نص ساعة (الخامسة عشر)

الحلقة الخامسة عشر 

فى مدخل العمارة اللى فيها عيلة محمود السلحدار ..... 

(. ملك خارجه من بيتهم عشان تروح تقابل اخوات هادى ، لبست بنطلون جينز ازرق وعليه تى شيرت بنى فى بيج ورفعت شعرها كالعادة ، خرجت ملك من باب الشقة وهى ماسكه فى ايدها المفاتيح بتاعتها وفى الايد التانيه ماسكه الشنطة الكروس وجاكيت لونه بنى ، خرجت من العمارة وفجأة شافت حاجة خليتها وقفت ووقع من ايدها الجاكيت والشنطة ، وفضلت واقفه ملك وهى مش حاسة بـ الدنيا من حواليها .)

(. قرب وليد من ملك ووطى جابلها الجاكيت والشنطه واداهملها ولكن ملك من قلة الاستيعاب مخدتهمش .)

وليد بارتباك شديد : ملك ، الـ اممم ، خدى الجاكيت والشنطة

ملك (بتفوق) : انت بتعمل ايه هنا !!

وليد : انا جاى ، جاى عشان .............. (وسكت)

ملك بعصبيه : بتعمل ايه هنا !!

وليد : انا جاى اشوف مليكة

ملك : وده بانهى حق !!

وليد : بـحق انها بنتى

ملك ترفع حواجبها : بنتك !! اهو انا بقى واخدة بنتك دى مخصوص رغم انى مبطيقهاش عشان بس احرق قلبك عليها ، عشان كل ما تفتكر ان فى حته منك انت لا قادر تشوفها ولا تكلمها ولا اصلاً تعرف شكلها قلبك يتحرق زى ما حرقت قلبى

وليد : انا اللى حرقت قلبك بعد كل الحب اللى حبتهولك ، ده انتِ بقالك عشر سنين بتوجعى فى قلبى 

ملك : انت ازاى كده !! انت بجد شايف انك انت المظلوم ، انت اللى اتوجعت 

وليد : وجعت واتوجعت نبقي خالصين

ملك : خالصين !! بالسهوله دى !! ده انا لو قطعت من لحمك وانت حى مش هيشفى غليلى

وليد : انتِ لـ اللى وصلتيني لكده ، انتِ السبب

ملك : بجد !! يعني انا دلوقتى ممكن اجيب سكينه واشرحك بيها واقول انك انت السبب لانك جيت لحد هنا

وليد : مش قصدى ، بس كنتِ عارفة ان حبي ليكي بيفقدنى عقلى كتير وانتِ استفذتيني

ملك : انت واعى لـ اللى انت بتقوله !! مُدرك لـ كلامك ده !! حاسس بـ ايه وانت اى حاجة تعملهالى تقولى بسبب حبي ليكي

ده ايه الحب المُقرف ده ، قولى (بزعيق) حاسس بـ ايه

وليد : انتِ وحشتيني اوى ، مش حاسس بـ اكتر من انى مبسوط عشان شايفك

ملك : انت بنى ادم مستفذ وبطل كلامك ده  بدل ماتصرف تصرف يندمك

وليد : انا مش جاى اتحاسب انا جاى اشوف بنتى حقى 

ملك : وحقك ده انت تنازلت عنه من زمان وبمزاجك وصدقنى لو فكرت تقرب منى او من مليكه سواء دلوقتى او بعد ١٠٠ سنه هخليك تقضى عمرك كله فى السجن 

(. خدت ملك حاجتها من ايد وليد ومشيت كام خطوة ورجعت تانى لـ وليد .)

ملك : فى حاجة كان نفسى  اعملها اول ماشوفتك دلوقتى

وليد : حاجة ايه ؟

(. ترفع ملك ايدها وبكل قوتها تضرب وليد قلم ، من قوته وليد حس ان اسنانه وقعت .)

ملك : على الله القلم ده يفوقك ويعرفك انا حسيت بـ ايه لما شوفتك

(. ومشيت ملك ووليد واقف مصدوم من اللى عملته ملك واللى مجاش خالص فى باله ، ركبت ملك عربيتها وبعدت شوية عن وليد وركنت العربيه وفضلت تعيط شوية بحرقة شديدة ، اما وليد فضل واقف تحت العمارة خايف يدخل ومش هاين عليه يمشى من غير ما يشوف مليكة ولكنه اكتفى بـأنه شاف ملك وقرر يمشى عشان عمه لو شافه مش هيرحمه .)

_____**_____**_____**_____**_____**_____**_____**_____

وليد فى التاكسى مروح .....

(. وليد راكن دماغه على ازاز شباك العربيه دماغه عماله تودى وتجيب ، رغم انه راح ومشافش مليكة زى ما كان ناوى بس على الاقل شاف ملك زى ما كان نفسه ، وبرغم ان ملك قابلته مقابله سيئه وبرغم انها مدت ايده عليه الا انه برضه مبسوط انه شافها ، افتكر حياته الواقفه على ان ملك مش موجوده فيها وشاف ان ملك مقضياها وعايشه حياتها عادى ، افتكر ملك وهى بتقوله انها مبطيقش البنت بس وخداها عشان تحرق قلبه ، وافتكر لما قالتله انه تنازل عن حقه بمزاجه ورجع بـذاكرته لـ اليوم اللى عايش ندمان عليه ، يوم ما قرر يتنازل عن حقه .) 

                                                                        FLASH BACK

(. فى احد السجون كان وليد محبوس حبس احتياطى ، راح عادل لـ وليد عشان يزوره ، استدعاه مأمور السجن ودخل وليد المكتب وقعدوا فى ركن فى المكتب .)

عادل : لسه مش عايز تطلقها

وليد : يا بابا انا ماصدقت اتجوز ملك اقوم اطلقها

عادل : مانت لو مطلقتهاش هتفضل كده فى السجن

وليد : انا مستعد اقضى عمرى كله فى السجن ولا انى اطلقها ، ده كنت عايش على امل انها تبقي مراتى

عادل : بس هى مصره على الطلاق

وليد : مصره ازاى بقي اذا كان ولاء بتقول انها حابسه نفسها ومقالتش هى عايزة ايه

عادل : يعني ابوها هيطلقها من غير موافقتها وبعدين يا ابنى مش فى اتفاق

وليد : انا ماليش دعوه بالكلام ده ، اللى ليا ان ملك مراتى وانا من حقى مطلقهاش

عادل : بس ممكن يخلعوك

وليد : ماشى ، مش ملك حامل ، انا بقى هطالب بـ ضم حضانه الطفل

عادل : القاضى مش هيحكملك انت ناسى القضية اللى عملنهالك واللى انت بسببها محبوس احتياطى

وليد : بس على الاقل من حقى اشوفه ، يعني لو خلعتنى هفضل فى حياتها برضه

عادل : طيب مانا عندى اقتراح افضل

وليد : اقتراح ايه ؟

عادل : مش جايز لو عملتلهم اللى هما عايزينه ، يعنى لو طلقتها دى يخليك تكبر فى نظر ملك واكيد لما تخلف وتشيل حته منك ومنها بين ايدها وفى حضنها قلبها يحنلك

وليد : بس عمو عايزنى اطلق وامضى على اوراق انى ماليش علاقة بعد كده لا ملك ولا الطفل 

عادل : امضيله ، عمك مش هيعيش العمر كله وملك يوم ما تخلف ابنك وتحنلك محدش هيقف ادامها

وليد : طيب بس ........

عادل يقاطعه : مبسش يا وليد ، احنا مش عايزين ولا ناقصين فضايح يا ابنى اسمع كلامى

وليد : حاضر يا بابا

عادل : حاضر كلام رجاله ولا حاضر والصبح هتغير رأيك

وليد : حاضر بجد

عادل : بس اياك عمك او امك يعرفوا انى اللى قولتلك تعمل كده

وليد : ليه ؟

عادل : عشان تبقي جت منك انت وده هيكبرك فى نظرهم

وليد : حاضر يا بابا ماشى

عادل : ربنا يكملك بـ عقلى يارب

__**__**__

يفوق وليد من ذكرياته وهو بيتنهد ويقول لـنفسه >> ياريت ربنا ما كان كملنى بـعقلى وعملت كده

_____**_____**_____**_____**_____**_____**_____**_____

فى شركة وائل ودياب .....

(. دياب جه الصبح الشغل بس دخل على مكتب وائل واستناه فيه لحد ما جه ، دخل وائل لقى دياب قاعد على الكرسي المحاذي لـ المكتب ورافع رجله الشمال على رجله اليمين بـ زاويه قائمة ، وبيشرب شاى .)

وائل : دياب ، صباح الخير جيت بدرى

دياب : او انت اللى جيت متأخر

وائل (يقعد على مكتبه ويبص فى ساعة الموبايل) : الساعة لسه تسعه يا برنس شكلك منمتش طول الليل

دياب : بصراحه اه

وائل : ليه خير

دياب : بص يا وائل من الاخر ، انا انـ اممم ، عايز اخطب

وائل : طيب ما تخطب

دياب : بس فى مشكله ؟

وائل : مشكله ايه ؟

دياب : انك مش عايز تخطب او تتجوز الا لما نعمل فرع كمان للشركه

وائل : طيب وانت مالك بيا ولا ناوى تخطبنى انا ولا ايه حكايتك

دياب : قصدى يعني ، مينفعش انت تبقي مركز فى الشغل وانا اروح اخطب

وائل : طيب مانت بتحب وبتروح تقابل ومقضيها ، وبتأثر على الشغل وبتحملنى انا فوق طاقتى يعني هى هى

دياب : طيب معندكش عروسه ؟

وائل : انت يا ابنى مش بتحب ومرتبط ، انت قولتلى قبل كده انا فاكر

دياب : سيبك من بحب ومرتبط ، انا عايز اتجوز واحدة اكون واثق فيها

وائل(بيطلع اللاب من الشنطه) : اهااا تتجوز حبيبة واحد تانى

دياب : قصدك ايه ؟

وائل (يقوم يقعد قصاده ويسند بايده على ركبته) : يعني احنا فى زمن مفيش واحد او وواحدة مبيحبوش ، فى ناس كتير singles بس كلهم بيحبوا ، مفيش حد مهما كان سواء مرتبط ولا لا قلبه مدقش ووقع فى غرام حد

دياب : وايه المغزى من كلامك ده

وائل : اتجوز اللى حبيتك يا ديبو ، بدل ما تتجوز واحده قلبها متعلق بـ واحد تانى

دياب : انا عايز اتجوز اختك

وائل (يرجع ضهره لورا ويبص بتمعن لـ دياب) : اختى انا !!

دياب : اه ، انا ليا الشرف انى اناسبك 

وائل : وانت عايز تتجوز اختى ليه ؟

دياب : اولاً عشان اختك ودى لوحدها شهادة ، وثانياً لانها محترمه ومؤدبه 

وائل : اولاً عشان هى اختى !! يعني انت عايز تتجوز اى اخت ليا وخلاص ، ماشى بـ مبدأ بلاها ناديه خد سوسو

دياب : لا طبعاً مش كده ، انا عايز اتجوزها لـ شخصها

(. يقوم وائل من قصاد دياب ويطلب من الـ office boy يعمله نسكافيه ورجع قعد على مكتبه ودياب متوتر جداً .)

وائل : وانت بقي يا دابو تعرف شخصها منين ؟

دياب : انت بتتكلم معايا كده ليه كأنى بقولك عايز اتجوزها عرفى

وائل : بص يا دياب ، انت بتحب واحدة وبتروح تقابلها وبسمعك احياناً بدون قصد وانت بتكلمها فى الموبايل ، مقدرش اجوز اختى لواحد انا واثق انه بيحب واحده تانيه

دياب : ده طيش شباب مش حب

وائل : وبيتهيألى احنا رجاله زى بعض واقدر اميز كويس اوى بين طيش الشباب والحب والحب ده يا دياب باين فى عينك ، بيبان اوى فرحتك لما تكون بتقابلها وراجع على الشغل او لما تكون لسه مخلصه معاها المكالمه

دياب : ماهى البنت دى تبقي ........... (وسكت)

وائل : تبقى ايه ؟

دياب : مفيش ، انت شكلك مش موافق

وائل : انا بعزك جداً بس اختى غاليه عليا برضه وعايزها تتجوز اللى يحبها وتحبه وبعدين الاحسن نخلى صداقتنا وشراكتنا بعيده عن النسب

دياب : تمام ، عن اذنك

(. وقام دياب راح مكتبه وهو مضايق جداً ومخنوق من كلام وائل ، مضايق اكتر لانه مقدرش يصارحه ويقول ان البنت اللى انا بسببها بكون فرحان وبحبها بجد تبقى اختك ، اما وائل حس انه عمل الصح لانه شايف ان صداقتهم وشراكتهم لازم تكون بعيده عن النسب وان اخته لازم تتجوز شخص بيحبها وبتحبه .)

_____**_____**_____**_____**_____**_____**_____**_____

فى بيت الدكتور ابراهيم وهدان (والد انجى) .....

(. انجى البنت الكبيرة للدكتور ابراهيم وهدان والدكتورة عبلة الشربيني ، بعدها بنتين توأم فى اولى كلية الاتنين فى جامعه خاصة ، عيلة الدكتور ابراهيم اهم حاجة عندهم المستوى العلمى وليس المادى ، رغم خوف انجى من عدم موافقه اهلها على مُعز الا انها اتجرأت واتكلمت مع باباها ومامتها .)

ابراهيم : خير يا جى جى مسيبانا اللى ورانا ليه ؟

عبلة : انجى جايلها عريس

ابراهيم : وايه الجديد !! ماهى كل يومين بيجيلها عريس

انجى : الجديد يا بابا انى موافقه على الشاب ده

ابراهيم : وانتِ تعرفيه منين ؟

انجى : اخو واحده اعرفها وهو شافنى وقالى انه عايز يتقدملى

ابراهيم : امممم وبيدرس ايه ده ولا خريج ايه !!

انجى : هو خريج business administration جامعه اجنيه وبيشتغل بره مصر فى شركه اجنبيه

ابراهيم : محاسب يعني !! 

عبلة : هو من عيلة ايه ؟

انجى : اسمه مُعز محمود السلحدار ، باباه مهندس فى شركه هنا فى القاهره ومامته مبتشتغلش وعنده اختين واحدة قدى وواحده عندها سنتين

ابراهيم : عايزة تتجوزى مُحاسب يا انجى ؟

انجى : ايه المشكلة يا بابا !! هو انا هتجوز مهنه ولا بنى ادم

ابراهيم : فيها ايه لما يكون بنى ادم ومكانته العلميه مرموقه

انجى : ومين قال ان المُحاسب ولا المدرس ولا حتى خريج معهد مكانته مش مرموقه !! ما فى دكاترة فاشلين زى ما فى دكاترة متفوقين

ابراهيم : كل واحد ياخد اللى يشبهله 

انجى : يعني ايه ؟

عبلة : يعني الدكتور يتجوز دكتورة والمحاسبه يتجوز محاسبه زيه

انجى : ده اللى هو ازاى يعني !! مُعز بيشتغل فى شركة الدكتور بتاعكوا ده ميعرفش يشتغل فيها ، دخله المادى افضل من مليون مهندس ودكتور

ابراهيم : وانا ميفرقش معايا بيقبض كام !! انا يفرق معايا مؤهله ومهنته واللقب اللى بيتنادى بيه

انجى : بس انا عايزة مُعز

عبلة : خلاص يا انجى اهدى ، اهدى يا ابراهيم ، ان شاء الله يا جى جى نسأل عن مُعز ده وعيلته وربنا يسهل

انجى : بابا ، انا عايزة مُعز مش انتوا اللى هتعيشوا معاه او مع غيره ، انا اللى هعيش معاه

ابراهيم : ماشى ، انا موافق عليه من غير ماشوفه ولا اسأل عنه بس اياكى ، اياكى يا انجى تستنى منى انى افرحلك ولا اشيل همك

عبلة : هو ايه اللى موافق عليه من غير ما تشوفه ولا تسأل عنه ، لازم نسأل عنه وبعدين تقعد معاه وساعتها بقى نشوف هنعمل ايه

ابراهيم بنظره غضب لـ انجى : ماشى

_____**_____**_____**_____**_____**_____**_____**_____

بعد مرور شهرين واكثر قليلاً .....

- انجى ضغطت على ابوها ووافق ، سأل عن مُعز واهله ومسمعش عنهم كلمه وحشه ، مُعز اتقدم لـ انجى ووافقوا واتخطبوا رسمى وسافر تانى

- يزن لاول مرة تعدى شهور ويقدر على نفسه انه ميشوفش ولا يكلم ملك ولا حتى يطمن عليها ولكنه بيحاول يحل الالغاز اللى حوالين حياة ملك ولكن بدون علم ملك

- دياب كل ما يحاول يفتح مع وائل انه يتجوز اخته وائل يصده بحجة ان دياب بيحب واحده تانيه وبحجه انهم يفضلوا اصحاب وشركاء بس

- دياب وولاء كل مرة يقولوا مش هيحصل بينهم حاجة ولكن فى كل مرة بيحصل بينهم سواء على الموبايل او فى الحقيقة لحد ما بقى الموضوع طبيعي بالنسبه لهم ومبقاش بيحرك ضمير ولاء زى زمان

- هادى وملك علاقتهم مع بعض كويسة

- ملك بقالها اصدقاء وهما عاليه وهايدي وانجى ، بتخرج معاهم وبتقابلهم 

- علاقة ملك ومليكه زى ماهى

_____**_____**_____**_____**_____**_____**_____**_____

فى احدى الكافيهات ....

(. ملك نازله عشان تقابل عاليه على حسب اتفاقهم على المقابله ، دخلت ملك الكافيه والمفروض ان عاليه فى انتظارها ولكنها لقيت هادى ، ملك فرحت جداً انها شافت هادى لانه كان فعلاً وحشها رغم بروده مشاعرها عن زمان ، جريت عليه وسلموا على بعض .)

ملك : المفاجأة دى حلوة اوى ، انا اتبسطت جداً

هادى : انتِ وحشتيني اوى يا ملك 

ملك : انت متفق مع عالية

هادى : اه حبيت اعملهالك مفاجأة

ملك بابتسامه صادقة : احلى مفاجآة

هادى : بجد ؟

ملك : بجد ايه ؟

هادى : انها احلى مفاجاة ؟

ملك : هادى ، انت مش مصدق انى بحبك وبفرح لما بشوفك ليه ؟

هادى : ليه بتقولى انى مش مصدق

ملك : اغلب تلميحاتك كده

هادى : انا فعلاً بحس انك بتحبيني بس مش زى زمان ، يعني انا وجودى فى حياتك زى عدمه

ملك : لا ، انت فاهم غلط ، انا بحبك اوى ووجودك مهم جداً فى حياتى

هادى : امال ليه اكتر من مره تبقي عيزانا نسيب بعض

ملك : عشان ده الصح 

هادى : منين بتحبيني ووجودى مهم فى حياتك ومنين شايفه ان الصح نبعد عن بعض

ملك (تحط ايدها فى شنطتها) : ممكن اولع سيجاره

هادى : لا

ملك : عشان خاطرى

هادى : مش عايز اشوفك بتدخنى ، مش عايز اشوفك كده

ملك (تطلع ايدها من الشنطه) : طيب ماشى

هادى : مش ناويه تحكيلي ايه حصل في السنتين اللى بعدناهم

ملك : لو حكيت هشرب سيجارة

هادى : بتلوى دراعى يعنى 

ملك : بقولك ايه انت لسه جاى من السفر وانت واحشنى وانا وحشاك ايه بقى لازمه الحكاوى دى

هادى : ماشى يا لوكا غلبتيني

ملك : وحشتنى اوى بجد

هادى : وانتِ كمان ، هااا بقى

ملك : هاا ايه ؟ 

هادى : الخطوبة ، هتقدملك امتى

ملك : انت لسه مُصر على خطوبة الايام دى

هادى : نعم !! 

ملك : انا قصدى ...........

هادى يقاطعها : هو انا ليه بحس انك عيزانا نقضيها صحوبيه ، اول مرة فى حياتى اشوف واحد بيتحايل على واحدة يخطبها رسمى وهى تتهرب منه

ملك : طيب يا هادى خلينا نأجل الموضوع شوية انت لسه واصل و.........

هادى يقاطعها بعصبيته : معاكى سجاير صح

ملك : اه

هادى : هاتى واحده

ملك : الله فى ايه !! وبعدين انت مش بتبطل

هادى : وانتِ اللى يعرفك يعرف يبطل ، كويس اوى انى لسه بعقلى ودماغى مفوتتش وكويس انى مشربتش مخدرات

ملك : طيب يا حبيبي اهدى ، انا هريحك وهعملك اللى انت عاوزه

هادى : عالية تتجوز وبعدها اتقدملك هو ده اللى انا عاوزه

ملك : ماشى حاضر

هادى : لما اشوف اخرتها ايه معاكى يا ملك

ملك بتنهيده طويلة : خير ان شاء الله

_____**_____**_____**_____**_____**_____**_____**_____

فى بيت عادل السلحدار .....

(. وليد راجع من بره دخل الاوضة فتح الباب فتحة مخبرين ، دخل ورزعه وراه ومدد على سريره ، وائل كان فى اخر الاوضة بيلعب بلايستيشن ، داس pause وبص لـ اخوه .)

وائل : مالك

وليد : مفيش

وائل : والبوز ده وحمه يعني ولا ايه

وليد : فكك منك 

وائل (يقوم ويقعد على سريره) : مالك ياااد فى ايه

- وليد يسكت

وائل : الوش ده مش غريب عليا ، الوش ده خاص بـ ملك

وليد : يوم ماقرر اخرج واشم هوا واقابل صحابى اللى بقالى سنين مقابلتهمش ، نروح كافيه الاقى فيه ملك

وائل : ملك !! هى الدنيا ضيقة اوى كده

وليد : ومش لوحدها 

وائل : يعني ايه مش لوحدها !! كان معاها حد يعني

وليد : اه

وائل : مين !!

وليد : الزفت اللى اسمه هادى ، تخيل

وائل باستغراب : هادى !! مش ده اللى كانت ماشيه معاه زمان

وليد : اه والمفروض انهم سابوا بعض ، معرفش ازاى رجعوا لبعض 

وائل : عادى يعني ، اكيد لسه بيحبها وعرف يحببها فيه

وليد بعصبيه : وهو فيه ايه زياده عني !! بيحبها !! محدش فى الكون ده حبها اكتر منى

وائل : عادى يا وليد جايز تكون هى اللى بتحبه

وليد : ازاى !! ازاى واحدة تحب واحد وكل ليله بينام فى حضنها حته من واحد تانى

وائل : انت يا وليد اللى كنت مقتنع ان ملك لما تخلف هترجعلك فى حين انك لما روحتلها من كام شهر قالتلك انها بتكره البنت عشان حته منك

وليد : هى اكيد كانت بتقول كده من غيظها لكن مفيش ام بتكره ولادها

وائل : بس فى امهات كتير بيكرهوا ابو ولادهم عادى يعني

وليد : انا مش عارف اعمل ايه لـ زفت هادى ده عشان يبعد عن سكة ملك

وائل : وحتى لو عملتله ، هيعمل ايه يعني !!

وليد : انا عايزه يبعد عنها

وائل : ولما يبعد عنها تفتكر ملك هتجألك ولا هتحبك مثلاً

وليد : لازم يبعد عنها

وائل(بيقوم) : اهدى شوية يا وليد وفكر واحسبها صح متضيعش نفسك انت مش ناقص

وليد بصوت واطى : ضياع بـ ضياع بقى

_____**_____**_____**_____**_____**_____**_____**_____

فى عربية دياب .....

ولاء : ما بلاش يحصل كده فى العربية ، شكلنا بيكون مريب

دياب : مانا مفيملك العربيه كلها اسود فى اسود اهو

ولاء : بس برضه ملهاش لازمه بدل ما نتمسك بفعل فاضح فى الطريق العام

دياب بعصبيه : احنا لسه بهدومنا اهو يا ولاء فى ايه !!

ولاء : فى ايه يا حبيبى مالك متعصب كده

دياب : مفيش يا حبيبتى

ولاء : لا بجد مالك ؟

دياب : انا قررت اقول لـ وائل الحقيقة

ولاء : حقيقة ايه ؟

دياب : حقيقة انى بحبك وانك بتحبيني ، الوضع كده بقي مريب ومربك وانا خايف عليكي وعلى اللى بينا

ولاء : طيب افرض اتخانق معاك 

دياب : وائل عاقل جداً واكيد هيستوعب الموضوع ، بس انا هحاول امهدهاله عشان ميقفش وانتِ بقى ممكن تاخدى علقة

ولاء : لا لو وليد كنت قولتلك ماشى ممكن يقتلنى لكن وائل متفاهم وعاقل جداً

دياب : تمام ، انا هكلمه بكره

ولاء : ربنا يستر

دياب : متقلقيش يا حبيبتى خير ان شاء الله

_____**_____**_____**_____**_____**_____**_____**_____

تانى يوم الصبح فى بيت محمود السلحدار ....

(. محمود نزل راح الشغل ، وملك نزلت تقابل انجى عشان يفطروا سوا ، فريال ومليكة لوحدهم فى البيت ، فريال كانت داخله تنام شوية لانها صحيت بدرى ونامت متأخر ، فجأه رن جرس الباب ، راحت بصت من العين السحريه لقيت واحد متعرفهوش جابت طرحة وغطت بيها شعرها وفتحت الباب .)

الطارق : صباح الخير

فريال : صباح النور

الطارق : حضرتك والدة ملك السلحدار

فريال بتوتر : ايوة انا ، حضرتك مين ؟

الطارق : انا يزن نصار

فريال : اسفة انا معرفش حضرتك

يزن : بس انا اعرف ملك

فريال : تعرفها !! تعرفها منين ؟

يزن : ......................

اشوفكم الحلقة الجاية

ارجوع التقييم بـ تعليق :)

_____**_____**_____**_____**_____**_____**_____**_____

بـ قلم آلاء الشريفى

www.facebook.com/sh5abyt.bnoota

sh5abytalaa.blogspot.com

www.wattpad.com/alaaelsherifi