الحلقة التاسعة
جزء من حلقة سابقة :
شريفة : قولولى بقى ايه المفاجأة
اياد : بصى كده من البلكونة
*_____________________________________________**___________________________*
(. بصت شريفة من بلكونة اوضتها ولقيت ناس كتير فى جنينة الڤيلا.)
شريفة : ايه الناس دى كلها
اياد : الناس دى تبقى معارفنا واصحابنا وقرايبنا عزمناهم بمناسبة عيد ميلادك
شريفة : ايه ده صحيح انا النهاردة عيد ميلادى
زياد : كل سنة وانتِ طيبة يا شيفة (وادالها مفاتيح عربية)
شريفة : مفاتيح ايه دى ؟
اياد : مفاتيح عربيتك الجديدة
شريفة : عربيتى !!
زياد : ايوة عربيتك مش معقول يعنى يبقى ابوكى عنده اكبر معرض عربيات وانتِ معندكيش عربية خاصة بيكي وبعدين مش المفروض انك اتعلمتى السواقة
شريفة : اه اياد علمنى بس انا مبعرفش اوى
اياد : هنخليكي يا ستى تعرفى اوى
شريفة : بس انتوا عزمتوا الناس دى كلها على عيد ميلاد مين
زياد : عيد ميلادك انتِ
شريفة : ايوة بصفتى مين
اياد : بصفتك شريفة عمر ابو الوفىٰ اختنا اللى كانت مسافرة مع مامتها بره
شريفة : تمام
زياد : بصى لو الناس سألتك كنتى بره فين قولى كنت فى بريطانيا
شريفة : وافرض بقى حد غلس قالى كنتى فين فى بريطانيا
اياد : قولى اى حاجة يا شيفة لندن مانشيستر ليڤربول اى مكان
شريفة : تمام
زياد : انتِ بتعرفى تتكلمى انجليزي صح
شريفة : ايوة يا ابنى انا كنت شغالة فى مكتب ترجمه
زياد : فل اوى حاولى تتدخلى كده كام كلمه انجليزي فى وسط كلامك
شريفة : متخفوش عمرى ما هكسفكوا قدام قرايبكوا او اصحابكوا
اياد : انتِ هبلة ولا ايه احنا لو علينا عايزين نقول الحقيقة بس انتِ كل شوية تقولى فضيحة وهتفضح
شريفة : انا فاهمه والله
زياد : مش وقت رغى احنا اتأخرنا على الناس اوى
(. نزل شريفة واياد وزياد واحتفلوا بـ عيد ميلاد شريفة وقالوا انها اختهم من ام تانية بس كانت عايشة فى لندن ، شريفة اتعرفت على قرايبها واصحاب اخواتها وكونت صداقات من الحفلة دى .)
*_____________________________________________**___________________________*
بعد اسبوع فى النادى .........
(. شريفة قاعدة بتقرأ كتاب وجه عليها فارس سحب كرسى وقعد .)
فارس : صباح الخير
شريفة : صباح التطفل
فارس : طيب انتِ مش عايزة تتعرفى عليا ليه
شريفة : واتعرف عليك ليه
فارس : مش يمكن اعجبك وتحبيني
شريفة : شوف بقى انت بترسم عليه
فارس : مش فكرة رسم والله انا فعلاً معجب بيكي بس ممكن نتعرف كـ اصحاب نفهم دماغ بعض ونشوف الدنيا فيها ايه
شريفة : خلاص سبنى افكر
فارس : تمام انا فارس ابو المجد ابن الوزير السابق محمود ابو المجد
شريفة : احنا بدأناها كده
فارس : مش فاهم
شريفة : اصلك بتقول انك ابن الوزير السابق محمود ابو المجد يعنى بتعرفنى بابوك مش بنفسك
فارس : لا على فكرة انا عمرى ما اتمنتظرت بمركز ابويا انا بس بعرفك انى ابن ناس مش واحد من الشارع وهدفه يعاكسك وبس
شريفة : تمام
فارس : انا عندى شركة صرافة اي نعم بابا هو اللى عملهالى اول ما اتخرجت بس انا اللى كبرتها وانا اللى شايل شغلها لوحدى
شريفة : ربنا يوفقك بس انا بشوفك دايماً فى النادى بتروح شغلك امتى
فارس : انا بـ اجى عشان اشوفك وانا اصلاً معايا واحد صاحبى هو بيمسك الشغل لما انا بغيب
شريفة : تمام
فارس : كله تمام تمام مفيش اى حاجة تقوليها عنك
شريفة : انت عندك كام سنة
فارس : ٢٨ سنة
شريفة : ولسه متجوزتش لحد دلوقتى !!
فارس : مش فاهم ايه المشكلة
شريفة : المفروض ان اللى بيعطل الشباب عن الجواز هو العامل المادى لكن المفروض انك مادياً كويس جداً يبقى متجوزتش ليه
فارس : ماهى البلد دى لاما شمال اوى لاما يمين اوى
شريفة : مش فاهمه
فارس : يعنى اللى ممعهوش بيبقى نفسه يتجوز وبيفضل يحوش يحوش عشان الغرض ده واللى معاه مبيكونش عايز يتجوز قبل ما يعيش حياته ويستمتع بيها
شريفة : وانت بقى عشت حياتك واستمعت بيها
فارس : انا عيشتها بالطول وبالعرض على فكرة هحكيلك تفاصيل حياتى بس قوليلي اسمك حتى ايه
شريفة : انا شريفة عمر ابو الوفىٰ
فارس : عمر ابو الوفىٰ اللى هو عمر ابو الوفىٰ رجل الاعمال المشهور
شريفة : ايوة هو
فارس : على فكرة باباكى صديق لابويا وكمان انا عارف ولاده بس اول مرة اعرف انه له بنت
شريفة : انا بنته من زوجته الاولى بس هما انفصلوا من زمان وانا كنت عايشة بره
فارس : بره فين
شريفة : فى لندن
فارس : انا بعشق لندن انا عشت هناك فترة طويلة
شريفة : تمام
فارس : واكيد درستى هناك
شريفة : اهاا
فارس : انا كمان درست هناك فى اكسفورد وانتِ
شريفة : فى نفس الجامعة
فارس : وعندك كام سنة
شريفة : ٢٥ سنة
فارس : وعايزة تعيشي حياتك برضه قبل ما تتجوزى ولا ايه
شريفة : انا كنت مخطوبة على فكرة وفركشنا من اقل من تلت شهور وفضلنا مخطوبين سنتين
فارس : مصرى ولا بريطاني
شريفة : بريطانى !!!!!
فارس : ايوة مش بتقولى كنتى عايشة بره
شريفة : اهاا لا لا كان مصرى
فارس : ومكملتوش ليه
شريفة : النصيب
فارس بابتسامه : ده نصيبى انا
شريفة : بص يا فارس ، احنا خلينا اصحاب زى مانا قولت لحد ما اخرج من ازمة مؤمن
فارس : انتِ لسه بتحبيه
شريفة : مش عارفة بس اللى اعرفه انى لسه مجروحه
فارس : وانا هنسيكي مؤمن ده وجرحه وايامه وانا لسه صديق
*_____________________________________________**___________________________*
فى ڤيلا عمر ابو الوفىٰ ........
عمر : عندى ليكي خبر حلو اوى
شريفة : خير يا بابا
عمر : موضوع النسب خلص خلاص
شريفة : يعنى خلاص يا بابا بقيت مكتوبة باسمك
عمر : لا للاسف مضطرين نروح المحكمة
شريفة : تمام بس كويس انه الموضوع خلص بالسرعه دى
عمر : هو لولا التزوير اللى عملناه مكنش مشى
شريفة : تزوير !! تزوير ليه يا بابا
عمر : عملت قسيمة جواز وقسيمة طلاق باسمى انا وامك بتاريخ قديم
شريفة : ليه كده
عمر : عشان ............... (وسكت)
شريفة : فهمت عشان ميقولوش بنت حرام
عمر : بغض النظر المهم انك تتكتبى باسمى
شريفة : صح هو ده المهم
عمر : اه صحيح انا اشتريت ارض عشان نعمل فيها دار ايتام ومسجد وكنت عيزاكى تشوفيهم
شريفة : انا بحبك اوى يا بابا ربنا يخليك ليا
عمر : ويخليكي ليا ويفرحنى بيكي قريب
شريفة : بابا حضرتك تعرف واحد اسمه محمود ابو المجد
عمر : اه ده وزير سابق
شريفة : قصدى تعرفه معرفة شخصية
عمر : اه اعرفه يعتبر صديق ليا وبينا شغل كمان بتسألى ليه
شريفة : اصل ابنه جه اتعرف عليا فى النادى ، بقاله شهر مصمم انى اتعرف عليه فقعدت النهاردة واتكلمت معاه شوية
عمر : تتعرفوا بس ولا اكتر من كده
شريفة : اللى فهمته انه عايز يرتبط بيا بس انا قولتله خلينا اصحاب لحد ما نعرف بعض كويس
عمر : عموماً محمود ابو المجد من الناس المحترمه وفارس ابنه كمان شاب محترم جداً وكويس ومستقبله هايل اى نعم كان طايش الاول وبهدل ابوه وامه معاه بس بعد ما اتخرج وجه مصر بقى كويس
شريفة : يعنى كان طايش بيعمل ايه
عمر : زيه زى اى شاب بتاع بنات وشرب وسهر لحد الصبح فى الديسكوهات
شريفة : على فكرة يا بابا مش كل الشباب كده ده بس المجتمع اللى انتوا عايشين فيه هو اللى كده
عمر : مجتمع ايه
شريفة : المجتمع ده بتاع السفر والحفلات والفلوس الكتير اللى ملهاش عدد بس الناس العادية مش كده يعنى مش كل الشباب بتاعة بنات وشرب وديسكوهات ولا كل البنات كده
عمر : انا فهمتك قصدك الطبقات الراقية هى اللى كده
شريفة : راقية !! فين الرقى ده هو الرقى انى اعصى ربنا واغضبه لو هو ده الرقي يبقى الطبقات المتوسطة والفقيرة لها الفخر انها مش راقية
عمر : فى ايه يا شيفة انتِ هتديني محاضرة عن الطبقات الاجتماعية
شريفة : سورى يا بابا انا مقصدش بس انا من يوم ما عشت العيشة دى وقربت من اخواتى وبقالى اصحاب من الطبقة دى وانا حاسة ان انتوا عايشين فى دنيا غير اللى احنا عايشين فيها وكمان الدين بالنسبة لناس كتير مجرد خانة فى البطاقة
عمر : هما اتربوا كده واهاليهم من قبلهم اتربوا كده
شريفة : ربنا يهدى الجميع
*_____________________________________________**___________________________*
عـنـد مـديـحـة ....
(. مديحة راحت المقابر تزور قبر مصطفى ، بعد ما قرأتله الفاتحة كلمته .)
مديحة لـ مصطفى >> سامحنى يا مصطفى انا عارفة انى ظلمتك كتير وجت عليك اكتر حتى بعد ما موت بس كان لازم أأمن لها مستقبلها انا كنت خايفة عليها ، انا مش عارفة انت سامعنى ولا لا ولو سامعنى مسامحنى ولا لا بس انا يا مصطفى مكدبتش عليك لما قولتلك بحبك فى يوم من الايام لانى فعلاً حبيتك ولو رجع بيا الزمن مكنتش هختار غيرك ربنا يرحمك ويسكنك فسيح جناته .)
*_____________________________________________**___________________________*
بعد مرور شهرين .......
- شريفة غيرت نسبها
- فارس وشريفة قربوا من بعض وارتاحوا لبعض جداً
- زياد شبه تقبل شريفة وبيعاملها كويس
- شريفة اتلهت عن امها فى الفلوس والسفر ومبتسألش فيها
*_____________________________________________**___________________________*
فى ڤيلا عمر ابو الوفىٰ .......
(. شريفة راجعه من بره .)
اياد : كنتى فين
شريفة : كنت مع فارس
اياد : لحد دلوقتى
شريفة : فى ايه يا اياد دى الساعة مجتش ١ لسه
اياد : وهو الصح انك تقعدى بره البيت مع واحد لحد نص الليل
شريفة : وايه كمان
اياد : فى ايه يا شريفة ايه اللى غيرك كده انتِ لما كنتى بتخرجى معايا ونتأخر لـ ١٠ كنتى بتخافى
شريفة : عشان مكنتش متعودة وخلاص اتعودت
اياد : ياريت يا شريفة متتأخريش بره تانى ولو حابة تخرجى فى وقت متأخر كده قوليلي اجى معاكى ومش هضايقك خالص
شريفة : حاضر ممكن ادخل اغير هدومى
اياد : ممكن بس سؤال اخير
شريفة : اتفضل
اياد : انتِ وفارس وصلتوا لحد فين
شريفة : يعنى ايه لحد فين
اياد : يعنى لسه اصحاب ولا ارتبطوا
شريفة : مانا قولتلك ان احنا شبه ارتبطنا
اياد : طيب ما تتخطبوا
شريفة : مش دلوقتى خالص يا اياد فى حاجات لازم فارس يعرفها قبل اى خطوة رسمى
اياد : اللى هى ايه
شريفة : يا اياد بجد مش قادرة اتكلم تعبانه جداً وعايزة انام
اياد : اوكى تصبحى على خير
(. دخلت شريفة اوضتها وراح اياد لـ زياد كان بيلعب بلايستيشن .)
زياد : مالك
اياد : قلقان على شريفة
زياد : من ايه
اياد : التغير المفاجئ اللى حصلها ده
زياد : ده طبيعي اللى فهمته من عيشتها معانا انها كانت محرومه جداً يا ابنى دى فى اصناف اكل مكنتش تعرفها وبلدان اول مرة تسمع عنها
اياد : ماشى بس تأخيرها بره وفارس اللى لازقلها ده
زياد : ماله فارس ابن ناس وكويس خليها يا عم بقى تتجوز وتستقر
اياد : مانا خايف يعرف الحقيقة ويسبها ساعتها شريفة مش هتستحمل الصدمه
زياد : الوضع اللى شريفة اتنقلتله خلاها تنسى امها مش هتنسى واحد حبيته
اياد : ايوة يا زيزو بس المفروض برضه نخلى عينا عليها هى فى النهاية اختنا
زياد : هنراقبها يعنى ولا ايه هى كده كده بتحكيلنا كل حاجة وكمان بتاخد رأينا
اياد : ايه البرود اللى انت فيه ده
زياد : يا ابنى افهم شريفة عندها ٢٥ سنة يعنى ناضجة وعاقله مش عيله ممكن يضحك عليها ريح بالك انت شوية
اياد : يا زياد افهم انت شريفة اتنقلت من عالم لـ عالم تانى خالص ، من مستوى لـ مستوى متناقض تماماً زى مانت قولت من حرمان لـ اكتفاء من حاجة محتاجاها كل ده ممكن يخليها تتصرف تصرفات مش مظبوطه زى مانت قولت برضه انها نسيت امها فممكن تنسى نفسها
زياد : اهو جه فيا جول يا عم الواعظ
اياد : تصدق ياد انت معندكش دم
زياد بعصبية(بيرمى دراع البلايستيشن) : يوووه انت عايزنى اعمل ايه يعنى
اياد : بص متروحش الشغل خالص سبهولى وانا هشيله كله والزق انت لـ شريفة متسبهاش تروح حتة لوحدها
زياد : ماشى اى خدمه تانية
اياد : كمل لعب كمل
*_____________________________________________**___________________________*
فى ڤيلا محمود ابو المجد ...
(. فارس كان بيكلم شريفة .) - رومانسية بقى القصة ناشفة اوى -
فارس : وحشتيني اوى
شريفة : وانت كمان وحشتنى
فارس : انا قولت الحقك قبل ما تنامى عشان اقولك حاجة مهمة اوى
شريفة : حاجة ايه
فارس : انا بحبك اوى يا شريفة
شريفة : بجد يا فارس
فارس : والله العظيم بحبك
شريفة : يعنى مفيش اى حاجة هتغير احساسك من ناحيتي
فارس : ولا اى حاجة فى الدنيا
شريفة : انا كمان بحبك اوى يا فارس
فارس : قولتى ايه !!
شريفة : قولت انى بحبك اوى وبموت فيك كمان
فارس : اوعدك يا شيفة انى اخليكي اسعد واحدة فى الدنيا
شريفة : انا مش عايزة اكتر من انك تستحملنى بكل ظروفى وحالاتى وتحبنى كده على طول
فارس : لا طبعاً مش هحبك كده على طول
شريفة : امال على عرض
فارس : ايه السكر ده انا قصدى انى هحبك اكتر من كده يا بنتى انتِ مش فاهمه انا بحب كل حاجة فيكي اصلاً كلك على بعضك كده بموت فيكي
شريفة : انا مش عارفة اقولك ايه غير انى بحبك
فارس : هشوفك بكرة
شريفة : اكيد بس على امتى
فارس : خلينا نتغدى بكرة سوا عشان الصبح عندى شغل مهم
شريفة : خلاص ماشى
فارس : هتعملى ايه الصبح
شريفة : هصحى اروح النادى او الجيم ده لو قدرت اصحى يعنى
فارس : اوكى اول ما تصحى كلميني ولو خرجتى كلميني اول ما توصلى
شريفة : حاضر
فارس : تصبحى على خير يا حبيبتى
شريفة : وانت بخير يا حبيبي (وقفلوا)
(. هنا دخلت أم فارس .)
رجاء : بتكلم مين يا روميو
فارس : بكلم جوليت يا ام روميو
رجاء : اممم بتهزر بجد مين دى
فارس : دى شريفة
رجاء : شريفة مين
فارس : شريفة عمر ابو الوفىٰ حبيبتى
رجاء : قصدك حبيبتك الجديدة
فارس : لا والله يا ماما انا بحب شريفة بجد
رجاء : انا سمعت الجملة دى كتير
فارس : لا لا المرة دى فعلاً بجد انا ناوى اتجوزها
رجاء : ثوانى كده انت قولت شريفة مين ؟
فارس : بنت عمر ابو الوفىٰ رجل الاعمال اللى بابا عامل معاه شغل ده
رجاء : بس ميرڤت الله يرحمها مخلفتش الا ولدين
فارس : حكى لها ان شريفة بنت واحدة تانيه وكانت بره والخ الخ الخ
رجاء : اهااا طيب وحلوة
فارس : بصى هتتفاجئ لما هتشوفيها
رجاء : يا سلام ليه ؟
فارس : لانها جميله من كل حاجة شكلها اخلاقها لبسها كلامها دلعها هزارها
رجاء : امممم طيب هنروح نخطبها امتى
فارس : قريب ان شاء الله
*_____________________________________________**___________________________*
تانى يوم فى بيت مديحة ......
(. مديحة قاعدة لوحدها كالعادة والجرس بيرن فتحت لقيته عمر .)
مديحة : عمر !! اهلاً وسهلاً اتفضل
عمر(دخل) : اذيك يا مديحة
مديحة : بخير الحمد لله ، انت اخبار صحتك ايه
عمر : الحمد لله
مديحة : وشريفة عامله ايه يا عمر كويسة بتاكل كويس
عمر : متخافيش يا مديحة شريفة عايشة احسن عيشة خدى شوفى صورها
(. وادالها موبايله كان عليه مجموعة صور لـ شريفة .)
مديحة : ما شاء الله دى احلوت خالص
عمر : دى بقت بتلبس على الموضه ببعتها تجيب هدومها من باريس
مديحة : باريس !!!
عمر : امال دى بنتى الوحيدة
مديحة : ربنا يخليك ليها يارب
عمر : شريفة ارتبطت واتوقع انها هتتجوزه قريب
مديحة : كان نفسى اشوفها وهى عروسة
عمر : هتجيلك وهتصالحك وهتزوقيها بنفسك يوم فرحها
مديحة : خلاص بقى شريفة رمتنى ومبقتش محتجانى
عمر : هى بس متاخدة من الوضع الجديد
مديحة : ربنا يكرمها
عمر : على فكرة دى مرتبطه بـ ابن الوزير السابق محمود ابو المجد
مديحة : ما شاء الله وهو بيحبها
عمر : بيحبها اوى وهى كمان بتحبه
(. فضل عمر يحكى لها عن شريفة وحياتها شوية وبعد كده ادالها ظرف فيه فلوس رفضت مديحة تاخده بس عمر اقنعها وخادته .)
*_____________________________________________**___________________________*
فى احدى المطاعم الفاخرة .......
(. شريفة قعدت تستنى فارس اللى اتأخر عليها .)
فارس : اووووبا القمر ده قاعد لوحده ليه
شريفة : مستنيه واحد اتأخر عليا
فارس : ده مين الغبى اللى يسيب قمر زيك تستنى
شريفة : بطل هزار انت كنت فين كل ده
فارس : انا كنت قاعد بفكر فيكي وسرحت ونسيت المعاد
شريفة : يا سلام
فارس (ادالها بوكيه ورد) : انا اسف يا روح قلبى
شريفة : اممم خلاص ماشى
فارس : وحشتني اوى
شريفة : وانا بحبك اوى
فارس : ممكن تغمضى عينك
شريفة : ليه
فارس : غمضى بس
(. غمضت شريفة عيونها وقام فارس لبسها سلسلة عليها اسمها الماظ .)
شريفة : الله !! حلوة اوى يا فارس
فارس : ده اغلى اسم على قلبى خدى بالك منه بقى
شريفة : دى شكلها غالية اوى
فارس : مفيش حاجة تغلى عليكي
شريفة : ربنا يخليك ليا يا حبيبي
فارس : وميحرمنيش منك يا حبيبتى (ومسك ايدها وباسها)
شريفة : انا بحبك اوى
فارس : وانا جعان اوى
شريفة : طيب شوف هتطلب ايه
(. طلبوا الاكل وقررت شريفة تتكلم مع فارس عن قصتها الحقيقية لحد ما الاكل يجي .)
شريفة : فارس انا عايزة احكيلك على حاجة
فارس : حاجة ايه يا حبيبتى
شريفة : حكيت شريفة لـ فارس من اول زواج امها العرفى من عمر وانها اتنسبت لواحد تانى لحد تغيير نسبها لـ عمر ابو الوفىٰ
فارس : ايه اللى بتقوليه ده !!
شريفة : دى الحقيقة اللى كنت مخبياها عنك
فارس : ومقولتيش الكلام ده من بدرى ليه
شريفة : كنت خايفة
فارس : خايفة من ايه
شريفة : خايفة تسبنى
فارس : وهو المفروض انى اكمل !!
شريفة : انت ليك حرية الاختيار وانا مش هزعل من اى قرار تاخده
فارس : انا بسألك المفروض انى اكمل
شريفة : مش عارفة
فارس : لازم تعرفى وتجاوبيني
شريفة : فارس انا اعصابى مش مستحمله قول هتكمل ولا لا
فارس : ......................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق