الحلقة السادسة
جزء من حلقة سابقة :
(. فضل مديحة ومؤمن يغنوا ويردوا على بعض وشريفة عماله تفكر فى كلامهم .)
شريفة : خلاص انا وافقت
مؤمن : بجد يا حبيبتى
شريفة : بس بشرط واحد بس
مؤمن ومديحة : ايه هو !!
شريفة : ..........................
*_____________________________________________**___________________________*
شريفة : تاخد دى يا مؤمن (وقلعت الدبلة)
مؤمن : ايه !!
شريفة : اللى سمعته ، هقبل بالميراث بس بشرط انك تاخد دبلتك
مؤمن : فى ايه شريفة ليه كده
(. شريفة مردتش وهدوء عم المكان ومديحة ومؤمن بيبصوا لبعض .)
مديحة : ايه اللى بتقوليه ده يا شريفة ده مؤمن حبيبك
شريفة : حبيبي !! حبيبي عمره ما كان مادى وبتاع فلوس حبيبي ميحطش سمعتى وشرفى فى كفة والفلوس فى كفة ويختار الفلوس ، عارف يا مؤمن انا احترمتك اكتر لما سبتنى عشان خاطر مش عايز جدة ولادك تبقى ست خاطية لكن دلوقتى نزلت من نظرى وميشرفنيش اكمل حياتى معاك
مؤمن : انتِ اللى ميشرفكيش !! انتِ المفروض تحمدى ربنا ان قبلت اتجوز واحدة زيك
(. شريفة مردتش ودخلت اوضتها وجابت الشبكة لـ مؤمن .)
شريفة : اتفضل شبكتك واتفضل اخرج بره
مؤمن : ماشى هخرج بره (ومخدش الشبكة)
شريفة : استنى هنا استنى (مؤمن مردش ومشى)
مديحة : ليه عملتى كده
شريفة بدموع : انتِ تخرسي خالص مش عايزة اسمع صوتك انتِ السبب فى كل اللى انا فيه
مديحة : يا شيخة حرام عليكي بقى متبقيش جاحدة ، افتكرى اى حاجة حلوة عملتها عشانك نسيتي تعبت عشانك ومعاكى ازاى عشان اكبرك واعلمك
شريفة : بصى ممكن الواحد يعمل غلطة واحدة بس تمسح تاريخه الكويس وده اللى حصل معاكى
مديحة : بس انا امك انا مهما عملت انا امك فاهمه يعني ايه امك
(. دخلت شريفة اوضتها وبعد شوية خرجت ومعاها شنطة هدومها .)
مديحة : رايحة فين ؟
شريفة : رايحة لابويا
مديحة : هتعيشي معاه ؟
شريفة : على طول
مديحة : طيب وانا هتسبيني
شريفة : على طول برضه
مديحة : يعنى انتِ رايحة لابوكى اللى غلط نفس الغلطة وبتعاقبيني انا ؟
شريفة : انا قررت افكر بنفس طريقتك
مديحة : مش فاهمه
شريفة : انتوا وابويا غلطتوا نفس الغلطة وهتفضحونى نفس الفضيحة بس هو عوضنى وكتبلى نص ثروته انتِ بقى هتعوضيني بايه !!
مديحة سكتت وبصت فى الارض
شريفة : شوفتى مفيش حاجة عندك تقدمهالى عشان تعوضينى
مديحة : والعمر اللى ضيعته عليكي مش مكفيكى
شريفة : لا مش مكفيني لان ده واجبك عليا كـ أم معملتيش حاجة زيادة عن باقى الامهات وبعدين انا هعمل زى مانتِ عايزة هقبل بنسب ابويا وهاخد الفلوس
مديحة : وده سبب يخليكي ترميني
شريفة : لا بس انتِ قولتى انك هتبقى مطمنه عليا لما اعيش مع ابويا واخواتى واديني ريحاله ومتخفيش هبقى ازورك
مديحة : ماشى يا شريفة
(. شريفة مسكت موبايل امها وخدت رقم عمر ابو الوفىٰ من عليه .)
شريفة : انا ماشية سلام (ومشيت)
*_____________________________________________**___________________________*
فى بيت مؤمن ........
سميرة : حصل ايه
مؤمن : رمتلى الدبلة فى وشى
سميرة : ليه عملت كده
مؤمن : فهمت انى راجع عشان الفلوس
سميرة : وحتى لو راجع عشان الفلوس فانت برضه بتحبها وهى بتحبك
مؤمن : بتقولى انى قال ايه نزلت من نظرها
سميرة : دى تحمد ربنا هى وامها انك وافقت ترجعلها دول عيلة تعر اصلاً
مؤمن : لا بقى الست هانم مش عاجبها بتقولى ارجعلك بس مش هقبل بالفلوس
سميرة : وانت قولت ايه
مؤمن : يا ماما هو انا بس اللى عايز الفلوس دى امها هتتبهل عليها هى كمان
سميرة : اكيد طبعاً هتجنن عليها على حسب كلامك ابوها ده غنى اوى وبعدين ايه اللى يخليها تفضح نفسها بعد العمر ده كلها الا اذا كانت حاطة عينها على خميرة كويسة
مؤمن : مش بعيد كمان تكون شريفة مش بنته وامها ضحكت على الراجل عشان تلهف الفلوس
سميرة : طيب وانت هتعمل ايه
مؤمن : مش عارف
سميرة : لازم ترجعلها يا مؤمن
مؤمن باستغراب : لازم !!
سميرة : ايوة يا ابنى هتضيع حب عمرك من ايدك يعنى ده احنا كنا المفروض نفرح بيكوا كمان شهرين
مؤمن : ربنا يسهل يا ماما انا هسيبها لحد ما تهدى وبعدين اتكلم معاها تانى
(. هنا الجرس ضرب .)
سميرة : شوف مين
مؤمن : حاضر
(. فتح الباب لقى شريفة .)
مؤمن : شريفة
سميرة : ايه ده شريفة !! اتفضلى يا حبيبتى
شريفة : انا جاية اجبلك شبكتك
سميرة : يا حبيبتى استهدى بالله كده ده انتوا فرحكوا كان فاضل عليه شهرين
شريفة (بصت لـ سميرة واتكلمت بهدوء) : لما مؤمن جه قالى فى يوم ان سمعة سعيد ابن عمى السيئة وصلتكوا وقولتيله ان اللى يمس شريفة هيمس ولادك فى المستقبل احترمتك جداً عشان كنتى خايفة على ابن وسمعته وسمعة ولاده فى المستقبل ولما مؤمن قالى برضه انا مش هسيبك تحت اى ظرف حسيت انى ملكت الدنيا كلها ولما سابنى عشان نفس السبب اللى انتِ حذرتيه منه احترمته ولما رجعلى الروح كانت ردت فيا تانى
سميرة : انا قولتله ان لازم يرجعلك انتوا مهما كان بتحبوا بعض وقولتله مينفعش حاجة زى كده تأثر على اللى بينكم
شريفة بزعيق : حب واللى بينا بتضحكى عليا ولا على نفسك انت رجعتيه عشان الفلوس
مؤمن : وطى صوتك
شريفة : ابنك يا هانم فضل الفلوس على شرف وسمعة مراته المستقبليه ، فضل الترف على الشرف وانا بقى فضلت انى اعيش لوحدى من غيره ومن غير زوج خالص على انى اتجوز ابنك
مؤمن : ده اخر كلام عندك
شريفة : ومعنديش كلام غيره اتفضل شبكتك اهيه (واديتهاله وخرجت)
سميرة : البت دى اتجننت ولا ايه اانا مرضتش ارد عليها عشان كانت فى بيتي
(. هنا جت ايمان .)
ايمان : هتردى عليها تقولى لها ايه يا ماما
سميرة : اعلمها الادب اللى امها معرفتش تعمله لها
ايمان : شريفة عندها حق فى كل كلمه قالتها
مؤمن : انتوا كنتى بتجسسى علينا
ايمان : هتفرق كتير يا اخويا يا كبير يا محترم
مؤمن : غصب عنك
ايمان : انتوا ازاى قدرتوا تغيروا مبادئكوا كده ازاى !! كل ده عشان الفلوس
سميرة : احترمى نفسك
ايمان : انا مبحبش شريفة ويمكن مكنتش طيقاها بس هى عندها حق
سميرة : دلوقتى بقى عندها حق ليه بقى ان شاء الله
ايمان : لما سمعت عن سعيد ابن عمها قولت اكيد مش هتسمحوا بحاجة زى كده وهتفركشوا الجوازة واقتنعت بكلامكم انه مش اكتر من ابن عم لكن تقبلوا بيها وانتوا عارفين قصتها الحقيقية كانت اكبر صدمه والصدمه الاكبر انكوا تطلعوا طمعانين فى فلوسها
مؤمن : تعرفى تخرسى ومتتحشريش فى اللى مالكيش فيه والا والله لاربيكي من اول وجديد
ايمان : ربى نفسك الاول يا مؤمن (ومشيت)
مؤمن : شايفة قليلة الادب دى بتقول ايه
سميرة : سيبك منها يا حبيبي دى لسه صغيره ومش فاهمه الدنيا ماشية ازاى
مؤمن : انا اعمل ايه دلوقتى
سميرة : زى ما قولت سيبها تهدى
مؤمن : يا ماما دى هزأتنا
سميرة : يا حبيبي هى الشتيمه بتلزق
مؤمن : بابا كان دايماً يقولى انت طالع لامك
سميرة : الله يرحمه
*_____________________________________________**___________________________*
فى ڤيلا عمر ابو الوفىٰ .......
(. زياد بيتفرج على التلفزيون و عمر بيكلم مديحة فى الموبايل .)
عمر : يعنى هى قالتلك انها هتجيلي
مديحة : اه وخدت الرقم انا قولت هتكلمك عشان تعرف العنوان
عمر : لا مكلمتنيش
مديحة : امال هتكون راحت فين
عمر : الكلام ده من امتى
مديحة : من اكتر من ساعتين
عمر : هى مجتش ومكلمتنيش
مديحة : انا قلقانه عليها هتكون راحت فين يعنى
عمر : طيب جربتى تكلميها على موبايلها
مديحة : مقفول يا عمر انا هموت من القلق عليها
عمر : طيب يمكن مع خطيبها انتِ مش قولتى انها مخطوبة
مديحة : ماهى سابت خطيبها ومظنش انها تروحله وبعدين بقولك خرجت بشنطه هدومها
عمر : طيب اول ما اقفل معاكى ابعتيلي رقمها فى رساله وانا ان شاء الله هعرف اوصلها
مديحة : طيب يا عمر لو وصلت لـها كلمنى
عمر : اوكى ماشى (وقفلوا)
زياد : خير يا بوب فى حاجة
عمر : اختك خرجت من اكتر من ساعتين وقالت لامها انها جاية عندى لا جت ولا اتصلت
زياد : يمكن عند خطيبها
عمر : انا فكرت فى كده برضه بس امها بتقول انها سابته
زياد : يمكن متجوزة عرفى
عمر : اخرس يا قليل الادب ازاى تقول على اختك كده
زياد : عادى يا بوب تكون عملت زى امها
عمر : تعرف تخرس مش عايز اسمع صوتك
زياد : هو انا قولت حاجة لكل ده
عمر بصوت عالى : دى اختك يا محترم يا متربى كلمه واحدة فى سمعتها هتمسك قبل ما تمسها
(. هنا جه اياد لما سمع صوت ابوه .)
اياد : فى ايه يا بابا مالك تزعق كده ليه
زياد : هو انا قولت حاجة غلط مش امها عملت كده قبلها ولا انا غلطان
عمر : طيب مانا عملت كده ده معناه انك لازم تعمل كده
زياد : انا وانت رجاله مفيش حاجة تعيبنا
عمر : انت متخلف وانا معرفتش اربيك
اياد : فى ايه يا زياد ما تلم نفسك
زياد : انا برضه اللى فى ايه ولا انتوا اللى فى ايه
عمر : انت مش هترتاح الا لما اخبطك خبطة تروح فيها
اياد : خلاص يا بابا حقك عليا انا (ومسك زياد) تعالى نطلع يالا اتحرك امشى معايا
__**__**__
اياد : فى ايه يا زياد انت عايز تموتلنا ابوك
زياد : انا كنت بهزر معاه وهو قلبها بجد وبعدين ايه الحنية اللى نزلت عليك دى
اياد : يا بنى ادم افهم ابوك لو حس ان احنا مش حابين شريفة او مش عايزنها ممكن يكتبلها حاجات من الثروة باسمها عشان هيخاف عليها مننا لكن طول ماهو مش خايف مننا هيتعامل عادى وهتورث زيها زينا
زياد : طيب ماهى كده كده هتاخد يبقى نقطع رجليها من الاساس ومتاخدش حاجة
اياد : يا حمار افهم بعد عمر طويل لابوك ممكن نلعب بالقانون ونثبت انها ملهاش حاجة ، وممكن نخفى جزء كبير من ممتلكات ابوك ساعة اعلان الوراثة وفى النهاية هتاخد ملاليم
زياد : انا حاسك بتشتغلنى
اياد : مش فاهم
زياد : انا حاسس انك متقبل شريفة ومعندكش مانع انها تاخد نص الثروة حتى
اياد : انا فعلاً متقبلها لان مفيش سبب يخليني اكرها بس انا مش مع انها تاخد نص الثروة يعنى
زياد : امال مع ايه
اياد : مع انها تاخد حقها الشرعى
زياد : جاك كسر حُقك
اياد : يا بنى ادم افهم وشغل القلقاسة االلى فى راسك مش من مصلحتنا نخسر ابوك ولا حتى شريفة
زياد : ليه بقى
اياد : عشان كده ولا كده ابوك حاببها او على الاقل حاسس بالذنب ناحيتها وعايز يعوضها ولو حس بخوف مننا شريفة هتاخد حقها مش الضعف لا دى التلت اربع اضعاف فهمت
زياد : اه فهمت
اياد : وبعدين هى فى النهاية اختنا وابوك نفسه معترف هتكدبه
زياد : مش حاسسها اختى
اياد : ههههه عشان كانت عجباك بس
زياد : مش عارف جايز
اياد : بس لازم تغير نظرتك دى
زياد : اكيد يعنى اتغيرت
اياد : تمام
*_____________________________________________**___________________________*
بعد مرور اربع ايام .........
(. شريفة راحت قعدت فى بنسيون وحابسه نفسها فيه مبتخرجش الا للضرورة وقافله موبايلها .)
(. كان فى حوار طويل بين عقل شريفة ونفسها .)
شريفه بتكلم نفسها >> انا ليه مروحش اعيش معاه فى عزه وفى خيره !! خايفة من ايه يا شريفة من الفضيحة وهى الفضيحة دى تجى ايه جنب الاحساس اللى انتِ حساه دلوقتى ولا تجى ايه جنب كلمة مؤمن ليا لما قال انتِ تحمدى ربنا انى قبلت اتجوز واحدة زيك !! خلاص بقى مبقتش فارقة كتير وبعدين طالما ام مؤمن عرفت يبقى انا فعلاً اتفضحت بس الناس لما تعرف الفلوس اللى عندى والعيشة اللى عيشاها هيتخرسوا وهيتمنوا رضايا وهينسوا الفضيحة والكلام ده زى ما ام مؤمن عملت بالظبط هو ده الصح
(. قررت شريفة تكلم ابوها .)
شريفة لنفسها >> ايه يا شريفة هتفضلى الترف على الشرف !! هتبيعي نفسك !! ابيع نفسى ايه !! ايه الكلام الكبير ده هو انا هتجوز عرفى ولا هروح ابيع شرفى مقابل الفلوس انا هاخد حقى ، طيب والرجل اللى رباكى !!هبنيله مسجد باسمه وهعمل دار ايتام باسمه عشان تبقى صدقة على روحه ، انا هاخد حقى وفلوسى اقل حاجة بعد كل اللى شوفته وعيشته ده
(. راحت شريفة فى النوم وهى بتفكر وبتكلم نفسها ومكلمتش ابوها .)
*_____________________________________________**___________________________*
فى ڤيلا عمر ابو الوفىٰ .......
(. عمر بيكلم مديحة فى الموبايل .)
مديحة : انت لازم تتصرف وتشوفلى بنتى فين
عمر : اهدى يا مديحة انا هتصرف
مديحة : بقالك خمس ايام بتقولى انا هتصرف انت مش قلقان عليها ولا ايه
عمر : قلقان عليها طبعاً زيك واكتر ماهى بنتى
مديحة : انا هنزل ابلغ البوليس
عمر : اديني النهاردة بس وانا ان شاء الله هعرف مكانها (وقفلوا)
اياد : فى ايه يا بابا مالها شريفة
عمر : اختكم يا حضرات مختفية من خمس ايام محدش عارف مكانها
زياد : طيب ايه يا بابا ننزل ندور عليها فى المستشفيات مثلاً
عمر : هتدور فى مستشفيات مصر كلها يعنى
اياد : يا بابا حضرتك بتقول مختفيه من خمس ايام يعنى عدى اكتر من ٤٨ ساعة ومن حقنا نبلغ وهما هيجبوهلنا
عمر : انا عارف انها قاصدة تختفى عشان تفكر او تتقبل الصدمة عشان كده مش عايز ابلغ البوليس واكبر الموضوع
اياد : بابا انا جت فى دماغى فكرة
زياد : فكرة ايه
عمر : خير
اياد : لما شريفة كانت بتجى مع مامتها كانت بتستنى معانا لما مامتها كانت بتدخل لحضرتك واللى فهمته من كلامها عن نفسها انها خريجة السن وبتشتغل فى مكتب ترجمه
زياد : فهمنا ايه احنا كده
اياد : ممكن تكون بتروح الشغل
عمر : انت قصدك نروح نسأل عليها
اياد : كلم طنط مديحة وهات منها العنوان ومواعيد شغل شريفة
عمر : ماشى
(. واتصل عمر بـ مديحة وجاب منها العنوان والمواعيد .)
اياد : تمام كده انا بكرة هستناها وهى خارجة من الشغل
عمر : هنستنى لبكرة
زياد : يا بابا ماهى مواعيد الشغل خلصت بكرة ان شاء الله اياد يروحلها ويلاقيها
عمر : ان شاء الله
*_____________________________________________**___________________________*
تانى يوم الصبح فى بيت مؤمن .......
سميرة : انت مش هتروح شغلك
مؤمن : اه هروح هقوم البس اهو
سميرة : احضرلك فطار ولا هتفطر فى الشغل
مؤمن : لا يا ماما متشكر ماليش نفس
سميرة : مالك يا مؤمن
مؤمن : شريفة وحشتنى اوى يا ماما ، الايام من غيرها وحشة اوى
سميرة : معلش يا مؤمن ده هو اسبوع واحد اللى غابت عنك فيه
مؤمن : كان ممل اوى يا ماما ، دى كانت لما بتغيب عليا يوم كنت بتجنن من غيرها
سميرة : ان شاء الله هتهدى وتفكر وترجعلك
مؤمن : انا فعلاً لما رجعتلها كنت بفكر فى الفلوس بس والله عشانها هى نفسي تعيش فى مستوى واحسن والفرصة جاتلنا كان صعب ارفضها
سميرة : يت حبيبي متقهرش فى نفسك صدقنى هتفكر كويس وهترجعلك
مؤمن : يارب يا ماما يااارب
*_____________________________________________**___________________________*
فى شغل شريفة .......
(. شريفة خارجة من الشغل لقيت اخوها فى وشها بس معرفتش هو مين فيهم .)
اياد : اذيك يا شريفة
شريفة : الحمد لله
اياد : كده تقلقينا عليكي
شريفة : وانتوا تقلقوا ليه
اياد : عشان انتِ اختنا
شريفة : اختكوا !!!
اياد : ممكن نروح نقعد فى اى مكان نتكلم شوية
شريفة : معلش مش هينفع
اياد : هترفضى اول طلب اخوكى يطلبه منك
شريفة : معلش فى السؤال بس انت اياد ولا زياد
اياد : انا اياد ، زياد تلاقيه دايماً مهيبر وبيضحك ويهزر انا هادى شوية عنه
شريفة : تمام
اياد : ممكن تجى بقى
شريفة : بس مش عايزة اتأخر
اياد : اوكى
(. وركبت معاه عربيته وراحوا قعدوا فى كافيه .)
شريفة : كنت عايز ايه
اياد : عايز اقولك ان احنا بنحبك سواء بابا او زياد وفرحنا جداً لما عرفنا ان لينا اخت وكنا هنموت من القلق عليكي لما ختفيتي
شريفة : انت مصدق ازاى انى اختك
اياد : بغض النظر عن كلام مامتك وابويا اللى بيأكد لنا انك اختى بس احساسى بيكي بيقول ان اختك
شريفة : والمفروض اصدق
اياد : يا شريفة احنا بشر كلنا معرضين للخطأ ابوكى وامك غلطوا بس انتِ مش احن من ربنا اللى بيسامح وبيغفر ، هما غلطوا فى حق ربنا وتابوا او متابوش حتى دى علاقتهم بـ ربنا احنا مالنا
شريفة : والفضيحة !! تقبل ان الناس تقولك اختك اتخلفت فى الحرام
اياد : انا عمرى ما هستعر منك انتِ اختى وده شئ يشرفنى
شريفة : والفضيحة ليا انا بقى نظرات الناس ليا وولادى فى المستقبل
اياد : يا حبيبتى كل حاجة بتتنسى والناس لازم هتتكلم
شريفة (بدأت تحنله) : انت عايز ايه يا اياد ، جيت لى ليه
اياد : عشان انتِ اختى ، عشان بحبك وخايف عليكي ، عشان ليكي حق عليا انى اخوكى وانا ليا حق عليكي انك اختى ، تعالى عيشي معانا انا عملتك جناح خاص عندنا فى الڤيلا جهزته على زوقى
شريفة : انت بتتكلم جد !!
اياد : انتِ مش مصدقة
شريفة : انا مش مصدقة انك متقبلنى عادى كده
اياد : انا فى الاول اتصدمت بس بعد كده فرحت انتِ ليكي حق فينا كـ اخواتك وليكي حق فى ابوكى
شريفة : انا كنت فاكرة انكوا هترفضونى عشان هشاركوا فى الميراث
اياد : بصى بصراحة احنا كنا قلقانين من الموضوع ده بس احنا فى النهاية اخوات وانتِ ليكي حق وهتاخديه
شريفة (بدأت تستريح) : انا استريحت اوى بكلامك ده
اياد : يعنى هتجى تعيشي معانا
شريفة : بس بشرط
اياد : ايه هو
شريفة : اعمل تحليل DNA
اياد : احنا بالفعل عملناه وطلعتى بنت عمر ابو الوفىٰ
شريفة : عملتوه ازاى
اياد : حكى لها قصة التحليل
شريفة : عايزة اعمل واحد تانى ونتيجته تطلع قدام عيني
اياد : حاضر وهعملهولك قبل ما تروحى عند بابا عشان تبقى مطمنه
شريفة : ازاى
اياد : هاخدك دلوقتى وهنروح المعمل ياخدوا منك العينه ويبعتوا ياخدوا عينه من بابا فى البيت ويجيبوها
شريفة : بس التحليل ده بياخد ايام
اياد : بالفلوس ياخد ساعات
(. وراحوا المعمل وعمل اياد زى ما قال لـ شريفة وقال لابوه ان شرطها عشان تروح معاه ان التحليل يتعمل قدامها وفضل اياد وشريفة فى المعمل لحد ما نتيجة التحليل طلعت .)
الدكتور : نتيجة التحليل طلعت
اياد : وايه الاخبار
الدكتور :....................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق