الحلقة الثانية عشر
جزء من حلقة سابقة :
(. هنا التليفون الارضى رن ، فؤاد وشهيرة بصوا لبعض بخوف وتوتر شديد ، رد فؤاد وهو قلقان جداً .)
فؤاد : الو
مالك : ايوة يا بابا انا مالك
فؤاد بقلق : خير يا مالك فى ايه
مالك : الحقنى يا بابا
فؤاد : فى ايه يا ابنى سيبت ركبى
*_____________________________________________**___________________________*
مالك : اروى يا بابا اروى بكلمها ومبتردش عليا
فؤاد : تعالى يا شهيرة كلمى مالك
(. خدت شهيرة السماعه من فؤاد وهى مش على بعضها .)
شهيرة : فى ايه يا مالك
مالك : اروى يا ماما اغمى عليها وعرقانه من كل حتة حاولت افوقها مفاقتش
شهيرة : فى نزيف ولا حاجة
مالك : مش عارف بتهيألى لا
شهيرة : طالما مفيش نزيف اطمن كده الجنين محصلوش حاجة
مالك : ما يولع الجنين يا ماما المهم اروى مالها
شهيرة : طيب خدها على اقرب مستشفى واحنا هنجيلك
مالك : ماشى هكلمكوا اقولكوا احنا فين
شهيرة : ماشى احنا هنلبس ونستنى مكالمتك (وقفلوا)
فؤاد : فى ايه يا شهيرة
شهيرة : الظاهر ان اروى تعبانه شوية هو هيوديها المستشفى واحنا هنحلقه
فؤاد : طيب يالا نلبس
*_____________________________________________**___________________________*
فى المستشفى .....
(. وصل مالك وسامح احدى المستشفيات الكبرى ودخل بـ اروى على الطوارئ وكانت لسه مغمى عليها ، دخلت اروى غرفة الكشف ، واتصل مالك بـ ابوه وامه وقالهم ما يجوش وهو هيطمنم .)
بعد الفحص ...
مالك : خير يا دكتور
الدكتور : محاولة انتحار بس احنا لحقناها
مالك وسامح مصدومين : انتحار !!!
الدكتور : اه هى خدت كمية كبيرة من البرشام مضاد حيوي تحديداً وهو اللى ادى للحالة دى
مالك : طيب وهى عامله ايه دلوقتى
الدكتور : لا احسن الحمد لله
سامح : والجنين ؟
الدكتور : مبدأياً الجنين كويس بس لما تبقى احسن هننقلها اوضة الاشعه وهنعملها سونار 3D عشان نطمن اكتر
سامح : متشكرين جداً يا دكتور
الدكتور : العفو يا افندم
سامح : انت عملت ايه فى بنتى !!
مالك : نعم !! وانا هكون عملت فيها ايه
سامح : انتوا اخر مرة قبل ما تعمل كده كنتوا مع بعض وكانت راجعه زعلانه
مالك : مانا قولت لحضرتك السبب
سامح : وهو ده سبب يخليها تنتحر
مالك : انا معرفش حصل ايه حضرتك بقى ممكن تسألها
سامح : انت المسئول قدامى
مالك بحزم : سامح بيه ، انا مش هقبل اكون شماعه كل مصيبه تحصل حضرتك تحملنى المسئوليه
سامح : هى بس تفوق ونطمن عليها وعلى اللى فى بطنها ونعرف ايه اللى خلاه تعمل كده
مالك : عن اذن حضرتك انا رايح اصلى الفجر
(. راح مالك صلى الفجر وبعد ما خلص صلاة موبايله رن وكانت شهيرة .)
شهيرة : ها يا ابنى خير طمنا على مراتك
مالك : كويسة يا ماما
شهيرة : طيب ايه اللى حصلها
مالك : مفيش حاجة ضغطها كان واطى من الحمل
شهيرة : والجنين
مالك : اطمنى يا ماما هما الاتنين كويسين الحمد لله
شهيرة : طيب يا حبيبي الحمد لله احنا كنا قلقانين عليها اوى
مالك : لا اطمنوا مفيش حاجة خطيرة
شهيرة : ماشى يا حبيبي ابقى طمنا عليكوا اول باول
مالك : حاضر (وقفلوا)
__**__**__
فى الجهة التانيه ......
(. اروى كانت فاقت ودخلها سامح بس الدكتور حذره انه ميتكلمش معاها فى اى حاجة تضايقها .)
سامح : اخبارك ايه دلوقتى
اروى : الحمد لله
سامح : انا مش هتكلم معاكى فى اى حاجة تضايقك دلوقتى بس انا حزين اوى من جوايا ، حزين عليكي وليكي
اروى : انا اسفة يا بابا
سامح : ولو كنتى روحتى مني كان الاسف ده هينفعنى بايه
(. هنا دخل مالك اللى كان زعلان جداً من اروى .)
مالك : فاقت
سامح : تعالى يا مالك فاقت
مالك : انتِ كويسة
اروى : اه الحمد لله
مالك : امال ليه عملتى كده
سامح : مش وقته يا مالك ، مش وقته الكلام ده
مالك : لا وقته لازم اعرف ايه اللى يخليها تفكر فى الموت وانها تقضى على حياتها بكل سهولة كده
اروى : حاضر هقولكم ليه عملت كده
(. قعد مالك وسامح على كنبه قصاد اروى .)
مالك : اتفضلى احكى
اروى بدموع : كل اللى انا فكراه انى تخيلت حياتى من غير الناس اللى بحبهم ، كنت بغمض عينى لثوانى معدوده وافتحها وفى كل مرة كنت باشوف حياتى من غير حد فيكوا ، مرة مالك ومرة بابا ومرة ماما كلكم حتى ابنى اللى مشوفتوش ومعرفش نوعه تخيلت حياتى من غيره ، اكتشفت انى مش هقدر اعيش من غير ما حد فيكوا ولا هستحمل صدمة موت حد وافضل انا لسه عايشة فقررت اموت نفسي
سامح بعصبيه : ومفكرتيش فينا احنا لو انتى موتى ، مفكرتيش فى حياة جوزك او امك او انا ، مفكرتيش فينا
مالك : مش مهم احنا يا عمى ، اسألها مفكرتش لما موتت نفسها فى النار اللى هتدخليها ، مفكرتيش فى انك هتموتى كافرة
اروى : انا مفكرتش فى اى حاجة غير كده ، كل اللى فكرت فيه انى مش هقدر اعيش من غيركم ، ومفيش حد فيكوا عايز يضحى عشانى
سامح : والمفروض نضحى عشانك بايه ، ايه اللى فى ايدنا نعمله
اروى : حضرتك تبيع القصر ده اللى بقى بيشكل خطورة على حياتنا وتسيب شغلك فى الخارجية اللى فيه خطورة على حضرتك ، ومالك يسيب شغله اللى بسببه ممكن يروح منى فى اى لحظة
مالك : يا بنتى افهمى الموت جاى جاى لكن امتى وفين ازاى ده فى علم الغيب ، مش قعدتى فى البيت هى اللى هتحمينى من الموت
سامح : مالك بيتكلم صح مش قعدتنا جنبك هى اللى هتمنع الموت عننا
اروى بدموع وعصبية : شوفتوا بقى ان محدش عايز يضحي عشانى كلكوا بتضحوا بيا انا .. كلكوا بتضحوا بيا كلكوا
(. فضلت اروى تكرر نفس الجمله ومالك وسامح بيبصوا لبعض كأنهم حسوا ان فى حاجة مش فاهمينها .)
*_____________________________________________**___________________________*
بعد مرور اسبوعين ...
- اروى اتحجزت فى المستشفى اسبوعين عشان كان عندها اكتئاب وحملها دخل فى السادس
- مالك ما بين شغله وبين المستشفى
- سامح ومالك مقالوش لـ فاتن او اهل مالك ان اروى فى المستشفى
*_____________________________________________**___________________________*
فى قصر سامح الخولى ....
(. اروى حالتها الصحية والنفسية اتحسنت والنهاردة رجعت القصر .)
سامح : اطلع معاها انت يا مالك
مالك : حاضر يا عمو
سامح : وانا هخليهم يحضرولك حاجة تاكليها
اروى : ميرسى يا بابا
مالك : قادرة تمشى ولا اشيلك
اروى : لا يا حبيبي انا كويسة وبعدين احنا هنركب الاسانسير مش عايزة اتعبك
مالك : تتعبيني طيب يالا هيلا هوب (وشالها)
اروى : ربنا يخليك ليا
مالك : وميحرمنيش منك
(. طلعوا الجناح الخاص بيهم ومالك ساعدها وغيرت هدومها .)
مالك : ينفع اللى عملتيه ده يا روءة
اروى : انت مش حاسس باللى جوايا يا مالك
مالك : يا حبيبتى انا شريك حياتك يعنى المفروض تشاركيني احاسيسك وافكارك ، اى خطوة تفكرى فيها خدى رأيي على الاقل
اروى : صعب اوى يا مالك لما تحس ان الناس اللى انت بتحبهم ممكن يموتوا
مالك : اروى يا حبيبتى الموت هو الحقيقة الوحيدة فى حياتها مينفعش ننكرها ونتجاهلها ومينفعش برضه نفكر فيها طول الوقت انتِ اعملى لاخرتك وخلاص والموت بقى يجي وقت ما يجي
اروى : ولما الناس اللى انت بتحبهم يموتوا هتعيش ازاى من غيرهم
مالك : ربنا قبل ما ينزل البلاء على شخص معين بينزل الصبر الاول ، ربنا بـ يبتلينا على قد قدراتنا
اروى : انا بحبك اوى يا مالك وشغلك ده مسببلى توتر
مالك : انا عارف انتِ ليه عملتى كده بس يا روءه ...... (وسكت)
اروى : بس ايه !!
مالك بيغتصب ابتسامه : مفيش حاجة يا حبيبتى يالا عشان تستريحي
اروى : طيب خليك جنبى متسبنيش
مالك : اوعديني يا اروى انك متعمليش كده تانى ولا حتى تفكرى
اروى : حاضر اوعدك بس اوعدنى انت كمان ...........
مالك يقاطعها : مش هقدر اسيب شغلى
اروى : انا فعلاً نفسي انك تسيب شغلك بس مش هطلبها منك هسيبك انت تختار بس اوعدنى تاخد بالك من نفسك
مالك : اوعدك انى هاخد بالى من نفسى ومنك
اروى : بحبك اوى (وحضنته)
مالك : وانا بحبك اوى
(فى سره >> مكنتش اعرف انى بحبك اوى كده يا اروى)
(. هنا الباب خبط وكانت الشغاله جايبة الاكل لـ اروى ، فتح مالك وخد منها الاكل .)
اروى : انا مش قادرة اكل
مالك : توء هتاكلى عشان عندك دوا وعشان زوءرم جعان
اروى : مين !!
مالك : زوءرم ، ابننا
اروى : ههههههه ايه زوءرم ده
مالك : ايه رأيك فى الاسم ده ، اختيارى
اروى : وافرض جت بنت
مالك : زوءرمه ان شاء الله
اروى : هههههههه حلوة الاسماء دي تخيل بنوته اسمها زوءرمه
مالك : وحشتنى ضحكتك ، بقالك كتير مضحكتيش من قلبك
اروى : ربنا يخليك ليا
(. اكلت اروى وراحت فى النوم ومالك قاعد جنبها عمال يتأمل ملامحها ويكلم نفسه .)
مالك لنفسه >> عمر ما توقعت انى احب شخص اكتر من شغلى ، عمرى ما تخيلت انى افضل حد على واجبى ، انا عارف انى بحب اروى بس مكنتش اعرف انى بحبها اوى كده ، اول مرة احس معنى كلمة الضياع والخسارة لما كانت هتروح منى اول مرة فعلاً افكر فى الموت واحب انى اعيش بس عشان خاطرها وعشان متوصلش للمرحلة دى
(. قام مالك من جنبها ووقف فى البلكونه وبص للسما وللقمر .)
مالك >> يارب اخترلى فانى لا احسن الاختيار ودبر لى امورى فانى لا احسن التدابير
*_____________________________________________**___________________________*
تانى يوم الصبح فى شغل مالك .....
(. مالك وصل الشغل ودخل مكتبه وفضل فيه حوالى نص ساعه وبعدين قام دخل لـ رئيسه .)
مالك : صباح الخير يا افندم
رئيسه : صباح الخير يا مالك اخبار مراتك ايه
مالك : الحمد لله بخير رجعت البيت امبارح
رئيسه : حمد الله على سلامتها
مالك : الله يسلم سعادتك ، اتفضل (واداله ورقه)
رئيسه : ايه ده (وبدأ يقرأ)
بعد ما خلص .....
رئيسه : استقالة !!!
مالك : ايوة يا افندم دى استقالتى
رئيسه بعصبية : استقالة ايه يا حضرة الضابط انت فاكر نفسك شغال فى شركة مقاولات
مالك : يا افندم انا عندى اسباب ............
رئيسه يقاطعه : انت عندك مهام وقضايا من اهم القضايا اللى تمس البلد وامنها
مالك : يا افندم فى ضباط زيى واكفأ قادرين على المسئوليه دى انا حاسس انى مش قدها
رئيسه : والمفروض انى اجيب ضابط تانى فى مكان حساس زى ده وامسكه قضايا مهمه زى دى واقوله ابدأ من الجديد وناخد بقى الطريق من اوله تانى
مالك : يا افندم انا ممكن ...............
رئيسه يقاطعه : اسمعنى يا مالك لو اعتبرت انك قدمت استقالتك هعتبرك بتتهرب من الواجب الوطنى وهقدمك لـ محاكمه عسكرية بتهمة الخيانه العظمى
مالك باستغراب : محاكمة عسكرية وخيانة عظمى !!
رئيسه : ايوة محاكمه عسكرية هنتعامل معاك انك هربت من مسئولية الوطن دى مش خيانه عظمى (بزعيق) ولا نسيت القسم اللى قسمته يا حضرة الضابط
بعد دقيقة من صمت الطرفين ....
رئيسه : انا هديلك فرصة تفكر تانى لاما تجى ونقطع الورقة دى ونكمل اللى بدأناه لاما تجهز نفسك لمحاكمه عسكرية
مالك : تمام يا افندم
__**__**__
(. رجع مالك مكتبه وهو مشتت جداً وقعد يفكر ويكلم نفسه .)
مالك لنفسه >> ليه كده يا مالك ؟ ليه عملت كده ؟ ليه وعشان مين تتخلى عن واجبك وعن بلدك !! عشان اروى ، بس انت مضحكتش على اروى ، هى عارفة طبيعه شغلك وحساسيته من الاول ، هتهرب من المسئولية والواجب الوطنى يا مالك ؟ لا مش انا اللى اعمل كده ، انا شايل هم بلدى وهشيله على كتافى لحد ما اموت ، انا مش هتخلى عن واجبى ودورى مهما كانت النتايج والعواقب
(. وقام مالك ودخل مكتب رئيسه تانى .)
__**__**__
فى مكتب رئيسه ....
مالك : خلاص يا افندم انا مش هسيب الخدمه
(. مسك رئيسه ورقة الاستقالة وقطعها ورماها .)
رئيسه : وانا كنت عارف انى لما اديلك اخر فرصة للتفكير هتوصل للقرار ده
مالك : بس انا موصلتش للقرار ده خوفاً من المحاكمة العسكرية بس انا مش جبان ومش هارب ومش هسيب بلدى وبا هتخلى عن واجبى مهما كانت الظروف
رئيسه : وهو ده اللى انا عايزك توصله وعارف انك مش خايف من المحاكمه انت بس متستحملش يتقال عليك هارب او خاين
مالك : تمام يا افندم
رئيسه : ربنا معاك فى الجاى ، مصر بين ايدك يا مالك
مالك : ربنا معانا كلنا لان مصر بين ايد كل واحد مصر
رئيسه : ربنا يحفظها
مالك : عن اذن سعادتك
رئيسه : اتفضل
(. خرج مالك من مكتب رئيسه وهو حاسس انه سعيد وان الاستقالة كانت غلطة كبيرة جداً اتسرع وعملها .)
*_____________________________________________**___________________________*
فى قصر سامح الخولى .....
(. فاتن رجعت من السفر بس هى متعرفش اللى حصل لـ اروى وهما قرووا ميحكوش حاجة ، اروى كانت نايمه وامها دخلت لها .)
فاتن : روءة وحشتيني اوى يا حبيبتى
اروى بتفوق : ماما انتِ جيتي
فاتن : اه يا حبيبتى لسه واصلة
اروى : حمد الله على سلامة حضرتك
فاتن : الله يسلمك عامله ايه فى الحمل
(. اروى حضنت امها وعيطت .)
اروى : انا محتجالك اوى يا ماما متسافريش تانى وتسيبيني
فاتن : انتِ كويسة يا اروى ؟
اروى : كويسة يا ماما متقلقيش بس انتِ وحشتيني اوى
فاتن : وانتِ كمان يا حبيبتى وحشتيني وعندى ليكي خبر حلو
اروى : خير
فاتن : مروة اختك وادم هيجوا مصر اجازة
اروى : يوصلوا بالسلامه
فاتن : مالك يا حبيبتى ؟ هو مالك مزعلك ؟
اروى : لا والله يا ماما مالك شايلنى فى عيونه
فاتن : ربنا يخليكوا لبعض ويقومك بالسلامه بس انتِ بتعيطى ليه مالك
اروى : مش عارفة يمكن عشان وحشتيني
فاتن : طيب قومى يالا غيري هدومك وانزلى افطرى معايا تحت فى الجنينه
اروى : حاضر يا ماما
(. خرجت فاتن وهى متأكده ان اروى فيها حاجة مش طبيعيه فـ راحت لـ سامح مكتبه .)
فاتن : مالها اروى يا سامح
سامح : مش فاهم ماهى كويسة اهى
فاتن : دى اول ما شافتنى اترمت فى حضنى وفضلت تعيط
سامح : انتِ عارفة الحوامل بيكونوا حساسين شوية وبيضايقوا من اقل حاجة
فاتن : هى متخانقه مع مالك ؟
سامح : لا اطلاقاً
فاتن : امال مالها
سامح : مفيش حاجة يا فاتن
فاتن : لا فى حاجة ولازم اعرفها
سامح : بنتك جالها اكتئاب وحاولت الانتحار واتحجزت فى المستشفى اسبوعين
فاتن : يا نهار ازرق كل ده حصلها
سامح : ايوة احنا مكناش عايزين نقلقك
فاتن : وهى ايه اللى وصلها للمرحلة دى
سامح : صدقيني محدش فاهم اى حاجة لا انا ولا جوزها وكلامها كله مبهم ومش مفهوم
فاتن : بس اكيد حصل حاجة
سامح : اخر حاجة حصلت ان صاحبتها خانتها وبترسم على جوزها
فاتن : بس ده يوصلها للمرحلة دى
سامح : هى اصلاً مجبتش سيرتها وزى ما قولتلك كلامها كله مبهم ومحدش فينا فاهمه
فاتن : بس انا لازم افهم فى ايه
سامح : بلاش تفتحى معاها الموضوع ده ولا تعرفيها انك عرفتى احنا ما صدقنا حالتها اتحسنت
فاتن : هى كده حالتها اتحسنت !!
سامح : يووووه بمراحل كمان
فاتن باستسلام : ربنا يحفظك يا اروى يا بنتى يارب
سامح : يارب
*_____________________________________________**___________________________*
العشا فى بيت اهل مالك ....
(. شهيرة قاعدة فى البلكونة وسرحانه .)
فؤاد : مالك يا شهيرة
شهيرة : مش عارفة
فؤاد : يعنى ايه
شهيرة : قلبى مقبوض
فؤاد : انتِ قلبك بيتقبض غلط شكله عنده حول
شهيرة : مش فاهمه ؟
فؤاد : يعنى قلقتى على مالك مراته طلعت هى اللى تعبانه
شهيرة : اهو انا من اليوم ده وانا فعلاً قلقانه على مالك وكمان محمد وعبد الرحمن
فؤاد : ولادك فى امانة ربنا ، هتخافى عليهم وهما فى امانة ربنا ؟
شهيرة : ونعم بالله
فؤاد : استهدى بالله كده وان شاء الله خير
(. هنا الجرس رن وكان مالك لانهم كانوا مستنينه .)
فؤاد : اهو جه اهو
مالك : خير مالكوا
فؤاد : امك يا سيدي قلقانه عليكوا
مالك : عليكوا اللى هما مين
شهيرة : انت واخواتك
مالك : يا ماما اطمنى احنا بخير طالما دعواتك معانا
شهيرة : ربنا يخليكوا ليا
مالك : ويخليكوا لينا يارب
فؤاد : انت لسه راجع من الشغل
مالك : اه
شهيرة : وسايب اروى لوحدها ؟
مالك : مامتها جت من السفر عشان كده قولت اخلص شوية حاجات مهمة
شهيرة : طيب هدخل اعملك اكل
مالك : لا يا ماما انا لازم امشى
فؤاد : انت جاى فى ايه وماشى فى ايه
شهيرة : اه صحيح احنا ملحقناش نشوفك
مالك : معلش والله عندى حاجات مهمة لازم اخلصها وجيت عشان اطمن عليكوا واخد حضن من ماما عشان وحشنى حضنها
شهيرة : يا حبيب قلبى (وحضنته) ربنا ما يحرمنى منك ومن طيبه قلبك
مالك : ولا يحرمنى من حضنك يا ماما
فؤاد : لا انا كده ممكن اعيط
مالك : ربنا يخليكوا انتوا الاتنين ليا انا همشى بقى
شهيرة : استودعك الله الذى لا تضيع ودائعه
*_____________________________________________**___________________________*
فى قصر سامح الخولى .....
(. اروى وفاتن وسامح قاعدين بيتعشوا .)
فاتن : ايه يا حبيبى كنت فين
سامح : كان معايا تليفون خاص بالشغل
فاتن : ربنا معاك يا حبيبي ، روءة امال فين مالك
اروى : هيتأخر النهاردة
فاتن : ربنا معاه يارب
اروى : امين يارب
فاتن : مالك يا اروى شكلك متغيره
اروى : لا يا ماما مرهقة شوية انا هطلع انام شوية
سامح : تنامى دلوقتى الساعة لسه ٩
اروى : مش عارفة حاسة انى نعسانه
فاتن : ادخلى نامى وانا هبقى اطمن عليكي
اروى : تصبحوا على خير (ومشيت)
سامح : وانتِ من اهله
فاتن : اروى مش طبيعية يا سامح
سامح : مش طبيعيه ازاى
فاتن : دى بنتى وانا عرفاه لما توصل للحالة دى من صغرها بيكون حاجة من اتنين
سامح : الللى هما ايه ؟
فاتن : لاما مخبية سر كبير اوى لاما ....... (وسكتت)
سامح : كملى لاما ايه !!
فاتن : لاما بتخطط لحاجة
سامح : بتخطط !! هتكون بتخطط لايه
فاتن : معرفش يا سامح وبعدين ممكن تكون مخبية حاجة بس مش اكتر
سامح : ربنا يستر
فاتن : ربنا يحفظها ويسترها معاها
__**__**__
(. الساعه ١٢ ونص بالليل اروى نايمه فى الجناح الخاص بيها وموبايلها رن برقم متعرفوش .)
اروى : الو
المتصل : اروى الخولى ؟
اروى : ايوة انا مين ؟
المتصل : انا النقيب ياسر الحمصانى
اروى بعصبية : ياسر !! خير فى ايه ومتصل فى وقت زى ده ليه
ياسر : ...................
__*__*__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
لو سمحتي نزلي الحلقة الحادية عشر بليييييييييييييز انا واصحابي متابعنها انتي بجد فنانه
ردحذفاتفضلي اللينك اه و سوري على الخطأ و التأخير :)
ردحذفhttp://sh5abytalaa.blogspot.com/2014/01/11.html