نص ساعة (الواحد والعشرين)

الحلقة الواحد والعشرين

(. فتحت ملك الباب وشنكلته بالجنزير وسابت مساحه بسيطه يدوب تشوف بيها اللى بره ، ملك واقفة وفريال وراها .)

ملك : مين حضرتك ؟

الطارق : انا مصطفى وهدان ابن عم انجى خطيبة اخو حضرتك

فريال بصوت هامس : ابن عم انجى !!

ملك بتفك الجنزير : اه اه اتفضل معلش معرفتش حضرتك

مصطفى : لا ولا يهمك 

فريال : خير !! فى حاجة

مصطفى : اه ، عمى ابراهيم قالى اوصلكم ده

(. ملك تاخد منه حاجة اشبه بـ شنطة الهدايا .)

فريال : ايه ده ؟

مصطفى : معرفش والله ، هو قالى خد دى وصلها على العنوان ده

فريال : اوك ، اتفضل شوية

مصطفى : لا متشكر

(. مشى مصطفى وقفلت ملك الباب وراه ودخلوا الـ living وهما بيسألوا بعض ايه اللى ممكن يكون باعته ابو انجى ، دخلوا وقعدوا وفتحت فريال العلبة لقيت الشبكة اللى كان مُعز مقدمها لـ انجى .)

فريال : الله مش دى الشبكة !!

ملك بزعل : ايوة

فريال : ده معناه ايه يعني ؟

ملك : هيكون معناه ايه يعني يا ماما ، معناه انهم فسخوا الخطوبة

فريال : كده من نفسهم !! ولا كأن مُعز له اهل ، ايه قلة الذوق دى ، دول كأنهم بيقولوا ان ده اللى بيربطنا بيهم ، هو مُعز عارف

ملك : هو كان قالى ان فى خلاف بينه وبين انجى ، يمكن يكون مُعز وبابا انجى وصلوا لـ القرار ده

فريال (بتقفل العلبه وتحطها جنبها) : احسن ، انا وافقت بس عشان مُعز بيحبها بس ابوها وامها مناخيرهم فى السما وميتناسبوش

ملك : هقوم اكلم مُعز (وتقوم)

فريال : بقولك ايه ، اقول انا لـ ابوكى لما يجي على موضوع هادى ولا تقوليله انتِ

ملك : لا يا ماما استنى شوية 

(. دخلت ملك اوضتها وهى حابسه دموعها من الضيق والزعل على اخوها خاصة وانها السبب فى انه يخسر حب حياته ، دخلت ملك وقفلت على نفسها واتصلت بـ اخوها .)

ملك : ليه يا مُعز مقولتش انك فركشت الخطوبة

مُعز : فركشتها !! مش فاهم

ملك : يعني ايه مش فاهم !! انت مش قولتلى ان الموضوع لسه متعلق

مُعز : ماهو لسه متعلق

ملك : يعني ايه لسه متعلق !! امال انجى واهلها بعتوا الشبكة

مُعز باستغراب وزعل : بعتوا الشبكة !! لا يبقي خلاص كده مبقاش متعلق

ملك : انا مش فاهمه حاجة يا مُعز

مُعز : مفيش حاجة يا لوكا عشان تفهميها ، خلاص كده الخطوبه اتفركشت

ملك : بسببى !!

مُعز : بصي هي مش بسببك بس حتى لو بسببك فـ فداكى الدنيا كلها

ملك : الدنيا كلها مش اغلى من اول حب حقيقي فى حياتك

مُعز : بس انتِ اغلى بقى من الحب ده ، ملك احنا ملناش غير بعض ومفيش حد هيبقالى غيرك ومحدش هيبقالك غيرى عشان كده مينفعش نتخلى عن بعض عشان اى حد حتى لو الحد ده بابا وماما ، وانا عمرى ما كنت هتجوز واحدة وهى بالعقلية العقيمه دى

ملك : مش عارفة اقولك ايه ؟

مُعز : متقوليش حاجة ، هو اساساً مفيش نصيب يعني حتى لو انا ماليش اخوات خالص مكنش الموضوع هيكمل

ملك : ربنا يعوضك خير يا حبيبى

مُعز : ربنا يخلينا لبعض يا لوكا

_____**_____**_____**_____**_____**_____**_____**_____

فى بيت ابراهيم وهدان ....

(. صحيت انجى من نومها ملقيتش الدبلة فى ايدها ، استغربت لانها مبتقلعهاش ، قامت تدور عليها فى كل حته فى الشقة من اوض وحمامات وبلكونات واخر ما زهقت راحت لـ مامتها ، اللى كانت قاعدة مع جوزها بيقرأوا كتب .)

انجى : ماما 

عبلة : نعم يا حبيبتى

انجى : مشوفتيش دبلتى ، انا فاكره انى مقلعتهاش بس صحيت ملقتهاش فى ايدي ولا فى الشقة

ابراهيم يبصلها من تحت النضاره : احنا قلعنهالك وانتِ نايمه 

انجى : نعم !! قلعتوهالى وانا نايمه

عبلة : انتِ للدرجة دى مكنتيش حاسه 

انجى : انا محستش بـ اى حاجة ، قلعتوهالى ليه ؟

ابراهيم : مُعز اتصل وفسخ الخطوبة وكان لازم نبعت الشبكة

انجى : ايه !! مُعز اتصل بـ مين !! وخطوبة مين اللى اتفسخت

ابراهيم : هو خاطب حد غيرك

عبلة : يا حبيبتى مُعز كلم بابا ونهى معاه الموضوع بتاعكوا ده وطلب الشبكه فـ قولنا نبعتها فى الحال مرضناش نصحيكي قلعتك الدبلة وانتِ نايمه وبعتنا الشبكه لـ اهله

انجى (بتقعد) : مُعز عمل كده !!

ابراهيم : هو برضه اتصرف صح

عبلة : بصى يا جى جى يا حبيبتى ، فركشة الخطوبة كانت خطوة صح وكان لازم تحصل ، انتِ نفسك اللى كان هيخليكي تكملى مش اكتر من الحب لكن فكرة ان ملك حصلها كده طبعاً ربنا يكون فى عونها وعونهم بس انتِ نفسك كنتى بتترددى

انجى : بس ........

ابراهيم يقاطعها : مفيش بس ، ده نصيب ، ربنا عايز كده ربنا يعوضك ويعوضه خير

(. قامت انجى دخلت اوضتها وقفلت على نفسها وفضلت تعيط ، جابت الصور بتاعة الخطوبة وفضلت تتفرج عليها وهى بتعيط بحرقه شديدة على انها خسرت مُعز وعلى ان مُعز عمل معاها كده ، فتحت الفيس بوك وفتحت الشات بينهم وفضلت تقراها وهى بتعيط وتبكلى بـ وجع وحسره ، لاحظت ان مُعز لسه كاتب انه مخطوب لها فـ هى من ضيقها من اللى عمله معاها ومن وراها راحت محوله الخطوبة الى single فى نفس التوقيت اللى كان مُعز فاتح فيه الفيس ولاحظ مُعز اللى انجى عملته واتوجع اوى من الحركه دى .)

مُعز لنفسه >> ياااه ده انا طلعت رخيص اوى عندك يا انجى ، الله يسامحك على الكسرة اللى انتِ كسرتيهالى دى

انجى لنفسها >> مكنتش اعرف انى قليله عندك كده يا مُعز ، معملتليش اى اعتبار وفركشتها مع بابا وصغرتنى قدامهم

_____**_____**_____**_____**_____**_____**_____**_____

بعد كام يوم فى بيت مجدى فاضل .....

(. مجدى رجع من شغله ، قعد مع مراته وابنه وبنته الصغيره على الغدا اللى كانوا فرحانين بـ جواز عالية وفوق ده كله ان هادى هيخطب ، مجدى مكنش بياكل كويس ومكنش باين عليه الفرحه بتاعتهم دى ، لاحظت هدى انه مش طبيعي .)

هدى : خير يا حبيبى مالك ؟

مجدى : مفيش يا حبيبتى ، عالية عاملة ايه ؟

هدى : كويسه ، المفروض ترجع من شهر العسل زى النهارده

مجدى : ربنا يسعدها

هادي : ايه يا بوب ، انت زعلان عشان عالية اتجوزت ولا ايه ؟

(. يبص مجدى بصة طويلة لـ هادى وميردش ويقوم ويسيب الغدا ويقعد فى البلكونه اللى وشها لـ النيل وضهرها لـ الشقة .)

هادى : فى ايه يا ماما !! ماله بابا

هدى : معرفش والله يا حبيبي

هايدي : عادى يا جماعه اى اب بيكون قافش بعد ما بنته  تتجوز خاصة الكبيرة او الصغيره

هادى : انا مش مطمن  

هدى : هقوم اعمله الشاى واروح اشوف ماله ، شيلوا انتوا الاكل

__**__**__ 

(. مجدى فاضل قاعد فى البلكونه ، شارد الذهن مش مركز الا فى حاجة واحدة بس اسم "ملك محمود السلحدار" ، رجع مجدى بـ ذاكرته شوية .)

                                                                         FLASH BACK

(. مجدى فاضل قاعد فى مكتبه بينظر لـ قضية ، قدامه لوحه مكتوب عليها " المستشار مجدى فاضل / مساعد نائب عام " ، دخل عليه احد وكلاء النيابة واللى هو ابن اخوه  .)

مجدى : خير ؟

وكيل النيابه : حضرتك كلمتنى امبارح عشان اجيلك هنا

مجدى : اه عايزك فى موضوع بس قولى عامل ايه فى القضيه اللى انت ماسكها

وكيل النيابه : شهادة الشهود بتقول انها قضيه زنا مش اغتصاب

مجدى : انت مش قولت ان البنت حالتها متدمرة جسدياً ، زنا ازاى بقى ؟

وكيل النيابة : القضيه خلاص اتحولت لـ المحكمه وهما بقى يحكموا فيها انا قدمت كل الادلة والتحقيقات والشهود اللى تحت ايدي

مجدى : بس انت مالك متأثر ليه بـ القضيه دى

وكيل النيابة : انت عارف البنت المُغتصبه تبقى مين ؟

مجدى : لا تبقى مين ؟

وكيل النيابة : خالها يبقي المستشار فؤاد الحسينى ، وابن عمها نديم السلحدار كان ضابط شرطه وحول نيابه بعد ما خدم شوية فى الشرطه ، حالفين قسم النيابة سوا

مجدى : دول سمعتهم هتبقى فى الحضيض

وكيل النيابة : هتبقى فى الحضيض لو القضيه اتحكم فيها على انها زنا بس متوقع ان النيابه هترجعلى القضيه تانى وهنعيد التحقيق فيها

مجدى : ماهى لو اتحكم فيها على انها اغتصاب هتبقى برضه فى الحضيض انت مش بتقولى ان اللى اغتصبها ابن عمها

وكيل النيابة : البنت حالتها متدمرة صعبت عليا جداً

__**__**__

(. افتكر مجدى لما ابن اخوه قاله ان القضيه رجعتله تانى وحقق فيها واثبتوا انها قضيه اغتصاب وفقاً لـ تقرير الطب الشرعى اللى اثبت ان فض غشاء البكاره حديث مش من زمان زى ما الشهود بيقولوا وان القضيه اتنشرت فى الجرايد واصبحت قضيه رأى عام ، ورجع مجدى بـ ذاكرته تانى لما ابن اخوه كان عندهم فى البيت وكان مضايق جداً .)

                                                                         FLASH BACK

مجدى : ايه يا ابنى بس ، هى كانت من بقيه عيلتك عشان تزعل عليها كده

وكيل النيابه : يا عمو البنت حياتها اتدمرت والحيوان اللى اغتصبها خرج من السجن زى الباشا

مجدى : مش هما اللى تنازلوا عن القضيه فى جلسة النطق بـ الحكم

وكيل النيابة : ماهى طلعت حامل وكان لازم يكون فى نسب للجنين اللى فى بطنها فاضطروا يتنازلوا مقابل انه يكتب عليها ويطلقها

مجدى : يا سيدى ماتشلش الهم اوى كده ، مش يمكن تكمل حياتها معاه وتعيش مبسوطه كمان

__**__**__

(. تجى هدى وتقطع تفكير مجدى مع نفسه .)

هدى : الشاى يا حبيبى

مجدى : تسلم ايدك

هدى (بتقعد) : مالك بقى شكلك مش طبيعي

مجدى : مفيش مشكله فى الشغل

هدى : ربنا معاك يا حبيبى

مجدى : قوليلي صحيح يا هدى ، هو مش هادى كان مرتبط بـ ملك قبل كده

هدى : اه ارتبطوا حوالى تلت سنين وانفصلوا سنتين ورجعوا تانى

مجدى : متعرفيش انفصلوا ليه ؟

هدى : هو هادى قالى انها اختفت فجأة وهو عرف يوصلها

مجدى : تمام

هدى : هو فى ايه ؟

(. هنا يدخل هادى ويقعد على كرسي من الكراسى الموجودة فى البلكونه .)

هادى : هاا يا بابا هنروح نتقدم لـ ملك امتى ؟

مجدى : انت المفروض مسافر امتى

هادى : عشر ايام بالكتير

مجدى : اجل

هادى : أاجل ايه بالظبط !!

مجدى : الخطوبة

هادى : ااجلها لحد امتى

مجدى : مش كتير سافر ولما تجى

هادى : بابا انا لو سافرت احتمال مقدرش اجى غير السنه الجاية

مجدى : انت بيبقى عندك اجازة فى اواخر رمضان واسبوع العيد كله يعني حوالى اسبوعين ابقى تعالى هنا

هادى : طيب ليه يا بابا احنا مش كنا متفقين نروح .....

مجدى يقاطعه : طيب اصبر شوية يومين تلاته كده

هادى : ماشى حاضر

_____**_____**_____**_____**_____**_____**_____**_____

فى احدى الكافيهات ...

(. ملك اتصلت بـ يزن وطلبت تقابله بس بره العيادة ، يزن طبعاً ما صدق ولكنه فى الاول قال لـ ملك انه مشغول شوية واخر المعاد تلت ساعات من اتصال ملك ، دخل يزن الكافيه لقى ملك مستنياه .)

يزن (بيقعد) : شكلك مش طبيعي

ملك : خطوبة مُعز اخويا اتفركشت رسمى وده طبعاً بسببى

يزن : شخصيات مريضة

ملك : انا قولت لـ ماما متقولش لـ بابا على ان هادى هيتقدملى

يزن : ليه ؟

ملك : انا محتاجه ادرس الموضوع ، انت عارف فى البلد دى مفيش حاجة بتستخبى واهله اكيد هيعرفوا والموضوع هيتفركش وانا بصراحة بقي كرامتى متسمحليش

يزن : وانتِ عيزانى اعمل ايه ؟ اقابل هادى برضه

ملك باستغراب لـ لهجة يزن : انا كنت مخنوقة وحبيت افضفض معاك

يزن : طيب ما تفضفضى مع هادى ، اظن ده موضوعكوا انتوا

ملك : فى ايه يا يزن ، انت بتكلمنى كده ليه ؟

يزن : مفيش حاجة يا ملك ، انا بس مضايق شوية

ملك : من ايه !! احكيلي مش احنا اصحاب

يزن بتهكم : اه ، اصحاب

ملك : يبقي احكيلي بقي زى ما بحكيلك

يزن : ملك ممكن امشى ، انا تعبان من الشغل ومحتاج اروح

ملك : طيب قولى اقول لـ هادى ايه عشان يأجل حوار انه يتقدملى

يزن بضيق من عدم احساس ملك بيه : قوليله الحقيقه ، (بيقف) ان خطوبة اخوكى اتفركشت ولازم هو يستنى شوية

ملك : طيب استنى يا يزن احنا ملحقناش نقعد

يزن : معلش ، نبقي نتقابل مرة تانيه

(. ومشى يزن وهو بيحاول يتجنب النظر لـ عيون ملك اللى بتضعفه وبتحطم قلبه ، ركب عربيته وطلع على الطريق ، صورة ملك بتزاول فيه ، وصورة هادى كل شوية تظهر قدامه ، ركن على هادى على يمين الطريق وخبط الدريكسون من ضيقه وقهرته .)

يزن لنفسه >> انت بتلومها وبتحاسبها ليه ولا على ايه !! هو انت اصلاً كنت قولتلها حاجة  ولا انت مستنى تحس بيك من نفسها وهى اصلاً شايفه حد غير هادى !! نفسى اتخلص من صورتك اللى بتطاردنى دى ملك ، نفسى ابطل اعافر مع حبك ده ، انا فعلاً تعبت لا قادر ابعد ولا قادر اقولك

__**__**__

(. بعد ما يمشى يزن ويسيب ملك لوحدها يتصل هادى بـ ملك هادى اللى مش عارف هيقول لـ ملك ايه وانه مش هيجي الاحد زى ما قالها ليه ، وردت ملك وهى مش عارفه تقول لـ هادى ميجيش ازاى .)

هادى : هاا قولتى لـ مامتك وباباكى

ملك : معرفتش خالص

هادى : ليه ؟

ملك : خطوبة مُعز اتفركشت وهما مخنوقين من الموضوع ده فـ معرفتش اقولهم

هادى : انا من رأيي برضه تستنى شوية لانهم اكيد مشحونين وعلى اخرهم

ملك بفرحه : انت شايف كده ؟

هادى : اهاا ، ماهو مجيش اخطبك منهم وهما على اخرهم من اهل خطيبة اخوكى

ملك : طيب وانت هتقول لـ باباك ايه ؟

هادى : لا متقلقيش انا هتصرف

ملك : بحبك

هادى : انا بموت فيكي ، ايه الدوشه دى انتِ بره ؟

ملك : اه خرجت اشم شوية هوا

هادى : لوحدك ؟

ملك : كان معايا يزن ومشى

هادى : ملك ، انتِ محتاجه يزن ده ضرورى اوى كده ؟

ملك : ليه بتقول كده ؟

هادى : انا مضايق من وجوده المبالغ فيه فى حياتك ده 

ملك : غيران عليا ؟

هادى : اكيد يعني ، ارجوكى خفى معاه شوية وياريت تقطعى معاه نهائي 

ملك : تبقى قلة اصل اوى منى

هادى : ليه يعني هو اخوكى ولا قريبك ده حيالله دكتور نفسى يعني من حقك تقطعى معاه فى اى وقت

ملك : حاضر ربنا يسهل

هادى : خليكي بقى عندك انا هـ اجى اشوفك عشان وحشانى

ملك : ماشى يا حبيبى مستنياك

_____**_____**_____**_____**_____**_____**_____**_____

فى بيت فاروق السلحدار ....

(. عريس الغفله جاى يتغدى عند بيت فاروق هو وابوه وامه عشان يقعد مع هيام ويتعرف عليها وتتعرف عليه ، هيام طول الوقت وهى عاملة مكسوفة وكلامها قليل جداً اشبه لـ العدم ، بعد الغدا سابوهم يقعدوا سوا مع بعض ، هيام قاعدة كمشانه فى نفسها ووشها فى الارض والخجل كان مقطع نفسه معاها .)

عزيز : انتِ مخلصة كلية صح ؟

هيام : اه

عزيز : عمى بيقولى درستى بره مصر

هيام : اه

عزيز : درستى ايه وفين ؟

هيام : درست سنه اعلام هنا وبعدها سافرنا بره ودرست اعلام برضه فى المانيا

عزيز : اشمعنى المانيا

هيام : بابا هناك من زمان ومعاه الجنسيه وخدنى معاه اعيش هناك

عزيز : كنتى مبسوطه هناك ؟

هيام : يعني

عزيز : والعيشة هناك كانت كويسه ؟

هيام : معرفتش اتأقلم ، اصل المجتمع مُتفتح اوى هناك والناس easy جداً والحياة free اوى ، فى تحرر فى كل حاجة وانت عارف احنا عيلة مُحافظة (ااااه يا بنت الـ ... مُحافظة :D )

عزيز : ونعم العائلات بصراحه

هيام : متشكره 

عزيز : انا بقى درست تجارة وبشتغل مع بابا 

هيام : اهاا بابا قالى

(. فضل عزيز وهيام يتكلموا سوا ويعرفوا بعض اكتر ، عزيز انبهر بـ هيام ، انبهر بـ شخصيتها وجمالها واناقتها وفوق ده كله اخلاقها اللى المجتمع الغربي معرفش يغيرها وعجبه اكتر حيائها "جاتك وكسه :D " ، اما هيام حست ان عزيز شخصيه طيبة ومحترم ومستقبله كويس ، حست ان طيبته واصله لـ حد العبط ، لاحظت انبهاره بيها اما هى كانت منبهره بنفسها انها قدرت تمثل حلو للدرجة دى .)

__**__**__

بعد ما العريس مشى ....

فاروق : هاا ايه اخبار العريس

هيام : مُثقف وشيك ولبق جداً شكله طيب وابن ناس

فاروق : يعني موافقه

هيام : امم ، اهاا موافقه مبدأيه

فاروق : مفيش حاجة اسمها موافقه مبدأيه الراجل جاى يتجوز فى شهر ونص

هيام : طيب نستنى رأيه مش يمكن هو ميوافقش اصلاً

فاروق : ابوه قالى هنرد عليكوا بكره بس عزيز باين عليه موافق

هيام : طيب لما يردوا بقي نتكلم فى التفاصيل

(. دخلت هيام اوضتها وفضلت تحلم احلام ورديه وتدعى ربنا وتشكره على انه سترها وبعتلها واحد بـ طيبة عزيز وسذاجته .)

هيام لنفسها >> عشان الست ولاء متبقاش تقول حق ملك ، اهو انا هتجوز اهو وهى لسه عايشه بالفضيحه

__**__**__

فى عربية عزيز .....

ابوه : هاا يا عزيز ايه رأيك ؟

عزيز : بصراحة يا بابا انا مُنبهر هو لسه في بنات بالاخلاق والحياء دول

ابوه : مش قولتلك انى مش هختارلك حاجة اى كلام ، فاروق السلحدار ده مربى بنته احسن تربية

عزيز : وانتِ ايه رأيك يا ماما

امه : البنت فى قمة الادب والذوق واهلها ناس مُحترمين

ابوه : يبقي على خيرة الله ، بكره نكلمهم ونقولهم اننا موافقين ونتفق على التفاصيل

عزيز : ياريت يا بابا منطولش فترة الخطوبة يعني جواز على طول

امه : ده انت مستعجل اوى 

عزيز : لا مش قصدى ، بس شخصية هيام دى مش هتخلى الواحد يتبسط فى الخطوبة

ابوه وامه باستغراب : ليه ؟

عزيز : اصلها بتتكسف اوى وخجوله وده مخلى كلامها قليل وفى احتمالات كبيرة انها مترضاش تخرج معايا فـ ده هيكون ممل ، انا رأيي يبقي جواز على طول ( البس :D )

ابوه : طيب تمام على خيرة الله

امه : ربنا يكملك على خير يا حبيبى

عزيز : يارب يا ماما

_____**_____**_____**_____**_____**_____**_____**_____

فى بيت عادل السلحدار ....

(. ولاء ووائل قاعدين مع بعض .)

ولاء : يا وائل انا عايزه ازوره ، انت ليه مش عايزنى ازوره بس

وائل : يا حبيبتى ده فى سجن طُره ايه اللى هيكوديكي بس بين المساجين والقرف ده

ولاء : سجن طُره !! هو مش فى المديرية ؟

وائل : لا ، لان هو مُعترف ومسلم نفسه يعني التحقيقات مخدتش وقت بسرعه كانت متحوله من المباحث لـ النيابة ومن النيابة لـ المحكمه

ولاء : طيب وبعد المحكمه

وائل : هتفضل المحكمه تنظر فى القضيه وتأجل الجلسات والمحامى بقي يشوف شغله انه يجيبله حكم مُخفف

ولاء : ربنا يستر

وائل : ان شاء الله متقلقيش كده

ولاء : دياب جدع يا وائل وطيب وميستاهلش كل ده

وائل : ربنا يفك سجنه

ولاء : هو انت حضرت اول جلسه

وائل : اه وبكره هروح ازوره

ولاء : طيب خدنى معاك 

وائل : لا ، الاحسن ليكي وليه متشوفيهوش فى الحالة دى

ولاء : طيب ابقي سلملى عليه وطمنى عليه ولو ينفع اكلمه من موبايلك وانت هناك خليني اكلمه

وائل : حاضر

_____**_____**_____**_____**_____**_____**_____**_____

تانى يوم فى سجن طُره .....

(. وائل جاب تصريح بـ زيارة دياب فى سجن طُره المحبوس على ذمة القضية ، خد التصريح ودخل لـ مدير السجن .)

وائل : صباح الخير ، انا جاى زيارة لـ النزيل محمد دياب البحيري

الضابط : لا هو خلاص مبقاش موجود هنا

وائل باستغراب : يعني ايه مبقاش هنا ؟

الضابط : ........................

اشوفكم الحلقة الجاية

ارجوع التقييم بـ تعليق :)

_____**_____**_____**_____**_____**_____**_____**_____

بـ قلم آلاء الشريفى

www.facebook.com/sh5abyt.bnoota

sh5abytalaa.blogspot.com

www.wattpad.com/alaaelsherifi