الحلقة السادسة
جزء من حلقة سابقة :
اروى (مسكت ايده) : مالك يا حبيبي فيك ايه
مالك : .....................
*_____________________________________________**___________________________*
مالك سحب ايده : احنا مش هينفع نكمل مع بعض
اروى مصدومه : ايه !!
مالك : انا اسف بس انا مش عايز اظلمك
اروى باستهزاء : مش عايز تظلمنى !!!
مالك : ايوة
اروى بعصبية : ولما تركنى جنبك تلت شهور على اساس ان اصحاب وبعدين تقولى بحبك وتفرحنى وتعلقنى بيك وبعدها بكام يوم تكسر قلبي وتقولي مينفعش نكمل سوا ده مش ظلم
مالك : ايوة ظلم بس اخف بكتير من الظلم اللى هتتظلميه لو كملنا
اروى : طيب انا عايزة اعرف ليه ، عايزة اعرف السبب
مالك : انا حاسس انى مش قد مسئولية الارتباط دى ، حاسس انى مش هقدر اسعدك زى مانتِ متخيلة
اروى : هو احنا لحقنا
مالك : يا اروى متضغطيش عليا خلينا ننهى الارتباط ده لمصلحتك انتِ
اروى : متشكرة اوى يا حضرة الظابط ان حضرتك بتفكر فى مصلحتى وطالما ارتباطك بيا بيضغط عليك اوى كده اعتبره انتهى بس انا عمرى ما هسامحك
(. وقامت اروى مشيت وهى زعلانه وبتعيط ، وفضل مالك قاعد شوية فى الكافيه وبعدين دفع الحساب وروح .)
*_____________________________________________**___________________________*
فى قصر سامح الخولى .....
(. اروى راجعه من بره مخنوقة وزعلانه جداً وماسكه دموعها بالعافية لحد ما تطلع اوضتها ، دخلت لقيت مامتها بتتفرج على التلفزيون رمت عليها السلام وطلعت بسرعه بس فاتن وقفتها .)
فاتن : استنى يا اروى
اروى : خير يا ماما
فاتن : مالك يا حبيبتى
اروى : مفيش ، حضرتك كنتى عايزة حاجة
فاتن : اه عندى ليكي خبر حلو
اروى : خير
فاتن : بابا وافق
اروى : وافق على ايه
فاتن : وافق انه يقابل مالك وشكله كده كمان موافق انك تتجوزيه
اروى باستهزاء : اتجوزه !!
فاتن : ايوة ، انتِ مش مبسوطه ولا ايه انا كنت فاكرة انك هتطيري من الفرحة
(. اروى مقدرتش تمسك نفسها ، حضنت امها وفضلت تعيط .)
فاتن : الله الله مالك يا اروى فيكي ايه يا حبيبتى
اروى : مالك سابنى يا ماما مش عايز يكمل معايا
فاتن : ليه طيب حصل ايه
اروى : معرفش كل اللى قاله انه مش عايز يظلمنى
فاتن : طيب اهدى يا حبيبتى خلينا نتناقش
(. قامت اروى غسلت وشها وبطلت عياط ورجعت لمامتها .)
فاتن : قوليلي بقى ايه اللى حصل
اروى : حكت لامها كل اللى حصل من اول ما عرفت مالك لحد ما سابها
فاتن : بس هو عنده حق
اروى بدموع : يووووه بقى هو انا كل ما اكلم حد يقولى عنده حق
فاتن : يا حبيبتى هو بيحبك بس خايف عليكي من انك متستحمليش وخايف على نفسه من الفشل
اروى : مكنش يقرب منى ويعشمنى بيه
فاتن : متزعليش منى يا اروى انتِ مكنتيش مدياله فرصة يبعد
اروى : عشان بحبه بجد يا ماما
فاتن : بصى يا حبيبتى هقولك اللى يريحك
اروى : ايه ؟
فاتن : لو ليكي نصيب فى مالك مهما بعد عنك وحاول يهرب منك هيرجعلك تانى ولو مالكيش نصيب فيه عمركوا ما هتتجوزوا
اروى : يعنى انا اعمل ايه دلوقتى
فاتن : ادعى ربنا ان لو كان ليكي خير معاه يقربه منك وربنا يحلها من عنده
اروى : ادعيلي انتِ كمان والنبى يا ماما انا بحبه اوى
فاتن : ربنا يكتبلك الخير يااارب يا حبيبتى
اروى : يارب اتجوز مالك
فاتن : يارب يا حبيبتى ، قومى بقى خدى دش كده ونامى شوية
اروى : حاضر يا ماما
__**__**__**__
(. قامت اروى خدت دش وقعدت فى بلكونة اوضتها وكانت مخنوقة جداً وبدأت تفكر وتربط مواقف ببعضها .)
فاتن : ممكن ادخل
اروى : اتفضلى يا ماما
فاتن : انا عملتلك نسكافية وساندوتشات ممكن تاكليها
اروى : ماما عايزة اسألك على حاجة
فاتن : اسألى
اروى : ليه بابا وافق رغم انه كان مصمم انى متجوزش مالك
فاتن : معرفش يا روءة هو قالى اديني فرصة افكر وبعدها قالى انا موافق اقابل مالك ولو حسيته كويس موافق على الجواز
اروى بعصبية : يبقى انا صح اكيد هو ده اللى حصل
فاتن : اللى هو ايه ؟
اروى بعصبية : بابا يروح لـ مالك ويهدده ويطلب منه يبعد عنى ويجي بابا يقولى انا موافق عشان اشوف مالك ندل ومبحبنيش وبابا طيب وموافق على الحاجة اللى انا عيزاها
فاتن : انتِ اتجننتى ولا ايه ابوكى استحالة يعمل كده
اروى : قصدك ميعملش كده الا بابا انتِ ناسية انه هدد آدم بالقتل لو اتجوز مروة
فاتن : ده كان كلام فى لحظة غضب
اروى : لا مكنش اى كلام واللى حصل مع مالك مالوش تفسير غير ان بابا اتدخل فى الموضوع
فاتن : يا بنتى ابوكى ميعرفش مالك اصلاً
اروى : ولو عايز يعرفه تفتكرى دى صعبه عليه !! اكيد بعت حد راقبنى وعرف مالك وهدده وانا بقى مش هسكت
فاتن : احترمى نفسك ده انتِ فعلاً قليلة الادب ومش متربية
اروى : انا فعلاً ابقى قليلة الادب ومش متربية لو سبت اللى حصل ده يعدي على خير(وخرجت من الاوضة)
فاتن : انتِ رايحة فين
(. وخرجت فاتن وهى بتنادى عليها بس اورى مردتش ونزلوا تحت وكان سامح لسه راجع من بره .)
سامح : فى ايه مالكوا !!
فاتن : مفيش حاجة يا حبيبي تعالى يا اروى نطلع
اروى : مش طالعه فى حته
سامح : فى ايه
اروى : بابا انت قولت ايه لـ مالك خليته يبعد عنى
سامح : مالك مين !!
اروى : الظابط اللى انا عايزة اتجوزه
سامح : وانا هعرفه منين انا لسه حتى قايل لمامتك تقولك انى عايز اقابله
اروى : مانت قولت كده بس من الناحية التانيه روحت هددت مالك عشان يبعد عنى ويسبنى ويبقى هو الواطى الندل و انت الاب الطيب
سامح : وانا هعمل كده ليه مقدرش ابعدك انتِ عنه بدل ما احط نفسى فى موقف زى ده
اروى : لانك عارف انى ممكن اتجوزه غصب عن اى حد
سامح : بعد الكلمتين دول مش هتتجوزيه يا اروى لا بمزاجى ولا غصب عنى
اروى : لا هتجوزه ومحدش له الحق يرفض او يقبل
سامح (ضربها بالقلم) : لما تتكلمى مع ابوكى تتكلمى بادب
(. طلعت اروى اوضتها .)
فاتن : ايه اللى انت عملته ده يا سامح
سامح : طالما مربتهاش وهى صغيره اربيها وهى كبيرة
فاتن : بس انت عمرك ما مديت ايدك على حد تقوم تضرب اروى حبيبتك
(. سامح مردش عليها ودخل اوضة المكتب يشتغل شوية .)
*_____________________________________________**___________________________*
بالليل فى بيت مالك .....
(. الكل متجمعين ، مالك وفؤاد وشهيرة وعبد الرحمن ومريم وولادهم .)
(. عبد الرحمن ومالك قاعدين فى البلكونة لوحدهم وبيتكلموا .)
عبد الرحمن : طيب انت سيبتها ليه
مالك : عشان ده الصح
عبد الرحمن : طيب ايه السبب يعنى
مالك : اسباب كتير
عبد الرحمن : ايه هى الاسباب دى
مالك : اسباب اقوى منى
عبد الرحمن : حضرتك فاكر نفسك شريهان ولا نيللى ، ايه يا عم فوازير رمضان دى
مالك : حل عنى والنبى يا عبد الرحمن انا مش ناقص
عبد الرحمن : على فكرة انت اكتشفت انك مبتحبهاش صح !!
مالك بخنقة : يارتنى فعلاً محبتهاش عشان محسش الا انا حاسه دلوقتى
عبد الرحمن : حاسس بايه
مالك : عارف لما تحس انك ظالم ومظلوم ، جارح ومجروح عارف انك خدعت واتخدعت
عبد الرحمن : بسم الله الرحمن الرحيم الاجابة العجل فى بطن امه صح
مالك : انا غلطان انى بتكلم معاك اصلاً
عبد الرحمن : مانت عمال تتكلم بالالغاز
مالك بعصبية : لو قادر اتكلم كنت اتكلمت بس انا مش قادر ولا عارف وكل اللى انا حاسه انى انسان ضعيف مكسور وانا لاول مرة احس الاحساس ده
عبد الرحمن : خلاص يا مالك متزعلش وطالما مش قادر تتكلم معايا اتكلم مع ربنا صلى وادعيله يخرجك من اللى انت فيه ده
شهيرة : هتفضلوا قاعدين لوحدكوا كده
عبد الرحمن : لا لا احنا جايين اهو
شهيرة : مالك يا مالك
مالك : مفيش يا ماما
شهيرة : طيب يالا العشا جاهز
(. قاموا كلهم عشان يتعشوا ، السفرة مقابل باب الشقة ، الجرس ضرب وقام مالك يفتح الباب .)
مالك بخضة : اروى
اروى : ايه اللى حصل يا مالك
مالك : مينفعش نتكلم هنا
اروى : انا جاية افهم ايه اللى حصل !! ابويا عملك ايه
مالك : امشى دلوقتى يا اروى متعملليش مشاكل
اروى : مشاكل ايه اللى ممكن اعملهالك
مالك : يوووه بقى انا ابويا وامى جوه
اروى : وانا جاية افهم منك ايه اللى حصل وماشية على طول
(. طبعاً كل اللى على السفرة سابوا الاكل وركزوا مع اروى ومالك وكلهم فى حالة ترقب شديدة .)
مالك : محصلش حاجة
اروى : امال سبتنى ليه !! ايه السبب اللى يخليك تبعد عنى بعد ما اعترفت بـ حبك
مالك : اكتشفت انى مبحبكيش استريحتى كده
اروى : يا سلام والمفروض انى اصدق الهرى ده
فؤاد : فى ايه يا مالك
مالك : مفيش حاجة يا بابا
اروى (دخلت) : لا فى يا عمو
مالك بحزم : اروى
فؤاد : انتِ مين !!
اروى : انا اروى الخولى ، انا ومالك كنا مرتبطين وفجأة سابنى عشان وقع تحت تهديد من ابويا وانا جاية اقوله ميخفش بابا مش هيقدر يعمله حاجة
مالك : كفاية يا اروى
شهيرة : ليه يعنى ابوكى يأذيه هو كان عمله ايه
اروى : مش عايزنى اتجوزه وانا على استعداد يا مالك ان احنا نروح نكتب كتابنا دلوقتى وبابا مش هيعملك حاجة
مالك بزعيق : انتِ اتجننتى ولا ايه ابوكى مالهوش دعوة انا اللى مش عايزك افهميها بقى
(. اروى اتصدمت من رد فعل مالك ومقدرتش تتكلم .)
عبد الرحمن : بس يا مالك مينفعش الكلام ده
مالك بزعيق : فوقى بقى لا انتِ بتحبينى ولا انا بحبك ، احنا عمرنا ما هنكون لبعض ، احنا كنا بنضحك على بعض
اروى بدموع محبوسة : انت كداب
مالك : لا مش كداب انتِ اللى رخصتى نفسك زيادة عن اللزوم
اروى (وبدأت دموعها تنزل) : انا اللى رخصت نفسى يا مالك !! يعنى انا فى نظرك رخيصة !!
مالك : ايوة رخيصة
فؤاد بحزم : مالك !! عيب الكلام ده البنت فى بيتنا اعمل احترام لينا على الاقل
مالك : امشى يا اروى ومتظهريش فى حياتى تانى لو عندك ذرة كرامه
(. ودخل مالك اوضته .)
عبد الرحمن : الواد ده اتجنن رسمى
(. ودخل عبد الرحمن وراه ووقفت اروى مصدومه ودموعها بتنزل منها تلقائى ، مريم صعبت عليها اروى فـ راحت عندها .)
مريم : معلش هو كده لما بيتعصب مبيعرفش بيقول ايه تعالى استريحي
اروى : لا متشكرة انا همشى
شهيرة : لا يا بنتى مينفعش تمشى وانتِ فى الحالة دى
اروى : لا يا طنط متشكرة واسفة على القلق اللى انا عملته ده عن اذنكم (ومشيت)
فؤاد : ايه اللى مالك عمله ده ، على الاقل كان يحترم وجودها فى بيته
شهيرة : هى صعبت عليا بس برضه مكنش ينفع تجى لـ شاب لحد بيته
مريم : ماهما يا طنط مرتبطين وهى جاية تطمنه
فؤاد : هى تبقى بنت مين ؟
مريم : بنت السفير سامح الخولى
فؤاد وشهيرة : سامح الخولى !!
مريم : اه هى
شهيرة : بس انا لما سآلته قالى انه مش مرتبط
مريم : انا عرفت من عبد الرحمن انهم ارتبطوا من فترة بسيطه
فؤاد : وايه اللى ابوها عايز يعمله
مريم : انا معرفش بس اللى فهمته من حوارهم انه هدد مالك عشان يبعد عنها
شهيرة : والصح انه يبعد عنها احنا مش قد الناس دى
فؤاد : خلاص خلاص تعالوا نكمل عشا
__**__**__**__**__
فى الجهة التانية ....
(. عبد الرحمن دخل ورا مالك على طول .)
عبد الرحمن : ايه اللى انت عملته ده يا مالك
مالك : ده الصح
عبد الرحمن : بس مكنش ينفع تقولها الكلام ده على الاقل يا اخى قدامنا
مالك : انا قاصد اقول الكلام ده بالذات قدامكم عشان تاخد الصدمه وتبعد للابد
عبد الرحمن : يعنى ابوها هو اللى ورا اللى حصل ده فعلاً
مالك : لا محدش ورا اى حاجة ، المنطق والعقل هو اللى قالى ابعد عنها
عبد الرحمن : ليه بس يا ابنى
مالك : قولت ١٠٠ مرة ده الصح ، لا انا لـ اروى ولا اروى ليا
عبد الرحمن : والله صعبت عليا اوى
مالك : حصل خير
عبد الرحمن : طيب انا خارج اكمل عشا (وخرج)
مالك لنفسه >> وانا قلبى اتقطع عليها بس اعمل ايه بس
(. وبص مالك من شباك اوضته لقاها تحت فى عربيتها وعماله تعيط .)
مالك : سامحيني يا اروى يارتنى موت قبل ما اكون سبب دموعك
__**__**__**__**__
فى الجهة التالته ...
(. نزلت اروى من شقة مالك وهى بتعيط ومخنوقة وحاسة ان الدنيا ضيقة جداً ، ركبت عربيتها بس مقدرتش تسوق .)
اروى لنفسها >> ياااااه ازاى هان عليه يجرحنى ويهنى كده قدام اهله ، حتى لو مبحبنيش مكنش يعمل فيا كده قدام اهله ، وانتِ ايه اللى وداكى بيت اهله اصلاً يا اروى !! صح انتِ اللى رخصتى نفسك وانتِ اللى حطيتى نفسك فى الموقف ده
ازاى اقرب اتنين لـ قلبى يعملوا فيا كده ، بابا وحبيبي ، يارتنى ما حبيتك يا مالك يارتنى ما حبيتك بسببك خسرت نفسى وخسرت ابويا وخسرت اول حب فى حياتى
(. وفضلت شوية تلوم نفسها وشوية تلوم ابوها وشوية تلوم مالك وفجأة طلعت بـ العربية على غير هدى .)
*_____________________________________________**___________________________*
فى احدى الكافيهات ....
(. اروى قاعدة فى الكافيه لوحدها واتصلت بـ سمر تجيلها .)
سمر : مالك يا اروى فيكي ايه
اروى بدموع : حكت لها اللى حصل مع مالك
سمر : طيب اهدى
اروى : اكيد بابا اللى ورا كل اللى حصل ده
سمر : متظلميش ابوكى يا اروى مش جايز فعلاً مالك ده هو اللى ندل
اروى : انا واثقة يا سمر ان بابا هو السبب ومتوقعه كمان ممكن يكون عمله ايه
سمر : يعنى ابوكى هيعمل ايه لـ ضابط يا اروى
اروى : بابا يعرف ناس تقيلة فى الداخلية ووارد جداً يكون وقع تحت تهديد من رئيسه فى الشغل
سمر : ومالك يعنى مش قادر يجازف شوية
اروى : يجازف بـ شغله ومستقبله يعنى
سمر : انتِ مش ملاحظة انك عماله تلتمسى الاعذار لـ مالك
اروى : انا بقول الصح بس برضه مهما كانت الضغوط اللى عليه مكنش ينفع يعمل فيا كده انا تجرحت اوى يا سمر
سمر : انا بقى حاسة ان باباكى معملوش حاجة مالك هو اللى مش قد مسئولية الارتباط
اروى : ازاى يعني
سمر : يعنى مبيعرفش يحب الا نفسه وده صعب يعرف يرتبط ويحب ويستقر
اروى : انا مش عارفة اعمل ايه
سمر : انسيه وشوية وهتبدأى حياة جديدة
اروى : انا حبيته اوى واتجرحت اوى
سمر : هتنسيه عشان هو ميستهلكيش
هنا قامت اروى
سمر : انتِ رايحة فين
اروى : هروح
سمر : طيب هتعرفى تسوقى
اروى : اه متقلقيش
سمر : طيب خدى بالك على نفسك وابقى طمنيني عليكي
اروى : حاضر
(. وكل واحدة روحت على بيتها .)
*_____________________________________________**___________________________*
الساعة اربعة الفجر فى قصر سامح الخولى ....
(. سامح وفاتن نايمين فى اوضتهم ، قلقت فاتن فـ قامت تطمن على اروى ملقتهاش فى اوضتها ودورت عليها فى القصر كله ملقتهاش وسألت الشغالين كلهم محدش عارف هى راحت وسألت الـ security عليها قالوا انها خرجت بـ عربيتها بالليل ومرجعتش ، اتصلت فاتن على الموبايل كذا مرة لقيته مقفول فـ قررت تصحى سامح عشان يتصرف .)
فاتن : سامح سامح اصحى يا سامح
سامح : فى ايه يا فاتن
فاتن : اروى مرجعتش
سامح : مرجعتش منين
فاتن : الحراس بره بيقولوا انها خرجت فى حدود الساعه ١٠ ومرجعتش
سامح : هى الساعه كام
فاتن : الساعه داخله على خمسه الفجر قوم يا سامح شوفلى بنتى فين
سامح (قام من السرير) : كلمتيها على موبايلها
فاتن : مقفول
سامح : خير اللهم اجعله خير هتكون راحت فين
فاتن : معرفش اتصرف شوفلى البنت راحت فين
سامح : معاكى رقم سمر صاحبتها ؟
فاتن : اه
سامح : طيب كلميها اسأليها عليها
فاتن : اكلمها دلوقتى
سامح : ايوة كلميها اسأليها هى معاها ولا لا واخر مرة كلمتها او شافتها امتى
فاتن : حاضر
سامح : وانا هكلم مروة واسر يمكن تكون كلمتهم
بعد دقايق معدوده .....
فاتن : سمر بتقول انها شافتها النهاردة بس قالتلها انا مروحه ومتعرفش ممكن تكون راحت فين
سامح : مروة واسر برضه بيقولوا انها كلمتهم من فترة
فاتن : يعنى هتكون راحت فين
سامح : معاكى رقم مالك ؟؟
فاتن : مالك !!
سامح : ايوة مالك مش يمكن تكون راحتله
فاتن : لا طبعاً هتروحله ليه وهما سايبين بعض
سامح بعصبية : معاكى رقمه !!!
فاتن : لا
سامح : انا مش هعرف اتصرف قبل الساعة ٨ الصبح
فاتن : نعم !! هنفضل كده لحد ٨ الصبح
سامح : مانا مش هكلم الناس فى وقت زى ده وبعدين احنا كده كده مش هنعرف نبلغ قبل ٤٨ ساعة من اختفائها
فاتن : انت بتقول ايه !! انت المفروض تتصرف وتقلب عليها البلد هو انت شوية فى البلد
سامح : دى قوانين
فاتن : انا ماليش دعوة بالكلام ده انا عايزة بنتى
سامح : اهدى شوية وخلينا نستنى للصبح يمكن ترجع
فاتن بدموع : وان مرجعتش
سامح بزعيق : ساعتها هتصرف
(. فضل سامح وفاتن للصبح قاعدين وبيحاولوا يتصلوا بيها على امل انها تفتح الموبايل .)
اتصل سامح بـ لواء فى الداخلية ....
سامح : صباح الخير يا سيادة اللوا
اللواء : اهلاً يا سامح بيه اخبارك حضرتك ايه
سامح : بخير الحمد لله بس كنت عايز من حضرتك خدمة
اللواء : اتفضل احنا دايماً فى الخدمة
سامح : متشكر جداً ، فى نقيب فى الداخلية اسمه مالك فؤاد الشاذلى عارفه
اللواء : اه طبعاً عارفه ده من اكفأ الضباط فى الداخلية
سامح : انا كنت عايز رقمه الشخصى
اللواء : خير يا افندم فيه حاجة
سامح : لا لا ده موضوع شخصى بينى وبينه
اللواء : اوكى ساعة كده وهبعت لحضرتك رقمه فى رسالة
سامح : اوكى يا سيادة اللوا واسف جداً على الازعاج
اللواء : العفو يا افندم (وقفلوا الخط)
فاتن : انت عرفت منين انه اسمه مالك فؤاد الشاذلى
سامح : مش انا قولتلك اديني وقت افكر وارد عليكوا فى الوقت ده انا سألت عليه
فاتن : انت اللى ورا اللى حصل ده يا سامح
سامح : لا طبعاً انا لو عايز ابعده عنها كنت هقولها الكلام ده
فاتن : اوعى تكون انت يا سامح
سامح : قولت مش انا ماشى
فاتن : ماشى
*_____________________________________________**___________________________*
فى بيت مالك .......
(. مالك صحى الصبح ولبس عشان يروح شغله بعد ما يفطر مع ابوه وامه .)
على سفرة الفطار .....
مالك : صباح الخير
فؤاد وشهيرة : صباح النور
(. قعد مالك على السفرة وبدأ ياكل وفى صمت مالى المكان قطع الصمت صوت موبايل مالك ولقاه private number .)
مالك : الو
سامح : النقيب مالك الشاذلى معايا
مالك : ايوة انا مين
سامح : معاك سامح الخولى
مالك : اهلاً يا سيادة السفير
سامح : بنتى فين يا حضرة الظابط ؟
مالك : انا معرفش احنا اصلاً سيبنا بعض
سامح : بنتى خرجت من البيت امباح بالليل ولسه مرجعتش
مالك : انا معرفش ممكن تكون راحت فين
سامح : يعنى مشوفتهاش ولا اتكلمتوا من ساعة ما سيبتوا بعض
مالك : لا جت عندى ومشيت على طول ومعرفش راحت فين بعد كده
سامح : اوكى يا حضرة الظابط اسف على ازعاجك
مالك : العفو يا سيادة السفير (وقفلوا)
فؤاد : ده سامح الخولى
مالك : اه
شهيرة : خير يا ابنى فى ايه
مالك : مفيش حاجة كان بيسألنى على بنته قولتله معرفش
فؤاد : هو ايه الموضوع ده يا مالك ممكن تفهمنا
مالك : مفيش موضوع يا بابا اصلاً
شهيرة : امال ايه اللى حصل امبارح ده
مالك : زى ما سمعتوا بالظبط
فؤاد : بس احنا مفهمناش حاجة ومن حقنا عليك نفهم
مالك : انا عندى شغل يا بابا لما ارجع ان شاء الله (وقام)
شهيرة : طيب هو فعلاً ابوها كان عايز يأذيك
مالك : محدش يقدر يعملى حاجة لا ابوها ولا غيره الا بـ ارادة ربنا
فؤاد وشهيرة : ونعمٓ بالله
مالك : انا نازل مش عايزين حاجة
شهيرة : خد بالك على نفسك
مالك : ان شاء الله سلام (ونزل)
شهيرة : الموضوع شكله كبير يا فؤاد
فؤاد : خير ان شاء الله
شهيرة : يعنى هو يوم ما يحب ، يحب واحدة ممكن تتسببله فى اذية
فؤاد : هو قال المفيد يا شهيرة ، محدش هيقدر يعملها حاجة الا بارادة ربنا
شهيرة : ربنا يسترها معاه ويكتبله فى كل خطوة سلامه
فؤاد : امين يارب
*_____________________________________________**___________________________*
الضهر فى قصر سامح الخولى ........
فاتن : اتصرف بقى هاتلى بنتى انا خلاص مبقتش قادرة استحمل
سامح : انا عملت كل اللى فى وسعى واديكي سمعتى الظابط قال لو عملنا بلاغ رسمى الخير هيبقى بكره فى كل الجرايد
فاتن : وايه المشكلة مش يمكن يكون حصلها حاجة
سامح : يا ستى ماهو قال هيدوروا عليها بس من غير بلاغ رسمى
فاتن : مش يمكن لو عملنا بلاغ رسمى ياخدوا الموضوع بجدية اكتر
سامح : متخافيش يا فاتن هياخدوه بجدية متقلقيش بقى
فاتن : بنتى لو حصل لها حاجة انا مش هسامحك عمرى كله (ومشيت وسابته)
سامح لنفسه >> يارب استرها معاها ورجعها بالسلامه
__**__**__**__
فى اوضة فاتن ...
(. مروة اتصلت بـ فاتن عشان تطمن على اختها .)
مروة : ها يا ماما ايه الاخبار
فاتن : مفيش جديد يا مروة
مروة : طيب بلغتوا
فاتن : ابوكى مش عايز يبلغ عشان الخبر ميتنشرش فى الجرايد
مروة : يعنى ايه مش هتبلغوا
فاتن : قالوا هيدوروا عليها بس من غير بلاغ رسمى
مروة : ان شاء الله خير يا ماما
فاتن : انا حاسة ان اختك حصلها حاجة يا مروة
مروة : متقوليش كده يا ماما ان شاء الله هترجع بالسلامه
فاتن : يارب يارب ادعيلها يا مروة
مروة : انا هحجز على اول طيارة للقاهرة وهاجى
فاتن : لا يا بنتى خليكي عشان شغلك
مروة : يولع شغلى يا ماما المهم اكون جنبكم فى ظرف زى ده
فاتن : ربنا يخليكي يا حبيبتى
مروة : لما احجز هكلمك اقولك هاجى امتى
فاتن : اوكى يا حبيبتى (وقفلوا)
فاتن لنفسها بدموع >> يارب استرها مع ولادى كلهم ومتورنيش فيهم حاجة وحشة ابداً ، يارب انت الوحيد العالم بـ مكان اروى وبحالها يارب احفظهالى واحميها ورجعهالى بالسلامه ، يارب اجعل يومى قبل يوم ولادى ياااااارب
*_____________________________________________**___________________________*
المغرب فى بيت عبد الرحمن ....
مالك : انا مش عارف ممكن تكون راحت فين
عبد الرحمن : هما ملقيوهاش لسه
مالك : لا لسه ، مش موجوده فى اى مستشفى ومعدتش على اى كمين
عبد الرحمن : ان شاء الله خير يا مالك متقلقش
مالك : انا حاسس انى السبب فى كل اللى حصل ده
عبد الرحمن : ان جيت للحق يعنى انت السبب فعلاً هو اللى عملته فيها شوية
مالك : تصدق ياد انك مدب يخربيت كلامك
عبد الرحمن : مش بقولك الحقيقة
مالك : طيب اسكت
(. هنا موبايل مالك رن وكان ياسر اللى كان ماسك فريق البحث عن اروى .)
ياسر : ايوة يا مالك اذيك
مالك : فى جديد يا ياسر
ياسر : بس مش عارف اللى هقوله كويس ولا لا
مالك : قول وخلصنى
ياسر : احنا لقينا عربيتها
مالك : العربية بس
ياسر : اه العربية بس كان فيها موبايلها كمان ، واضح انها ركنتها وركبت مواصلات عامه
مالك : لقيتوها فين العربية
ياسر : عند كارتة اسكندرية
مالك : يعنى ممكن تكون فى اسكندرية
ياسر : مش متأكدين احنا بلغناهم فى اسكندرية وفى قوة اتحركت
مالك : طيب العربية فيها اى خبط او او اثار حادثة
ياسر : لا لا واضح انها سابتها بارادتها او بسبب ان البنزين كان قرب يخلص وعموماً الونش ساحبها لحد قصر ايوها
مالك : طيب يا ياسر لو فى جديد كلمنى لو سمحت
ياسر : اوكى يا معلم متقلقش (وقفلوا)
عبد الرحمن : ها ايه الاخبار
مالك : حكاله الى ياسر قاله
عبد الرحمن : ان شاء الله حتى تكون فى اخر الدنيا اهم حاجة ميكونش حصلها حاجة
مالك : ان شاء الله خير
عبد الرحمن : اول ما ترجع بقى روح صالحها
مالك : مش وقته يا عبد الرحمن ممكن
عبد الرحمن : ماشى
*_____________________________________________**___________________________*
بالليل فى بيت مالك .....
(. مالك كان مخنوق جداً وقاعد فى البلكونة وجه عليه فؤاد .)
فؤاد : لسه مظهرتش برضه
مالك : لا لسه
فؤاد : ان شاء الله خير متقلقش
مالك : انا حاسس انى السبب يا بابا
فؤاد : المكتوب على الجبين لازم تشوفه العين
مالك : انا كان لازم ابعد عنها
فؤاد : طيب ليه
مالك : عشان حاجات كتير هى مش مقتنعه فـ كان لازم اجرحها عشان تكرهنى
فؤاد : يبقى مكنتش تقرب منها من الاول
مالك : مكنتش بتديني فرصة ابعد
فؤاد : بس هى شكلها بتحبك اوى يا مالك
مالك : وانا والله بحبها وعشان بحبها لازم نفضل بعيد عن بعض
فؤاد : طيب قولى الحقيقة ابوها السبب
مالك سرح لـ ثوانى كأنه افتكر حاجة
فؤاد : يبقى هو السبب
مالك : لا يا بابا ابوها مالوش دخل فى اى حاجة انا اللى خدت القرار ده من نفسى
فؤاد : متأكد ؟!
مالك : ايوة يا بابا انا اصلاً من الاول بقولها احنا مننفعش لبعض
فؤاد : زى ما دايماً بقولك انت ادرى بـ شغلك هقولك برضه انت ادرى بـ حياتك وظروفك واحاسيسك
مالك : انا هقوم انام شوية عشان عندى شغل الصبح
فؤاد : اوكى يا حبيبي تصبح على خير
مالك : وحضرتك من اهله
(. ودخل مالك اوضته وفضل صاحى ويتقلب للصبح وراح شغله من غير نوم .)
*_____________________________________________**___________________________*
تانى يوم فى قصر سامح الخولى ....
(. مروة رجعت من المانيا هى وادم وابنهم .)
مروة : هى اروى جت !!
فاتن : لا يا مروة مظهرتش ولا اتكلمت (وحضنت بنتها)
آدم : اصل احنا شوفنا عربيتها بره افتكرناها رجعت
فاتن : حكت لهم قصة العربية
مروة : ان شاء الله خير يا ماما متقلقيش
فاتن : اختك اكيد حصل لها حاجة
آدم : لا يا طنط خير ان شاء الله متقلقيش
مروة : هو بابا فين
فاتن : راح لـ الظابط اللى بيدور على اروى
مروة : انتوا بلغتوا رسمى
فاتن : اه
آدم : لو مظهرتش النهاردة نزلوا اعلان فى الجرايد
مروة : لا ان شاء الله هتجى النهاردة
(. هنا جه عليهم سامح .)
فاتن : ها يا سامح ايه الاخبار
سامح : اذيك يا مروة اذيك ادم
آدم ومروة : بخير الحمد لله
فاتن : طمنى على اروى يا سامح فى جديد
سامح : ............................
__*__*__
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق