الحلقة السابعة
جزء من حلقة سابقة :
(. وراحوا المعمل وعمل اياد زى ما قال لـ شريفة وقال لابوه ان شرطها عشان تروح معاه ان التحليل يتعمل قدامها وفضل اياد وشريفة فى المعمل لحد ما نتيجة التحليل طلعت .)
الدكتور : نتيجة التحليل طلعت
اياد : وايه الاخبار
الدكتور :....................
*_____________________________________________**___________________________*
الدكتور : الجينات الوراثية متطابقة
اياد : يعنى هى بنته
الدكتور : ايوة بنته
اياد : متشكر جداً يا دكتور
(. وخرج اياد وشريفة من المعمل .)
فى عربية اياد .....
اياد : ارتحتى كده
شريفة : اقولك حاجة وتصدقنى
اياد : قولى
شريفة : انا على قد مانا مبسوطه ان ليا اخ زيك بس كان نفسى يطلع التحليل غير كده
اياد : طيب ليه يا شريفة
شريفة : خايفة من الفضيحة
اياد : مفيش فضيحة ان شاء الله
شريفة : احنا رايحين على فين كده
اياد : على الڤيلا
شريفة : ڤيلا ايه
اياد : ڤيلتنا
شريفة : لا يا اياد انا مش مستعدة دلوقتى خالص
اياد : لا هتروحى معايا ولازم تسمعى كلام اخوكى اي نعم انا مش الكبير بس برضه الراجل
شريفة : طيب وهترجعنى على البنسيون
اياد : لا طبعاً هتعيشي معانا ومفيش خيارات تانية اصلاً
شريفة : طيب وديني بس على البنسيون ادفع الحساب واجيب حاجتى
اياد : يعنى مش هتزوغى منى
شريفة : لا والله هروح معاك
اياد : ماشى فين بقى البنسيون ده
(. وصفت شريفة لـ اياد المكان وراحت دفعت باقى حسابها وخدت حاجتها ومشيت مع اياد .)
*_____________________________________________**___________________________*
فى ڤيلا عمر ابو الوفىٰ ......
(. عمر قاعد فى جنينه الڤيلا وجه عليه اياد وشريفة ، عمر اول ما شاف شريفة قام من مكانه .)
عمر : شريفة اذيك يا حبيبتى قلقتينا عليكي
اياد : معلش يا بابا هى بس كانت عايزة تفكر مع نفسها كده
عمر : اهم حاجة انها بخير
اياد : سلمى على بابا يا شريفة
(. قربت شريفة من عمر ومدت ايدها وهو شدها وحضنها ، شريفة اتصدمت الاول ومحضنتوش بس بعد شوية حسيت بابوها وحضنته وعيطت بهستيرية .)
عمر : انا اسف يا شريفة حقك عليا انا
شريفة بدموع : ليه عملتوا كده
عمر : انا اسف يا شريفة سامحينى
اياد : خلاص يا بابا هى مسمحاك
عمر ماسك شريفة من كتفها : مسمحانى يا شريفة
شريفه بتهز دماغها بالموافقة
عمر : عايز اسمحها منك
شريفة : مسمحاك يا بابا
(. عمر خدها فى حضنه تانى .)
اياد : طيب انا هدخل جوه واسيبكوا لوحدكوا شوية
(. زياد كان واقف فى شباك اوضته بيتفرج على المنظر ده واول ما دخل اياد نزله .)
زياد : حلو الفيلم اللى شغال ده
اياد : طيب مش هتخرج تسلم عليها
زياد : انت جبتها ليه
اياد : امال اسيبها تقعد فى بنسيون معفن فى حتة زباله
زياد : رجعها لامها
اياد : انت اتجننت
زياد : انا مش فاهم انت بترسم علي ايه !! مبقتش فاهمك خالص
اياد : عايز تفهم ايه
زياد : عايز افهم انت فعلاً موافق على ان شريفة تجى تعيش معانا وتاخد ٢٠٪ من الميراث
اياد : اه موافق
زياد : وموافق ليه بقى ؟
اياد : موافق تجى تعيش معانا لانها اختنا ومش هنرميها فى الشارع ومش هنسيبها تعيش العيشه اللى هى عيشاها دى
زياد : وبالنسبة للميراث
اياد : زى مانت ليك حق هى ليها حق
زياد : انت مش كنت بتقولى احنا نسايسهم ونعاملها كويس كنت بتقول كده فعلاً ولا قصدك نثبتهم
اياد : عايز الصراحة
زياد : اكيد
اياد : كنت بثبتك انت
زياد : نعم !!
اياد : اللى سمعته ، دى اختنا وانا عملت التحليل بنفسى على اخر الزمن هنرمى لحمنا
زياد : ماشى يا اياد مش هتخانق معاك بس ابقى كلمنى بقى عن الاخوة لما تجى الست هانم دى تلهف منك كل حاجة ابوك قبل فلوسه
اياد : ماشى ، يا سامية (مديرة البيت)
سامية : ايوة يا ابنى
اياد : ابعتى حد ياخد الشنطة دى يطلعها الجناح اللى جهزناه لـ شريفة وقولي لهم فى المطبخ يجهزوا غدا كويس
سامية : حاضر
زياد : ههههههه
اياد : فى ايه
زياد : محسسنى انك متربى معاها
اياد : خلي عندك دم انا طالع اخد دش
(. طلع اياد فوق وخرج زياد يسلم على شريفة ، شريفة وعمر كانوا قاعدين بره وعمر كان بيكلم مديحة يطمنها على شريفة .)
عمر : خلاص يا مديحة متقلقيش هى عندى ومعايا
مديحة : طيب عايز اكلمها
عمر : تكلميها
(. شريفة شاورت انها مش عايزة .)
عمر : هى دخلت جوه شكلها بتغير هدومها
مديحة : بتغير ولا قالتلك مش عايزة تكلمنى
عمر : اطمنى بقى هى معايا ومع اخواتها
مديحة : ماشى يا عمر ابقى طمنى عليها
عمر : حاضر (وقفلوا)
زياد : اهلاً وسهلاً يا شريفة نورتى البيت
شريفة : ده نورك ، انت زياد اكيد
زياد : اه
شريفة : انا بعد كده هعلمكم بالدقن ، اياد عنده دقن خفيفة
زياد : بالظبط ، المهم انك نورتى المكان
شريفة : متشكرة
عمر : يالا يا شيفة اطلعى غيري كده وخدى دش واستريحي لحد ما الغدا يجهز
زياد : وانا هوصلك للجناح بتاعك
عمر : على فكرة الولاد هما اللى عملوا ليكي الجناح ده
شريفة : ربنا يخليهملى
عمر : ربنا يخليكوا لبعض
*_____________________________________________**___________________________*
بعد مرور شهرين ....
- شريفة عاشت مع ابوها واخواتها ومبسوطه جداً ومزرتش امها ولا كلمتها من يوم ما سابت البيت واستقالت من الشغل
- زياد بيحاول يتقبل شريفة لكنه خايف من انها تاخد من الميراث
- اياد بيعامل شريفة احسن معامله وبيخرجها وبيفسحها وسافر معاها عشان تتفسح
- مؤمن بيحاول يعيش حياته بس لسه بيفكر فى شريفة وحاول يكلمها بس هى مبتردش
- مديحة بتطمن على شريفة من عمر
*_____________________________________________**___________________________*
فى ڤيلا عمر ابو الوفىٰ .......
(. شريفة وزياد واياد قاعدين بيتفرجوا على التلفزيون .)
اياد : مين اللى عمال يتصل ده ومبترديش عليه
شريفة : ده مؤمن
اياد : خطيبك ؟
شريفة : اللى كان خطيبي
اياد : انتِ سبتوا بعض ليه
زياد : مش اغتنت بقى لازم تسيبوا
شريفة : اغتنيت !!!
زياد : ايوة بتهيألى مؤمن ده ميمشيش مع الوضع اللى انتِ فيه دلوقتى
شريفة : على فكرة انا سيبت مؤمن قبل ما اقرر الاعتراف بنسب ابوك اصلاً
اياد : هو بيهزر يا شريفة متزعليش
شريفة : وانا هزعل ليه مانا خلاص اتعودت على زياد وكلامه بس عموماً انا سيبته عشان هو سابنى الاول عشان خاطر خاف من الفضيحة ولما عرف املاك ابوك رجعلى عشان كان طمعان فيا
اياد : بس ده ميمنعش انه بيحبك
شريفة : يا اياد انا حطيت كل حاجة فى كفة ومؤمن فى كفة واخترته هو لكن هو حط شرفى وسمعتى فى كفة والفلوس فى كفة واختار الفلوس
اياد : بس انتِ لسه بتحبيه
شريفة : بحبه اه لكن مبحترموش
زياد : الا انتِ يا شريفة مبتروحيش لمامتك ليه
شريفة : عشان زعلانه منها اوى
زياد : هههههههه زعلانه منها ومش زعلانه من ابوكى ولا عشان هو .......
اياد يقاطعه : فى ايه يا زياد ما بلاش الكلام ده
شريفة : سيبه يا اياد مانا قولتلك اتعودت وعلى فكرة يمكن ابويا وامى غلطوا نفس الغلطة بس بابا قالى انه غلط فى حقى واعتذرلى بس ماما مكنتش معترفة بغلطها وبعدين لما تحس ان الشخص اللى انت عايش معاه عمرك كله اتحول لـ بنى ادم تانى انت متعرفوش غصب عنك بتنفر منه
اياد : ما علينا من الحكاوى دى ، قوليلي مش هتغيري النسب بقى بابا زعلان اوى من الموضوع ده
شريفة : ربنا يسهل يا اياد انا لسه مش قد المواجهة دى
اياد : اوكى يا شيفة براحتك
*_____________________________________________**___________________________*
فى بيت مديحة .......
(. الجرس بيضرب وفتحت مديحة لقيت كريمة وثريا عمات شريفة ومحمود عمها، دخلوا وقعدوا شوية .)
محمود : وشريفة لسه مسافرة مع الشغل
مديحة : جت وسافرت تانى
كريمة : ايه الحكاية دى
مديحة : حكاية ايه
ثريا : انتِ ازاى تسيبي البنت تسافر لوحدها
كريمة : الموضوع ده فيه إن
مديحة : بلا إن بلا مإناش انتوا عاملين تلفوا وتدوروا على ايه
محمود : بصى بقى يا مديحة سعيد ابنى راح سأل على شريفة وعرف انها مبتروحش الشغل بقالها شهرين
ثريا : اتكلم دوغرى يا محمود وقولها على الكلام اللى سمعناه
مديحة : خير !! سمعتوا ايه
سعاد : سمعنا ان شريفة مش بنت مصطفى اخويا الله يرحمه
مديحة : وايه كمان ؟
ثريا : وده مش مكفيفكى
محمود : اهدوا يا جماعه ومديحة هتفهمنا اصل القصة
مديحة : ايوة شريفة مش بنت مصطفى الله يرحمه دى بنت واحد تانى وهى راحت تعيش مع ابوها الحقيقي عندكوا مانع
محمود : يعنى ايه مش بنت مصطفى !! وعاشت معاه السنين دى كلها على اساس ايه
سعاد : وهو كان عارف انها مش بنته
مديحة : ايوة كان عارف وصمم يكتبها باسمه
ثريا : احنا مش فاهمين حاجة !!
مديحة : انا كنت متجوزة قبل مصطفى واطلقت وكنت حامل ومصطفى اتجوزنى وقرر يكتب شريفة باسمه عشان جوزى الاولانى ميخدهاش منى
محمود : ايه اللى انتِ بتقوليه ده انا شاهد على عقد جوازكوا وكان مكتوب فيه البكر الرشيد
مديحة : والله دى بقى روح اسأل فيها اخوك وابويا الله يرحمهم
سعاد : واحنا ايه يأكدلنا انك مش ست خاطية
مديحة : مش مطلوب منى أأكدلك حاجة زى كده
ثريا : هو الفُجر وصل بيكي للدرجة دى
مديحة : بقولكوا ايه ميراث مصطفى الله يرحمه مخدناش منه حاجة ولو ان مكنش فيه حاجة نخدها اصلاً
محمود : وبالنسبة للبيت اللى انتِ قاعده فيه
مديحة : بتهيألى ساعة اعلان الوراثة اتثبت ان البيت ده مكتوب باسمى غير كده احنا مخدناش حاجة
محمود : يبقى تتنازلى عنه لانه مش من حقك لان شريفة مش بنته
مديحة : بس انا مراته
ثريا : بس ..............
مديحة تقاطعها : اتفضلوا اخرجوا بره (بزعيق) بره
(. وخرجوا وهما مذهولين من قوة مديحة وجبروتها ومصدومين من اخوهم انه قبل حاجة زى كده .)
*_____________________________________________**___________________________*
فى احدى النوادى الاجتماعية ......
(. شريفة نزلت الصبح النادى وكانت بتجرى واول ما خلصت راحت عشان تستريح .)
مؤمن : اذيك يا شريفة
شريفة : اهلاً يا مؤمن
مؤمن : تصدقى معرفتكيش
شريفة : وانا المفروض اعملك ايه
مؤمن : قصدى الفلوس بانت عليكي لون شعرك متغير ستايل لبسك بتجى النادى تجرى
شريفة : عايز ايه يا مؤمن
مؤمن : نستينى خلاص الفلوس غيرتك عليا يا شريفة
شريفة : اه نسيتك والفلوس غيرتنى
مؤمن : مش دى الفلوس اللى كنتى مش عايزة تاخديها عشان الفضيحة ضحيتى بالشرف مقابل الترف
شريفة : مالكش دعوة
مؤمن : انا قصدى انك عملتى اللى كنت بقولك عليه وعملتى الحاجة اللى انتِ سبتيني عشانها
شريفة : عارف يا مؤمن انا خدت الفلوس مخصوص عشان انت وامى تتحصروا عليا لما تشوفيني عايشة الحلم اللى كنتوا عايزين تعيشوه
مؤمن : حتى امك كمان رمتيها
شريفة : اه رميتها زى ما رميتك بالظبط عن اذنك (وخدت شنطتها وراحت تغير هدومها)
مؤمن بصوت عالى : هتندمى يا شريفة
شريفة اتلفت : هندم اكتر لو رجعت لـ بنى ادم زيك (ومشيت)
*_____________________________________________**___________________________*
فى ڤيلا عمر ابو الوفىٰ .........
عمر : ايه ده يا شيفة انتِ رجعتى بدرى كده ليه
شريفة : زهقت
عمر : مش هتروحى تزورى مامتك بقى يا شريفة
شريفة : لا مش عايزة
عمر : على فكرة عماتك واعمامك وخلاتك وكل الناس عرفت الحقيقة
شريفة : عماتى مين اخوات حضرتك
عمر : لا اخوات باباكى التانى مصطفى المنياوى
شريفة : يعنى اتفضحنا
عمر : لا مامتك قالت لهم نفس القصة اللى قالتهالك قبل كده
شريفة : طيب كويس
عمر : وانا كمان قولت للناس ان كنت متجوز قبل ميرڤت مراتى وخلفت بنت وكانت عايشة بره مع مامتها
شريفة : بابا كنت عايزة اطلبك منك تلت طلبات
عمر : اوؤمرى يا حبيبة بابا
شريفة : انا عايزة اعمل اى حاجة صدقة على روح بابا مصطفى
عمر : حاضر يا حبيبتى هعمله صدقة على روحه بس تحبى تبقى ايه
شريفة : ممكن مسجد ودار ايتام
عمر : حاضر والطلب التانى
شريفة : عايزة اشتغل
عمر : طيب يا حبيبتى ما تروحى الشركة بتاعتك
شريفة : هو انا ليا شركة
عمر : ايوة طبعاً انا بعتلك شركة من شركاتى
شريفة : تمام كنت عايزة حاجة اخيرة
عمر : ايه هى
شريفة : .........................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق