الحلقة الثانية عشر
جزء من حلقة سابقة :
احمد : ايوة عمر بيه الله يرحمه باع نص ممتلكاته لـ شريفة عمر ابو الوفىٰ اختكم
زياد واياد باستغراب : شريفة !!!!!
*_____________________________________________**___________________________*
احمد : ايوة وشريفة هانم عارفة الكلام ده وادى اوراق البيع
اياد : انتِ عارفة الكلام ده يا شريفة
شريفة : اه بابا كان قالى انه باع جزء من املاكه بس انا كنت ناسيه خالص الموضوع ده
اياد : خلاص تمام يا دكتور احمد احنا هنتفق مع بعض وهنكلم حضرتك عشان اعلان الوراثة
احمد : اوكى وانا فى انتظاركم عن اذنكم (ومشى)
زياد : انتِ ازاى متقوللناش حاجة زى كده
شريفة : نسيت
اياد : خلاص يا زياد حصل خير قوليلي بقى هتعملى ايه يا شريفة
شريفة : هعمل ايه فى ايه !!
اياد : هتاخدى نص الثروة فعلاً
شريفة : ده حقى يا اياد
زياد بعصبية : حقك !!!! نص ثروة ابويا حقك !!!!
شريفة : ايوة حقى هو باع النص ده ليا بكامل ارادته وهو فى كامل قواه العقلية
زياد : انت هتستعبطى بقى
اياد : اهدى يا زياد
زياد : انت مش شايف البرود اللى هى فيه
اياد : ازاى حقك يا شريفة !! ازاى ٥٠٪ من الثورة حقك انت كده واخده الضعف
شريفة : انتوا الاتنين عيشتوا مع ابوكوا ٢٣ سنة ، اتعلمتوا احسن تعليم فى الجامعه الامريكية عايشين فى ارقى مكان فى مصر فى القطامية ، مقضيين حياتكوا فسح وسفر حول العالم خروج وشوبينج وعربيات وعز انا مكنتش بشوفوا الا فى الافلام كل ده انا معشتوش يبقى ده حقى ولا مش حقى
زياد : بصى يا شريفة بلاش نخبط فى بعض عشان خاطر الفلوس رجعى ٣٠٪ من اللى معاكى بدل ما تخسري كل حاجة
شريفة : انت بتهددنى !!!
زياد : ايوة بهددك خليها بمزاجك بدل ما ترجعى للحوارى اللى انتِ جيتى منها (ومشى)
شريفة بصوت عالى : مالكش حاجة عندى يا زياد واعلى ما فى خيلك اركبه
اياد : اهدى يا شريفة مينفعش اللى بتعمليه ده
شريفة : وهو ينفع اللى بيقوله ده
اياد : بتهيألى الصدمه مش قليلة عليه
شريفة : انا مش هرجع حاجة يا اياد ده حقى ومش هسيبه
اياد : بس انتِ كده بتظلمينا
شريفة : لا مبظلمكوش الاملاك دى اتباعت ليا بيع رسمى
اياد : اوكى يا شريفة براحتك (ومشى)
هنا دخل فارس ........
فارس : فى ايه يا شريفة مالهم اخواتك
شريفة : انت ايه اللى خرجك
فارس : انا قولت اسيبكوا براحتكوا فى ايه
شريفة : مفيش
فارس : امال مالهم
شريفة : زعلانين على الفلوس
فارس : زعلانين ليه مش الفلوس دى هتتقسم بينكم حسب الشرع
شريفة : بابا لما انا عرفت الحقيقة كاتبلى نص ثروته باسمى او بمعنى اصح باعها ليا ، زياد واياد مكنوش عارفين ولما عرفوا اتصدموا وعايزين اديهم الفلوس دى
فارس : وانتِ ناوية تعملى ايه
شريفة : اعمل ايه فى ايه ده حقى
فارس : لا مش حقك يا شريفة ، الذكر مثل حظ الانثتين يعنى انتِ ليكي ٢٠٪ من ميراث ابوكى وكل واحد من اخواتك ٤٠٪
شريفة : اديك انت قولت من ميراث ابويا ، يعنى انت بتتكلم عن النص اللى بـ اسم ابويا لكن النص اللى اتباع ده محدش له فيه
فارس : ازاى ابوكى يعمل كده !! يعنى هو ده العدل لما انتِ تاخدى النص لوحدك
شريفة : ابقى روح اسأله انا داخلة انام
فارس لنفسه >> ربنا يهديكي يا شريفة
*_____________________________________________**___________________________*
فى ڤيلا عمر ابو الوفىٰ ......
زياد : ورحمة ابويا لو مرجعتش الفلوس دى لاخدها عافية
اياد : هتاخدها عافية ازاى يا متخلف انت دى اتباعت لها يعنى قانوناً حقها
زياد : حقها !! نص الثروة حقها فى انهى شرع وانهى قانون ان شاء الله
اياد : يا ابنى فوق النص ده اتباع لها
زياد : مانا مش مصدق بقى ان ابوك يعمل كده
اياد : مصدق او مش مصدق ده حصل فعلاً والاوراق والمستندات تثبت كده
زياد : ما يمكن هى والمحامى متفقين على اللعبة دى
اياد : مظنش
زياد : يبقى هقتلها وساعتها هنورثها
اياد : انت اهبل يالا
زياد : والله العظيم مفيش حد اهبل غيرك فضلت تقولى نكسبها ونحبها ونخليها تحس بامان عشان تاخد حقها الشرعى بس اهى يا معلم لعبتها صح كسبتك وكسبت ابوك وكمان خد نص الثروة اشرب بقى
اياد : ماحنا لو فضلنا زى ماحنا ممكن تلين وترجعهم لنا
زياد : عشان تعرف انك اهبل ، شريفة عاشت عمرها محرومه واظن كان واضح من كلامها لما تجيلها فرصة زى دى استحالة تسيبها
اياد : لا هتسيبها شريفة طيبه ومش هتقبل بكده
زياد(وهو ماشى) : والله ما حد طيب وعبيط غيرك
*_____________________________________________**___________________________*
فى ڤيلا فارس وشريفة .......
(. شريفة فى اوضة نومها واتصلت بالمحامى .)
شريفة : اذيك يا دكتور احمد
احمد : كويس الحمد لله اخبار حضرتك ايه
شريفة : انا بخير الحمد لله
احمد : يارب دايماً
شريفة : متشكرة ، كنت عايزة اطلب من حضرتك طلب
(. هنا دخل فارس وقعد جنبها .)
احمد : اتفضلى
شريفة : عايزة حضرتك تعرفنى ممتلكاتى كلها عشان ابدأ اباشرها
احمد : اكيد طبعاً ده حقك
شريفة : متشكرة
احمد : الثروة كلها تقدر بـ ١٦ مليار جنية
شريفة : كام !!
احمد : يعنى حضرتك ليكي ٨ مليار جنيه بجانب ١٠٪ من النص التانى
شريفة : اوكى يا دكتور احمد انا ان شاء الله هعدى على حضرتك فى اقرب وقت عشان اعرف الممتلكات عبارة عن ايه
احمد : اوكى يا شريفة هانم فى انتظار حضرتك (وقفوا)
فارس : كنتى بتكلمى مين
شريفة : ده المحامى كنت بعرف منه ايه ممتلكاتى
فارس : وعرفتى
شريفة : تخيل يا فارس ان ممتلكاتى تقدر بـ ٨ مليار جنية
فارس : ومش هترجعى لاخواتك حقهم برضه
شريفة : ده حقى انا هما عاشوا فى خير ابويا وعزه ٢٣ سنة وانا كنت مرمية محرومه من ابسط الحاجات
فارس : بس هما مالهمش ذنب
شريفة : ولا انا ليا ذنب ان بابا باعلى حقهم
فارس بعصبية : هو فى ايه !! هو انا ماليش اى كلمه عليكي ؟! اقولك روحى لمامتك بترمى كلامى ورا ضهرك اقولك رجعى لاخواتك حقهم متعبرنيش ، فين احترامك ليا !!
شريفة : هو لما اسيب حقى ابقى كده بحترمك اسمع يا فارس انا مش هسيب حقى لو كان تمنه حياتى
فارس : ماشى يا شريفة براحتك بس ابقى عرفيني هتقابلى ربنا بانهى وش
شريفة : ربنا بيسامح
فارس : ويا ترى هيسامحك انك عاقة ولا انك اكلت حق اخواتك (وخرج)
شريفة : يا فارس يووووه ايه القرف ده
*_____________________________________________**___________________________*
بعد حوالى اسبوعين .......
- عملوا اعلان وراثة وشريفة ورثت كمان فى النص تانى ورفضت ترجع لاخواتها اى حاجة
- فارس زعلان جداً من شريفة بس مش قادر عليها
- مديحة متعرفش حاجة عن شريفة
*_____________________________________________**___________________________*
فى ڤيلا عمر ابو الوفىٰ ......
زياد : اتمنى تبقى سيادتك مبسوط
اياد : فكك منى يا زياد انا مش ناقص
زياد : الهانم خدت ٩ مليار و٦٠٠ مليون جنيه من اجمالى ١٦ مليار جنية
اياد : انت عارف انا زعلان ليه !!
زياد : يا ترى ليه
اياد : زعلان ان شريفة اتغيرت كده
زياد : اتغيرت كده !! اه تصدق عندك حق ما تفوق بقى احنا حقنا اتاخد مننا انت عارف كان المفروض تاخد كام ٣ مليار و٢٠٠ مليون بس
اياد : انت عامل تقول فى حسابات المفروض يعنى اعمل ايه
زياد : بص بقى زى مانت جيبتها من الزباله اللى كانت عايشة فيها وعيشتها هنا وكنت سبب انها تضحك على ابوك ويكتبلها كل ده انت برضه هتكون السبب ان الفلوس دى ترجع ماشى
اياد : ارجعها ازاى يعنى
زياد : معرفش بقى ترجعها ازاى بالعافية بالحسنى بالفضايح ده ميخصنيش
اياد : وان معرفتش ارجعها
زياد : يبقى متلومنيش على اللى هعمله فيها
اياد : اعقل يا زياد دى مهما كان اختك
زياد بعصبية : متقولش اختى ، انا ماليش اخوات غيرك وان فكرت تجى عليا او على حقى ساعتها هعتبرك مش اخويا
اياد : خلاص انا هتصرف متعملش حاجة انت
زياد : قدامك اسبوعين لو الفلوس مرجعتش متولمنيش (ومشى)
(. فكر اياد وقرر يروح يتكلم مع شريفة ويقنعها .)
*_____________________________________________**___________________________*
فى شغل فارس .....
(. اياد راح لـ فارس شغله وطلب يقابله وفارس استقبله احسن استقبال .)
اياد : معلش لو جيت فجأة كده
فارس : ايه الكلام ده انتِ تجى فى الوقت اللى يريحك
اياد : متشكر انا كنت عايزك فى حاجة
فارس : خير
اياد : انت يرضيك اللى شريفة عملته ده
فارس : لا ميرضنيش ومن اول يوم عرفت فيه الموضوع ده وانا بقولها ترجع لكم حقكم
اياد : انا والله مش فارق معايا الفلوس انا صدمتى كانت فى شريفة نفسها كنت متوقع انها هتقولى فلوسى هى فلوسكوا
فارس : والله يا اياد انا اتكلمت معايا كتير وصعب عليا اقولك انى مش قادر عليها بس هى دى الحقيقة
اياد : زياد ناوى على نية اوى مع شريفة وانا حايشه بالعافية
فارس : والله ما عارف اقولك ايه انا فعلاً تعبت معاها وبرضه مش مقتنعه
اياد : طيب ايه رأيك نروحلها سوا بعد شغلك ونتكلم معاها احنا الاتنين جايز تقتنع
فارس : اوكى انا معنديش مانع ودلوقتى كمان يالا بينا
اياد : بس انا كده هعطلك
فارس : مفيش تعطيل ولا حاجة (ومشيوا سوا)
*_____________________________________________**___________________________*
فى ڤيلا شريفة وفارس .......
فارس : شريفة فين
الشغالة : نايمه
فارس : طيب يا اياد انا هطلع اصحيها
اياد : لا سيبها نايمه وهاجى فى وقت تانى
فارس : لا دى نايمه بقالها كتير اوى
__**__**__**__
فى اوضة نوم شريفة ......
فارس : شريفة يا شريفة اصحى يا حبيبتى
شريفة : ايه يا حبيبي هى الساعه كام
فارس : الساعة واحدة الضهر
شريفة : ايه ده انا نمت كل ده
فارس : شوفتى بقى بقالك اكتر من ١٨ ساعه نايمه
شريفة : طيب يا حبيبي سبنى انام كمان شوية
فارس : بطلى كسل يا حبيبتى قومى يالا اياد اخوكى تحت جاى يزورك
شريفة : لسه فاكر يزورنى
فارس : معلش اخوكى الصغير وبيدلع عليكي قوم يالا غيري هدومك وانزليله
شريفة : اوكى ماشى هقوم
(. قامت شريفة وغيرت هدومها ونزلت هى وفارس لـ اياد .)
شريفة : عاش من شافك يا اياد
اياد : يعنى انتِ اللى بتسألى
شريفة : مش انتوا زعلانين
اياد : واحنا فى وجهة نظرك ملناش حق نزعل
شريفة : انا مش فاهمه انتوا زعلانين ليه ده حقى
اياد : بصى يا شريفة انتِ حقك ٣ مليار و ٢٠٠ مليون ازاى تاخدى ٩ مليار و٦٠٠ مليون انتِ واخدة تلت اضعاف حقك
شريفة : يعنى انت جاى عشان الفلوس مش عشان تزورنى
اياد : يا شريفة احنا مقصرناش معاكى فى حاجة وكنا شايلينك على دماغنا من فوق ليه تعملى معانا كده
شريفة : انا معملتش حاجة ابوك هو اللى باع
فارس : انتِ كان المفروض ترفضى من اول ما عمل كده وكنتى تجبريه ميعملش كده
شريفة : هو كان عمل ايه يعنى
فارس : وزع ثروته وهن عايش وموزعهاش بالعدل
شريفة : والله فلوسه وهو حر فيها ده مش تخصصى
اياد : طيب ابويا ظلمنى انا وزياد انتِ كمان تظلمينا
شريفة : وانا لما ابوك رمانى ٢٥ سنة عايشة فى الذل والفقر ده مكنش ظلم
فارس : بس ساعة ما عرف انك عايشة خدك عنده وعوضك واخواتك اللى عمرهم ما شافوكى كانوا بيعاملوكى احسن معامله هو ده جزاءهم
شريفة : وانت مالك
فارس : نعم !!!!!!!!
اياد : اوكى يا شريفة براحتك
(. ومشى اياد وطلع فارس فوق ، شريفة نادت عليه بس مردش وطلعت وراه .)
شريفة : انا اسفة والله ما اقصد
فارس : مش عايز اسمع كلمه زيادة لو سمحتى
شريفة : يا حبيبى انا فعلاً مقصدش
فارس : انتِ قولتى وانت مالك وانا فعلاً هيبقى ماليش دعوة بس انا مقبلش ان اعيش مع واحدة قبلت تاخد حق مش حقها
شريفة : يعنى ايه
فارس : يعنى لاما ترجعى لاخواتك حقهم لاما كل اللى بينا اعتبريه انتهى
شريفة : ايه اللى انت بتقوله ده !! هو انا واحدة صاحبتك انا مراتك
فارس : اللى عندى قولته يا شريفة وفكرى على مهلك وردى عليا
(. راح فارس غير هدومه .)
شريفة : انت رايح فين
فارس : نازل لحد ما تفكرى وتشوفى هتختارى ايه
شريفة : ممكن تسمعنى
فارس : مش هسمع منك اى كلمه قبل ما تعرفيني اخترتى ايه
شريفة : يا فارس انا عيشت فى الفقر والحرمان سنين يوم ما تجيني فرصة زى دى اسيبها بسهولة كده
فارس : يا شريفة ٣ مليار و٢٠٠ مليون مبلغ مش قليل وبعدين انا عندى كتير اوى ومش هحرمك من حاجة
شريفة : برضه يا فارس ده حقى
فارس : انا نازل ولما توصلى لقرار كلميني
*_____________________________________________**___________________________*
تانى يوم فى بيت مديحة ........
(. الجرس بيرن فتحت مديحة لقيت فارس .)
فارس : مساء الخير يمكن حضرتك متعرفنيش بس .........
مديحة تقاطعه : انت جوز شريفة صح
فارس : ايوة انا
مديحة ؛ اتفضل يا ابنى
(. دخل فارس وبصت مديحة بره على امل ان شريفة جت معاه .)
فارس : مجتش يا طنط
مديحة : وهى عامله ايه طمنى عليها
فارس : هى كويسة الحمد لله
مديحة : هى اللى قالتلك تجى تزورنى !!
فارس : بصراحة لا
مديحة : امال عرفت عنوانى منين
فارس : انا خدته من عمو عمر الله يرحمه من ايام ما كنت خاطب شريفة على امل انى اجيبها فى يوم واحطها قدام الامر الواقع
مديحة : كتر خيرك يا ابنى متجبرهاش على حاجة يكفيني اشوفها مبسوطه
فارس : بس حضرتك عرفتيني ازاى
مديحة : انا حضرت الفرح
فارس : ازاى
مديحة : حكيتله ان عمر خلاها تحضر الفرح وانه كان بيزورها
فارس : الله يرحمه
مديحة : يوة نسيت اجبلك حاجة تشربها ، هاا تشرب ايه
فارس : متشكر اوى يا طنط اقعدى بس انا عايز حضرتك فى موضوع مهم
مديحة : خير
فارس : شريفة ماشية فى سكة اخرتها وحشة وانا خايف عليها
مديحة : يا مصيبتى سكة ايه
فارس : حكى لها موضوع الفلوس
مديحة : بس انا ممكن اعمل ايه فى حاجة زى كده
فارس : تمنعيها
مديحة : يا ابنى دى من يوم ما راحت لابوها مزارتنيش ولا حتى كلمتنى تفتكر هقدر عليها
فارس : انا بجد خايف عليها
مديحة : سيبها ومتتناقش معاها فى الموضوع ده وهى هتراجع نفسها انا عارفة بنتى عنيدة لما حد يقولها على حاجة تسيبها بتمسك فيها اكتر
فارس : يعنى تفتكرى فعلاً هترجع الفلوس
مديحة : لو بطلتوا تتكلموا معاها ممكن
فارس : انا سايبلها البيت اصلاً
(. هنا اتصلت شريفة بـ فارس وطلبت منه يروحلها بيتهم.)
فارس : انا مضطر امشى عشان شريفة عيزانى
مديحة : طيب ابقى طمنى عليها
فارس : حاضر (. ومشى .)
مديحة لنفسها >> يارب استرها مع شريفة بنتى واهديها وابعد عنها السوء يارب
*_____________________________________________**___________________________*
فى ڤيلا فارس وشريفة .......
فارس : خير يا شريفة
شريفة : وحشتنى (ولفت ايدها على رقبته)
فارس بينزل ايدها : فكرتى
شريفة : اه فكرت بس عايزة اقولك حاجة الاول
فارس : حاجة ايه خير
شريفة : قولى الاول وحشتك ولا لا
فارس : يوه بقى اتكلمى حاجة ايه
شريفة : ...............
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق