الحلقة الثامنة
جزء من حلقة سابقة :
شريفة : تمام كنت عايزة حاجة اخيرة
عمر : ايه هى
شريفة : .........................
*_____________________________________________**___________________________*
شريفة : انا عايزة اغير نسبى ، عايزة اسم حضرتك بعد اسمى
عمر : يا حبيبة قلبى (وخدها فى حضنه)
شريفة : ده حقك عليا يا بابا انا فى النهاية بنتك
عمر : ماشى يا حبيبتى بس نشوف المحامى هيقول ايه
شريفة : محامى ليه !!
عمر : يا حبيبتى تغيير النسب ده مش حاجة سهله وبعدين متنسيش ان فى ممتلكات كتير انا بيعهالك على انك شريفة مصطفى المنياوى منعرفش لو اتغير اسمك لـ شريفة عمر ابو الوفىٰ هيبقى ايه وضع الممتلكات دى
شريفة : اوكى يا بابا
عمر : هشوف الدكتور احمد خليل المحامى وان شاء الله ميكونش فيه عواقب
شريفة : ان شاء الله بس هو دكتور ولا محامى
عمر : ههههه واخد دكتوراة فى المحاماة
شريفة : مانا فاهمه بس بهزر
عمر : طيب دلوقتى لو بابا طلب منك طلب هتنفذيه ولا هتكسفيني
شريفة : لا طبعاً يا بابا اتفضل اطلب اى حاجة وانا انفذها
عمر : تزورى امك
شريفة : انا زعلانه منها اوى يا بابا
عمر : وهى عملت ايه زيادة عنى
شريفة : استغربت جرأتها وبجاحتها لما اتكلمت عن اللى حصل
عمر : بس متستاهلش منك كده ابداً
شريفة : انا هزورها عشان خاطرك
عمر : لا يا شريفة مش عشان خاطرى انا عايزك تزوريها عشان ده فرض وواجب عليكي
شريفة : يبقى يا بابا سبنى لحد ما احس انى صفيت من ناحيتها
عمر : ماشى براحتك بس افتكرى انك كده عاقة لامك
شريفة : انا هطلع اخد دش لانى جريت كتير وهنام شوية
عمر : ماشى وانا هنزل انا اروح الشغل
شريفة : اه صحيح يا بابا هو حضرتك عندك كام شركة
عمر : عندى تلاته وكل واحدة ليها فروع انا بعتلك واحده منهم تعتبر اكبر واحده فيهم
شريفة : طيب وانا يا بابا خريجة السن اشتغل ايه
عمر : اياد هيعلمك الشغل وشوفى عايزة تشتغلى مع مين معايا ولا مع اخواتك
شريفة : هو اياد وزياد فى شركة وحضرتك فى شركة امال التالته فيها مين ؟
عمر : انا مبقعدش فى شركة معينه انا رئيس مجلس الادراة وبعين ناس اثق فيهم هما نواب رئيس مجلس الادارة وانا بباشر الشغل فى التلت شركات اول باول
شريفة : اوكى يا بابا هطلع انام شوية
(. طلعت الشريفة السلالم لكن عمر نداها .)
عمر : شريفة
شريفة : ايوة يا بابا
(. عمر قرب منها شوية .)
عمر : اخواتك ميعرفوش انى بعتلك نص املاكى ياريت متعرفهمش دلوقتى انا هعرفهم فى الوقت المناسب
شريفة : اوكى يا بابا متقلقش
*_____________________________________________**___________________________*
فى بيت مديحة .....
(. الجرس بيضرب فتحت مديحة الباب لقيت سميرة ومؤمن .)
مديحة : اهلاً وسهلاً اتفضلوا
سميرة : اذيك يا مديحة عامله ايه
مديحة : بخير الحمد لله
مؤمن : انا شوفت شريفة النهاردة
مديحة : انتوا رجعتوا لبعض ؟
سميرة : بنتك مش عايزة ترجع لـ مؤمن خالص يا مديحة
مديحة : وانا المفروض اعمل ايه
سميرة : تعقليها يا مديحة وتقنعيها ترجع لـ مؤمن دول المفروض يكونوا متجوزين
مديحة : ده نصيب والنصيب وقف لحد كده
مؤمن : وهى ازاى سيباكى كده
مديحة : انا مش عايزة اسيب بيتي انا حرة
سميرة : مالك يا مديحة بتكلمينا من تحت ضرسك كده ليه
مديحة : مين يا سميرة اللى قال لـ عمات شريفة على موضوع ابوها ده
مؤمن : هما يبقوا عماتها اصلاً
مديحة : والله دى حاجة مش تخصك وبعدين انتوا فاكرين انى مش عارفة انتوا جايين ليه
سميرة : لا منعرفش انتِ فاهمه
مديحة : مؤمن راح شاف شريفة وشاف العز اللى هى عايشة فيه وبدأ يتحصر اكتر واكتر ويبقى عايزها اكتر واكتر وفاكر انى ممكن ارجعهاله
مؤمن : بصى يا طنط زى مانتِ جيتي اتفقتى معايا انى ارجع لـ شريفة عشان علاقتها بـ حضرتك تتحسن وانا فكرت ووافقت فاحنا ممكن نعمل اتفاق جديد
مديحة : اتفاق !!
مؤمن : ايوة اتفاق وهو ان احنا نحط ايدنا فى ايد بعض بحيث ان شريفة ترجعلى وعلاقتها تتحسن بحضرتك
مديحة : عايزنى اتفق على بنتى يا مؤمن
مؤمن : يا طنط هو احنا هنقتلها دى خطة بسيطه جداً هنعملها سوا هنأثر بيها على شريفة
مديحة : خطة ايه !!
مؤمن : هنقولها ان حضرتك تعبانه من فترة والمفروض تتحجزى فى المستشفى وهنفق مع اى دكتور او اى مستشفى طبعاً شريفة مش هتستحمل كده مهما كانت زعلانه وهتفضل تروح جاية عليكي ده لو مجتش اقامت معاكى بالتدريج هتنسى وهترجعلك وانا هستغل وجودها معاكى واقربلها تانى
مديحة : هى وصلت للدرجة دى وكل ده عشان ايه !! عشان الفلوس
سميرة : وانتِ فضحيتى بنتك ونفسك الفضيحة دى كلها ليه مش عشان الفلوس برضه
مديحة : عشان اعيشها العيشة دى بس مش عشان اعيش على قفاها ، جيت على نفسى وقبلت اعيش لوحدى من غيرها بس المهم تكون مبسوطة بس انت جاى تلعب عليها عشان فلوسها مش عشان بتحبها
مؤمن : يا طنط بس افهميني
مديحة : انا مش هتكلم فى الموضوع ده تانى ولا هساعدك بنتى مش صغيره وتقدر تختار والموضوع ده انتهى مش هتكلم فيه تانى لا دلوقتى ولا بعد عشر سنين
مؤمن : متشكر يا طنط يالا يا ماما (وخرجوا)
مديحة (بتقفل الباب) : فى ستين داهية
*_____________________________________________**___________________________*
بالليل فى ڤيلا عمر ابو الوفىٰ ........
اياد : ايه الشياكة دى انتِ خارجة
شريفة : اه خارجة
اياد : لوحدك كده
شريفة : لا بابا عازمنى بره
اياد : ايوة بقى وطبعاً انا ماليش مكان
شريفة : لا طبعاً تعالى معانا
اياد : لا انا عندى خروجه مع صحابى اصلاً وبكرة انا عاملك مفاجأة
شريفة : مفاجأة ايه
اياد : مانا لو قولتلك عليها متبقاش مفاجأة
شريفة : طيب اى تلميح كده
(. هنا دخل زياد .)
زياد : لا مفيش تلميح دى مفاجأة يعنى تعرفيها فى وقتها
شريفة : انت عارفها يا زيزو
زياد : هو الواطى ده مقالكيش انى مشترك معاه فى نفس المفاجأة
شريفة : لا مقاليش
زياد : واطى
شريفة : طيب عن اذنكوا بقى عشان اتأخرت على بابا (وخرجت)
اياد : بس انت مش مشترك معايا فيها
زياد : ماهو عشان انت واطى كان المفروض تقولى
اياد : مكنتش هتوافق وهتعملى فيها فيلم
زياد : لا والله بالعكس
اياد : بس انت عرفت ازاى
زياد : مالكش دعوة
__**__**__**__
فى اوضة عمر ...
شريفة : واو ايه الشياكة دى
عمر : مش خارج معاكى
شريفة : هو احنا رايحين فين
عمر : عازمك على العشا بره زى ما قولتلك
شريفة : طيب مش كنا خدنا اياد وزياد
عمر بصوت واطى : لا لا احنا اصلاً هنقابل المحامى انا زى ما قولتلك مش عايزهم يعرفوا حاجة دلوقتى
شريفة : يعنى هنروحله الاول وبعدين هنتعشى
عمر : ايوة بالظبط
*_____________________________________________**___________________________*
فى مكتب المحامى .......
عمر : دلوقتى انا بعت نص ممتلكاتى لـ شريفة بس باسم شريفة مصطفى المنياوى
أحمد : اه مانا فاكر
عمر : شريفة تبقى بنتى بس منسوبة لشخص تانى
أحمد : تمام
عمر : دلوقتى هى عايزة تغير النسب لـيا انا يعنى تبقى باسمى
أحمد : وانتوا خايفين ان الممتلكات تروح منها
عمر : بالظبط ، هل بقى ينفع تغير النسب ولا مش مهم
أحمد : لا طبعاً ينفع بس زى ما قولت لحضرتك سابقاً الموضوع هيبقى فيه محكمة
عمر : ايه رأيك يا شيفة
شريفة : مش مشكلة يا بابا
أحمد : بس حضرتك شخصية مشهورة فى مجال البيزنس وده معناه ان المجلات الاجتماعية ممكن تنشر حاجة زى كده
عمر : معنديش مانع بس اهم حاجة موضوع نص ممتلكاتى ده ميخرجش برانا احنا التلاته
أحمد : هنحاول نكتم بالموضوع ان شاء الله
شريفة : طيب دلوقتى احنا مطلوب مننا ايه
أحمد : حضرتك هتعمليلي توكيل وانا هقدم تحليل الـ DNA اللى يضمن نسبك لـ عمر بيه وكمان هقدم صورة من اوراق الملكية اللى تثبت ملكيتك وهنطلب تغيير النسب وتحويل الممتلكات دى باسمك الجديد
شريفة : طيب وايه الاجراءات اللى المحكمة هتاخدها
أحمد : هى الاول هتثبت النسب وهتتأكد من ملكيتك للمتلكات دى وبعدين هتغيري اسمك وهتعملى رقم قومى جديد وهتتنقل كل الممتلكات ليكي بالاسم الجديد
عمر : تمام وان شاء الله تحاول تخلصلنا الليلة دى بسرعه
أحمد : متقلقش يا افندم كل اوراقها هتخلص بسرعه
عمر : اوكى يا دكتور أحمد متشكر جداً وبكرة ان شاء الله شريفة هتعملك التوكيل
أحمد : ان شاء الله
(ومشيوا)
*_____________________________________________**___________________________*
تانى يوم الصبح فى النادى ......
(. شريفة كانت بتجرى كعادتها وفى واحد بيجرى قصادها لو زودت سرعه بيزود ولو قللت بيقلل وبعد كده سبقها وهى خلصت وراحت تستريح بعد الجري لقيته قاعد على تربيزتها .)
فارس : على فكرة انتِ سريعة جداً ما شاء الله وشكلك رياضية كمان
شريفة : متشكرة (وبتلم حاجتها)
فارس : طيب ايه مش هتقعدى تستريحي
شريفة : لا هقعد بس على تربيزة تانية اصل واضح انها ضاقت بيك اوى (ومشيت)
فارس (قام وراها) : استنى بس
شريفة : افندم
فارس : انا فارس
شريفة : تشرفنا (ومشيت)
فارس (وقفها) : ايه يا بنتى انت كل حاجة عندك جرى تقولى كلمتين وتجرى
شريفة : عايز ايه يا استاذ فارس
فارس : عايز اتعرف عليكي
شريفة باستهزاء : والله !! هههه انت بقى من بتوع نتعرف
فارس : لا بتوع نتعرف هما اللى منى
شريفة ابتسمت
فارس : طالما ابتسمتى يبقى ينفع
شريفة : انا ابتسمت عشان دمك خفيف مش اكتر بس مش معنى كده انى ينفع اتعرف عليك
فارس : ليه !! مرتبطة
شريفة : وانت مالك
فارس : اصل حتى لو مرتبطه احنا ممكن نبقى اصحاب عادى
شريفة : هههههه والله ده على اساس انى مرتبطه باريال
فارس : بس انتِ مش مرتبطه صح
شريفة : فكك منى (ومشيت)
فارس لنفسه >> اهااا مؤدبة بقى وهتتعبنى بس انا نيتى خير يعنى
__**__**__**__
(. شريفة خارجة من غرفة تبديل الملابس لقيت فارس فى وشها .)
فارس : ماهو انتِ مش هتعرفى تهربى منى
شريفة : لا على فكرة اعرف اخلص منك انا عندى اخين لو عرفوا بس انك بتضايقنى شوف بقى هيعملوا فيك ايه
فارس : يا سلام طيب مانا عندى برضه اخين لو عرفوا انك بتضايقينى هيعلقوكى
شريفة : انت فاكر ان دمك خفيف
فارس : انتِ قولتيلي ان دمى خفيف
شريفة : مش معنى كده انك تفتكر نفسك ظريف وتقعد تروش
فارس : بجد بقى انا عايز اتعرف عليكي انا بقالى كتير بشوفك رايحة جاية هنا فى النادى وبحاول امنع نفسى مكلمكيش بس خلاص مبقتش قادر
شريفة : انت فاضى بقى مش وراك حاجة تعملها غير القعدة فى النادى
فارس : امممم لا انا مش فاضى بس انا اصلاً شغلى ............
شريفة تقاطعه : مش عايزة اعرف عن اذنك
(. ومشيت شريفة وحاول فارس يوقفها لكنها ركبت العربية والسواق طار بيها وراحت هى وابوها الشهر العقارى وعملوا توكيل للمحامى .)
*_____________________________________________**___________________________*
فى احدى شركات عمر ابو الوفىٰ ......
فى الاستقبال ....
شريفة : لو سمحت مكتب رئيس مجلس الادارة او نائبه فين
موظف الاستقبال : حضرتك اللى موجود حالياً اياد بيه ابو الوفى
شريفة : اوكى فين مكتبه
موظف الاستقبال : حضرتك مين
شريفة : انا شريفة عمر ابو الوفىٰ
موظف الاستقبال : اهلاً يا افندم اهلاً وسهلاً اياد بيه فوق يا فوزى يا فوزى ، طلع الهانم لمكتب اياد بيه
شريفة : متشكرة جداً
__**__**__**___
فى مكتب اياد ....
(. خبطت شريفة ودخلت .)
شريفة : صباح الخير يا سيادة نائب رئيس مجلس الادارة
اياد : ايه الصباح الجميل ده (وباس دماغها)
شريفة : انا روحت النادى وكالعادة زهقت روحت على البيت غيرت وجيتلك هنا
اياد : فى حاجة ولا ايه
شريفة : اه يا يودة فيه انا زهقانه جداً من قعدة البيت ومتعودتش تبقى حياتى عبارة عن اكل وانتخة
اياد : طيب ايه تحبى تسافرى بره
شريفة : انا عايزة اشتغل
اياد : تشتغلى !!
شريفة : ايه مفيش ليا شغلانه هنا ؟
اياد : لا يا حبيبتى فيه بس انا عايزك تبقى مستريحة
شريفة : شوفلى اى شغلانه هنا يا اياد بجد انا زهقانه مووت
اياد : خلاص تعالى معايا هنا فى مجلس الادارة
شريفة : وانا هفهم ايه بقى فى الشغل ده
اياد : ادينا مع بعض وهعلمك
شريفة : طيب مينفعش امسك اى شركة تانية او حتى فرع للشركة
اياد : يا ستى لما تتعلمى الشغل هسيبلك الشغل كله وانتخ انا بقى
شريفة : ربنا يخليك ليا يا يودة (وحضنته)
(. هنا دخل زياد .)
زياد : ايه جو العشق الممنوع ده
شريفة : هههههه عشق طبعاً بس مش ممنوع ده اخويا
زياد : الا عمرى ما شوفت منك حضن زى ده
شريفة : هو انت سايبنى اتعود عليك دايماً بترخم عليا وخلاص
اياد : سيبكوا من الكلام ده دلوقتى شريفة هتجى تشتغل معايا هنا وانت بقى ممكن تروح تشتغل فى الشركة التانية
زياد بيحاول يتقبل الصدمة : بجد يا شيفة كويس عشان انا أأنتخ شوية
شريفة : سيبكوا بقى من كل ده عندى ليكوا مفاجأة حلوة اوى
زياد واياد : خير
شريفة : انا قررت اغير نسبى
اياد بفرحة : براڤو يا شريفة احلى حاجة عملتيها
زياد : لا لا لا كده خبطتين فى الراس توجع
شريفة : يعنى ايه
زياد : يعنى قلبى ميستحملش الفرحتين دول شغل ونسب
اياد : يالا يا شيفة روحى انتِ عشان مفاجأة النهاردة هتبقى بالليل
زياد : اه صحيح البسى فستان شيك اوى واعملى شعرك ومكياج حلو كده عشان الليلة هتبقى غير اى ليلة
شريفة : هو فى ايه اوعوا تكونوا هتجوزونى
اياد : لا لا مش للدرجة دى
شريفة : اوكى اشوفكوا بالليل (ومشيت)
زياد : يالهوى ياما نسب وشغل
اياد : مالك
زياد : انا كنت بدأت افتكر ان شريفة نسيت موضوع النسب ده وبكده مش هتورث لانها مش مكتوبة باسم ابوك تقوم تتنسب لابوك وكمان تجى تشتغل
اياد : وايه مشكلة الشغل
زياد : كده هتبقى عارفة الدنيا ماشية ازاى وداخل الارباح كام
اياد : تعرف يا زيزو تسيبها على ربنا وهو هيكرمك
زياد : فكك منى يا عم الشيخ
اياد : طيب خلصت الحوار اللى قولتلك عليه
زياد : متقلقش الليلة هتبقى عالمية
اياد : ربنا يسهل
*_____________________________________________**___________________________*
بالليل فى ڤيلا عمر ابو الوفىٰ .........
(. شريفة فى اوضتها لابسه فستان شيك جداً وعامله شعرها ومكياج حلو اوى ، دخل عليها زياد واياد .)
اياد : خلصتى
شريفة : اه
زياد : ايه القمر ده كان لازم يعنى تبقى اختى
شريفة : بطل قلة ادب وبعدين ايه الشياكة اللى انتوا فيها دى
اياد : منجيش جنبك حاجة
شريفة : لا والله ده انتوا زى القمر ربنا يحفظكم من العين يارب
زياد : يارب
شريفة : قولولى بقى ايه المفاجأة
اياد : بصى كده من البلكونة
(. بصت شريفة من بلكونة اوضتها ولقيت ..................... .)
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق