الحلقة الرابعة
جزء من حلقة سابقة :
شريفة بزعيق : اللى سمعته يا عمر بيه الست دى كدبت عليك عشان تلهف منك ميراث وفلوس لكن انا مش بنتك وانا متأكده من كلامى ده
عمر : وايه اللى يأكد كلامك
شريفة : .........................
*_____________________________________________**___________________________*
شريفة : انا روحت السجل المدنى وطلع عينى هناك ودفعت فلوس قد كده عشان بس الاقى قسيمة جواز او طلاق باساميكم
عمر : قسيمة !!
شريفة : ايوة مفيش اى قسايم ليكوا انتوا الاتنين ولو عايز تتأكد روح بنفسك السجل المدنى وطلعلى قسيمة باساميكم ، الست دى كدابة
عمر : احترمى نفسك واتكلمى عن امك كويس انا اتجوزت الست دى وواثق انى اتجوزتها
شريفة : بقولك مفيش اى قسيمة جواز او طلاق بينكم
عمر : عشان مكنش فيه ..............
(. راحت مديحة لـ عمر وحطت ايدها على بوؤه .)
مديحة : لا يا عمر ابوس ايدك متكملش
عمر : لازم تعرف الحقيقة
مديحة : هى دى الحقيقة شريفة مش بنتك وانا كنت بضحك عليك
شريفة بتوتر : فى ايه ؟
مديحة : مفيش مفيش يالا بينا
عمر : استنوا هنا ، الست دى كانت مراتى وانتِ بنتى بس احنا كنا متجوزين عرفى
شريفة مصدومة : متجوزين ايه !!
(. عمر ومديحة بيبصوا لبعض وشريفة مصدومه ودموعها محبوسه .)
شريفة : ما ترودوا عليا كنتوا متجوزين ايه !!
عمر : عرفى ، كنا صغيرين وغلطنا وبعدين ...........
(. شريفة قاطعته وهجمت على امها ومسكتها من هدومها .)
شريفة بدموع : كنتى متجوزاه عرفى !! عرفى ، (شبه منهارة وبصوت عالى) خلفتيني فى الحرام ، خلفتيني فى الحرام يا ماما ليه عملتى فيا كده
مديحة : اهدى يا حبيبتى
(. وبتحاول تحضنها بس شريفة زقتها وقعدت على الارض وكانت منهارة تماماً .)
شريفة : يعنى انا بنت زنا خلفتونى فى الحرام ، (بصوت عالى) ليه عملتوا كده !! بتخلفونى فى الحرام ليه مموتنيش ليه !! ليه سبتينى عايشة لليوم اللى اكتشف فيه ان امى وابويا زوانى وخلفونى فى الحرم ليه
(. وبدأت شريفة تنهار وتكسر فى الاوضة وعمر طلب الدكتور وجه وادى لـ شريفة حقنه مهدئة خلتها تنام ونقلوها اوضة تانية .)
__**__**__**__
(. هنا جه اياد وزياد .)
اياد : ايه اللى بهدل الاوضة كده
عمر : الممرضة قالت هيبعتوا حد من بتوع النضافة يعملها
زياد : ايوه بس ايه اللى عملها كده
عمر : اقعدوا عايز اتكلم معاكوا فى موضوع
اياد وزياد : خير يا بابا
عمر : من حوالى ٢٥ سنة اتجوزوت واحدة فى السر
زياد : ايه ده يا بوب انتوا كان على ايامكم الكلام ده
اياد : بطل تهريج
عمر : المهم انى اهلى رفضوا انى اتجوزها وسيبتها وهى حامل
اياد : وبعدين
عمر : انتوا ليكوا اخت
زياد واياد : نعم !!
عمر : عارفين الست اللى جاتلى هنا اكتر من مرة ومعاها بنتها
زياد : الفورتيكة
عمر : ايه !!
اياد : زياد بيهزر يا بابا
عمر : البنت دى تبقى اختكم
(. زياد واياد من الصدمة بصوا لبعض ومعرفوش يردوا .)
عمر : هى كانت هنا هى وامها ولما عرفت انها بنتى جاتلها حالة انهيار وحصل اللى انتوا شايفينه ده
اياد : يا بابا الكلام اللى حضرتك بتقوله ده مش منطقى
زياد : ايوة يا بوب ومبيحصلش الا فى الافلام والمسلسلات (امال احنا فى ايه يا اخويا :D)
عمر : اهو ده اللى حصل ، انتوا ليكوا اخت وهى دى الحقيقة والواقع اللى لازم تتقبلوه واتفضلوا بقى عشان عايز استريح شوية (وخرجوا)
__**__**__**__**__
زياد : ايه يا اياد الكلام ده انن مصدق او مقتنع
اياد : يعنى ابوك هيكدب يا زيزو
زياد : مش لازم يكون ابوك هو اللى بيكدب ممكن تكون الست دى هى اللى بتكدب
اياد : يا زياد خلى تفكيرك منطقى
زياد : مش فاهم
اياد : يعنى اكيد ابوك اتجوزها فعلاً من ٢٥ سنة وهو قال كده بنفسه
زياد : ايوة اتجوزها وكانت حامل ماشى بس مش معنى كده ان البنت دى تبقى بنته
اياد : انت قصدك ان الست دى ممكن تبقى بتشتغل ابوك
زياد : ممكن جداً
اياد : امممممممم عندك حق وكمان هى كانت فين من ٢٥ سنة ليه ظهرت دلوقتى
زياد : عشان عرفت ان ابوك تعبان وحالته الصحية خطيرة ولو لا قدر الله حصله حاجة تلهف من الميراث
اياد : وان محصلوش حاجة ابوك يصعبوا عليه ويحس بالذنب ويعيشوا فى خيره
زياد : ايوة تمام كده شغل مخك معايا
اياد : بس فى تحليل ممكن ممكن يثبت اذا كانت هى بنته ولا لا
زياد : ما هما ممكن يزوروا نتيجة التحليل
اياد : بص ابوك يصحى ونسأله عمل تحليل ولا لا
زياد : ماشى
*_____________________________________________**___________________________*
فى بيت مؤمن .....
سميرة : مالك يا مؤمن
مؤمن : بتصل على شريفة مبتردش
سميرة : طيب كلمها على تليفون البيت
مؤمن : برضه مبتردش
سميرة : خير اللهم اجعله خير
مؤمن : مش عارف انا قلقت جداً
سميرة : لا يا حبيبي خير ان شاء الله يمكن نايمين ولا حاجة
مؤمن : لا اكيد مش نايمه لانها قالتلى هتروح مشوار مع مامتها وبعدها هنخرج انا وهى عشان نروح نشوف كتالوجات العفش
سميرة : انت هتقلقنى ليه طيب جرب تانى انت على موبايلها وانا هجرب على الارضى
مؤمن : ماشى
بعد ثوانى ...
مؤمن : مبتردش برضه
سميرة(بتقفل الخط) : خير اللهم اجعله خير هيكونوا راحوا فين
مؤمن : ماهى شريفة مبتروحش فى حتة الا لما تقولى
سميرة : طيب ما تتصل على موبايل مامتها
مؤمن : ايوة صح انا ازاى مفكرتش فى حاجة زى كده
واتصل مؤمن على مديحة ....
مؤمن : ايوة يا طنط انتوا فين
مديحة : خير يا ابنى فى ايه
مؤمن : انا بتصل بـ شريفة مبتردش وعلى التليفون الارضى برضه محدش بيرد
مديحة لنفسها >> طيب اقوله ايه بس !!
مؤمن : يا طنط حضرتك سمعانى
مديحة : شريفة نايمه
مؤمن : احنا كنا المفروض نخرج نروح نشوف كتالوجات العفش
مديحة : اصل احنا كنا فى مشوار وهى صدعت وتعبت وجت نامت اول ما تصحى هخليها تكلمك
مؤمن : خلاص ماشى يا طنط (وقفوا)
سميرة : ها فى ايه
مؤمن : بتقول نايمه
سميرة : طيب خير الحمد لله
مؤمن لنفسه >> بس لو طنط مديحة فى البيت ليه مبتردش على التليفون الارضى !!
*_____________________________________________**___________________________*
فى المستشفى .....
(. فاقت شريفة من الحقنة المهدئة ولقيت امها جنبها .)
مديحة : انتِ كويسة يا حبيبتى
شريفة(بتلف وشها الناحية التانية)
مديحة : انا اسفة يا شريفة حقك عليا مكنش قصدى اعمل فيكي كده بس هى الظروف جت كده
شريفة : مش عايزة اشوفك
مديحة : ايه !!
شريفة : اللى سمعتيه اخرجى مش عايزة اشوفك
مديحة : انا امك يا شريفة
شريفة : ام خاطية ومش شريفة
مديحة بدموع : ماشى يا شريفة هخرج (وراحت ناحية الباب)
شريفة : استنى
مديحة : نعم !!
شريفة : عايزة اعرف ازاى مصطفى المنياوى وافق يكتبنى باسمه
مديحة بتوتر : امم اصله كان .. هو ....
شريفة : متخافيش مش هتصدم يعنى هو فى صدمة اكبر من انى بنت زنا
مديحة : هو كان فاكرك بنته
شريفة : ايه !! بنته يعنى فهمتى انى بنته ازاى !!
مديحة : انا قبل جوازى منه بتلت ايام عملت عمليه رجعتنى بنت تانى
شريفة : وانتوا كان على ايامكوا البلاوى دى
مديحة : وكنت حامل فى شهر ونص فيكي وهو سافر تلت سنين يعنى رجع لقاكى عندك سنتين وشوية
شريفة : لعبتيها صح يا مديحة هانم
مديحة : يا شريفة انا كنت صغيره وفعلاً ابوكى كان هيتجوزنى بس اهله رفضه
شريفة : الشرف مفهوش اعذار يا مدام
(. هنا مؤمن اتصل على مديحة .)
مديحة : مؤمن بيتصل ومش عارفة اقوله ايه
شريفة : ردى عليه واديله العنوان وخليه يجي
مديحة : يجي فين انتِ هتقوليله ايه
شريفة : هقوله الحقيقة عشان يختار يكمل معايا ولا لا
مديحة : انتِ عايزة تفضحيني
شريفة : انتِ اللى فضحتينا كلنا ردى عليه لو سمحتى
مديحة : ايوة يا مؤمن
مؤمن : انتوا فين يا طنط انا بضرب الجرس عندكم ومحدش بيفتح
مديحة : احنا فى المستشفى
مؤمن : ليه طنط خير
مديحة : تعالى لـ شريفة احنا فى مستشفى دار الفؤاد
مؤمن باستغراب : دار الفؤاد !!!!!!!
مديحة : احنا مستنينك (وقفلت)
مديحة لـ شريفة >> ابوس ايدك متقولوش الحقيقة احنا كده هنتفضح
شريفة : لازم يعرف الحقيقة ويشوف عايز يتجوز بنت الخطيئة ولا لا ومتقلقيش مؤمن مش هيقول لحد
مديحة : يا بنتى مش عايزين فضايح
شريفة : انتِ بالذات متتكلميش عن الفضايح لان انتِ سبب كل حاجة
__**__**__**__**__
فى جناح عمر .........
زياد : كنا عايزين انا واياد نتكلم معاك فى موضوع
عمر : خير
زياد : ما تتكلم يا اياد
اياد : بابا هو حضرتك متأكد ان البنت دى بنتك
عمر : اه طبعاً
زياد : وايه اللى أكد لحضرتك
عمر : مش فاهم ؟
اياد : يعنى ممكن فعلاً حضرتك تكون اتجوزت الست دى وفعلاً ممكن تكون كانت حامل بس حضرتك قولت انك سيبتها وهى حامل يعنى متعرفش هى خلفت بنت ولا ولد
زياد : يعنى حضرتك شوفت الست دى بعد ٢٥ سنة من جوازكوا
اياد : يعنى ممكن تكون جابت اى حد وقالت انه ابنك او بنتك عشان تاخد فلوس منك او عشان تنتقم من حضرتك
عمر : بس ...............
اياد يقاطعه : بابا احنا مبنكدبش حضرتك ولا بنكدبهم بس احنا لازم نتأكد ونقطع الشك باليقين
عمر : اللى هو ازاى
زياد : ايه يا بوب يعنى عارف الجواز العرفى ومش عارف تحليل الـ DNA
عمر : احترم نفسك يا واد انت
اياد : هو قصده اننا نعمل تحليل DNA عشان نتأكد انها اختنا
عمر : بس هى حالتها متسمحش اننا نشكك ونكدبها
زياد : مش هى محجوزة هنا فى المستشفى
عمر : ايوة
اياد : يبقى الدكتور ياخد منها عينة دم من غير ما تحس ويحلله ويجبلنا نتيجة التحليل
زياد : لو هى بنتك واختنا مش هنعرفهم حاجة بس لو التحليل قال غير كده يبقى لازم نواجهم
عمر : عندكم حق ماشى
اياد : احنا هنقول للدكتور
عمر : ماشى يا ولاد
(. راح اياد وزياد وطلبوا من الدكتور ياخد من شريفة عينة دم لـ تحليل الـ DNA من غير ما تعرف وخد عينة من عمر .)
__**__**__**__
فى اوضة شريفة ....
(. خبط مؤمن ودخل وهو ملهوف على شريفة واول ما دخل خرجت مديحة .)
مؤمن : مالك يا حبيبتى خير
شريفة : انا كويسة يا حبيبي متقلقش عليا
مؤمن : امال انتِ هنا بتعملى ايه !! وايه اللى جابك المستشفى الغالية دى
شريفة : كنت بزور عمر ابو الوفى
مؤمن : ده باباكى
شريفة : ايوة
مؤمن : يعنى هو هنا
شريفة : ايوة
مؤمن : هو غنى اوى كده
شريفة : فوق ما تتصور
مؤمن : ما شاء الله
شريفة : انا عايزة احكيلك على حاجة مهمة بس ياريت تفضل بينى وبينك
مؤمن : حاجة ايه
شريفة : حكت لـ مؤمن قصة الجواز العرفى وازاى هى اتنسبت لـ مصطفى المنياوى
مؤمن مصدوم : ايه !! ايه اللى بتقوليه ده يا شريفة
(. هنا دخل الدكتور .)
الدكتور : اخبارك ايه دلوقتى
شريفة : كويسة الحمد لله
فحص الدكتور شريفة ..
الدكتور : لا تمام ضغطك مظبوط ايدك بقى
شريفة : حقنة ايه دى
الدكتور : دى حقنه فاضيه هاخد منك عينة دم
شريفة : ليه
الدكتور : شاكك ان عندك انميا وعايز اتأكد
شريفة : اهاا
(. خد الدكتور عينة الدم وخرج .)
شريفة : مؤمن يا مؤمن
مؤمن : ايوة يا شريفة
شريفة : قوم روح وفكر على مهلك ومش هزعل من اى قرار هتاخده
مؤمن : ماشى ومتخفيش مش هقول لحد سلام (وخرج)
(. خرجت شريفة من المستشفى بالليل ومرحتش شافت ابوها .)
*_____________________________________________**___________________________*
بعد كام يوم فى بيت شريفة .......
مديحة : يعنى انتِ هتفضلى مقطعانى كده كتير
شريفة مبتردش
مديحة : ردى عليا انا بكلمك
شريفة : عيزانى اقولك ايه
مديحة : اياً كان نوع الجواز انا فى النهاية امك ليا حق عليكي تعبت فيكي وشلت همك السنين اللى فاتت دى كلها فى الاخر ده جزائى
شريفة : ده جزاء خطيتك وذنبك سواء ناحيتى او ناحية الرجل اللى انتِ استغفلتيه وناحية ربنا
مديحة : على فكرة انا احسن من غيري ، كان ممكن اموتك اول ما تتولدى وكان ممكن ارميكي فى اى ملجأ وشوفى بقى الذل اللى على حق ، لكن انا قدرت اوفرلك نسب وقدرت اوفر لـ مصطفى بنت واخليه يحس بالابوة لانه اصلاً مكنش بيخلف
شريفة : يا بجاحتك يا شيخة انتِ ازاى قادرة تتكلمى اصلاً
مديحة : عشان مش عايزة اخسرك
شريفة : انتِ اصلاً خسرتى نفسك وخسرتى ربك من سنين
مديحة : يا شيخة كفاية بقى حرام عليكي
شريفة : الحرام ده انا معرفوش انتِ اللى بتعملى الحرام (ودخلت اوضتها)
(. قعدت مديحة مع نفسها تفتكر زمان .)
FLASH BACK
مصطفى : ديحة يا حبيبتى
مديحة : ايوة يا حبيبي
مصطفى : شريفة بقى عندها ست سنين وشوية ودخلت المدرسة
مديحة : اه ما شاء الله كبرت ربنل يبارك لنا فيها
مصطفى : مش عايزة تجيبي لها اخ او اخت
مديحة باتباك : اه اه طبعاً بس .........
مصطفى : بس ايه !!!
مديحة : انا مبخدش موانع للحمل من ساعة ولدت شريفة
مصطفى : ايه !! وكل ده محصلش حمل
مديحة : ماهو اصل !!
مصطفى : اصل ايه
مديحة : انا معدش ينفع اخلف
مصطفى : ليه !!
مديحة : وانا بولد فى شريفة الدكتور شال الرحم
مصطفى : لا اله الا الله خلاص يا حبيبتى الحمد لله ربنا يباركلنا فى شريفة
مديحة لنفسها >> الاحسن البسها لنفسى انا اربع سنين وانا مستنية الحمل ومحملتش يبقى اكيد هو مبيخلفش وبدل ما نروح نحلل يبقى الاحسن اقوله انى مبخلفش كده صح
*_____________________________________________**___________________________*
بعد كام يوم فى احدى الكافيهات .....
شريفة : كل ده يا مؤمن
مؤمن : انا كل ده بحاول استوعب الصدمة
شريفة : انا ماليش ذنب يا مؤمن فى اى حاجه
مؤمن : انا عارف انى مالكيش ذنب بس انا .....
شريفة : انت ايه
مؤمن : مينفعش نكمل يا شريفة
شريفة بدموع محبوسة : ليه يا مؤمن مش انت قولت انك بتحبنى وعمرك ما هتسبنى حتى بعد ما سمعت عن سعيد
مؤمن : بس دى امك يا شريفة جدة ولادى
شريفة : وانا ذنبى ايه
مؤمن : ذنبك انك بنتها
شريفة : ماشى يا مؤمن براحتك (ومشيت)
*_____________________________________________**___________________________*
فى مستشفى دار الفؤاد ......
(. اياد وزياد قاعدين مع عمر جوه وجه الدكتور عليهم .)
الدكتور : اخبار حضرتك ايه النهاردة
عمر : كويس الحمد لله
الدكتور : عندى لحضرتك خبر كويس
عمر : خير !!
الدكتور : هكتب لحضرتك خروج بعد بكرة
زياد واياد وعمر : بجد يا دكتور
الدكتور : اه ان شاء الله بس لازم يكون فى متابعه برضه
زياد : متقلقش يا دكتور هنجبله ممرضة فى البيت
اياد : اه ان شاء الله لو وصلت نعمله مستشفى جوه البيت هنعمله
عمر : ربنا يخليكوا ليا يا اولاد
الدكتور : اه صحيح نتيجة التحليل ظهرت (وخرج ورقة التحليل من جيب البالطو)
زياد : تحليل الـ DNA
الدكتور : اه
عمر : وايه الاخبار يا دكتور
الدكتور : .....................
ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
جميله الروايه
ردحذف