الحلقة الثالثة عشر
جزء من حلقة سابقة :
فارس : حاجة ايه خير
شريفة : قولى الاول وحشتك ولا لا
فارس : يوه بقى اتكلمى حاجة ايه
شريفة : ...............
*_____________________________________________**___________________________*
شريفة : انا حامل
فارس : ايه !!
شريفة : زى ما قولتلك انا حامل
فارس : بجد يا شريفة انتِ حامل !!
شريفة : هى الحاجات دى فيها كدب (وحضنته)
فارس : الف مبروك يا حبيبتى
شريفة : مبروك علينا احنا الاتنين
فارس : اظن بقى ده سبب اقوى يخليكي ترجعى الفلوس لاخواتك
شريفة : بذمتك ده وقته
فارس : شريفة عشان خاطر ابننا رجعى الفلوس دى
شريفة : انا مش فاهمه انت ازاى بتفكر بالطريقة دى
فارس : وايه المشكلة
شريفة : واحد زيك لف الدنيا عمل كل حاجة غلط ، ليه شاغل بالك اوى انى ارجع الفلوس
فارس : جايز اكون عملت كل حاجة غلط انا قولتلك فى يوم من الايام انا كنت شمال اوى المفروض لما اجى اتعدل ابقى يمين اوى بس انا قررت ابقى وسطى لا انا متشدد ولا انا ضايع زى ما كنت وعشان كده بقولك رجعى الفلوس لاخواتك
شريفة : انا مش هرجع حاجة لحد يا فارس ده حقى
فارس : ده اخر كلام عندك شريفة
شريفة : ومعنديش كلام غيره
فارس : حتى لو قولتلك ان ده هيبقى اخر يوم بينا
شريفة : نعم !!
فارس بزعيق : هترجعى الفلوس ولا لا ؟
شريفة : مش هرجع حاجة
فارس : يبقى انتِ اخترتى يا شريفة (ومشى)
*_____________________________________________**___________________________*
بعد كام يوم .....
فى ڤيلا محمود ابو المجد ...
رجاء : انا مش فاهمه يعنى انت سايب بيتك ليه
فارس : ايه يا ماما اتخنقتى منى ولا ايه
رجاء : لا يا حبيبي بس عايزة اطمن عليك
فارس : شريفة سافرت تشوف مامتها وانا معرفتش اسافر معاها عشان شغلى
رجاء : هى مامتها دى مبتنزلش مصر خالص
فارس : لا يا ماما اصلها عاشت فى لندن عمرها كله وكمان هى الفترة دى تعبانه
رجاء : ربنا يشفيها ويجيب شريفة بالسلامه
فارس : يارب
*_____________________________________________**___________________________*
فى ڤيلا عمر ابو الوفى .....
(. اياد رجع من الشغل غير هدومه وخرج لـ زياد وزياد كان بيعوم فى حمام السباحه واول ما شاف اياد خرج .)
اياد : نعيماً
زياد : عملت ايه
اياد : معملتش حاجة ومفيش امل
زياد : عندك انت مفيش امل بس عندى بقى فى كل حاجة
اياد : بص يا زياد انا كلمت كبار المحامين مفيش اى طريقة قانونية تخلينا ناخد الفلوس
زياد : ولما تثبت بقى انها بنت زنا وابن الزنا لا يرث مفيش واحد من الكبار دول قالك كده
اياد : حتى لو عملت كده مش هتاخد اكتر من ٣ مليار و٢٠٠ مليون
زياد : انت فاهم غلط
اياد : فهمنى
زياد : اهل فارس بيه ميعرفوش اصل الست هانم ، هما فاكرين انها شريفة عمر ابو الوفى اللى ابوك طلق امها من ٢٥ سنة لانها مكنتش عايزة تسيب بريطانيا فاكرين انها البنت الـ high class اللى عاشت عمرها بتلف اوروبا لكن ميعرفوش الحقيقة
اياد : انا مش فاهم حاجة انت قصدك ايه
زياد : تخيل بقى عيلة ابن سيادة الوزير لما يعرفوا ان مرات ابنهم بنت زنا هيعملوا ايه
اياد : انت اتجننت !! انت عايز تفضح اختك قدام عيلة جوزها
زياد : لا انا هعمل معاها deal انها ترجع كل الفلوس مقابل انى معملش كده
اياد : مينفعش يا زياد
زياد : عندى انا ينفع وهعمل كده ، روح بقى قولها الكلام ده
اياد : طالما انت جدع اوى كده روح قولها انت
زياد : انا لو شوفت شريفة هقتلها وممكن ادفنها بالحيا كمان (ومشى وسابه)
(. اتصل اياد بـ فارس .)
اياد : اذيك يا فارس
فارس : بخير الحمد لله وانت
اياد : كنت عايزك فى حاجة مهمة
فارس : خير
اياد : حكى له على اللى زياد عايز يعمله
فارس : زياد اتجنن ولا ايه انا اهلى لو عرفوا حاجة زى كده الدنيا هتولع
اياد : هو عايز يهددها
فارس : ماهى شريفة عنيدة وهتقوله اعلى ما فى خيلك اركبه وهو هينفذ
اياد : طيب ما تقنعها
فارس : انا بقالى اكتر من خمس ايام سايب البيت كله لـ شريفة على امل انها ترجع فى كلامها
اياد : وهى طول المدة دى مردتش عليك
فارس : ولا عبرتنى
اياد : دماغها الناشفة دى هتودينا كلنا فى داهية زياد مجنون
فارس : ايوة يعنى بس دى فى النهاية اخته اكيد مش هيأذيها
اياد : زياد اخويا وانا عارفه لو ابوه ذات نفسه جه على حقه هيدوس عليه
فارس : صدقنى يا اياد انا عملت كل اللى اقدر عليه مع شريفة مش عارف اعملها ايه تانى
اياد : طيب كلمها وقولها اللى زياد عايز يعمله وعرفها قد ايه ده هيأثر عليكوا
فارس : خلاص ماشى انا هروحلها واتكلم معاها
اياد : اوكى وابقى عرفنى الاخبار
(. وقفلوا وقرر فارس يروح لـ شريفة بالليل .)
*_____________________________________________**___________________________*
فى بيت مؤمن .......
(. دخلت سميرة على مؤمن اوضته لقيته ماسك المجلة اللى كان فيها صور شريفة .)
سميرة : مؤمن تعالى عشان ..........
(. لما شافت المجلة فى ايده سكتت وراحت قعدت جنبه لقيته بيقلب فيها وهو مخنوق وحابس دموعه .)
سميرة : ده نصيب يا ضنايا
مؤمن : هى كانت بتاعتى انا ، كنا زمانا متجوزين
سميرة : يا حبيبي تكون فى ايدك وتقسم لغيرك
مؤمن : انتِ اصلك مشوفتيش الصور
سميرة : مالها الصور ؟
مؤمن : الفرحة بتطل من عيونها ، نظراتها له كلها حب ورومانسية انا كأنى مكونتش موجود فى حياتها
سميرة : هى فرحانه بالاملى اللى بقت فيها
مؤمن : وانا يا ماما انا فين مكانى فى حياتها وفى قلبها
سميرة : ماهو الواحد عشان يعيش لازم ينسى
مؤمن : تنسى !! تنسى ايه !! تنسى السنين دى كلها !! تنسى حبنا وكلامنا ولمساتنا !! تنسى اللى عملناه عشان نكون سوا كل ده يتنسى ازاى يا ماما
سميرة : احنا بنى الانس يعنى تحسها كده جاية من النسيان
مؤمن : ايوه بس الواحد ممكن ينسى بعد سنتين تلاته سنة على الاقل بس احنا مكملناش سنة سايبين بعض ، يا ماما اللى بيني وبين شريفة اقوى من النسيان
سميرة : يبقى زى ما هى نسيت انت كمان تنسى
مؤمن : انسى !!! مش قبل ما اخد حقى منها
سميرة : حق !! حق ايه ؟
مؤمن : حق حبى ليها وتضحياتى والسنين اللى فاتت من عمرى ، حق جرحى واهانتها ليا ولكرامتى
سميرة : استهدى بالله يا مؤمن
مؤمن : لا اله الا الله
سميرة : ايوة يا حبيبي كده ربنا يهديك
مؤمن : برضه مش هسيبها فى حالها
سميرة : فكر فيها بعقلك هتلاقيك انت الخسران
مؤمن : مش هخسر اكتر من اللى خسرته
سميرة : طيب تعالى بس نتغدى وبعدين نتكلم فى الحوار ده
*_____________________________________________**___________________________*
تانى يوم الصبح فى ڤيلا شريفة وفارس ......
(. فارس راح لـ شريفة عشان يتكلم معاها بخصوص موضوع زياد ، فارس دخل لقى شريفة بتلعب رياضة .)
فارس : بتعملى ايه يا شريفة
شريفة : حبيبي انت جيت (وجريت عليه)
فارس : انتِ ازاى تلعبى رياضة زى دى وانتِ حامل
شريفة : ايه ده هو مينفعش !!
فارس : لا فى رياضة معينه للحوامل ابقى اسألى مدرب الجيم عليها
شريفة (بتحضنه) : وحشتنى اوى يا حبيبي
فارس (بيبعدها عنه) : انا جاى اتكلم معاكى فى موضوع
شريفة : موضوع ايه
فارس : بصى يا شريفة انا بديلك اخر فرصة انك ترجعى الفلوس دى او تسيبينى
شريفة : انت ازاى تحط نفسك فى مقارنه زى دى
فارس : قولتى ايه
شريفة : انا قولت كلامى قبل كده ومش هعيده ولا حتى هغيره
فارس : ماشى يا شريفة كده انتِ اخترتى الفلوس وانا هطلقك
شريفة : تطلقنى !!!
فارس : مش ده اختيارك
شريفة : يا حبيبي متخليش حاجة زى كده تأثر على حياتنا
فارس : انتِ اللى بتهدى حياتنا
شريفة : انا برضه ولا انت
فارس : يا شريفة كده كده هتتهد لو انا وافقت انك مترجعيش الفلوس وعشنا سوا زياد هيهدها فوق دماغنا
شريفة : زياد !! زياد اخويا
فارس : ايوة
شريفة : ليه ناوى يعمل ايه
فارس : زياد بيقولك لاما ترجعى الفلوس لاما هيرفع قضية يطعن فيها فى نسبك والميراث
شريفة : ههههه عبيط حتى لو انا مش بنت عمر ابو الوفى هو باعلى ممتلكاته انا مورثتش الا حاجات بسيطه يعنى برضه مش هياخد حاجة
فارس : هو ده اللى هامك انه مش هياخد حاجة !! طيب والفضيحة !!
شريفة : فضيحة ايه
فارس : لما اهلى واصحابنا ومعارفنا يعرفوا القصة الحقيقية
شريفة : ما يعرفوا
فارس : تفتكرى اهلى ممكن يقبلوا بحاجة زى كده
شريفة : انت بتستعر منى ؟
فارس : انا مقولتش كده بس انتِ بنفسك فى يوم من الايام رفضتى النسب والفلوس عشان خوفتى من الفضيحة
شريفة : كنت هبلة
فارس : وكده انتِ عقلتى !!
شريفة : اه عقلت لما عيشت فى المستوى ده عقلت لما لقيت ان الناس دى مبتهتمش لا بـ دين ولا شرف ولا بـ فضايح الا من رحم ربى
فارس : الناس دول برضه بيهتموا باصل الناس اللى بيتعاملوا معاهم
شريفة : قصدك انى اصلى ميشرفكش
فارس : افهمى اللى تفهميه بس لو فعلاً خايفة على سمعة نفسك وسمعة اللى فى بطنك لمى الليلة دى ، مش ده كان كلامك لـ مؤمن
شريفة : انا بقى اتغيرت ، اكتشفت ان طظ فى الشرف طالما معايا فلوس ، اكتشفت ان الناس بتتخرس طول مانت فوق طول مانت عالى وطول مانت معاك فلوس ، اكتشفت ان الناس اللى هتتكلم عليك وانت فقير هيجوا يلحسوا تراب جزمتك عشان انت معاك فلوس ، اكتشفت انى طول مانا مسنوده على الفلوس مخفش من اى. حاجة ولا اى حد
فارس : خافى من ربنا ، خافى على اللى فى بطنك
شريفة : ربنا بيسامح وانا بعمل خير كتير
فارس : يعنى مفيش فايدة يا شريفة
شريفة : انا داخلة اخد شور
فارس : يبقى انتِ اخترتى الطلاق يا شريفة (ومشى)
*_____________________________________________**___________________________*
فى شغل فارس ......
السكرتيرة : يا افندم الظرف ده جه لحضرتك
فارس باستغراب : ظرف !!!
السكرتيرة : اه ظرف
فارس : هو لسه فيه حد بيبعت جوابات احنا فى زمن التكنولوجيا
السكرتيرة : مانا كمان استغربت
فارس : هاتى لما نشوف فيه ايه الظرف ده
السكرتيرة : اتفضل يا افندم
فارس : اوكى اتفضلى انتِ
(. فتح فارس الظرف ولقى فيه ورقة واحدة ، عبارة عن عقد جواز عرفى بين شريفة ومؤمن من سنة .)
فارس : ايه ده !!!
(. فارس حاول يمسك اعصابه لكنه مقدرش وقرر يروح لـ شريفة تانى بس وهو فى طريقه لـ شريفة مكنش مصدق ان شريفة تعمل كده فـ راح لـ زياد .)
*_____________________________________________**___________________________*
فى ڤيلا عمر ابو الوفىٰ .......
(. فارس اول ما دخل وركن عربيته دخل الڤيلا وكان زياد واياد بيتغدوا .)
اياد : تعالى يا فارس اتفضل
فارس لـ زياد : هى وصلت بيك البجاحة وقلة الادب انك تعمل فى اختك كده
زياد : عملت ايه
فارس : اتفضل اقرأ (ورماله الورقة)
زياد (بعد ما قرأها) : هههههههه دى طلعت زى امها
فارس : احترم نفسك
اياد : هو فى ايه
زياد : خد اقرأ
فارس : انت ازاى تعمل فى اختك كده
زياد : انا معملتش حاجة ومعرفش حاجة عن العقد ده
فارس : مين الوحيد اللى له مصلحه فى فضيحة شريفة
زياد : فضيحة شريفة مش هتفدنى بحاجة
فارس : انت مش قولت انك هتساومها
زياد : ايوة حصل بس اديتكوا فرصة تقنعوها وبعدين انا معرفش اصلاً اى حاجة عن خطيب شريفة الاولانى
اياد : اهدى يا فارس ، زياد مش ممكن يعمل كده
فارس : امال مين اللى ممكن يعمل كده
زياد بصوت عالى : وليه ميكونش هى نفسها عملت كده زى امها
اياد : بس يا زياد
زياد : لا مش بس ، امها كانت متجوزه عرفى وكمان كانت حامل ولبست واحد تانى فى الحيط ليه متكونش عملت كده معاك
فارس : لما واحد يتكلم عن اخته يعنى عن شرفه وعرضه بالشكل ده يبقى مينفعش اتناقش معاه (ومشى)
اياد : ايه يا زياد اللى انت عملته ده
زياد : والله ما عملت كده مانا عارف ان فارس سايب البيت لـ شريفة هستفاد ايه يعنى لما ابعتله حاجة زى كده
اياد : بس مكنش ينفع تقول الكلام ده عن اختك
زياد : وانت تعرف منين ان شريفة متكونش عملت كده
اياد : عيب يا زياد تقول عن اختك كده
زياد : هو احنا نعرف عنها او عن تربيتها واخلاقها حاجة عشان يبقى عيب وارد جداً يكون ده حصل
اياد : فُكنا بقى من الموضوع ده
*_____________________________________________**___________________________*
فى ڤيلا شريفة .....
فارس : يا شريفة
شريفة : فى ايه يا فارس بتزعق كده ليه
فارس : ممكن افهم ايه المكتوب فى الورقة دى
شريفة (بعد ما قرأتها) : ايه الهبل ده !!
فارس : ده فى وجهة نظرك هبل
شريفة : انا متجوزتش عرفى لا مؤمن ولا غيره
فارس : امال ايه الورقة دى
شريفة : مزورة يا فارس هو فى ايه انت بتشك فيا
فارس : تفتكرى لما اشوف حاجة زى كده اعمل ايه
شريفة بزعيق : اعمل اى حاجة غير انك تشك فيا
فارس : تفتكرى مين له مصلحة يزور حاجة زى كده
شريفة : مش زياد هددنى انه يفضحنى
فارس : وهو زياد يعرف يجيب البيانات دى منين
شريفة : بالفلوس يجيب اى حاجة
فارس : انا روحت لـ زياد وقال انه معملش كده
شريفة : انت يعنى بتصدقه وبتكدبنى
فارس : زياد مالوش مصلحة يخلق مشكلة بيني وبينك لاننا already متخانقين
(. سكتت شريفة شوية وفكرت .)
شريفة : مؤمن
فارس : ماله
شريفة : مؤمن هو الوحيد اللى له مصلحة يوقع بينى وبينك وهو الوحيد اللى عارف بياناتى الحقيقة وبياناته
فارس : تعرفى عنوان مؤمن ده
شريفة : بتسأل ليه
فارس : عشان لو كان فعلاً زور حاجة زى كده اعرف اتصرف معاه
شريفة : اه اعرف عنوانه
فارس : هاتهولى بقى
شريفة : كتبت العنوان لـ فارس
فارس (وهو ماشى) : انا بقى هعرف ازاى اتصرف مع الاشكال دى
*_____________________________________________**___________________________*
فى بيت مديحة ......
(. فوزية صاحبة مديحة راحت تزورها .)
مديحة : يااااه يا فوزية وحشتيني اوى
فوزية : وانتِ كمان يا مديحة عامله ايه
مديحة : انا بخير الحمد لله انتِ جيتي من السفر امتى
فوزية : من يومين بس
مديحة : حمد الله على سلامتك
فوزية : الله يسلمك امال فين شريفة عايزة اسلم عليها ولا اتجوزت
مديحة : من ناحية اتجوزت فـ هى اتجوزت
فوزية : مش مؤمن ابن سميرة ، كلميها قوليلها ان احنا هنزورها
مديحة : لا مش مؤمن ده واحد تانى
فوزية : واحد تانى مين
مديحة : حكت لها قصة شريفة من اولها لاخرها
فوزية : ومزراتكيش من ساعتها
مديحة : ولا شوفتها من يومها لا من بعيد لبعيد
فوزية : وانتِ ازاى تقبلى بحاجه زى كده
مديحة : المشكلة ان انا عملت كده عشان اطمن عليها وعلى اساس ان الفلوس دى هتبقى نعمه بس بقت نقمه
فوزية : ليه بتقولى كده
مديحة : حكت لها موضوع الفلوس والورث واللى شريفة عملته واللى زياد عايز يعمله
فوزية : بس ده اخوها استحالة يأذيها
مديحة : لا ممكن طبعاً هما ملحقوش يبقى بينهم علاقة اخوه قوية تخليه يبقى عليها
فوزية : والله ما عارفة اقولك ايه ربنا معاها وبرضه اكيد جوزها مش هيسبها
مديحة : انا ندمانه اوى على اللى عملته ده حاسة ان انا اللى ضيعتها
فوزية : اللى مكتوب على العين لازم تشوفه العين
مديحة : ربنا يستر فكرت اروح اقولها ان عمر مش ابوها وانى كدبت عليها
فوزية : لا يا مديحة انتِ كده هتضيعها اكتر خصوصاً قدام اهل جوزها
مديحة : امال اعمل ايه
فوزية : ادعيلها يا مديحة وان شاء الله ربنا هيلهمها الطريق الصح
مديحة : ياارب
*_____________________________________________**___________________________*
تانى يوم فى احدى المخازن ....
(. فارس بعت ناس جابت مؤمن ، وخده فى مخزن وخلى الـ body guards تضربه علقة محترمه .)
فارس : ها بقى قولى الحقيقة اتجوزت شريفة عرفى
مؤمن : انت عايز منى ايه
فارس : جاوب
مؤمن : انا ماليش دعوة
فارس : ليه مش انت اللى بعتها
مؤمن : لا اكيد حد غيري
فارس : حد غيرك !! حد غيرك زورها ولا بعتها
مؤمن : دى مش مزورة
فارس : انت لسه عايز تضرب تانى بقى مشبعتش
مؤمن : انت فاكر انى هسكت على اللى عملته فيا
فارس : وانت فاكر انك تقدر تعمل معايا حاجة
بعد فترة من الصمت ......
فارس : حقيقية ولا مزورة
مؤمن : مزورة
فارس : انا كنت متأكد من كده بس لو مبعدتش عن شريفة انا هدفنك بالحيا
مؤمن : انا مقربتش منها
فارس : امال ده اسمه ايه على فكرة انا ممكن اسجنك بالورقة دى ، دى تهمة تزوير
فارس لـ body guards >> خدوه ارموه قدام بيته وخليك فاكر لو فكرت بس تقرب منها تبقى جنيت على نفسك
*_____________________________________________**___________________________*
بالليل فى ڤيلا عمر ابو الوفىٰ .......
اياد : انت رايح فين
زياد : مشوار
اياد : وايه لازمة السلاح فى المشوار اللى انت رايحه
زياد : مالكش دعوة
اياد : انت رايح لـ شريفة
زياد : قولتلك مالكش دعوة
اياد : اياك تعمل كده يا زياد
(. زياد مردش عليه ومشى وهو معاه اوراق وسلاح ، اياد طلع غير هدومه وخد عربيته وحاول يلحق زياد بس زياد كان سبقه بـ كتير .)
__**__**__**__**__
فى ڤيلا شريفة .....
(. الامن سمح لـ زياد بالدخول عشان هو اخو شريفة ودخل زياد وضرب الجرس بكل قوته وفتحتله الشغاله .)
زياد : يا شريفة يا شريفة
(. شريفة سمعت الصوت راحت عنده .)
شريفة : فى ايه بتزعق كده ليه
زياد : انا جاى اتكلم معاكى
شريفة : تعالى ندخل اوضة المكتب
(. دخلوا اوضة المكتب وقفلوا على نفسهم .)
شريفة : فى ايه ؟
زياد(طلع اوراق) : امضى هنا
شريفة : امضى على ايه
زياد : امضى على تنازل على الممتلكات اللى ابويا باعها ليكي
شريفة : انت اتجننت
زياد : امضى يا شريفة احسنلك
شريفة : ده حقى
زياد : انتِ عارفة كويس اوى انه مش حقك امضى
شريفة : مش همضى
زياد(خرج السلاح) : امضى يا شريفة
شريفة بارتباك : انت عايز تقتلنى
زياد : اه هقتلك لو ممضتيش
شريفة : انت اتجننت يا زياد انا اختك
زياد : تصدقى ضحكتينى ، انتِ اخر واحد تتكلمى عن الاخوة
شريفة : بس انا مفكرتش اقتلك
زياد : بس سرقتيني ودوستى على حقى ومعنديش مانع اقتلك
شريفة : هتقتلنى عشان الفلوس
زياد : امال انتِ بتعملى كل ده عشان ايه
(. اياد كان وصل ڤيلا شريفة ودخل وسأل الشغالة قالتله انهم فى المكتب ، دخل اياد لقى زياد رافع السلاح فى وش شريفة وشريفة واقفة قصاده مرعوبة .)
اياد : زياد
زياد : ابعد انت
اياد : هتودى نفسك فى داهية يا زياد
زياد : مالكش دعوة انت
اياد بزعيق : يا ابنى دى اختنا
زياد بزعيق : متكلمنيش عن الاخوة ، هتمضى ولا لا
شريفة : انتوا عاملين اللعبة دى عشان اخاف وامضى
زياد : اخلصى هتمضى ولا لا
شريفة (حست انها لعبه وانهم استحاله يقتلوها) : مش همضى
(. زياد اتعصب من جرأة شريفة وضغط على الزناد وطلعت طلقة من المسدس .................... .)
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق