقفل سامح مع عبد الرحمن وقام يلبس .)
*_____________________________________________**___________________________*
فى بيت عبد الرحمن .....
مريم : خير يا عبد الرحمن اتطمنت على مالك
عبد الرحمن مصدوم : مالك مات
مريم بخضة : مات !! انت متأكد
عبد الرحمن : مالك مات مالك اخويا مات
مريم بتحضنه : ادعيله يا عبد الرحمن ربنا يرحمه اكيد فى الجنة ان شاء الله
عبد الرحمن : ده ملحقش يفرح بـ شبابه ولا جوازه ولا حتى ابنه
مريم : راح عند اللى احسن من الكل يا عبد الرحمن
عبد الرحمن (دموعه بتنزل تلقائى) : اخر حاجة قالهالى متخفش عليا انا فى حماية ربنا بس اهم حاجة خد بالك من ماما
مريم : ربنا يرحمه يارب ويسكنه فسيح جناته
عبد الرحمن (بيمسح دموعه) : قومى غيري يالا عشان نروح عند ابويا وامى
مريم : حاضر ثوانى وهكون جاهزة
(. قامت مريم غيرت واتصلت بـ امها عشان تودى ولادها عندها ، عبد الرحمن من الصدمه مقدرش يقوم يغير هدومه لدرجة ان مريم هى اللى لبسته ومقدرش يسوق عربيته ومريم هى اللى ساقت بيهم .)
*_____________________________________________**___________________________*
فى بيت اهل مالك ....
(. سامح وفاتن وصلوا تحت بيت اهل مالك واستنوا لحد ما عبد الرحمن يوصل عشان يطلعوا سوا ، اتجمعوا وطلعوا كلهم وضربوا الجرس ، فؤاد وشهيرة كانوا نايمين وصحيوا مخضوضين على صوت الجرس .)
شهيرة : مين اللى جاى فى وقت زى ده
فؤاد : خير اللهم اجعله خير ربنا يستر
شهيرة : يارب خير
(. وقاموا هما الاتنين سوا وفتح فؤاد الباب وتفاجئوا بـ سامح وفاتن ومريم وعبد الرحمن .)
فؤاد : خير يا جماعة فى ايه
شهيرة بدموع تلقائيه : مـ مـ مالك ابنى مالك ابنى حصله حاجة صح
فؤاد : فى ايه ؟
سامح : مالك اتقتل
فؤاد : لا اله الا الله . لا اله الا الله ربى لا اسألك رد القضاء ولكنى اسألك اللطف فيه
شهيرة (بتقعد على الارض) : مالك اتقتل ، مالك ابنى مات !! لا لا لا اكيد لا هو قالى مش هسيبك عمرى كله
عبد الرحمن(بيحضنها) : راح عند اللى احسن من الكل يا ماما
شهيرة مصدومه : اخوك مات يا عبد الرحمن . ضنايا راح منى
فؤاد : كانت امانه عندك وربنا استردها
شهيرة بتصرخ : يـــا ابـــنــى يــا ضـنـايـا ده مالحقش يفرح بـ ابنه ده لسه عريس
فاتن : عريس فى الجنة ان شاء الله
فؤاد بيحضنها : قولى ورايا يا شهيرة ، ربى لا اسألك رد القضاء ولكنى اسألك اللطف فيه
شهيرة بتردد ودموعها سبقاها
فؤاد : لا اله الا انت سبحانك انى كنت من الظالمين
شهيرة بتردد وراه
فؤاد : اذكرى الله واستعينى بيه ، مالك فى مكان احسن دلوقتى ادعى ربنا يجمعنا بيه فى الجنة
شهيرة : يارب ارحمه واسكنه فسيح جناتك يارب
(. حالة شهيرة كانت صعبه جداً وعبد الرحمن ادالها حقنه مهدأة عشان تنام وفضلت مريم وفاتن جنبها للصبح .)
سامح : معلش يا جماعه احنا مضطرين نمشى قبل ما اروى تصحى
عبد الرحمن : انتوا ازاى سايبنها لوحدها فى ظروف زى دى
فاتن : اروى لسه متعرفش حاجة لسه هنروح نقولها
فؤاد : ربنا يكون فى عونكم وعونها وعونا كلنا
فاتن : امين يارب
فؤاد : صحيح يا سامح بيه احنا نقدر نستلم جثته امتى
سامح : للاسف مش دلوقتى مش هيسلموها لكم ولا هيطلعوا تصريح دفن الا اذا لقيوا الجانى
عبد الرحمن : طيب مش المفروض نروح نتعرف على جثته
سامح : المفروض بس مالك الله يرحمه مش شخص عادى يعنى اكيد الداخليه كلها اتعرفت عليه
فؤاد : كان نفسى اشوفه
فاتن : بلاش يا سيادة المستشار اكيد محدش فينا هيستحمل
سامح : بس لو طلبوكوا لازم حد قريب من الدرجة الاولى يروح
عبد الرحمن : ربنا يسهل
(. ومشى سامح وفاتن وفضل عبد الرحمن مع ابوه ومريم جنب شهيرة .)
*_____________________________________________**___________________________*
فى قصر سامح الخولى .....
(. سامح وفاتن طول الطريق بيفكروا هيقولوا لـ اروى ازاى ، وصلوا وقرروا يطلعوا لها الجناح الخاص بيها هى ومالك ، دخلوا لقيوا اروى قاعده بتتفرج على التلفزيون .)
سامح : اخبارك ايه النهاردة
اروى : كويسة الحمد لله
فاتن : فطرتى
اروى : اه لكن انتوا كنتوا فين كده
سامح : كنا فى مشوار
فاتن : اروى حبيبتى كنت عايزة اقولك على حاجة مهمة
اروى ببرود : عارفة عايزة تقولى ايه
فاتن : لا يا حبيبتى اكيد متعرفيش
اروى : صدقيني عارفة
سامح : طيب عارفة ايه
اروى(بتبص فى عيون سامح) : ان مالك اتقتل
(. فاتن بترجع لورا لانها خافت من نظرة اروى واستغربت برودها ، سامح كان واقف مذهول تماماً من اللى اروى بتعمله .)
سامح : انتِ واعيه للى انتِ قولتيه دلوقتى
اروى : اه واعيه ، مالك اتضرب عليه نار فـ اتصاب فـ مات ، يعنى بح خلاص معدش فيه مالك
فاتن : وانتِ واخدة الموضوع ببساطه كده
اروى : كلنا هنموت
فاتن : ايوة بس ده مش معناه اننا منحزنش على اللى ماتوا
اروى : مانا لو قعدت اعيط هتقولولى متعمليش فى نفسك كده واديني جبتها من قصرها وبتعامل عادى
سامح : يا بنتى فوقى جوزك مات
اروى : على فكرة انا فايقة اوى وواعيه لكل اللى حصل ومتوقعه كل اللى جاى ومتجننتش على فكرة انا بكامل قوايا العقلية
فاتن : انتِ كده بكامل قواكى العقلية
سامح : سبيها يا فاتن هى بس الصدمه خليتها كده
اروى : هاهاهاها صدمه !! انا اصلاً متصدمتش
سامح : يالا يا فاتن نروح نستريح
(. خرج سامح وفاتن وقعدت اروى تتفرج على التلفزيون عادى جداً وعلت صوته عشان تغيظ ابوها وامها .)
__**__**__**__
فاتن : البت اتجننت يا سامح موت مالك فقدها عقلها
سامح : شوية كده وهتبقى كويسة
فاتن : طيب هى فيها ايه
سامح : احتمال كبير جداً يكون مخها مش متسوعب الصدمه وبتتعامل كأن مالك لسه عايش
فاتن : بس هى قالت ان مالك اتقتل يعنى مات يعنى معدش فيه مالك
سامح : كلها هلاوس يا فاتن عقلها لسه مستوعبش الصدمه
فاتن : انا مش مطمنه يا سامح
سامح : ليه بس
فاتن : شوفت نظراتها لينا كانت عامله ازاى انا خوفت منها
سامح : انا كمان خوفت لاول مرة احس ان اروى عدو وانا خايف منه
فاتن : طيب احنا هنعمل ايه
سامح : احنا نسيبها براحتها تماماً
فاتن : يارب استرها من عندك
سامح : انا داخل استريح شوية
فاتن : دى مروة زمانها على وصول
سامح : مش قادر يا فاتن عايز انام شوية
فاتن : ماشى هصحيك على الغدا
سامح : اوكى
*_____________________________________________**___________________________*
بعد كام يوم فى المباحث ..
رئيس المباحث : انت اخر واحد كلمت مالك صح
عبد الرحمن : ايوة صح
رئيس المباحث : ممكن تقولنا ايه اللى حصل فى المكالمه
عبد الرحمن : اكيد
FLASH BACK
عبد الرحمن : ايه يا ابنى انت مش قولت انت هتجى تزورنى النهاردة
مالك : معنديش وقت يا عبد الرحمن
عبد الرحمن : طيب فى ايه كنت عايزنى ضرورى فى ايه
مالك : لو حصلى حاجة اى حاجة مهما كانت بسيطه الوحيدة اللى هتبقى عارفة سر اللى حصلى هى اروى
عبد الرحمن : انا مش فاهم حاجة
مالك : لو حصلى حاجة اضغط على اروى عشان تعترف لازم تضغط عليها فاهمنى يا عبد الرحمن
عبد الرحمن : انت ممكن يحصلك حاجة !! فى خطورة على حياتك
مالك : متخفش عليا انا فى حماية ربنا بس اهم حاجة خد بالك من ماما
عبد الرحمن : يا ابنى فهمنى فى ايه
مالك : مفيش حاجة متقلقش بس زى ما قولتلك اروى معاها السر
__**__**__**__
عبد الرحمن لـ رئيس المباحث : بعدها سمعت صوت ضرب نار وصوت العربية وهى بتقف بطريقة عشوائيه وصوت الفرامل كان شديد جداً
رئيس المباحث : وبعدين
عبد الرحمن : بعدها سمعت صوت تبادل اطلاق النار كأن اتنين بيردوا على بعض وبعدها الصوت وقف وسمعت واحد بيقول انا عرفت شكله وهجيب امه وبعدها الخط اتقطع واتصلت لقيته مقفول
رئيس المباحث : المكالمه كانت الساعه كام تقريباً
عبد الرحمن : ٩:١٠ بالليل
رئيس المباحث : متعرفش ايه السر اللى اروى تعرفه
عبد الرحمن : لا هو مقاليش وانا مشوفتهاش
رئيس المباحث : اروى دى مراته صح ولا هو قصده واحده تانيه
عبد الرحمن : لا اكيد يقصد مراته
رئيس المباحث : بس احنا استجوبناها وقالت انها متعرفش حاجة
عبد الرحمن : ممكن اقابلها
رئيس المباحث : هى لسه موجوده بره
(. واستدعى العسكرى وخلاه يدخلها .)
رئيس المباحث : عبد الرحمن اخو مالك بيقول انك عارفة السر
اروى : سر ايه يا عبد الرحمن
عبد الرحمن : حكى لها مكالمه مالك
اروى : انا معرفش انت او مالك بتتكلموا عن ايه
عبد الرحمن : متستعبطيش يا اروى مالك قالى لازم اضغط عليكي عشان تعترفى
اروى : اعترف بـ ايه ،
عبد الرحمن : بالسر اللى ورا قتل مالك
اروى : انا معرفش اى اسرار مالك فعلاً كان قالى انا هقولك على سر مهم بس ملحقش مات قبل ما يقولى
عبد الرحمن : مالك اكدلى انك عارفة حاجة واتضرب عليه نار وانا معاه على الخط
اروى : انا معرفش اى حاجة
عبد الرحمن : خلاص يا اروى ماشى براحتك طالما عادى بالنسبة لك ان دم مالك يروح هدر
اروى : اقدر امشى يا افندم
رئيس المباحث : اتفضلى
(. مشيت اروى ومشى عبد الرحمن ومازال التحقيق جارى .)
*_____________________________________________**___________________________*
فى قصر سامح الخولى ...
(. اروى راجعه من المباحث قابلتها مروة .)
مروة : ايه يا اروى كنتى فين كل ده
اروى : كنت فى المباحث
(. هنا فاتن جت .)
فاتن : ايه يا بنتى اللى اخرك كده
اروى : هو فى ايه
مروة : فى ناس جايين عشانك
اروى : ناس مين
فاتن : ناس قرايبنا جايين يعزوكى ٍ
اروى : ومين قالكوا انى عايزة حد يعزيني
فاتن : دى ناس بتفهم فى الواجب والاصول
اروى : انا اصلاً مش هقبل عزا فى مالك
فاتن : نعم انتِ اتجننتى فعلاً
اروى : لا متجننتش انا مش هقبل عزا فى مالك فاهمين
مروة : اهدى يا اروى الناس جت ادخلى اقعدى دقيقتين وقومى
(. اروى مردتش ودخلت عند الناس .)
ست ١ : البقاء لله يا اروى
اروى : اتفضلوا اخرجوا بره
فاتن : معلش يا جماعه هى بس اعصابها تعبانه
اروى : انا اعصابى مس تعبانه ومش مجنونه اتفضلوا اطلعوا بره معندناش هنا عزا
مروة : اروى ميصحش اللى انتِ بتعمليه ده
اروى : انا مش هقبل عزا فى مالك فاهمين ولا لا واللى هيجي عشان يعزيني هطرده فاهمين (وطلعت اوضتها)
فاتن : معلش يا جماعه انا بعتذرلكم بس هى حالتها النفسية تعبانه من ساعة اللى حصل
ست ٢ : ربنا يكون فى عونها ويصبرها
ست ٣ : عموماً احنا عملنا الواجب ويارب يجعلها اخر الاحزان
فاتن : امين يارب
*_____________________________________________**___________________________*
فى بيت اهل مالك ...
عبد الرحمن : بابا
فؤاد : نعم
عبد الرحمن : مش المفروض نعمل عزا لـ مالك
فؤاد : عزا من غير دَفنه وجنازة يعنى
عبد الرحمن : طيب هما ليه مش عايزين يسلمونا الجثة
فؤاد : انت مش سمعت بـ نفسك يا ابنى قالوا هيسلموها لنا بعد ما القضية تتقفل
عبد الرحمن : تفتكر يا بابا هيلاقوا اللى عمل كده
فؤاد : يارب
(. هنا الجرس رن وقام عبد الرحمن يفتح ولقاها اروى .)
اروى : اذيك يا عبد الرحمن
عبد الرحمن : كويس اتفضلى (ودخلت)
اروى : اذيك يا عمو
فؤاد : نشكر ربنا على اى حال
اروى : امال فين طنط عايزة اشوفها
(. هنا شهيرة لما عرفت انها اروى قررت تخرج .)
شهيرة : انا هنا يا اروى هانم
اروى : اذيك يا طنط
شهيرة : ياريته ما كان اتجوزك يا ريته ما عرفك
اروى : ليه يا طنط بتقولى كده
شهيرة : من يوم ما عرفك والمصايب نازله ترف على دماغنا
فؤاد : شهيرة ميصحش الكلام ده البنت فى بيتنا
اروى : انتوا ليه بتتكلموا كأن انا اللى عملت فى مالك كده
فؤاد : ايه السر اللى انتِ عرفاه يا اروى ، ايه اللى مالك عايزك تعترفي بيه
اروى : يا جماعه مالك مقاليش حاجة ومعرفش حاجة
شهيرة : كان غلطان يوم ما استأمنك على دمه وروحه
اروى : صدقونى انا معرفش اى حاجة
عبد الرحمن : خلاص يا اروى كفاية دى اساساً حاجة ترجع لـ ضميرك
اروى : عموماً انا كنت جاية اطمن عليكوا
شهيرة : لا صاحبة واجب
اروى : عن اذنكم (واتجهت ناحية الباب)
شهيرة : اكبر غلطة عملها انه استأمنك على دمه وروحه اكبر غلطه عملتها يا مالك يا ابنى
(. نزلت اروى وركبت عربيتها وجملة شهيرة لها مش مفارقة ودانها .)
*_____________________________________________**___________________________*
فى المباحث .....
رئيس المباحث : خير يا مدام اروى طلبتى تقابليني
اروى : انا جاية اقول السر اللى مالك الله يرحمه عايزنى اعترف بيه
رئيس المباحث : ايه هو
اروى : باختصار انا عارفة القاتل
رئيس المباحث بترقب : مين ؟
اروى : ............................
__*__*__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق