الحلقة العاشرة
جزء من حلقة سابقة :
فارس : انا بسألك المفروض انى اكمل
شريفة : مش عارفة
فارس : لازم تعرفى وتجاوبيني
شريفة : فارس انا اعصابى مش مستحمله قول هتكمل ولا لا
فارس : ......................
*_____________________________________________**___________________________*
فارس : انتِ كدبتى عليا ليه ؟
شريفة : كدبت !!
فارس : ايوة كدبتى قولتيلي انك كنتى عايشة بره وحوارات كده ليه مقولتيش الحقيقة دى من الاول
شريفة بزعيق : انا مكنتش اعرفك عشان اقولك كل حاجة عنى
فارس : ممكن توطى صوتك احنا فى مكان عام والناس بتتفرج علينا
شريفة : بص يا فارس سواء بقى كدبت او خبيت او اياً كانت التسمية اديك عرفت الحقيقة وانا دلوقتى بقولك اختار
فارس : بحبك يا هبلة
شريفة باستغراب : يعنى هتكمل معايا
(. فارس قام من الكرسى اللى قصادها وقعد جنبها ومسك ايدها .)
فارس : انا عمرى ما هسيبك وبعدين مش فاهم يعنى فين المشكلة فى اللى انتِ حكتيه ده
شريفة : ده عادى بالنسبة لك
فارس : هو بالنسبة لك مش عادى
شريفة : اصل مؤمن. سابنى لما عرف وقالى انه مينفعش مامتى تبقى جدة ولاده
فارس : مش عارف يمكن تفكيرنا مختلف انا شايف انك ملكيش ذنب فى حاجة زى كده ده اولاً
شريفة : وثانياً ؟
فارس : ثانياً انى بحب اعيش اليوم بيومه ومشغلش بالى باللى جاى ، يعنى فى الوقت الحالى انا بفكر فى نفسى وازاى ابقى مبسوط لما اخلف ساعتها افكر فى ولادى
شريفة : انا بحبك يا فارس ومبسوطة اوى انك مش هتسيبنى
فارس : انا مش هسيبك الا اذا مُت بس بما انك حكتيلي كل حاجة عنك لازم انا كمان احكيلك عن نفسى
شريفة : عايز تحكيلي ايه
فارس : يعنى عن حياتى قبلك
شريفة : انا سمعت انك كنت طايش اوى
فارس : دى حقيقة انا كنت طايش جداً جداً
شريفة : طايش لحد فين !!
فارس : باختصار انا عملت كل حاجة ممكن تتعمل
شريفة : كل حاجة كل حاجة !!
فارس : اه كل حاجة واى حاجه ممكن خيالك يوصلها
شريفة مصدومة ومش عارفة تقوله ايه
فارس : مالك
شريفة : بص يا فارس هكلمك بصراحة
فارس : اتكلمى يا حبيبتى
شريفة : العيشة اللى انا عيشاها دى والمستويات اللى تعاملت معاها دى انا عمرى ما شوفتها الا فى التلفزيون فى الافلام والمسلسلات ، الشباب اللى زيك وزى اخواتى اللى كل همهم السفر والسهر والبنات واللبس والعربيات انا مكنتش اعرف انه موجود فى الحقيقة فكل ما اكتشف حاجة فى المجتمع ده انا بتصدم
فارس : انتِ كنتى عايشة فين قبل كده
شريفة : فى المنيل
فارس : بصى انا معاكى ان النقلة من المنيل لـ القطامية مختلفة تماماً فى كل حاجة بس صدقيني انتِ مينفعش تعيشى الا كده هى دى العيشة اللى تنفعلك وهو ده المستوى اللى يليق عليكي
شريفة : لا متقلقش انا خدت على الجو بسرعه
فارس : تصدقى انا مشكتش لحظة انك عيشتي مستوى غير اللى انتِ عيشاه ده انتِ راقيه فى اسلوبك جداً وستايلش ولبقة
شريفة : ده عشان انت بتحبنى بس
فارس : انا بموت فيكي مش بحبك بس
شريفة : ربنا يخليك ليا
فارس : بس ينفع اطلب منك طلب
شريفة : اطلب يا حبيبي اى حاجة
فارس : السر ده عايزه يفضل بيني وبينك
شريفة : اكيد طبعاً متقلقش
(. جه الاكل وبدأوا الاكل .)
فارس : طيب ايه
شريفة : ايه
فارس : انا عايز اجى اخطبك
شريفة : مش بدرى شوية
فارس : يعنى ايه
شريفة : قصدى ان احنا عارفين بعض من شهرين بس
فارس : طيب وايه المشكلة يعنى احنا فى الشهرين دول عرفنا بعض كويس جداً
شريفة : عندك حق
فارس : بصى احنا نعمل خطوبة ونبدأ بقى نجهز للفرح
شريفة : هنتجوز فين !!
فارس : انا عندى ڤيلا بتاعتى فى التجمع الخامس ومفروشه كمان لو حابه تغيري العفش براحتك
شريفة : لا مش مهم
فارس : عموماً هبقى اخدك تشوفيها
شريفة : تمام وهنعمل الفرح فى جنينتها ولا فين ؟
فارس : لا انا مبحبش الجو ده احنا هنعمله فى نفس الفندق اللى هنقضى فيه ليلة فرحنا ان شاء الله
شريفة : تمام
فارس : خديلي بقى معاد من باباكى وهاجى انا وبابا وماما
شريفة : حاضر هتفق معاه وهكلمك
فارس : صحيح يا شريفة هى مامتك فين
شريفة : فى المنيل
فارس : بتزوريها !!
شريفة : قالتله انها قطعت علاقتها بيها من بعد ما عرفت
فارس : نعم !! ليه كده يعنى
شريفة : اهو اللى حصل
فارس : بس ده مينفعش
شريفة : بليز يا فارس لو ليا غلاوة عندك متتكلمش فى الموضوع ده
فارس : ماشى بس ده مؤقتاً
*_____________________________________________**___________________________*
فى ڤيلا عمر ابو الوفىٰ ........
(. شريفة راجعه من بره ، دخلت على اوضتها تغير هدومها ، الباب بيخبط .)
سامية : شريفة هانم
شريفة : ادخلى يا دادة
سامية : فى واحد مستنيكي تحت
شريفة : واحد مين
سامية : بيقول خطيب حضرتك
شريفة بلهفة : فارس طيب خليهم يقدموله حاجة يشربها لحد ما البس
(. غيرت شريفة ولبست فستان بسيط و شيك اوى وعملت شعرها ضفيرة على جنب نازله على كتفها .)
شريفة مصدومه : مؤمن !!
مؤمن : اذيك يا شريفة
شريفة : انت جيت هنا ازاى
مؤمن : بصراحة طلع عيني عشان اعرف ادخل منطقة زى دى
شريفة : عرفت عنوانى منين
مؤمن : مش مهم المهم انك وحشتيني اوى
شريفة : انت اتجننت احنا اللى بينا خلاص انتهى واستحالة يرجع تانى
مؤمن(بيمسك ايدها) : حبيبتى انا بحبك وانتِ بتحبيني ومنقدرش نستغنى عن بعض
شريفة : سيب ايدي وخلاص يا مؤمن انا مبقتش بحبك
مؤمن : كدابه انا اول حب واخر حب فى حياتك
شريفة : حب ايه !! انت خلاص كانت حاجة وانتهت وعلى فكرة انا هتجوز قريب
مؤمن : هتتجوزى !!
شريفة : ايوة هتجوز فوق بقى من الوهم ده
مؤمن : طيب وانا يا شريفة نستيني بالسرعة دى
شريفة : انت جاى ليه يا مؤمن
مؤمن : يا شريفة انا مش عارف ولا قادر اعيش من غيرك حرام عليكي
شريفة : يعنى عايزنى ارجعلك ؟
مؤمن : ياريت يا شريفة
شريفة : موافقة بس بشرط
مؤمن : شرط ايه ؟
شريفة : هسيب كل اللى انا فيه ده وهاجى اعيش معاك فى شقتنا اللى اتأجرناها واخترناها سوا ، شقتنا اللى فى المنيل ، هنعيش بمرتبك وبمرتبى ، هنرجع لحياتنا القديمة
مؤمن : هتسيب العز ده كله يا شريفة
شريفة : عشانك انت عندى اهم من اى عز
مؤمن : بس الفلوس دى حقك هتسبيها لمين
شريفة : يا سيدي انا مفرطه فى حقى مالكش انت دعوة
مؤمن : ايوة بس .........
شريفة : بس ايه !!
مؤمن : هتقدرى ترجعى للعيشة دى تانى
شريفة : شوفت بقى انا هضحى ازاى عشانك
مؤمن : يا شريفة يا حبيبتى افهمى انتِ عارفة احنا هتبقى حياتنا عامله ازاى لو امتلكنا كل الفلوس دى
شريفة : حياتنا !!!! اسمها حياتك انا حياتى خلاص عيشتها واخترتها انا بس كنت عايزة اثبتلك انى مش فارقة معاك وانك مش جاى الا عشان الفلوس
مؤمن : ابقى كداب لو قولت انى مش فارق معايا الفلوس ، يا شريفة انتِ عيشتى فى الفقر والحرمان وعارفة يعنى ايه فرصة تجى للواحد تنقله نقلة تانية
شريفة : النقله دى مش هتكون على قفايا يا مؤمن ، انت دلوقتى مبقتش بتحبنى انت بقيت كلب فلوس
مؤمن : كلب فلوس !!!! هى وصلت للدرجة دى
شريفة : بص يا مؤمن انت كنت مرحلة فى حياتى بس مرحلة خلصت بحلوها ومرها ونسيتها ونسيتك انا دلوقتى بحب فارس ومرتبطه بيه وهنتجوز قريب
مؤمن : ماشى يا شريفة بس متزعليش بقى من اللى هعمله معاكى
شريفة : فوق يا مؤمن واتكلم على قدك واعرف حجم اللى قدامك ،انا اللى معايا الفلوس يعنى انا اللى معايا القوة
مؤمن : انتِ بتهدديني
شريفه : ايوه بهددك وعلى فكرة انا خطيبي ابن وزير
مؤمن : خوفت انا كده
شريفة (متجه لـ السلالم) : امشى بقى بدل ما اجبلك الامن يرميك بره
مؤمن : ماشى يا شريفة
*_____________________________________________**___________________________*
فى بيت مؤمن .......
سميرة : يا ابنى خلاص بقى مفيش نصيب
مؤمن : بالسهولة دى
سميرة : اه بالسهولة دى انساها بقى وشوف واحدة بنت حلال اخطبها واهى شقتك جاهزة وشبكتك موجودة
مؤمن بعصبية : انتِ عيزانى اسيب شريفة بالسهولة
سميرة : يعنى هتتجوزها بالعافية
مؤمن : ايوة بالعافية ولو وصلت لـ انى اخطفها هخطفها
سميرة : اعقل يا مؤمن وبطل جنان كل ده مش هيجيب فايدة
مؤمن : يعنى عيزانى اقف اتفرج عليها وهى بتروح لواحد تانى
سميرة : بمزاجها
مؤمن : اكيد ضحك عليها
سميرة : ليه هى نوغه ولا مراهقة عشان يضحك عليها
مؤمن : يا ماما شريفة موهومه بالوضع والفلوس والمستوى الجديد اللى اتنقلت بيه بس هى شوية وهتفوق وهترجعلى
سميرة : فوق اانت بدل ما تودينا كلنا فى داهية احنا مش قد الناس دى
مؤمن : يا ماما انا بحبها
سميرة : هتنساها مع الوقت بلاش مشاكل يا مؤمن انت بتقول خطيبها ابن وزير
مؤمن : يورينى يقدر يعمل ايه
سميرة : يقدر يعمل كتير ، يا حبيبي انت مع الوقت هتنساها وهتعيش حياتك طبيعي جداً
مؤمن : انساها !! لما نشوف
سميرة : انت جبت عنوانها منين
مؤمن : من المستشفى اللى كان ابوها فيها
سميرة : طيب اهدى كده وفكر بالعقل هتلاقى من مصلحتك انك تبعد عنها
مؤمن : ماشى يا ماما
*_____________________________________________**___________________________*
بعد اسبوع فى ڤيلا عمر ابو الوفى ........
(. شريفة اتفقت مع ابوها واخواتها عشان فارس يجي يتقدملها وكذلك فارس ، راح فارس وابوه اومه وكان فى انتظارهم ، اتفقوا انهم هيعملوا حفلة خطوبة صغيرة للاسرتين وان الفرح خلال شهر وان شريفة وفارس هيعيشوا فى ڤيلا فارس فى التجمع وهيقضوا شهر العسل فى اوروبا .)
فارس : مبسوطة
شريفة : اوى يا فارس
فارس : يعنى فرحتك اكبر من لما مؤمن خطبك
شريفة : ممكن متحطش نفسك فى مقارنه مع مؤمن ولا مع اى حد اصلاً
فارس : ماشى ، هتجيبي فستان الخطوبة امتىى
شريفة : مش عارفة
فارس : طيب وفستان الفرح
شريفة : اياد بيقولى انى ممكن اسافر باريس اجيبه من هناك
فارس : ممكن تعملى زى دينا اختى فصلته فى باريس برضه
شريفة : هى مجتش معاكوا ليه
فارس : دينا عايشة فى امريكا وهتجى على الفرح ان شاء الله
شريفة : تجى بالسلامه ، بس مامتك لذيذة اوى انا حبيتها جداً
فارس : هى كمان حبيتك اوى
بعد فترة من الصمت ......
فارس : مامتك موحشتكيش يا شريفة
شريفة : انا مش قولتللك ...........
فارس يقطعها : وانا قولتلك مؤقتاً
شريفة ساكتة
فارس : انا مش فاهم انتِ بتعقبيها ليه ؟ هتبقى اكبر من ربنا
شريفة : استغفر الله العظيم
فارس : اهو الله العظيم ده بيسامح وبيغفر
شريفة : بس انا مش ربنا
فارس : انتِ جاحدة يا شريفة
شريفة : جاحدة !!
فارس : ايوة جاحدة ، سامحتى ابوكى اللى عمل نفس الغلطة لمجرد انه عوضك بالفلوس وسامحتيني لما قولتلك انا عملت كل حاجة تتخيليها عشان انا عوضتك انى حبيتك بجد او عشان سامحتك لما خبيتى عليكي امك بقى اللى شالتك ٢٥ سنة متستاهلش انك تسامحيها
شريفة : انت يعنى بتنكد عليا فى يوم زى ده(وعيطت)
فارس : انا بفوقك
(. هنا جه اياد .)
اياد : ايه ده يا فارس انت بتزعلها من اول يوم
فارس : اانا عارف انكوا قريبين لبعض ازاى تسيبها المدة دى كلها متروحش لمامتها
شريفة : ممكن توطى صوتك شوية لو سمحت اهلك فاكرين ان امى بره مصر
اياد : اهدى يا شريفة فارس عنده حق
فارس : شوفتى بقى
شريفة : بصوا بقى انتوا الاتنين ، انا مش هزورها الا لما احس انى عايزة ازورها مش هزورها عشان خاطر حد
فارس : ماشى يا شريفة بس انا فرحى عليكي مش هيتم الا بحضور مامتك
شريفة : انت بتخلى دى قصاد دى
فارس : لا طبعاً بس اولاً دى امك من حقها تشوفك عروسة يا بنى ادمه انتِ حطى نفسك مكانها وثانياً عدم وجودها فى الفرح هيشكك اهلى
اياد : خلاص يا فارس اهدى ده مش يوم مناسب للنكد والزعل ده
(. اتقمصت شريفة وسابت اياد وفارس وراحت قعدت مع ام فارس .)
اياد : اهدى يا فارس واختار الوقت المناسب للكلام
فارس : الموضوع ده استفذنى جداً يا اياد مش ممكن شريفة الطيبة الرقيقة تبقى بقسوة القلب دى وتبقى جاحده كده
اياد : محدش لحد دلوقتى فاهم ليه هى قاطعت مامتها هل عشان السبب ده بس ولا فى حاجة تانية
فارس : اياً كان يا اياد مفيش ابناء بيعاقبوا اهاليهم ولا الدنيا اتقلب حالها
اياد : خلاص خلاص اهدى تعالى نشرب حاجة تروقك كده
*_____________________________________________**___________________________*
بعد مرور شهر .......
- شريفة مشغولة بتجهيز بيتها وترتيبات فرحها وسافرت بره مصر جابت فستان الفرح
- فارس حاول معاها كتير بخصوص زيارة امها بس فقد الامل وبطل يتكلم معاها
- اياد وزياد فى حالة استقرار نفسى مع شريفة ومبسوطين جداً انها هتتجوز
- مؤمن لسه حاطط شريفة فى دماغها وبيتتبع اخبارها
- مديحة عايشة لوحدها وعمر بيزورها كل اسبوع وبيديلها فلوس
*_____________________________________________**___________________________*
النهاردة فرح فارس وشريفة فى احدى القرى الفاخرة فى شرم الشيخ ....
- شريفة كانت زى الملكات فى ليلتها وكانت جميلة اوى وفارس كان منبهر بجمالها وفستانها
- الفرح بدأ الساعة ٩ بالليل لـ ٥ الفجر بحضور كبار رجال الاعمال والفن والسياسة
- فارس قال لـ اهله ان ام شريفة معرفتش تنزل مصر بسبب انها مريضة
- شريفة كانت منبهرة بالفرح الاسطورى بتاعها وبتحاول تدارى انبهارها لما بتشوف حد مشهور
- عمر اياد وزياد كانوا فرحانين جداً لـ فرحة شريفة وانهم اطمنوا عليها
- فارس وشريفة هيقضوا الليله فى الفندق وهيسافروا تانى يوم هاواى
- عمر جاب مديحة من القاهرة لـ شرم الشيخ وحضرت الفرح كله من على بُعد وشافت شريفة وكانت فرحانه بيها جداً بس شريفة مشفتهاش
__**__**__**__
بعد الفرح فى الجناح الخاص بـ فارس وشريفة ....
فارس : مبروك يا احلى عروسة فى الدنيا كلها
شريفة : الله يبارك فيك يا احلى عريس
فارس : عارفة بقى انا اسعد واحد فى الدنيا
شريفة : مش اسعد منى
فارس : انا من اول مرة ما شوفتك فيها فى النادى وانا بحلم باليوم ده يا شيفة ، بحلم باليوم اللى تبقى فيه بتاعتى انا لوحدى
شريفة : انا بحبك اوى
فارس : ايه رأيك بقى فى الفرح
شريفة : انا عمرى ما كنت اتخيل بس مجرد خيال ان ممكن فرحى يكون بالشكل ده ، ده فرح اسطورى ، عمرى ما كنت اتصور ان ممكن اشوف النجوم والمشاهير دى فى الحقيقة
فارس : انا بقى ربنا خلقنى عشانك ، اى حاجة نفسك فيها انا هحققهالك (وحضنها)
شريفة : ربنا ما يحرمنى منك يا فارس انا بجد بعشقك
فارس : اقولك حاجة وتصدقى
شريفة : قول
فارس : وانتِ جاية عليا بفستان الفرح التحفة ده كنت حاسس انك ملاك
شريفة : انا بستكترك عليا
فارس(بيحط صباعه على بؤها) : هُش متقوليش كده ابداً انتِ اللى كتيرة عليا يا اجمل واحلى واحن انسانه ربنا خلقها (وخدها فى حضنه)
بعد دقيقة ....
فارس : شيفة انتِ نمتى يا حبيبتى
شريفة : لا يا حبيبي انا منسجمه بس
فارس : ههههه افتكرتك نمتى
شريفة : انا هدخل اغير الفستان بقى
فارس : ماشى يا حبيبتى بس استنى افكلك الطرحة
شريفة : هههههه ماشى
(. فك فارس الطرحة لـ شريفة ودخلت غيرت الفستان وهو كمان غير هدومه .)
فارس : ايه القمر ده شكلك احلى بكتير من غير مكياج
شريفة : يا سلام !!
فارس : والله ما بكدب
شريفة : ده عشان انت بتحبنى بس (وحضنته)
فارس : ايه يا شيفة احنا هنقضيها احضان ولا ايه
شريفة : قصدك ايه
فارس : الاكل زمانه باظ بره فى الريسبشن تعالى ناكل
شريفة : هههههههه ماشى
فارس (شدها من ايدها) : ماشى ايه انتِ ما صدقتى فى موضوع مهم لازم نتكلم فيه
شريفة : خير يا حبيبي فى ايه
فارس : هقولك (وشالها)
شريفة : بحبك
فارس : انا بموت فيكي
(. وسكتت شهرزاد عن الكلام المباح .)
*_____________________________________________**___________________________*
تانى يوم ....
- شريفة وفارس سافروا هاواى الساعة ١ الضهر هيقضوا شهر العسل
- اهل فارس واهل شريفة لسه فى شرم الشيخ
- مديحة كمان لسه موجوده وشافتها وهى مسافرة من بعيد
__**__**__**__
فى استقبال الفندق ......
عمر : انا عارف انك كان نفسك تاخديها فى حضنك
مديحة : مش مشكلة يا عمر المهم انى شوفتها والاهم انها مبسوطه
عمر : ممكن اعرف ايه اللى حصل وصلكوا لكده
مديحة : صدقنى يا عمر مفيش اى حاجة حصلت الا اللى حتهولك
عمر : ايوة بس شريفة سامحت الكل اشمعنى انتِ
مديحة : عشان هى عاشت معايا اكتر من اى حد فالصدمة كانت اقوى
عمر : انا واثق ان فارس هيقدر يقنعها لانه مضايق جداً من الوضع ده
مديحة : هو عارف الحقيقة
عمر : هو بس لكن اهله ميعرفوش
مديحة : ربنا يكرمه هو شكله طيب وبيحبها
عمر : ربنا يسعدهم
*_____________________________________________**___________________________*
بعد مرور اسبوعين فى ڤيلا محمود ابو المجد ......
رجاء : فارس وحشنى اوى يا محمود
محمود : ربنا يجيبه بالسلامه ويسعده
رجاء : امين يارب
محمود : هو اخر مرة كلمك امتى
رجاء : من يومين
محمود : ههههه ده شكله غرقان فى العسل للاخر
رجاء : شريفة اصلها بتحبه اوى وهو كمان اكيد نسيوا الدنيا كلها
محمود : شريفة طيبة وبنت حلال ربنا يسعدهم
رجاء : ياااارب ويرجعوا بالسلامه
(. هنا موبايل محمود رن .)
محمود : الو . الحمد لله . انت عامل ايه . ايه انت بتقول ايه !!!!!!!
رجاء : فى ايه محمود
محمود : .......................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق