الحلقة الثالثة
جزء من حلقة سابقة :
مديحة : مش عايزة تعرفى مين اخوكى
شريفة : مين !!
مديحة : ................................
*_____________________________________________**___________________________*
مديحة : فاكرة يوم ما ........... (وسكتت)
شريفة : يوم ايه يا ماما كملى !!
مديحة : بصى هى حاجة صعب تستوعبيها بس هى دى الحقيقة
شريفة : اوعى تقوليلى ان مؤمن هو اخويا وجو الافلام الهندى ده
مديحة : فاكرة يوم ما روحنا المستشفى
شريفة : اه لـ جوز صاحبتك
مديحة : فاكرة الولدين التوأم اللى احنا شوفناهم هناك
شريفة : اه بتهيألى اسمهم زياد واياد
مديحة : هما دول اخواتك
شريفة : نعم !! انتِ بتقولى ايه اخواتى ازاى
مديحة : يعنى ايه اخواتك ازاى
شريفة مصدومه : يعنى بابا كان متجوز عليكي مثلاً وخلفهم ولا ايه
مديحة : هو فعلاً اتجوز عليا
شريفة : اتجوز صاحبتك
مديحة : ام زياد واياد مش صاحبتى ولا عمرى شوفتها
شريفة : يعنى بابا اتجوز عليكي ام الولاد دول
مديحة : اه
شريفة : بس ليه بابا يعمك كده ده بيحبك اوى وبعدين ........ (وسكتت)
مديحة : وبعدين ايه ؟
شريفة : انتِ سألتى فى استقبال المستشفى عن واحد اسمه عمر ابو الوفى واياد وزياد ولاده يبقى ازاى دول اخواتى
مديحة : عشان انتِ بنت عمر ابو الوفى
شريفة مصدومه : ايه !! بنت مين ؟ امال مين مصطفى المنياوى
مديحة : ده اللى تبناكى
شريفة : تـ ايه !!!! انتِ بتقولى ايه انتِ اكيد بتخرفى انا بنت مين
مديحة : بنت عمر ابو الوفى
شريفة : وانتِ تبقى مين
مديحة : انا امك
شريفة : انا مش فاهمه حاجة
مديحة : مش فاهمه ايه وانا افهمك
شريفة بعصبية : مش فاهمه اى حاجة انا ازاى بنتك ومش بنت جوزك وبنت رجل تانى
مديحة : طيب اهدى بس وانا هفهمك كل حاجة
شريفة : مش عايزة اتنيل اهدى ممكن تفهميني
مديحة : من ٢٥ سنة اتجوزت عمر ابو الوفى وبعدين اهله طردونى عشان كنت من عيلة فقيرة وهما عيلة غنية جداً وطلقنى عمر وانا كنت حامل فيكي ، مصطفى المنياوى ده كان واحد بيحبنى ولما عرف اللى حصلى اتجوزنى بعد شهور العدة وصمم نكتبك باسمه عشان عمر مياخودكيش منى
شريفة : انتِ بتقولى ايه !!
مديحة : بقولك السر اللى خبيته عنك
شريفة بزعيق : وخبيته ليه وليه جاية بعد ٢٥ سنة تقوليه
مديحة : عشان انتِ ليكي حق فى ابوكى الحقيقى
شريفة بدموع : انتِ فاهمه انتِ عملتى فيا ايه !! ازاى عيزانى اصدق ان الرجل اللى عشت معاه ٢٢ سنة من عمرى مش ابويا ، الرجل اللى صرف عليا وتعب عشانى وادانى حنية الدنيا كلها ، الرجل اللى كنت بنام فى حضنه وبغير هدومى قدامه ولو اتعريت بستخبى فيه مش ابويا
مديحة : عشان هى دى الحقيقة اللى لازم تتقبليها وتتعايشى معاها
شريفة بعصبيه : اتقبل ان الرجل اللى رامانى انا وانتِ ٢٥ سنة ابويا
مديحة : انتِ ليكي حق فيه وفى فلوسه متبقيش هبلة
(. سابت شريفة امها ودخلت اوضتها وقفلت على نفسها .)
مديحة لنفسها >> يارب استرها
(. بعد شوية اتصل مؤمن على التليفون الارضى .)
مؤمن : الو اذيك يا طنط
مديحة : الحمد لله يا ابنى
مؤمن : هى شريفة فين بتصل على موبايلها مبتردش
مديحة : هى نايمه شوية
مؤمن : طيب هتصحى امتى
مديحة : هو فى حاجة ضرورية
مؤمن : اه حاجة بخصوص الشقة كنت عايز اسألها على حاجة فيها عشان العمال متعطلين
مديحة : طيب ثوانى
(. راحت مديحة خبطت على اوضة شريفة .)
مديحة : افتحى يا شريفة مؤمن عايزك فى حاجة مهمة
شريفة : مش عايزة اكلم حد
مديحة : طيب اقوله ايه
شريفة : هكلمه على موبايله
مديحة لـ مؤمن >> بتقول هتكلمك على موبايلك
مؤمن : ماشى يا طنط متشكر
(. اتصلت شريفة على موبايل مؤمن .)
مؤمن : ايوة يا شيفة بقولك
شريفة : خير
مؤمن : مال صوتك يا حبيبتى
شريفة : مفيش
مؤمن : لا فيكي حاجة
شريفة عيطت
مؤمن : الله فيكي ايه مالك خضتيني عليكي
شريفة : ممكن اشوفك دلوقتى
مؤمن : خلاص هغير واجيلك على طول
شريفة : لا مش هينفع نتقابل هنا
مؤمن : طيب هعدى عليكي ونروح نقعد فى اى حته
شريفة : ماشى هستناك (وقفلوا)
(. غيرت شريفة هدومها وخرجت عشان تستنى مؤمن تحت .)
مديحة : رايحة فين يا بنتى
شريفة : خارجة مع مؤمن
مديحة : انتِ قولتيله حاجة
(. مردتش شريفة على امها ونزلت واستنيت مؤمن تحت وعدى عليها وراحو كافيه .)
*_____________________________________________**___________________________*
فى احدى الكافيهات .......
مؤمن : مالك يا شريفة فيكي ايه يا حبيبتى
شريفة : فاكر لما قولتلك انا رايحة مع ماما نزور جوز واحده صاحبتها
مؤمن : اه فاكر
شريفة : الرجل ده مش جوز صاحبة ماما
مؤمن : امال يبقى مين
شريفة : يبقى ابويا
مؤمن : ابوكى !! احنا مش دافنين ابوكى من تلت سنين طلع عايش يعنى ولا ايه مش فاهم
شريفة : انا هفهمك كل حاجة
مؤمن : فهمينى
شريفة : حكت لـ مؤمن اللى امها قالتهولها
مؤمن : ايه الكلام ده !! ده ولا كانه فيلم عربى
شريفة : انا زيك مش قادرة اصدق ماما ولا استوعب كلامها
مؤمن : بس هى هتكدب عليكي ليه
شريفة : ايه اللى خلاها اصلاً تقولى بعد العمر ده كله
مؤمن : جايز يكون ابوكى عايز يشوفك وبعدين هى بتقول ان ليكي ميراث
شريفة : انا مش مقتنعه يا مؤمن حاسة ان فى حاجة غلط
مؤمن : بصى يا حبيبتى اكيد صعب عليكي تستوعبى حاجة زى كده واكيد برضه مش مطلوب منك تصحى الصبح تتقبلى رجل غريب عليكي انه ابوكى بس ده واقع
شريفة : يعنى اعمل ايه يا مؤمن
مؤمن : حاولى تهدى وتفكرى كويس
شريفة : افكر فى ايه
مؤمن : تفكرى فى ان فى اب عايز يشوف بنته اللى اتحرم منها ٢٥ سنة كمان تفكرى فى حقك فيه
شريفة : يا سلام
مؤمن : بصى انتِ تريحي مخك شوية وحاولى تهدى ويومين كده وتروحى تزوريه جايز لما تشوفيه شعورك يتغير
شريفة : اوعدنى ان عمرك ما هتسبنى
مؤمن(يمسك ايدها) : انا بعشقك يا شيفة وعمرى ما هسيبك
شريفة : ربنا ما يحرمنى منك
*_____________________________________________**___________________________*
بعد كام يوم فى بيت شريفة .......
(. شريفة كانت مبتتكلمش مع امها خالص وحابسة نفسها فى الاوضة والنهاردة اول يوم تخرج تتكلم مع امها .)
شريفة : ماما
مديحة : ايوة يا حبيبة ماما
شريفة : انا عايزة اروح ازور ............
مديحة : تزورى مين يا حبيبتى !!
شريفة : بـا ..... اللى اسمه عمر ابو الوفى ده
مديحة : انتِ بتتكلمى جد يا شريفة
شريفة : ايوة
مديحة : عايزة تروحى امتى
شريفة : اى وقت
مديحة : هيفرح بيكي اوى يا شيفه
شريفة : طيب
مديحة : انا كنت مفهماه ان احنا خلفنا ولد ومات
شريفة : ليه عملتى كده
مديحة : خوفت ياخدك منى ، هو لحد دلوقتى فاكر انك ولد هيتفاجئ لما يعرف انك بنته
شريفة(وهى داخله اوضتها) : مش هيتفاجئ اكتر منى
مديحة لنفسها >> يارب استرها وعديها على خير
*_____________________________________________**___________________________*
بعد يومين فى المستشفى ......
(. راحت مديحة وشريفة لـ عمر المستشفى .)
شريفة : انا هستنى فى استقبال الجناح
مديحة : ليه
شريفة : لحد ما تعرفيه انى بنت مش ولد
مديحة : حاضر
شريفة : ومتخلهوش يلمسنى خالص
مديحة : يا حبيبتى ده ابوكى
شريفة : لحد ما اتعود عليه
مديحة : ماشى
(. خبطت شريفة ومديحة ولقيوا زياد قاعد بيتفرج على التلفزيون .)
زياد : اهلاً وسهلاً اتفضلوا
مديحة : متشكرة ، بابا صاحى
زياد : ولو مش صاحى نصحيه
مديحة : هههه طيب هدخله
زياد : اتفضلى
شريفة : وانا بعد اذنك هقعد معاك هنا لحد ما ماما تدخل لـ باباك
زياد : ده انا اتمنى
شريفة : متشكرة
زياد : انتِ اسمك ايه
شريفة : مانا قولتلك قبل كده شريفة
زياد : بس مقولتليش كام سنة
شريفة : شهرين واكمل ٢٥ سنة
زياد : اوووبا
شريفة : فى ايه
زياد : اصلك اكبر منى بحوالى سنة ونص
شريفة : اهاا اوكى
زياد : ومرتبطة بقى يا شريفة
شريفة : مخطوبة
زياد : يا بخته
شريفة : ما تحترم نفسك بقى
زياد : خلاص يا ستى
(. سكت زياد شوية وشريفة سرحت وفكرت فى حاجات كتير وفجأة قامت ومشيت .)
زياد : يا شريفة يا شريفة !! ايه المجنونة دى
__**__**__**__
فى الجهة التانية كانت مديحة مع عمر .....
مديحة : شريفة معايا بره
عمر : شريفة مين
مديحة : شريفة بنتك
عمر : انتِ مش قولتى انه ولد
مديحة : انا خليت فوزية تقولك انه ولد عشان لو شوفت شريفة فى يوم من الايام متشكش انها بنتك ولما طلبت تشوفه قولت لـ فوزية تقولك انه مات
عمر : يعنى احنا خلفنا بنت
مديحة : اه وسميتها شريفة ، خلصت كلية السن ومخطوبة كمان
عمر : ما شاء الله يا مديحة تصدقى انا فرحت انها بنت اكتر
مديحة : انا قولتلها من ساعة اخر مرة كنت عندك وهى اعتزلتنى خالص
عمر : الصدمة مش قليلة يا مديحة عشان تستوعبها فى يوم وليلة ، فجأة كده بتقولى لها ان ابوكى مش ابوكى
مديحة : انا عارفة والله
عمر : طيب هى فين هاتيها نفسى اشوفها
مديحة : معلش يا عمر لما تشوفها متحضنهاش لحد بس ما تتعود انك ابوها
عمر بلهفة : فاهم فاهم بس اشوفها بس قدامى ناديلها بسرعه
مديحة : حاضر
(. خرجت مديحة لقيت شريفة مش موجودة .)
مديحة : شريفة راحت فين
زياد : فجأة كده قامت ومشيت
مديحة : انت ضايقتها
زياد : لا والله يا طنط
عمر من جوه >> فى ايه يا مديحة
مديحة : شريفة مشيت هروح الحقها
عمر بحزن : يا خسارة كان نفسى اشوفها
مديحة : انا ماشية (ومشيت)
زياد لـ عمر >> مين دول يا بابا وليه كل شوية يزوروك
عمر : زى ما قولت قبل كده صاحبة امك
زياد : وليه كل شوية بتزورك
عمر : انت بتحقق معايا يا واد انت روح للدكتور شوفه واسأله هخرج امتى من المخروبة دى
زياد : حاضر
*_____________________________________________**___________________________*
فى بيت مديحة .......
مديحة : انتِ مشيتى ليه
شريفة : مش قادرة مش قادرة يا ماما
مديحة : مش قادرة ايه
شريفة : مش قادرة اصدق او اقتنع انه ابويا هتعامل معاه ازاى
مديحة : هى دى الحقيقة وهو ده الواقع ده ابوكى ودول اخواتك
شريفة : اهاا اخواتى قولتيلي بقى (بزعيق) اخويا ده كان بيعاكسنى مشوفتيش نظراته ليا عامله ازاى
مديحة : بس لما يعرف انك اخته الوضع هيختلف
شريفة : قصدك الدنيا هتولع
مديحة : ليه بتقولى كده
شريفة : عايزة تقنعينى ان العيلة اللى رفضتك من ٢٥ سنة هتقبلنى انا دلوقتى
مديحة : دلوقتى ابوكى كبر وبقى مسئول عن كلمته
شريفة : قصدك بقى راجل كبير على فراش الموت والدنيا هتولع عشان الميراث اللى انا هشارك ولادهم فيه
مديحة : حتى لو الدنيا ولعت ده حقك
شريفة : وحقى ده ليه متمسكتيش بيه من ٢٥ سنة ليه وافقتى انك تطلقى ليه اساساً اتجوزتيه
مديحة : اهو ده اللى حصل
شريفة : ليه قولتيلى ان ابويا مش ابويا !! ليه دلوقتى قولتيلي !! ليه عملتى فيا كده !!
مديحة : كان لازم تعرفى السر ده عشان انتِ ليكي حق فيه وهو له حق فيكي
شريفة : بصى انا لا عايزة الراجل ده ولا عايزة حقى ولا حتى عايزة اخواتى
مديحة : وميراثك
شريفة بعصبية : مش عايزة حاجة مش عايزة اى حاجة ارحميني بقى (ودخلت اوضتها)
مديحة : ربنا يهديكى يا شريفة
*_____________________________________________**___________________________*
تانى يوم فى احدى الكافيهات .....
مؤمن : ليه مشيتى يا شريفة كنتى ادخلى شوفيه
شريفة : معرفش يا مؤمن انا لقيت نفسى بقوم
مؤمن : طيب اهدى انتِ هتحتاجى وقت لحد ما تتقبلى الوضع
شريفة : لا خلاص يا مؤمن انا مش هتقبل الوضع
مؤمن : قصدك ايه
شريفة : قصدى انى هعتبر ان كل ده محصلش وهكمل حياتى عادى انا شريفة مصطفى المنياوى
مؤمن : طيب وهو ذنبه ايه
شريفة : ذنبه انه رمانى من ٢٥ سنة وسابنى لـ رجل تانى اتكتب باسمه ويربيني
مؤمن : انسان وغلط زى اى انسان ربنا بيسامح انتِ مش هتسامح
شريفة : انا مش هسامح نفسى يوم واحد لو غيرت اسمى لـ شريفة عمر ابو الوفى وشيلت اسم الرجل اللى ربانى وشال همى وتعب معايا وصرف عليا
مؤمن : ده ابوكى اللى رباكى وده ابوكى اللى خلفك ده له حق عليكي وده له حق عليكي
شريفة : ربنا يسهل بقى
مؤمن : لا يا شريفة لازم تروحيله وتزوريه وكمان لو ينفع تعيشي معاه عيشي معاه لحد ما نتجوز
شريفة : يا سلام
مؤمن : هو ده الكلام الصح وكلام المنطق والعقل
شريفة : يا مؤمن حط نفسك مكانى
مؤمن : يا حبيبتى حطيت نفسى مكانك وحطيت نفسى برضه مكان اب اتحرم من بنته
شريفة : يعنى انت عايزنى اعمل ايه
مؤمن : روحى بس زوريه هو ده بس اللى مطلوب منك حالياً
شريفة : هروح بس لما اتأكد من حاجة الاول
مؤمن : حاجة ايه
شريفة : هقولك لما اتأكد منها الاول
مؤمن : من امتى وانتِ بتخبى عليا يا شيفة
شريفة : متضغطش عليا يا مؤمن انا مش ناقصة
مؤمن : خلاص يا حبيبتى ماشى
*_____________________________________________**___________________________*
بعد كام يوم .....
(. شريفة رجعت من شغلها .)
شريفة : ماما يا ماما انتِ فين
مديحة : انا فى المطبخ يا شيفة
(. راحت لها المطبخ وطفت عيون البوتاجاز .)
مديحة : فى ايه
شريفة : سيبى اللى فى ايدك يالا هنروح مشوار مهم
مديحة : مشوار ايه
شريفة : البسى يالا وهقولك وانتِ بتلبسى
مديحة : حاضر
(. لبست مديحة ونزلوا ووقفوا تاكسى .)
مديحة : انتِ رايحة لابوكى
شريفة : اه
مديحة : مقولتيش ليه واحنا فوق
شريفة : اللى حصل بقى
__**__**__**__**__
فى المستشفى .....
(. خبطت شريفة بس دخلوا ومالقيوش حد موجود .)
مديحة : الظاهر اخواتك مش هنا
شريفة : احسن برضه
(. دخلوا وخبطوا على عمر ودخلوا وكان معاه الممرضة بتديله الحقنة وخرجت .)
عمر بلهفة : شريفة صح
مديحة : اه هى
عمر : شريفة بنتى
شريفة : اه انا شريفة بس مش بنتك
مديحة وعمر : ايه !!
شريفة : انا شريفة مصطفى المنياوى يعنى مش بنتك
عمر : ايوة يا حبيبتى ده على الورق بس .......
شريفة تقاطعه : مفيش بس الست دى اللى هى امى كدبت عليك انا مش بنتك
مديحة : ايه يا شريفة اللى بتقوليه ده
شريفة : بقول الحقيقة يا مديحة هانم انا مش بنته وانتِ عارفة كويس انى مش بنته
عمر : ايه الكلام ده يا مديحة
مديحة : والله ما فاهمه حاجة
شريفة بزعيق : اللى سمعته يا عمر بيه الست دى كدبت عليك عشان تلهف منك ميراث وفلوس لكن انا مش بنتك وانا متأكده من كلامى ده
عمر : وايه اللى يأكد كلامك
شريفة : .........................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
0 التعليقات :
إرسال تعليق