الحلقة الحادية عشر
جزء من حلقة سابقة :
(. هنا موبايل محمود رن .)
محمود : الو . الحمد لله . انت عامل ايه . ايه انت بتقول ايه !!!!!!!
رجاء : فى ايه محمود
محمود : .......................
*_____________________________________________**___________________________*
محمود : تمام . خلاص ماشى فهمت . المهم انتوا بخير . متقلقش هتابع معاك اول باول . سلام
رجاء : مين يا محمود
محمود : ده كان فارس
رجاء : فى حاجة ولا ايه
محمود : عمر دخل المستشفى واتحجز وفارس مش عايز يقول لـ شريفة دوقتى فـ عايزنى اتابع الاخبار ولو حصل حاجة اكلمه
رجاء : طيب احنا لازم نروح نزوره
محمود : اكيد طبعاً ماهو فارس متصل عشان كده
رجاء : طيب هنزوره امتى
محمود : خير البر عاجله تعالى نروحله دلوقتى
رجاء : ماشى انا هقوم البس
*_____________________________________________**___________________________*
فى المستشفى ........
محمود : خير يا ولاد ايه اللى حصل
زياد : فجأة كده لقيناه مش قادر ياخد نفسه وبعدين اغمى عليه اتصلنا بالاسعاف على طول
رجاء : والدكتور قال ايه
اياد : دى الازمة القلبية جاتله تانى
محمود : طيب هو مكنش ينفع يعمل عملية
زياد : لا
رجاء : لا ازاى !! سفروه بره
اياد : لا يا طنط حالة بابا مينفعلهاش عملية لازم العلاج والراحة النفسية
محمود : طيب والدكتور قالكوا ايه
زياد : اتحجز فى العناية ربنا يستر
محمود : ان شاء الله خير
(. سابهم محمود وراح للدكتور وسأله عن حالة عمر وعرف ان الحالة سيئة جداً فقرر يتصل بـ فارس .)
فارس : ايوة
محمود : شريفة جنبك
فارس : اه
محمود : حالة ابوها سيئة جداً انا من رأيي تقولها وترجعوا عشان تشوفوه عشان لو لا قدر الله حصله حاجة
فارس : خلاص ماشى ربنا يسهل (وقفلوا)
__**__**__**__
(. رجع محمود لـ زياد واياد ورجاء .)
محمود : بصوا يا اولاد شريفة لحد دلوقتى متعرفش حاجة بخصوص تعب باباكوا
زياد : ماحنا مرضناش نقولها احنا كلمنا فارس
محمود : انا كلمت فارس وقولتله ينزلوا فى اقرب وقت عشان برضه تبقى جنبكوا
اياد : لا لا يا عمو خليهم ميجوش احنا كده هنكسر فرحتهم
رجاء : لا يا حبيبي خليهم يجوا وتبقى معاكوا وكمان عشان تطمن على باباها
محمود : فارس هيقولها بطريقة ما عشان متقلقش وهيجوا فى اقرب وقت
زياد : يجوا بالسلامه
*_____________________________________________**___________________________*
فـى هـاواى ......
(. شريفة وفارس على شواطئ هاواى .)
فارس : شيفة حبيبتى
شريفة : ايوة يا حبيبي
فارس : مزهقتيش
شريفة : ايه ده انت زهقت منى
فارس : لا يا روحى مقصدش انا قصدى مزهتيقش من المكان
شريفة : لا عادى انا مبسوطه
فارس : انا بقول ايه رأيك ننزل مصر اسبوعين كده نشوفهم ونقعد فى ڤيلتنا شوية وبعدين نسافر نتفسح فى اى حته تانية
شريفة : بس انا مبسوطه هنا
فارس : بس يا حبيبتى احنا ايه يحبسنا شهر بحاله هنا انا بقول كده احلى نسافر مصر اسبوعين وبعدين نروح اى بلد اوروبية تانية انتِ نفسك تروحيها
شريفة : انا نفسى الف العالم كله بس معاك انت
فارس : بحبك اوى
شريفة : ماشى
فارس : هو ايه ده اللى ماشى
شريفة : ماشى انك بتحبنى
فارس : ده انا بعشقك كلك على بعضك كده
شريفة : وانا بحبك اوى والله يا فارس ربنا ما يحرمنى منك
فارس : ولا يحرمنى منك يا روح قلبى
شريفة : ها هننزل مصر امتى
فارس : بعد بكرة كويس
شريفة : بس بشرط !!
فارس : انتِ توؤمرى يا حبيبة قلبى وانا انفذ
شريفة : نقعد فى مصر اسبوع واحد بس
فارس : ماشى اسبوع واحد
شريفة : ربنا يخليك ليا يا حبيبي
*_____________________________________________**___________________________*
فى بيت مؤمن ........
ايمان : ماما عايزة اوريلك حاجة
سميرة : حاجة ايه
ايمان : حاجة فى المجلة دى (وفتحتها)
سميرة : ايه ده مش فاهمه
ايمان : دى يا ماما مجلة اجتماعيه بتجيب اخبار رجال الاعمال والوزرا
سميرة : وعايزة توريني ايه
ايمان : شوفى كده بس العروسة دى وقوليلي رأيك فيها ايه
سميرة : ما شاء الله جميلة اوى (وبدأت تقرأ) حفل زفاف نجل الوزير السابق محمود ابو المجد على قرينة رجل الاعمال عمر الو الوفى
(اتفرجت على الصور) صورة لـ العروسين فارس وشريفة ، دى شريفة !!!!
ايمان : شوفتى بقى
سميرة : دى شريفة اللى كان مؤمن خطبها صح
ايمان : ايوة هى يا ماما
سميرة : انا معرفتهاش
ايمان : شوفى يا ماما الفستان اللى هى لبساه ولا فرحها والمشاهير اللى كانوا فيه
سميرة : انا عارفة انها اغتنت بس مكنتش اعرف انه للدرجة دى
ايمان : ده بيقولك انه كان معمول فى اكبر فندق فى شرم الشيخ وحضر الفرح كبار مشاهير الفن والسياسة والاعلام ورجال الاعمال
سميرة : ايوة بس برضه هى عملت فى نفسها ايه انا معرفتهاش
ايمان : يا ماما انتِ مش فاكرة ان مؤمن كان بيمنع شريفة تحط مكياج هى بقى حطت مكياج وصبغت شعرها
سميرة : بس ازاى واحد ابن ناس اوى كده يتجوز واحدة اتخلفت فى الحرام
ايمان : ممكن يكون ميعرفش الحقيقة وحتى لو يعرف عادى
سميرة : عادى !!
ايمان : ايوة يا ماما عادى الطبقات دى مبيفرقش معاها اوى
سميرة : طيب خبى المجلة دى قبل ما اخوكى يجي
ايمان : هو ميعرفش
سميرة : حتى لو يعرف مش لدرجة انه يشوف صورها خبيها خالص واوعى تخليه يشوفها
ايمان : حاضر يا ماما بس انتِ شوفتى اخوات شريفة
سميرة : فين هما
ايمان : اهم (وشاورت ع صورتهم)
سميرة : دول توأم
ايمان : اه واحد اسمه اياد والتانى زياد
سميرة : ما شاء الله عليهم زى القمر وفيهم شبه من شريفة
ايمان : اهاا فيهم شبه كبير من بعض
سميرة : طيب قومى بقى عيني المجلة دى
ايمان : حاضر
*_____________________________________________**___________________________*
بعد كام يوم ......
(. شريفة وفارس رجعوا من هاواى على ڤيلتهم فى التجمع الخامس .)
فارس : حمد الله على السلامه يا حبيبتى نورتى بيكي
شريفة : الله يسلمك يا روح قلبى
فارس : انا جايبلك هدية بمناسبة رجوعنا بالسلامه
شريفة : هدية !! يا حبيبي احنا من يوم ما اعرفنا بعض وانت مغرقنى هدايا
فارس : مش خسارة فيكي ومفيش اى حاجة تغلى عليكي
شريفة : اقولك حاجة غريبة شوية
فارس : قولى
شريفة : انا فى يوم من الايام حبيت مؤمن اوى كان ممكن اسيب الدنيا كلها عشانه اضحى باى حاجة ، كنت فاكرة انى وصلت لاقصى درجات الحب بس لما حبيتك اكتشفت انى محبتش قبلك حاسة ان قلبى اول مرة يدق
فارس : بجد يا شريفة بتحبينى اوى كده
شريفة : فوق ما تتصور يا فارس
فارس : انا بقى حبيتك بسرعه اوى اوى اوى اوى رغم انى عرفت بنات كتيرة جداً وكنت تقريباً برتبط كل شهر بواحدة تانية بس اول ما شوفتك حبيتك
شريفة : طيب ليه بقى حبيتى رغم انى اكيد مش اجمل واحدة انت عرفتها
فارس : بس الوحيدة لما شوفتها وقربت منها وعرفتها اكتر اتمنيت انى اكمل معاها عمرى كله
شريفة : بحبك
فارس : بموت فيكي (وطلع علبه من جيبه وفتحها) ايه رأيك
شريفة : حبيبى مش دى السلسلة الالماظ اللى كان عليها اسمى
فارس : هههههه سرقتك انا مثلاً
شريفة : لا يا حبيبي مقصدش بس شبها خالص
فارس : ركزى يا شيفة يا حبيبتى هى شبها فعلاً بس عليها اسمين مش اسم واحد اسمى واسمك
شريفة : اهاا صح تصدق مخدتش بالى
فارس : اكيد مخدتهوش عشان هو معايا
شريفة : جميلة اوى يا حبيبي تسلملي
فارس : ربنا يخليكي ليا يا شيفة عشان افضل مبسوط على طول ، بتهيألى طول مانتِ جنبى عمرى ما هزعل
شريفة : انا عمرى ما هزعلك اصلاً
فارس : ربنا يخليكي ليا تعالى بقى نروح نتغدى عشان فى مشوار مهم لازم نعمله
شريفة : مشوار فين
فارس : هنزور اهلى واهلك
شريفة : اوكى
(. اتغدى شريفة وفارس وغيروا هدومهم وراحوا زاروا اهل فارس الاول قعدوا عندهم شوية وبعدين خرجوا من عندهم والمفروض انهم رايحين ڤيلا اهل شريفة بس فارس كان واخدها على المستشفى .)
شريفة : حبيبي ده مش طريقنا احنا رايحين فين كده
فارس : مشوار
شريفة : مش هنروح لـ بابا واخواتى انا مرضتش اكلمهم عشان اعملهالهم مفاجأة
(. ركن فارس العربية على جنب الطريق وقرر يعرفها قبل ما يروحوا .)
شريفة : فى ايه ركنت ليه
فارس : بصى يا حبيبتى انا عايز اقولك حاجة بس اوعديني الاول انك تاخديها ببساطه
شريفة : فى ايه يا فارس متقلقنيش
فارس : باباكى محجوز فى المستشفى وتعبان شوية
شريفة بقلق : بابا فى المستشفى !!! من امتى وحصله ايه !!
فارس : من حوالى اسبوع انا عارف من لما كنا فى هاواى بس مرضتش اقلقك
شريفة : حصله ايه يا فارس
فارس : انتِ متعرفيش ان باباكى مريض قلب
شريفة : بس عارفة انه بيبقى كويس على العلاج ولو فضلت حالته النفسية كويسة
فارس : انا اللى اعرفه ان الازمة جاتله
شريفة : طيب يا فارس خدنى عنده والنبى
فارس : حاضر يا حبيبتى (وطلع بالعربية)
(. راحت شريفة المستشفى وطلبت من الدكتور تشوفه ودخلها وفضلت قاعده جنبه شوية وبعدها خرجت وعرفوا ان حالته سيئة جداً ووجودها مالوش لزوم فـ روحت مع جوزها على انها تجيله الصبح وفضلت تعمل كده كل يوم .)
*_____________________________________________**___________________________*
بعد مرور اسبوع .........
- مديحة راحت زارت عمر مرتين بس متصادفتش مع شريفة فى ولا مرة
- شريفة بتروح المستشفى الضهر وترجع على بالليل
- اياد وزياد ما بين الشغل والمستشفى
- فارس ما بين شغله وما بين شريفة
*_____________________________________________**___________________________*
فى المستشفى ......
(. شريفة كانت لسه رايحة لابوها والدكتور قابلها .)
شريفة : صباح الخير يا دكتور
الدكتور : صباح النور
شريفة : اخبار بابا ايه
الدكتور : البقاء لله
شريفة : ايه !! مات
الدكتور : انا اسف بس ارادة ربنا فوق كل شئ
(. شريفة كانت مصدومة تماماً لدرجة انها معيطتش وشافت اقرب كرسى قعدت عليه وطلعت موبايلها وكلمت جوزها واخواتها عرفتهم ان ابوها مات. ولازم يجوا دلوقتى ، شريفة كان نفسها تدخل تشوفه بس مقدرتش وقررت تستنى لحد ما تدخل مع اخواتها .)
جه اياد وزياد ......
اياد : مين اللى قالك الكلام ده
شريفة : الدكتور
زياد : مات امتى احنا كنا معاه طول الليل
شريفة : انا عايزة اشوفه ممكن
اياد : تعالى يا شريفة
(. ودخلوا شافوه كلهم وبدأت اجراءات الغُسل فى المستشفى ، شريفة برضه معيطتش وكلامها بارد وقليل ، زياد واياد بيحاولوا يتماسكوا .)
هنا جه فارس .........
(. شريفة اول ما شافته رمت نفسها فى حضنه ومقدرتش تقف على رجليها وانفجرت فى العياط وكانها كانت مستنيه فارس .)
شريفة بدموع : ابويا مات يا فارس ابويا مات
فارس : ربنا يرحمه
شريفة : انا ملحقتش اعيش معاه يا فارس ملحقتش اشبع منه ، انا اتيتمت مرتين يا فارس مرتين مش قادرة
(. فارس مكنش بيتكلم هو كان بيطبطب عليها وبيحضنها وسابها تقول كل اللى فى نفسها .)
شريفة : انا حبيته اوى يا فارس معشتش معاه كتير بس حبيته واتعلقت بيه اوى
فارس : اهدى يا شريفة وادعيله
شريفة : ياااارب ارحمه وسامحنى لو كنت قصرت فيه ولا قسيت عليه
__**__**__
(. فى الجهة التانية زياد دخل الحمام واتأخر فـ اياد قلق عليه وراح يشوفه ، دخل اياد ورن على موبايل زياد عشان يعرف هو فين ، ولما سمع الصوت خبط عليه مردش بس لقى الباب مش مقفول من جوه ففتحه ولقى زياد قاعد على الارض وحاطط راسه بين رجله وبيعيط .)
اياد : زياد انت بتعمل
زياد بدموع : مش قادر اتماسك اكتر من كده
اياد(قعدجنبه وجنبه) : يا واد انا كنت بقول انت اللى هتقويني
زياد : مش قادر يا اياد ، مش عارف اتخيل حياتنا من غيره
اياد (دموعه نزلت منه) : والله استريح مانت عارف هو كان تعبان قد ايه
زياد : احنا برضه قصرنا معاه تفتكر ابوك زعلان مننا
اياد : بس يا زياد الكلام ده
زياد : انا اول مرة احس ان امك ماتت فعلاً ، اول مرة احس يعنى ايه يتيم
(. اياد مش لاقى حاجة يقولها بس دموعه نزلت منه .)
زياد : حاسس ان ضهرنا اتكسر يا اياد ، حاسس ان احنا من غير ابوك اتعرينا
اياد : كفاية يا زياد قوم اغسل وشك قوم خلينا نتوضى ونصلى ركعتين
زياد : مش قادر اقوم
اياد بزعيق وبيشده : قوم يا زياد قوم
(. قام زياد واياد اتوضوا وصلوا فى مسجد المستشفى .)
(. تمت اجراءات الغُسل واتكفن وفضل فى تلاجة المستشفى ، اتعمل نعى فى الجرايد واتعمل عزا كبير فى عمر مكرم حضره كبار رجال ونساء البلد .)
*_____________________________________________**___________________________*
بعد مرور اسبوع ......
- شريفة حابسة نفسها فى اوضتها مبتشوفش حد
- زياد لسه فى حالة اكتئاب ومبيخرجش من البيت
- اياد بيحاول يضغط على نفسه ويتماسك وبيتابع الشغل
__**__**__**__
فى ڤيلا فارس وشريفة ........
(. شريفة حابسة نفسها فى اوضتها مبتاكلش ولا بتقابل حد .)
(. الشغالة خارجة من اوضة شريفة بـ الاكل زى ماهو .)
فارس : مكلتش برضه
الشغالة : لا
فارس : اوكى (ودخلها)
فارس لـ شريفة : انتِ كده هتموتى من قلة الاكل
شريفة : متضغطش عليا يا فارس لو سمحت
فارس : يا شريفة انتِ بقالك اسبوع مبتاكليش اى حاجة الا اذا ضغطت عليكي
شريفة : ماليش نفس يا فارس ، ١٠٠ مرة اقولك ماليش نفس
فارس : مش عايز يبقالك نفس عايزك تاكلى فوقى بقى انتِ كده هتموتى
شريفة : يووووه بقى انا قايمة وسيبالك المكان
فارس بدأ يهدى : خلاص يا شريفة بس يا حبيبتى انا خايف عليكي
شريفة : وانا موجوعه اوى اوى يا فارس (وعيطت)
فارس حضنها : طيب اهدى اهدى يا حبيبتى
شريفة : انا زعلت على بابا مصطفى اوى بس زعلى المرة دى اكبر لاحساسى انى قصرت معاه وحرمته منى كل السنين دى ، عمرك شوفت حد له ابين ويتتم مرتين
فارس : بس انتِ مقصرتيش انتِ لما عرفتى انه باباكى جيتيله وعشتى معاه
شريفة : بس بعد ما كدبته وبعد ما اهنته
فارس : معلش يا حبيبتى كلنا معرضين للخطأ
شريفة : يارتنى ما كنت سافرت وسيبته يارتنى ما كنت سافرت كان زمانى شوفته واتكلمت معاه اليومين اللى عاشهم
فارس : معلش يا حبيبتى نصيب
(. فضلت شريفة تتكلم فى حضن فى فارس لحد ما راحت فى النوم .)
*_____________________________________________**___________________________*
فى ڤيلا عمر ابو الوفىٰ ......
اياد : انت هتفضل حابس نفسك كده كتير
زياد : عايز ايه يا اياد
اياد : عايزك تفوق بقى من الحالة دى ولو فعلاً عايز ترضى ابوك قوم شيل الشغل معايا
زياد : يا ابنى افهم بقى انا نفسيتى زفت فكك منى بقى
اياد : مش هتنيل افكنى منك انت كده ممكن تموت من الاكتئاب
زياد : مالكش دعوة بيا
اياد : هو انت اول ولا اخر واحد ابوه يموت
زياد بزعيق : عايز ايه منى
اياد : قوم احلق دقنك دى واغسل وشك والبس اى حاجة المحامى زمانه جاى
زياد : محامى ليه !!
اياد : عشان اعلان الوراثة
زياد : وشريفة جاية
اياد : كلمتها وفى نفس الحالة الزفت دى بس فارس قالى شوفوا انتوا هتعملوا ايه وهى لما تبقى كويسة هتجى
زياد : وهو ينفع نعمل اعلان وراثة من غير شريفة
اياد : ده مجرد حصر لاملاك ابوك
زياد : طيب فكك منى انا اعمل اللى انت عاوزه
اياد : انا نازل استنى المحامى تكون نزلت انت كمان وافتح الاوضة ريحتها وحشة من السجاير
زياد : اطلع بره يا اياد
(. مرضاش زياد يخرج واتصل اياد بالمحامى لغى المعاد .)
*_____________________________________________**___________________________*
بعد اسبوع فى ڤيلا شريفة .......
(. اياد خد زياد والمحامى ورواحوا لـ شريفة عشان يشوفوها والمحامى يقول حصر لاملاك ابوهم عشان يبدأوا فى اجراءات الوراثة .)
(. زياد اول ما شاف شريفة حضنها وفضلوا يعيطوا شوية وسكتوا .)
اياد : اخبارك ايه يا شريفة
شريفة : كويسة
فارس : دى اول مرة تخرج من الاوضة النهاردة
اياد : زياد برضه اول يوم النهاردة
شريفة : ربنا يرحمه ويصبرنا
اياد : المحامى قاعد بره مستنى
شريفة : محامى ليه !!
اياد : عشان نعمل حصر لاملاك بابا الله يرحمه
شريفة : حصر !! مش فاهمه
فارس : هو يقصد يا حبيبتى ان هو عايز المحامى يقول كل املاك باباكى قبل اعلان الوراثة عشان كل حاجة تبقى قدامكوا
شريفة : مش هنختلف يا اياد
(. وخرجوا لـ المحامى .)
__**__**__**__
(. قال المحامى كل املاك عمر ابو الوفى .)
اياد : دكتور احمد الاملاك دى ناقصة كتير
احمد : لا دى الاملاك اللى باسم عمر بيه الله يرحمه كلها
زياد : حضرتك بتكلم ولاده يعنى احنا عارفين كل ممتلكاته بس حابين نعملها حصر
احمد : طيب انا مجبتش حاجة من عندى دى كلها اوراق ومستندات وملكيات
اياد : بس ده نص ممتلكات ابويا
احمد : ماهو النص التانى اتباع
زياد واياد : نعم !! اتباع
احمد : ايوة عمر بيه الله يرحمه باع نص ممتلكاته لـ شريفة عمر ابو الوفىٰ اختكم
زياد واياد باستغراب : شريفة !!!!!
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق