نص ساعة (الثالثة والعشرين)

الحلقة الثالثة والعشرين

فى بيت عادل السلحدار ....

(. العيلة كلها كانت بتتعشى ماعدا ولاء اللى من ساعة اللى حصل لـ دياب وهى كل حاجة عندها قليلة ، اكل ونوم وكلام وخروج وضحك ، كانوا بيتعشوا لانهم رجعوا متأخر من فرح هيام ،  ولاء قامت من نص الاكل وسابتهم وهما محبوش يضغطوا عليها ، قام وليد عشان يغسل ايده بعد الاكل ، جه يدخل الحمام لقاه مقفول فـ قال "ولاء انتِ جوه !! انجزى عايز اغسل ايدي" ، فضل وليد مستنى وابتدوا كلهم يخلصوا اكل وولاء مبتخرجش وملهاش صوت ولا حركه جوه ، فضل وليد يخبط بهدوء عشان ميقلقش مامته ، لما قلق هو مقدرش يستنى ، كسر ازاز موجود فى الباب ومد ايده وفتح الباب ، مجرد ما فتح باب الحمام طلع يجرى منه ونادى على وائل بصوت عالى "وائل ، الحق يا وائل " ، جرى كل اللى فى المكان عادل وسميرة ووائل ناحية وليد ووليد اتجه ناحيه الحمام وهما وراه .)

سميرة : يالهوى مالها ولاء

وليد : انا دخلت لقيتها كده

(. دخل وليد شال اخته اللى كانت بتنزف ، وراحوا بيها للدكتور ، نزلوا كلهم وتقريباً كانوا بـ لبس البيت ، ركبوا عربية وائل ، وائل ساق العربيه وقعد جنبه ابوه اما وليد وسميرة قعدوا فى الكنبه اللى ورا وولاء كانت بينهم كانت قاعدة بس نصها الفوقانى على رجل مامتها ، كانت عرقانه ووشها اصفر وشفايفها ناشفة ومتشققة ، وصلوا بيها لـ اقرب مستشفى ودخلت الطوارئ وكشف عليها وطلب يتنقل لها دم لانها نزفت كتير ، بعد ما الدكتور عمل اللازم لـ ولاء خرج لـ اهلها .)

كلهم : خير يا دكتور

الدكتور : مفيش حاجة اطمنوا هى كويسه 

سميرة : امال ايه اللى حصلها ده ؟

الدكتور : هى عندها مشاكل فى حياتها ؟

- كلهم واقفين مستغربين وبيبصوا لبعض

عادل : خير يا دكتور ، حضرتك كده قلقتنا

الدكتور : هى كانت بتحاول تجهض نفسها

كلهم فى نفس واحد : تـ ايه !!

الدكتور : حاولت تجهض الجنين ، حصلها نزيف بس هى دلوقتى احسن والجنين كمان كويس

سميرة بحسره : جنين ايه !! جنين مين ؟

الدكتور : انتوا متعرفوش ان بنتكوا حامل فى شهرين ونص

(. سميرة بتطلم على وشها وبتردد "يا مصيبتى ، يا فضيحتى" ، عادل قعد على اقرب كرسي من الصدمه مكنش قادر يقف او يتكلم ولا حتى ياخد رد فعل ، وليد الدم غلى فى عروقه كان نفسه يطول ولاء عشان يقتلها ، اما وائل عينه وسعت ولمعت وبوؤه اتفتح ومكنش قادر ينطق ، الدكتور فهم ان الحمل حصل بـ طريقة غير مشروعه لذلك انسحب من الموقف بهدوء ، فضلوا كلهم قاعدين بيحاولوا يستوعبوا الصدمه ولكن مفيش حد قادر يستوعب .)

بعد شوية ...

سميرة : اكيد فى حاجة غلط ، اكيد انا بنتى متعملش كده ابداً

وائل : مظنش

سميرة بدموع فيها حسرة : لا متقولش كده يا وائل اكيد فى حاجة غلط

وليد بعصبيه : يعني ايه حاجة غلط !! متوهميش نفسك وتوهمينا معاكى ، بنتك كانت دايره على حل شعرها ، كانت بتعاملنا اننا مقاطف

وائل بعصبيه غير معتاده : انت بتزعق لـ امك ليه !! هو مين سبب الوحله اللى احنا فيها دى

وليد : بقولك ايه !! مش كل واحد يحصله مصيبه يلبسها فيا ، ربنا قال "ولا تزر وازرة وزر اخرى" فـ متعش الدور بقي

(. هنا جه احد الممرضين وقالهم ان ولاء فاقت واتنقلت اوضة خاصة بيها ، رغم قلقهم عليها الا ان ابوها وامها مقدروش يروحوا يشوفوها لكن وليد بمجرد ما سمع ان ولاء فاقت وبقت فى اوضة طلع يجرى على الاوضة عشان يشفى غليله وعشان كده وائل لحقه عشان ميعملش حاجة فى ولاء ، دخل وليد بعصبيه شديدة ومسك ولاء من شعرها اللى كانت شبه ميته من التعب فضل يشدها من شعرها وهو بيقولها "فضحتينا ، فضحتينا يا زباله يا واطيه مين اللى عمل كده ، ردى" ، دخل وائل وحاول يخلص شعر ولاء من ايد وليد وبعده عنها وولاء منهاره من العياط .)

وائل : ولاء ، اهدى ، ده حصل ازاى ومع مين ؟

- ولاء بتعيط ومبتردش

وائل : يا بنتى ردى 

ولاء : دياب

(. وائل ووليد وقفوا يبصوا لبعض من شدة الصدمة .)

وليد بعصبيه : شوفت صاحبك عمل ايه !! دخلته بيتك وشاركته وفى الاخر عمل كده فى اختك .. فى شرفك

وائل مش مستوعب : دياب !! دياب ازاى ؟ دياب مسجون انتِ ناسية

ولاء بدموع : محصلش حاجة بينا الا مرة واحدة بس ، وبعدها اتقدملى وحصل اللى حصل مع مامته وهى دى المرة اللى حصل فيها الحمل

وليد بنبرة شماته : مش انا سبب اللى انتوا فيه !! اشرب بقى اختك حامل من صاحبك ، صاحبك اللى استغفلك واستحمرك

(. وائل صدمته كانت مُضاعفه ، كان يقدر يلتمس لـ اخته العذر ويقول انها ساذجه وحد ضحك عليها لكن يبقي الحد ده صديقه وصاحب عمره هى دى الصدمة الاقوى ، خرج وليد من عند ولاء وراح عند ابوه وامه وقالهم على اللى ولاء قالته وده لم يغير فى صدمتهم شئ ، اما وائل فضل قاعد عند ولاء وساكت بيحاول يستوعب .)

_____**_____**_____**_____**_____**_____**_____**_____

فى بيت عزيز ....

(. رجع عزيز على عش الزوجيه اللى جمعه بـ هيام ، البنت الرقيقة الخلوقه الخجولة المحترمه اللى كانت امه دعياله يوم ماتجوزها ، كان بيحاول يستوعب ازاى هيام قدرت تخدعه وتضحك عليه كده ، كان بيحاول يستوعب ازاى قدر يصدق انها كده فعلاً ، كان بيحاول يستوعب اللى حصله كان متوقع انه فى كابوس واكيد هيفوق منه ، فضل ممدد على كنبة الانتريه بيفكر فى كل اللى حصله ، مخنوق ومش مستوعب ومش مصدق ومستنى يصحى من الكابوس ده ، عدى خمس ساعات وهو مش حاسس بالوقت ، ومحسش ان الوقت ده كله عدى ، فاق وقام غسل وشه ورجع تانى مدد على الكنبه ، جاب موبايله من على ترابيزة الانتريه واتصل بـ رقم متسجل عنده بـ اسم "Myada" ، اتصل وقفل الصوت بحيث انها متسمعهوش بس هو يسمعها ، ردت عليه وفضلت تقول " الو ، الو ، الله ، ماترد ولا تردى" ولما زهقت قفلت الخط ، حط عزيز الموبايل جنبه وحط ايده على وشه ونزل من عيونه دموع ندم وحسره ، ورجع بـ ذكرياته شوية .)

                                                                              FLASH BACK

(. عزيز فى عربيته المتفيمه اسود ، جنبه بنوته رقيقة فى العشرينات من عمرها .)

ميادة : عزيز معدش ينفع نعمل كده

عزيز : فى ايه يا دودو يا حبيبتى ، هو احنا بنعمل ايه يعني

ميادة : انت شايف اننا مبنعملش حاجة

عزيز : يا حبيبتى ده كام بوسة على حضن ، عادى يعني احنا هنتجوز

ميادة : لما نبقي نتجوز بقي

عزيز : يوووه ، هو انتِ كل ما اقرب منك تعملى المناحه دى ، طيب. مبتعمليهاش ليه قبل ماقرب 

ميادة : قصدك ايه ؟

عزيز : قصدى انك عايزة زيي ويمكن اكتر بس بتعملى الحبتين دول بعد ما يحصل اللى انتِ عيزاه

ميادة : انا بعمل حبتين يا عزيز !! 

عزيز : ميادة ، انا مقصدش اللى انتِ فهمتيه بس يا حبيبتى انا عارفك كويس مش لازم بقي ننكد على بعض

ميادة : اللى عندى قولته انا مش هعمل كده تانى بس خلصت

__**__**__

(. يجرب عزيز يتصل تانى بـ الرقم ويقفل الصوت ويسمع صوت ميادة ويقفل هو قبلها المرة دى ، ويمسك مخدة يحطها على دماغه على اساس انها تمنع مخه من التفكير سواء فى الماضى او الحاضر .)

                                                                              FLASH BACK

(. عزيز قاعد فى كافيه مع اصحابه الشباب ، جت عليه ميادة اللى بقالها شهرين مش عارفه توصله ، بس لما واحدة صاحبتها شافته فى الكافيه كلمتها وقالتلها ، جت ميادة واقتحمت قعدة عزيز مع اصحابه وقبل ما تنطق كان عزيز قام عشان يتكلموا بعيد عن الناس لانه متوقع انها تجرثه فى المكان .)

ميادة : ياااه بقيت بشوفك بالصدفة حتى رقم موبايلك غيرته عشان معرفش اوصلك

عزيز : عايزة ايه يا ميادة 

ميادة : عايزة ايه !! انت ليه بتتهرب منى ، مبقتش تحبنى

عزيز : انا بحبك يا ميادة بس .........

ميادة : بس ايه !! مش عايز تتجوزنى

عزيز : انا مش عايز اقولك كلام يضايقك بس كفاية لحد كده

ميادة : كفاية عشان زهقت من اللعبه صح ؟

عزيز : ميادة ، انا تجاوزت معاكى اه بس سايبك صاخ سليم واحد غيري كان ممكن يعمل كل حاجة ويخلع

ميادة : صاخ سليم !! وانت فاكر انى هقدر اعيش مع حد غيرك بسهوله

عزيز : هتقدرى ، لازم تقدرى وانا كمان لازم اقدر

ميادة : انت فعلاً هتخطب ؟

- عزيز يسكت ويبص الناحيه التانيه

ميادة : رد عليا يا عزيز ، اللى انا سمعته صح ؟

عزيز : ايوة

ميادة : طيب وانا !! ليه مخطبتنيش مش انا حبيبتك ، مش انت وعدتنى بالجواز !!

عزيز : انتِ فعلاً حبيبتى وانا حبيتك بجد وكنت ناوى اتجوزك

ميادة : وايه اللى اتغير

عزيز : مش لازم تعرفى

ميادة : لا لازم ومصممه اعرف

عزيز : بصراحه يا ميادة انا مقدرش اتجوز واحدة تساهلت معايا ، مانتِ ممكن تكونى تساهلتى مع حد قبلى او ممكن بعد او حتى بعد ما نتجوز

- قدرت ميادة تتحكم فى اعصابها بعد اللى عزيز قاله

ميادة : واللى هتتجوزها بقى ضامن انها متساهلتش مع حد ؟

عزيز : دى اختيار ابويا وامى وهما مش هيختاروا حاجة وحشه

ميادة : يعني انا وحشة ، انا هقولك جملة واحدة بس

- يهز عزيز دماغه وكأنه بيقولها ايه 

ميادة : انا جايز اكون غلطت وعصيت ربنا بس انا توبت توبة نصوحه وان شاء الله ربنا يتقبلها منى ، وقولت انك لو ظلمتنى انا مش مسمحاك وهستنى ربنا يجبلى حقى منك ، حسبى الله ونعم الوكيل فيك

(. مشيت ميادة وجه على عزيز واحد صاحبه واللى كان عارف تفاصيل قصة ميادة باكملها وعارف عزيز سابها ليه .)

صاحبه : نهيت الموضوع ؟

عزيز : اه

صاحبه : هتندم على فكرة

عزيز : اشمعنى

صاحبه : نصحتك قبل كده وهنصحك تانى ... خد واحدة تجاوزت معاها بدل ما تاخد واحده تجاوزت مع غيرك

__**__**__

>> يفوق عزيز من ذكرياته اللى بتخليه يندم ويتحسر وهو بيقول لنفسه >> يارتنى سمعت كلامك ، ربنا انتقملك جامد اوى يا ميادة

_____**_____**_____**_____**_____**_____**_____**_____

فى بيت فاروق السلحدار ....

(. فاروق من لحظة ما هيام قالت ان اللى عمل كده وليد وهو مش على بعضه ، نفسه يشوف وليد عشان يخنقه ويشرب من دمه عشان بس يشفى غليله ، لما راح خبط عليهم ملقاش حد بيفتح فـ اتصل على وائل اللى قاله ولاء تعبت شوية وهما فى المستشفى ، هيام حابسه نفسها فى اوضتها وفاروق قاعد فى اوضته على كرسى هزاز ومراته قاعدة على السرير وحاطه ايدها على خدها .)

فاروق : بقى انا اوديها اخر الدنيا وابعدها عنه وفى الاخر يعمل برضه اللى هو عاوزه ، ايه الواد مبيتهدش ، لافف على بنات عمه ، انا مش فاهم ازاى ده بنى ادم طبيعي

زوجته بحسره : هو ده اللى هامك 

فاروق : وفى ابشع من كده ، ابن اخويا يعمل كده فى بنتى

زوجته وهى بتولول : فى ، فى ياخويا ، فى ان بنتك رجعت على بيت اهلها بعد دُخلتها بساعتين ، والحته كلها شافتها والناس مبتسكتش وفوق ده كله تطلق يوم فرحها ، هنتفضح

فاروق : هــ نتفضح !! احنا خلاص اتفضحنا ، بنتى جابتلى العار وخلت رقبتى قد السمسمه

زوجته : قولى بقى هتحل المشكلة دى ازاى !! لما لقيت بنتك بتحب وليد خدتها وسفرتها بره مصر ، بدل ما كانت بتروح شهر ولا شهرين فى السنه بقيت تخليها طول السنه هناك ، هتحل دى ازاى

فاروق : بعد ما اشفى غليلى من وليد هشوف اعمل ايه 

زوجته : طلع عليه عصبيتك واقتله ، اقتله يا فاروق عشان تروح فى داهيه وبنتك متلاقيش حد يسترها ونعيش بالفضيحه والعار عمرنا كله زى اخوك محمود وبنته

(. اول ما يسمع فاروق اسم اخوه محمود يرجع بدماغه لورا ، مش بدماغه بس ، بدماغه وذكرياته .)

                                                                              FLASH BACK

(. فى احد اجتماعات العيلة عشان يحلوا موضوع وليد وملك ، اثناء النقاشات الحادة وابداء وجهات النظر فاروق اتكلم مع محمود .)

فاروق : انا مش فاهم انت عامل من الحبه قبه ليه !! ماتجوز البنت لـ ابن عمها وتخلص ، وهو زيتنا يبقي فى دقيقنا

محمود بخنقه : يوم ما تبقى مكانى مش هتقول كده ، لانك ساعتها هتتحسر على بنتك

__**__

>> يتنهد فاروق تنهيدة فيها حُرقة قلب وحسره وهو بيقول >> جربتك حسرتك يا محمود ياخويا ، جربتها اضعاف اضعافك ،  لان بنتى عملت كده بارادتها

_____**_____**_____**_____**_____**_____**_____**_____

تانى يوم الصبح فى بيت عادل السلحدار ....

(. ولاء خرجت من المستشفى ، الكل مقاطعها ماعدا وائل لانه حاسس انه يحمل جزء من المسئوليه فى اللى حصل لـ ولاء لانه اللى آمن لـ دياب بـزياده ولانه اللى دخله البيت ، ولاء حابسه نفسها فى اوضتها ، وائل هو اللى بيروح يطمن عليها وياخدلها اكل ومياة وعصاير وبيديها الدوا وبيسندها للحمام لانها لسه تعبانه من محاولة اجهاض نفسها ، عادل من ساعة ماعرف وهو لسه متكلمش اما سميرة فـ ما بين اللطم وبين وهم نفسها ان كل ده محصلش وبنتها استحاله تعمل كده ، ووليد ما بين شماته فى اخوه اللى لما بيضايق بيعايره بـ حوار ملك وما بين انه بيغلى من ولاء ونفسه يخنقها .)

__**__

فى اوضة ولاء .....

(. وائل عامل ساندوتشات لـ ولاء وواخدلها مياة وعصير والدوا بتاعها وقاعد جنبها لحد ما تخلص .)

وائل : كُلى يا ولاء ، كُلى كويس عشان تعوضى الدم اللى فقدتيه

ولاء : انت ليه بتعمل كده معايا !!

وائل : بعمل ايه ؟

ولاء : ليه مش مقاطعنى زيهم

وائل : عشان انتِ مغطلتيش لوحدك

ولاء : قصدك ايه ؟

وائل : قصدى ان كلنا مشتركين فى اللى حصلك وده طبعاً ميسقطش الغلط من عليكي

ولاء : انا عايزة اقولك على حاجة 

وائل : قولى

ولاء : دياب كان جدع معايا واللى حصل والله ما كرره تانى وبعدها على طول جه اتقدملى رسمى بس الظروف وقفت بين اننا نتجوز

وائل : ده قلم جامد اوى يا ولاء ، المفروض تعرفى ان الظروف عمرها ما هتمشى زى مانتِ مخططلها فى غيب احنا منعرفوش

ولاء : طيب انا هعمل ايه دلوقتى

وائل : العمل عمل ربنا ، لما ابوكى وامك يفوقوا من الصدمه هقعد معاهم واشوف هنعمل ايه

(. خلى وائل ولاء تاخد الدوا وقالتله انها هتنام ، غطاها وطفى النور وخرج وراح ودى الصينيه المطبخ وفضل واقف شوية لانه افتكر اكتر حاجة عملها وبيندم عليها .)

                                                                              FLASH BACK

(. اثناء ما كانت قضية وليد وملك شغاله فى المحاكم ، فى فترة ما شهد ولاء وهيام ضد ملك واتحولت القضيه من اغتصاب. هتك عرض الى قضيه زنا ، اتصلت ملك بـ وائل .)

ملك : اذيك يا وائل

وائل : انتِ اللى اذيك يا ملك ، طمنيني عليكي

ملك : انا محتجالك اوى يا وليد

وائل : اؤومريني

ملك : وائل انت اكتر واحد عارف ومتأكد ان مفيش اى حاجة عاطفيه او جنسيه بيني وبين وليد وعارف انه اذانى وان اللى حصل مكنش زنا 

وائل : عارف يا ملك

ملك : طيب يا وائل ، انا عيزاك تجى تشهد فى المحكمه بالكلام ده

وائل : اشهد ضد اخويا !!

ملك : مش عيزاك تشهد ضد حد ولا لصالح حد ، انا عيزاك تقول كلمة الحق

وائل : كلمة الحق دى هتدمر اخويا

ملك : طيب وانا !!

وائل : يا ملك مكنش لازم الموضوع يكبر ويوصل لـ محاكم كان ممكن يتحل ودى

ملك : انا من يوم اللى حصلى وانا مقاطعه كل الناس حتى ابويا وامى ، من يوم اللى حصلى من اخوك وانا مبتكلمش ويوم ما فكرت اتكلم اتكلمت معاك انت ، احتجتلك انت لانى عرفاك متسكتش عن شهادة حق ، لانى عارفه ان وائل مبيعملش غير اللى يرضي ضميره

وائل : يا ملك حطى نفسك مكانى ، ده مهما كان اخويا

ملك : وانا مش هقولك حط نفسك مكانى ، عشان انت لو حطيت نفسك مكانى هتحلها ودى

وائل : انا اسف ، بجد اسف

ملك : انت عارف انى مظلومه وعارف اخوك عمل فيا ايه ، وعارف انك كان ممكن تساعدنى وعارف ان شهادتك كانت هتفرق معايا ، انا مش مسمحاك ومش هنسى انى احتجتلك وملقتكش ، هقول لـ ربنا انك سكت عن الحق 

__**__**__

يخبط وائل دماغه فى دولاب المطبخ كأنه بيعاقب نفسه وهو بيقول >> يارتنى ما سكت ، يارتنى ما سكت عن الحق

_____**_____**_____**_____**_____**_____**_____**_____

فى بيت محمود السلحدار ....

(. ملك فى اوضتها بتكلم هادى على السكايب صوت وصورة .)

هادى : ممكن متكشريش

ملك : هادى انت مش حاسس بيا ، انا نظرتى من تلت سنين كانت صح

هادى : مش فاهم ؟

ملك : يعني انا لما بعدت عنك زمان بعد اللى حصلى ده لانى كنت متوقعه كل اللى احنا فيه ده ، ان اهلك مش هيوافقوا وانا مش هقدر احط نفسى فى الموقف ده

هادى : طيب يا ملك اسمع كلامى ، انا مش عايز حاجة غيرك انتِ

ملك : وانا مش هتجوزك الا بـ رضا وموافقه اهلك

هادى : انتِ كده بتلوى دراعى

ملك : هادى اللى مقبلهوش على نفسى مقبلهوش على غيري

هادى : يعنى ..... !!

ملك : يعني انا مرضاش ان مُعز اخويا يتجوز من غير موافقه بابا وماما ، مقدرش اتخيل انه ممكن يتجوز وانا محضرش فرحه

هادى : عموماً انا بحاول مع بابا بكل اسلحتى وطاقتى وربنا يسهل

ملك : ان شاء الله خير

هادى : مش هتسبيني صح ؟

ملك : بحبك

هادى : بموت فيكي

(. فضلوا يتكلموا فى مواضيع مختلفه وبعدين قفلوا سوا .)

_____**_____**_____**_____**_____**_____**_____**_____

فى بيت عادل السلحدار ....

(. عادل وسميرة ووليد ووائل قاعدين كلهم سوا فى محاوله منهم لـ ايجاد حل عقلانى ومنطقى لحل مشكله او فضيحه ولاء ، فضلوا يتناقشوا سوا وعادل ملتزم الصمت ولكنه خرج عن صمته ولكن بعد فترة طويلة من نقاش وليد ووائل .)

عادل : هى ملهاش الا حل واحد

وليد : ايه هو

عادل : هناخد الست هانم من ايدها وفى الايد التانيه مأذون ونروح لـ هباب البرك دياب ونكتب الكتاب هناك

سميرة : يا سلام وهتقنع الناس ازاى ، البنت حامل ومحدش لحق يعرف حتى بـ قراءه فاتحتها

وائل : هو اصلاً دياب مش هيعرف يكتب كتابه على ولاء

وليد : ليه ان شاء الله !! هو يعملها ويخلع

سميرة : هو قالك كده ؟

وائل : مش هينفع لان مفيش مأذون هيرضي يكتب كتابهم

وليد : ما تتكلم دوغرى

وائل : دياب المحكمه حولته لـ مستشفى الامراض العقليه والنفسية للتأكد من سلامه قواه العقلية والدكتور اكد انه جاتله صدمه نفسية وعصبيه اثرت على وظائف المخ يعني يعتبر مريض عقلى

سميرة : ملناش دعوة ، لازم يكتب عليها

وائل : من شروط عقد القران ان يكون الزوج بالغ وراشد وعاقل ، يعني المأذون مش هيرضي يكتب الكتاب

(. التزم عادل الصمت مرة اخرى ، وليد اتصدم وسميرة فضلت تصوت على خيبتها فى بنتها ، قطع حوارهم وكلامهم وصدمتهم صوت جرس الباب ، قام وليد فتح ولقاه عمه فاروق ، فاروق اول ما شافه رزعه بالقلم ، فـ نسى الكل مشكلة ولاس وقاموا يشوفوا فاروق عمل كده ليه .)

وليد : الله فى ايه يا عمو !!

فاروق : يعني مش عارف فى ايه يا كلب يا سافل

عادل : فى ايه يا فاروق ، مالك داخل بزعابيبك كده

(. يدخل فاروق ويقفل الباب وراه ، ويقفوا كلهم قصاد بعض فى انتظار ان فاروق يتكلم ويفهمهم .)

فاروق : بنتى ، هيام العروسة

سميرة : مالها ؟

فاروق : بعد فرحها بساعتين جوزها رجعهالى

(. كلهم بصوا لـبعض باستغراب شديد .)

وليد : رجعهالك !! هى علبة تونه

عادل : رجعها ليه !! مش فاهم

فاروق : رجعها عشان ملقهاش بنت بنوت ، رجعها عشان ابنك عمل عملته مع بنتى

عادل : ابنى مين !!

فاروق : هو فى غيره ، اللى عمال يلف على بنات العيلة واحدة ورا التانيه ، وليد

وليد : نعم !! عملة ايه دى اللى عملتها مع بنتك

فاروق : يعني انت مش عارف ، هيام اقسمتلى انك انت اللى عملت كده وانت اللى شجعتها على الجواز من عزيز وشجعتها على العملية

سميرة بتصرخ : يالهوى عليا وعلى حظى المنيل فى عيالى ، يا ميلة بختك يا سميرة

وليد : استنى يا ماما ، انا والله العظيم ما عملت كده 

عادل بغل من وليد : على اساس انك معملتهاش قبل كده ، ايه يمنعك تعملها تانى

وليد : انا عملتها قبل كده لانى كنت بحب ملك ، كنت عايزها تبقي ليا بأى طريقة لكن هعمل كده مع هيام ليه

فاروق : وبجملت

وليد : والله العظيم انا ماعملت كده ولا لمست هيام فى حياتى

فاروق : والمفروض اصدقك انت واكدب بنتى

وليد : ايوة عشان انا بقول الحقيقه

عادل بعصبيه : انت بتستغفلنا ياااد انت ، البنت خلاص كده كده اتكشفت هتتبلى عليك ليه ما كانت قالت الحقيقه

فاروق : انا عايز حق بنتى يا عادل 

عادل : خده اعمل فيه ما بدالك ، لو قطعت من لحمه نساير مش هقولك انت بتعمل ايه

وائل : خلاص يا عمو ، هو هيتجوز هيام بعد ما شهور العدة بتاعتها تخلص

وليد : اتجوز مين يا عم انت

فاروق : تخلص شهور العدة ولينا كلام تانى سوا ، بس حق بنتى يا وليد مش هسيبه حتى لو هيطير في الموضوع ده رقاب

(. وخرج فاروق من بيت عادل اخوه بعد ما رزع الباب وراه .)

سميرة بصوت فيه حسرة ووجع : ايه اللى بيحصلنا ده بس يارب ، عملنا فيكوا ايه يا ولادى عشان تعملوا فينا كده

وليد : والله العظيم يا ماما ما عملت حاجة مع هيام ولا جيت جنبها

سميرة : قال يعني ماعملتش قبل كده

(. هنا يقع عادل على الارض وميحطش منطق ، ينزل وليد يجيب دكتور بسرعه وبعد الكشف اكد انه اصاب بـ جلطة ولازم يتنقل المستشفى ، واتنقل عادال المستشفى واقام فى العنايه المُركزة .)

_____**_____**_____**_____**_____**_____**_____**_____

بعد مرور ثلاث اسابيع ....

- ولاء حابسه نفسها فى اوضتها وبتتكسف تخرج بره وحالتها النفسية اتدمرت بعد ما عرفت اللي حصل لـ دياب

- حالة دياب مبتتحسنش

- عادل بقى بيتكلم بس كلام بسيط جداً ولكنه مبيقدرش يتحرك وخرج من العنايه المركزة 

- هادى وملك لسه مع بعض ولكن موقف اهل هادى متغيرش

- عزيز طلق هيام رسمى

__**_____**_____**_____**_____**_____**_____**_____

فى بيت محمود السلحدار .....

(. ملك قاعدة فى بلكونه اوضتها بتسمع مزيكا وبتدخن سيجارة ، موبايلها رن بـ رقم هادى المصرى وعشان كده استغربت ، ردت وهى قلقانه ومتوترة .)

ملك : هادى ، انت فى مصر ؟

هادى : غيري هدومك وتعاليلي حالاً ، انا تحت بيتكوا

ملك : فى ايه ؟

هادى : يالا يا ملك انا مستنيكي

(. غيرت ملك هدومها بسرعه شديدة نزلت لـ هادى اللى كان مستنيها تحت بيتها بـ عربية ، ركبت ملك جنب هادى وهى جسمها كل بيرتعش من الخضة .)

ملك : فى ايه يا هادى ؟ انت جيت مصر امتى

هادى : هفهمك على كل حاجة

( وطلع هادى بالعربية ومشى فى طريقه وهو ساكت لحد ما وصل عند مكان زى شقة او بيت .)

ملك : ايه ده ؟

هادى : احنا هنروح هنا

ملك بتقرأ يافطة متعلقة : مأذون شرعى (لـ هادى) نعم !! ايه ده ؟

هادى : ملك انا تعبت والله تعبت وزهقت من كتر المحاولة مع بابا رافض تماماً 

ملك : وانت مش قادر تقنعه

هادى : بابا قالى جمله كان عنده حق فيها

ملك : جملة ايه ؟

هادى : الجملة خاصة بـ مليكة ، بيقول اذا كانت امها كرهاها وبتنكرها نربيها احنا ليه وليه احنا او المجتمع يعترف بيها

ملك : عنده حق

هادى : نعم !!

ملك : باباك عنده حق بس ما علينا انت جايبنى هنا ليه ؟

هادى : انا مش هفضل تحت رحمه الكبار ، انا هتجوزك غصب عن اى حد

ملك : برضه مجاوبتنيش ، جايبني هنا ليه ؟

هادى : عشان نتجوز ، احنا وصلنا السن القانونى ، هنتجوز يا ملك ونحطهم قدام الامر الواقع . وانا واخد اجازة من رصيد اجازاتى من اول ماشتغلت هخلص ليكي الورق انتِ ومليكه ونسافر سوا

ملك : انت عايزنى اتجوز بالطريقة دى

هادى : عندك حل تانى

ملك : معنديش حلول ، بس مش هتجوز وافضل هربانه لاما من الاغتصاب لاما من جوازه اهل جوزى مش راضيين عليها

هادى : انا مش هقدر استغنى عنك

ملك : وانا مش هعمل كده يا هادى برغم انك اخر امل باقيلي

هادى : انا بضحى بأهلي وبخسرهم عشانك وانتِ مش عايزه تضحى

ملك : عايزنى اضحى بـ ايه وانا اصلاً خسرت كل حاجه انا معنديش حاجه اضحى بيها

هادى : على الاقل وافقى اننا نتجوز من غير ما اهلي يوافقوا

ملك : واخلف عيال يواجهوا نفس مصير مليكة

هادى : قصدك ايه ؟

ملك : قصدى هيعيشوا من غير عيله يا هادى زى مليكة ، هعيش انا وولادى منك منبوذين عشان خدنا واحد من اهله زى ما مليكة هتعيش منبوذه لانها بنت ناتجه من اغتصاب ، انا مش هعمل كده يا هادى

هادى : انتِ كده بتحكمى علينا بالموت يا ملك

ملك : انا وانت نستحمل الموت ده بدل ما نجيب اطفال من غير عيله ، اهلك كارهينهم وكارهين امهم

هادى : انتِ صدمتيني

ملك : انا بحبك بجد وعشان بحبك بعدت عنك زمان وهبعد عنك دلوقتى ، بس المرة دى يا هادى بلا رجعه

هادى : مش هسيبك تبعدى

ملك : خلينا نرضي بالمكتوب ونبعد عن بعض  ، احنا ملناش نصيب مع بعض بس جايز نتقابل بعدين في زمن تانى وظروف تانيه

هادى : بسهوله كده !!

ملك : اشوفك علي خير

(. وتنزل ملك من العربيه عشان تمشي لكن هادى ينزل وراها ويلحقها وتحاول ملك جاهده تقنعه بكلامها وفي النهايه قالها هادى "طيب تعالى اوصلك خليني جنبك اطول فترة قبل ماتحرم منك" ووافقت ملك وركبت جنبه وطول الطريق كانوا ساكتين تماماً ، وصلها هادى لحد العماره ، نزلت ملك من العربيه وطلعت السلم وبعدين وقفت وبصت لـ هادى اللى كان بيبصلها وعيونه كلها دموع محبوسه وكلام كتير نفسه يقوله اما ملك مقدرتش تقاوم دموعها ونزلت منها وهى بتبص لـ هادى ولما هادى شاف دموعها نزل من العربية ملك كان نفسها تجرى عليه وتترمى في حضنه بس قاومت احساسها وجريت ناحيه شقتها ، فضل هادى واقف شوية على امل ان ملك هترجع بس لما عدى كتير وهى مرجعتش ركب العربية ومشى وهو ساخط على المجتمع والظروف واهله .)

__**__**__

(. طلعت ملك اوضتها وفضلت تعيط كتير مع نفسها ، زعلانه على هادى وعلى نفسها وعلى نظرة الناس والمجتمع ليها ولـ مليكة بدأت تدخل جوه دايره اكتئاب وبقت ناقمه جداً على كل حاجة ، ملقيتش حد تلجأله الا يزن ، او بمعنى اصح حمال هموم ملك ، اتصلت بيه واول ما سمعت فضلت تعيط وهو يهدى فيها ولما هديت بدأت تحكيله انها سابت هادى للابد ، يزن كان فى حيره من امره مش عارف يتبسط عشان كده ممكن ياخد فرصته بالفوز بالجواز من ملك ولا يزعل على زعل ملك ، بدأ يبان فى كلام ملك مدى سخطها على اللى حواليها وخاصه مليكة واهل هادى وسخطها على المجتمع باكمله ، لاحظ يزن ان ملك داخله على حالة اكتئاب وانطواء غير عادية وان ده هيعود بالسلب على مليكه فقرر يخرجها من الموود ده .)

يزن : بقالك قد ايه مسافرتيش ؟

ملك : من يوم الحادثة مخرجتش بره القاهره

يزن : مش عايزه تروحى شرم

ملك : ياريت

يزن : طيب جهزى نفسك

ملك : اجهز نفسى لـ ايه ؟

يزن : هتسافرى بكره شرم الشيخ

ملك : بتهزر

يزن : لا بتكلم جد ، مكانك فى السوبر جيت محجوز ده لو مش عايزه تسافرى بـ عربيتك وكمان مكانك فى الفندق

ملك : انت بتتكلم جد !! 

يزن : والله بتكلم جد ، دى فسحه كانت معروضه عليا بس انا مش هينفع اروح ، روحى انتِ غيري جو ، عيدي ترتيب افكارك وحساباتك ، شوفى ايه ضاع من ايدك وايه لسه بين ايدك ، شوفى قرارتك كانت صح ولا غلط

ملك : فكرة حلوة

يزن : خلاص بكره هعدى عليكي عشاان اوديكي محطة السوبر جيت وهـاجى اخدك لما ترجعى بالسلامه

ملك : طيب هقول لـ ماما وارد عليك

يزن : ان شاء الله مش هترفض

(. قامت ملك وقالت لـ مامتها على السفر لـ شرم الشيخ ووافقت فريال بعد ما رجعت لـ محمود واخدت اذن منه ، قامت ملك تجهز شنطة هدومها واتصلت بـ يزن اتفقت معاه ، الغريبه ان بمجرد ما يزن طرح فكرة السفر دى ملك نسيت كل حاجة ومكنش فى دماغها الا حاجة واحدة بس وهى انها هتسافر تغير جو وتستجم .)

_____**_____**_____**_____**_____**_____**_____**_____

فى بيت فاروق السلحدار ....

(. فاروق طلب من وليد يجيله عشان يتكلم معاه بخصوص موضوع هيام خاصه ان عزيز طلقها رسمى ، وليد فضل مُصر على الانكار وانه فعلاً ملمسش هيام وفاروق مُصر ان هيام مبتكدبش وانه لازم يصلح غلطته وقرر وليد يعوم على عوم عمه لحد ما يعرف من هيام هى عملت كده ليه وراحلهم البيت وطلب يقعد مع هيام .)

وليد : عملتى كده ليه ؟

هيام : انا عملت نفس اللى انت عملته فى ملك

وليد : مش فاهم

هيام : مش انت من حبك فى ملك ورغبتك انك تعيش معاها اتبليت عليها وقولت انها كانت ع علاقة بيك ، انا برضه من حبى فيك عملت كده

وليد : ولما بتحبيني زى ما بتقولى ليه روحتى غلطتى مع واحد تانى

هيام : انا معرفتش اقول لـ بابا ، اسمك جه على لسانى بالغلط

وليد : تلبسيني مصيبه وتقولى اسمك جه بالغلط

هيام : على فكرة الاحسن اننا نتجوز ، احنا عارفين قذاره بعض واحنا اولى ببعض

وليد : وانا مش هسيبك تتهنى يوم واحد يا هيام ، سواء اتجوزتك او لا

هيام : انت بوووء يا وليد ، بتقول بس مبتعملش اى حاجة

وليد : انتِ ازاى بالبجاحه والوقاحة دى

هيام : من بعض ما عندكم

وليد : ماشي يا هيام ، انا هشربك من نفس الكاس اللى انتِ شربتهولى

هيام باستهزاء : وانا شربتك من نفس الكاس اللى شربته لـ ملك

(. اتصدم وليد من كلام هيام لانه فعلاً بيشرب من نفس الكاس اللى شربه لـ ملك ، بص لـ هيام بصة طويلة وخرج من بيتهم نهائي وهو بيقول لنفسه "هى دايره واحدة كلنا بندور فيها" .)

_____**_____**_____**_____**_____**_____**_____**_____

فى بيت مجدى فاضل .....

(. هادى جه من مقابلة ملك وهو يجر اذيال الخيبة وراه ، كان متوقع ان ملك هتوافقه على اللى عايز يعمله ، رجع وهو طهقان من كل حاجة وكل اللى حواليه ، رجع وهو مش عايز يشوف اى حد كان السبب فى انه يخسر البنت الوحيدة اللى حبها ، رجع على اوضته وجاب شنطة هدومه وبدأ يرص هدومه فيها عشان يرجع الامارات وعقد النيه بأن المرة دى سفرية مفهاش رجعه ، دخلت هايدي عليه .)

هايدي : هادى ، بتعمل ايه ؟

هادى : بلم هدومى ، هرجع الامارات 

هايدي : انت مش قولت انك جاى تحط بابا قدام الامر الواقع

هادى : خدت ملك وروحت بيها لـ مأذون مرضيتش ، قالتلى مش هتجوزك (وحكى لها باقى التفاصيل)

هايدي : متزعلش منى ، بس ملك عندها حق

هادى : عندها حق !! 

هايدي : ايوة ، كده هى بتحكم عليك تقاطع اهلك العمر كله ومفيش حد بيعيش من غير اهله يا هادى ، وهتبقي حكمت على عيالها سواء اللى منك او من اللى حصلها يكونوا من غير عيله تحميهم ويتحاموا فيها

هادى : وانا فين غلاوتى عندها

هايدي : هى عملت كده عشاان انت غالى عندها وبعدين انت لازم تقدر موقفها

هادى : كل ده ومش مقدر

هايدي : ايوة مش مقدر ، مش مقدر الجرح والوجع والحسره اللى حست بيهم وانت واخدها تتجوز من ورا اهلك ومن غير رضاهم ومن ورا اهلها

هادى : انا عملت كده من حبى فيها

هايدي : بس خدتها فى الخفا ، كأنك بتقولها انك فضيحه واللى حصلك حاجة تعر

- يتنهد هادى تنهيدة طويلة ويسكت

هايدي : انا هسألك سؤال

هادى : امممم

هايدى : لو انت اتجوزت ملك هيبقي عندك الجرأة تقول للناس انها اتعرضت لـ اغتصاب 

هادى : لا طبعاً

هايدي : يبقي انت مينفعش تتجوز ملك ، فى فرق يا هادى بين ملك حبيبتك وملك اللى اُغتصبت ومعاها طفله من الاغتصاب ده

هادى : انا مش هقول ان حصلها كده عشان احنا فى مجتمع متخلف

هايدى : وملك واللى زيها عايزين واحد يتمرد على المجتمع ده ، ملك مينفعش تتجوز واحد معرفش يقنع اهله ، مينفعش تتجوز واحد بيعاملها على انها فستان فيه قطع فـ قرر يدارى القطع بـ ايده كل ما حد يعدى قدامه

هادى بندم : انا اصلاً مستاهلهاش

هايدي : بص يا هادى انت عملت اللى عليك وزياده بس ملك عملت الصح متلومهاش زيادة

(. وخرجت هايدي من اوضه هادى وهادى قعد مع نفسه يفكر فى الكلام ويعقله .)

_____**_____**_____**_____**_____**_____**_____**_____

فى بيت عادل السلحدار ....

(. ولاء قاعدة فى اوضتها حابسه نفسها بتعيط طول وقتها ، زعلانه على نفسها وعلى دياب وعلى ابوها ، كانت ندمانه ومقهوره ، ولاء حست ان نفسها الزمن يرجع بيها مش عشان متعملش كده مع دياب لا عشان متعملش كده فى ملك ، افتكرت شهادتها الزور ضد ملك ، افتكرت لما قالت لـ العيله "ان يوم الحادثة ملك كانت جاية وهى عارفه جاية ليه" ، افتكرت لما قالت "انا بتفق مع ملك تجى عندنا لما يكون محدش موجود غير وليد وبعدين انا انزل واسيبها هى ووليد براحتهم" ، افتكرت برضه "اللى اعرفه ان فى علاقة بتجمع بين ملك ووليد" ، افتكرت لما راحت المحكمه وقسمت وقالت "والله العظيم اقول الحق" ولكنها مقالتش الحق ، افتكرت اكتر حاجة وجعتها وهى مواجهتها مع ملك يوم ما راحت شهدت فى المحكمة .)

                                                                              FLASH BACK

(. فى قاعة المحكمه ، القاضى اجل القضيه ، ملك خارجه من قاعة المحكمه لقيت ولاء فى وشها ، وقفت وبصتلها بصه طويلة اوى كلها عتاب وحزن ورغم ان ملك كان شكلها متغير باين عليه الاكتئاب والتعب النفسى والجسدى ورغم ان كلامها كان قليل جداً الا انها اتكلمت لـ ولاء .)

ملك : انا يا ولاء كنت جاية عندكوا وعارفه انا جاية ليه ؟

- ولاء ساكته

ملك : انا يا ولاء كنت على علاقة بـ اخوكى بحكيلك كل يوم تفاصيلها

- ولاء تبص للارض

ملك : ده احنا كنا اكتر من الاخوات ، ده احنا كنا بنام فى سرير واحد وبناكل فى طبق واحد من كتر حبنا لبعض

- ولاء ملتزمه الصمت

ملك : عارفة ، انا مش هقولك يارب تحسى اللى انا حساه دلوقتى لانى متمناش اى بنت تكون مكانى ، ابن عمها وعيلتها كلها ينهشوا فى لحمها وشرفها متمناش يا ولاء اشوفك فى الوضع بس انتِ ظلمتيني وانا مش مسمحاكى وهستنى ربنا يجبلى حقى منك بالطريقة اللى يرضاها

__**__**__

دفنت ولاء وشها فى المخدة وهى بتبكى بحرقه وبتقول بصوت عالى >> كفايه يا ملك ، كفايه ابعدى عنى ، حقك طلع تقيل اوى انا مش قادرة عليه ، انا مش قد حقك ، كفايه يا ملك ، كفايه تخليص فى حقك اللى مبيخلصش

_____**_____**_____**_____**_____**_____**_____**_____

بعد كام يوم فى شرم الشيخ ....

(. ملك قاعدة بتستجم على البحر بعد ما قضت ايام تعتبر من اجمل ايام حياتها ورغم انها كانت لوحدها الا انها استمتعت جداً ، ولكن اقتحم فرحتها موقف اهل انجى منها ومن جواز بنتهم من مُعز وكذلك موقف اهل هادى منها ومن مليكة ، بعد تفكير عميق اكتشفت ان العيلتين اتفقوا على حاجة واحدة وهى "لما امها نفسها كارهها ونكراها نربيها احنا ليه ونشيل همها" ، اكتشفت ملك انها بتدمر حياة مليكة وانها بسبب كرهها ليها وانكارها لـ امومتها لـ مليكه خليتها منبوذه من الكل ، رجعت ملك دماغها لورا وبدأت تفتكر مواقف لـ مليكه معاها ، كانت ملك بتبتسم تلقائي ، افتكرت وهى بتبوسها ان بتحضنها او بتديها من اكل بتاكله او بتصالحها او بتطبطب عليها وهى زعلانه ، اكتشفت ملك ان مليكة كانت بتحس بيها اوى ، كانت بتحس بزعلها وبوجعها وبفرحها قالت ملك لنفسها "انا مكنتش اعرف ان بين ايديا حاجة حلوة اوى كده زى مليكة" ، قامت ملك طلعت الفندق غيرت هدومها ونزلت عملت شوبينج واشترت هدوم ولعب كتير اوى لـ مليكة كـ محاولة منها لـ تعويض مليكة ، فى عز حنينها لـ مليكة واحساسها بالحب ده ناحيتها لـ أول مرة افتكرت فراق هادى ووجع قلبها عليه وان مليكة هى السبب ، افتكرت وليد واللى عمله فيها وان مليكة تبقي بنته وحته منه ، قعدت ملك على كرسى فى الموول وتنهدت تنهيدة طويلة وقالت لنفسها "احساس غريب اوى لما تبقي احلى حاجة فى حياتك اكتر حاجة بتوجعك" ، افتكرت حاجات كتير اوى نكدت عليها بس فاقت سريعاً من مشاهد النكد اللى بتتوارد على ذاكرتها وقالت لنفسها "ربنا خد منى حاجات كتير اوى كنت بحبها بس ادانى حاجة احلى من اى حاجة ، ادانى مليكة ، من النهاردة لازم اعوض مليكة ، لازم اخليها احسن منى فى كل حاجة عشان مآساة ملك متكررش تانى ، من النهاردة هعتبر ان مليكة بنتى انا وبس ، ايوة بنتى انا وبس وهنسى انها جت عن طريق اب ، هعتبر ربنا حطها فى رحمى بقدرته ، مليكة بنتى ومحدش له حاجة فيها غيري انا" ، وقررت ملك ترجع تانى يوم القاهره واتصلت بـ يزن عشان يقابلها فى السوبر جيت وفرح يزن جداً لما سألها "هتجى بدرى ليه كملى لـ اخر الاسبوع" وقالتله "مليكة وحشتنى" ، لانه قدر يحقق هدفه من ورا سفرية ملك .)

_____**_____**_____**_____**_____**_____**_____**_____

تانى يوم الصبح فى بيت محمود السلحدار ...

(. ملك راجعه من شرم الشيخ مبسوطه جداً حاسه انها اتولدت من جديد خاصة بعد الاستجمام والتفكير والقناعات اللى وصلتلها ، راجعه محمله بـ التفاؤول والسعادة وطاقة ايجابيه رهيبه ، ملك مكنتش كده عشان سافرت او عشان بقالها تلت سنين مغيرتش جو ، ملك راجعه مبسوطه ومتفائلة عشان افكارها وقناعاتها اتغيرت ، يزن راح جاب ملك من محطة السوبر جيت زى ما وعدها ، وصل عند بيتها وركن العربيه ونزلت ملك منها وهى لابسه شنطه كروس وجارة وراها شنطة سفر بعجل فيها هدومها وشايله فى ايدها التانيه شنط هدايا ، وصلت عند باب الشقة وقفت شنطة السفر وطلعت المفتاح من شنطتها وفتحت باب الشقة ودخلت شنطتها ودخلت وقفلت الباب  ، اول ما دخلت الشقة لقيت مامتها فى الصالون المقابل لـ باب الشقة ، ابتسمت ولكنها فى ثوانى قليله اتفزعت وصرخت وقالت "ماما" .)

اشوفكم الحلقة الجاية

ارجوع التقييم بـ تعليق :)

_____**_____**_____**_____**_____**_____**_____**_____

بـ قلم آلاء الشريفى

www.facebook.com/sh5abyt.bnoota

sh5abytalaa.blogspot.com

www.wattpad.com/alaaelsherifi