الحلقة الرابعة عشر
جزء من حلقة سابقة :
شريفة : انتوا عاملين اللعبة دى عشان اخاف وامضى
زياد : اخلصى هتمضى ولا لا
شريفة (حست انها لعبه وانهم استحاله يقتلوها) : مش همضى
*_____________________________________________**___________________________*
(. زياد اتعصب من جرأة شريفة وضغط على الزناد وطلعت طلقة من المسدس بس اياد جرى على شريفة وخدها فى حضنه ووقع بيها على الارض والطلقة جت فى الهوا ، اياد قام من على الارض وخد المسدس من زياد .)
اياد : انت اتجننت
زياد : انت مالك انت
اياد : عايز تموتها وتودى نفسك فى داهية
زياد : وهو فى داهية اكبر من اللى احنا فيها دى
اياد : مش على اخر الزمن هنموت بعض عشان الفلوس
زياد لـ شريفة >> المرة دى اتكتبلك عمر جديد ، فلتى من ايدي بس المرة الجاية مش هتلاقى اياد يلحقك (ومشى)
اياد لـ شريفة >> شريفة انتِ كويسة
شريفة : انتوا عاملين اللعبة دى عليا
اياد : والله معملناش اى حاجة زياد فعلاً كان جاى وناوى يقتلك
شريفة : انا مش هسكت انا هبلغ عنه وهعمله قضية شروع فى قتل
اياد : حصل خير يا شريفة
شريفة : والله لابلغ عنه واوديه فى داهية
اياد : فين الشهود
شريفة : وانت بتعمل ايه
اياد : انتِ عيزانى اودى اخويا فى داهية
شريفة : ده كان هيموتنى
اياد : وانا جيت ولحقته ولحقتك عشان انتِ متموتيش وعشان هو ميروحش فى داهية ، مالك يا شريفة انتِ كويسة !!
شريفة : مش عارفة بطنى وجعانى
اياد : يمكن من الوقعة قومى اطلعى اوضتك استريحي شوية وفكرى يا شريفة كويس
شريفة : قول لـ زياد ان بعد اللى حصل ده انا تمسكت بحقى اكتر ومش هتنازل عن حاجة
اياد : مش وقته الكلام ده قومى استريحي وانا هروح (ومشى)
شريفة لنفسها >> ماشى يا زياد لما اشوف انا ولا انت !! انا ترفع عليا السلاح وتحاول تقتلنى ماشى هتشوف هعمل فيك ايه
(. طلعت شريفة اوضتها خدت دش واتصلت بـ فارس .)
شريفة : اذيك يا فارس
فارس : الحمد لله انتِ عامله ايه
شريفة : وحشتنى اوى يا فارس
فارس ساكت
شريفة : موحشتكش ؟
فارس : انتِ كويسة
شريفة : انا تعبانه اوى من غيرك يا فارس
فارس : معلش بكرة تتعودى واكيد الفلوس هتعوضك عن غيابى وعنى انا شخصياً
شريفة : مفيش حاجة تقدر تعوضنى عنك
فارس : معلش هتتعودى
شريفة : انت ازاى قاسى كده يا فارس
فارس : خدى بالك على نفسك وابقى طمنيني عليكي
شريفة : يعنى خلاص كده
فارس : عارفة يا شريفة انتِ حتى لو رجعتى الفلوس مش هرجعلك
شريفة : ليه يا فارس
فارس : عشان انتِ فضلتى الفلوس عليا
شريفة : انا هونت عليك للدرجة دى
فارس : شوفى انتِ هتبقى فاضية امتى عشان نخلص اجراءات الطلاق
شريفة : انا بحبك
فارس : تصبحى على خير (وقفل)
شريفة لنفسها >> اخص عليك يا فارس للدرجة دى هونت عليك
*_____________________________________________**___________________________*
فى ڤيلا عمر ابو الوفى .....
اياد : ايه اللى انت عملته ده
زياد : قصدك ايه اللى انت هببته ده
اياد : انا ولا انت
زياد : انت طبعاً ، انت جيتك خلت شريفة تبقى اقوى وتحس انها لعبة واننا مش هنأذيها
اياد : يا زياد انت كان ممكن تودى نفسك فى داهية
زياد : المهم انها متاخدش الفلوس دى
اياد : القاتل لا يرث
زياد : نعم !!
اياد : نعم الله عليك ، انت لو كنت قتلت شريفة مكنتش هتاخد ولا مليم
زياد : انا مكنتش رايح اقتلها على فكرة انا كنت رايح اهددها
اياد : وليه ضربت نار
زياد : برودها وجرأتها استفذونى
اياد : احمد ربنا بقى انى جيت فى الوقت المناسب
زياد : شريفة عايزة خطه محترمه تخليها ترجع الفلوس ورجلها فوق رقبتها
اياد : بطل بقى خطط فاشلة
زياد : ماشى يا اياد بس برضه مش هسيب شريفة تتهنى بيهم يوم واحد
*_____________________________________________**___________________________*
بعد مرور شهر ......
- فارس مبيزورش شريفة ومبيردش على مكالماتها الا نادراً
- شريفة بتحاول مع فارس بس هو خد موقف منها وبقت بتنزل الشركة تتابع الشغل واملاكها
- زياد بيحاول يعمل لـ شريفة مشاكل
- اياد بيحاول مع شريفة انها ترجع الفلوس وبيحاول يبعد زياد عنها
- شريفة وفارس بيحاولوا ميفتحوش سيرة الطلاق عشان هما من جواهم مش عايزينه يتم
*_____________________________________________**___________________________*
الصبح فى ڤيلا محمود ابو المجد ....
فارس : صباح الخير يا ماما
رجاء : صباح النور بس ايه البوز ده
فارس : عادى مقريف شوية
رجاء : اكيد شريفة وحشتك هى هتجى امتى
فارس : انا هطلق شريفة
رجاء : ليه ؟
فارس : مش مُتفقين سوا فى خلافات كتير اوى وزهقنا
رجاء : بس ده عادى يا فارس لازم تاخدوا اول سنه تخبيط فى بعض
فارس : فى حاجات يا ماما بتبان من اولها
رجاء : بس انت بتحبها اوى
فارس : الحب مش كل حاجة عشان الجواز يكمل
رجاء : وشريفة وافقت بالسهولة دى
فارس : ده اختيارنا
رجاء : انت عشان كده سايب لها البيت
فارس : اه
رجاء : بس دى ڤيلتك انت ولا انت كتبتها لـ شريفة
فارس : لا مكتبتهاش ولا حاجة وبعدين شريفة مش محتجاها انا بس مكنش ينفع اقعد معاها
رجاء : هو الموضوع كبير اوى كده
فارس : المشكلة ان شريفة حامل
رجاء : حامل !!
فارس : اه وحاسس ان الانفصال هيبقى صعب عليا
رجاء : عيدوا التفكير والحسابات فى الموضوع ده ، فى بيبي بينكم جاى فى السكة
فارس : ربنا يسهل
رجاء : متفرطش فى ابنك بالسهولة دى يا فارس اكيد هو يستحق انك تستحمل او على الاقل تفكر تانى
فارس : والله بفكر يا ماما
رجاء : ربنا يهديك انت وشريفة لبعض
فارس : يارب
*_____________________________________________**___________________________*
فى ڤيلا شريفة ......
(. شريفة صحيت من نومها لقيت دم كتير على السرير ، قامت خدت دش وغيرت هدومها وراحت للدكتور .)
__**__**__**__
فى عيادة الدكتور .....
الدكتور : حضرتك متجوزة ولا انسة
شريفة : متجوزه
الدكتور : معاكى اولاد
شريفة : لا
الدكتور : متجوزه من قد ايه
شريفة : مش كتير حوالى اربع شهور
الدكتور : حصل حمل يا شريفة ولا لا
شريفة : لا
الدكتور : طيب انا محتاج تحاليل وفحوصات معينه هكتب لحضرتك عليها
شريفة : خير يا دكتور انا فيا ايه
الدكتور : ان شاء الله خير انا مقدرش احكم على اى حاجة الا اذا عملتى التحاليل
شريفة : حضرتك طيب شاكك فى ايه
الدكتور : اعملى التحاليل النهاردة وان شاء الله على بعد بكرة تجيلي ونشوف فيها اي
شريفة : اوكى يا دكتور متشكرة
(. خدت شريفة ورقة التحاليل من الدكتور وراحت على المعمل على طول حللت وعملت فحوصات الدكتور قالها عليها وقالوا ان النتيجة هتظهر تانى يوم .)
*_____________________________________________**___________________________*
فى ڤيلا عمر ابو الوفىٰ ......
زياد : اياد كنت عايز اتكلم معاك فى موضوع
اياد : خير يا زوز
زياد : انا مسافر
اياد : مسافر فين
زياد : امريكا
اياد : ليه
زياد : هعيش هناك
اياد : تعيش هناك !! ليه
زياد : عادى يعنى اتخنقت من هنا
اياد : طيب وانا هتسبنى
زياد : والله انت ممكن تبيع كل حاجة هنا وتعالى نعيش هناك واحنا كده كده معانا الجنسية
اياد : وليه الغربة دى
زياد : انا هنا حاسس بغربة ومخنوق
اياد : طيب ما تسافر تغيير جو وترجع تانى
زياد : انا هسافر يا اياد ومش هرجع تانى
اياد : انا مش هعرف اقعد هنا من غيرك وفى نفس مش عايز اسافر
زياد : وانا برضه صعب عليا اعيش فى مكان انت مش فيه بس بجد انا اتخنقت من العيشة هنا
اياد : طيب خلينا نسافر اجازة مؤقته يمكن متحتجش تفضل هناك
زياد : هتسافر معايا
اياد : لا سافر انت غير جو واتبسط وانا لو عرفت اظبط امور الشغل هجيلك
زياد : ماشى
اياد : هتسافر امتى
زياد : يومين تلاته كده لسه هشوف
اياد : تروح وترجع بالسلامه
*_____________________________________________**___________________________*
فى ڤيلا شريفة ......
(. شريفة قاعدة فى جنينة الڤيلا بتفكر فى فارس وقد ايه وحشها ونفسها تكلمها ، زياد اخوها جه عليها وهى سرحانه .)
شريفة : يا ترى المرة دى جاي بـ سلاح برضه
زياد : لا انا جاى اتكلم معاكى شوية
شريفة : زياد انا فيا اللى مكفيني ومش قادرة اتكلم
زياد : معلش اصل انا مسافر ويمكن دى تبقى اخر مرة نشوف بعض
شريفة : اتفضل
زياد : انا يوم ما فكرت فى الفلوس مكنش غرضى الفلوس قد ما كان غرضى انى انتقم منك مش كرهاً فيكي لا بالعكس انا حبيتك جداً بس عشان انتِ ناكرة للجميل
شريفة : امممم كمل
زياد : انا واياد وبابا الله يرحمه كنا بنعاملك احسن معامله وعوضناكى عن الحرمان اللى عشتيه ، لما اياد قرر يعمل جرد للثروة عشان نعرف احنا عندنا ايه كنا متوقعين انك مش هتاخدى حاجة
شريفة : كنتوا متوقعين انى هتنازل عن حقى صح
زياد : حتى لو كنتى تنازلتى مكناش هناكل حقك زى مانتِ عملتى بس كنا متوقعين احنا التلاته واحد وانك هتقولى فلوسى هى فلوسكوا لكن متوقعناش اللى انتِ عملتيه ده
شريفة : بس مفكرتش اقتلك
زياد : وانا مكنتش جاى اقتلك انا كنت جاى اهددك مش اكتر بس انتِ استفذتيني
شريفة : انت بقى جاى تستعطفنى ، يعنى القتل والمشاكل مجبتش نتيجة فـ جاى تحسسنى بالذنب فـ ارجعلك الفلوس
زياد : توء ، انا مش جاى عشان عايز فلوس لانى مبقتش عايز فلوس بس جاى اقولك حاجة واحدة
شريفة : اتفضل
زياد : لو كنتى كلتى حقنا ودوستى علينا انا عن نفسى مش مسامحك وبدعى ربنا دايماً ان الفلوس دى تبقى نقمة عليكي وتبقى سبب فى دمار حياتك (ومشى)
*_____________________________________________**___________________________*
بعد يومين فى احدى عيادات النساء والتوليد .......
(. شريفة دخلت للدكتور وفحص التحاليل والفحوصات بكل عناية ودقة .)
شريفة : خير يا دكتور ايه الاخبار
الدكتور : متقلقيش كل حاجة خير من عند ربنا
شريفة : حضرتك قلقتنى اكتر
الدكتور : انا هتكلم معاكى بصراحة
شريفة : ياريت
الدكتور : انتِ عندك بوادر ورم فى الرحم
شريفة بقلق : سرطان !!!!
الدكتور : هى مجرد جذور لـ الورم ، بس غالباً فى سنك ده بيبقى حميد
شريفة : انا مش هينفع اخلف
الدكتور : بصى احنا هناخد عينه من الرحم نشوف الورم حميد ولا خبيث بس فى كل الاحوال انا عند اقتراح
شريفة : اقتراح ايه
الدكتور : حتى لو الجذور دى حميدة مع الوقت بتتحول لـ ورم خبيث فـ انا بقترح اننا نشيل الرحم قبل ما يتطور
شريفة : يعنى انا مش هينفع اخلف !!
الدكتور : لا ينفع بس لازم فى خلال سنة ونص ، سنتين بالكتير نكون شايلين الرحم
شريفة : طيب هو لو حميد نشيل الرحم ده
الدكتور : هو ده الصح ، الحميد ممكن يتحول لـ خبيث
شريفة بلهفة ودموع محبوسة : لا يا دكتور انا هنتظم بالعلاج وهاخد بالى من نفسى انا ممكن اسافر بره
الدكتور : يا بنتى انا مقدر موقفك وحاسس بيكي بس مش اكيد ان العلاج يجيب نتجيه ويقضى على الورم
شريفة : طيب افرض محصلش حمل قبل سنة ونص او سنتين زى ما حضرتك قولت
الدكتور : ماحنا لازم نعمل خطوة مهمة
شريفة : ايه هى
الدكتور : هنعمل تحاليل ليكي ولـ جوزك ونشوف اصلاً ينفع تخلفوا ولا لا عشان منضيعش وقت
شريفة : اوكى
الدكتور : انا هكتبلك التحاليل المطلوبة ليكي ولـ جوزك وان شاء الله تعملوها وتيجوا
شريفة : ان شاء الله
*_____________________________________________**___________________________*
فى شغل فارس ........
(. شريفة خرجت من العيادة وراحت لـ فارس شغله عشان تعرفه بـ كلام الدكتور ، فارس اول ما شاف شريفة فرح جداً وفى نفس الوقت اتخض لان شكلها كان متغير خالص .)
فارس : شريفة انتِ كويسة
شريفة : لا يا فارس مش كويسة (وحضنته وعيطت)
فارس : مالك يا شريفة
شريفة بدموع : انا عندى سرطان يا فارس
فارس بقلق : عندك ايه !!!!!
شريفة : عندى بوادر ورم فى الرحم والدكتور توقع انه حميد بس بيقول لازم الرحم يتشال
فارس : طيب يا حبيبتى انتِ تكملى الحمل وبعدين تشليه
(. شريفة عيطت بـ حرقة .)
فارس : فى ايه يا شريفة
شريفة : انا مش حامل اصلاً يا فارس
فارس باستغراب : مش ايه !! مش حامل !!
شريفة : انا قولتلك كده عشان ترجعلى
فارس : يعنى مفيش حمل خالص
شريفة : بس فى امل اخلف الدكتور بيقول انى ممكن اخلف فى مده اقصاها سنتين
فارس مصدوم ومش عارف يتكلم
شريفة : انا محتجالك اوى يا فارس (وحضنته وفارس بعدها عنه)
فارس : انا مش مصدقك
شريفة : يا فارس انا كدبت عليك عشان ترجعلى كنت مضطرة
فارس : ومنين جالى انك مبتكدبيش دلوقتى عشان برضه ارجعلك
شريفة : هكدب فى المرض !!!!!
فارس : انا بقيت متوقع منك اى حاجة
شريفة : والله دلوقتى ما بكدب فعلاً الدكتور قالى كده
فارس : وانا مطلوب منى ايه
شريفة : نروح نحلل نشوف احنا بنخلف ولا لا ، ونرجع لبعض عشان اخلف
فارس : يعنى الاول فضلتى الفلوس عليا ودلوقتى راجعه عشان اكون وصله او كوبرى انك تخلفى
شريفة : انا مراتك يا فارس
فارس : انا مش مصدق يا شريفة الفيلم ده كله
شريفة : فيلم !!
فارس : اه فيلم ، زى فيلم انا حامل ويرضيك ابنك يتربى بعيد عنك مش ده كان كلامك
شريفة : وانا اللى كنت فاكرة انك هتقف جنبى
فارس : عادى انا افتكرت حاجات كتير بس طلعت كلها اوهام
شريفة : اخص عليك يا فارس بجد اخص وعموماً دى التحاليل بتاعتى لو حبيت تتأكد (ومشيت)
*_____________________________________________**___________________________*
فى ڤيلا شريفة .....
(. شريفة قاعدة فى جنينة الڤيلا وسرحانه جداً ودموعها بتنزل منها غصب عنها .)
شريفة >> ليه كده بس يارب تحرمنى من الحاجة الوحيدة اللى اى بنت بتستناها ، ليه يارب بتحرمنى انى اكون ام ، يعنى اخد كل حاجة واتحرم من احلى حاجة فى الدنيا ، ربنا يهديك يا فارس وتصدقنى وتعرف انى مبكدبش ، يارب انا نفسى اكون ام
(. شريفة افتكرت اخر كلام بينها وبين زياد وحاسة ان دعوته استجابت .)
شريفة >> يعنى انت يا زياد كنت بتدعى عليا وابواب السما مفتوحة ، لا لا طالما دعوته استجابت يبقى هو فعلاً مظلوم وانا ظلمتهم ، لا انا مظلمتش حد انا خدت حقى ده حقى انا
*_____________________________________________**___________________________*
بعد كام يوم ......
(. شريفة حاسة بالوحدة جداً ، من ساعة ما كانت عند فارس مكلمهاش خالص ولا حتى بيرد عليها ، مفيش حد حد بيزورها ولا بيسأل عليها .)
شريفة اتصلت بـ اياد ....
شريفة : اذيك يا اياد
اياد : كويس وانتِ
شريفة : انت فين يا اياد مبقتش بتسأل عليا
اياد : وانت محتجانى فى حاجة
شريفة : احنا اخوات يا اياد وماليش حد غيرك
اياد : لا طبعاً انا ماليش لازمة فى حياتك لا انا ولا غيري ربنا يخليلك الفلوس
شريفة : الفلوس عمرها ما هتعوضنى عنك
اياد : انتِ عايزة ايه يا شريفة
شريفة : انا اختك يا اياد ازاى تتخلى عنى كده
اياد : يا شريفة انتِ اللى اتخليتي وانتِ اللى دوستى على الاخوة
شريفة : يا اياد ده كان حقى انا مغلطتش
اياد : طيب يا شريفة اشبعى بيه بس متجيس تقولى ان احنا اخوات
شريفة : بس احنا اخوات
اياد : لا يا شريفة مش اخوات انتِ دوستى على الاخوة وانا وزياد طلعناكى من حساباتنا خالص
شريفة : يعنى ايه طلعتونى من حسابتكوا
اياد : يعنى اعتبرينا مش موجودين
شريفة : ازاى يعنى
اياد : هو كده انتِ اخترتى الفلوس اشبعى بيها و خليها تنفعك بقى ، معلش انا مضطر اقفل سلام (وقفل)
*_____________________________________________**___________________________*
(. شريفة الدنيا ضاقت عليها وافتكرت امها فـ قررت تروح تزورها ، شريفة كانت لسه مُحتفظة بـ مفتاح الشقة ، راحت تزورها وهى مترددة وخايفة من رد فعل امها بس كانت متأكده ان اكيد امها هتسامحها ، ضربت شريفة الجرس كتير بس محدش فتح فـ فتحت هى بالمفتاح ودخلت الشقة و........................... .)
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق