الحلقة الخامسة عشر
(. شريفة الدنيا ضاقت عليها وافتكرت امها فـ قررت تروح تزورها ، شريفة كانت لسه مُحتفظة بـ مفتاح الشقة ، راحت تزورها وهى مترددة وخايفة من رد فعل امها بس كانت متأكده ان اكيد امها هتسامحها ، ضربت شريفة الجرس كتير بس محدش فتح فـ فتحت هى بالمفتاح ودخلت الشقة ونادت على امها ودورت فى الشقة كلها بس ملقتهاش واتصلت لقيت الموبايل مقفول ، فـ قررت تسأل حد من الجيران ، وخبطت على الشقة اللى قصادهم .)
شريفة : مساء الخير اذيك يا طنط
الجارة : اذيك يا شريفة عاش من شافك
شريفة : انا دخلت الشقة ملقتش ماما وبتصل موبايلها مقفول
الجارة : مامتك فى المستشفى تعبت من كان يوم ودخلت المستشفى
شريفة : مستشفى !! من امتى ومستشفى ايه
الجارة : من حوالى خمس ايام وبتهيألى راحت القصر العيني
شريفة : اوكى شكراً جداً
(. ونزلت شريفة راحت على القصر العيني وسألت على مامتها وعرفت توصلها .)
*_____________________________________________**___________________________*
فـى الـقـصـر العيني ......
شريفة(حضنت امها) : سامحيني يا ماما انا اسفة حقك عليا
مديحة : متتأسفيش يا حبيبتى حقك عليا انا ، انا اللى غلطت فى حقك
شريفة : انا مش عارفة انا ازاى قسيت عليكى كده
مديحة : المهم انك مبسوطة وبخير طمنيني عليكي
شريفة : انا تعبانه اوى يا ماما
مديحة : مالك يا حبيبتى
شريفة : الدنيا ضاقت عليا اوى يا ماما كل حاجة بتروح منى
مديحة : مالك يا بنتى طمنيني عليكي
شريفة : حكت لها ان فارس سايب البيت وعلى موضوع الورم والخلفة
مديحة : وانتِ ليه مرجعتيش الفلوس عشان متخسريش فارس
شريفة : يا ماما ده حقى انا
مديحة : حصل خير بس انتِ لازم تراضى جوزك عشان يرجعلك اوعى تخسرى واحد زى فارس يا شريفة
شريفة : يعنى اعمل ايه يا ماما
مديحة : ارضيه واعمليله اللى هو عاوزه
شريفة : ربنا يسهل يالا عشان نمشى من هنا
مديحة : انا تعبانه يا بنتى ومقدرش امشى من هنا
شريفة : لا يا ماما انا كلمت اسعاف وهنروح مستشفى كبيرة اوى
مديحة : يا بنتى انا خلاص ايامى بقت معدودة
شريفة : بعد الشر عليكي يا ماما هو انتِ حصلك ايه
مديحة : انا تعبانه اوى يا شريفة من زمان ومكنتش عايزة اقولك ، انا لما حسيت انى تعبانه وانى ممكن اموت قولتلك الحقيقة عشان ابقى مطمنه عليكي مكنتش اعرف انى بدمرك
شريفة : يعنى انتِ عملتى كل ده عشان خاطر كنتى خايفة عليا
مديحة : كنت خايفة عليكي من الزمن ومن الفقر ، كنت خايفة اموت وانا مش سيبالك سند او ضهر او حتى فلوس فقررت اعرفك ابوكى الحقيقي
شريفة : انا ظلمتك يا ماما حقك عليا
(. خدت شريفة امها وودتها مستشفى دار الفؤاد ، وبعد الكشف والفحوصات عرفت شريفة ان مديحة عندها الكبد و تعبانه جداً وحالتها الصحية بتتأخر وشريفة قررت تسفرها بره .)
*_____________________________________________**___________________________*
بعد مرور اسبوعين .....
- مديحة لسه فى المستشفى وشريفة بتقعد معاها وبتروح بالليل
- فارس مسألش على شريفة خالص وشريفة كذلك مسألتش عليه
- اياد اقنع زياد انه يستناه وهيسافروا سوا
- اياد مبيتصلش على شريفة وشبه علاقتهم اتقطعت ببعض
*_____________________________________________**___________________________*
فى ڤيلا شريفة وفارس .............
(. شريفة صحيت من النوم لقيت فارس موجود ، جريت عليه وحضنته .)
شريفة : انا كنت عارفة انى هوحشك
فارس بيبعدها عنه : انا جاى اخد شوية حاجات وماشى تانى
شريفة : يعنى موحشتكش
فارس : شريفة انا جاى اتفق معاكى
شريفة : انا موافقة على اى حاجة انت عايزها
فارس : هنطلق
شريفة : نطلق !!
فارس : انا جاى اتفق معاكى على التفاصيل
شريفة : فارس مفيش حاجة حصلت تستدعى الطلاق
فارس : نعم !!! انتِ فضلتى الفلوس عليا
شريفة : انا مستعدة ارجع الفلوس
فارس : بعد ايه يا شريفة
شريفة : يا فارس انا محتجالك
فارس : عشان تخلفى يا شريفة ، عشان تخلفى بس لكن غير كده انتِ مش محتجانى
شريفة : مانا ممكن اطلق واجوز اى حد تانى عشان اخلف بس انا عايزة اخلف منك
فارس : كدابة وبعدين انتِ متأكده اصلاً انك عيانه
شريفة : انت كل ده مش مصدق
فارس : انا مبقتش مصدق اى حاجة اصلاً
شريفة : هو مفيش اى حاجة استاهل انك تسامحنى عليها
فارس : انا عرفت بنات بعدد شعر راسى وراسك ، بنات من كل الجنسيات ، بنات فى قمه الجمال بس محبتش غيرك ، محطتش قلبى الا بين ايديكى انتِ ، مهتمتش باى حاجة غير انى اتجوزك وانتِ فى لحظة واحدة دوستى على كل ده بس عشان خاطر الفلوس انا مجروح يا شريفة وموجوع منك اوى ، وعلى قد ما ممكن احب شخص واعمل المستحيل عشانه على قد مانا ممكن اكرهه واعمل المستحيل عشان ابعده عنى
شريفة بعصبية : انت السبب فى كل اللى احنا فيه ده دلوقتى لو مكنتش تمسكت بانى ارجع الفلوس مكنش حصل كل ده
فارس : عارفة انا فكرت بيني وبين نفسى ، قولت هو انا ليه متمسك بانك ترجعى الفلوس هو انا كسبان او حتى خسران ليه هو انا مالى اصلاً ، بس اكتشفت انى الكسبان
شريفة : كسبت ايه ؟
فارس : عرفت انا ايه عندك وانك عشان حاجات تافهه ممكن تضحى بيا ، انتِ طالق يا شريفة
شريفة دموعها نزلت منها ومعرفتش ترد
فارس : جهزى نفسك عشان نخلص اجراءات الطلاق
شريفة بدموع (ومسكت ايد فارس وقعدت على ركبها) : ابوس ايدك يا فارس ما تسبنى انا ممكن اموت من غيرك
فارس (تأثر بـ شريفة) : انتِ بالفعل موتيني يا شريفة (وخرج)
شريفة بدموع وصوت عالى : يا فارس يا فارس متسبنيش يا فارس (وانهارت من العياط)
*_____________________________________________**___________________________*
فى مستشفى دار الفؤاد ......
(. راحت شريفة لـ امها تحكيلها عن موضوع فارس ، بس قابلت الدكتور وسألته على امها .)
شريفة : اخبار ماما ايه يا دكتور
الدكتور : لازم تعمل العملية فى اقرب وقت
شريفة : طيب ما تعملوها
الدكتور : انا مش هكدب عليكي حالة والدتك صعبة جداً انا من رأيي تسافر بره
شريفة : وهو بره هيفرق ايه عن هنا
الدكتور : لا هى مش هتسافر اى مكان بره هى تسافر تتعالج فى لندن هناك موجود اكبر مركز لـ علاج امراض الكبد
شريفة : حضرتك كده قلقتنى اكتر
الدكتور : وجودها هنا مضيعه للوقت ياريت تسافر فى اقرب وقت
شريفة : اوكى يا دكتور متشكرة
__**__**__**__**__
شريفة : اذيك يا ماما وحشتيني
مديحة : وانتِ كمان يا حبيبة ماما ، مالك شكلك متغير كده ليه
شريفة : فارس هيطلقنى يا ماما
مديحة : انا قولتلك راضيه يا شريفة
شريفة : انا قولتله انى هعمله اللى هو عاوزه بس قالى بعد ايه
مديحة : حاولى معاه تانى
شريفة : شكلها كده خلاص يا ماما فارس واخد موقف وصعب يتراجع عنه
مديحة : حاولى معاه تانى وانا لما اخرج ممكن اتكلم معاه
شريفة : اه صحيح الدكتور قال ان حالتك استقرت وممكن تخرجى
مديحة : طيب الحمد لله
شريفة : انا هسفرك بره يا ماما
مديحة : ليه
شريفة : عشان نطمن عليكي
مديحة : انتِ مش قولتى انه بيقول ان الحالة استقرت
شريفة : انتِ هتسافرى تعملى العملية
مديحة : عملية ايه لا طبعاً انا من يوم ما عرفت انى عندى الكبد وانا خايفة اعملها
شريفة : ماما حضرتك هتسافرى لندن فى اكبر مركز لـ علاج الكبد هناك هتتعلاجى وهتبقى كويسة جداً
مديحة : لا يا بنتى
شريفة : ليه يا ماما
مديحة : انتِ عرفانى طول عمرى بخاف من العمليات
شريفة : انا جنبك اهو متخافيش من حاجة وبعدين احنا نتكل على ربنا وهو هيقف جنبك وهيشفيكي
مديحة : طيب والفلوس
شريفة : هههههه يا ماما خلاص مبقاش فيه اكتر من الفلوس متشليش هم حاجة انتِ بس
بعد فترة من الصمت ........
شريفة : ماما عايزة اسأل حضرتك على حاجة
مديحة : اسألى يا بنتى
شريفة : انتِ ازاى سامحتيني بالسهولة دى !! ازاى نسيتي قسوتى عليكي بالسرعه دى
مديحة : انا مسامحتكيش اصلاً لانى مكنتش شايله منك
شريفة : انتِ ازاى طيبة كده
مديحة : انا مش طيبة يا شيفة انا ام واى ام عمرها ما بتشيل من ولادها ولا بتتوجع منهم قد ما بتتوجع عليهم انا كان يكفيني انى اشوفك مبسوطه مش انا بس اللى كده اى ام فى الدنيا كده ، ربنا ان شاء الله يكرمك وتعرفى يعنى ايه ام
شريفة : مبقتش معشمه يا ماما
مديحة : خلى عشمك فى ربنا يا حبيبتى
*_____________________________________________**___________________________*
فى ڤيلا عمر ابو الوفى .....
زياد : اياد يا اياد
اياد : ايوة يا زياد فى ايه
زياد : مالك سرحان فى ايه كده
اياد : احنا مبنسألش على شريفة خالص يا زياد مهما كان هى اختنا
زياد : عايز تسأل عليها
اياد : مينفعش نسيبها كده دى برضه ملهاش حد غيرنا
زياد : انا عن نفسى مش هسأل على حد وماليش اخوات غيرك عايز انت تسأل اسأل لكن انا اعفيني وياريت متحبليش سيرتها
اياد : مش صح ان احنا نقاطع بعض عشان الفلوس
زياد : انا مش مقاطعها عشان الفلوس ، هى لو خدت الفلوس كلها بس من جواها انسانه كويسة وكانت باقيه على الاخوة مكنتش هزعل منها كده بس هى حقيرة اصلاً
اياد : طيب انا هسأل عليها ومش هجيب سيرتك
زياد : انت حر
اياد : ولا تفتكر اروح ازورها
زياد : اعمل اللى انت عاوزه انا عن نفسى لا هزورها ولا هكلمها ولا حتى هسألك انت عليها
اياد : مالكش دعوة انت انا هروح ازورها خلينا احنا احسن منها
زياد : خليك انت احسن منها انا زى مانت قولت ماليش دعوة
اياد : اوكى
*_____________________________________________**___________________________*
تانى يوم .....
(. اتصلت شريفة بـ فارس .)
شريفة : اذيك يا فارس
فارس : بخير وانتِ
شريفة : انا الحمد لله كويسة
فارس : خير فيه حاجة
شريفة : انا هسيب الڤيلا بعد بكرة ان شاء الله ابقى ارجعلها بقى
فارس : هتسيبها !! طيب هتروحى فين ؟
شريفة : بابا كان سايبلي ڤيلا متقلقش
فارس بكبرياء : انا مش قلقان
شريفة : انا هبعتلك العنوان عشان تبقى تجيب المأذون وتجى تخلص اجراءات الطلاق
فارس : اوكى
شريفة : هو مينفعش .......... (وسكتت)
فارس : مينفعش ايه !!
شريفة : مفيش حاجة هستناك انت والمأذون اخر الاسبوع باى
فارس : باى
(. قفلت شريفة مع فارس وفضلت تعيط وبعد كده دخلت الشغاله عليها وقالت لها ان اياد مستنيها تحت ، غيرت شريفة هدومها ونزلتله .)
شريفة : اخيراً زورتنى
اياد : عامله ايه
شريفة : بخير وانت
اياد : انا كويس الحمد لله ، اخبار فارس ايه
شريفة : معرفش
اياد : متعرفيش ازاى
شريفة : انا وفارس هنطلق خلاص
اياد : ليه كده
شريفة : اهو النصيب بقى وقف لحد كده
اياد : حصل ايه وصلكوا لكده يعنى
شريفة : حصل حاجات كتير اوى مش موضوعنا دلوقتى طمنى عليك عامل ايه انت وزياد
اياد : احنا كويسين الحمد لله بنفكر نصفى كل املاكنا هنا ونروح نعيش فى امريكا
شريفة : امريكا !! ليه كده
اياد : كده احسن احنا مبقناش مرتاحين هنا
شريفة : وهتسبونى لوحدى انا مبقاش ليا حد غيركوا
اياد : لا متقوليش كده ان شاء الله متحسيش بوحدة
شريفة : انتوا لسه زعلانين منى
اياد : خلاص يا شريفة اللى حصل حصل انا مش جاى عشان اتناقش فيه
شريفة : وزياد مجاش معاك ليه
اياد : اظن العلاقة بينك وبين زياد عمرها ما هترجع تانى كويسه
شريفة : هى مكنتش كويسة اصلاً انا مطلعتش من الدنيا الا بيك انت
اياد : ربنا يخلينا لبعض
شريفة : ايه ده انت رايح فين
اياد : همشى بقى عشان عندى شغل وانتِ بقى ابقى طمنيني عليكي
شريفة : خلاص ماشى بس ممكن اطلب منك طلب
اياد : اكيد يا شيفة اتفضلى
شريفة : انا هنفصل عن فارس اخر الاسبوع ممكن تبقى معايا
اياد : حاضر هجيلك
شريفة : يعنى عشان مبقاش لوحدى ، هيقول عليا من غير اهل
اياد : لا يا حبيبتى متقوليش كده هجيلك بس انتوا هيكون فين
شريفة : فى الڤيلا اللى بابا سبهالى
اياد : خلاص كلميني هجيلك على طول
شريفة : ربنا يخليك ليا
اياد : خدى بالك على نفسك
(. خرج اياد من عند شريفة وركب عربيته واتصل على فارس .)
فارس : اذيك يا اياد
اياد : الحمد لله وانت
فارس : بخير
اياد : انا كنت عند شريفة وقالتلى ان انتوا هتطلقوا
فارس : اهاا تمام
اياد : هو ينفع اعرف السبب
فارس : هو مش سبب واحد ، دى اسباب كتير
اياد : لو عشان الفلوس فـ احنا خلاص مش زعلانين
فارس : انا منكرش ان حوار الفلوس ده هو السبب الرئيسى بس حالياً مبقاش هو مشكلتى مع شريفة
اياد : امال ايه المشكلة
فارس : انا بالنسبة لـ شريفة مجرد زوج ، منظر اجتماعى ووسيلة لـ الخلفة غير كده انا ولا حاجة
اياد : بس شريفة بـ تحبك
فارس : انا برضه كنت فاكر كده بس شريفة مبتحبنيش ولا بتحب حد هى بتحب نفسها
اياد : يعنى مفيش امل خالص
فارس : كان نفسى والله بس هو ده النصيب
اياد : حصل خير بس خلينا على اتصال
فارس : ان شاء الله (وقفلو)
*_____________________________________________**___________________________*
فـى خـلال اربـع شـهـور ......
- شريفة وفارس اتطلقوا وشريفة نقلت فى الڤيلا الجديدة
- زياد واياد سافروا اجازة بره مصر بقالهم شهر ولسه مرجعوش
- مديحة سافرت لندن هى وشريفة وعملت العملية بس برضه حالتها الصحية مش مستقرة
*_____________________________________________**___________________________*
فى ڤيلا شريفة .......
(. دخلت شريفة الاوضة على مامتها .)
شريفة : انتِ بتعملى ايه يا ماما
مديحة : بلم حاجتى يا حبيبتى عشان امشى
شريفة : تمشى تروحى فين
مديحة : هروح بيتى
شريفة : ليه كده يا ماما هتسيبينى لوحدى
مديحة : معلش يا حبيبتى انا مبعرفش اقعد بره بيتى وبقالى فوق الاربع شهور سيباه
شريفة : طيب وانتِ عايزة تروحى هناك ليه ما هنا برضه بيتك واحنا قاعدين مع بعض
مديحة : يا شريفة انا ما قولتلك انك ليكي اب تانى وكنتى عارفة هتعيشي ازاى مكنش فى بالى خالص اجى اعيش معاكى او اخد منك مليم واحد بس انتِ عالجتيني وعيشتينى الشهور اللى فاتت عيشة مكنتش احلم بيها بس برضه كل دى حاجاة مؤقتة ويدوب ارجع بيتي
شريفة : اهون عليكي تسيبينى يا ماما
مديحة : يا حبيبتى انتِ عندك حياتك وشغلك انا مش عايزة اعطلك انتِ تبقى تجى تزوريني وانا كمان هاجى ازورك
شريفة : يعنى انتِ هتبقى مطمنه عليا لما تسبينى كده لوحدى
مديحة : بصراحة اه انتِ ما شاء الله عليكي بقيتي شطورة وواعية وناصحة ميتخافش عليكي
شريفة : طيب روحى شوفى الشقة واقعدى شوية وتعالى تانى
مديحة : سبيها بظروفها
شريفة : ماشى يا ماما مش هضغط عليكي ووقت ما تحبى تجى كلميني ابعتلك السواق
مديحة : ماشى يا حبيبتى (ومشيت مديحة)
__**__**__**__**__
(. شريفة قاعده مع نفسها ، البيت فاضى عليها والدنيا مفهاش حد ، حاسة بالوحده تماماً .)
شريفة لنفسها >> انا خلاص مش هينفع اعيش لوحدى ، انا من يوم الطلاق مستنية فارس يرجعلى وبحاول معاه بس مفيش فايدة منه ، انا ولا كأنى قتلت له قتيل ، انا خلاص لازم اشوف حياتى لازم اتجوز عشان اخلف ، مش هفضل مستنية فارس على امل انه يرجعلى لحد ما الوقت يعدي ومعرفش اخلف لا منه ولا من غيره ، ايوة انا مينفعش اعيش كده وهتجوز
*_____________________________________________**___________________________*
فى ڤيلا محمود ابو المجد .......
رجاء : لما انت بتحبها كده طلقتها ليه
فارس : تانى يا ماما انا بجد فيا اللى مكفيني
رجاء : يا حبيبى انا زعلانه عليك ، اديك طلقتها وخلصت شهور العدة وانت زى مانت
فارس : بحبها حاجة وانى اكمل معاها دى حاجة تانية خالص ، مش كل اللى بنحبهم يا ماما نقدر نعاشرهم ونكمل حياتنا معاهم
رجاء : مانا قولتلك خد وقتك يا فارس اعرفها اكتر بس انت اللى كنت مستعجل
فارس : عشان كان مكتوب عليا اعيش كل ده
رجاء : يالا حصل خير اهم حاجة انك تخرج من الازمة دى
فارس : ربنا يسهل يا ماما
رجاء : طيب ما تشوف عروسة كويسة كده وتتجوزها وانت يعنى تعرف كتير
فارس : يعنىا اصلح الغلط بـ غلط اكبر منه
رجاء : ايه الغلط فى انك تتجوز
فارس : يا ماما انا لسه بحب شريفة مش عشان انساها اوا خرج من الازمة دى اتجوز غيرها فـ معرفش اتأقلم معاها ومعرفش احبها ولا حتى انسي شريفة فـ مبقاش مرتاح فـ اطلقها وبكده هرج لـ نقطة البداية تانى
رجاء : هو انت بتعقد نفسك وخلاص
فارس : انتِ عيزانى اتجوز يعنى
رجاء : ايوة
فارس : حاضر هتجوز
رجاء : امتى
فارس : اكيد مش هقوم دلوقتى اتجوز اسبوع كده واقولك هتجوز مين
رجاء : ربنا يسعدك يا حبيبي ويارب اشوف ولادك
فارس لنفسه >> مفيش احسن من حاضر ، انا اخدهم على قد عقلهم واعمل اللى انا عاوزه
*_____________________________________________**___________________________*
بعد كام يوم فى بيت مؤمن ......
(. الجرس بيضرب فتحت سميرة لقيت شريفة ، سميرة كانت مذهولة جداً .)
سميرة : شريفة !!!!
شريفة : اذيك يا طنط
سميرة : الحمد لله اتفضلى
شريفة : مؤمن موجود
سميرة : خير عيزاه فى ايه
شريفة : موضوع مهم جداً هو مش موجود ولا ايه
سميرة : لا اتفضلى هصحيهولك
(. دخلت شريفة قعدت فى الصالون ودخلت سميرة صحيت مؤمن من النوم اللى مكنش مصدق الا لما شافها بعينه .)
مؤمن : انتِ بتعملى ايه هنا
شريفة : اكيد مش جاية احاسبك على ورقة العرفى
مؤمن : انتِ كمان عايزة تحاسبيني مش كفاية اللى جوزك عمله
شريفة : جوزى مين !!
مؤمن : فارس بيه ابن سيادة الوزير
شريفة : هو عمل ايه
مؤمن : حكى لها
شريفة : امممم سورى حقك عليا بس عموماً متقلقش منه خلاص انا وفارس انفصلنا
مؤمن : انتِ جاية عايزة ايه
شريفة : بدون مقدمات كده انا جاية اعرض عليك الجواز
مؤمن مصدوم : الـ ايه !!! الجواز !! جواز مين ؟
شريفة : مالك يا مؤمن فيك ايه
مؤمن : ردى عليا جواز ايه
شريفة : جاية اعرض عليك تتجوزنى
مؤمن باستغراب : اتجوزك !!
شريفة : انا مش عارفة انت مالك مستغرب كده ليه
مؤمن : انتِ رجعالى بعد كل ده تقوليلي اتجوزك ومش عيزانى استغرب
شريفة : فكر فيها براحتك
بعد فترة من الصمت كان مؤمن بيفكر ..........
مؤمن : هتدفعى كام ؟
شريفة : هو مفروض انا اللى ادفع
مؤمن : ايوة طبعاً لان بعد ما فارس طلقك انتِ عايزة تغظيه ومالقتيس كوبرى غيري تستغفليه انا يا ستى موافق ابقى كوبرى بس لازم يبقى فيه مقابل
شريفة : هههههه لا ذكى ، عايز كام
مؤمن : مليون جنية
شريفة : اوكى
مؤمن : انتِ موافقة كده بسهولة
شريفة : ايوة
مؤمن : طيب هنتجوز امتى
شريفة : دلوقتى لو حبيت بس الفلوس مش هتاخدها الا بعد كتب الكتاب
مؤمن : خلاص نكتب الكتاب بكرة
شريفة : اوكى معنديش مانع هكتبلك العنوان بتاع ڤيلتى وتجيلى بكرة هناك
مؤمن : تمام
شريفة : على فكرة احنا هنعيش هناك وكمان مفيش فرح
مؤمن : اوكى يا شريفة
شريفة(كتبت له العنوان ورقمها) : هستناك بكرة
(. مشيت شريفة وراح مؤمن حكى لـ امه .)
سميرة : يا نهار اسود انت عايز تتجوز واحدة اتجوزت قبل كده وكمان من غير فرح مش عايزنى افرح بيك
مؤمن : يا ماما دى جوازة مؤقتة انا هاخد اللى انا عايزه وهخلع منها
سميرة : وانت عشان تاخد الفلوس تحرق قلبى انا عليك
مؤمن : لما اخد الفلوس نار قلبك هتبرد
سميرة : لا يا مؤمن انا مش موافقة
مؤمن : يا ماما دول مليون جنية
سميرة : ولا مال قارون يعوضنى عن فرحتى بفرحك وعروستك
مؤمن : يا ماما لما اخد المليون جنية هنتنقل نقلة تانية هتجوز واحدة تانيه وانا مستريح
سميرة : الطمع وحش يا مؤمن
مؤمن : متخافيش يا ماما دى فرصتى وجت لحد عندى اعوض بقى كل اللى فاتنى واخلص من شريفة كل اللى انا شوفته بسببها
سميرة : ربنا يستر ولو ان قلبى مش مطمن
مؤمن : متقلقيش يا ماما ابنك واعى
__**__**__**__**___
(. تانى يوم راح مؤمن لـ شريفة وكتبوا الكتاب وعاش معاها بس امها واخواتها ميعرفوش انها اتجوزت تانى .)
*_____________________________________________**___________________________*
بعد مرور فى ڤيلا شريفة ......
(. مديحة عملت مفاجأة لـ شريفة وراحت تزورها ، دخلت مديحة لقيت مؤمن فى ڤيلا شريفة .)
مديحة : مؤمن !!! انت بتعمل ايه هنا
مؤمن : انا اتجوزت شريفة يا طنط
مديحة : ايه !!! اتجوزت شريفة
مؤمن : اه من شهر وشوية
مديحة : هى فين
مؤمن : فوق فى اوضتها
(. طلعت مديحة وهى مشحونة جداً من اللى شريفة عملته .)
مديحة : شريفة يا شريفة اصحى
شريفة : ماما انتِ جيتي امتى
مديحة : لسه دلوقتى ، قولت اعملك مفاجأة لقيتك انتِ عملالى مفاجأة
شريفة : مفاجأة ايه مش فاهمه
مديحة : مؤمن بيعمل ايه هنا
شريفة : انا ومؤمن اتجوزنا
مديحة : من غير ما تقوليلي وبعدين مالقتيش الا مؤمن اللى كان طمعان فيكي
شريفة : يا ماما انا هخلف منه وبعدين هطلق مش هكمل معاه يعنى
مديحة : وانتِ ليه ما تجوزيش واحد بيحبك ومن توبك ومن نفس المستوى اللى انتِ عايشة فيه وتخلفى منه وتكملى معاه
شريفة : يا ماما الوقت بيجرى لحد ما الاقى اللى انتِ بتقوليه ده يكون السنتين عدوا وساعتها مش هعرف اخلف
مديحة : يا بنتى انتِ الف واحد لا مش الف ١٠٠ الف واخد يتمناكى ليه تعملى فى نفسك كده
شريفة : مضطره يا ماما عايزة ابقى ام
مديحة : طيب يا بنتى مش تختارى ابو ابنك
شريفة : انا مش فاهمه حاجة انتِ كنتى بتحبى مؤمن ايه اللى قلبك عليه كده
مديحة : عشان مؤمن كان جالى يتفق معايا ان احنا نعمل خطه سوا عشان يرجعلك
شريفة : بصى يا ماما انا عارفة ان مؤمن وافق عشان الفلوس حتى هو طلب مليون جنيه
مديحة : وادتيهمله
شريفة بصوت واطى : كتبتله شيك بـ اتنين مليون جنيه عشان اغريه اكتر بس ميتصرفش قبل سنة
مديحة : وهو مخدش باله
شريفة : لا خد باله وسألنى وقولتله انى عندى مشكله فى حساباتى فى البنوك بسبب ورثى مع اخواتى واول ما تتحل هكتبلك شيك بتاريخ جديد
مديحة : وهو صدقك
شريفة : ايوة صدقنى ، انا قولتله ان كتبت الشيك بتاريخ لسه مجاش عشان اضمنله حقه واضمن حقى انا كمان انه ميقدموش لـ النيابة
مديحة : انتِ بتلعبى لعبة خطيرة اوى وكمان مع واحد حقير
شريفة : متقلقيش يا ماما بنتك اقوى منه
مديحة : ربنا يستر
*_____________________________________________**___________________________*
فى شغل فارس ...
(. فارس سمع ان شريفة اتجوزت فـ قرر يتأكد من اياد .)
فارس : ايه يا عم انت عجباك الاقعدة بره
اياد : هههههه لا انا خلاص جاى اخر الاسبوع
فارس : تجى بالسلامه ان شاء الله
اياد : اخبارك ايه
فارس : انا بخير الحمد لله ، مبروك لـ شريفة
اياد : مبروك على ايه ؟!!
فارس : على جوازها
اياد : جواز مين !!!
فارس : جواز شريفة يا ابنى
اياد : هى شريفة اتجوزت !!
فارس : انت متعرفش
اياد : لا
فارس : نعم !! ازاى يعنى
اياد : لا انا هنزل مصر واشوف الموضوع ده واشوف اتجوزت مين
فارس : طيب تمام ابقى كلمنى لما تجى مصر
اياد : اكيد ان شاء الله (وقفلوا)
فارس لنفسه >> ايه الجوازة الللى فى السر دى !! ليه كده
اياد لنفسه >> هو الفُجر وصل بيكي للدرجة دى يا شريفة تتجوزى من غير ما تعرفى حد
*_____________________________________________**___________________________*
فى ڤيلا شريفة .....
شريفة : مؤمن غير هدومك لو سمحت
مؤمن : رايحين فين يا حبيبتى
شريفة : مش رايحين فى حتة بس فى ناس جاية
مؤمن : ناس مين
شريفة : اتصلت بـ المعمل عشان يبعت لنا ناس تاخد مننا عينات التحليل
مؤمن : انتِ برضه مصممه
شريفة : اه مصممه الحمل عايزة اعرف راسى من رجلى
مؤمن : يا حبيبتى اكيد مفيش عيب فى حد فينا بس هى مسألة وقت
شريفة : وانا معنديش وقت اضيعه لازم احمل فى اسرع وقت فاهم
مؤمن : مش هزعلك يا شيفة ولو انى متأكد ان احنا الاتنين مفناش حاجة وهى مسألة وقت
شريفة : طيب
(. جه الدكاترة بتوع المعمل خدوا عينات لـ التحاليل بتاعة شريفة ومؤمن عشان يشوفوا بيخلفوا ولا لا وقالوا انها هتتبعت بالايميل بعد يومين ، خدت شريفة التحاليل وراحت لـ الدكتور من غير مؤمن .)
*_____________________________________________**___________________________*
فى عيادة النساء والتوليد .......
شريفة : دى تحاليلي انا وجوزى يا دكتور اتفضل
الدكتور بيفحص التحاليل : امممم تمام ، تمام
بعد شوية ......
شريفة : ها يا دكتور فى مشكله
الدكتور : .........................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق